Ka Nupepa Kuokoa, Volume XIII, Number 13, 28 March 1874 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XIII. HELU 13.                                 HONOLULU, POAONO, MARAKI 28, 1874,

 

E PAU NA PUPUPU KAHIKO

 

E pani me na Hale Laau!

 

PAPA, PAPA, PAFA!

 

O KELA ME KEIA ANO,

 

A ME

 

NA LAKO KUKULU HALE

 

O KELA ME KEIA ANO, MA KA

 

PA-PAPA O S. G. WAILA MA!

 

-KIHI O-

 

ALANUI PAPU me ALANUI MOIWAHINE,

no ke Kumukuai HAAHAA LOA!

ae like ka mui me

ka makemake.

 

LAAU NOUAIKI!

NA LAAU KAOLA,

            NA PAPA MANOANOA,

                        NA PAPA HELE,

                                    NA KUA.

                                                AAHO,

                                                            AAHO LIILII, & c

LAAU ULAULA!

NA LAAU KAOLA,

            NA PAPA MANOANOA,

                        NA PAPA HELE,

                                    NA KUA,

                                                AAHO, POU,

                                                            AAHO LIILII,

                                                                        MOLINA, & c.

 

Pili Cida keokeo, Pili Laau ulaula,

Na Puka Hale, o na ano a pau,

Na Puka Aninui, o na ano a pau,

Na Olepelepe Puka, o na ano a pau,

 

Pepa Hale me na Lihili hi.

 

NA LAKA PUKA

NA AMI-PUKA,

            NA AMI-PUK A LIILII,

                        NA KUI NAO.

PENA, AILA-PENA, VANIKI,

WAI HOOMALOO.

 

PAAKAI Helu 1,

 

O PUULOA.

 

E lawe wale ia no ua mea i kuai ia mai kela Pa Papa aku a i kahi o ka mea kuai mai, ina ma ke kaona nei, a me na Awa o kela Paeaina e like me ka aolike.

 

Ala maanei ke keena o ka      

            MOKUMAHU "KILAUEA,"

                        L. Marphant, Kapena.

 

S.G. Waila ma. 614 3m

 

HE MOOLELO KAAO

-NO-

ROBIANA LO:

Ka Hiwahiwa o ke Koa.

HELU AKOLU O KA IKAIKA.

 

I unuhiia mai loko mai o ka Burke Arabia, mai ka

Olelo Beritania a ka Olelo Hawaii.

 

MAHELE III - HELU 113.

 

MA KEIA olelo a ka Alihikaua, aole no ia he mea e nele ai ka manaolana aua o na mea a pau, e loaa ke kulana kiekie, nolaila, ua hele kela a me keia me ka nana ole aku i kona hoa, a i loa no a ike pono aku ia Lo Hipa ma, pakela no ka hoi oe i ua mea he mama, o ia paukiki no ka ia o ka makamua la, a komo loa no iloko o ka eke talena, a pela aku no a hiki i ka haneri kanalima o ka poe i komo iloko o ka eke talena, aole no ia i hana ia aku e Lo Hipa ma, aka, i noho kanaka maikai wale ia aku no, aka,

"I hewa no i ka lele mua,"

e hele ia aku ai no la hoi paha ma ke ano hooainaininau a hoolaulea paha, ina no la hoi paha aole no hoi e hele ino loa ko lakou holomoku ana iloko o ka eke talena ana ole.

 

O ka Alihikaua nae a me na koa he kanalima pu me ia, aole no lakou i manao ua pau ko lakou poe i ka lilo i pio, no ka mea, ua ike mai no lakou i ka hele pololei ana a hiki ma kahi a Lo Hipa ma e noho ana, a o ka nalowale no ia, oiai ua alai ia mai ko lakou ike e ka lio, a nele ai lakou i ka ike ana i ka mea ma kela huli, a nolaila, ua manao lakou, ua lilo no la ke poo o Lo Hipa i ka mea mua, a nolaila, ua hahai wale aku no la kahi poe mahope, oiai aohe no hoi he ike ia aku a ka haualaoa ana mai.

 

A mamuli o ko lakou manao kuhihewa, ua hele aku lakou me ka hooponopono ole, me ka manao e lawe pio i ka lio, a e hana hoomainoino hoi i ke kino o Lo Hipa, me ka manao ua moku la ke poo i na koa mapu. Aia nae a hiki aku lakou ma kahi a Lo Hipa ma e noho, a nana aku ka hana, e noho mai ana no o Lo Hipa me na maka mohala maikai, aole hoi na helehelena o ke kaumaha maluna ona, a o ka lio e ku ana no, a o kahi mapu elele hoi, ku hooio ae la oia ma ka aoao o ka lio.

 

A no keia mea, paweo ae la na maka o ka Alihikaua, a kuemi hope mai la kona mau kapuaai, me ka manao e holo, aka, manao hou ae la oia, o hoohaahaaia auanie oia mai kana oihana ae, nolaila, hoao ae la oia i ka hele ana'ku imua, ma ke kauoha ana ae i ke koena o ka poe me ia, e lele pualu aku i ka manawa hookahi maluna o Lo Hipa ma. Aia nae ia lakou i lele aku ai, o ka palemo aku la no ia noho ana iloko o ka eke talena, "pau pulu aohe lau e kanu ai."

 

O na mapu nae e noho ana ma ko lakou mau hale lua, ike mai la lakou i ka nalowale honua ana o ka Alihikaua a me ka poe me ia, huliamahi mai la lakou me ka manao e lanakila ana lakou maluna o na mamo a Adamu, aka, no ko lakou ike ole i ka lakou mea e hana ai, lele naaupo mai la lakou maluna o Lo Hipa wa.

 

Mamua ae nae o ko lakou hoao ana e lele mai, a mamuli hoi o ka mana o ka olelo a Lo Hipa, ua hoano e ia ko lakou mau noonoo, a nolaila, ua ike ole kela a me keia i kana mea e hana ai, nolaila, ua lele aku a lele mai kela a me keia mea maluna o kona hoa iho, a ua pau no lakou i ka make "ia lakou hooi-a." A hu ae la ka aka a kahi mapu elele. A no keia mea, ninau hoomahua aku la o Lo Hipa i kahi mapu elele, Ea, pela iho la no ke kaua ana ma ko oukou aupuni nei, ina e manao ana e kaua me ka enemi, alaila, e hakaka no oukou me oukou iho a pau no oukou i ka make, a o ka enemi hoi a oukou i manao aku ai e make, noho nani wale mai no kela me ka luhi ole, a i @ no kela he lanakila, he lanakila ka hoi ko oukou naaupo, a make no oukou ia oukou iho. Pane mai nae kahi mapu elele me ka oiaio ku i ka hoohaahaa, E kuu haku, o makou kau poe kauwa, he poe manao lokahi, he poe koa lanakila, aohe kipi e pakele ke komo mai iloko nei, e make ana no ia, a o kona poo, e malamaia ana ia i mea hoikeike makahiki na ka Alihikaua imua o ka Ahaolelo. Aka, ma keia la, ke haohao nei kuu manao, ma kuu ike ana aku i ke ano o kuu mau hoa, ua ano e loa ka lakou mau hana nolaila, ua noonoo nui au, a ua maopopo no ia'u, ke ano, a nolaila, aole au e hookamani i ka olelo ae, aia ma ou la ka mea i ano e ai ka manao o keia lahui, no ka mea, ua maopopo no ia'u, o ka mana o kau olelo, ka mea i loaa ai o keia poino i kuu lahui, nolaila, o ka mea i oleloia no na mamo a Adamu, aohe no ia he mea e nele ai, no ka mea, ua kumaka iho nei ko'u ike ana ia oe. Pane aku hoi o Lo Hipa, E kuu makamaka, ua ike no oe, a o kaua pu iho nei no hoi maanei, aole no oe i lohe mai nei, ua owaka ae kuu waha, a olelo ae, e hoanoe iho i ka manao o keia poe mapu, i pepehi ai no lakou ia lakou iho. Ua ike no oe, o ka naaupo mai a oe a ia lakou, ka mea nana i pepehi ia lakou iho; a ina no hoi aole oe i komo mai iloko o maua, alaila, o oe no la ka lehua mua, a he haluku wale ana aku no ko lakou nei, aole hoi e hihi, kau e ka haili iluna ou, a komo honua mai la iloko o maua, a loaa iho la he puuhonua nou e pakele ai. Aole no hoi paha oe i poina, ua hanaia oukou he mea uhane ole, a o ko oukou make a me ko oukou ola, aia no ia i ka mea i hana uhane ia e like me a'u nei.

 

Ma keia mau olelo a Lo Hipa, noonoo iho la ua wahi mapu nei, a i mai, Ina ua hewa wau ma keia olelo ana, e kala mai, no ka mea, ua kuhihewa au ma ia olelo ana, a e loaa ia'u ka pomaikai ma ka oiaio o kau mau olelo, a hiki i ko'u hopena.

 

A no keia poino nui i ili iho maluna o na mapu, ua ili iho la ka maka'u maluna o na mea a pau, a emi hope aku la lakou iloko o ko lakou mau hale lua, me he puhi la i emi aku iloko o ka lua, mahope iho o ko lakou lapa ana mai i ka maunu i kupalu ia aku ia lakou Nolaila, ua haule ino ko lakou manaolana no ka lanakila, a e kali wale ana no lakou, o ka pahola aku o ke ahulau a ka make maluna o lakou, no ka mea, ua ike no lakou, aole e hiki ia lakou ke ku aku imua o ka mamo a Adamu a kue aku, i hoihoiia mai ai ko lakou mau pono, i ole ai lakou e noho malalo o ka hoomalu ana a ka mamo a Adamu.

 

Aka, o keia noonoo ana nae o lakou, aole no ia i pololei, no ka mea, aole no ia o ko Lo Hipa manao, o ka lawe ana ae a nana e hooponopono i ke aupuni, a oia la ke kumu o kona luku ana i na mapu. Aole pela, no ka mea, o keia hana ana a Lo Hipa, he pale ana no ia nona iho, aole me ka manao e lawe ae i ke aupuni malalo o kana hoomalu ana, a e hoonele aku i ka Moi nona ke aupuni a me ka lahui. A o keia manao haku o ka lahui, ua ulu wale ae la no ia a pala kahuki iho la.

 

Mahope iho o ka noho malu ana o na mea a pau no ka maka'u, holoholo hookano ae la kahi mapu elele imua o kona poe hoa mapu, a ua hiki ole nae ia lakou ke pane mai ia ianei, no ka mea, ua hele iho la keia a "Kapukapu na maka o Puna i ke'kua, Aohe ike wale iho i na hoa mapu,." no ka mea, ua hoomaopopo iho no oia, e loaa ana iaia ke kulana hanohano, kahi ana i kau nui ai i ua la i hala ae.

 

A na ka iini a me ka manao wiwo ole o ua wahi mapu nei i alakai aku ia Lo Hipa a hiki imua o ka Moiwahine, oiai ua hele ka puu a maloo, no ke ake nui e ike i na mamo a Adamu.

 

Mamua ae nae o ka hookipa ia ana o Lo Hipa me ka maluhia, ua komo iho la ka manao kanalua no kahi mapu elele, nolaila, nonoi aku la oia i ko Lo Hipa lokomaikai, i ka i ana aku, Mai kaumaha ka manao o kuu haku. no ka mea, o kahi a kaua e ku nei, a me keia wahi a pau loa, he kapu loa i ka poe aole i ae ia e like me kaua nei, nolaila, e oluolu oe e noho iki maanei, a e mauna ae hoi au i kuu ola imua o ka Moiwahine nou, a ina e loaa ana ia'u ka pomaikai ma ka'u hele ana, e kii mai no au ia oe, a o ko kaua komo ana ka hoi ia iloko, a ina e hoi hou ole mai ana au imua ou, e hoomanao iho oe, ua halawai pu an me ka pilikia, alaila, nau no ia e hana aku e like me ka mea hiki ia oe, aka, mai poina nae oe i ka hoomanao ana mai no'u no ka mea, aole au i poina i ka hoomanao ana no ka lio au i hoola ai, a pela no hoi oe e hana ai no'u.

 

Aia nae i ua wahi mapu nei i hele ai a komo iloko, halawai mua mai la me ia nei ko ka Moiwahine Puuku, a ninau mai la, Heaha kau o onei? I aku la kahi mapu, E ae mai oe e alakai aku ia'u imua o ka Moiwahine, i hoike aku ai au i kuu manao imua ona, anoai o loaa paha iaia ka maliu ana mai, a ina aole, e haawi no au i kuu ola i paepae no kona mau kapuai. Pane mai ka Puuku, E oluolu no au ke haawi mai oe i na huaolelo ia'u, a na'u ia e lawe ae a hai aku i ka Moiwahine, a o ka mea i pono i kona manao, e hoi mai no au a hai aku ia oe; a ina hoi aole oe e haawi mai ana, alaila, e puka koke aku no oe iwaho ano, no ka mea, ua lohe no oe, owau wale no ka mea mana ma keia wahi. Pane aku kahi mapu, Mamua ae o kou hoopuka ana mai nei i kau mau huaolelo, ua ike mua aku nei no au i kou manao, aole no oe e ae mai ana i ka'u mea e manao nei, a o ua huaolelo la, he mea paakiki no ia, aole no hoi i kupono ia oe, no ka mea, o kou noonoo, he paupauaho wale, a nolaila i manao ai au, e waiho no a imua a ka opu ahonui a noonoo hohonu hoi, a nana no hoi e kaupaona like i ka pono a me ka hewa o ka mea a'u e manao nei, a imua au ona e hoi mai ai me ka nele a me ka pomaikai paha, aole hoi imua ou, ka mea i like na kulana me ko'u.

 

Ma keia olelo ka a ua wahi mapu nei, makena no ka hoi oe i ua mea he huhu o ka mapu Puuku, a i mai, Ina pela, e ku oe a hoi koke aku me ka nele, aole au e ae aku ana ia oe  e ike i na maka o ka Moiwahine, aole no hoi o'u makemake e lohe hou i kau mau olelo.

 

A no keia mau olelo, hoomanao ae la keia, aole oia e hiki ana imua o ka Moiwahine, no ka mea, o ua mapu Puuku nei, oia iho la no ka puka komo o ko ka Moiwahine hale lua, oiai aia wale no ma ona la e komo ai na mea a pau iloko, a ina oia e hoole, o ka nele iho la no ia. Nolaila, ku iki iho la oia me ka noonoo nui, a ulu ae la na manao ino iloko ona, i ka i ana iho, Ina wau e hoi ana a hiki imua o kuu aikane, a ina he mea hiki iaia ke hoolilo i keia aupuni a me na mea a pau maluna iho i mea ole, alaila, e ike ana oe i ka io o ka hana a ka mamo a Adamu, o i hoi auanei oe, nou iho kou hanohano, a ku no kau hookiekie.

 

Oiai nae ka Moiwahine e holoholo ana, ike mai la oia i ua wahi mapu nei, a kahea mai la i kona Puuku, E hookuu mai oe i kahi mapu e, i hele mai ai oia i o'u nei, no ka mea, he mau huaolelo maikai kana , ke hiki la oia ianei. Pane aku ka Puuku, Ae, he mau huaolelo io no kana, a o ka'u hoi ia i noi aku nei, o ke pakike mai nei no ia. Lawe ae la ka Moiwahine i ka pahi-umiumi (huhu) a i mai la, Aole no ou kulena o ka nonoi ana i kana mau olelo i manao ai paha na'u, eia  nae ia oe ke noi, me kou manao paha, aia ma ou la au e lohe ai i na huaolelo, he oiaio paha aole paha, a nolaila, ma keia hope aku, ina e helemai ana kekahi ma kuu inoa me na huaolelo a huaolelo ole paha, a he makemake nae e ike ia'u, e hookomo mai no, aole loa he mea mana e ae maloko nei o kuu aupuni, e hiki ai ke pale ae i ka oiaio o kuu olelo. (Aole i pau).

 

NA OLELO HOOKAAU!

 

I ninauia mai o Hepa. Owai ke kino kupapau i kanuia i ka onohi o ka i-a? O Kamehameha I., no ka mea, aia ma Kamakahonu, i Kailua, Hawaii kona wahi i kanuia ai.

 

Owai ka Lunakanawai hoopono mawaena o na mea lele? O Amakihi, no ka mea, nana i hai mua aku i ka hewa o Elepaio, i ka pao ana i ka huewai a ke kauaka, penei: "Hewa ha oe i ka pao ana, I ka huewai a ke kanaka."

 

Heaha ka manu i hai mai i kana ono, aole nae he hele e hana i mea e loaa ai kana ono? He Elepaio, nana ke kani, "Ono ka ia, ono ka ia!"

 

Heaha ka manu i auhau mai i ke o, e liuliu? He Kioea, naua ke kani, "Lawelawe ke o! Lawelawe ke o."

 

Heaha la ka mea i oleloia no Anihi? Eia, I ike ole ia. "He aloha o Anihi, E nihi kuu hele, O ikea mai au."

 

I ninauia mai o Huaa, Heaha kau nu hou? Pane aku la oia, "Ua paa o Laka (akua lula) i ka hao." Luliluli mai la ka pulima o ua mea la ia Huaa, a i mai, "Ua hoohoku oe ia'u." Ma ia wa i hoiki hou aku ai keia i ka oiaio, ua ike oia i kekahi kumu hula ua paa i ka hoe. Keke ae la ua niho o ua kanaka la i ka akaaka.

 

Oiai na la i hala e aku, e hele ana o Napela i ka hoohulihuli ma kahi wahi o Wailuku, ninau aku la oia i kekahi luahine, "He ui he olelo no ke Akua, Owai ke Akua maoli? I mai la ua luahine nei, "O Napela." Ekolu ninau ana aku a ekolu no hoi a ia la pane ana mai pela. Ninau hou aku keia, "Aole ou manao e malama i ke Akua?" Pane mai ua luaui la, "I ku no paha ka malama aku i ke Akua i ka wa niho, i mama aku ai hoi i ai na ua akua la i ka wa e hoi mai ai." Ua kuhi paha ka luaui, he inu awa o lehova.

 

I na la loihi i hala, ua hoomakaukau kekahi i na ano rama Hawaii, a no ka inai (i-a) ole, ua kali iki ia; aia nae me lakou he wahi kao hanaiahuhu, pane mai la oia, Ua inu ka lalama o oukololou? Pane mai ke kahu, Aohe i inu. no ka pupu ole, a ke manao nei la e kalua ia oe i inai no ka rama o makou. O ka pane mai la no ia o ua kao nei, Aole la hoi i kiiia mai a kololua ia iho. A ma ka po ana iho, oiai na hoaai e ona ana, a e hoonuu ana hoi i ka momona o ua kao nei, hoopuka ae la kekahi, He kao auanei keia, he like loa me ke kanaka ka olelo mai, Ua inu ka lalama o oukolou; aole la hoi i kiia mai a kololua ia iho. I ka lohe ana o na hoaai, o ko lakou noke aku la no ia i ka luai a pau ke aho. Kahaha!

 

Wehe i ka pili la e ka hoa.

 

Ma Kapua Kapalilua S. Kona Hawaii, make emoole iho la o H M Kekauoha k, me ka mai ole, i ka la 28 o Dec M H 1873.

 

Ua hanau oia i ka M H 1827 ma Paula i Kau, ana mare ia maua i ka M H 1858, o ka piha o ko maua mau makahiki ma ka noho pu ana. A wehe mai nei kela i ka maua pili ana he 15. o ka huina pau o kona ola ana ma keia Honua 46. aua haalele mai keia ia'u, a me aa ohana a pau, aua haku iho au, i wahi kanaenae Kanikau nona malalo iho.

 

He kanikau he aloha nou e H M Kekauoha

Kuu kane hoi - e,

Kuu kane mai ka ua Haao o Waiohinu,

Ke nihi hele ae la ma uka o Auaulele,

E lele poo ana ka wai Okaha,

Kuu kane mai ka wai naule poo - e,

Auwe! kuu kane - e!!

Ua hala keia i kehu a ke ao,

Aloha ino!

Kuu kane i ka pali hulilua o Pohina,

E hoolohe ana i ke kani a Kawelohea,

I ke kani hone i keehu o ke kai,

O ka leo no paha ia o kuu kane,

Auwe! kun kane - e!!

Aloha oe e ka ua pehi puahiuano o Panaewa,

Maewaewa iho nei au i ka hale a ke aloha,

Kulanalana i ka hale o ke hoa pili he kane,

Kuu kane mai ka la welawela o Kahaupoakane

He kane oe he hoapili ao kuu kino,

Kuu kane mai ka lai o Kona kai malino a Ehu,

Auwe kuu kane ka hoa pili o kuu kino,

Ua hala me Melekuliana,

Me ke kameau o ka Aupuni Uila,

Auwe! ukioki ino!!

I ka lilo o kuu aloha iaia.

            Miss. KANEOLE KEKAUOHA.

 

Kuu kane mai ka ua kipu i ke pili,

I piliia e kaua ka la welawela o Kuahea,

Ehea iki mai nan ka uhane iluna o moeahi,

Ahi wela ia'u ke kula o Laumaumau,

Ma'u ka loa i ka piina o Haupu,

E aku aku ana e ike ia Hanakahi,

I ka malu hale o kaua,

Aole nae oe i laila,

Auwe! aloha ino!! kuu kane - e.

            Miss. KANEOLE, KEKAUOHA

 

Kanikau no H M Kekauoha,

Aia paha ka uhane,

I ka lai o Kulukahi,

Hooipo ana ka uhane,

Me na ipo o ka lai,

O ka la no keia,

Haalele ia ka wahine,

Kaahele ana ka uhane,

I ka uka o Puki,

Ua ki ia a paa,

E na manu o ka uka,

I uka aku ka uhane,

I ka lai o ka pali huli,

Huli iho nei makou,

Aole oe i loaa,

Kalewa ana ka uhane,

I ka uka e Waialohe,

Ua lohe mai makou,

Kanikau no na make,

            WILLIAM. KOAHOU.

 

He kanikau H M Kekaoha,

He aloha pua Melekule,

Hokolekole ka noho'na

Ua hele aku nei oe,

I ka lai e kahawai,

He piina loa Kikanu,

I ka luna lai o Molale,

E molale ana ka uhane,

I ka hao a Hanakahi,

I ka luna Panoheohe,

He ohe kau i lohe,

I ke kapalili i puuone,

Heo aku nei ka uhane,

I ke anu o Kekaa,

Ninau ana ka uhane,

Auhea ia hikiwawe,

Huli lioi ana ka uhane,

I ka puhu lai o Kona,

            MRS. NAKOO.

 

Kanikan no H M Kekauoha,

Kuu kaikunane mai ka la welawela o Kalepoula,

Mai ke kapa ula i ka ili o ke kai,

Auwe! kuu kaikunane hoi - e,   

Kuu kaikunane mai ka ia haaheo o ka Mana,

E wehe mai ana i ka poli me-he ipo la,

Kuu kaikunane mai ka ai hooluhiluhi kino

            o ka aina,

E hookunewa ana i one o Hinahele,

Hele hookahi ka uhane aohe laa,

Auwe kuu kaikunane - e,       

Kuu kaikunane mai ke ahiahi wela o Kahuku,

Ku mehe lepa ala i ke pili o ka Maoa,

Ka iho makawalu i ka poli o Molilele,

Auwe kuu kaikunane hoi - e, Aloha ino,

                        MISS. MALEKA.

 

Kanikau no H M Kekauoha,

Aia paha ka uhane,

I ka luna o Maunaloa,

Hooipo ana ka uhane,

Me na iwa o ke anu,

i walea paha ka uhane,

I ka leo o paho o ke kai,

O ka makani paha o Kau,

Au iho nei makou,

Aole iho nei makou,

Aole iho nei oe,

Aia paha ka uhane,

I ka lai o Kaukaweli,

I ka luna o Kaeo,

Ua heo aku nei oe,

Me Kauiokalewa i ke anu,

O ke kamaeo a Lo Hipa.

                        MISS. KAIKUNANEOLE.

 

Kanikau no H M Kekanoha,

Aia paha ka uhane,

I ka lai o ke koana,

Euanea ana ka uhane,

Ina hale kuai,

Hoolai ana ka uhane,

I ka inu kiaha kofe,

Aweawe ana ko lio,

I ihona lai o kaula,

Ulu iho nei makou,

Aole iho nei oe,

Haaheo ana ka uhane,

I ka olu o Ilama,

Malama ia ke kaula-kohi,

He ihona o Makalepo,

Aweawe ana ka uhane,

I ke kula o Kanenelu,

Ka ihona lai o Paiahaa,

Kikaho ana ka uhane,

I ka nalu hee Hooili,

                        W H NAAIHOOLAHA.

 

He kanikau no H M Kekauoha,

Auhea wale ana oe,

Hoapili o kuu kino,

Pili ia e kaua,

Ka ua me ka makani,

Haalele mai nei oe,

I ka pili a kaua,

Au iho nei makou,

Aole iho nei oe,

E i kau nei paha oe,

I ke kui pua Ohelo,

Ohelo nee i ka papa,

I ka luna o Maunaloa,

Haalele mai nei oe,

I ka pili a kakou,

He aloha o Kapualoa,

I ka nanea a ko kino,

Kahea mai o Kalihi,

Eu hoi no kaua,

He ihona wela Kulukahi,

Akahi au a ike,

He mea ino ke aloha,

He aloha no ko kino,

A'u e hiipoi nei,

                        D.H. KEIKO.

            Miss. Kaneole Kekauoha,

J.D.B. Kuakahela, Kakauolelo.

Kapua, Kapalilo, S.K.H. Mar. 12, 1874