Ka Nupepa Kuokoa, Volume XIII, Number 12, 21 Malaki 1874 — Page 4

This text was transcribed by:	Pualani Steele
This work is dedicated to:	Nakila Steele

Ka Nupepa Kuokoa

KE KILOHANA POOKELA NO KA LAHUI HAWAII.

KA NUPEPA KUOKOA, ME KE AU OKOA I HUIIA.

Ka Nupepa Kuokoa

I love the Sabbath School.

Fresh Laurels p. 52

Aloha nui au. Owau pu, Owau pu;

Ke Kula Sabati. ALL. Kakou a pau.

Hoolohe phono au. Owau pu, Owao pu,

Na kanawai a pau. ALL. Kakou pu.

E olioli e ke hui mai

E helu, mele, pule e,

Mele ae a hoomaikai

Ma na kula, kula Sabati.

Cho. E oli, oli, oli nui e

Ke hoomaikai

Ma na Kula Sabati;

E oli, oli, oli nui e

Ma na Kula Sabati.

Aloha nui au, Owau pu, Owau pu:

Ka olelo e ola'i, Kakou pu.

E hoopau phono au. Owau pu, Owau pu.

I kuu wa ui no, Kakou pu.

Malaila ike au ka pono mau;

Malaila au e ku a ao

E mele ae a hoomaikai

Ma na kula, kula Sabati.

Cho. E oli, oli, oli nui e, &c.

Aloha nui au, Owau pu, Owau pu,

Kuu kumu maikai e; Kakou pu.

Hoopaanaau no au, Owau pu, Owau pu,

I kaua i ao mai ia'u, Kakou pu.

Ke Kula Sabati kuu Alakai,

Kuu mea e oluolu ai,

E mele e, na pokii nei,

Ma na kula, kula Sabati.

Gho. E oli, oli, oli nui e, &c.

HAWAII.

HAAWINA KULA SABATI.

KA HAPAHA ELUA O 1874.

HELU 14, SABATI APERILA 5.

KUMUHANA---Na Kanawai he Umi.

PAUKU BAIBALA---Pukaana 20:1-17.

OLELO mai la ke Akua i keia mau olelo a pau, i mai la.

2 Owau no Iehova kou Akua, ka mea nana oe i lawe mai nei, mai ka aina o Aigupita mai, mailoko mai hoi o ka hale hooluhi.

3 Aohe ou akua e ae imua o ko'u alo.

4 Mai hana oe i ke kii i kalaiia nou, aole hoi ma ka like ana o kekahi mea i ka lani iluna, a me ko ka honua ilalo, a maloko hoi o ka wai malalo o ka honua:

5 Mai kuloa oe ilalo ia lakou, aole hoi e hoomana ia lakou, no ka mea, owau no Iehova o kou Akua, he Akua lili; e hoopai ana i ke na makua hala i na keiki, a biki aku i ke kuakahi a me ke kualua o ka poe e inaina mai ia'u:

6 A e aloha ana hoi i na tausani o ke poe e aloha mai ia'u, a e malama hoi i ko'u mau kanawai.

7 Mai hoohiki wahahee oe i ka inoa o Iehova o kou Akua; no ka mea, aole loa e hoapono o Iehova i ka mea hoohiki wahahee i kona inoa.

8 E hoomanao i ka la Sabati @ @.

9 I na la eono e hana'i oe i kau hana a pau;

10 Aka, o ka hiku o ka la, he Sabati ia no Iehova no kou Akua, aole loa oe e hana ia la, aole oe, aole hoi kou keikikane, aole hoi kou kaikamahine, aole hoi kau kauwakane, aole hoi kau kauwahine, aole hoi kou holoholona, aole hoi kou kanaka e ma kou ipuka:

11 No ka mea, i na la eono i hana'i o Iehova i na lani, a me ka honua, a me ke kai, a me na mea a pau maloko o ia mau mea, a i ka hiku o ka la i hoomaha'i; nolaila hoi i hoomaikai ai o Iehova i ka la sabati, a hoano ai hoi oia ia la.

12 @ E hoomaikai oe i kou makuakane, a me kou makuwahine; i loihi ai kou mau la maluna o ka aina a Iehova a kou Akua i kaawi mai ai ia oe.

13 Mai pepehi kanaka oe.

14 Mai moekolohe oe.

15 Mai aihue oe.

16 Mai hoike hoopunipuni oe e hewa ai kou hoalauna.

17 Mai kuko oe i ka hale o kou hoalauna, mai kuko oe i ka wahine a kou hoalauna, aole hoi i kana kauwakane, aole hoi i kaoa kauwawahine, aole hoi i kona bipi, aole hoi i kona hoki, aole hoi i kekahi mea a kou hoalauna.

Pauku Alakai---Mat. 22:37-40. Hoopaa naau.

Mele Him. 27. Leo-St. Thomas (Haualei,)

1 Ke Akua o ke ao, I lokomaikai mai,

Hoolaha oia no kakou I kona kanawai.

4 He kumu maikai nei, A kuhikuhi mai

I alanui e hiki ai I hahi o ola'i.

PULE i hoolahaia aku ai ke kauawai i na aioa naaupo.

Na ninau a na Kumu i na Papa.

Haalele kakou i ka poe @ mahea? Makena 17:@ Hoi mai i kekahi mau mea i @ malaila ma ka makena 18? Owai ka i hale o halawai pa? 1-6. Heaha ke M@ @ @ @ @ @ @ @ aku la letero? p. 9-12 Heaha ka Mo@e i haua'i a koohalahala letero a kahikahi i ka hana hoomama ia Mose? p. 13-23. Ua ao anei Mose? p. 24-26.

Hele lakou mai Repidima a i hea? mok 19:1-2. Heaha ka hana kepanaha ma Sinai? Pii Mose i hea p. 3. Heaha ka ke Akua olelo iaia? p 4-6. A hai aku Mose, pane mai lakou pehea? p 7, 8. Heaha kekahi mau olelo a ko Akua ia Mose: p 9-14. Hana anei Mose pela? p 14, 15. Heaha ma ke kula o ka la? p 16-17. Heaha ma ka mauna? p 19-20. Heaha na olelo kike a Iehova me Mose? p 21-25. Mok 20; 1. Mahea Mose i ka wa e olelo mai ana ke Akua me ia? Malalo o ka mauna paha, ua pii iki nae iluna; a mahope, no ka makau o kanaka i ka leo o Iehova, i ka hekili &c. pii loa Mose i ka piko o ka mauna p. 18-21.

P. 2. No ke kanawai mua anei keia? He mea hoakaka paha, e hai mai ana o Iehova ke Akua. &c---

P. 3. Ehia Akua? Nui no na akua; he mau mea i ike maka ia kekahi, a he mau mea ike maka oleia kekahi, aka, hookahi wale no Akua oiaio. Heaha ka i papaia? Akahi no anei a papaia ka hoomana ana i na akua e? No ka papa ole ana anei ke kumu o ka hoomahuahua ana i na akua? Rom 1. 19-23.

P. 4-6. Ke kanawai elua; mahea ka like ole o ke kanawai elua me ke kanawai akahi? Papa ke kanawai 1 i ka hoomana i na akua e, i ka la, i ka mahina, i ka pipi &c. Papa ke kanawai 2 i ka hoomana ana i na kii o na akua e, o ka la, o ka pipi, &c. Me keia; mai hoomana i kekahi alii, mai hoomana i ke kii o kekahi alii.

Pehea ka hoopai ana? pehea hoi ke aloha ana? E hoopai ana a hiki i ke kualua----E aloha ana a hiki i ke kausani ka pololei; Ua like ia me ka hoomau ana i ke aloha i ka poe e aloha mai ana.

Owai ka põe kue i keia kanawai? Ka poe hoopiha i na luakini i na kii, a me Kolosa 3; 5. Nui wale ka poe kue; na Pegana, ka poe manao nui i na mea o keia ao.

P. 7. Ke kanawai Ekolu. Pili keia kanawai ia wai? I ka poe hoohiki ma ka Baibala ma na aha hookolokolo, a mahope, hoike wahahee lakou. Pili hoi i ka poe hoopuka ino i ka inoa o Iehova, ka poe hailiili, a olelo, By god, god damn you-By Jesus, By Christ &c&c.---Nui wale ka poe kue i keia kanawa@ Pehea Iesu? mat. 5; 33-37.

P. 8-11. Ke kanawai Eha. Akahi no anei a kau ke kanawai Sabati? Mahea ka Sabati mua? Kin. 2; 2, 3. Heaha kekahi olelo no ka la Sabati ma ka mok 16; 23, 27-30? Nui anei ka poe kue i keia kanawai?

P. 12 Ke kanawai 5, ke kanawai mua ia ma keaha; Epeso 6; 2, 3. Nui anei na makua? Nui anei ka poe kue i keia kanawai? Mat 15; 4-6, Nui anei na keiki hookuli?

P. 13-16. NA KANAWAI 6, 7, 8, 9. Mahea kekahi mau pepehi kanaka, moekolohe, aihue &c? Mak 5; 21, 22, 27, 28. 1 Ioane 3; 15. Heaha ka Iesu olelo ma Ioane 8; 44?

P. 17. Ke kanawai 10. Na paukupili Ios. 7; 20, 21. Kolosa 3; 5. 1 Tim 6; @ @. Iak. 4; 1. Mahea i kakou @ @ a'i na kanawai? K@ @ 6-21. Ua like anei?

Ehia papa kanawai? Nawai i kakau? na inoa o na kanawai, ka hoopokole anake ano i kuhikuhiia ma 2 Kor. 3; 6, 7, 11 Rom. 7; 12. 7, 6-10.

Mele Him. 28.---Leo Downer C. Sacra p 115. 1. Alohaia kou kanawai, Kuu oli ia a mau; Malaila au e noonoo ai, Ke uhi mai ka po. 4. A noho, ala, hele au, Kuu hoa hele nei; A oi kona maikai ia'u I na maikai e ae.

NA NINAU A KE KAHU.

Papa Makua. He kanawai anei mamua o ko ke Akua haawi ana mai i na kauawai he 10? Kin. 2; 16, 17, 24,. 9; 6. Puk. 16: 28, 20. Mahea hoi e kakau ia'i na kanawai? Rom. 2; 15. 1; 32. Heaha ke kanawai mua ma Hawaii nei? Inahea ka haawi ana i na kanawai he 10? Mahea hoi?

Papa keikikane. Mauna Sinai, mahea ia? ua aha oia i ka wai iho mai ai ke Akua o haawi mai i na kanawai? Ua'ha na kanaka i ka ike ana i ke ahi &c? No keaha ko ke Akua haawi ana mai i na kanawai? Ehia papa kanawai? Nohea na pohaku?

Papa kaikamahine. Ehia kanawai ma kekahi papa? a, ehia ma kekahi papa? Hai mai ina kanawai ma kela, ma keia papa. Ke kanawai elima no ka papa hea ia? Pili anei ia i na papa elua' i ke Akua, a i kanaka? Pela paha.

Ke kanawai Sabati, heaha ia? Pili anei ia oukou? Ke kanawai ehia ka i papa i na @? Ke malama nei anei oukou ia kanawai?

Papa pokii. Ehia kanawai? ua paa naau anei? Mahea i haawiia mai ai? Heaha ka mea kupanaka i ikeia a loheia ma ia manawa? Ina ike a lohe oukou i na mea like pehea oukou? Ua haawiia na kanawai ia wai? Ehia papa? Ke kanawai ehia e pili ana i na keiki? Hai mai ia kanawai? Ke kanawai Sabati hai mai. Pehea ka hoomanakii? Nui anei ka poe hoomanakii? @ aka kakou no lakou? Hai p@ naau nei i na ano nui elua o na kanawai @ la @ @ @ @ @ 19: 28.

Ke Kula a pau. Owai na inoa o na kanawai he 19? Pak 34: 28. Kea 4: 13; 10: 4. Pak 24: 12. Kan 9: 9. Pak 32: 15. Mat 19: 17. Owai ka inoa nui i keia wa? Dekaloga. (10 hua) Heaha ko Hawaii kanawai i ka wa nauupo? I na hea ka puka ana mai o na kanawai ke 10 maanei? Heaha ka hoopai ke malama ole ia na kanawai? Ina haki ke kanawai hookahi, pehea na kanawai a ae? Iak 2: 10-11. Ola anei ma ke kanawai? Ma ke aha e ola ai? No ke aha ka hiki ole e ola ma ke kanawai? He kumu aha ke kanawai? Gal 3: 24. Owai na mea hooiaio loa i na kanawai? Mat 5: 17; 19: 17-19. Roms 7: 12. 13:9. Nowai na kanawai? I Tim 1: 9, 10.

Mele. Him 475. Leo. Hosana Kamalii.

Pule i hoolahaia'ku ke kanawai, ka olelo a ke Akua i na aina a pau, a malama ia hoi.

Haawina Kula Sabati no Aper. 12 Puk@ana 32: 1-16. 9, 20.

HAWAII.

Heaha ka hoailona o ka Uhane Hemolele i na kanaka i hoikeia ma 2 Kor. Mok. 1:22?

Heaha ke ano o ka hoailona iwaena o na kanaka? He mau hua palapala kekahi hoailona; ua kauia maluna o kekahi waiwai, i akaka i na mea a pau, he waiwai keia no ka mea nona ka hoailona. He Sila kekahi hoailona, he pilali, he kepau paha i kau ia maluna o na palapala. O ke ano nae o keia mau hoailona, ina he wepa paha, he kii paha i paiia, a he mea e ae i kapili ia maluna o ka palapala, he hooiaio ka mea i olelo ia iloko o ua palapala la. Ua hoopaa ia, ua paa loa, ua oiaio. Ina he palapala kuai aina, palapala hooili waiwai paha, palapala hoohui, o ka Sila, a o ka wepa, o kekahi mea e ae paha i kau ia a paa loa maluna o ua palapala la, he hoailona ia e akaka'i, ua oiaio kela palapala. Ina ua kuai kekahi he aina nona, a ua loaa ka palapala kuai, a ua kauia ka hoailona a ka mea nona mai ka palapala, ua akaka ma ka hoailona i kauia, ua lilo kela waiwai. Ua paa, ua aponoia, ua oiaio. Ua hiki ke paulele, no ka mea ua paa i ka Sila, a hoailona ia.

He hoailona ko na aupuni; A ua kauia maluna o na palapala o ke aupuni i hoopuka'i. Ina i hookohu ia kekahi he luna no ke aupuni, ua hoailona ia kona palapala hookohu i ko ke aupuni hailona. A heaha ke ano? I akaka he oiaio, a i maopopo no ke aupuni ka mea i hoailona ia.

Ma ko ke Akua hookumu ana i aupuni ma ka honua nei, ua haawi mai oia i hoailona, a kauoha oia e kauia keia hoailona maluna o ka poe i hookaawaleia mailoko ae o ko ke ao nei, i poe kanaka nona. I kawa i kahea ke Akua ia Aberahama e hele mai mailoko ae o ka hoomanakii, a lilo oia a me kona mamo i ohua nona, haawi mai la ke Akua i hoailona, a kauoha mai, e hoailonaia oia, a me kela lahui a pau i hookaawale ia i lahuikanaka hemolele no Iehova. O Iehova ko lakou Akua, a o lakou kona poe kanaka. Ua i @ o Paulo ma Roma Mok. 4:1@ @ a ua loaa ia ia (ia Aberahama) ke okipoepoe ia, i hoailona no ka pono o kona manaoio ana."

I ka wa i kukuluia ka hoomana Kristiano, ua haawi ia mai ka bapetizo ana i ka wai, i hoailona maluna o ka poe a pau i komo iloko o ia hoomana, a manaoio ia Iesu Kristo. Kouoha mai la o Iesu i na lunaolelo. "E hele e hoohaumana i na lahuikakaka a pau, e bapetizo ana ia lakou." O keia mau hoailona nae, he mau hoailona mawaho, a ua kau ia maluna o ka poe Iudaio, ka mamo o Aberahama, a maluna o ka poe ia lakou ka inoa Kristiano.

Ua olelo pinepine ia ma ka Baibala, aia i ka poe haipule io, ka poe i hanauhouia e ka Uhane Hemolele o ke Akua, he hoailona o loko maluna o ka naau. Ua olelo mai o Paulo ma ka palapala i ko Roma Mok. 2:29, o ka mea e Iudaio ana maloko, oia ka Iudaio, a o ke okipoepoe ana, no ka naau ia, ma ka uhane, aole ma ka hua palapala. Pela ke ano o ka hoailona i olelo ia ma 2 Kor. 1:22, a he haina kupono, no ka ninau i haawi ia mai e ka Aha i kumu manao. Penei ka pauku holoohoa---"Oia hoi ka i hoailona mai ia makou, a i haawi mai hoi i ka makana mua o ka Uhane Hemolele iloko o ko makou naau." Owai ka mea nana e hoailona mai ia haipule io? Ma ka pauku e pili pu ana me ka pauku nana mai keia kumu manao, penei ka heluhelu ana, "o ka mea nana makou e hooku paa me oukou iloko o Kristo, nana hoi makou i peni ai, o ke Akua no ia, Oia ke i hoailona mai ia makou." Ma keia olelo ua hoike maopopoia, o ka mea nana e hoailona mai i na haipule io i poe ohua nona, a komo iloko o kona aupuni ma ka lani, i poe hoailona no ke ola mau loa, o ke Akua no ia. Nana i hooiaio i ko lakou kuleana iloko o kona aupuni hemolele. E like me ke olelo i palapala ia ma Epeso, mok. 1:13, 14. "I ko oukou manaoio ana ia ia (ia Kristo) na hoailona ia oukou e ka Uhane Hemolele, i olelo e ia mai, oia ka i hooiaio i ko oukou noho ana." A me Epeso mok. 4:30, na olelo o Paulo i na hoahanau. Mai hoeha hoi i ka Uhane Hemolele o ke Akua, nana oukou e hoailona mai no ka la e hoola ia mai ai. Eia hou ma ka palapala i ko Roma. "O na mea a pau i alakai ia e ka Uhane o ke Akua, o lakou no ka poe kamalii na ke Akua." Ma keia mau olelo ua akaka, o ka hoailona i ike ia'i ke ke Akua poe oiaio, aia ma ka naau. A o keia hoailona oia ka noho mau ana, a me ka hana mau ana o ko ke Akua Uhane iloko o ka naau, e hoomaemae ana, a e ao ana, a e alakai ana, a e hooulu ana i ke aloha a me ke akahai, ka lokomaikai, ka manaoio a me na hua maikai e ae.

Eia kekahi, o ka noho ana o ka Uhane Hemolele iloko o na naau o na haipule ma keia ao, a hoohua mai i na hua maikai, he makana mua ia o ka Uhane. O keia mau hua maanei, he hoike e hooiaio ana no ke ola mau loa mahope. E like me na hua mua o ka aina, he hoike e akaka'i ka ohi nui ana mahope, pela na hua mua o ka Uhane, ka makana mua iloko o ka naau o ka poe haipule io, i ko lakou wa e noho kino ai ma ka honua nei, he hoike no ka mahuahua loa o na hua maikai ma kela ao mahope. He aloha io anei ka poe manaoio ia Kristo, he maemae anei ko lakou naau, he manaolana ko lakou, he ike ia Kristo, a he aloha ia ia i ko lakou wa e noho ai i keia ao; he mau hua mua keia. Aia mahope maloko o ke ao o ke Akua he maemae loa, he ike loa, he aloha kupaianaha, he nani ka mahao. Ua i mai o Iesu, ma Mat. 12:43. "Alaila e lilelile ae ka poe pono e like me ka la iloko o ke aupuni o ke Akua." Ua hoailona ia anei kakou no kela aupuni?

NA REV. B. W. PAREKA.

Keia Haawina.

Heaha kau e huna nei iloko kou hale? A no ke aha ka huna ana? Heaha hoi ka pono no ia mea?

He keiki liilii ka i hunaia ekolu malama ma ka hale o na makua. No keaha hoi? No ka mea, ua kau ke kanawai, e make na keiki kane liilii a pau a na makua Iseraela. Minamina na makua i keia keiki maikai ma ka nana'ku, a huna ia ia i pakele oia i ka make.

He makuahine mamua aku, o Rahela, lawe malu oia i na akua kii o Labana, a huna malalo iho o kahi noho i loaa ole ia ia Labana, ia ia e huli ana. Minamina paha oia i keia mau kii.

He kanaka Iseraela, Akana ka inoa, lawe malu oia i kahi lole nani me ona gula a dala, a huna maloko o kono halelewa. No ka makee ka ia i mea e waiwai ai.

He wahine hookipa o Rahaba, lawe oia i na kiu elua, a huna maloko o kona hale i pakele laua i ka make, i pakele hoi oia me ko kono hale i ka make.

O Gehazi, ke kauwa a Elisai, lawe malu oia i na lole, i na dala, a huna maloko o kona hale no kona makee waiwai ana.

He wahi keiki alii, o Ioasa ka inoa, ua hunaia oia i ono makahiki ma ka hale o Iehova, i ole oia e pepehiia e ke kupunawahine, i loaa hoi ke alii maikai mahope.

Ma ka nana'ku, he mea minamina, aloha ia, makemake nui ia ka mea i hunaia iloko o na hale.

He wahi olelo kaulana keia. He keletona hunaia iloko o @ me keia hale.

He kupapau maloo ke keletona. Ua pau na io, koe na iwi maloo wale no.

Aole paha he oiaio loa keia olelo kahiko. Ua koe paha kekahi mau hale, aole he keletona i hunaia maloko.

Aka, he nui no na hale, na ohana e hoao ana e huna i kahi keletona maloko.

E ka hale, ka ohana o kuu hoa, heaha kau e huna nei maloko? A no keaha hoi kou hoao ana e huna ia mea?

1. He kupapau, a iwi kupapau maoli paha kekahi mea i hunaai iloko o kou hale i mea aloha, mea hoomanamana paha. Pela mamua aku nei, a pela paha i keia wa ma kau wahi. He hana naaupo nae ia, e hoopau aku. O ke kii maikai o ka mea i make ke pani no ke kupapau, a iwi kupapau paha, i mea e hoomanao ai ia ia. He mea hoomanao wale no nae ia kii, aole he mea hoomanamana. E hoomana i ke Akua wale no, aole i kekahi kii.

2. He ipu-baka me on a wahi eke baka paha kekahi mea i hunaia iloko o kekahi mau hale hoahanau. No ke aha kou huna ana, kau hoao ana e huna ia mea? No ka mea, ua hoohiki oe e haalele ia mea ino imua o ke kahunapule, a me na hoahanau. Ua minamina no nae oe ia mea, a lalau hou no i ka ipu-paka a puhi malu me ka hoao nao e huna i kau hana, i ole e ike ke kahuna. Aole nae e hiki ke huna. Hoea aku la ke kahuna me kou iko ole, a loaa oe ia ia e puhi ana. Loaa no hoi kou puhi ana ma ke ano eleele o kou hale, a ma ke ala hohono o kou waha. Ike mau hoi na anela, me na maka o Iehova. Aole o ke puhi ana i ka baka, o kou hewa nui, aka, o kuo hoopunipuni, a me ka hookamani ana, oia ka hewa nui. I na makemake oe i ka baka, e noho oe mawaho o ka ekalesia mamuli o ke baka. Mai puhi malu mahope o ka hoohiki e haalele, a hoao e hana. Aole hiki, e loaa ano no; a heaha ka hoopai no ka hoopunipuni? A hiki anei i ka baka, kou akua ke hoopakele ia'oe?

3. Eia hoi kekahi mau mea e hunaia'na iloko o kekahi mau hale; ke kiaha rama, omole rama, kuai rama, on a rama, opiuma, pepa piliwaiwai, hula, oli mele lapuwale, me na mea ano like. Aia no ia mau mea iloko o kou hale, e kuu hoa, a ke hono nei oe e huna. No ke aha? No ka ono, ka minamina, no ka hoohiki e haalele a hoomau no nao, no ka makou paha o loaa, a hoopai io, a hoolaiia'ku paha iwaho o ka ekalesia, a ino kou inoa maikai, a hoopauia kau oihana me na he@a o ola'i kou kino. Make hewa! aole hiki ia oe ko huna. Nui na maka ike; nui hoi na hoike, kou helehelena ino, kou moe ana iloko o ka on a, kou hele bikaka ana, a kamailio lalau, ka walaau maloko mawaho o kou hale na keiki ike, a e hoolaha wale ana. E aho e hoopau aku oe ia mau mea ino. Mai hana malu, a hoao e huna. Hiki ole, ea!

4. He mea kekahi, o Manuahi ka inoa, he keletona ia, i hunaia iloko o kekahi mau hale; he kane paha, he wahine paha, he kaikamahine paha. He keiki manuahi. Ke hoao nei paha ka poe nona keia keletona e hana, a kapaia he kaikuahine, he kaikuana, he makuahine, he wahine hoolimalima, he kaikamahine hanai no ka makua ole. Ua mareia ma kahi e, (he hoopunipuni nae ia.) Nui ke ino o keia keletona. Hohono, hiki ole ke hana. E wiki e hoopau aku. E loaa ano no; a, pehea? pakele anei i ka hoopai nui ana?

5. Ka hakaka, a nuku, a hoopaapaa me na mea like. Oia kekahi mau mea e huna ia'na iloko o kekahi mau hale. Makehewa nae ke hoao e huna. Na na manu o ka lewa e hai mai ana; na ka poe e maalo, a hakilo ana mawaho, na na helehelena ino no e hoike mai ana. E hoopau aku no, ano, o loaa a hoolaha nui ia ma kahi akea, a hilahila, a kau maha ka poe e hoao ana e hana me ka huna no nae.

6. He waiwai i aihue ia i lawe wale ia i aie ia paha ka iloko o ka hale o kekahi poe a e imi ana lakou e huna. Makau, a hopohopo, a pihoihoi lakou ke komo kekahi iloko o ko lakou hale, o loaa ia waiwai. Aloalo na maka o ka poe aie, holoholo, huli ae io ia nei i ole e halawai me ka mea i hooaie ia ia, noho hihihu no ka loihi a kaa ole o ka aie. Makehewa nae. Aole hiki ke huna, a hoonalo ia oe iho. E wiki e hoihoi aku i ka waiwai aihue, a e hookaa mai i kau aie.

7. He Kino mai, he puupuu, he kaokao, he lepera, oia kekahi keletona iloko o kekahi mau hale. Ke hoao nei nae kekahi poe e huna ia mau mai. Makehewa! naaupo! E make auanei. E wiki i ka hoike mai i lapaauia i ola. Mai hilahila. E aho ka hilahila i ka make.

8. He naau ino paha iloko o na hale a pau. Ke imi nei nae ka poe nona ia naau e huna. Hiki auei ke huna i ke ahi? Aole anei he uwahi e hoike ana he ahi maloko, a mahope koke iho paha, poha mai ke ahi?

He hoopau oe i kou naau ino, e noi aku i ka Uhane Hemolele e haawi mai i naau hou i naau maikai a maemae.

HAWAII.

Mai huli ae ma ke ala hewa. E hele pololei aku.

Mamua loa aku, e hele aku ana au i kauwahi o Kohala. Ua ike no au i ke ala mamua. Ua hele pinepine no au ma ia ala. He ala e ae nae i hanaia mahope e hele ana i kahi e. Aia no ia ala ma ka lima akau. I ko'u hele ana 'ku me ko'u hoa hele, aole au i makaala a nana pono i kahi e hele aku ana. Ka hele wale aku no ia me ka nanea, me ka manao e hele pono ana. Aka, aole liuliu a komo aku maua iloko o kahi nahelehele loa, iloko o ka uku-laau, a pohihihi loa ke ala.

A pihoihoi au, a i ka ike ana i kekahi kanaka ma o aku, holo au a ninau aku, auhea la ke ala e hiki aku ai ia Iole? Kahaha, e hele ana ka olua i Iole? Ua lalau loa olua.

Aia ihope loa ke ala. Ua haalele olua i ke ala pono, a hele mai ma keia ala hewa e komo aku ana iloko o ka ulu-laau lipolipo. Ka imi no ia i ala e hiki ai i Iole, a puka ilaila, ua pulu, a luhi, a eha loa maua. Pakele nai i ka nalowale loa.

Ma ka hoopili ana. Ua hoomaka kekahi poe e hele aku i ka lani. Ua lohe no lakou i ke ala. Ua kuhikuhiia ma ka Baibala, he ala olioli, a he ala pololei.

Aia no ia mawaena o na ala e ae he nui wale, ma ka lima akau kekahi, a ma ka lima hema kokahi. He mau ala kekee nae, e hoolalau ana, e lawe aku ana i ka poe komo malaila i ka nahelehele, ka ulu-laau weliweli, i ka loko ahi kalipolipo, i ka make mau loa.

Ma kekahi mau mea na like keia mau ala kekee ma ke ala o ke ola, a ma ka hele ana'ku, ua kuhi ka poe e hele ana, e hele pono ana no, a e puka aku ana no i ka lani. Ma ia mau ala, he mau halepule no, a halawai, a kula Sabati, a bapetizo ana, a ahaaina a ka Haku, a kokua mahina hou, a pule ohana &c. Kainoa ke ala keia e hiki aku ai i ka lani. Alia. Aole anei he mau mea e ae ma ia mau ala? he mau lealea, mau hula, mau paani pepa, mau kiaha rama, kiaha waina, mau lau baka, ipubaka, wahine manuahi, kane manuahi, laikini hookamakama, mau kue, hoomauhala, mau hoohiki i hooko ole ia?

E nee aku ana paha iloko o ka nahelohole. E ku a nana i uka, i kai, imua.

Ke hoea mai la anei ka lani? Nana a loihi. Aia, ke hoea mai la heaha? na piko hinuhinu anei o na puu o ka lani? Pela paha ina e nee aku ana kakou ma ke ala pololei.

Aka, ina ua lalau a komo ma na ala ke keo, aole o na piko puu o ka lani kela e hoea mai la, aka, o na kia wahi o ka po. Aia ka lani ma ke kua, aole ma ke alo. E nee aku kakou mai ka lani aku a i ka po.

E huli mai ke alo a i ke kuo, e imi i ke ala pololeli, ke ala olioli ka mihi, ka hoohanau hou ia, ka pili mau ia Iesu, i ka noho hemolele.

E pau ka hele lua ana, i uka, i kai; io ianei; imua, i hope, i ka pono, i ka hewa, i ka pule, i ka hula, i ka halawai, i ka hale inu rama; i ke kula Sabati, i na hana kolohe. He ala kekoe, a manamana aku i ka akau; i ka hema anei ke ala o ke ala? Aole paha. Hookahi no ala, a he pololei wale no ia Iesu no ke kuhikuhi, a oia hoi ke ala wahi ana. E hoopili mau aku ia ia, a nana no e alakai a hookomo aku iloko o ka lani.

HAWAII.

Davida ke Alii.

"Hookokoke mai la na la o Davida e make ai; a kauoha mai la oia ia Solomona i kana keiki, i mai la.

Ke hevee nei au i ka aoao o ko ka honua a pau; e hoikaika oe, a hoike ia oe iho he kanaka makua.

A e malama oe i ke kauoha a Iehova kou Akua; e hele ma kona mau aoao, me ka malama i kona mau kapu, a me kana mau kauoha, a me kona mau kanawai, a me kana mau olelo me ia i kakou ia'i ma ke kanawai ia Mose, i pomaikai oe ma na mea a pau au e hana aku ai, a i na wahi a pau e hula ae ai oe.

I hooko iho ai o Iehova i kana olelo ana i olelo mai ai no'u, i ka i ana mai, lna e malama kau mau keiki i ko lakou aoao, e hele imua o'u me ka oiaio, me ko lakou naau a pau, a me ko lakou uhane a pau; aole oe e nele i ke kanaka ole (wahi ana) e noho maluna o ka noho alii o ka Iseraela."

"Alaila hiamoe ihola o Davda me kona mau makua, a ua kanaia ma ke kulunakauhale o Davida."

I Na Lii 2:1-4 & 10.

Ko Solomona Akamai.

"Haawi mai la ke Akua i ke akamai ia Solomona, a me ka manao he nui loa, a me ka nui ana o ka naau, e like me ke one ma kahakai.

A o ko Solomona akamai, ua oi aku ia mamua o ke akamai o na kamaaina a pau o ka hikina, a me ke akamai a pau o Aigupita.

A ua olelo mai la oia i na olelo akamai ekolu tausani, a o kana mau mele, hookahi tausani ia a me kumamalima.

A ua olelo mai oia i na laau, mai ka laau Kedera ma Lebanona a hiki i ka husopa, e kupu ana mailoko o ka pa, a olelo mai la hoi oia no na holoholona, a me na manu, a me na mea kolo, a me na ia.

Hele mai la hoi ko na lahuikanaka a pau e hoolohe i ke akamai o Solomona, mai na Lii a pau o ka honua, i lohe i kona akamai."

I Na Lii 4:29-34.

NA BUKE

I HOOLAHAIA E KA PAPA HAWAII

ME KE

KUMUKUAI O KELA ME KEIA

BAIBALA HEMOLELE NUI ILI GULA NANI

me na kuhikuhi ma na aoao…$12 00

Baibala Hemolele Nui ili eleele kaekae wai guila……………….5 00

Baibala Hemolele uuku iki iho kae wai gula…………………….8 00

Baibala Hemolele pananaiki iho ili eleele……………………….4 00

Baibala Hemolele ili eleele………………………………………2 00

Kauoha Hou ili gula nani me na kuhikuhi……………………….3 00

Kauoha Hou ili eleele kaekae wai gula………………………….1 00

Kauoha Hou ili eleele……………………………………………...75

Kauoha Hou Hapa Haole…………………………………………..75

Lira Hawaii 1848 me ke kanawai………………………………….25

Lira Hawaii 1855…………………………………………………..25

Moolelo Ekalesia…………………………………………………..50

Haiao ili lahilahi…………………………………………………...10

Hele Malihini ana………………………………………………….25

No ko ke Akua ano………………………………………………...25

Lira Kamalii……………………………………………………….25

Hoike Palapala Hemolele………………………………………….25

Moolelo o Heneri Opukahaia……………………………………...25

Hoike Akua………………………………………………………...20

Wehewehehala……………………………………………………..20

Ninau Hoike ili manoanoa…………………………………………25

Ninau Hoike ili lahilahi……………………………………………15

Kumumua Kula Sabati…………………………………………….15

Buke Lawe Lima…………………………………………………..15

He Buke no ka Pope……………………………………………….10

Ui Kula Sabati Helu 3……………………………………………..20

Ui Kula Sabati Helu 4……………………………………………..65

Ui Kula Sabati Helu 5……………………………………………..20

Buke Euanelio a Ioane…………………………………………….15

Himeni Hawaii…………………………………………………..1 00

Himeni Hawaii ili nani…………………………………………..1 70

Kumu Leo Mele…………………………………………………...15

Kumu Leo Mele ili nani……………………………………………50

NA KAUOHA HOU PAKEKE.

Ili gula nani………………………………………………………1 50

Ili eleele kaekae nani……………………………………………….50

Ili eleele…………………………………………………………….35

KAUOHA HOU PAKEKE ME NA HALELU.

Ili gula nani………………………………………………………1 75

Ili eleele kaekae wai gula…………………………………………..60

Ili eleele……………………………………………………………50

Buke Wehewehe Huaolelo Baibala, elua ano….

Buke Wehewehe Ano Mataio………………….

NA HALELU PAKEKE.

Ili Gula nani……………………………………………………….50

Ili eleele kaekae wai gula………………………………………….30

Ili eleele……………………………………………………………20

Ka Hae Hoonani (Buke Mele)…………………………………….25

EIA NA BUKE HAAWI WALE.

PALAPALA LIILII---

Helu 4---Makemake anei oe i ke o'a?

Helu 6---E hele i o Kristo la.

Helu 7---Ka hoi ana mai o ke Keiki Uhauha.

Helu 11--No ka hoohiki wahahea i ke Akua.

Helu 16--Ka Eehia ana o ka Ahaaina a ka Haku a me ka Bapetizo ana.

Helu 17--Mai hana ino i na holoholona.

Helu 18--No ka mahi ana, kuai ana a me ka inu ana i ka Awa.

Ka Davida Malo Kumumanao.

Ka Moolelo o Batimea Punaiki.

Aia ke keena kuai buke o ka Papa Hawaii me ka h@ina o Alanui Beteta me Alanui Kalepa, e kokoke ana i ka Hale Leta. J. F. POKUE.

Kakauleta o ka Papa Hooko o ka Ahahui Euanelio o ko Hawaii Pae Aina.

KA NUPEPA "KUOKOA!"

Hoopuka mau ia

I KELA POANO KEIA POAONO.

$2.00 no na mahina Umikumamalua

$1.00 " " " @

ME KA HOOKAA MUA MAI.