Ka Nupepa Kuokoa, Volume XIII, Number 6, 7 Pepeluali 1874 — Ka Makemake Lahui. [ARTICLE]

Ka Makemake Lahui.

Eia no he mau manawa e ili mai ai maluna o ka Papa Pai e hana pololei aku ai, a ma ke ano he elele no ka Lahui, aole e pono e hana me na manao kulike ole. Pela no ka hiohiona o keia wa. O na la o ka Moi hanohano a opiopio, ua heluia a ke moe la me na Moi o Hawaii nei i hala e aku. Oiai, aole oia i hooili i panihakahaka nona, ua hoohakahaka hou ia ka Noho Alii, a nolaila, eia hou o Hawaii iloko o ka pioo, e kali ana o ke kohoia ona Moi kupono malalo o ke Kumu Kanawai. Ke ola nei no na Alii hanau o ka aina e nana aku i ka hele ana o ka Moi i make, a ke kukala mai nei ke Kumukanawai, mai loko mai o na Alii hanau, hookahi o lakou e kohoia e ka Ahaolelo i pani hakahaka no ke Kalaunu. Mawaena ona Alii a pau, aohe Alii e ae a ka Lahui e nana aku ai me ka lokahi o na manao, o ke KANELA D. KALAKAUA, wale no, ke keiki a Keohokalole ke Keiki Alii, nona na hiohiona e lilo i Moi kupono, i makua akahai, a he hoopakele no ka Lahui. Koe wale no kona kaikaina Alii, oia no hoi kekahi Alii hanau e ae i kupono no keia kulana, a i kulike paha e hooko i na manaolana o ka Lahui.

No ia mea, ia makou e hookipa mai nei i na mahalo kiekie ana no na Alii hanau a pau e ola nei, aole i maopopo lea ia makou he wahi kanalua kekahi o ka Lahui, o ke koho wale aku no i ke keiki Alii DAVID KALAKAUA no ke kulana kiekie he Moi no ko Hawaii Pae Aina, a oia ka ka Lahui e hoikeike aku ai i ka Hale Ahaolelo, e koho mai iaia i pani hakahaka no LUNALILO. Ke hoopii pu aku nei no hoi makou i na Alii, e hana pololei iloko o keia wa pioo e like me ka hanauna o na Alii Hawaii, a e koho i kona aoao no ka pomaikai a me ka maluhia. Ina he lehulehu na poe e ae e holo ana, hookahi wale no mea e koho ia ana, oia ka mea i maopopo, aole he hana naauao e hoole ina he hiki, no ka uluaoa hookelakela, o ke koho maoli aku no iaia i Moi, oia ke Alii i kaulana. A ke ao aku nei makou i ka Lahui mai Hawaii a Niihau, e malama i ka maluhia a me ka noho kuee ole, a e hoike ae i ke ao holookoa e like me ko kakou hana mua ana iho nei, i ike ia mai ai ua makaukau na Hawaii no ka malama ana ia lakou iho, ke koho ia kekahi Alii hou. No ia mea, he pono ia kakou e hui pu ma ke koho ana ia ke Keiki Alii DAVID KALAKAUA, i pani hakahaka no ka Noho Alii hakahaka o Hawaii nei. E hoopanee kakou i na kuee, a e noonoo ma ka mea nana e hookiekie ae i ka maluhia a me ka pomaikai o ko kakou aina hanau oia o Hawaii nei.