Ka Nupepa Kuokoa, Volume XII, Number 34, 23 ʻAukake 1873 — Page 3

This text was transcribed by:	Puakea Nogelmeier
This work is dedicated to:	Nakila Steele

Ka Nupepa Kuokoa

KE KILOHANA POOKELA NO KA LAHUI HAWAII.

Nu Hou Kuloko.

Ua holo aku nei na alalaua mai na ae kai aku o Ainahou aia la i hea.

He onawaliwali iho nei ko ke Lii ka Moi, a ua oluolu loa ae nei ko ke Lii ka Moi, a ua oluolu loa ae nei. Aia no ia ma Waikiki-kai e noho mai nei.

Mai poina ko makou poe heluhelu i ka ke kilohi mau ae i na OLELO HOOLAHA, aohe i kana mai ka nui e puka mau nei.

Ke lealea mai nei na keiki o ke kai o na moku manuwa aina e ku nei. Aole e nele ana ko lakou hookahekahe mau dala mai no oka nei o ka aina.

I ka POALIMA i hala aku nei, ua iho aku ka haole nona ka hoolimalima ana i ka Hotele maluna o kona kaa ma ke alanui pali aku o Nuuanu.

Mai kekahi leta mai o Hilo, i ike iho ai makou, he ikeia aku no ka pua mai o ka uahi o ka lua pele e ko Hilo i ka nana aku, a pela no ko ka mauna kiekie.

O ka la 20 aku nei o keia malama ka ia i hookaawaleia ai no ka ninaninau ana i ka pake pepehi kanaka o Kauai Ua lohe wale mai makou, malie he ono opiuma ko ua pake la i hele ai e imi dala e loaa mai ai.

Ma ke kakahiaka Poaono aku nei i hala, ua holo aku ke kuna Kinau me ka piha papa, aka iaia i kaa aku ai mawaho o Lae Ahi, ua iliki mai la ke kikio makani i kona kia hope a poomuku iho la. Ma ke ahiahi, ua kii aku o Pele e kaukoo mai iaia iloko nei o ke awa.

Ua ae o Mr. A. Kalauli, e haiolelo ma ka po Poalua mua o Sepatemaba aenei, no ke kumumanao e nune nei mawaena o na kanaka Hawaii, oia ke Kuikahi Panai Like me ka haawi ia Ewa.

MAKE EMOOLE-Ma ka Poaono o ka pule i hala, make emoole iho la o Kauka J B Saunders o Wailuku Maui ma kona home, no ka mai ake pau. Ma Kona, kona wahi i noho mua ai no kekahi mau makahiki.

NA KOKUA ALOHA.-Ma kekahi olelo hoolaha o ka pepa o keia la, e ikeia ai, ke noiia aku nei na kokua a na makamaka a me na hoaloha o ka poe i hoopilikiaia a hookaawaleia ma Kalawao, ina he mau kokua lole ka lakou e manao nei e hooili aku no kekahi poe o lakou, e lawe ae ia mau mea ma kahi o Samuela G Waila ma Honolulu, a nana e hooili aku me ke aloha.

Ma ka Poaha iho nei no, lawea hou mai ana ka lohe, ua loaa hou he mai pake ma ka Halemai Moiwahine. E moe make hou no paha auanei oia la i ka hoole. E kali kakou a hoea mai ke kokua hewa o keia mau la Mai poina oe e K.H.P i ka leha ae ma Solomona 3:28-32. Aloha nui.

He oiaio paha keia lohe, aole paha. Eia no ia, ke noho mai nei no ka kekahi mau mai lepera mauka o na ulunahele o Ewa aenei Ina he oiaio keia noho huanaia ana mai e na makamaka, aole anei e pono ia lakou e noonoo mai hoi kekahi no ke ola o ka lehulehu. Ke hai aku nei makou, aia o Kalawao ke waiho maila me ka aina palahalaha, a i malama pono ia na ola a me na hune e ke aupuni. Manao anei ka poe e pee mai nei, ua oi ae ko lakou pono a lako, i ko ka poe e noho mai la ma Kalawao, kahi a na hoolako ana a ke aupuni e haawi nei? E hele ilaila ka poe i loohia i keia mai, aole no ka hana ino ia, aka, no ke aloha no.

AIA KEKAHI ILIO.-Ma Kapalakiko, o kana hana he ohi pepa mai na puka mai o ka poe lawe pepa, a lawe aku a huna iloko o ka puu opala. A i kekahi la, hoohuoi iho la ka mea lawe pepa i ka lilo pinepine o kana pepa, nolaila, hoomakakiu iho la ua kanaka nei ma ka waiho ana i kana wati ma kahi ana e waiho mau ai i kana pepa, a i ka wa i hiki mai ai ke kolohe, a lawe aku la i ka mea i waiho ia, ia manawa ukali aku la ua kanaka nei mahope ona a hiki wale i kahi a ua ilio nei mahope ona a hiki wale i kahi a ua ilio nei e waiho mau ai i na pepa. I ke kii ia ana 'ku e huli, aia he haneri pepa i lawe huna ia e keia ilio.

Ua oleloia e ka haiolelo o ka po Poalua i hala, aole e laweia mai ka hewa o kana mau olelo kue i ka hooponopono aupuni ma kona ano Luna Aupuni. Eia ka ninau, ina i ka wa e ninau ia ai ka pono a me ka ole o ka haawi hoolimalima ana ia Ewa, ma kona ano Luna Aupuni, heaha la kana e pane ai? E hoole ana pa ha oia e like me kona manao i paiia iho nei,a e ae aku ana paha? Ina e hoole oia, alaila, ua malamalama ke alanui e puka ai no ka poe noonoo lokahi ole me ko ua Poo Aupuni, no ka mea, he mea pono ole i ka poe opukekeue ke noho malalo o ka malumalu hookahi. Ina hoi oia ma ke ano luna aupuni, he pono ke hoolimalima ia Ewa, alaila, he kanaka keia elua ona haku, oia hoi keia, ma ke ano makaainana, he kue; a ma ke ano luna aupuni, he ae i ka pono. Nolaila, ua ka lehulehu e noho Lunakanawai iho no lakou ma keia ninau e waihoia aku nei, a e hooholo ma ke kupono, ke maopopo ka pololei.

E uku.-E uku mai ka poe a pau i aie mai ia mkaou, no ka mea, e uku e ia ana ka pepa e paiia iho ai mamua. Ke makemake nei no hoi makou i na dala no ka uku aku i na paahana no ke pai ana.

Ua malamaia e ko Lahainaluna mau keiki ka la hoihoi ea o ke aupuni nei, a kela mau lima lawelawe o ke aupuni nei, a kela mau lima lawelawe o ke aupuni i hala i hookae ai.

No ka piha a loa o ka pepa o keia la i na manao a me na nu hou, noalila, ua waihoia ka makou pane i ka Ewaewaiki a keia pule ae. He mea iki no ko keia pule.

E NANA I KEIA-Ke kaheaia aku nei ua lala a pau o Ka Ahahui Euanelio o Hawaii Komohana, oia hoi na Kahu, na Elele a me na hoa lala. Oiai, aia ma ka la 27 o Augate nei, hora 10 A.M, e halawai ai ka aha, ma Helani Kona Akau. Me ka mahalo. J.K KAHUILA, Kakauolelo.

Waiohinu, Aug. 7 1873.

Ua hoomoe iho nei na kamana kapili moku Tibbetts & Sorenson i ke kila, a ke haualaoa nei na wae, o kekahi wahi moku nuku, he 25 paha tona, ma ko laua kahua kapili, ma ka makeke kuai i-a. E haawi ana ia hana i mau ola kino no ka poe lawelawe ma ia hana.

Ke i mai nei ko kakou mea hoopuka moolelo, aia keia pule ae ka, e hiki aku ai ka kakou huakai makaikai moolelo, iloko o na aupuni he kanalima kumamalua, kahi a kakou i lohe ai, malaila i lilo ai ka mana o ka eke talena i mea ole, imua o ka owili diana pauda a ke kaikamahine o ua aupuni la; a heaha la hoi kona mana imua o kahi opu hipa, ka mea nana i hooluliluli malie ae i ke kumu o ia mau aupuni, a poholo mai la iloko, hookahi ia hele ana.

KA MOKU KUNA "ODIFELO."-Ma ka huakai hope a keia kuna mai Hilo mai nei, ua kipa ae oia e hoolelel i kekahi, mau ohua ona ma Pukoo, Molokai. Ua kunia ka waapa, a ua aolo ia na ohua iuka, i ukaliia e ke Kapena. Aka, no ka poeleele loa paha o ka hoi ana mai o ka waapa, a no ka hapa hoi o na lima hana oluna o ka moku, he elua wale no luina a me ke puhi hapa a ka makani o ia wahi kowa, ua hiki ole ke hoopiipii. A o ka waapa hoi, noke hele aku la i ka huli a komo ana i ka pali o Kaholo, a malaila kahi i hoolulu ai, aole nae he loaa. O ka moku nae, ua huli hoi loa mai no i Honolulu nei, i kahi nui o ka ipuhaole. A o kahi waapa hoi, ua nee hele loa aku oia a pae i Manele, a mai laila aku i Lahaina. A ma ka manao o ke Kapena, ua hookele mai oia i ka waapa, mamuli o kona akamai, a komo mai la i ke awa nei o Kou, ma ka auina la Poalua iho nei.

WAIHO NA IWI I KA AINA MALIHINI.-Mai ka makamaka mai o ke Kuokoa ma Vernon Sutter Co. Kaleponi. J. Kapu i loaa mai ai keia wahi nu hou kaumaha no kekahi mau Hawaii ponoi i waiho na iwi i ka aina malihini.

Ua make o Henere Nahoa, no Lahaina, Maui. He keiki opiopio o ke ano, a make aku la.

O Hare Nuuhiwa, no Hoouaula, Maui, ua make aku la. Aole no i oo loa keia kanaka a waiho aku la na iwi. O ke kumu o kona make ana, i hou ia e ka wahine Ilikini i ka pahi a ku ma ke kuamoo e pili la i ka opi opu. Ekolu mahina mahope o ke ola nawaliwali ana mai keia eha mai, make aku la oia. Ua hookolokoloia iho nei no e ka aha haole ma Sakarameta a ua hookuu wale ia keia hewa nui. Eia nae, i ka make ana o ua kanaka nei, ua hoolaha mai ke kauka o ka halemai maloko o ka nupepa ina he poe e manao ana e hoopii hou ia i ka Aha. Aka, aole nae i hoopiia a hiki i ka la 16 a Iulai, oia ka wa i kakauia ai keia palapala.

HE HOOKAE NUI I KA ILI ULAULA.-Ma ka auina la Poaha iho nei, ua kukulu ae kekahi poe Lahainaluna hapa he 20 paha, he Ahahui kalepa, maloko o ka luakini o Kaumakapili malalo o ke poo, "Ahahui Kalepa a ko Hawaii Ponoi," A iwaena o ka noonoo nui ana i ke kupono o keia poo, no ke kono aku i ka poe a pau e makemake ana e hooholo aku i ka lawelawe ana i keia hana, aia hoi, ua ku mai o E. Mikalemi, a olelo mai, "Ina o ke poo keia o ka Ahahui, aole au e komo, no ka mea,ua haalele aku nei au i ka'u hana a hele mai nei no ka manao he Ahahui keia na ka Lahainaluna wale no aole ka poe e ae. Aole o'u makemake iki i ka poe e aku o waho e komo mai ina no he Hawaii lakou, aole nae i komo i Lahainaluna. O ko'u makemake, na ka Lahainaluna waleno aole ka poe e ae. Aole o'u makemake iki i ka poe e aku o waho e komo mai ina no he Hawaii lakou, aole nae i komo i Lahainaluna. O ko'u makemake, na ka Lahainaluna wale no e hapai, a i haule iho a ku paha. O ke ano o keia Ahahui he hoomaemae i ka inoa ino o na Lahainaluna apela aku."

Ma keia e ike ai ka lehulehu, ua hookae maoli loa o Makalemi i na Hawaii Ponoi e ae, aole makemake e hapai pu i kela hana maikai, aka, eia no kakou a pau maluna o ka waapa hookahi, ina e kahuli ka waapa, e poholo ana kakou a pau. He kupono ole i kekahi kanaka Hawaii e kue aku i ke komo ana mai o kekahi kanaka Hawaii e lawelawe pu. Eia anei malalo iho o ka la kekahi mea i oi ae mamua o ka mea nana i hana, e hookaeia mai nei kekahi poe o kakou. E nana pono ka Apana o Honolulu i keia hana ano e.

Nu Hou o na aina e.

Hookahi hebedoma ka makamaka.

Ma ke ku ana mai a ke kiapa Hawaii D.C Mare mai S. Farakiko mai i ka Poakahi nei, ua loaa mai ia makou na nupepa a hiai i ka la 2 o Augate. Eia malalo iho nei na nu hou:

Ua hoopuka ae ka Peresidena o Amerika Huipuia he olelo kuahau, e weheia ana he Hoikeike nui o na mea a na lahui a pau, oia na mea paahana akamai, ulu, a pela au, ma ke kulanakauhale o Piladelapia, ma ka la 19 o Aperila 1876, a ma ka puha ana hoi o ke keneturia makahiki o ko Amerika Huipuia noho kuokoa ana. Ua konoia kahi Hawaii uuku nei e komo pu aku ia hoikeike nui.

Ua lonoia mai, ua loaa kekahi lua gula waiwai loa ma ka Ripubalika o Buanosa Aresa, a ke olelo pu ia la, oia ka oi loa o na lua gula waiwai loa ma ke ao nei. O kekahi hana o na lua la, ua lilo i ke kuaiia no ka $100,000,000.

Enelani.

Ludana, Iulai 11.-Ua hoopaaia iho nei ka mare mawaena o ke Duke o Edinebor, a me ke Duke Nui Wahine Maria Alexandrowna, ke kaikamahine hookahi wale iho no a ka Emepera o Rusia. I ka hora 11 o keia po, ka pau ana o na olelo hookoho ia hana. Ua ike mua ke Duke i kona pono e lilo i Duke o Saxe-Coburg, nona paha auanei e komo ai kekahi mau noonoo pili aupuni.

Ma Enelani, o ka manao a na Kuhina i lawe mai ai imua o ka hale o na Makaainana no ka hoomahuahua ae i ka uku makahiki o ke Duke o Edineboro i $125,000 ke Mare i ka wahine, ua halawai mai ia me na kue ikaika, aka, ua hooholo lokahiia nae e ka Hale o na Alii, a ma ka Hale o na Makaainana, he 162 ae, a he 18 hoole.

Ke olelo mai nei kekahi olelo ku i ka wa mai Ladana mai penei: Ua malamaia he halawai malu ma ka Hale Stafford, ka hale noho o ke Duke o Surtherland, no ka hoomahuahuaia o ka hoomoe alanui kaa ahi ana ma ka Emepire o Kina. Ua manaoia e ka poe nana i hapai i keia hana, e hoolako aku ma ke ano he makana manawalea, oia ka haawi ana aku i mau apana hao e lawa ai ke hoomoe i omo mile, me ka manao e kona aku i ko ka Emepera o Kana noonoo e hooiaio mai i ke kukulu ana ia mau apana o ke alanui kaa ahi. Ua pau i ka hookupuia ka hapalua o na dla e lawa ai keia hana ke hapaiia.

GEREMANIA.

Parisa, Aug 1.-I ka wa e hoi ana na koa kiai Geremania ma ka apana o Vosges ua loheia aku ka leo, "E ola na kipi."

Parisa; Aug.1-Ua unuhiia aku na koa kiai o Geremania malalo o Kenela Manteufel, mai Nancy aku, ke kulanakauhale nui o ka okana aina o Meurthe, kahi i noho muaia e na koa Geremania mai ka manawa i oki mai ai o ke kaua. O kahi wale no i koe o Farani, e noho ia mai nei e ka enemi lanakila, o ka apana o Verdul.

AUSETURIA.

Viena. Iulai 29-Ma na pale keakea mawaho aku o ke kulanakauhale, a ma na kauhale e poai a puni mai ana mai ke kulanakauhale ponoi aku, iloko o ka la hookahi, ua hiki aku i ka elua haneria mai, a he kanakolu make. No ka nui o ka pahola ana mai o keia mai luku, ua koi ia mai ke aupuni e hoonee ae i na koa i Bruck, he wahi kauhale he 23 mile ma ka hikina hema o Viena. Ma keia kauhale, ua haiia mai, he iwakalua ka nui o ka make i ka la hookahi, a o na mai luku la e noke la ia wahi, o ke Corela no ia.

FARANI.

Prisa, Iulai 30.-Ua lono laulaha ae, e paa ana o Generala Makemahone i ka noho ana Peresidena o ka Ripubalika i eono malama hou aku ka loihi, a ia wa e haalele ai oia a hoi e noho poo no na koa. Ke ike ia la no hoi e kekahi poe noonoo, e pau'na ka Ripubalika, a e paniia ana malaila he aupuni alii, a ke ike e ia la, e hoi io ana o Makamahone, ka mea i makemake loa ia e na koa, e noho ma ke poo o ka oihana koa, ke hoololiia ae ma ke ano e ke aupuni. Ua hooholo iho ka poe hema o ka Ahaolelo Ripubalika, e hoi ma na apana i ka wa hoomaha, a paipai aku i na makaainana, e hoopau i keia Ahaolelo, a e hoomakaukau me ka ikaika no ke koho balota hou.

SEPANIA.

Ua komo aku o Don Carlos iloko o Biscay.

Lisebona, Iulai 30-I keia la, ua hui'ku ka moku kaua Sepania Villa Madarida ma ka poe kipi ma Cadiza, a ua kipu aku la oia i ka hale panda.

Madarida, Iulai 31-Iloko o ka Hale Ahaolelo i keia la, ua hoike mai ke Kuhina Kaua, ua hoomaka hou aku ka poe kipi i ke kipu ana i ke kulanakauhale o Almeria i keia auina la.

Ua wawahi ae ka poe kipi i ka hale noho o ke Kanikela Geremania ma Carthagena, me ka makau ole i ka hae Geremania e welo ana. O ke kumu paha, no ka hopu ana o ka moku kaua Geremania malaila i kekahi moku o ka poe kipi. Malia paha e komo mai ana o Geremania e pakuikui i ka poe kipi no keia hoinoino i ka Hae Geremania.

OLELO HOOLAHA

Ua Haule ka Buke Malama Dala Banako a N.P GOODALE. Ua papa ia ka uku ana aku i na Dala maloko o ia Buke. Ke koiia aku nei ka mea e loaa ai, e hoihoi mai i ka Banako o

611 2ts 612 BISHOP & Co.

OWAU O KA MEA NONA KA INOA MALALO

nei, ke kauoha aku nei au i ka poe ale a me ka poe i aie ai o KAEHA (k), no Waikapu, mokupuni o Maui. I make aku nei, e hele mai e hooponopono me a'u, ka Lunahooponopono waiwai o Kaeha, mai lohi.

SAM OBEDA, Lunahooponopono Waiwai.

Wailuku, Aperila 2, 1873 611 4ts 614

KE PAPA, A KE HOOKAPU LOA IA AKU

nei na aina o Wailele a me palikea ma Kalihiuka, Oahu, aole e hele wale na holoholona, a me ka poe kuleana ole maluna iho. Ina e kuela kela olelo hoolaha e ka poe mea holoholona, alaila, e hopuia na mea kue, a na ke kanawai e kau iho na haawe o ka popilikia.

WAILUPE. Kalihiuka Aug.15, 1873. 611 2ts 612 o.

E IKE auanei na mea a pau, owau o ka mea nona ka inoa malalo ino nei, ke papa aku nei au i ka poe waiwai a pau loa, aole e hiaue mai i kuu wahine mare, ia MRS. KELIAUMOANA, no Kaalaea, Oahu, no ka mea, ua haalele kumu ole mai oia la'u, a ua hele aku mamuli o kona manao. Ke papa pu ia aku nei no hoi na mea a pau, aole e hookipa iaia ma kekahi ano e ae, o hoopiia auanei lakou ma ke Kanawai. K. KUAPALAHALAHA.

Kaalaea, Koolaupoko, Aug 11, 1876. 611 4ts 613

Hoolaha Komisina Pai ena Aina.

KE HAIIA AKU NEI, UA NOIIA MAI AU E hoomaopopo a e hoolalo i na palena o ka Ili o Kalawahine. E hooloheia keia noi, ma ka hora 11 o ka Poaha, ka la 28 o Augate 1873, ma ka Hale Hookolokolo. Honolulu, a ma ia manawa a ma ia wahi, e hooloheia na mea a pau, ke kulana lakou. L. McCULLY.

Komisina Palena Aina o Oahu.

Honolulu, Iulai 30, 1873 610-3ts 612

E IKE MAI NA KANAKA a pau o keia a me keia ano, owau o ka mea nona ka inoa malalo iho, ka mea a kuu kane mare i hoolhaa ai, aole au i haalele iaia no kekahi kumu e ae, aka, ua haalele au iaia no na kumu malalo iho nei-he kanaka pepehi hoomainoino ia'u imua o ka lehulehu, he kanaka hoounauna ino ia'u ma na hana kaumaha, e like me ka mahiai, kii holoholona, olokaa wahie, a pela aku. He kanaka hoopuka mau i na olelo hooweliweli o'u, e oki ka i kuu poo i ke koi, aole ka ona minamina i kona oia. Oia iho la na kumu o'u i hele ai. Ua hai mai no hoi kela, aole au e aie, ke hai aku nei au me ka oiaio, he mana hiki ia'u ke aie ma ka inoa o kuu kane; a ua hai mai oia, ua kekahi poe e ae e hookokono ia'u e hele, ke hai pololei aku nei au, aole na ka poe e ae, na'u ponoi no, no kuu makau, e like ma na kumu a'u i hai ae la maluna. MELE PEELUA KAHALEPUNA.

Honolulu, Aug 4, 1873. 610-4ts 613

AHA HOOKOLOKOLO KIEKIE O KO HAWAII PAE AINA. Ma ka waiwai o D. Weatherbie no Honolulu, i make. ma ke keena imua o ka Hon. H.A. Widemann.

Ma ka heluhelu a me ka waiho ana mai o ka palapala noi a me ka papa hoike waiwai a S.B Dole ka Luna Hooponopono, me ka palapala hooilina e pili ana o ka waiwai o D. Weaterbie, o Honolulu, i make, e noi ana e aponoia na hoolilo ana i na $400 ua mailoko mai o na $400 00 i loaa iaia, e nanaia a hoaponoia a e kauohaia e mahele i ka waiwai e paa nei iloko o kona mau lima, no ka poe i kuleana ia waiwai, a e hookuu iaia a me kona poe hope mai ka noho ana ma ia ano.

Nolaila, ua kauohaia o ka POALIMA, la 12 o Sepatemaba, A.D. 1873, ma ka hora 10 A.M, imua o ka lunakanawai i haila, ma kona keena maloko o ka Hale Hookolokolo ma Honolulu, oia kahi a me ka maanwa e hoolohe ai i ua noi la me ka papa hoike waiwai, a o ka poe a pau i pili, e hele mai a e hoike ina paha he kumu io e ae ole la ai ua noi la, a na lakou e hoike mai owai la ka mea kuleana la waiwai. A o kela kauoha e hoolahaia ma an olelo ENelani a Hawaii, a e paila ma na nupepa "Ke Kuokoa a me Ke Au Okoa i huiia" a me ka "Hawaii Gazette," he mau nupepa i paiia a hoolahaia ma Honolulu, no na hebedoma ekolu mamua ae o ka manawa e hoolohe ai.

Kakauia ma Honolulu, H.I., Aug.6, A.D. 1873.

H.A. WIDEMANN,

Lunakanawai o ka Aha Kiekie.

Ikeia:

JNO E. BARNARD, Kokua Kakauolelo Aha Kiekie.

610-3ts-612.

AHA HOOKOLOKOLO KIEKIE O KO HAWAII Pae AIna. Ma ka waiwai o ka Moi i make KAMEHAMEHA V. Imua o ka Lunakanawai Kiekie E.H. Allen.

Ma ka heluhelu a me ka waiho ana mai o ka palapala noi a Kahokua (k), e hoike mai ana, ke kaikuaana ponoi oia no M. Kekuanaoa i make, a he hooilina kupono ma ke Kanawai no Kamehameha V., i make, e noi mai ana i ka Aha, e koho i la a me kahi e hoololhela ai kana Noi, a ina ma ia hoolohela ana, a kukalaia, oia ka Hooilina, alaila, o ka waiwai o Kamehameha V, i make, e maheleia iaia.

No ia mea, ua kauoha ia o ka Poakolu, ka la 10 o Sepatemaba M.H 1873, ma ka hora 10 kakahiaka ma ka Hale Hookolokolo ma Honolulu, Oahu, imua o ka Mea Hanohano Elisha H. Allen, ka Lunakanawai o ka Aha Kiekie ma ke Keena, oia ka la i hoana e ia no ka hoolohe ana ia Palapala noi, a ua kauoha hou ia, e hoolaha aku ma na nupepa* "Hawaiian Gazette" a me ke "Kuokoa" he mau nupepa i paiia a hoolahaia ma Honolulu, no na hebedoma eha, e kono ana i na mea a pau i pili, e hoike mai, loa paha he kumu e ae e hooleia ai kela noi. ELISHA H. ALLEN.

Lunakanawai Kiekie.

Kakauia Honolulu, Iulai 30, 1873 609-4ts 612

OLELO HOOLAHA!

O KA POE A PAU E MAKEMAKE ANA E hoouna Dala aku i ko lakou mau makamaka a me na hoaloha ma Kalawao, ua hiki no ke waihoia mai ma ka ilima o ka mea nona ka inoa malalo iho nei, a e haawiia na palapala kikoo dala ia lakou, ma ka Hale Kuai ma kalawao. Aole mau lilo e ae. S.G WAILA.

Augate 6, 1873. 610-3m 621

JUDD & LAINE (Alani a me Laine.)

NA MEA KUAI MEA AI o na lako ai a pau, na mea ulu, a me na mea hoomomona lio.

Halekuai malalo o ka Hale Mu, Alanui Papu. Honolulu. 564ly

AI HANAI I KA MOA!-Mai keia wa aku, e kuai makepono loa aku no au i ka ai e hanai ai i ka moa. I ka poe e makemake ana, a e loaa no ma Ulakoheo, Honolulu. CHULAN & Co.

Honolulu, Mar. 25, 1873 (581 1y) (Kiulana ma.)

KAUKA O.S.CUMMINGS, he Lapaau Homeopathica.

O ke ano o ka haawi ana i ka Laau i kupono no na mai

HUI, RUMATICA, FIVA,

a me na mai kaa loihi wale

Aia kona Keena Oihana ma ka Hale Kauka o Kenede, Helu 63, Alanui Papu, Honolulu.

589 1y2

MAKEMAKE ANEI OE I PAPA INOA, inika me ka hulu no ka hoailona ana i na lole? Ina pela e hele ae i o Thrum la, ma Waikiki iho o ka Hale Hana Wati o Kini.

Makemake anei oe i mea kuni ma kou mau buke? Ina pela, e hele i o Thrum la.

Makemake anei oe i na baibala, Buke Himeni, na Buke Kula a kanawai, a Buke Kuokoa i humuhumuia? Ina pela, e niau i o Phrum la.

Makemake anei oe i kanana, na wahi leta, na peni, inika , penikala, ia mea aku ia mea aku? Ina pela, e kipa i o Thrum la.

Makemake anei oe i na papa pohaku, na buke? ao kakau lima, na buke hoomanao, a pela aku i Ina pela, e naue i o Thrum la.

Makemake anei oe i buke hoahu kii, na pahi pelu, na pahi kahi umiumi, a pela aku? Ina pela, e kipa i o Thrum la.

Makemake anei oe i mau mea pani na kamalii? Ina pela, e uhai i kahi o Thrum.

Makemake anei oe i na Buke malama waiwai, ka buke hoomanao, a i na buke paa lima? i hele i o Thrum la.

Ina he makemake ko oukou i na mea pili i ke kakau, na buke waiwai, na papa inoa i okiokiia, hana kii, a i ole ia humuhumu buke, e hele i o

600-8ms-612 THRUM LA.

AKIU PAKE.

HANA I NA KAMAA

HILA AULII MAIKAI

ALOHA OUKOU e na kanaka Hawaii a pau a me na wahine maka onaona o Honolulu nei, na Iwa kiani o Paliuli. Owau o ko oukou hea aloha, ka mea nona ka inoa malalo nei, he kumeka kamaa e noho ana ma ke Alanui Nuuanu, ma ka hale no na ka Helu 65, malalo o ka Hale Pai Kii Hooleleaku.

Na Kamaa Buti maikai loa i hanaia me ka ili Farani maikai loa, no ka uku haahaa me ka oluolu.

Na Kamaa Wahine maikai loa o kela a me keia ano, no na ili Farani maikai loa no ka uku oluolu.

No ka hana ana i na hila o ke kamaa me ka paa loa, a maikai kupono i ka makemake me ka uku oluolu loa-A no ke poho ana i na kamaa nahaehae me ka maikai loa no ka uku oluolu loa.

Na ili noho lio o kela me keia ano-he nui wale na ili maikai loa. Eia hoi kekahi, o na kamaa a pau a'u e hana ai, a i na ua ikeia, ua kapakahi, a nohae, a kahuli a puka paha iloko o ka makahiki hookahi, e hoihoi mai a na'u no e hana meka uku ole. A o na kamaa i waihoia ma kuu lima a hala na mahina 3, e kuai kudala aku no au no ka loihi loa Nolaila, e hele nui mai oukou ma kuu hale hana kamaa, e ike maka i na hana a pau, i pau ke kuhihewa,a e hana no ua e like me ko oukou makemake, ka aulii hulali o na kuihao malalo o na hila, e uheuhena ana i ka papa o Maukele, e aloha ana i kona hoa, ka uwe a ke kamaa ke hanaia.

590-6m

HALE KUAI KIKAHAKAIWAINAPALI!

HAYSELDEN BROS.

[KOMO ME PELEKA]

E kuai aku ana laua i na

Waiwai Lole a pau!

ME KE KUMU LILO NO NA HEBEDOMA EKOLU!

E hoomaka ana ma ka Poaono Aug.16.

EIA MALALO IHO NEI KEKAHI O NA ANO LOLE A LAUA E MAKEMAKE NEI E KUAI HOOPOHO AKU:

Na Lole huluhulu keokeo, Huluhulu eleele,

Huluhulu ulaula, Lole merino, Halua, Kalepa,

Kalakoa, Lole wawae kane, na Kuka.

Puliki palemai wawae, Palemai oluna.

Lei ai, Kakini, Ai kala, a me na mea a pau e pili ana i na lole o ke kane

E HAAWI ANA LAUA I Makana Manuahi I KA POE A PAU E LILO ANA $2 (he Elua Dala) a oi aku.

E hoi mai ana o PELEKA mai KIKANE mai Poko o na pule paha ekolu i koe

ME NA WAIWAI LOLE HOU AOHE I KANA MAI,

A E KUAI MAKEPONO LOA IA AKU ANA

HAYSELDEN BROS. (KOMO me PELEKA.)

N.B-Aole makou e wehe koke ana a hiki ka HORA UMI A.M. o ka POAONO, no ka pa @@@ ke kau i na kumukuai makepono loa ma na Lole a pau. [611-6t 616]

HOOLAHA HOOKOLOKOLO

MA KA WAIWAI O LAKAHIWA (K), no Waiea, Kona Hema, Hawaii, i make. Ma ke keena o kekahi Lunakanawai Kaapuni, o ka APana Ekolu o ko Hawaii Pae Aina. Ua heluhelu, a ua waihoia ka palapala noi a S.K Makalaau, e noi ana, e hoonoho iaia i Lunahooponopono ma ka waiwai o Lukahiwa (k), no Waiea, Kona Hema, Hawaii i amke aku nei. Nolaila, ke kauohaia aku nei na kanaka a pau, ke pili o ka Poaono, oia ka la 27 o Sepatemaba 1873, ma ka hora 10 o kakahiaka, ma ka Hale Hookolokolo ma Kona Hema, oia ka la a me kahi i kohoia no ka hoolohe ana i ua nonoi ia, a me na mea kue, ke hoike ia.

CHARLES F. HART.

Lunakanawai Kaapuni, Apana Ekolu H P A.

Kohala Akau, Aug 6, 1873. 611-3ts 613

MA KA WAIWAI O Naohe (K), o Honaunau, Kona Hema, Hawaii, i make. Ma ka Keena o kekahi o na Lunakanawai Kaapuni o ka Apana Ekolu o ko Hawaii Pae Aina. Ua heluhelu, a ua waihoia ka palapala noi a Emilia Kahele e noi ana, e hoonoho lala i Lunahooponopono ma ka waiwai o Naohe (k), no kauoha aku nei na kanaka a pau, ke pili o ka Poaono, oia ka la 27 o Sepatemaba 1873, ma ka hora 10 o kakahiaka, ma ka Hale Hookolokolo ma Kona Hama, oia ka la a me kahi i kohoia no ka hoolohe ana i ua nonoi la, a me na mea kue ke hoikeia. CHARLES F. HART.

611 3ts Lunakanawai Kaapuni Apana Ekolu H P A.

MA KA WAIWAI O D. Mikakai (k), no Kona Hema Hawai, i make. Ma ka Keena o kekahi o na Lunakanawai, o ka Apana Ekolu o ko Hawaii Pae Aina. Ua heluheluia, a ua waihoia ka palapala noi a D.H Nahinu, ka Lunahooponopono no ka waiwai o D. Mikakai, Kona Hema, Hawaii i amke, e noi ana e hookuu laia. Nolaila, ke kauohaia aku nei na kanaka a pau, ke pili o ka Poaono, oia ka la 27 o Sepatemaba 1873, ma ka hora 10 kakahiaka, ma ka Hale Hookolokolo ma Kona Hema, oia ka la a me kahi i kohoia no ka hoolohe ana i ua nonoi ia, a me na mea kue ke hoikeia. CHARLES F HART.

611 3ts Lunakanawai Kaapuni Apana Ekolu H P A

MA KA WAIWAI O Naihe (w), o Waipio Hamakua, Hawaii, i make. Ma ka Keena o kekahi o na Lunakanawai Kaapuni Apana Ekolu o ko Hawaii Pae Aina. Ua heluheluia,a ua waihoia ka palapala noi a Ioane Paele, e noi ana e hoonoho iaia i Lunahooponopono no ka waiwai o Naihe (wa, no Waipio, Hamakua, Hawaii i make aku nei. Nolaila, ke kauoha aku nei na kanaka a pau, ke pili o ka Poalima, oia ka la 12 o Sepatemaba 1873, ma ka hora 10 o kakahiaka, ma ka Hale Hookolokolo ma Waimea, Hawaii, oia ka la a me kahi i kohoia no ka hoolohe ana i ua nonoi la, a me na mea kue, ke hoike la.

CHARLES F HART.

611 3ts Lunakanawai Kaapuni Apana Ekolu H P A

MA KA WAIWAI O Samuela Kamakahalahalawai (k), no Holualoa, mokupuni o Hawaii, i make.-No ka mea, ua waihoia mai imua o ka Aha, kekahi palapala i oleloia, oia no ka palapala kauoha hope loa a Samuela Kamakahalahalawai i amke aku ia, a me ka palapala hoopili, e noi ana e hooialola kela palapala kauoha, a e hoopuka hoi ka palapala Lunahooko no Kalani (k); Ua waiho ia mai e Kalani (k). Nolaila, ua kauohaia, o ka Poaono, oia ka la 27 o Sepatemaba, ma ka hora 10 o kakahiaka, ma ka Hale Hookolokolo ma Kona Hema, Hawaii, oia ka la a me kahi e hoolohe ai i ua nonoi ia a me na mea kue, ke hoikeia.

CHARLES F HART.

Kohala Akau, Aug 6, 1873. 611-3ts 613

MA KA waiwai o Piipii (k), o Waikapu, Ma ui, ko Hawaii P A I make. Ma ke Keena o ka Luna kanawai Kaapuni Apana Elua o ko Hawaii Pae Aina. Ua heluhelu, a ua waihoia ka palapala noi a Keanu (k), e hoonoho iaia i Lunahooponopono no ka waiwai Piipii (k), no Waikapu, Maui H P A i make aku nei. Nolaila, ke kauoha ia aku nei na kanaka a pau, ke pili, o ka Poaha, oia ka la 18 o Sepatemaba, M.H 1873, ma ka hora 10 o kakahiaka, ma ka Hale Hookolokolo ma Wailuku, oia ka ia a me kahi i kohoia no ka hoolohe ana mai i ua nonoi la a me na mea kue ke hoikeia." ABR. FORNANDER.

Lunakanawai Kaapuni Apana Elua H P A.

Lahaina, Augate 6, 1873. 610 3ts 612

MA KA WAIWAI O PUUOHALA (k), no honokohau, Maui, H P A, i make aku nei. Ma ke Keena o ka Lunakanawai kaapuni, o ka Apana Elua o ko Hawaii Pae Aina. Ua waihoia a ua heluheluia ka palapala noi o Kemaa (w), e noi ana e hoolalola ka palapala kauoha hope loa o Punohala (k), no Honokohau, Maui H P A, i make aku nei. Nolaila, ke kauoha la nei na kanaka a pau, ke pili, o ka Poakolu, oia ka la 11 o Sepatemaba, M.H 1873, maka hora 11 o kakahiaka, ma ka Hale Hookolokolo o Lahaina, oia ka ia a me kahi i koho ia no ka hoolohe ana i ua nonoi ia, a me na mea kue ke hoike la.

ABR FORNANDER.

Lunakanawai Kaapuni APana Elua, H P A

Lahaina, Augate 5, 1873 610 3ts 612

MA KA WAIWAI O M. HIKIAU (k). no Hamakualoa, Maui, H P A i make. Ma ke Keena o ka Lunakanawai Kaapuni, Apana Elua, o ko Hawaii Pae Aina. Ua heluhelu a ua waihoia ka palapala noi a Rev. C.B Andrews, e noi ana , e hooiaioia ka palapala kauoha hope loa o M Hikiau (k), no Hamakualoa, Maui i make aku nei. Nolaila, ke kauohaia aku nei na kanaka a pau, ke pili o ka POAHA, oia ka la 11 o Sepatemaba M H 1873, ma ka hora 10 o kakahiaka, ma ka Hale Hookolokolo o lahaina, oia ka la a me kahi i koho ia no ka hoolohe ana i ua nonoi la a me na mea kue ke hoike la.

ABR. FORNANDER.