Ka Nupepa Kuokoa, Volume XII, Number 30, 23 July 1873 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

KA NUPEPA KUOKOA, ME KE AU OKOA I HUIIA

 

Ka Nupepa Kuokoa

 

I was a wandering Sheep. 6-8 palua.

 

1 He hipa auwana wau,

      Aloha ole ae

   I kuu makua haalele no

       I kona pa maikai.

   He kamalii lalau,

       Hookuli a kue

   Ka leo o ke kahu o’u,

      A hele i o ia nei.

 

2 Huli ke kahu ia’u,

      Me kona aloha mau,

   Ma na awawa, ma na puu,

      Na waoakua no :-

   Loaa iaia la wau,

      Pololi, makewai,

   Ua nele, eha, maule no,

       A ane make ae.

 

3 Olelo olu mai,

      Hoala i kuu poo,

   Wahi i kuu eha, a hanai

      Ka uhane maule o’u ;

   Holoi a maemae au,

      Kahiko a maikai,

   Lalau a hoihoi no,

      Ka hipa auwana nei.

 

4 Iesu kuu haku mau,

     Aloha io mai,

   Na ia la i kii i hoi au

     Ma kona kihapai.

   Ua pau kuu auwana’e,

      Kuu hele io, ia nei,

   Ua hoi i kuu kahu mau,

      I kona pa maikai.

Himeni Hawaii

 

HAAWINA KULA SABATI.

 

HELU 31, SABATI, AUGATE 3.

 

KUMUHANA. – KA OIHANA A IESU.

 

Pauku Baibala. – Mataio 4: 17-25.

 

17 Mai ia manawa mai, hoomaka o Iesu e hai mai a e olelo mai, E mihi oukou, no ka mea, ua kokoke mai nei ke aupuni o ka lani.

18 Hele aku la o Iesu ma ke kae o ka loko o Galilaia, ike mai la ia i na hoahanau elua, o Simona i kapaia o Petero, a me kona kaikaina o Anederea, e kuu ana i ka upena i ka loko, no ka mea, he mau lawaia laua.

19 I mai la oia ia laua, E hahai mai olua ia’u, a e hoolilo no au ia olua i mau lawaia kanaka.

20 Haalele koke iho la laua i na upena, a hahai aku la iaia.

21 A hele aku la ia mailaila aku, ike mai la ia i na hoahanau e ae elua, o Iakobo ke keiki a Zebedaio, a me kona kaikaina o Ioane, maluna no o ka moku me ko laua makuakane o Zebedaio, e hono ana i na upena, a kahea mai la oia ia laua.

22 Haalele koke aku la laua i ka moku, a hahai aku la iaia.

23 Kaahele o Iesu ma Galilaia a puni, e ao ana ma na halehalawai, a e hai mai ana i ka euanelio no ke aupuni, a e hoola ana i ka mai a me ka nawaliwali a pau o kanaka.

24 Kui aku la kona kaulana i Suria a puni, halihali mai la lakou i ona la i ko lakou poe mai a pau, i loohia ia e kela mai keia mai, a me na eha, o ka poe i uluhia e na daimonio, a me ka poe hehena, a me ka poe lolo, a hoola mai la oia ia lakou.

25 He nui loa ka poe kanaka i hahai mai iaia no Galilaia mai, no Dekapoli mai, a no Ierusalema mai, no Iudea mai, a no kela kapa mai o Ioredane.

Pauku Alakai. “ E mihi oukou, no ka mea, ua kokoke mai nei ke aupuni o ka lani.” Mataio 4: 17.

Pauku hui lahui. “ Aole loa he kanaka i olelo like me keia kanaka.” Ioane 7: 46

Mele. – Him. 102. Nesper. C. Sacra, page 118.

Pule, i hoohalike kakou me Iesu ma ka hana mau ana i na mea e pono ai ke kino, a me ka uhane o na kanaka, o na kamalii.

 

NA NINAU.

 

Na Makua. MAI IA MANAWA MAI, ka manawa hea keia ? Haalele kakou ia Iesu mahea ? Ma ka mauna hea ? Kahi i aha ai oia ? A iho oia mai ka mauna mai, hele oia i hea ? Ioane 1 : 43. Mai ka manawa paha i iho ai Iesu mai ka mauna a hoomaka e hele i Galilaia kona hoomaka ana e hai i ka euanelio. He aha kana kauoha mua ? Owai kekahi, i paipai mua i na kanaka e mihi ? Ka mihi a Ioane Bapetite i paipai ai, a me ka mihi a Iesu i paipai ai, ua like pu anei ? Mahea ka like ole ? Heaha ke ano o ka mihi oiaio ? Ina mihi a bapetizoia i ka wai wale no, he mihi oiaio anei ia ? Ina mihi a haalele ole i ka hewa, he mihi oiaio anei ia ? Ina mihi a bapetizo ole ia i ka Uhane Hemolele, he mihi oiaio anei ia? Ina he mihi i ka hewa no ka makau wale iho no i ka hoopaiia, he mihi oiaio anei ia ?

Na Keikikane. No ke aha e mihi ai ? “Ua kokoke ke aupuni o ka lani.” Owai ka i olelo mua pela.

KE AUPUNI O KA LANI, heaha ia ? Ke aupuni a Iesu e kukulu ana, ma keia ao kekahi hapa, ma ka lani ka hapa nui. He aupuni aha ? No wai ia aupuni ? Hiki anei i ka mea haumia ke noho maloko ? Hoopaanaau. Mat 13:41,42. Hoik. 21:27

Na Kaikamahine. UA KOKOKE KE AUPUNI O KA LANI, heaha ia ? Ua kokoke anei ia ia oukou ? Hiki anei ke komo ano ? Hiki anei i na kamalii ke komo iloko ? Hoopaanaau Mataio 19: 14. Aia mahea kekahi aupuni o ke Akua ? Luka 17: 21.

O ka ekalesia, oia anei kekahi ano o ke aupuni o ka lani ? Ae. A ua komo anei kekahi hapa o oukou iloko o ka ekalesia ? Ae. Pau anei oukou i ke ola no ka noho ana iloko o ka ekalesia ? Aole paha, aia a noho pono makou, me ka maemae, me ka malama mau ia Iesu, alaila, hiki ke ola.

Na Pokii. Pili anei ka hewa ia oukou ? Ae, ua hewa no makou a pau. Heaha ka pono ? E mihi paha makou i ka hewa. Heaha kekahi mau hewa e mihi ai ? Ka hoopunipuni, ka wahahee, kahuhu, ka hookuli, ka olelo ino, nuku, kuamuamu, haikaika, manao ino. Pehea e mihi ai? E haalele, e noi aku ia Iesu e kala mai. Hiki anei i na pokii ke mihi ? A hiki anei i na keiki liilii ke komo iloko o ke aupuni o ka lani ? Ae anei Iesu ia oukou e komo ? Ae, ke makemake makou e komo, nana no makou i paipai e komo. Ahea ? Ano no ka manawa maikai. Me ke aha e komo ai? Me ka lole maemae, oia hoi ka naau ano hou, ano haahaa, akahai.

P. 18 Na Makua. Hele o Iesu mahea? Ka loko o Galilaia, ma ka muliwai hea ia ? Ehia inoa o keia loko ? Eha paha. Owai? Nahelu 34:11. Mar. 1:16. Luka 5:1. Ioa. 6:1. Huli i loaa pono. Ehia mile ka loihi, ka laula ? Owai na mea a Iesu i ike ai ? Heaha ka laua oihana ? Owai ka inoa hou a Iesu i kapa aku ai ia Simona ma Ioane 1:42 ? Akahi no anei a ike laua ia Iesu, a o Iesu ia laua ? Owai ka ike mua ia Iesu ? Ioane 1:40. Owai ka i imi mua ia Simona? Simona, Anederea, he mau haumana nawai mamua ? Nawai i paipai ia laua e nana’ku ia Iesu ? Nohea hoi laua? Ioane 1: 35-37, 40, 41, 42, 44.

P. 19 Na Keikikane. Heaha ka Iesu kauoha ia Simona ma ? Ina e hahai laua ia Iesu, alaiila, e hooliloia laua i mau aha ? Lawaia kanaka, heaha ia ? Ua hoohalike ia ke aupuni o ka lani me ke aha ma Mat. 13: 47 ? Nolaila, o ka lawaia kanaka, oia ka imi, e hoohuli i kanaka, i kamalii, a hookomo iloko o ke aha ? Ka hahai ia Iesu, heaha ia ? Makemake anei oukou e hahai ia Iesu ? A lilo i aha ?

P. 20 Na Kaikamahine. Hoolohe koke anei laua i ka Iesu kauoha ? Akahi no anei a hahai laua ia Iesu ? Aole, ua hahai no laua ia Iesu mamua, Ioane 1: 37,40,41, mai kahi a Ioane e bapetizo ana, a hiki Galilaia, a ike i kekahi hana mana, Ioane 2: 1-3. Akahi no nae a kahea o Iesu ia laua e hahai mai iaia. Ua paipai ia oukou e hahai ia Iesu, ua hoolohe anei ? Ke kanalua nei anei ? Pehea e hiki ai ke hahai ia Iesu ? Hoopaanaau, Mat. 16: 24. Hiki anei ia oukou ke hahai ia Iesu me ko oukou mau hewa ? A ike ole oukou me Iesu, hiki anei ke hahai ?

Na pokii. Heaha ka oukou oihana ? Mahiai, lawaia, haumana kula, heaha ? Hiki anei ia oukou ke hahai mamuli o Iesu ? Hiki no, ko Iesu makemake no ia. Hahai kino anei ? Aole, he hahai uhane, e pule, e malama i kana mau olelo, e hoohalike me ia, e noho oluolu, aloha, kuikahi. Owai na haumana mua a Iesu ? Anederea, Simona, Pilipo, Natanaela. Ioa. 1:40,43,45. Owai ka makuakane o Simona ma ? Iona. Ioa. 2: 42. Hoopaanaau. Ioa. 1: 29.

P. 21, 22 Na Makua. Owai kekahi mau kanaka a Iesu i kahea ai e hahai iaia ? Owai na makua o laua ? E huli i loaa. Kokua na keiki. Heaha ka lakou oihana ? Pehea na keiki ? Hoolohe anei ? Heaha ka pono ke kauoha ia e Iesu e hana i kekahi mea ? Hoopaanaau, Mat 10: 37,38.

P. 23 Na Keikikane. Mahea ko Iesu kaahele ana ? Mahea o Galilaia ? He aha ka Iesu mau hana ekolu ma keia pauku ? Heaha ke ano o na halehalawai ? He mau hale uuku no ma kauhale a pau, Sunegoga ka inoa ia lakou. Ua like paha me na halehalawai apana ma ko kakou mau wahi. He aha ka euanelio ? Ka nu hou maikai – ka olelo no ke ola ma o Iesu la. Hoopaanaau, Oihana 10:38.

P. 24, 25 Na Kaikamahine. Hiki ko Iesu kaulana ihea ? Mahea o Suria ? He aina kahiko loa anei ? Owai kona kulanakauhale nui ? Kin. 15: 2. Owai ka poe i halihaliia i o Iesu la ? Pehea hoi o Iesu ia lakou ? Ma kona mana aha i hoola ai oia ia lakou ? Ina aole oia he Akua, hiki anei ke hana pela ? I owai la kakou e hoopii aku ai ke mai, a nawaliwali, a pilikia ? Na mai o ke kino wale no anei e hoopii aku ai i pau ? Pehea na mai o ka uhane ? Hoopaanaau, Isaia 53:4. Nohea mai na kanaka i hahai ia Iesu ? Mahea Dekapoli ? E huli i loaa me kona ano. He hahai aha keia ? He hahai kino paha. Ioa. 6: 26. Heaha ka hahai pono ? Ioa. 6: 27. Hoopaanaauia.

Na Pokii. Heaha ke kauoha nui ma keia haawina ? E mihi. A mihi ole pehea? Hoopaanaau, Luka 13: 5. Heaha ka lua o na kauoha ? E haalele i na mea a pau a hahai ia wai ? Ua malama anei oukou i keia mau kauoha elua ? Owai ke kahuna lapaau nui a mana ? Hiki anei iaia ke hoola i na mai lepera? Heaha ka mai nui e pili ana i ka uhane o na keiki ? Nawai e hoola ? - Ma ke aha ? Ke pule nei anei oukou e hoolaia ?

Na Keiki a pau. Hai paanaau mai i ka pauku alakai, a me ka pauku hui lahui. Heaha ka manao nui e pili ana ia oukou ?

Mele. – Owai no Iesu ?” Alaula Iulai 72. Pule e hoolaia na mai a pau.

Hawaii.

 

Na Kula kaikamahine.

 

Ua hoomauia na kula kaikamahine ma kekahi mau Mokupuni o keia Pae Moku. O ka Mokupuni o Hawaii koe, aole he kula kaikamahine malaila. Ua hoomakaia nae ka noonoo e kukulu i kula kaikamahine ma Kohala, Hawaii. Ma keia hope aku e ikeia ai ke kula o keia ano malaila, pela ka manao.

Ke hoomaha nei ke kula ma Koloa Kauai, i keia wa; aole nae no na haumana ole, aka; no ka nawaliwali o na kumu. Ke lana nei ko makou manao, aole i make loa keia kula. He hiamoe wale no; a ma keia hope aku, e hoala hou ia’i oia.

 

KULA KAIKAMAHINE KAWAIHAO, OAHU.

Ke hoike mai nei ke Poo o keia kula, Miss. L. Binamu, penei: “ Eono makahiki i hala, mai ka hookumu ana o keia kula ma ka malama o Julai, 1873. He 103 mau haumana i hanai ia ma ke kula ma ia mau makahiki. He 10 mau haumana i hookomoia iloko o ka ekalesia, oiai ko lakou noho ana ma ke kula. He 9 mau hoahanau ekalesia i ka wa a lakou i komo mai ai i ke kula. Hookahi o keia poe he 10 ka i holo aku nei i misionari i ka Pae Aina o Makala, o ka wahine ia a W. Kekuewa. He 19 haumana i mare ia mahope o ka hookuuia ana, mai ke kula aku. He 12 o lakou i mare me na haole ; a i ole ia, me na hapa haole. He 7 o lakou i mareia me na kanaka Hawaii. He 9 mau makuwahine, a ia lakou na keiki he 13. O ka averika o na haumana o ke kula i ka makahiki i hale ae nei he 42. Nani ka lokomaikai o ke Akua i ke kula. Nana i haawi mai i wahi kumu akamai, naauao, mai Amerika mai. Ua mahuahua ka ike o na haumana ma ka pa ko li, a me ka hookani pila. Aole nae hoopoinaia ka oihana hooponopono hale, a me ka humuhumu ana. O Miss. Lzzie Binamu kekahi o na kumu e like me kana i na makahiki i haha.”

 

KULA KAIKAMAHINE WAIALUA, OAHU.

Ekolu mau kumu i keia kula. O Miss. M. E. Gelina ke Poo o ke kula, a penei kana : “ He 48 ka huina pau o na haumana ; aole i hookukeia kekahi no ke kolohe. Ikaika a puipui na kino o na haumana. Aole mai loa kekahi, a he kakaikahi wale no ka poe mai uuku. Ua mahuahua ka ike o na haumana ma na buke, pela no hoi ka hooponopono hale, a me ka humuhumu ana. Ma na olelo elua, olelo haole a me ka olelo Hawaii i aoia aku na haumana. He mea nui loa keia i kuu manao.”

 

KULA KAIKAMAHINE O MAUI HIKINA.

Aia ma Makawao, Maui, keia kula. Eha mau kumu no keia kula, oia hoi, o Rev. C. B. Aneru, Aneru wahine, Miss. H. E. Carpenter, a me Miss. E Arms. O ka huina a pau o na haumana o ke kula o ka makahiki i hala, he 86. O ka nui o na haumana i keia wa he 56. He 32 o lakou ua kokua ia e na makua ; he 20 hoi i kokua hapaia e na makua ; a o ke koena, ua kokua lakou e na dala o ka poe lokomaikai i haawi wale ia mai no na haumana ilihune loa. Ua hoonuiia ae ka ike a me ka naauao o na haumana. Ua aoia aku hoi lakou ma ka hooponopono hale, ka humuhumu, aiana lole, a pela aku.

Ua hoomauia ke kula ohana a Laiana wahine, a me kana kaikamahine, ma Waimea Hawaii, e like me na makahiki i hala. No na kaikamahine wale no keia kula.

 

KULA KAHUNAPULE.

Ma ka la mua o Okatoba 1872, ua hoomakaia keia kula ma Honolulu. Eha mau kumu i waeia no keia kula ; eia ko lakou mau inoa, a me ko lakou mea e ao aku ai.

Rev. J. D. Paris – Poo, a me ke kumu wehewehe pauku Baibala.

Rev. B. W. Paleka – kumu ao aku i ko ke Akua ano.

Rev. D Baluwina – kumu ao aku i ka Moolelo Baibala, a me ka moolelo Ekalesia.

Rev. H. H. Paleka – kumu ao i ka hoomakaukau i na Haiao, ka Haiolelo, a me ka Oihana Kahunapule.

A he Umi kumamakolu (13) ka nui o na haumana i kinohi. Ekolu o lakou ua haalele, a ua hala hookahi i ka Pae Aina Makela, Maikonisia, he misionari no ka Papa Hawaii.

Auhea la na kanaka piha i ka uhane o Kristo, a makemake e hoomakaukau ia lakou iho no ka oihana kahunapule, oihana kahu ekalesia, a me ka oihana misionari i ka poe hupo ma na aina e @ Nui na ekalesia hemahema, kahu ole, ma Hawaii nei. Ke kahea nei lakou i kumu, i kahu, e hele a noho pu a wehewehe ia lakou i ka olelo a ke Akua, a hanai ia lakou i ka berena a me ka waiu o ke ola.

Nui a ikaika hoi na leo kahea mai ko Nuuhiva Pae Aina ; a pela no hoi mai Maikonisia mai.

Auhea ka poe i uluhia i ka uhane o Karisto, a e manao ana i ke ao a me ka po, e like me ko Paulo manao i ko Korineto ; “ Ua kau ia mai keia hana maluna o’u ; auwe hoi au, ke hai ole aku au i ka euanelio.” I Kor. 9:16.

Aloha ino ka poe hookuli ; ka poe e kinai ana i ka uhane hemolele ; ka poe makemake e noho mau mamuli o ka lealea, no ka mea, “ o ka aoao o ka poe aia, he oolea ia.” Na Sol 13:15. Eia hoi, “ ke waiho nei ke koi lipi ma ke kumu i na laau, a o kela laau a keia laau e hua ole mai ana i ka hua makai, e kua ia ilalo, a e kiolaia aku ia i ke ahi.” Mat. 3:10.

 

Ka make ana o Rev. J. W. Kaiwi.

 

I ka la 7, o Julai nei, ma Waimea, Kauai, ua make o Rev. J. W. Kaiwi, kekahi misionari Hawaii, i ka Pae aina o Nuuhiwa.

Ma mua o kona hele ana i ka aina e, he hoahanau ekalesia o J. W. Kaiwi ma Kaumakapili. He kumu ao kula no oia ma Maemae, ua akamai oia i kela oihana.  A i ke kahea ana o ka Ahahui Misionari Hawaii i mau paahana e hele i ka aina e, o Kaiwi no kekahi i o mai, me ka makemake e hele a ao aku i ka poe pegana. No laila, oia kekahi o na kumu eha i waeia e hele i ko Nuuhiva Pae Aina; oia hoi, Rev. J. Kekela, Rev. S. Kauwealoa, Mr. Kuaihelani, a me Mr. J. W. Kaiwi, a me ka lakou mau wahine. Ua hele launa pu Mr. J. Bikanele, aka, aole ia he lala o ka Ahahui Misionari Hawaii ia manawa.

Ua hoomakaia keia misiona i ka M. H. 1853, no ka mea, ua hiki mai o Makunui, kekahi alii o Fatuiva, a me Mr. Puu, kona hunona. He kanaka Hawaii nae o Puu no Lahaina ; a no kona noho ana ma Fatuiva i kekahi mau makahiki, ua makaukau e mahele i ka olelo.

Noi mai o Makunui i mau kumu misionari e hele a noho ma Fatuiva, e ao aku i ko laila poe kanaka i ka olelo a ke Akua, a nana no e kokua, a malama ia lakou.

O Rev. B. W. Pareka ka Elele o ka Ahahui i hele pu me lakou, a ua hoonohoia lakou a pau ma Omoa. Noho pu lakou a pau i kekahi mau makahiki, a loaa ka olelo o kanaka, alaila ua hele aku kekahi hapa o lakou i Hivaoa, a hoomaka i ka hana ma kela mokupuni. O Kaiwi laua o Kuaihelani ka i noho ma Omoa, a me Hanavave, e malama i na haumana kula, a e ao aku i kanaka i ka la Sabati.

Ua loaa ka ekalesia ma Omoa, he 25 paha o lakou. Ua aloha nui ia o Kaiwi e kanaka ; ikaika oia i ke ao kula, he noho aloha pu me kona mau lawe hana; ua kokua aku a kokua mai me ka lokahi o ka manao. He 19 na makahiki o kona noho ana me ka ohana ma Fatuhiva; oia hoi, mai ka M. H. 1853 – a hiki i ka M. H. 1872.

I ka M. H. 1868, ua hele o Rev. L. Kamika, i elele no ka Papa Hawaii, e ike i na misionari Hawaii ma ko Nuuhiva Pae Aina. Ia wa ua nawaliwali o Kaiwi, a ua ae na hoa misionari ia ia, e hoi mai i Honolulu, e hoomaha, e lapaau, a e hooluolu i kona kino i hookahi makahiki. Ua holo like hoi ka manao, e noho o Napaeaina, kana wahine, me ka laua mau keiki ma Omoa; a e kokua na misionari e ae ia ia i ka wa e kaawale ai ke kane.

Ua launa paha o Kaiwi i na ekalesia a pau, mai Hawaii a Kauai ia makahiki, a ua paipai ikaika oia i na hoahanau e pule, a e aloha kokua i ka poe hupo ma na aina pegana.

I ka M. H. 1869, hoi aku la oia i Omoa, i kona kihapai kahiko. Hapai hou oia i ka oihana misionari me ke aloha, a me ka ikaika – a hiki i ka M. H. 1871, ua lohia oia i ka mai pono ole ma ke poo; a he ane pupule kekahi manawa. No laila, i ka hele ana o Rev. W. P. Alekanedero i Elele i ka M. H. 1872, ua hoi nui mai Rev. J. W. Kaiwi me kona ohana a pau. Ma ka lapaau ana o Kauka Mc. Grew ia ia, ua loaa ka oluolu ; a hala kekahi mau malama, ua lana kona manao, e hapai hou i ka ka Haku hana. Ua hele no i kekahi mau Sabati ma Ewa. A hiki mai ka palapala kahea ia ia, mai ka ekalesia o Anahola, Kauai ; ua kuka pu oia me kekahi o ka Papa Hawaii ; a ua aeia e hele, a hapai i ka hana ma Anahola. Aka, aole liuliu, a lohia hou oia i kela mai pono ole ma ke poo – a ua pupule maoli. Nolaila, ua oki loa ka hana, a hele me ka ohana i Waimea, kahi o kona poe pilikoko ; a me lakou kona noho ana mai Januari mai, a make aku la ! Koe no ka wahine, o Hana Napaeaina, kona kokoolua maikai, me ka laua mau keiki kane ekolu.

Pono no i ka Papa Hawaii, a me na hoahanau lako, ke kokua i keia wahine kane make, a me keia mai keiki makuakane ole.

E pule nui hoi kakou a pau i ka Haku nona ke kihapai, e hoouna aku i mau paahana hou, e pani i ka hakahaka, a e kiai, a hanai i kela poe hipa, e auwana ana  me ke kahu ole.

 

Fulton Street Prayer Meeting.

 

He kahuna pule iloko o ka halawai, mai Minesota mai. Penei kona manao i ka aha halawai.

“ E hai aku anei au i ke kumu o ko’u makemake nui i keia halawai haipule ? Eia no ia. Ko ke akua halawai no keia ; nona mai keia mau manao pule, a me keia mau manao himeni. Aole hiki pinepine mai au i keia halawai. Maanei no au i kela makahiki; a noi au ia oukou e pule i ke Akua e kokua mai ia’u i kau mau hana ana. Ke hoomanao nei au i ka poe i haipule ia manawa. Eia no kekahi o lakou i keia la: a ua hala iluna ae kekahi. Ua palapala pinepine mai au ia oukou, e hoomanao mai ia’u i ko oukou haipule ana ; a ua hoolohe mai no ke Akua i ka oukou haipule ana. Ua maopopo no ia’u, e noho mau ana ka Uhane o ke Akua maloko o keia halawai.

I ko’u noho ana ma kahi loihi aku ma ke Komohana, ua hoomanao au i ka hora haipule awakea, ma Nu Yoka nei, a he mau hora maikai loa no lakou no ko’u uhane. He nui ka’u hana ; a he uuku ko’u manawa e hoomaha. I ka la Poakahi e hoi ana au – a Poaha e hoomaka ana au i ka pule hoomau ma Minesota. E pule nui oukou, i ole au e hele aku i kela hana, ke ole ke Akua e hele pu me au.

 

He Makima maikai loa.

 

Makima, heaha ia ? He maxim, he motto, he hua, a he mau hua maikai, a pono ke kau ma kahi akea, ma ka paia paha, maluna’e paha o ka puka o kou keena, a nana pinepune, a hoopaanaau, a hoomanao mau, i mea e kaohi ai ke manao oe e hana hewa, a e paipai ai ke manao e hana maikai.

He wahi kaao ka’u e hai aku ai ia oukou, no kekahi alii Tataria me kekahi Kahunapule ona.

E holo ana ke’lii me kekahi mau luna ona ma ke kaa alii, a lohe lakou i ka leo o kekahi Kahunapule, e kukala ikaika ana, “O ka mea e hawai mai ana ia’u i hookahi haneri dinara, (he mau apana dala liilii oia) e hawai aku au iaia i wahi makima maikai.”

Ku malie ke kaa, a ninau ke alii, “Heaha keia wahi makima au e haawi mai ana no na dinara he haneri ?” Pane mai ke kahuna, “E oluolu loa au e hai aku i ua makima nei, ke loaa e mai nae ka haneri dinara.” No ka manao ana  o ke alii, he makima maikai loa paha keia, a makemake e lohe koke, nolaila, kauoha oia, e haawi e aku i ua mau dinara nei i ke kahuna.

A, i ka loaa ana o na dinara, olelo ke kahuna, “Eia ua makima nei, Mai hoomaka e oe i kekahi hana mamua o kou noonoo ana i ka hope o ia hana.”

A, i ka lohe ana o na luna o ke alii, akaaka lakou i keia makima lapuwale i ko lakou manao, a nana lakou i ke alii me ke kuhi ana, e huhu loa ana oia i ke kahuna, a e kena koke ana e hoopai nui ia oia no kona haawi ana ia makima hoohenehene i ke alii ma ko lakou manao. Aka, aole pela ka manao o ke’lii. Olelo oia i na luna ona, “Aole keia he makima akaaka, he makima maikai loa ia. Ma ko’u manao, ina ua malama pono ia keia makima, ina ua pakele na kanaka i na pilikia he nui wale i ili mai muluna o lakou. A, ma ko’u ike ana, he makima naauao keia, e kauoha ana au, e kahakaha ia ia ma ko’u pa dala, a e kakauia ma na paia o ko’u keena alii, i kau mau ia imua o’u.”

Haawi aku la ke’lii i kona mahalo i ke kahuna, a hoi aku la i kona hale alii ; a kii i kekahi luna,a kauoha iaia e imi i ka mea akamai, e kahakaka oia i ua makima nei ma kona pa dala, a e kakau ia ma na paia o kona keena alii.

Mahope iho, ua imi kekahi luna alii e pepehi i ke alii, a e lawe oia i ka noho alii nona iho. I mea e ko ai kona manao ino, hoohuli oia i kekahi kahuna lapaau o ke alii mamuli ona, a hoowalewale iaia e pepehi i ke alii ma ka ae ana iaia e haawi i umi tausani apana gula, a e koho iaia i Kuhina nui nona ke lilo ke aupuni iaia. Haawi oia i pahi o i hookomia ka welau iloko o ka mea make, i mea e make ai ke alii ke o ia oia. O ka ae koke no ia i ua kahuna nei e hana  pela.

Aole liuliu mahope iho, a loohia ke alii i ka mai, a kii oia i ua kahuna nei e hele mai, a o i kona lima. Ho-o ke kahuna i ua pahi o make nei iloko o kona pakeke me kekahi mau pahi o e ae, a hele i ka hale o ke alii. E moe ana  ke alii ma kona wahi pela. He mai ko’u, wahi ana, e o mai oe i ko’u lima, oia paha ka mea e oluolu ai. Ae, e o no au. Hoopaa oia i kona lima me ka welu, he pa wai holoi malalo iho, ho-o i kona lima iloko o ka pakeke, a unuhi  i ka pahi o make, a makaukau e o i ka lima ; kau na maka ona ma ke pa wia malalo iho, aia hoi, ike oia a heluhelu i ua makima nei maluna, “Mai hoomaka e  i kekahi hana mamua o ka noonoo ana i ka hope.” Ka makau no ia o ke kahuna a noonoo oia iloko iho ona, “Ina e o au i ke alii i keia pahi o make, e make no ke alii, a e liia hoi au a make, alaila, heaha ko’u pomaikai no ka loaa mai o na apana gula he 10,000 ?” Hoihoi oia i ka pahi o make iloko o kona pakeke, a unuhi i kekahi pahi o e ae. Ike ke alii ia hana, a ninau, “Heaha ke kumu o kou hoololi ana i na pahi?” He kumumu ka pahi mua, wahi a ke kahuna. Kumumu ! Pane ke alii, Aole paha. E hoike mai oe ia pahi ia’u. O ka haalulu nui iho la no ia o ke kahuna, a manao ke alii, he kumakaia paha keia, a kena iaia e hai koke mai i ke kumu o keia hana, a i ole, e oki koke ia kona poo. E ae au e hai i ke kumu, ke ae mai ke alii e kala mai, wahi a ke kahuna. Ae no ke alii e kala. Alaila, hai pololei ke kahuna i ke kumu, me ka olelo, Ina aole au i heluhelu i na hua iloko o ke pa wai, ina ua o au ia oe i ka pahi o make.

Hoakoakoa iho la ke alii i kona mau luna, a kena aku la, e okiia ke poo o ua kahuna lapaau kumakaia ano. A haliu ae la oia ia lakou, a olelo, “Ke ike nei oukou ano, o ka makima a ke Kahunapule i haawi mai ai ia’u, ka mea a oukou i akaaka’i, a manao, he mea lapuwale, he mea nui ia. Ua hoopakele ia ia’u i ka make. E huli ia Kahunapule, a loaa, e alakai mai, i hiki ai ia’u ke uku pono aku iaia no kona makima maikai loa.”

E o’u mau hoa, na kanaka, na kamalii a pau, e pai i keia makima ma ka papa o ko oukou naau ; “Mai hoomaka e i kekahi hana, mamua o ka noonoo ana i kona hopena.” E noonoo e mamua – Pehea la wau ? Heaha ko’u hope ? Heaha ka uku, ke hookuli au ? Ke aihue au ? Ke hookamakama au ? Ke lilo au i na mea lealea, na mea awaawa, na mea i papaia ? Mai holokiki iloko o na hewa me ka noonoo ole i ka hope. O ka noonoo e mamua i ka hope, oia ka mea e pakele ai i na pilikia he nui wale.

Hawaii.

 

E lawe i kuu kapa komo.

 

Ua hele kekahi keiki kane i ke kula Sabati ma Burukalana, i Nu Ioka. Ua oluolu oia e imi i na keiki hou e hele i ke kula Sabati. Ua hele oia i kela hebedoma, keia hebedoma, e imi ana i na keiki auwana, a noi aku ia lakou e haalele i ko lakou auwana, a me na hana lealea kolohe i ka la Sabati, a e hele pu me ia i ke kula Sabati. Kekahi la ua alakai mai i kekahi mau keiki kane i ke kula, a hiki i ka ipuka o ka hale, hoololohe kahi keiki a komo ole. Ninau ke kumu alakai iaia penei : “ Ea, e kuu makamaka liilii, heaha la ke kumu o kou komo ole ana i ke kula ?” Loihi ka manawa, aole ona pane mai ; a mahope pane mai penei : “ Aole o’u manao e hele maloko, no ka mea, aole o’u kapa komo.” “ Oia wale no,” wahi a ke keiki misionari ; “ ina oia wale no kou makemake, e lawe oe i kuu kapa komo.”

Wehe ae la oia i kona kapa komo, a haawi ia i ua keiki nei; alaila, ua komo oia iloko o ke kula Sabati. A hala kekahi manawa, ua lilo oia he haumana maikai loa.

Y. C.

 

Ke helu nei ke Akua.

 

E paani ana kekahi keiki kane me kona kaikuahine iloko o ke keena, a ua komo mai ko laua makuahine, a kau i kahi hinai piha i na popo palaoa maluna o ka papa kaukau, a laila hele iwaho.

Maikai loa lakou ke nana aku, wahi o Charle, e o ana i kona lima e lawe i kekahi.

Ea ! mai hana oe pela, wahi o Jane kona kaikuahine. Ua ike no oe, ua papa mai ka makuahine ia kaua, aole e lawe i kekahi o lakou.

I mai o Charle, aole helu ka makuahine ia lakou, aole ona e ike, ke lawe au i hookahi wale no.

Aka, ea, e hoomanao oe, e Charle, ua helu no ke Akua, a oia ka mea e ike.

Hoihoi aku o Charle i ka popo palaoa, a huli ae ma kahi e, me ka manao kaumaha. Pane koke mai, ua pono loa oe, e kuu kaikuahine. Ke helu nei no ke Akua, no ka mea, ke olelo mai nei ka Baibala : “Hoike mai no oia i ka heluna o na hoku ; hea ae no hoi oia ia lakou a pau ma ka inoa.”

Halelu 147:4. “Ua pau loa no hoi na lauoho, o ko oukou mau poo i ka heluia.” Mataio 10:30.

N. Y. O.

 

 

NA BUKE

I HOOLAHA IA E KA PAPA HAWAII!

- ME KE -

KUMUKUAI O KELA ME KEIA.

 

BAIBALA HEMOLELE Nui Ili Gula Nani me

na kuhikuhi ma na aoao........................................... $12 00

Baibala Hemolele Nui Ili eleele kaekae wai gula .....   5 00

     “            “         uuku iki iho,     “              “              8 00

     “            “         Pananaiki iho ili eleele .................. 4 00

Kauoha Hou ili gula nani me na kuhikuhi .................. 3 00

     “          “       eleele kaekae wai gula ...................... 1 00

     “          “           “                               ......................    75

Kauoha Hou Hapa Haole ...........................................    75

Lira Hawaii 1848 me ke kanawai  .............................     25

      “     “     1855 ........................................................    25

Moolelo Ekalesia ........................................................    50

Haiao ili lahilahi  ........................................................    10

Hele Malihini ana   .....................................................    25

No ko ke Akua ano ...................................................     25

Lira Kamalii ...............................................................    25

Hoike Palapala Hemolele ..........................................    25

Moolelo o Heneri Opukahaia  ...................................    25

Hoike Akua ...............................................................    20

Wehewehehala ..........................................................    20

Ninau Hoike ili manoanoa .........................................    25

    “         “      “  lahilahi   ...........................................    15

Kumumua Kula Sabati ..............................................    15

Buke Lawe Lima .......................................................    10

He Buke no ka Pope .................................................    10

Ui Kula Sabati Helu 3 ..............................................     20

    “          “          “    4 ..............................................    05

    “          “          “    5 ..............................................    25

Buke Euanelio a Ioane ..............................................    15

Himeni Hawaii .......................................................... 1 00

Himeni ili nani Hawaii .............................................. 1 70

Kumu Leo Mele ........................................................    15

Kumu leo Mele ili nani ..............................................   50

NA KAUOHA HOU PAKEKE.

Ili Gula nani .............................................................. 1 50

Ili eleele kaekae nani .................................................    50

Ili eleele .....................................................................    35

KAUOHA HOU PAKEKE ME NA HALELU

Ili Gula nani ............................................................... 1 75

Ili eleele kaekae wai gula ..........................................   60

Ili eleele .....................................................................   50

Buke wehewehe linaolelo Baibala, elua ano.

Buke wehewehe ano Matalo.

NA HALELU PAKEKE.

Ili Gula nani ...............................................................   30

Ili eleele kaekae wai gula ..........................................   30

Ili eleele .....................................................................   20

Ka Hae Hoonani (Buke Mele) ...................................   25

EIA NA BUKE HAAWI WALE.

Palapala Liilii –

Helu 4 – Makemake anei oe i ke ola ?

Helu 6 – E hele i o Kristo la.

Helu 7 – Ka hoi ana mai o ke keiki Uhauha.

Helu 11 – No ka hoohiki wahahee i ke Akua.

Helu 16 - Ka Eehia ana o ka Ahaaina a ka Haku me ka Bapetizo ana.

Helu 17 – Mai hana ino i na holoholona.

Helu 18 – No ka mahi ana, kuai ana a me ka inu ana i ka Awa.

Ka Davida Malo Kumumanao

Ka moolelo o Batimea Puaaiki.

 

Aia ke keena kuai buke o ka Pepa Hawaii ma ka huina o Alanui Betela me Alanui Kalepa, e kokoke ana i ka Hale Leta.

J. F. POKUE.

Kakauolelo o ka Papa Hooko o ka Ahahui Euanelio o ko Hawaii Pae Aina.