Ka Nupepa Kuokoa, Volume XII, Number 30, 23 July 1873 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE XII.  HELU 30.  HONOLULU, POAONO, IULAI  23, 1873  NA HELU A PAU 608.

OLELO HOOLAHA

E PAU NA PUPUPU KAHIKO!

E pani me na Hale Laau!

E HELE I KA HALE KUAI PAPA

I PAHEEIKALIAE O

Samuela G Waila Ma.

AIA MA KA PA KUAI PAPA KAHIKO

O KIMO PELEKANE MA IHO NEI.

E Kuai Makepono Loaia Ana

---ME KE---

Kumukuai Haahaa Loa.

NA PUU PAPA NUI,

NA LAAU A ME

 

NA LAKO KUKULU HALE

A PAU MALAILA

OIA HOI NA

LAAU NOUAIKI o na ano a pau,

Na Papa Manoanoa Nouaiki,

Na Papa Nouaiki,

Na Aaho Paina Ulaula,

Na Pili Laau Paina Ulaula.

NA PINE PA!

NA AAHO PA A ME

NA POU PAINA ULAULA,

NA PILI LAAU CIDA, NA

PILI LAAU PAINA ULAULA.

Na Puka 2-0x6-0 a hiki i ka 3-0x7-6.

Na Puka Komo Laau Aniani, 2-9x6-6 a

hiki i ka 5-0x9-0.

            Na Laau Puka Aniani, 7x9 a hiki i ka

12x18.

NA PANI OLEPELEPE

I penaia, a pena ole ia,

O na ano a pau.

Na Aniani Pukaaniani,

Na Paina Ulaula Molina,

1 Iniha a hiki i ka 5 Iniha.

Na Ano Pepa Hale Maikai

A ME NA LIHILIHI.

Aila Hoowali Pena Maikai Loa,

Aila Hoomaloo Pena, Vaniki,

Na Pena Keokeo,

Ka Lead & Zinc,

Pena Eleele o na

Ano Pena e ae o

Kela ano keia ano.

NA LAKA PUKA!

Na Laka Poepoe,

Na Ami Loloa,

Na Ami Pokopoko,

Na Laka Uwai,

Na Kui-nao,

Na Ami Lele,

Na Puka Aniani, &c., &c.

Na Kui Hao,

Kui Wai,

A Kui Kui,

3d a hiki i ka 60d, &c., &c.

            O keia mau mea a pau, e kuai makepono

ia ana ma ke DALA KUIKE.

            O keia mau mea a pau, a o kahi paha o

keia, e hiki no ke hoounaia ma kekahi o na

awa o keia Aupuni.

He mau Agena no Makou no ka

MOKUMAHU “KILAUEA,”

Kapena D Taylor.

601-3m            WAILA Ma.

HE MOOLELO KAAO

..NO..

ROBIANA LO

KA HIWAHIWA O KE KOA,

Helu Akolu o ka Ikaika.

I unuhiia mai loko mai o ka Buke Arabia, mai

ka Olelo Beritania a ka Olelo Hawaii.

MAHELE III-HELU 81.

A Hala na la ewalu, aui hope loa aku la ke aupuni malamalama, hiki ana lakou nei i ka aina nona ka malamalama, he eono malama i ka makahiki, a pela no hoi, he eono malama e po ai, a pela wale no i na makahiki a pau. Eia hoi, ua maopopo ia lakou ma ka nana aku, he aina maikai a kupono ke nohoia e ke kanaka, aka, eia ka mea kupanaha, ua haohao loa lakou, ma ka ike ole ana aku i kekahi mea ola ma ka aina, a heaha la ke kumu i kanaka ole ai keia aina, no ka mea, he aina maikai a momona i ka nana aku, aka, ua nele nae i ke kanaka a me na mea ola e ae.

Aohe nae i liuliu ma ia hope iho, ike aku la lakou nei i kekahi ao nui mai luna iho, a he kohu waipuilani ma ka lakou nana aku. Aia nae a haule oia iloko o ke kai, he eono paha mile ka mamao mai o lakou nei aku, kani ae la oia me he pukuniahi la paha i palua ia kona kani, a ia wa no i hakukoi ae ai ke kai, a ala mai la na ale o ka moana, a lilo iho la ka moku o lakou nei i mea ole, e paia lewa ia ana i o a ianei, aole nae he ola i poino.

Aia nae ma kahi a ua waipuilani nei i haule iho ai, ua lilo koke ae la kehu o kona ikaika i ua kualau nei, a pii aku la i ka lewa e like me ka puahiohio, a ua hiki i kona ikaika ke lawe i na mea a pau i hiki aku i ka ekolu haneri paona ke kaumaha.

Aia nae maluna o ka moku, he haneri kanaka ka nui, ke hui ia na mea a pau loa, a he iwakalua kumamalima poe lawelawe i ka wati hookahi, no na hora 3 o ka po, a pela no i ke ao. Iloko nae o ia manawa, o ka Lo Hipa ma wati ia, hiki mai la ua kualau puahiohio nei, a lawe aku la i na mea a pau e waiho mokaki ana maluna o ka moku a me na kanaka he iwakalua kumamaha, me ka hoao no e owili pu aku ia Lo Hipa, aka, ua aua ia oia e ka mana o ka eke talena ana e hii ana.

I ka hala ana aku o ua kualau puahiohio nei mahope o ka moku, i nana aku ka hana o Lo Hipa, aohe na kanaka a me na mea pono moku a pau e waiho mokaki ana, nolaila, hoomanao koke ae la no oia, ua lilo i ka puahiohio. Aia nae, a huli ae oia a nana aku iluana, ike aku la no oia i na mea a pau maloko o ka puahiohio, e lauwiliia ana e like me kona makemake.

Ia manawa no, lalau koke iho la oia ia ka eke talena a hoohamama koke aku la i ka lewa, m kahi a ka puahiohio e wili ana, o ke omo koke ia mai la no ia o na mea a pau e ua eke talena nei, mai ka puahiohio a me na mea a pau ana i lawe aku ai. Hookuu ae la keia i na mea a pau, a koe wale no ua puahiohio nei. A no ka pakela hoeu pinepineia o kahi eke talena, uluhua iho la o Lo Hipa, a hookuu ae la.

I loa no ia hemo ana ae, ku ana o Puahiohio iwaho, huli koke mai la no a ninau ia Lo Hipa, Heaha hoi ka’u hala au i hoopaa iho nei, a hookuu hoi oe ma o lakou la wale no? Pane aku o Lo Hipa, Ua hoopaaia oe no kou hewa, no ka mea, pakele makou mai pau i ka make ia oe. Pane mai o Puahiohio, Aole no na’u, aka, na kuu haku ka Nalopakiana no. No ka mea, ua kauoha mai oia ia’u, a hele au ma na wahi a pau maloko o na palena o keia aupuni, a e lawe aku i na mea a pau i loaa ia’u a pela iho la au i hana iho nei ia oukou i keia wa. A pela no hoi au i hana mau ai i na wa a pau i hala aku, a ke ike aku la oukou, aohe kanaka o ka aina, ua pau loa i ka laweia e a’u, aia iloko o ka aina o Nalopakiana, a ua lilo lakou a pau i kino ano akua i keia manawa. Nolaila, ke noi aku nei au ia oe, ina he mea hiki, e kala mai oe i kuu hewa ma keia hana ana, a e hookuu mai ia’u me ka lanakila, i hele ai au e imi pomaikai no’u iho, aole hoi mamuli o kuu noho kauwa ana na ka Nalopakiana, a i ole, e hoolilo mai no oe ia’u kauwa nau, a ma kau mau hana a pau e olelo mai ai, e hooko no au, a o ka pomaikai e loaa ana ia oe, o ko kaua pomaikai no ia , a ina e komohia ana oe iloko o ka pilikia, owau n kou moepuu.

A ike nae o Lo Hipa, ua haawi pau mai o Puahiohio i kona manao, nolaila, kala mai la oia i kona hewa, a i mai, I keia manawa, e haawi ana au i ka pomaikai ia oe, a e lilo oe i Moi no keia aupuni, ke hoolohe nae oe i ka’u, e like me kau olelo, e kii oe i na mea a pau o keia aupuni au i lawe ai iloko o ka aina o Nalopakiana, a e lawe mai ia lakou a pau, a e hoonoho maluna o ka aina, a o oe no ko lakou Moi, a o oe no ka mea maluna o lakou, a e noho oe me ka lanakila a hiki i kou make ana, a pela aku no i kau poe mamo a pau mahope aku ou a mau loa.

Ua hooko no o Puahiohio e like me na olelo o Lo Hipa, a ne manawa ole no hoi ia miki ana aku, hoi mai ana me na kanaka a pau o ke aupuni ana i lawa ai, ua pau loa mai lokou i ka hoihi hou ia mai e like me mamua.

He elua pule ko Lo Hipa ma noho a malaila. Ua hoohihi loa ka manao o na kanaka o ka moku, no ka maikai o ka aina, a ne nui hoi ke dala a me ke gula, a o ke diamana hoi, ua ikeia aku no ia ma ka waha o na Moo; a ina hoi he makemake kou, e noi maoli aku no oe me ka maikai, a e haawi mai no kela me ke kanalua ole.

Iloko o ia mau la, ninaninau aku la ke Kapena ia Puahiohio. He mau aupuni no nae paha ma keia mua uku nei? Pane mai o Puahiohio, He oiaio, he iwakalua kumamaha aupuni i koe mai anei aku , alaila, loaa aku ke aupuni o ka Moi Meriana, he aupuni nui a nani hoi, he nui no hoi a lehulehu na kanaka, aole no hoi he aupuni kanaka e ae ma keia aoao e like me ia; he oluolu maikai ko laila noho ana, a he maikai ka ea mai ka moana mai i ke ao, a pela no i ka po mai ke kuahiwi mai, a pela mau no i na wa a pau, aole loa e ano e ke ea malaila i kekahi manawa.

Aka, aia nae ma ua aupuni la, hookahi wale no auhau, oia hoi he humu kamaa ka na mea a pau, a hookupu aku imua o ua Moi la, a ua hoahuia a piha kekahi hale nui i hoopiliia mai i ka Halealii, a ua puni na aoao ekolu o ua hale la i ke kiaiia e na koa, no ka pau pinepine o ua hale kamaa la i ka aihueia, a ua hoohiki paa iho ka Moi, o ka mea nana e ike a hopu paha a paa i ka mea nana i aihue, a lawe aku, a hai aku hoi i ka Moi Meriana, e lilo koke us kanaka la i kane na ke kaikamahine, a i Moi hoi no ke aupuni. A ina hoi e loaa ole i ka mea kiai, e li koke ia oia maluna o ka amana i ke ao ana ae. He mau tausani paha o na makahiki elua  i hala ae nei. Ua pau pu i ka make, mai na malihini puni Moi, a i na kamaaina puni hanohano, a ua olo mau ke pihe o na ohana i pa la a pau.

A ia manawa no nae i pane koke ai ua o Puahiohio i ke  Kapena, me ka i ana aku, Ma kuu manao a me kahi ike uuku i loaa ia’u, he oiaio, e loaa ana ia ianei (Lo Hipa) ka mea nana e aihue la ke kamaa, a e lilo ana oia i Moi no ua aupuni la, a lilo pu mai hoi me ke kaikamahine i wahine nana a nau paha, a ko lilo no hoi ia i Moi no ua aupuni la, oiai aohe oukou manao ana ae e hoi hou i ko oukou aina, no ka mea, o ka aina a’u e olelo nei, o ka oi hookahi paha ia me keia aoao o ka honua, a o keia ao holookoa paha. No ka mea, ma ua aupuni la, aoha hoomaopopoia o na mea a pau, a ua lawe kela a me keia e like me kona makemake, a o na pomaikai o ka aina, e hu wale mai ana no ia me he wai puna la. Ua hiki no hoi i kela a me keia ke pii ma na anuu a pau, a koe aku ka noho Moi ana no ke aupuni. O na mea ai ma ia aupuni, aohe hoomakaukau mua ia e like me ko ke ao a pau, no ka mea, iloko o kou wa paina, kii aku la no oe ma kau mea e makemake ai, lawe mai no a ai iho, me ka hoomanao ole no kau wahi hakina i koe. A ma ia aupuni no hoi, aole a noho kanaka aku kekahi no kehahi, ma ke ano kuke a mea lawelawe paha e like me ko ke ao nei, a koe aku ka Moi ma ia wahi. Aole au e hoike pau loa aku ana ia oe i na mea i koe ma ua au aupuni la, o lilo auanei keia mau mea a pau a’u e hahai aku nei i mea hoopohala na kou manao, nolaila, e waiho no kou hooiaio a hiki aku ilaila, a ia wa paha oe e hoomanao ae ai no ka’u mau olelo, e hahai e nei ia oe mamua o ko oukou hiki ana aku ilaila.

Eia hoi, o na aupuni he iwakalua kumamaha ma keia mua aku, a’u hoi i olelo aku nei ia oe, he mau aupuni maikai wale no lakou a pau, a he oluolu kupono no i ka noho ana, he nui loa na mea maikai malaila, i kupono hoi no ka hoohanohano ana, a o ka mea hewa wale no, o ka nele i ke kanaka ole, no ka mea, ua pua loa na kanaka o ia mau aupuni, i ka laweia e a’u, i ke aupuni o Nalopakiana, e like me kana kauoha, a ua hoo@@@@@@@@@@ kanaka o kela a me keia aupuni, e like me ka oukou i ike iho nei no keia aupuni.

A lohe nae o Lo Hipa no keia mau olelo, lana ae la kona manao, e olelo aku ia Puahiohio, e kii i na kanaka a pau o ia mau aupuni, a e hoihoi ia ko kela a me keia aupuni e like me mamua, no kona manao e hoonoho i na kanaka ona ma ia mau aupuni, no ka mea, aohe ona manao e hoihoi hou ia lakou ma ke aupuni o Galatia, no ka mea, ua ike oia i ka hewa o ka moku ma ka holo ana mai, no laila, nonoi aku la oia ia Puahiohio, ma ka i ana aku, Ma kou lokomaikai, ke nonoi aku nei au ia oe, o na kanaka o na aupuni he iwakalua kumamaha au i olelo ae nei, e kii oe a hoihoi ae i ko kela a me keia ma ko lakou mau aupuni iho.

Ae mai la no o Puahiohio, me kona manao kuhihewa nae, e huiia ana ia mau aupuni a pau malalo o kana hooponopono ana, nolaila, hao aku la oia ma kona mana me ke kanalua ole. A mai ia la no hoi a po, pau pono loa mai la na kanaka o na aupuni a pau, a hoi mai ana o Puahiohio.

Ma ia manawa no, ua hapai ae la o Lo Hipa, he wahi halawai mawaena o lakou wale iho, me ka hui pu ana mai o Puahiohio iloko o ia Aha.

Iloko no hei o ia wa, huli ae la oia a pane aku la ia Puahiohio, E like no hoi me ka’u olelo mua, pela no oe e noho ai i Moi maluna o keia aupuni, a nau no ke koho ana i mau hoa kuka uoa, a o na pomaikai e loaa mai ana mai ke aupuni mai, e ai oe a e inu hoi i ka loaa o kou aupuni a hiki i kou make ana; mai kipi hoi oe i kekahi mau aupuni hou aku, o pokole auanei kou noho ana ma keia ao, a lilo hou oe i kauwa hooluhi na ka Nalopakiana a hiki i kou make ana, me ka hehi hou ole o kou mau kapuai ma keia honua, a i ole ia , e uhae liiliiia kou kino a lilo i mea kauliilii, a o kou ikaika, e lilo ana ia i mea ole. A o na aupuni hoi i koe, na’u no e hoonoho i mau Moi no lakou.

Aole no hoi i hala ka makahiki hookahi ma ia hope iho, kue iho la o ua o Puahiohio i na olelo a Lo Hipa. A mamuli o ka mana o Lo Hipa, ua uhae liiliiia ke kino o Puahiohio, a oia ka mea i laha ai o ka puahiohio ma na wahi a pau o ke ao nei.

A pau no hoi na olelo kauoha a Lo Hipa, o ka hoomakaukau iho la no ia no ka holo, a holo aku la, a hiki ma ke aupuni mua, komo ana ka moku o lakou nei iloko o ke awa. A ma ia la no, ua kauohaia na mea a pau e akoakoa mai, a ua akoakoa mai la.

Lawe ae la o Lo Hipa, he eha kanaka o luna o ka moku, a hoonoho iho la i kekahi i Moi, a i ka lua, i Kuhina; a i ke kolu, i Lunakanawai Kiekie; a i ka eha, i Ilamuku Nui. Pane aku la oia i na mea a pau, O oukou a pau i na la i hala ae, ne poe pio oukou na ka Nalopakiana, a ua huikau na’lii me na makaainana, aka i keia wa, he poe alii wale no oukou a pau, aka, o ka mea e noho Moi ana maluna o oukou, eia no ia, a eia pu no hoi me kona mau waha olelo, a o na hooponopono ana o ke aupuni, na like no ia me ko oukou wa mamua, nolaila, e noho oukou me ka maluhia a hiki i ka hopena o keia ao. Ua hooholoia na olelo a pau a Lo Hipa, me ka apono pu ia mai e na mea a pau.

A pela no o Lo Hipa i hoonoho pa ha ai ma na aupuni a pau he iwakalua kumamaha, a koe wale no lakou nei eha maluna o ka moku, oia mei no hoi a me ke Kapena, o ka Malamamoku no hoi a me ke kuene, a ku ana lakou nei i ke aupuni o ka Moi Merina.

O ke Kapena nae, aole oia i poina no na olelo a Puahiohio, nolaila, kioe iho la oia i ke kai, kapalili ana he i-a, a i kona waiho ana aku iluna o ke pa, ku-ku-ku koke ae la no. A pae hoi lakou nei iuka, e hihi ana no ka pohuehue i kahakai, lalau aku la oia hookahi lau, o ke ku-a ipu-haole ae la no ia, a noho iho la no lakou nei o ai. Aka, o na kamaaina, muimuia mai la puni lakou nei, aole nae kekahi leo i hoopuiwa mai ia lakou nei. A pela no oia i hoao ai ma kela a me keia mea ana i makemake ai, aole kekahi mea i hoonele ia.

Oiai lakou nei e hele ana ma ke ano malihini iloko o ke kulanakauhale, halawai mai la me lakau nei kekahi kaikamahine opiopio, nona na makahiki he umi kumamalima, a hookipaia aku la lakou nei ma ka hale o kona mau makua, a hoonohoia iho la lakou nei ma ka rumi hookipa.

A o ua kaikamahine nei nae, aole no oia i hele mua e hai i na makua, aka, wikiwiki ae la oia ma ka rumi paina, a iloko o na minute elua e ekolu paha, ua makaukau koke ae la na mea ai, kani koke ana no ka bele, a kii koke mai la no ua kaikamahine la, a alakai aku la ma ka rumi paina. Hoonoho ae la nae ua kaikamahine nei ia Lo Hipa ma kekahi poo o ka papaaina, a oia no hoi ma kekahi poo.

Aia nae iloko o ka wa a ua kaikamahine nei i hookani ai i ka bele, lohe aku la nae na makua, oiai laua e komo kapa ana, no ka hele ana e makaikai li kanaka. Ia wa, pane aku la ke kane i kana wahine, He bele aina aha la ia a ke kaikamahine i hookani mai la? Pololi koke iho la no paha na kaikamahine la? O ka ai koke ana iho nei no la hoi a kakou. Pane mai ka wahine, Heaha la hoi auanei ka hewa o ko ia la ai, o ka nui koke ae paha ia, mare aku i ke kane, pau ko kaua luhi.

Iloko no o ia wa, kena ae la ke kane, i ka wahine, e hele e nana, a hele aku la. I kona wehe ana ae nae i ka puka, aia hoi o Lo Hipa e huli pono mai ana. O kona ilihia iho la no ia, a hoi aku ia me ke kaumaha a hiki imua o ke kane, aole oia i hoopuka aku i hookahi huaolelo a hiki i ka hala ana o na minute eli ma a me na sekona he kanakolu.

Pau ae la ka ai ana, hoi aku la lakou nei a ma ka rumi hookipa. A oiai hoi lakou nei a nanea ana i ka ninaninau i ke kaikamahine no na mea hou, hoea mai la na makua, a ku koke ae la no o Lo Hipa ma iluna, a haawi aku la i ka hoomaikai i na mea hale, a noho iho la me ka maluhia.

A no ka hiki koke ana mai o na makua, aole no i hoike pau mai ke kaikamahine i ka hahai ana i na mea hou, a nolaila, ua nonoi koke aku la o Lo Hipo i ka mea hale, e hoike pau mai i na mea hou o keia aupuni.

Ku nae la ka mea hale iluna, a mai la, Ma na helehelena e like me kou, (Lo Hipa) ua kaumaha ko’u manao, a aneane hiki ole ia’u ke hoopuka aku i hookahi huaolelo imua ou, no ka mea, ke ike nei au, aole i kohu pono ko’u kamailio ana aku ia oe, oiai ke hoike mai nei kou ano ia oe iho, a o ka Moi wale no kou hoa e like ai. I aku la o Lo Hipa, Aohe pono pela, he kanaka no au e like me oe, aka, ma na helehelena paha ka like ole. Aole no no kakou ia hewa, aka, no ka mea wale no nana i hana, a ma ia ano nae i maopopo ai kona mana, a ina oia e hana ma kea no like, alaila, e kuhihewa aku ana kakou a kuhihewa mai. E hoomaopopo iho no hoi oe, o ka nani o ka olua kaikamahine, ua oi palima ae imua o ko olua, a pela no hoi paha wau imua o ko’u mau hoa nei, nolaila, e hoopau i kou manao, no ka mea, he olelo waiwai ole ia, a o kou hahai ana mai i na mea hou, aia wale no malaila ka waiwai, ke ku no hoi ma kahi o ka waiwai, alaila, o ka loaa koke no ia o ka pomaikai ia oe ma ka la apopo, a o oe auanei kekahi hoa olelo o ka Moi ma keia hope aku.

(Aole i pau.)

Make i Aloha ia.

_________

He wahi moolelo no Miss Emmily Akiune Aii, ka mea i hele aku la i ke ala hoi ole mai.

Ua hanania oia ma Papaikou i Hilo Hawaii, i ka la 6 o June 1853. A o ka nui o kona mau la ma keia ao, na like me 19 makahiki me na mahine 5 a me 14 is.

Ua make ia oia ma Makawao Maui, i ka la 20 o Novemaba, oia ka Poakolu ma ka hora 9 o ke kakahiaka, a hele aku la i ka aoao mau o ka honua, ka pahu hopu o ko ke ao nei. Ua hoopilioili i oia ia ke kane no Makawao, aka, aole nae i mare, ua haalele wale ia no iloko no o ka Hale o ke kane kahi i noho hookahi ai, i koolua nae i ke kupunawahine, a hiki wale no i ka wa i make ai. O koa noho ana ma keia honua he kaikamahine oluolu, he hookipa, he heahea, he hoolohe i ka leo o na makua me na kupuna a me kona mau moli. Ua haalele iho oia he mau makua, he  mau kupuna a he mau muli olna e ola nei. Nolaila, ua heku iho au i mau lalani mele kanikau nona, a eia iho no ia malalo nei.

He u he aloha ia oe e Miss. Emily Akiune,

Kuu moopuna mai i ka oka anoano  Makewao,

Aloha ia uka a kaua i noho malihini ai,

Kuu haohele o kuu moopuna-e,

Ipiliia e kaua ke anu me ke koekoe,

Koekoe ka noho ana wa hele oe,

Wehe mai nei oe i ka pili hemo ole a kaua,

Noho iho nei au me ka u ia oe,

Aloha oe i hele hookahi aku nei aohe lua,

Auwe kuu mea aloha o kuu moopuna-e.

Kuu moopuna mai ka ua-ulalena o Piiholo,

Mai ka wai huihai la o Kalena,

Aloha ia wai a kaua e auau pu ai,

E nanea ai kaua i ka wela o ka la,

O ka ua – ukiu ka hoi ka mea aloha,

Ika nihi hele ae ma uka o Pua-nianiau,

Ika niau hele ana aku nei o ka ohane aohe lua,

Noho iho nei au me ka-u me ka minamina,

Me kuu aloha pau ole ia oe,

Auwe kuu lei haule ole kuu moopuna-e.

Kuu moopuna mai ka ua-lanipili o Hilo,

Aloha ia ua a kaua e pili ai,

Kuu moopuna mai ka papa-kahulihuli o Wailuku,

Ke huli nei au ia oe, aohe nae heloaa,

Kuu moopuna mai ka piha kanaka nui o Kahipalaoa,

Aloha ia wahi a kaua e luana ai,

E hoolu wale ei kaua i ka olu o Hale-Hui,

A Mokuola, ola kaua i ke ahe a ka makani,

Mai Kauakamlehua o Leleiwi,

Ke nihi hele ae la ma Pauaewa,

Kuu moopuna mai na kai ewalu,

Na ke ihu o ka maku kaua i lawe mai,

Na ale kawahawaha o Alenuihaha,

Ke haha hewa nei au ia oe eohe loaa,

A Lahaina Kaua ike i ka hono o ka aina,

Hooiho ka moku i ka lae o Kalaau,

Hoea mai ana o Makapuu,

Ike kaua ia Oahu,

Hooiho ke moku i Laeahi,

Auwe kuu lei aloha o kuu moopuna-e.

Auwe kuu lei haule ole he moopuna-e.

                                    Moopunaole.

Kikihale, Honolulu Oahu, June 14 1873.