Ka Nupepa Kuokoa, Volume XII, Number 11, 15 March 1873 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

Kuu makamaka o keia wahi,

Hoa hele, hoa noho, hoa pupuu anu,

Hoa haihai olelo o ke kulu aumoe,

Hoa kuka o ka pono o ke Akua,

Hoa imi naauao o na kau i hala,

Hala ka pili hookoo ia loko,

Oloko hana nui, hana mao ole,

Ua eha au i ka eha lima ole a ke aloha,

Ke iniki wela nei i ka ili me he ipo la,

  Au--we! kuu wahine ho—i.

 

Kuu wahine mai ka makani anu o ka ai-

Hoomehana aku i ka poli o ke hoa,  [na,

Kuu hoa o na po loloa o ka hooilo ke moe,

Aia no ka pili i ka helu o ke ao,

Moe kokolo ke anu hoonaue i ka houpo,

Wahi i kuu manawa elo ka waimaka,

Hoohanini i na lehua o Kaukini,

I kini a lau ka anoi me ka walohia,

Me ke aloha pau ole ia oe la.

  Au—we! kuu wahine ho—i.

 

Kuu wahine mai ka i-a hoanu ili o ka ai-

Ka upena alihi ole i ka lima ka loaa, [na,

Aohe apona hala i ka liilii hele kahawai,

Ohi hapuku ka akau ulu mai ka hema,

Aloha ia i-a hei i ka poho o ka lima,

Kuu wahine i ka ua pau pili o Lele,

Ke kahiko mai la i ka liko o ka lehua,

He lehua ke aloha na’u e hiipoi nei,

E loku nei i ka iwi hilo ua eha loko,

Haiamu ka ua loku i ke kula pili,

I piliia e kaua ke onu o Maunahoomaha,

Aloha ia wahi a kaua e hele ai,

Kuu wahine mai ka malu ulu, lau niu o

Oia wahi a kaua e luana ai,    [Puou,

Me ke kamalei aloha a kaua he keiki,

  Au—we! kuu wahine ho—i.

 

Kuu wahine i ka malu kukui o Koeleele,

Aloha ia wahi a kakou e noho ai,

Noho homanawanui i ka leo o ka mea ha-

Oia hale a ke aloha ole i noho ai,     [le,

I pupue ai kaua i ke anu a ke kehau,

Mea ole ia anu ia kaua,

Kuu hoa i ka malu o Maria-Lanakila,

Ka home laa loa o ka Moi Lani,

Kahi e haawi ai i ko kakou hoomaikai,

  Au—we! kuu wahine aloha.

  Aloha !  Aloha !  Aloha mau loa !

P.K. KAWAA.

Kahakuloa, Ian 16, 1873.

 

Ka La Hanau o ka Moi ma Kau.

 

Ma ka la 31 o Ianuari i hala, mamuli o ka hooholo lokahiia ana e na puuwai aloha Alii o Kau, ua malamaia ka la hanau o ka Lani Lunalilo.  A mawaena o na hana, he mau himeni ana, he haiolelo a he ahaaina.  Eia malalo iho ka haiolelo a ka Hon. W. T. Matina no ia la:

E na hoa makaainana o’u, mai ka ua Haao o Waiohinu, a hiki wale aku i ka ua kau laau o na lai elua o Kapaliuka;  Aloha oukou:

No ka hanohano a oukou i hooili mai ai maluna iho o’u, e ku aku imua o oukou i keia la, e hai aku i na mea kupono e pili ana i ka hoomanao ana i ka la hanau o ka Moi William Charles Lunalilo, nolaila, ke mahalo piha aku nei au ia oukou e o’u hoa makaainana, ka poe nona ka hoopihaia i ka olioli no keia la.

He hikilele nui ko’u me ka ilihia i keia hora, no ko’u ike ana aku i ko oukou mau helehelena aloha Alii, ma ko oukou naue ana mai nei me na aahu maemae, a me ke ano manao i kupono i ka hana a na aupuni Karistiano o ke ao nei.

O keia hana a kakou e hana nei i keia la, oia hoi, o ka hoomanao i ka la i hanau ai o ka Moi Lunalilo, mai ka pukaha mai o Kekauluohiomano.  kekahi o na Kuhina Nui o ka Lani Kauikeaouli Kamehameha III, ka Moi i aloha nuiia e kakou, he hoailona oiaio loa ia, o ko kakou aloha ana i ka Mea nona keia la hanau, oiai, na kakou like no a pau keia Moi mai Hawaii o Keawe i kekahi Alii o ka moku, a puehu aku i Kauai o Manokalanipo, i hoonoho ae nei ma ka Noho Alii, mamuli o ka hooponopono ana o ka mea Mana, e pu-a lokahi i na manao like ole o na makaainana a pau, ma o ke Keiki Alii la Nona keia la hanau e hoomanaoia nei e kakou, i la kulaia e hoalohaloha aku ai i na Lani, i loaa mai laia na hooponopono piha ana no Kona au, a i hooloihiia hoi Kona mau la ma keia ola ana.

Ma ka apua hope o ka makahiki i naue aku nei me kona mau hooponopono ana, ua ike kakou, ua hoohakahakaia mai la ko kakou Noho Alii, me ke akaka ole o ka mea e noho aku ana ma ke Kalaunu o ko Hawaii Aupuni.  A ia kakou e nune ana, me ka ninau aku ninau mai, aia hoi, ua kui like mai la na Lani i na naau o kakou e koho i ke Keiki Alii i Moi no ka Lahui Hawaii, a eia Oia ma ka hoe o keia Hanauna Hawaii, kahi i hooponopono ai, me ke aloha nui ia oukou e na makaainana o na kupuna Ona mai ka po mai.

Nolaila, he mea pono ia kakou ke hoalohaloha aku i ke Akua kahi-kolu, ma keia la i kapaia mamuli o Kona hanau ana mai, i ka la 31 o Ianuari makahiki 1835, ka la hoi i hoopiha ia na makahiki he 38 o Kona ola ana           E nonoi nui aku hoi kakou i ka Makua Mana Loa e hoomau mai i ka Noho Alii ana o ko kakou Moi ma ka pono, i alakaiia Oia ma ke alanui pololei e paa’i ka Noho Alii o Kona aupuni, a i hooponopono palahehe ole ai Oia me na lima haumia ole maluna o Kona mau Moku Lahui, a pelu iho i Kona mau kuli e kulou haahaa aku i ka Mea e ola mau ana ia hanauna aku ia hanauna aku.

E kulou hoomaikai aku no hoi kakou ma keia la i ke Akua, i hoomau mai ai oia i ka maluhia o ke aupuni me ko na aupuni e, i kapalili mau ko kakou Hae Hawaii i ka lewa me na huaolelo kehakeha, E MAU KA EA O KA AINA I KA PONO.” ma ke au o ka Noho Alii ana o ko kakou @ Moi.

E pelu haahaa i ko kakou mau kuli e hapai ai hoi me ka mililani aku i ka mea nona mai ka Noho Alii ana o na ‘Lii o ka honua, a me ka ulu ana o ka Lahuikanaka ka mea e mau ai ka Noho Alii ana o na Alii, i kaohi mai ai oia i ka neoneo ana o ka Lahui Hawaii mai ke kahua mai o ke emi holo kiki ana.  No ka mea, o ka makemake o ko kakou Moi Lunalilo, o ka hoao o na kanaka e hana pono, a e kokua pu me ia i ka panee ana i ke aupuni ma ka holua o ka hooulu lahui, malalo o na lima aloha o na Hawaii ponoi, a ke ake nui nei Oia, e lilo na kanaka opiopio a me na wahine opiopio, i mau kumu hooulu lahui; i alakai kupono no ka hanauna hou; a i umoki e kiki ai i na puka ou i emi ai, a loaa kou mau pulapula e Hawaii Nui Kuauli; a pela auanei e paa ai “Ka Ea o ka aina i ka pono,” a e mau ai ka Nohoalii ana a hiki i na hanauna he nui ma keia hope aku; a pela pu no hoi e puana mau ia ai, “E ola mau Lunalilo! E ola mau Hawaii, a kau i ka puaneane.”

Eia no hoi kekahi; E hoonani aku hoi kakou i ka Makua Nui, no Kona lokomaikai i ke aupuni Hawaii, no Kona haawi ana mai ia William C. Lunalilo, i Moi no kakou, oiai o ka mua no keia o na Moi o Hawaii nei, i lilo na na makaainana ka hoonoho ana ma ka Nohoalii, mai kahiko loa mai; aole i hanaia keia hana kiekie a hanohano nui hoi i na la i au wale aku la i o kakou mau kupuna, i like me keia a kakou i hana ae nei, e like me ka hana naauao a na aupuni o ka Hikina.

E mahalo pu aku no hoi i ke Akua, no ka nui o kona aloha, no ka haawi ana mai i ka naau noeau i na Kamehameha, e hana i Kumukanawai, e loaa ai ka mana kiekie ia kakou, e hoonoho i Moi ma ka hakahaka i loohia mai i ka Nohoalii; a i wahi hoi e hiki ai ia kakou ke hana e like me ko kakou makemake iho, e like me ka mea i hoakaka ia ma ke Kumukanawai a Kalani Kapuaiwa Kamehameha V., i nai lani aku nei.  No ia hoi, ke nonoi aku nei au i ko kakou naau alona Alii, e hoohui pu mai i ko kakou naau kaumaha Lani, e hohola aku malalo o na kapuai o ka Mea Mana, e uwe aloha nui aku i ko kakou Moi i hala e aku la; oiao laia pau ae la ka heluia ana o na Kamehameha, ka inoa i kapaia, “Ka Liona o ka Pakipika.”  A ma ia inoa i manaiia ai na mokupuni he umikumamalua, mai Hawaii nei o Keawe a Kauai o Mano, a ma o aku me ka lanakila, a hiki i ka 5 o ke au o ka Nohoalii ana; oia lanakila i auilani aku la.

E na hoaloha e, ke poloai hou aku nei au ia oukou me ka manaolana e ukaliia mai ana no e ko oukou mau hoolohe lokomaikai ana, E kikanalei ka noho, e hume ka malo, a e ku ae iluna, a e hana i ka makemake o ko kakou Moi, nona ke Au-Hou, oia hoi, e hookomo i na poohiwi ma na hana lima e kuonoono ai ka noho ana, oiai o kona olioli nui ia, o ka ike mai ia oe e Hawaii, e ala ana a ku iluna.  A pela no hoi e hana pu ai i ka makemake o ka Moi e ola mau ana, i mau ai ka noho alii ana o ko kakou Moi, a mau pu hoi ka Ea o ka aina i ka pono.

Nolaila, e puana like kakou.  “E OLA MAU KA MOI ILIHIA LUNALILO I KE AKUA!  E ola mau hoi kona Lahuikanaka!  E paa mau ka Hae Hawaii nani!”

Waiohinu, Kau, H., Ianuari 31, 1873.

 

O ke Kuikahi Panai Like mawaena o

KEIA AUPUNI A ME AMERIKA,

ua pono anai ke hapai hou ia?

 

He kumu noonoo nui keia a na aoao elua e nana like ai i ka pono kau like o na lehulehu o na aupuni elua.

Aia ma kela aoao mai, he aupuni nui, a nui kona mau waiwai, nui kona miliona kanaka, nui hoi kona ikaika a me ka mana hoi o ka naauao.  Ua lawa oia e hoakea i na pono o kona mau paia me ke akahele loa, me ka mana o kona ike.

O kakou hoi ma keia aoao aku, he aupuni uuku loa, a uuku loa kona mau kanaka, he mau umi tausani wale no, a he nawaliwali loa no hoi, a he emi no hoi. ko kakou waihona Aupuni, me ka hiki ole ke hoolawa i kona mau hemahema kuloko-

O keia iho la ke kulana o na aoao elua o kakou, a o ke kuikahi nae a naaoao elua e hana ai, e hana ia a like loa na panai a ka mea nui e haawi mai ai na kahi mea uuku, a pela aku hoi ka kahi mea uuku e haawi aku ai na ka mea nui ma ka helu dala ana.

He wa kupono keia a ko kakou aoao e lawe ai i keia ninau nui a e noonoo, a e olelo akea mamua o ko kakou ae ana. a hoole ana no ka hana Kuikahi Panai Kalepa.

E hoolilo hoi kakou ia kakou iho, i kaupaona kaulike no kakou iho, me ko kakou makamaka kahiko. i kuluma mau ka kakou noho kipa ana, a pela hoi me na makamaka no a pau a kakou e wehe aku nei i ko kakou mau ipuka hale. e komo mai; a ina ua lawa kakou e kaana like aku ia lakou a pau, alaila, ua pono no ia kakou ke hana.

E pono no hoi e ike lea e kakou i na pomaikai a me na poino o na aoao elua, a ina e kau like mai na loaa ma na aoao elua, mahope iho o ka ae ia ana o keia Kuikahi Panai, e piha ai kona mau poho e ike ia nei, me ka hookaumaha ole ia o ko kakou aoao e na auhau kuloko, alaila ua pono no ka hana ana aku; aka, i hiki ole, e pono no ia kakou ke akahele.

Eia au ma ka aoao kue i ka hana hou ana i Kuikahi Panai Like; a eia na kumu no keia:

Akahi—He mea e emi ai na loaa o ko kokou waihona Aupuni.  O ka ho ike a ko kakou Luna Dute, he $100,000 na loaa mai a Amerika Huipuia mai, e komo ana iloko o ko kakou Waihona i ka makahiki i hala ae nei,  a i hea la e loaa ai ia kakou ia mea e hoopihaia ai?  Ma ka manaoia, aia kahi e piha ai a oi aku paha ma ke komo dute ole ia ana mai o na waiwai o Amerika i o kakou nei, alaila, e kuai makepono loa ia mai ana na lole i ke kumukuui haahaa loa iho i ko ka wa a kakou e ike nei; he pomaikai io no ke oiaio ia; aka, aohe i uwe na makaainana e noho nei no ka pii o ka lole; a ua oluolu loa no i keia wa.  O ka’u e ninau nei, Mai hea mai e hoopihaia ai ka Haneri Tausani Dala i nele ai o ko kakou Waihona Aupuni, mai ke dute ana i na waiwai komo mai, mai Amerika mai?  Ke lele e nei ko’u hauli, malia mailoko ae no o na kapa aahu i loaa mai ia kakou me ke kumukuai emi i olelo mua ia; a eia ka paha auanei, he mau olelo uhiuhi wale no keia.

Eia hou hoi:  Ina ua ae aku kakou i ke Kuikahi Panai Like ana me Amerika Huipuia, ua hiki no ia kakou ke ae aku i na aupuni e ae, i kuikahi o keia ano.  O ke Kuikahi o keia aupuni me Beritania e waiho nei, e loaa no ia lakou na pono e like me ka kakou e haawi aku neia hai.  E nana aku i na kuikahi o kakou e noho nei, e laa hoi o Beritania, Denemaka, Hamebuga, Suedena, Norewai Farani. a pela aku.  Mai keia mau aupuni mai kekahi mau waiwai e hookomo ia mai nei io kakou nei; a malia paha, ke lawe ia aku nei no ko kakou mau waiwai i kahi o keia mau aina.  Aole anei he pono ia kakou ke ae aku ia lakeu kekahi Panai Like Kalepa ana?  Aole e hiki ia kakou ke hoole aku.

I ko kakou haawi ana ia lakou i keia pono o ke kuikahi panai like i ua mau aupuni la, alaila, o ko kakou hoole ana aku no ia o ke komo ana mai he puu dala nui kokoke $300,000, a ke huiia me ka panai a kakou e ae nei me Amerika he $100,000, alaila, ua hoopohoia ko kakou waihona he puu dala nui loa, a pehea la e piha ai? a ihea hoi e loaa ai?

Eia hou hoi:  O Amerika pu no kekahi e hoemi pu ia na loaa.  Ua ikeia, o ko kakou i hoopomaikai aku ai ia Amerika ma ke dute ana mai i ko kakou mau waiwai, he $400,000.  Pehea la kakou i manao ai, he hiki i ke aupuni o Amerika ke hoomaonaona i kona mau pomaikai?  Ina no ka panai waiwai kalepa ak ū , he waiwai lawe aku, a he waiwai lawe mai; Pehea la e hiki ai ia kakou ke manao aku, he hiki ia Amerika ke hoopoho mai i kona mau loaa he $400,000, no na $100,000 a kakou e panai pu ai no ka hoopoho ana?  He mea hiki ole ia.  He mea aneane hiki ole ia kakou ke hoao elua hou aku ia ia.

Alua.—He mea e hoonui ai i ka lilo.  E nana aku i ka hana mua ana, o ko kakou lilo no keia hana, ua aneane he $30,000, a he elua manawa o ka hoao ana malalo o keia lilo nui.  I ko kakou hoao hou ana, e halawai pu ana kakou me ia hopena hookahi wale no.

He manawa nui e lilo ai no ke kuka ana o ka Moi a me ka Aha Kuhina, aole hoi oia wale no, o ka Moi aku no me Kona Ahakukamalu, a o ka Ahaolelo ka hopena.  Ina e helu pono kakou i ka manawa o ka kalawai ana o keia mau Aha ekolu, he nui ke dala e lilo ana no ka manawa mua.  Ina hoi e koho aku ko kakou aupuni i Elele e holo aku i Amerika Huipuia no keia hana, e uku no kakou he puu dala nui, a ina e @ komo mai ko Amerika Huipuia i mau hoololi hou, a e hoole mai paha, o ka lilo no ia o ka luhi mua i mea ole, a o na dala, ua lilo u-a

Ina e hapai hou ko kakou aupuni e noonoo hou, alaila, ua hoomaka kakou e kukulu hou e like me ka hana mua ana, a me ka manawa nui i lilo, a me na dala hou aku, oia no ka mea hahai mahope o na hana o keia ano.                                                                                       Aole i pau.

 

 

PUALI KAUA LIO!

HOOLOHE !!

KE kau ohaia aku nei na Iloa a pau o ka

PUALI KAUA LIO,

e akoakoa ae ma ko lakou Hale Paikau mau, ma ka hora 7 ahiahi o ka Poalua e hiki mai ana, Maraki 18, me ko lakou mau aahu piha.                                      Ma ke kauoha.

 589 1t                                                                                                            J. MOANAULI.

 

KAUKA O.S. CUMMINGS.

HE LAPAAU HOMEOPATHICA.

O KE ANO O KA HAAWI ANA I KA LAAU I KUpono no na mai

HUI,

            RUMATICA,

                                    FIVA

a me na mai kaa loihi wale.

           
Aia kona Keena Oihana ma ka Hale Kauka o Kenede, Helu 63, Alanui Papu, Honolulu.   689 1y

 

E ike auanei na mea a pau ke nana mai, o makou o ka poe Hui Hoolimalimalima i ke Ahupuaa o

KULAIMANO,

e waiho la ma ka Apana o Hilo, Mokopuni o Hawaii, ke hookapu loa aku nei makou i na ano holoholona a pau, aole e hele wale maluna o ua aina la, a o ka mea holoholona e hookuli i keia papa ana, e uku no i hookahi dala no ke poo hookahi, ke loaa aku i ka makou Luna, ia Hanale Wahamu.—Na ka HUI.

   Kulaimano, Hilo, Hawaii, Mar 3, 1873.                                                                 589 4t*

 

E IKE auanei na mea a pau ke nana mai, o makou o ka poe nona na inoa malalo nei, ke hookapu loa aku nei makou i ko makou Aina Hui, e waiho ana ma Kawainui, Hilo, Hawaii, aole e hele wale na holoholona Lio, Bipi, Hoki, Miula, Puaa a me na ano holoholona e ae a pau.  Ina e loaa ia makou a i ka makou luna paha, kekahi o na holoholona i oleloia maluna, e uku no ka mea holoholona. i $1.00 no ke poo hookahi.  E lilo keia Kanawai mai keia la aku.

            Na H Wahamu, Piliwale, Puaohi a me Kahau.

  Kawainui, Hilo, Mar 3, 1873.                                                                                  589 4t*

 

E ike auanei na kanaka a pau e noho ana maluna o ka aina o KUILEI e waiho la ma Waikiki-waena, ke hookapu loa aku nei au i ka hele ana o na lio, bipi, hoki, miula, kao a me ka puaa, maluna o keia apana aina, oia hoi ka aina o W. Keolaloa, a’u e malama nei.  Ina e ike ia kekahi o keia mau holoholona e hele ana maluna o ua aina la. e hoouku no au: $1.00 no ke poo hookahi, a pela no hoi ia Lohiau ko’u hope.  E lilo keia olelo hoolaha i Kanawai mai kona ia e puka ai.                                                                                                            KANAAULUA.

  Kuilei, Kamoiliili, Mar 11, 1873.                                                                             589 1t*

 

L. MAKALE.

  He Loio, a he kokua no na hihia o kanaka, (koe na hihia hewa.)  Aia kona keena ma ka Hale Hookolokolo.                                                                                                                   6ms.

 

Hoolaha Lunahooponopono Waiwai.

No ke kohoia ana mai o na mea nona na inoa malao, i mau Luna Hooponopono Waiwai no APO (he kanaka no Kina) i make ma Hilo, mokupuni o Hawaii.  Nolaila, ke haila aku nei ka lohe i na mea a pau i ale iaia, e hookaa koke mai; a i ka poe hoi ana i ale aku ai, e hoike koke mai.

                                                                                                                         KAHUE (w),

                                                                                    Na Luna H. Waiwai,   {

                                                                                                                         L. SEVERANCE.

  Hilo, Feb 4, 1873.                                                                                                    685 3m

 

I NA kanaka a pau o keia a me keia ano, o makou o ka poe Hui nana i hoolimalima i na Apana Aina o J. KAHAI Esq. e waiho ana ma Kalihi-uka, Oahu, o KELIIPEPEHU a me HUEA ka inoa, o keia mau aina, a ke papa loa ia aku nei oukou a pau, mai kii wale i na mea ulu maluna o ua mau aina le.  Ke kauoha pu ia aku nei oukou, e kii koke mai i ko oukou mau holoholona, me ka uku pu mai.  Ina aole oukou e kii mai a hala na la he 15, mai keia la aku, e hiki no ia makou ke lawe ma ka aupuni.  E lilo keia i kanawai paa no ko makou mau aina, mai kona ia e puka ai ma ke Kuokoa.

                                                                                                                        J. MOEHAU,

                                                                                                                        D. KAHUNA,

  Kalihi-uka, Feb 13- 1873                 (586 2t*)                                                         Na Luna.

 

‘OHI KA IO O KALAAU!

HEAHA LA IA.

—I KA—

Pa Kuai Papa

—o—

SAMUELA G. WAILA MA!

HE PAHEE I KALIAE PAHA!

 

AIA NO MA KA

PA KUAI PAPA KAHIKO

—o—

KIMO PELEKANE MA

—IHO NEI—

E KUAI MAKEPONO LOA

IA ANA

—ME KE—

KUMUKUAI HAAHAA LOA!

—NA—

PUU PAPA NUI, NA LAAU,

—A ME NA—

LAKO KUKULU HALE

A PAU MALAILA.

—OIA HOI NA—

LAAU NOUAIKI O NA ANO A PAU.

PA PAPA MANOANO NOUAIKI.

NA PAPA NOUAIKI.

NA AAHO PAINA ULAULA.

NA PAPA HOLE PAINA ULAULA.

NA PINE PA,

NA AAHO PA a me

NA POU PAINA ULAULA.

NA PILI LAAU CIDA.

NA PILI LAAU PAINA ULAULA.

 

Na Puka 2-0x6-0 a hiki i ka 3-0x7-6.

Na Puka komo laau aniani. 2-6x6-6 a hiki i ka 5-0x9-0.

Na Laau Puka Aniani, 7x9 a hiki i ka 12x18.

 

NA PANI OLEPELEPE,

I PENAIA A PENA OLE IA.

O NA ANO A PAU.

NA ANIANI PUKA ANIANI.

NA PAINA ULAULA MOLINA.

I INIHA A HIKI I KA 5 INIHA.

NA ANO PEPA HALE MAIKAI LOA,

A ME NA LIHILIHI.

AILA HOOWALI PENA MAIKAI LOA.

AILA HOOMALOO PENA , VANIKI.

NA PENA KEOKEO.

            KA LEAD & ZINC.

                        PENA ELEELE O

                                    NA ANO PENA E AE

                                                O KELA ANO KEIA ANO.

NA LAKA PUKA.

NA LAKA POEPOE,

            NA AMI LOLOA,

                        NA AMI POKOPOKO,

                                    NA LAKA UWAI,

                                                NA KUI-NAO,

                                                            NA AMI LELE,

                                                                        NA PUKA ANIANI, &c.

NA KUIHAO,

            KUI WAI,

                        A KUI KUI.

                                    3d a hiki i ke 60d &c. &c. &c.

 

            O keia mau mea a pau, e kuai makepono ia ana ma ke dala kuike.

            O keia mau mea pau, a o kahi paha o keia, e hiki no ke hoounaia ma kekahi o na awa o keia Aupuni.

            He mau Agena no hoi makou no ka mokumahu,   “KILAUEA,”

                                                                                                Kapena McGregor.

  583 m3                                                                                                         WAILA MA.

 

I NA WAHINE HAWAII!

E HELE I “KIKAHAKAIWA!”

 

Ua haule ia HAYSELDEN BROS, ka hoolaha ana aku ma ka laua Olelo Hoolaha o

ka hebedoma i hala, no ka loaa ana mai o na

 

KAMAA BUTI HILA AULII ILI FARANI.

NA KAMAA WAHINE HAAHAA Ili Dia Farani.

NA KAMAA SILIKA HAAHAA o ua ano a pau.

 

O keia mau waiwai maluna, he mau waiwai hou loa, akahi no a loaa mai,

—a oia no na—

ANO HOU LOA O NA PAIKINI MA PARISA.

587 4t                                                                                                  HAYSELDEN BROS.

 

HOOLAHA! HOOLAHA! HOOLAHA!

 

KE MANAO NO KO KIMO.

E LAWE MAI I KA WAIWAI O KELA A ME KEIA ANO, E LIKE ME

KA NUI O NA MEA A NA KANE A ME NA WAHINE E WAE AI.

—AKA, —

No ka piha loa o ka Hale Kuai i na WAIWAI Kahiko i keia wa, nolaila, ua manao

OIA E KUAI POHO MALOKO O KEIA MAHINA WALE NO,

a loaa kahi e waiho ai na waiwai hou.

E hele mai oukou e ka poe i makemake e loaa ona lole maikai, no ke

KUMUKUAI MAKEPONO LOA!

—AKA.—

ME KE DALA KUIKE E HELE MAI AI!

AOLE ONA MAKEMAKE I KA AIE!

“HUAKA ULU O LELE.”

                                                                                                                                    KIMO.

Maraki 1, 1873                                                                                                                        588 3t

 

KUAI HOOPAU LOA.

MA KAHI O NEEDHAM MA.

WAILUKU, MAUI.

 

Oiai, e hele ana au ma ka Aina e, no kekahi manawa pokole, a i mea hoi

e hoemi ai i ka waiwai o makou e waiho nei, nolaili,

E KUAI AKU NO MAKOU NO KE DALA KUIKE!

ILOKO O NA LA HE 30 MAI KEIA LA AKU!

MA KE KUMUKUAI HAAHAA LOA!

EIA NO KA MANAWA E LOAA AI

NA LOLE ME KA MAKEPONO.

HE NUI NA ANO O NA LOLE E KO-

ho ai ka Makemake!

MA KA KUAI HOOPOKO!

                                                                                    W. G. NIDAMU MA.

Wailuku, Maui. Maraki 1, 1873.                                                                                 588 3ts.

 

O WAU o Kahananui, ke hookapu loa aku nei au, i na mea a pau maluna o kuu aina kuai, oia o Puukaeo’ a me na holoholona e hele ana maluna o ua aina la, A ke haawi nei au ia MAKOLE me J. W. PKLAUALELO ka malama, a me ka nana i kuu aina, a he mau Hope laua no’u.  Ina e loaa ka haole, pake a me na kanaka e kii ana i ka wahie e hooukuuia no i elima dala aia no la laua ka mana o pau loa o ka aina mai keia la aku.  Aole ia’u.                IOANE KAHANANUI.

  Puukaeo, Mar. 1, 1873                                                                                             588 2ts*

 

E IKE AUANEI na kanaka a pau, Owau o ka mea nona ka inoa malalo nei, ke papa aku nei au i ka poe waiwai na Haole a me na Pake, a me na kanaka waiwai a pau o kela a me keia ano, Mai hoale mai oukou i ka’u kane mare ia

J. P. KAAUAMO

No ka mea hoi; ua haalele kumu ole mai kela ia’u, a me ko maua wahi moe, a ua hele aku la oia me kahi noho kapakahi, Nolaila ko’u hopohopo, o hele wale aku kela a hoale wale aku i ko’u waiwai e waiho la ma Hamakua. Hawaii, oia hoi na bipi, a he mau eka aina no kekahi, a me na lio.  Aole au e ae aku i ka lilo ana o keia mau mea, mamuli o ka manao o kuu kane mare, ke ole au e ae, a kakau aku i ko’u inoa ma ka Palapala Kuai aku, a hoolilo hoi.  Ina oukou e hoolohe ole i keia, maluna no ona ko oukou poho, aole au e ae e lilo aku kekahi hapa o na waiwai i hoike mua ia aenei.  A no ka oiaio o keia, ke kakau nei au i ko’u inoa ma keia Palapala Hoolaha.

                                                                                                            TIKGA KAIPUKAE.

Hamakua, Hawaii, Feb. 28, 1873.                                                                              588—4ts*      

 

WILLIAM RYAN

(MEA KUAI LAKO AI.)

 

UA NEE AE NEI OIA, A UA WEHE I kona Hale Kuai Mea Ai, ma ka Hale Kuai mua mauka iho ka uapo o Peleula, Alanui Nuuanu.  Malaila e loaa ai na lako mea ai a pau.      584 3m

 

CHARLES SMITH!

[Kale Kamika,]

 

MEA PENA A HALE, Moku, Papa inoa a kaa lio, Kau Pepa hale, a hana puka aniani.  Ua konoia na mea a pau e hele mua ae i ona la.

  Hale Hana Alanui Kaahumanu.                                                                               582 3m

 

KA HALE PAI KII HOOLELE AKA

—O—

AGIU a me AKIONA!

 

UA wehe ae nei maua i Hale Pai Kii no na mea a pau ma ke

ALANUI NUUANU, HELU 65.

E paila na kii maikai o na ano a pau, e like me ko oukou makemake.  E hanaia ana a nani kupono e like no ka uku oluolu@ E hele mai.  O na lole komo i ka wa e pai ai, eia no ia mano kupono no na wahine a me na kane—na kuka palaa loloa a o Kaleponi, kaula-wati, komolima a me na mea hoonani a pau pela no ko na wahine mau lako, oia na peahi a me na pua hoonani.  E paila na kii pepa a me na kii aniani e like me ko oukou makemake, keokeo, eleele, ulaula a ahiahia paha.

  I ka wa e pai ai i ke kii, e hookaa mua ia ka hapalua o ka uku, a pau ke kii i ka hanaia, alaila, hookaa pau loa, a lawe no hoi ke kii.  Me ka mahalo.                                     577 6m

 

J. NOTT & CO.

MA MEA HANA

TINI KELEAWE,

—A—

HAO PAPAA,

Helu 9 Alanui Kaahumanu!

Ua hiki ia laua ke hana i na ano a pau e pili

ana i keia laina, e like me ka

Hoomoe ana i na Piula Wai,

HAO A PIULA PAHA.

HAWAI PIULA NO NA HALE LAAU

EIA HOI KEKAHI

Eia ma ko laua wahi i na wa a pau,

--NA—

LAKO PIULA

O KELA ANO KEIA ANO.

KAPUAHI HAO,

O NA ANO A PAU

A ME NA KUMUKUAI A PAU,

Papaa Kepau, Piula Wai,

            Paipu Hao, Papaa Ziniki,

                        Pauma Wai, Ki Wai,

NA KAPU AME NA PAKEKE HAO!

Papa Holoi, Na Ipu hao,

            Iliwai La@o Lio, Pa Palai,

                        Kui kakia moena,

 Na Papaa Hao Kaupaku Hale 26x64,

Na Palaki hamo puna me Holoi hale,

    Na Ipukukui hele po,

A me na mea e ae he nui wale ke helu aku

    21 yr.