Ka Nupepa Kuokoa, Volume XI, Number 46, 16 Nowemapa 1872 — Page 2

Ka Nupepa Kuokoa

KE KILOHANA POOKELA NO KA LAHUI HAWAII.

HONOLULU, NOVEMABA 16, 1872.

            Ano ka manawa e waele ni i ka aina no ke kanu pulupulu.Mai kaou i na anoano pulupulu e ae, uka, o  na anoano Pulupulu Si ailana wale no, no ka mea, aole i makemakeia na ano pepeekue. Ke aki mai nei na peelua i na laau opiopio, no ia mea, he oi aku ka maikai ke kali a hanau, a make, a laila kanu.

            O na kumu pulupulu kahiko a pau, e kulaiia lakou ilalo,  no ka mea, o ka pulupulu mai na kumu laau kahiko mai, he papeekue a mokumoku wale ke omilo ae a huki, a he popopo. I keia manawa, ua makaala loa ka poe kuai pulupulu o Enelani a me Amerika, e kuai ma ka pulupulu maikai a ikaika na moawe. No ia mea, mai ohi mai oukou i na pulupulu mai na kumu laau mai I oi aku mamua o elua makahiki ke kahiko a pau.

            Ma na makahiki hope mai nei, ua hemahema loa ka poe kanu pulupulu no ke ano o ka lakou pulupulu, a ua ohi mai lakou i na pulupulu popopo a inoino, a hoouna mai ianei. O ka mea keia i poino ai ma ke kuai ana aku ma na aina e, a no ia mea i kapaia ai ka pulupulu Hawaii ma Enelaai, “he pulupulu ino.”  He pono e hoao kakou e hooponopono i keia hewa ma ka hooulu wale ana no i na pulupulu maikai.

            E ike no ko makou poe heluhelu, ke nana ae ma kekahi olelo hoolaha, ke makemake ne ka Luna Pai o keia nupepa e kuai mai me ia i nu Pulupulu Si Ailana maikai, ma ke eono (6) keneta no ka paona pulupulu me ka anoano, a he iwakalua (20) keneta no ka paona ina na wae e ia na anoano.

            I mea i pakui aku ai i keia, e uku aku no oia i uku makana, he HOOKAHI HONERI DALA MA KE GULA, i ke kanaka e hooulu a lawe mai iaia iloko o ka makahiki 1873 aenei, I ka pulupulu nona na paona aole e emi malalo o 10,000.  No laila, o ke kanaka e hooulu ana i 10,000 paona pulupulu, e loaa ana no iaia, he $600.00 no ka pulupulu a me ka makana, he $100.00 , a i oie ia, o kona loaa no ka makahiki hana hookahi, he $700.00!

            Ke manao nei makou, o keia makana nui e haawi e ia nei, he mea ia e paipai mai ana i na

kanaka Hawaii e hoomaka i ke kanu pulupulu.  Ua iki no oukou a pau i ke kanu ana. No ia mea, e hoolana ke oukou manao, e hele i ka hana, a e loaa ke dala no oukou iho a no ka oukou mau keiki. E noonoo a mai palaualelo.

KA HELU KANAKA MA HAWAII NEI

            E like me ka makou i hooia aku ai i ko makou poe heluhelu, ma ka pepa o kela hebedoma i hala, e hai aku ana makou a nui, no ka helu ana i na kanaka o Hawaii nei i keia makahiki, pela hoi makou e hooko nei ano, me ka manao, e apo mai ana oukou a noonoo iho me ke akahele, a o la wa e hiki aku ai ka pepa pai hakahaka, alaila, e hoopihaia a lawa pono na mea i makeniakeia.

            Ua waihoia mai imua o makou e ke Kakauolelo a ka Papa Hoonaauao, kekahi o ka pepa pai hakahaka a me na kuhikuhi ana i na laua a ka Papa i hookohu aku ai no ka lakou mea e hana aku ai. Ua hoomaopopo no paha oukou, he kanawai ko kakou e waiho nei, e kauoha ana i ka Oihana Ao Pulapula, e heluia na kanaka o keia lahui i kela a me keia aono makahiki. Nolaila, ua piha na makahiki eono mai ko kakou helu hope ia ana ma ka makahiki 1866 a hiki i keia wa.

            O ke ano o ka pepa pai hakahaka, he pepaia i paiia me na huaolelo moakaka, a i ka wa e wehe ae ai kela a me keia, e hamama mai noa imua ona ka papa kuhikuhi, me na huaolelo Beretania a Hawaii. O na mea au e ike ai, mahope iho o ka heluhelu ana i na olelo mamua ne, e loaa ana na kolamu i hookaawaleia malalo o na poo pensi “Na inoa,” oia hoi kahi e kakau ai ke poo o ka ohana i kona inoa me ka poe e moe pu ana maloko o kona hale, i ka po o ka la 27 Dekemaba ae nei. Ma ka akau ae, e kau ana ke “kama” oia hoi ke ano, ina paha he kane a he wahine. Ma ka akau ae o ke kama, ke kolamu no na ke poo, “Na Makahiki,” oia hoi ka hai ana i ko ke kanaka mau makahiki. Ma ka akau ae, ke “One hanau.”  Ma ke kolamu hope loa, ka “Oihana lawelawe,” oia hoi, ko ke kanaka hoike ana i kana hana e lawelawe nei.

            Aia maloko o na kolamu nunui, noho kela mau poo maluna ae, i hoike @@@@@ aku la, ho mau kolamu liilii iho, oia keia, malalo o ke kolamu aunui, nona ke poo, “Kama,” ho mau kolamu lihi iho elua, “kane a me wahine,” oia hoi ina he kane, e kiko i kahi malalo o ke kane, a pela no hoi ina he wahine. Malalo o ke kolamu nui nona ke poo. “Na Makahiki,” he ma kolamu liilii iho, “Keikikane malalo o 6 makahiki” “Kaikamahine malalo o 6 makahiki” “Keikikanemawaena o 6 a me 15 makahiki” “He kane iwaena o ka 15 a me ke 40 makahiki” “He kane maluna ae o ke 40 makahiki” “He wahine maluna ae o ke 40 makahiki” Malalo o ke kolamu nui  “Mareia,” o keia mau kolamu liilii iho, He kane ua mareia. He wahine ua mareia. Malalo o ke kolamu nui “One hanau.” o na kolamu liilii iho, penei, He kane kanaka maoli. He wahine kanaka maoli. He hapahaole kane. He hapahaole wahine. He pake kane. He pake wahine. Hanauia oia Hawaii nei, he haole na makua. He haole Amerika. He haole Beretania. He haole Geremania. He haole Farani. He haole Pukiki. He haole no kekahi aina e ae. Malalo o ke kolamu nui nona ke poo, “Oihana Lawelawe,” na kolamu liilii iho, penei ,He Kahunapule. He Kumukula. He Kahunu lapaau i laikiniia. He loio. He oihana ka lepa. He oihana hana lima akamai. He oihana mahi aina. He hana ku makahiki. He mea kuleana aina.

            I mea i pono ai ka hoopiha ana o keia papa i pai-hakahaka, ua kenaia ke poo o ka hale e kakau moakakaia ka inoa o kela a me keia wahine, e keiki hoi, i moe ai iloko o ka hale i ka po o ka Poalima, la 27 o Dekemabe, 1872, ma ke kolamu ma ka aoao hema o ka pepa i paihakahakaia; a e kiko ia no kela me keia inoa, na mea i ninauia, ma ke kakuu ana iho wa kela me keia kolamu, i pili ai na ninau i kela me keia inoa, i kaha e like me keia. 1.

            Ua hoouna aku ka Papa i na kuhikuhi ana i na luna i hookohuia, a i mea e ike like ai kakou, eia mai no na wehewehe ana i kela a me keia luna pakahi.

            O ke koho ana, ao ana, a me ka hooponopono ana i kekahi poe kupono iloko o ka Apana, i mau hope nou.

            O ke kena aku i na Hope ou e waiho aku i kela hale keia hale, a puni ka Apana I kekahi o na pepa i paihakahakaia e ka Papa Hoonaaauo, a e hoolako aku ai hoi, mamua ae o ka la e kohoia'i no ka helu ana i na kanaka, oia hoi ka Poalima, la 27 o Dekemaba, 1872.

            O ke kena aku I na Hope ou o ohi maii na pepa i pai-hakahakaia, i waiho mua ia 'i e lakou i kela hale keia hale a puni ka Apana, i ka la mahope iho o ka la i kohoia'i no ka helu ana i na kanaka, a lawe pololei aku ka Luna ia oe.

            Na ka Luna e houluulu, a e hooponoponono i na pepa i pai-hakahakaia, a i hoopihaia hoi i ke la me keia hale, iloko o kekahi pepa i pai-hakahakaia, a ka Papa Hoonaauao e hoolako aku aku ai no ia mea, a hoouna koke mai i ka oihana nei i ua papa 'la i houluuluhia, ke pa'a iho.

            I ka wa a na Hope e kii aku ai e ohi i na pepa i pai-hakahakaia, i waiho mua ia, aku ai e lakou i kela me keia hale; ina e ikeia, na hoopiha ole ia kekahi e ke poo o ka hale, kahi i waihoia aku ai, no ka hemahema, poina, a no kekahi kumu e ae paha, alaila, na ka Hope Luna no e hoopiha i ua pepa la, no na poe a pau o ka hale, mamuli o ka ike i loaa iaia ma kona ninaninau ana aku i ka poe o ka hale oia manawa koke.

            E kohoia ana ma Honolulu kekahi Hope no ia hana wale no nana no e waiho aku maluna o keia a me kela moku holo pili aina, kekahi pepa i pai-hakahakaia. A na ke Kapena, a Malama-moku paha e hoopiha i ua pepa la no na poe a pau maluna o ka moku, oiai e holo ana paha i ka moana, e ku ana paha i ke awa, i ka po Poalima, la 27 o Kekemaba 1872. E malama pono na Kapena o ua moku la i na pepa i pai-hakahakaia, i hoopihaia maluna o ka moku, a hiki i ka manawa e kiiia ku ai ma Honolulu e ka Luna i kohoia no ia hana.

            E kakau like ia na ma na wahi a pau o ka Pae-aina, ka heluna o na kanaka, i ka po o ka Poalima, la 27, 1872.

            E ka hoopihaia ana o na pepa pai hakahaka, i ka wa i hoolahaia'i ua kauohaia na poo o ke la me keia ohana, e malama loa i ua mau pepa la, a hiki i ka wa a na hope luna e kii mai ai.

            Ke manao nei makou, he papa helu moa kaka keia i kona wa i hala oe, nolaila, i ka wa e loaa aku ai i na hale a pau, na ka pepa pai hakahaka no e wehewehe mai nona iho ma ka heluhelu ana a hoomaopopo iho, i kela me keia.

            E malama loa hoi na poo o na ohana, aole e kakau wale iho maloko o ka pepa pai hakahaka i loaa la makou, i na inoa o ko lakou mau ohana e noho kauliilii ana i o ia nei, o na inoa wale no o ka poe e moe ana maloko o ka hale, i ka po o ka Poalima, la 27 o Dekemaba ae nei.

            O ka makou ake nui loa ka hoikeike ana aku i ke kino o ka pepa pai hakahaka imua o oukou, aku, no ka nui o ka hana, nolaila, ua lawe mai makou i na wehewehe mamua ae nei me ka lana o ka manao, e hoomahuahuaia no ka oukou ike i ka wa e loaa kino aku ai ka pepa pai hakahaka.

            Me keia mau wehewehe, ke manao nei makou e hooki, a e pakui mai hoi i na inoa o na Luna i hookohuia e ka Papa, ma kela a me keia apana.

            HAWAII

Hilo – D.H. Hitchcock

Puna – L. Kaina

Kau – C.N Spencer

Kona Hema – S.N. Kaai

Kona Akau – J. G. Hoapili

Kohala Hema – S.F. Chillingworth

Kohala Akau -  Rerd. E. Bond

Hamakua – G.W.D. Halemanu

            MAUI

Lahaina – H. Ex. P. Namolelua

Waiehu & Waihee – W.P. Kahale

Waikapu & Wailuku – H. W. Daniels

Honuaula & Kula – Rerd. G. B. Whipple

Hana – A. Hunoa

Makawao – M. Kapine

            MOLOKAI

Molokai – R.W. Meyer

            LANAI

Lanai – W.M. Gibson

            OAHU

Kona (Honolulu) – W. Jos. Smith

Ewa & Waianae – J. Komokaehuehu

Waialua – J. F. Anderson

Koolauloa – W. C. Line

Koolaupoko – J. P. Kamai

            KAUAI

Waimea – V. Knudsen

Koloa – Rerd. J. W. Smith

Puna – P. Isenberg

Koolau & Hanalei – D. Kaukaha

            NIIHAU

Niihau – F. Sinclair

NU HOU KULOKO

Oahu.

            Ma kekahi olelo hoolaha o ka pepa o keia la, e ikeia iho ai, e haawi ana na puukani o Hale Iwa I Aha Himeni Kamakamailio ma ka aniabi o ka la 20 o Dekemaba.

            Ma kekahi leta mai Makawao mai, ua ikeia iho, ua haule iho he kuaua koikoi a ke Kona malaila, a ua pau kauhane ana a ko laila poe mahiko. Ua piha na lua wai eli, a ke olioli wale i ka loaa ana a ko ka lani pomaikai.

            “HE PAAKIKI 10. Ma kekahi Ahahui Paio, ua hoopaapaaia keia kumumanao, 'He hewa anei ke apuka i ka loio? Mahope o ka hoopaapaa nui ia ana o keia kumumanao, ua hooholoia penei: 'Aohe hewa, aka, he paakiki nae ke uku I na lilo.''

            HE ALII MAKAIKAI HONUA. Aohe e loihi ka manawa I koe, a e holo makaikai ana ke Duke o Genoa, keikikane a ko Victoa Emmanuela muli, a puni ke ao nei. E holo ana oia maluna o ka moku kaua Italia. E hiki mai ana anei oia i Hawaii nei.

            AOHE NO I KANA MAI. Ke hoike mai nei kekahi nupepa Kukini, ke aneane aku nei e hiki i ka hapalua miliona dala ka lilo o ka makuakane i ka huakai a ke Keiki Alii Rukini Alexis, e hele makaikai nei i ka honua. Ua hiki ae oia ma Kina, a e holo ana i lapana. O ka ninau, E hiki mai ana anei oia i Honolulu nei?

            HE MAKANA NO KE KOLOHE. Ke hoolaha nei o Bila Holo o keia kulankauhale, e haawi no oia i $25.00 no ka mea nana e hoike mai i ke kolohe nana i komo aihue kona hale kuai lolo ma alanui Beretania, i ka po Poaha o ka hebedoma i hala, a lawe aku me ka hana hilahila ole, I kekahi mau waiwai oloko o ka hale. Ke ake nei makou e loaa ia kolohe a e kauia ka hoopai maluna ona.

            E HOOHALAHALA. Ua loaa mai ia makou kekahi palapala mai ka Hale Mai Moiwahine mai, e hoohalahala ana no ke kojia ana o kekahi mea mai e hana maloko o ka pa mea kanu. No ko makou maopopo ole i ke ano o na mea i hanaia, a malia paha he kuhalahala no ka mea kakau lima, nolaila, ua kapae makou I ka hoolaha ana aku i mua o ke akea.

            MAKE ENOOLE. I ka auina la Poakahi iho nei, i kekahi kanaka Hawaii e hele ana ma ka alanui Hotele, aia hoi, hina iho la ia a haule iluna o ka lepo. Ua hapaiia ae oia e ka po'e e nana ana, aka, mamua o ka hiki ana aku i ka Hale Hana o Kauka Oliva, ua lele loa e aku kona hanu. Ua manaoia, ua make oia no ka mai ma ka pu'uwai.

            Ma ka po o ka la 10 o Novemaba nei, wa Waihee, Maui, ua make aku la o Mileka Kanoho. Ua hanauia oia ma ka makahiki 1832, a nolaila, e ka nui o kona mau la, he kanaha makahiki. He wahine hanau nui oia, no ka mea, ua hemo mai kona puhaka aku, he 12 mau keiki. He 2 o lakou i make, a he 10 e ola nei me ko lakou makuakane. “E mahaloia ke Akua iluna lilo, Nana i haawi a nana hoi e lawe aku.”

            KA HANA AKA NAAUPO. Ma ka la 7 o keia malama, ma Punaluu, Koolau, Oahu, ua loaa aku ia Makanui wahine, he puolo maloko o ka wai o Waipuka. Ua wahi ia ma waho i ka lole ulalii, a maloko he apu-awa me ka awa a me ka puaa, ua kaluaia a moa. He kini piula kekahi me na mea anaana oloko. O ka manao paha o ka hupo nana i uhauha i puaa hoohala miki-poi, o ka make o ka poe nana e auau a e inu ia wai, aka, owai la ka naaupo huli pu aku mahope o kana hoohoihoi. E pau ke kakuhihewa, a e manao aku, hookahi wale no mea nana e pepehi a e hoola.

            “AIA UA HALE LA. I kekahi la i hala aku nei, ana he elua mau kanaka Hawaii ma ke alanu Beritania, a i ko laua kaa pono ana me ma kahi e ikea pono mai ai o ka hale Hotele, pane mai la kekahi kanaka i kekahi: 'Aia! Oia no ka hale kahi i hoopohoia ai ka pau dala mai e na Kuhina. ' Nana hoomakahuhu ae la kekahi i ka hale a pane mai la, ae; poho maoli no!' Oia iho la ka kanaka e nana nei i ka hale hotele.”

            Ma ka la 11 iho nei, na ku mai kamoku Madura me na tona kanaha 1,530 no ka Laina Hooholo Mokuahi o Webs, a ke kiola nei ka laoahu.

            AIA KAA OLE. Ua ike iho makou, ua palohe iho nei ka Hui o Ahunako o keia kulanakauhale, a nolaila, ua hoihoila kona mau waiwai i na lima o na luna hooponopono no ka pomaikai o ka poe ana i aie aku ai.

            Me ka bebedoma aku nei i hala, he inoino ma na kapakai o Kona a me Kau. No ia mea, i ka hoao ana o ke kuna Uilama e ku i Kaalualu, aole oia i kokoke aku no ka nua o ka inoino, a ua hoi hou mai i Honolulu nei me ka ukana no. O Kilauea hoi, iaia e ku ana i Kawaihae, loaa koke oia i ka makani a haalele i kona heleuma me na ohua o Kawaihae a me Mahukona, huli hoi loa mai i Honolulu.

            KE KUMUKUAI O KA AILA. Ua hoopaa ka Oihana Kanikela Amerika i ke kulana no ka ohi ana i na luina i ko lakou mau uku no ke kikina pepehi kohola I hala, a penei ke kau ana:

Aila pama (Sperm) no ke galani 90 kaneta.

Aila o Arita no ke galani 35 kaneta.

Aila o Kuaau no ke galani 33 kaneta.

Aila o Uwalo no ke galani 33 kaneta.

Iwi Kohala no ka paona 70 kaneta.

Niho Uwalu no ke galani 20 kaneta.

            Ma ka Poalua iho nei, ia Asiu pake o Kauka G. P. Judd o holo ana maluna o ka lio, me ka  manao e pii e ike ia Kauka, aia hoi, ua kiolaia oia e ka lio ana e holo ana, a haule iho la a mauleule. Ua hoihoiia mai oia ma kona hale ma ke kihi o na huina alanui o Nuuanu a me Moi. He eha ulia wale keia, no ka mea, he wahi lio no ia ana i maa mau ai.

            NA LA KULAIA AUPUNI. Ua hoolaha ae nei ke aupuni, e malamaia keia mau la malalo iho, ma ke ano he mau la kulaia aupuni:

            POAHA, NOV. 28. Ka la i ae ia mai ai ke Kuakoa ana o Hawaii nei e na aupuni o Beritania nui a me Farani.

            POAKOLU, Dek. 11. La Hanau o ka Moi Kamehameha V.

            POAKOLU, Dek. 25. La Karisamasa.

            POAKOLU, Ian. 1, 1873. La Hapenuia.

            KA AINA O KAHUKU. Ma ke awakea Poaha iho nei, I kulike ai me ka hoolaha mua ia ana e na Luna Hooko Kauoha o R. Mofita i make, ua kuai kudalaia ae kela aina waiwai nui o Kahuku e E. P. Adamu ka Luna Kukala. Ua lilo aku ia H. A. Widemana no na $22,050. Mai ka $16.00 ka hoomaka ana o ke koho a hiki i keia puu hope. Ua nui ka poe i hele ae e nana i ke kudala ana. E lele ana keia puu dala mai ka aina aku nei.

            KA ULU ANA O LADANA. Iloko o na makahiki he 23, ua oi aku mamua o ka miliona kanaka hou i pakuiia mai i ka heluna o na kanaka, me ka hui pu ole ia mai o na kipeleleu ka hale e poai ana i ke kulanakauhale. Iloko po hoi o ia manawa, he 250.000 ka nui o na hale i kapili hou ia o na ano a pau, a ua hooneeneeia aku ke kulana o na makai i 1,100 mile ka mamao. Ke hoolimalimaia nei, he 80,000 makai ku mau no ka malama ana i ka maluhia a he puali kaua kekahi i hoolimalimaia no ia hana, a i na ma na hana ano nui loa ae, e komo mai ana no na koa Kiai a  me na koa ponoi o ka Moiwahine.

            HE OHANA IA PAHA. Ma ka ke kuna Hattie huakai i holo aku nei i Lihue i kela Poaono aku nei i hala, ua hoihoiia aku maluna ona mai Honolulu aku nei, he kanaka kumakahiki nona ka inoa Nawaaheihei. Aka, i ke kaa ana mawaho ae o Puuloa, ua lele iho la kela iloko o ke kai. I ka apa no i ka waapa a kuu ilalo ua hala loa kela. Ua pae ola mai paha ia, eia no paha i ka waha o ka ia nui. Malia no paha he mamo no na ka ia, ke hoi la no iloko o ke kai. Oia ohana like paha me ka “limu kaha kanaka,” oiai ma na moku wale no o Kauai e lohea mai nei na houpo kapalili.

            UA PALALAUHALA NO HOI, MAALO AKU LA MA O. Ma Kawailoa, Waialua, Oahu, ua kiei aku la o A.Kealainanea k ma kela kae o keia ola ana. Ua lia ia, ua pae pono aku la oia ma ka Muliwai Lani. Ua hanauia oia ma Kapaeloa, Waialua, Oahu, he 85 ka nui o na makahiki o kona ola ana a moe aku la. No kona loohia ana i ka nawaliwali ma na lala o ke kino, pela oia i kaa loihi ai i ko mai a hoomaha mau loa aku, ma ka la 11 o Novemaba, bora 3 A.M. kona make ana. Ua maopopo i na hoahanau a pau o ka ekalasia o Kehu-kai nei, he haipule oiaio o Aberabama Kealainanea, a ua make oia me kona haipule io. “Pomaikai ka poe make ke make iloko o ka Haku.” C. N. Kalama.

            UA HAPA NA LA. I ka la 30 o Okatoba i hala aku la hora 2 ahiahi, ua hala mohala aku la o Mrs. Mikala K. Bila Hane ma kela aoao o keia ola ana, ma ka home o Mrs. Poor kokoke i Monikahaae kona wahi i make ai. Ma ka hora 4 ahiahi Okatoba 31, ua manele ia aku la kona kino make ma ka ilina Maemae. Ua hanauia oia ma Naawaawa, Kona Hema, Hawaii, i ka la 28 o Iune, 1856, he 15 makahiki me 10 malama me 14 hora kona ola ana a nauwe aku la me ka luuluu. Ua mareia oia me Bila Hane Pakini ma ka ka la 22 o Aperila o keia makahiki no. Ua hooonaauaoia oia ma ka olelo makua a me ka olelo haole, o ke Talena maikai loa loaa iaia o ka ike himeni, ua mamao ia aku, he hoohanau oia no Malio i Puna, Hawaii, ka maalea i ka hookani ha-no a me ka pulani, ma ka apana o Kamualii kona hoomea ana i keia hana maikai. C. N. Kalaoa.

            MELE.--Eia iho malalo na mele hookaniia ana e ka poe pohi ohe o ke aupuni, ma ka Emma Square i keia ahiahi, e hoomaka ana ma ka hora 4:

Love Not, March...@@@@

Vanatina, Opera Linda...Bon@@tti

Rage in America, M@@@...@@@@@

@@@@@@@@@

@@@@@@@@@

@@@@@@@@@

            E hoopau ana me ka paikau a peni ka Square.

            KE KEIKI LALAWAI O LIHUE. Ma kekahi letu i hiki mai nei mai Kanai, ua ikeia iho, i ka hoi ana aku nei o ke keiki lalawai o Lihue me kana opuu rose, ua kalahea ae la oia i kona poe hoaloha me na makamaka, ina he mau makana ka lakou nona, e lawe mai. I mea e kapekepeke ole ai ka manao, ke lawe mai nei makou i ka olelo ponoi o ka leta: “Ma Lihue i ka Poaono iho nei, e ahaaina kuhewahewa ka i malama a e koonei keiki lalawai, oia he ahaaina la mare. Ua kuahauaia ke nui a me ka liilii e lawe i ka lakou mau makana, puaa, moa, bipi, pelehu, ia, oopu, opihi, limu, anae, a peia aku. O ka hapalua o na puaa ka i pepehiia a o kahi hapa, ua hookoe ia no, a pela aku no hoi na lako e ae. Ua ai ka poe I hele mai a lawa, a o ke koena, ua haawiia i na mea a pau. Aohe mea nele i ka haawi na opeope puaa, bipi, a pela aku.” O ka hana a ke keiki lalawai la, ai a ukauka ka waha a maona ka opu.

            EIA HOU NO UA KOLOHE. Ma ke aumoe o ka po Poaono aku nei i hala, o ka hora 11 paha ia, i ka hoi ana aku o kekahi mau haole e moe ma ko laua wahi ma alanui Kikeke, aia hoi, ike aku laua i ka ula mai o ke ahi maluna o ka lanai o hope o kekahi o na hale o Aberahama Bolster. E hoomaka ae ana ke ahi e aa i ka wa i loaa aku ai, aka, ua pomaikai loa nae i ka ike e ia ana mamua o ka nui loa ana aku. I ka hoomaopopo ana iho i kahi mai nona ke ahi, aia hoi, he welu ua houia i ka aila, ua hahaoia ae malalo o ke pa, malalo ponoi ae o ke pili hale, a malaila I hoaia aku ai. Maloko no hoi o ka pa, ua luaa aku he mau ahikoe laau, a ua koe ia kekahi. Ina i a loa ae ke ahi, ina la aohe nao ai i ka papaa, no ka mea, ua kukulu pili loa ia na hale ma ia wahi, a hookahi no la pulumi ana a ke ahi pau loa. Aohe he mea e kanalua ai, he ahi keia na ke kolohe e makemake ana e hooneoneo ia mau wahi. Ke paipai aku nei makou i ka poe a pau oloko nei o ke kulanakauhale, e makaala no na hoonaikola o keia ano. Ina e loaa e hopu a paa loa, alaila, hoopaa ma kahi pia.

            AHAAINA KUHIKUHI-A. E wehe ia ana he papa aina Kuikui-a Malamalama, malalo iho o ka malu lau Inia o Pihakamanao, ma Waikele, Ewa, nona ka inoa kaulana “Ka ia hamau leo,” e na keiki o ke kula Himeni i kapaia ka inoa e lakou, ka Malamalama, ke hiki aku i ka la 23 o Novemaba, bora 11 kakahiaka, malalo o ke alakai ana a D. K. Kuaihe. A ma ia la e kuu pau mai ai lakou i kekahi mau mea hoonanea i ke anaina, ma na mea kani lealea a me na leo kani nahenahe, oia keia, puhi Ohe (Flute) hookani Korisna (Accordian) a me kekahi mau Himeni hoohoihoi naau, i ku ka iini e loulou ai ka aka. Nolaila, e poloai ia aku nei na manu hulu like e hele nuna like mai me na pupu lau oliva a ke aloha, i hoopau ae i ka hemahema o keia kula. A e lohe no oukou i ka nenei, nunulu, puhepuheke, oweowe o na leo o na keiki o ka la Hamau-leo. Nolaila, e ka a nauwe mai i ike maka, he ole ka lohe wale. H.K. PERESIDINA.

            KANAKA MAMA I KE KUKINI. Aia ma Waikikikai nei kekahi kanaka mama i ke kukini o Kapulehololuna kona inoa, he kanaka no ua ao na helehelena, a ke hele aku la i ke ano elemakule. Ua olelo mai oia ia makou, na hooonaia oia e kone haku i noho aku ai e Mrs. Walawala mai Kawaihae aku, e kii ia John A. Kuakini ke Alii Kiaaina o Hawaii, aia ma Kaimu, Pona, kahi i noho ai. Ua hele aku oia mai ka wanaao aku hora 4 paha, ma ke ala aku o Waimea a puka kona la i Ahualoa, Hamakua, a peia aku ka hele ana a hiki i Hilo i ka aina kakahiaka, o Kanuha ke Konohiki ia manawa, a i ka aina ahiahi hiki i Kaimu, Puna, Hawaii. Eia ke komo o ka lohi ana, no ka ike ole a mae ole i ke alanui o ia wabi, mai Hilo aku a Puna. A i kekahi la ae no hiki la okoa i Kawaihae. Ua lohe hoi kakou ia Makoa i ke kanaka mama, eia no ka hoi ua mama. Ua olele mai oia, (Kapulehololuna) ua heihei oia me kekahi lio, a ua eo no ka iaia, mai Kohala a hiki i Hamakua, ina ka he pahu pokole, make no ika lio, ina ka he pahu loihi aole e pakele ka lio wahi ana. Eueu no ka mama o ka poe kahiko. Ua kanaka makua no oia. E ninau no oukou iaia.

            MOREMONA. Ke hele aku nei kekahi mau hoa kanaka o Waikiki nei ma ka oihana Mamona, haalele hoi i ka luhi a lakou I luhi ai a paa ae nei, eia oia ke ku kilakila nei me kona aleo loihi a me kona wabi ia e pikokai ana i ka makani, me he mea la he ia no ka makaha o na loko kuapa, a pela aku.

            ANAE-HOLO. O ka wa anae-holo keia o ua wahi nei, a ke ano kamolamola mai nei hoi I keia manawa na ke ano ia o ka manawa e hai mai.

            KA MOI KE ALII. Aia no ka Moi ke Alii ma Honolulu e noho nei, o na ohua wale no ia e noho nei, me ka lakou hana mau no o ka hilo aho, a me kekahi ana e ue no a iluna e haawi ai. I keia la aku ne (Poalima la 8 Nov.) ilalo na ohea o ua Moi la i Honolulu, me na puolo lole wale no ia o ka wahine e hai mai ana, ke kokoke mai nei la hoi ka la 28 Novemaba.

            KA MEA KIEKIE. Ke Alii ka Mea Kiekie Williama C. Lunalilo, eia no oia e hoomaalo nei ma kona home noho kahakai e walea ana no i ka pa mau a ke ehu kai o Kahaloa i na papalina, hele wale kela a mohala i ka la ka pua ilima o Mana, i ka pepe i ka lomia e ka ino wai.

            NA LII O KA AINA. O kekahi mau pua alii o ka aina na pua alii o Kehokalole, he anoai no ka laua e hoomaalo ae nei ma ko makou mau alanui, i ka wale no i ka olu o ka lau inia o Hamohamo. He ma'u paha ia wabi mau mea hou o Waikikikai nei. APOAKEHAU.

            Ua pio ka Pele!

            Ma na pule hope o Sepatemaba, he mau pule ua no ia, aohe ike pono ia aku o ka meuna, ua paa i na ao, nolaila, ike ole ia aku ai ka pio ana o ka pele. Ua hanohano loa o Mauna Loa ke naoa aku i ka wa e a mai ana ka pele, ua like loa me ka mokuahi e welo ana kona uwahi i ka makani ke nona aku, a i keia manawa, ua olohelohe no ia e like me ka moku i kuu kona heleuma.

            Ua hoi pau mai ka pele i Kilauea nei, a eia oia ke noke nei i ka hookahe i kona luai ana mai i na ahi pele mai na lua mai he umi, a ke kahe ae la ma na wahi a pau. Akahi wale no au a ike aku i ka ikaika o ka pele i keia manawa, ke hele nei a ula wena ka lewa, i ka na mea o ka ula launa ole mai.

            O ka lua i keia wa, ua kiekie loa oia iluna, a na oi ae i ko na wa mamua. Aole oia i hoomaha i ka luai ana mai i na pohaku.

            Ma keia ano, ke ninau ae nei au. Heaha la aoanei ke ano o ka ia nei hana e noke mai nei i ka hookahe a-wai i kona luai ana mai i na pohaku i hooheeheeia iloko o kana umuahi enaena, a luai mai me he waikahe la? O kahi kiekie o ka lua mamua, oia no Kapikowakea, ua haahaa loa ia  ilalo i keia wa.

            Ua mahe loa ka mauna i keia mau la, ua kalae na kuahiwi, ahuwale na kualono, a ua kupono i ka poe puni makaikai i  ua kupueu nei o ka maona.  J. KAINA. Kaluaopele, Kilauea, Oct. 17, 1872.

Na me Hou o ka Malu Ulu o Lele.

 

(Koena mai kela pule mai.)

            Ka noho ana o na kooaka i keia wa. He oluolu maikai no ke ola, nohe mai, aohe no he make o na kanaka, e like me kela mau malama i hala aku nei.

            No ka ai, a me ka ia i keia wa. Ua nui loa ka ai, aole he leo hookahi no ka pilikia ai, a pilikia ia o na kanaka i keia wa, e like me keia mau M. H. i hala, o ka opelu, a me ka hipa, a me ka bipi na ia e lawa nei ke kaona.

            No ka ona. Ua emi mai ka ona o ka poe maa, ma ka ona i keia wa, aole e like me kela mau la, i newa a ku la ma ke kao ana mai paha o ke alina maluna o ka poe ona, a ke kanawai i koi ai.

            No na Makai. Eha wale no wahi Makai e ku wati nei ma na huina alanui o keia kaona nui, malama I kekahi, waiho mai kekahi wahi me ka nele, a hookahi Maikai I waiho aku I kona palapala hookohu.

            No na keiki uapo. Ua lilo ka uapo I makua no ia poe, e makaala mau ana ia Net Mele, a me Kilauea, a he hoku maoli no na ma ka oia poe keiki ma ka lakou hana I maa o ka hoe waapa, a he pukaka ka malihini ke hoolauna mai ia lakou nei, he poe maikai nae ma ka malama I na ukana poina o na malihini, a ua lilo o Kilauea a me Neti Mella I wehe pilikia no lakou.

            No ka Aha Huialoha. Ke liolio nei ia Aha Hui, no ka hoomakaukau ana no ka la 28 e hiki mai ana, e like no me ka inoa oia Aha Hui, nolaila ke kono ia aku nei na lala Aha, e uleu mai, oi kaawale, a e haawi ana i ka hoomaikai i ke Akua, no kona malama ana ia Aha Hui, ma ka luakini o Wainee, ma ka hora umi o ke kakahiaka, me ka lohe i ka haiolelo a Kuaea, a me Aholo, no ke ano oia la. E ala mai na mea a pau o ka Malu Ulu o Lele nei ia la, a e hoolilo i mau lala no ia Aha Hui.

            No ka wiliko a ka Moi. Ke oki nei ke ko o Launiupoko, a e wili ana, a e nau ana, na niho o Hanaumoe me ka wakawaka i ke ko, i ka la 11, a ke kokoke mai nei ke kikina o ka poe mahiai ko, o keia hui, e ohi ai ke kati e like me ka poe holokahiki ka lati i ka aila, pela lakou nei.

            No na hoomana. Ekolu no aoao hoomana ma keia Kulanakauhale – 1 Hoomana Hoolepopo. 2 Hoomana Katorika, a me ka Hoomana Enelani, I hooponopono hou ia no ka apulu loa o ka mea kahiko. Ke noho Kahu ole nei ka Ekalasia Enelani I keia wa, a he Diakona ka mea nana e malama nei ia Ekalasia, e aho nae ia, I na ua pio loa kahi hele kaokao mai ai.

            No ke kula haole. Ke malamaia nei e ka aoao maluna ae he kula haole, a ua nui no na haumana I kaa I ke kumu.

            Moremona. Aole no he kuleana o keia aoao hoomana ma na palena o keia Kulanakauhale, e like no me kona nele ma Lanai, kahi ana I kapa ai o Ziona, kahi hoi e hiki ole ai na pilikia, e like no me kona nele I ka oiaio ole, pela no kona nele ana I ka haumana ole ma Lahaina nei. Me ke aloha.  G.W.P. KUKAHI. Maunakui Lahaina Nov. 6, 1872.