Ka Nupepa Kuokoa, Volume XI, Number 40, 5 ʻOkakopa 1872 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE Xl.  HELU 40.  HONOLULU, OKATOBA 5, 1872.       NA HELU A PAU 566

 

HE MOOLELO KAAO

NO

ROBIANA LO

KA HIWAHIWA O KE KOA,

HELu ALUA O KA IKAIKA.

 

I unuhiia mai loko mai o ka Buke Arabia, mai ka olelo Beritania a ka olelo Hawaii.

 

MAHELE II.

HELU 41.

 

         I KE kokoke ana aku e hiki i Farani, huki mua ae la ke kapena i ka hae o ke Keiki Alii, a mamua iho nae o ka haki ia ana o ka hae alii, ua iho mua mai ka manu elii o ka lewa, me kona mau ekah, he mau manu i manao waleia, ua hiki aku ko lakou heluna i ka miliona, a e lele pohai ana lakou maluna iho o ka mokuaina o Farani, a na lakou no i pani aku ka malamalama o ka la ma ua la la. O kekahi hapa nae o na manu, e paa ana lakou a pau me na Ipu Uila, a o kekahi hapa hoi, e paa ana me na hua hekili, a ua hookokoke loa iho lakou maluna o ka Hale Alii, a o ka manu alii hoi, ua poai ia ae ia oia e ka lehulehu o na manu, me kona kahiko nani loa, a he ano eehia i ko ke no nei ke ike aku.

         I loko nae o ka ike ia ana o keia mea kamahao ma ke aupuni o Farani, ua hoono ae la kahi kanaka kuaaina o Pelekane me ka leo nui, i ka i ana ae, He alii koa opiopio ka malihi e hiki mai ana i keia la, ka moopuna hoi a ka manu alii o ka lewa, a kakou no hoi e ike nei i keia la.

         I ka wa nae e hehi ai kona mau kapuai wawae i ka lepo o Farani nei, ia wa no e haale mai ai na hua hekili maluna o ka aina, a e hoike mai ai hoi na olapa uwila i kona malamalama eehia, a ia wa e pili pu ai ka hanu o na’lu a me na makaainana, nohe kanaka koa a ikaika hoi e hiki ana ke hookuoo iho mamuli o kona ikaika, oiai ua hoomalule ia ke kino o na mea ikaika a pau ma ia mau hora. Pela wale no i kukala hele ne ai ua wahi kanaka kuaaina nei a puni ke kulanakauhale holookoa.

         E ka mea heluhelu, aole paha oe i poina no keia wahi kanaka, oia nei no kahi kanaka kuaaina i aahu iaia iho me ka hae Pelekaae, a he huhui pua ma kona lima, a o hana wahi makaoa wale iho la no ia i hele aku ai o hookupu imua o Lo Peki, oai oia hoi ka la i hoike ia ai o Lo Peki mua o kona mau makua a me na’lii, mahope iho o ka hala aea o na makahiki elima n Eki Peki ma i hanai ai ia Lo Peki me ka maalea.

         A o keia manu alii hoi, oia no ka manu i loaa ai ia Ane ma ka maeuhane, i hinau ai oia i na keiki hua, a i ke kiko ana ae, aia ka o Robiana Lo a me Neba, i oleloia e kakou ma oa helu mua o ka mahele i hala o keia moolelo.

         Hoko nae o ku ka manawa a kahi kanaka kuaaina o Pelekane e hele kukaln ana, ua ala like mai na mea a pau o ke kulanakauhale, a haka pono aku la na maka i ka moana; a i ka aui ana ae o ka la, ike ia aku la he mea keokeo nui e maalo ae ana maloko o ka lner laau e ulu ana ma ka aoao hema o ka nuku o ke awa. Aka, hoi, i kona kaalo ana ae mamua o ka ululaau paina, ike ia aku la ka moku holookoa, a he hae alii ke pulelo haahelo ana mua o ka makani. Ala like mai la hoi ko ua wahi a pau o ke kulanakauhale, a hooho ae la, He moku alii! He moku alii!

         Ma ko Keoki ike ana aku i ka moku a me ka hae alii, akahi no ia a hooiaio i ka olelo kuakaua a kahi kanaka kuaaina o Pelekane, i kukala hele iho ai ma na wahi a pau o ke kulanakauhale alii o Farani oi kukala aku ua wahi kanaka nei mai ka wa leo a hanapilo, a hunoa wale aku la no me he poo kolea ia, me ke kuhi no nae o na lima i ka moku, a kuhi ae la no hoi i ka pohai manu e kau pono iho ana maluna o ke kulanakauhale.

         Ia Lo Walena e makaukaua ana no ka lele iuka, aia hoi, ku ana o Keoki me ke kaa Moi, o ka manawa no ia i hoomaka iho ai na kilihuna ua maoli, a mao ae la, haule makawalu mai la kekahi hapa o na hua hekili a me kekahi hapa o na ipu uwila. A i ka mao ana ae, lele aku la o Lo Walena, a haawi aku la i kona aloha ia Keoki, a kau ae la ma ke kaa. Moi, a holo aku la i ka Hale Alii.

         I ka hiki ana aku o Lo Walena i ka Hale Alii, o ka manawa no ia i iliki pau iho ai na uwila ma ka hoapapa ana a me na hua hekili hoi ma ka iho makawalu ana mai, a he nui loa na hale a me na mea ola i hoopoinoia ma ia la.

         I na alii a me na makaainana e akoakoa ana ma ka Hale Alii ia wa, ku ae la o Lo Walena iluna, a hoike ae la i kona manao imua o na mea a pau, i ka i ana aku, Owau nei o Lo Walena, ke keiki a Robiana Lo me Puakinamu, a no kuu aloha i kahi a o’o makua e luana ai a me ke ake nui o kuu manao e ike ia Lo Samila nei kuu hoa aiwaiu, a ia Lo Mila no hoi kuu hanau mua ma ka hanau ana, a he pokii hoi no’u ma ke kulana o na makua, a ia Keoki nei hoi ka hoa make o kuu makuakane, ka puupale hoi o kekahi mau la hoouka kaua, aka, ke noho nei oe me ka hanohano, ke ai nei oe a ke inu nei hoi me ka oluolu, aka, o na mea nana i nai i keia mau pomaikai, aia laua ke noho maila iloko o ka pilikia, a no laua hoi keia mau kapuai palupalu e mauna ae nei mahope o ko laua meheu, a make a ola paha. Nolaila, ma kuu aina i hanaiia ai, ua hoohiki ae aa, aole au e hoi hope mai ana ma ke alanui a’u e hele aku ai, ke ole e loaa o Debolo ia’u, ka mea nana i lawe kolohe i na makua o makou, na’lii hoi o oukou.

         I ka pau ana ae o na olelo a Lo Walena, aohe mea nana i kokua mai kana mau olelo, a hala he mau minute, ku mai la kahi kanaka kuaaina, a haawi ae la i kona aloha ia Lo Walena, a i na alii hoi a me na makaainana, a pane ae la ia Lo Walena, i ka i ana aku. E ke keiki opiopio, ke hoike mai nei kou mau ouli ia oe iho, a he koa lanakila oe ma keia hope aku, aohe ou laa ma ka honua nei a ma ka lani, a o na kanaka koa o keia ao a me na kupua o ka lewa, he mea paani wale no ia na kou wahi pokii pahi, i hui pu ia me ka ikaika o kou lima a me na kokua e loaa aku ia oe ma ke alanui mamuli o kau mau hana maikai. He oiaio, e loaa ana no o Debelo ia oe, a e lilo ana no ia oe ka eke talena, a e ike ana no oe i ou makua.

         Mai keia la aku nae a hiki i ka la e ko ai keia olelo, e puhi koke oe ia Debolo a me ka eke talena i ke ahi, mai hoolohe oe i ka olelo a ou makua, o lilo auanei ka eke talena ia Kiaimakani, a o ke ola no ia o Debolo, a o ko ia la miki mai no ia, a komo hou ou poe makua iloko o ka eke talena, a helu akahi hoi oe ma ke komo ana, a o ko wahi aikane hipa ka mea nana e hoopakele mai ia oukou, a o ka palena paha ia o ka Debolo hoopaa ana, a mahope aku, e lilo ana ka eke talena i na alii pows o Megiko, a o ka palena hope loa o ka lilo ana, ia Marina no ia ka mea nana ka eke talena, a ma ia lilo ana nae, owau kekaki e komo ana, ke ole oe e hoomaopopo pono a hoomanao hoi i i keia mau olelo a’u, e ko io ana no keia wanana, a o Lo Samila nei no auanei ka mea nana e hoopakele ia kakou. Nolaila, o keia mau olelo a pau a’u e wanana nei, e liloia i pale no kou mau kapuai wawae, a i uwila hoi e hoopuiwa ana i kou lunaikehala. Hoopau oe la kahi kanaka kuaaina, i kana mau olelo, a nonoi aku la i ke Akua, e haawi mai i ka hoomaikai ana no ke koa opiopio a me na pomaikai ma ke alanui a me na wahi a pau una e hele aku ai.

         Mahope iho o ia manawa, ku ae la o Keoki, a pane mai la ia Lo Walena, me ka ninau ana mai, I Farani nei no ane oe i keia mau la aku nei, maluna mai kekahi moku Farani, a waiho iho i kekahi bila dala ma ka lima o ke Kapena, a pela no hoi ma kahi o ke kanaka mahiai, a me he mea la, malaila paha kou wahi i moe ai ia po. A no ko makou haohao, ua hoopaaia ke Kapena ma ka halepaahao, a o ke kanaka mahiai hoi, ua moraki mai oia i ka hapa o kona waiwai, a ke waiho nei ia mau mea imua o ke aupuni i keia wa.

         Ku ae la o Lo Walena iluna, a hoohiki ae la ma ka inoa o ka Mean mana Loa, i ho i ana ae, He oiaio, maanei no wau i ua mau la la, a na’u io no ia mau bila, e no kuu ano manaonao i kahi a kuu mau makua i noho ai, nolaila, kipa ole mai ai au maanei, a hele auwana akua la a kiki i kahi o ke kanaka mahiai, a malaila ko’u wahi i moe ai ia po. A ma ke ao ana ae, loaa ia’u kekahi moku e holo ana i Paniolo, me ko’u kuhihewa e holopono ana ia manao, eia ka auanei, e halawai ana makou me kekahi makani iao, a puhiia aku la, a ku hou ana i Pelekane, kahi o’u i hiki mua ai, a mai laila mai nei a ku hou ana ianei, a ke hui nei kakou i keia la.

         Eia hoi, ia’u ma ka moana, hoahewa iho la au no kela mau bila a’u i hana ai, no ko’u huna ana ia’u iho imua o na poo aupuni, a e ili ana ia hewa maluna o na mea a’u i waiho aku ai i ka bila, a e oia io ana no ka. Nolaila, ke nonoi aku nei au, e kala mai ia’u, a e hookuu maikai aku hoi i na mea i manaoia ua hewa, ne ka uku palua iho mamua o ka mea i hanaia e a’u ma ua mau bila la, i loaa ai he uku kaulele no ka’u hewa i hana ai.

         A i ka po ana iho, moe iho la o Lo Walena ma ka Hale Alii ia po, a ke hoomau nei no ka hoohanohano ana a ka manu alii a hiki wale i ka hora o Lo Walena i kau ai iluna o ka moku, nalowale aku ai ua pohai manu nei.

         He ekolu la ko Lo Walena noho ana ma Farani, a i ke kakahiaka o ka ha o ka la, hiki mai la ka papa kuhikuhi o na moku holo o ia la, mai ka Hale Leta mai, e kuhikuhi ana i na awa kahi e holo ai.

         Aka, maloko nae o ua papa kuhikuhi la, ike iho la o Lo Walena, he moku e holo ana i Paniolo, kahi a kona manao i kau nui ai.

         I ke kokoke ana mai i ka hora e holo ai, haawi ae la o Lo Walena i kona aloha i na’lu a me na makaainana e akoakoa ana ma ka Hale Alii, a hoohaahaa iho la oia iaia io, a hele aku la ma ke ano he ohua eemoku, a kau aku la iluno o ka moku, a holo aku la.

         Ma Farani oia i waiho iho ai i kona ano alii, a hele aku la ma ke ano koa, me ka hna loa ana i kona ano alii, aka, ma kekahi o kana mau hana kaulana, ua kaena ae no ois ia Pelekane, me ka hoopuka pu ae no i kona inoa a me ko na makua.

         Ia lakou nei e holo ana a hala kekahi mau la, ninau ae la o Lo Walena i ke kapena, Pehea la ka loihi o ka manawa e holo ai kakou a ko aku i ka aina? Pane mai ke Kapena, Ina he maikai ka makani, hookahi no mahina a ko kakou i ke aupuni Paniolo, aka, ina he ino ka makani, e hala ana hookahi mahina a me na pule elua.

         Iloko nae o keia wa a laua e kamailio ana, ke hoomau nei no ka pa maikai ana o ka makani i ka po a me ke ao, nolaila, he elua wale no pule i hala, ike ia aku la ka aina, a i ka aui ana ae o ka la, hookomo ana lakou nei i ke awa ku moku Paniolo.

         A pau ae la ka hooponopono ana i na hemahema o ka moku, lele aku la ke Kapena iuka, a o Lo Walena pu kekahi ma ia lele ana.

         O ke awa kahi a Lo Walena ma i lele aku ai, he neo wale no, he ano waoakua nae i ka nana aku, a he mau hale hoahu waiwai no ka poe kalepa ke ku ana, a o ko laila poe kamaaina, aia no i ke kuahiwi.

         (Aole i pau).

 

Ke Sumima a me ka Urima e pau ai

KE AE O NA MAKA O S. W. KAWAI

 

         Ua halawai mai nei au me na opihi koele io ole a ka mea i aahu i ke koloka o ka hookamani, oia hoi o S. W. Kawai, o Halai Hill ole wale, e pee mai nei ke poo malalo o na ninau owili pauda hemahema.

         Ma ka la 13 o Aperila, ua hoomaka oe e aahu iho i ke kuka loloa o na Kahuna Katolika, a ma ka la 15 o Augite iho nei, aahu okoa mai nei oe i ke koloka o ka hookamani, me ka manao paha e nalo io ana; aole oe e nalo, no ka mea, he hele na ke kakaola.

         Apakau mai nei hoi ko waha, ua hoouna ninau aku makou i ke Keena Kuokoa, e haawi ana i ke kula o Makawao. Aia malaila ko eha mua ana, no ka mea, aohe a makou mau ninau i hoouna aku ilaila, (Keena Kuokoa) aka, i ke kula o Haleakala no. I mea e akaka ai keia. Aole na ka mea hookahi na ninau i hoounaia aku ilaila, aka, elua no, a o ka hoouna ana, aole no ia me ka pepa hookahi, me na pepa elua no. A o ka mea hoi i akaka lea, na ke Kula Keikikane no ia o Haleakala i imi apa ae i ke Keena Kuokoa. Nolaila, ua eha mua oe, a nou hoi keia wahi kanaenae:

         “I hewa no i ka lele mua,

         I ko hoolu i ka la ino,”

a ke hauhau mai nei ko waha i ka makani, he puni hoopaapaa makou, (Lahainaluna.)

         Ua maopopo iho la ia’u, ua ku oe i ka bipi momole o Halona, no ka mea, ke keke mai nei ou niho i ka mea io ole, oiai hoi, aohe na ko Lahainaluna i hoouna mua aku i ka ninau, aka, na ko kula no e hapaimemeue nei, oia o Haleakala. A nolaila ea, mai wikiwiki ko waha i ka pololo pela, no ka mea, aole oe i ike i kau mea i olelo ai. A ma keia mau olelo au, ua kau oe i ka lewa e like me Hamana.

         A no kau olelo ana mai nei, na makou (poe hoouna ninau) e hai aku i na haina o au ninau owili pauda pa-u, he mau ninau i kaupaonaia e oe me ka mea kau paona e Kimo Pakaka, a like ka me ko makou noonoo.

         Auhea oe, o au mau ninau, aole ia he mau ninau io, aka, he mau ninau opihi koele io ole no ka lae o Pohakea.

         A i mea e ike lea ai oe i ka io ole o au mau opihi, nolaila, ke lalau nei au i ke Sumima a me ka Urima, a haawi aku ia oe i ike pono oe. Eia ka hemahema o au ninau:

         Owili Pauda I, Hemahema I- Aole oe i hai i ke anapuni o ka hualala o ko baluna.

         Hemahema 2- - He kanaka ike ole oe i ke kakaulima ana, no ka mea, aole i kaomi pono ia na hopuna olelo me na kiko kupono. A heaha ka waiwai o ka ninau iho, ke ole e moakaka ka heluhelu ana o ka ninau.

         Owili Pauda II, Hemahema I - Olelo iho oe, Ua mahuahua ka holo o ka moku i ka hooiho i ka hema me ka makani ku-e, e like me I8:8 Hilahila! Akaaka ka Akeakamai ia oe, i ka oi aku o kona holo me ka makani ku-e i hele pu ole me ka moku.

         Hemahema 2 - Ua like me ko ka ninau mua, nolaila, aohe waiwai o ia owili pauda, e kuni aku ai ke kukaepele o kuu noonoo maikai ana.

         Owili Pauda III, Hemahema I - Aole i pahua ke koae e waiwai ai ka ninau aoa iho, Heaha ka loa o ka pio a ka manu i pahua lele ai? Ua hooia mai no oe, ua like ka nee ana o ka makani Kona me ka palua i ka hapalua o ka mama o ka manu; a ina o ka mama i oleloia, oia ka mama o ka manu i ka hora 1, alaila, he 40 no mile ka nee ana o ka makani, aleila, ua like no a like, a pehea la e pahua ai ka lele ana o ke koae? A ina o ka mama maoli o ka manu ka mea i manaoia, alaila, heaha ka waiwai o ka ninau ana iho, Ehia paona ke kaumoha o ka manu?

         Hemahema 2 - Aohe hookahi aina ma ke komohana o Halai, he nui wale, nolaila, aohe kohu o ia olelo iho. Ua like no ia me ke kanaka naaupo, i ka olelo ae, Ua ike au i ka Aukuu maluna o kekahi hale laau o Honolulu, no ka mea, he lehulehu wale na hale laau.

         O keia iho la na kilokilo ana a ka poe nana ouli o Kaukaweli, a waiho pu aku nei no me ke kumima a me ka urima pu, i maka-aniani no ka lio maka hemo o ka lua o Halai; a i ike ole oe, e haawi aku no au i ke Compound, i ike lea oe, i ole ai e lalau hewa ka hooponopo ana i na kaula uweo o ka baluna a olua o Panana. E kuhi ana paha oe, he pupule koonei poe, e hai aku ai i ka haina o kau mau ninau hemahema. Aloha no.

         James H. Ikukaleiehiku.

Sepatemaba 4, 1872.

 

Na hana a na Hoike Wahahee ia

A. Anapu

 

         E na makamaka o ke keena Kuokoa; Aloha oukou. Ma ko oukou ahonui paupauaho ole, no ka mea, ua loihi na la o ka waiho ana o keia moolelo, aka, o na hana, he oia mau no kona muemue, nolaila, ua lawe mai au i na mea i hanaia no S. Anapu i ko kakou pepa, i ike mai ai kuu Lahui ponoi i ka hihia ma ka umiumi a lilo ke kino uhane a ke Akua i hana’i i mea hoomainoino wale ia.

         Ma ka M. H. 1870 oia ka la 17 o Nov., ua hookolokoloia o S. A. e ka Lunakanawai Hoomalu o Lahaina, oia o W. A. Jones i hala i ka make. A o ke kamu o keia hoopiiia ana, no ka pepehi ana i kana Ewa, malalo o ka Mokuna 9 Pauku 9 o ke kanawai karaima, (he imi hala keia, aohe oiaio.) no ka mea, o na hoike a pau o ka aoao o ke alii ua olelo lakou, 3 hahau ana me ka hohoa, 3 kui ana me na lima, 3 hehi ana me na wawae a hee wale ke keiki a make iloko o ka opu, aka, ma ko makou ike aku i ka mea i hoehaia, aole wahi i eha, pela iho la nae ka haku ana i na hua a ke aloha ole, me ka maka keleawe makau ole i na ehaeha kanawai o ka wahahee. Mai hoomau i ka epa, o nahu mai me he Nahesa wela la, a lilo i mea Auwe! Auwe!

         Ma ka Loio o ka aoao pale, oia o Mr. Nahaku, ninau aku oia i ka hoike mua, ia Kaaiawahia, i ka manawa hea i pepehi ai ko kane ia oe, i ke ao paha i ka po paha? hoike mai la ia, ma ke ahiahi o ka la S o Nov. o keia M. H. no, (IS70) a o ka lua o na hoike oia o Opauhu, i ka puka ana o ka la kana i ike ai, o ke kolu o na hoike o Kanehoa Opio, i ke awakea oia kona ikea ana, aka, ma ka hoomaopopo ana i na olelo ike, ua lalau no, aole hoi e hihi. ua hapaiia e ka manao ohumu ino, he ake pilikia, he keu aku a ka hilahila ole, i ka ai pu iho no i ka umeke, a me ka ipukai hookahi, lawe ae no holehole i na iwi, i make no la hoi i ka io pono o Namano, a pela hoi keia i ka hoaai, aka, e nana i ka hopena. “Me ke ana a oukou e ana aku ai, pela no oukou e ana ia mai ai.”

         Ua noi aku o Nahaku e hookunia ka mea i hoopiiia i ka Aba, no na kumu he lehulehu, oiai na mea a pau e hooakaka ia aku ana, aole hookahi hunolelo i maliu iki ia mai, no ka mea, ua papani ae la ka Lunakanawai i kona mau pepeiao a paa, a hooia ia mai na helehelena i kona manao, ua hoahewa mua ia no o S. A. mamua ae o ka hookolokolo ana. A ma ka la 1S ae, ua hoopaiia he $100, a me ke koina he $4.75, ma keia mau dals i kau iho maluna o S. A., ua olioli ka poe e ake ana e hewa me na olelo hoonaaikola.

         Ua hoopii hou o S. A. ia Lawrence ka L. K. kaapuni. A me ka la 2 o Dec. ua hookolokoloia, o na ike no i ka Aba ilalo; ua latio like no ka laua haawina hookahi, aka nae, ua pee o Opauhu ma ia Aha no ka makau no i ka hoike wahahee, a pani mai o Mu, a ua hooholo keia Aba, he $100. a me na koina he $9.00 a me na kaula hahau he 50, no ka mea, aia malalo o ka makuna 9 pauku 8 o ke kanawai karaima, keia hihia.

         Ma keia hoopai ana i ili mai ai maluna iho o S. A. na haawe a ka maewaewa.

         A ma ka la 8 ae, ua bahaois oia. he S kaula marioo he iwilei paha ka loa, i pupu ia i ke kumu hookahi, i ka hahau ana ua oi ae he 53 pa ana, ua like me 424 kaula pakahi o ka pa ane. I ka nana aku i kahi i pa ai, me he mea la, ua mahelehele pahi ia la, ke kahe awai mai a ka wai ula, mai kahi i pa ai i ke kaula a ane maule no. Inoino maoli ao na hana a na enemi o Kaanapali.

         Hookahi malama me na la keu o ka noho ana o S. A. i ka hale hooluhi o Lahaina, lohe mai la ia i ka leo a ke aloha, e uku oe i ke koena o kou hoopai, i oia ko keiki, ua ao ia no nae, aole i make. aia a hanau, uumi ua manao ia e hana make ke keiki. aka, ua kanaluaia o make pu me ka makuahine, aia a hanau, alaila, make oiai he loihi kou manawa i koe e paa ai, e hanau e ana make io ana no. ina e hoolohe ole i ka’u olelo. oiai he menemene au i keia hana. i kuu lohe aua, no ka mea, ua makau nui i ka hoike wahahee ana ia oe.

         Akahi no a maopop ia S. A. he keiki no ka mea, o ka manao o ka opu ino, aole lakou i ike he keiki, i ka wa a i kou i kua ai a lawa i hoike ai, i hookomoia nae hoi ia mau olelo, hee wale a make ke keiki i loaa na haawina koikoi o ke kanawai, ua hooko ia ko lakou makemake a lawa. Ma keia mau olelo, ua hoouka hou ia iho o S. A. e ka luuluu no ka waiwai makamae a ke Aka i haawi mai ai, i mea uumi wale ia me he holoholona la, no keia mea, ua nonoi aku oia i kona hanau mua i dala, a ua ukuoia kona koena o ka hoopai ma ka la 4 o F M. H. 1871.

         No ka piha a kupalaka na hana hoike wahahee ia S. A., nolaila, ua hoopii oia ia lakoua, a hookolokoloia ina ka la 14 o Iune, M. H. 1871, ua loaa ia lakoua ka hopena o ka lakoua mau hoike hoopunipuni, elima makahiki pakahi e hana ai i ka hana oolea ma ka Hale Paahao, hookahi o lakkou i hookuu ia no ke ku ana a hoike pololei i ua hana a lakou i ohumuhumu pu ai a lawelawe pu no ka lakkou mau hana pono ole, ua pakele mahunehune i ka ili o ka niho o ke kanawai no ka aui ana ae, aole i hoike imua o na Aha.

         I na he lahui hoopololei ma ka hoopono a naauoio, mai koho aku ke aupuni i ka mea hoopilimeaai wale, a ano kamahi na hana, oia hoi o ka hoolohe aku i na olelo aluna, a niania, a epa paha, a pela aku, no ka mea, o ka L. K. he kanaka kuokoa oia, aole e he kanaka e “ai ana i ka mea ai a ke kuke,” o kuu ike ana ma keia hihio, aohe i hewa, eia nae ua hoopaiia, no laila, ua ulu mai na hoopaapaa ana, a me ka haunaele o ka Lahui.

         Ikemake.

 

Honolulu Sept. 7 1872

         Paakiki Kupono

 

O ka paakiki kupono i huipuia me ka ike a me ka noeau o na ana aina o makou, oia ke kumu i loaa’i ka pohaku kihi i haiia’e nei mamua. O ua pohaku la, ua kaha pea ia, e ka mea nona ka aina i kinohi, a ma oa kihi kahi i waiho ai o ua pohaku la, i kaapuni pono ia ai ka nina o Kamoiliili e Kelia a me Pehia, a puni pono loa me ka hooponopono pu ana o laua i ke aui o ke kui makeneti.

         Nolaila, ke ninau aku nei makou ia oukou; ua kupono anei ka olelo a kahi maukauka hoehewa mai Kahana mai, i hoopuka ai nei ma ko kakou “Kilohana” helu 38? E olelo ana he paakiki lalau, he naaupo, he wahi olali, a pela aku.

         Ua olelo mai nei no hoi oe, ua kiiia ke Kahunapule o Kamoiliili e hele mai e nana, a ua hoapono aku oia i ka J. Naili ana ana, manao iho la paha oe he kanaka piha kela i ke akamai, he ole loa oia, a oia kekahi o na hupo ma ia hana, o ke alako wale iho no i kahi lipine pepa ana ma ke kuauna o na loi, i kela la i keia la, e hoopau manawa ai, oia kana mea i ike, ua maopopo loa ia makou, ua haulehia oukou iloko o ke kuhihewa, a e make ana no paha auanei oukou iloko o ko oukou lalau.

         E hoakea ae oukou i ko oukou mau maka, a e nana pono iho i ka lalau o ka mea a oukou e hilinai kuhihewa nei.

         LALAU AKAHI. Aole oia i imi a loaa pono ke Kiki oiaio, i hoailonaia me kekahi pohaku, a i ole ia, me kekahi hoailona e ae, ua kukulu oia i kana panana maluna o kekahi kuauna oiaio ole, a malaila oia i hapalu aku ai i ke kea na ka ele ka ai, hui aku, hui mai hui ka naaupo me ke kuhihewa, a komo hewa, a lima nui aku i ko hui waena.

         LALAU ELUA. Ua hoohalike loa oia i ke ana ana i ka aina o Kaiapa e like me ka moe ana o na iho i ka wa i na ia ai ua aina la i kinohi. Ke manao nei makou, o keia ana aina wale no ka mea i hana me keia, he 20 makahiki, mai ka manawa i ana mua ia ai a hiki i keia la e ana hou ia nei, ma ia manawa loihi, he aei ko ke kui makeneti, a me ia aui e hooponopono ai, i loaa ai na moe oiaio i ka wa i ana mua ia ai.

         O keia mao mea elua na mea nui iloko o ka imi palena ana, a o ke ana aina i loaa ole keia mau mea, ua kapaia lakou he poe naaupo, ua kokuaia mai keia mau olelo ana a makou e Gillespies kekahi o na ana aina kaulana, a penei kana, o ka mea e hoohalike ana i kana ana ana e like me na moe mua ana o ka aina he hupo nui ia.

         Nolaila, ke ninau ia aku nei. He peakiki lalau anei keia? Aole! He paakiki kupono no. Me ke aloha.          KALAUHAIHAI

         Kahana, Oahu, Sept. 25, 1872