Ka Nupepa Kuokoa, Volume XI, Number 38, 21 Kepakemapa 1872 — Page 2

KA NUPEPA KUOKOA

 

NO KE AWA O HONOLULU.

La Kai Maloa Kai Piha.

 H.M. H.M.

Sept. 22 1 00 Aumoe 8 30 Kakahiaka

Sept. 23 1 30 Aumoe 9 30 Kakahiaka

Sept. 24 2 30 Aumoe 10 30 Kakahiaka

Sept. 25 3 20 Kakahiaka 11 20 Kakahiaka

Sept. 26 4 20 Kakahiaka 12 00 Awakea

Sept. 27 5 40 Kakahiaka 0 40 Auina la

Sept. 28 6 30 Kakahiaka 1 25 Auina la

C J. LAIANA.

 

Ka Nupepa Kuokoa.

HONOLULU, SEPATEMA BA 21, 1872.

 

Ka Pele o Mokuaweoweo ma Mauna Loa Hawaii.

 

                Ma keia puka a a hou ana mai nei o ka pele maluna o Mauna Loa, ua ilio ia i mea ake nuiia, no ka mea, akahi wale no a puka ae ma ka piko ponoi i ka wa e noho ana na haole ma keia mau mokupuni, a ua hoomau mai ia a ana no ka malama hookahi a oi ae me ka nalowale ole iho. O na ahi malamalama i wena ae ma kona piko, ua ikeia aku ia, aka, aole nae i ike kokeia aku ua nalowale a ua pio, a i ole ia, ua nee mai la a malalo iho ma na aoao o ka mauna, kahi a ka pele i kahe mua mai ai i na makahiki 1859 a me 1868.

                Ma ka la 2 o Sepatemaba, kau iho la kekahi huakai ake e ike i ka Pele maluna o Mauna Loa, ma ke Kilauea, he umikumamalima ko lakou nui, ke hui pu ia hookahi lede, me ka manao e pii iluna o Mauna Loa, a e makaikai i kekahi o na pele kiekie loa ma ka ili honua nei. He wa maikai keia, a ua lahilahi ka ea, a o na hiohiona o ka poe pii mauna, me he mea la, ua poloaiia, aka, ua hoomaopopo e no kekahi poe, e halawai mai ana me na pilikia ma keia pii ana ma ke ala nahelehele a aa, a i manao wale ia, he mauna hiki ole ke hookokokeia, a i kakaikahi wale ka poe i pii mamua, e ka poe auwana hoopaakiki.

                He mea ole no paha ka hai ana aku i ko makou holo ana ma ke Kilauea, ka mea nana e lawe nei i ko kakou holo ana mawaena o ko kakou mau mokupuni iho. I ka hiki ana aku i Kawaihae, ua hoomaikeikeia mai makou i ka ike mua ana aku i ka hiohiona o ka pele, he kanalima paha mile ka mamao a oi aku, e ponaha ana ka nani o ka punohu me he (dome) hale bele la ma ka piko o Mauna Loa, a hohola ae la me he ahi nui la mai Mauna Kea ma ka hema a hiki i Hualalai ma ka akau. Maluna ae o keia hale bele, he mau ao uwahi e pii ae ana iluna, a kalalewa aku la ma ka akau, me ka malamalama aiai e hoolele ana i ka malamalama mai ka lua pele mai o lalo, a hoomalamalama ae la i ka mokupuni o Hawaii a me ka moana, he mau mile a puni. Aole i ikemakaia aku ke ahi mailaila aku, aka, he lalani malamalama wale no ka i ikeia aku, me he mea la, e hoopunipuni mai ana i ka noonoo e manao aku, he pouhana ahi maoli.

                I ke ku ana aku o ka mokuahi ma ka hora 1 ahiahi o ka la 4, ma kahi awa kupilikii o Kaalualu, oia hoi, he wahi kuono uuku, e kokoke loa aku ana i ka lae hema loa o Hawaii, hoopaeia aku la makou ka poe makaikai-pele: a i ka loaa ana o na lio o kela a me keia, loaa koke iho la ia makou ke kuamoo e hiki aku ai i kahi kauhale o Waiohinu, he ehiku mile ka mamao mai kahi ku moku aku, a hiki aku la makou i ka aluna ahiahi malaila. Ua haohao na kamaaina i keia huakai nui i ikeia mai ai e nee aku ana, me ka lohe ole ia mamua no lakou.

                O Waiohinu, he wahi kauhale uuku hoonohenohea no ia, e moe ana me he punana la ma kahi awawa uuku ma ke kualapa hema loa o Mauna Lou, i poai puniia e na puu, a i uhi paapuia hoi e na kula uliuli, a ua huna loa ia hoi iloko o na ululaau kukui, ohia, piku a me ke kua va, a o ka malihini mua ke hiki aku oia ilaila mai kahakai mai, e luana e ana oia mamua o kona ike e ana aku i ka hale mua.

                Me he mea la paha, he elua hane ri na kanaka e noho ana maloko o Waiohinu, a oia no hoi ke kiko waena o ka hana pulu, ili-kao a me ka ili-pipi. Eia maloko o keia wahi, he eono hale kuai, hookahi wili-ko a me na hale paahana e ae he lehulehu. Aole paha, he mea maalahi ka imi ana aku, a loaa kekahi wahi e like me keia iloko o ko kakou nei mau moku, kahi i ikea ai ka pomaikai a me ka oluolu, e like me keia kihi maikai o Hawaii nei, oia hoi kahi kokoke loa aku i ka lua Pele.

                He oiaio no paha, ma ka parediso e like me keia, ua hiki ke hoolako pono ia na makemake a pau o ka malihini hele. O na lio hooholo ka mea i makemake nui ia ma keia huakai, he lehulehu wale, a ua akahele loa ke kohoia ana o na holoholona ikaika a i kapiliia me na kapuai hao, no ka huakai malu. hiluhi a paakiki e like me ka mea i manao e ia mamua. Mahope o ka hooholo ana a me ka holo ana o na aelike me na kanaka, kau ae la kela a me keia malihini hele maluna o na lio e like me kana lio i koho ai. Ua pii loa na uku hoolimalima lio, ma ka $15. no ka lio hookahi na ka pii ana a hoi mai i Waiohinu, a he $5.00 hou iho no ke poo, ina e holo i Hilo, a haaleleia ilaila ka lio. O na kekake lawe ai a me na lio no na kauwa, ua pau pu no ia iloko o ia uku hookahi.

                Ma ka ho ra 9 paha o ke kakahiaka Poaha. Sept. 5, haalele iho la ua poe pii mauna nei ia Waiohinu, a hele aku la i Keaiwa, he iwakalua ko lakou nui, ke hui pu ia me na kauwa. Pii kekahi poe ma ke alanui kualapa, pa, a holo hoi kekahi poe ma ke alanui makai, e pili ana i kahakai. I ka wa nei, ua oi aku ka maikai o ke alanui makai; aka, i ka wa malie, he maikai a oluolu ke alanui mauka, a he hapa mai hoi ka maluhiluhi. I ka makaikai ana ma ke alanui mauna, he maikai a ua hoohoihoi mai ia i na helehelena Maluna ae ou, e kau ana o Mauna Loa, e pii ana he kualapa ma ke kualapa, a hiki i ka wa e nalowale ai oe iloko o na ao, oiai he mau tausani kapuai ka haahaa malalo iho ou, a e pahola mai ana imua ou ke kula eleele i uhiia e ka pahoehoe pele, a hala wale i kahakai; a o na kuaau hoi, e keokeo mai ana ma o na nalu hai la, ma na wahi a ka maka e ike aku ai ma na aoao a pau.

                Napoo ka la hiki ka huakai i Kapapala, naholo aku ia kuhi poe iloko o ka hale o ka lunakanawai Fere S. Laimana, e imi wahi moe ai, aka, ke noho ia la ia wahi e alua kanaka wale no; aka, o ka nui o ka huakai, ua kaupe loa aku i kahi o Mr. Kele E. Rikikini, (Richardson) ka mea i apo aloha mai i keia poe malihini i upu ole ia mamua, a pahola mai la i na mea a pau i hoolawaia e kona makaukau. O ka mamao mai Waiohinu a hiki i Kapapala, he 24 mile, a ma ke alanui maikai hoi.

                Maanei i halawai ai me ka huakai ke anoninoni o ka manao — aole mea alakai e kii ae ai, a o ka hoi koke ana mai no ia o kekahi kanaka pii mauna mai ka piko mai, a hoonuinui mai la ma kana kamailio ana, no ka nui o na pilikia ke pii aku. Hookahi wale no kanaka i ike i ke ala e pii ai, o Kawaha ka inoa, a e noho ana hoi ia malalo o Mr. Rikikini. Ua ikeia oia, he alakai akamai, a o ka mea nana i kono i kona manao e hoole, aole e pii, o kona hoi ana mai no ia mai ka piko mai o ka mauna, me ka mai a me ka maluhiluhi. Aole oia i puni mai i ka hoikeikeia aku o ke dala e ka huakai. Malalo o keia kumu kuemi hope i kuia mai, ua haalele mai la he elua o ka makou huakai a holo aku la laua i Hilo.

                O kahi manao kapekepeke wale no i koe e hookanaho ana, o ka hoouna aku e kii i kekahi keiki hapa haole o Hanare Gandall kona inoa, a e noho ana ma kahi he eha mile ka mamao aku, a koi aku iaia e pailata ae i ka huakai a hiki i ka piko o Mauna Loa. Hookahi wale no ana pii ana mamua, a ua maopopo ole, e ae mai ana paha ia e pii, aole paha. Ua ike no oia i kekahi mau mile o ka mauna mamuli o kona hele huli pulu ana, a na ke kanalima dala i hoikeikeia aku aku iaia, i hooholo i kona manao e alakai. He keiki papa oia no Hawaii nei, a he paniolo hahai pipi, a ua maa oia i na kikekee alanui ma ke kualapa hio hema loa o Mauna Loa, a ma ke kiekiena hoi kahi a na pipi ahiu i hele ai.

                Mamuli o ka haalele ana mai o kela mau mea elua o makou, ua hoemiia iho la ka huakai i 12 ponoi poe pii mauna, hookahi alakai a me elima poe lawelawe, — 18 pau loa, a ua hoolakoia pono ia no hoi na ai a me na mea e ae i loaa maanei a ma o. Haalele makou ia Kapapala ma ka hora 3 auina la o ka la 6. O ko makou alanui no na mile mua ehiku o ka pii ana, he neinei, a e hele ona io a ianei maloko o na kaei ulunahele. Me he wahi kuamoo punuku la, e alakai ana iwaena o ke o-i waiwai ole, ka mea nana i pepehi iho i na mauu a me na launahele liilii ulu, a hoolilo ae i ka aina nui e palahalaha ana, i aina waiwai ole e manaoia aku ai.

                Ma ka ho ra 6 ahiahi, hoea aku la makou i kahi o Kapena Eliki, (Capt. Ellis) he wahi ia he 7 mile mai Kapapala aku. He hale papaaia, a he puu oioina no na pipi, e ku ana maluna o ke oneanea mauu, malalo pono iho o ke kakai ulunahele, ma kahi paa mau i ka ohu, a malia paha oia no kahi kulanahale kiekie loa ma Kau. Ua ano pahaohao a puiwa ke kapena i ka ike ana mai i keia huakai lio nui, aka, i kona hoomaopopo lea ana mai, aohe a lakou lako kaua, akahi no a kuu iho kona manao, aole ka he poe powa, a heahea koke mai ia ka leo o kamaaina i na malihini, me ka naau oiaio o ka luina holomoku, a kaana ae la i ka hoomakaukau ana i kona wahi pupupu hale mauu no ka moe ana o ia po. Ua pi-o kokeia ae la no hoi ka pea a makou i lawe pu aku ai, a moe aku la kahi poe o makou iloko olaila, oiai kahi poe e hiolani ana iloko o ka hale.

                Ma ka hora 6 o ka Poaono, mahope o ka pau ana o ka paina kakahiaka poniponi, i mikoiia me ka waiu bata huihui ono i hui pu ia me ka wai hau, hoolako iho la makou me ona mau omole wai pakahi, alake ae la maluna ana holoholona, o Mokuaweoweo ka ihu. O ko makou alanui, mai anei aku, ua alakaiia iloko o ka ulunahele—aole hoi me na kipuka, malaelae ae la hoi, aka, iloko o na koa a me na ulu-ohia, a he maalahi nae ka pii ana; aka, me ke akahele loa nae, me ka manao i maluhiluhi ole na holoholona ma keia huakai i hele mua ole ia e lakou. Ekolu ho ra o ia kapeau ana aku o makou, hiki ana i ke oioina, e kokoke ana ma kahi hio maluna o ke kakai kaei ulunahele—he 9 mile ka loihi mai kahi mai o Kapena Eliki, a he 16 mai Kapapala loa mai. O ke kiekie o keia waihi, he 7,000 kapuai maluna ae o ka ilikai, a oia ka hapalua o ka mauna. He wahi hoomaha oluolu keia, aka, aole nae he hale, a aohe hoi he malumalu e ae e malu ai. Maanei i hoomaha ai makou i na holoholona, ho-a ahi, baila wai, a hoomoa i mea ai paina liilii koekoe me ke bola ki. Ua waiho iho kahi poe o makou i na inoa o lakou i kahakahaia ma na kumu laau, i mau mea hoomanao no keia pii ana.

(Aole i pau.)

 

NU HOU KULOKO.

Oahu.

 

                Ma kela Poaono aku, e kuai kudalaia ana ka Hale o Pinehasa i noho mua iho nei ma Kamakela.

 

                Ma ka "Kilauea" huakai hope aku nei a hoi mai la ua ohi oia i na dala he $1800, no ia huakai hookahi.

 

                Ua hoopau o Kaulu i kana hana he kope a eli awa i keia mau la, a e kau ana kona poo ma ka uluna no kekahi mau malama hiamoe.

 

                Ua noho iho nei ka Ahahui Euanelio o ka mokupuni o Oahu ma Waialua, i kela Poalua aku nei, a ua hookuu ae no i ka Poakolu.

 

                MA MAKAWAO, ua pau i ke ahi, he 60 paha eke ko o ka Mahiko o Alekanedero a me Balawina. He ulia wale ko keia ahi; a no ka paapaa ia hoi paha kekahi, nolaila, pau loa ai.

 

                Ua hookohuia ae Theo. H. Davies, Esq., o keia kulanakauhale i Hope Kanikela no ke aupuni o Beritania Nui ma keia kawa oiai, e kaawale aku ana ke Kanikela nui i kona onehanau.

 

                MAI KAHANA MAI, — Mai keia wahi mamua ae, i loaa mai ai kekahi leta, e hai mai ana, he hana raiki no ka kolaila poe pake i ka la Sabati. Ke paipai aku nei makou i kolaila poe kaiko, auhea lakou i keia wa, e palapala ia mai nei?

 

                Ma ka halawai o ka Puali Kinai Ahi Helu 1 o keia kulanakauhale, ma kekahi po o keia pule iho nei, ua hooholo iho lakou he mau olelo hooholo hoalohaloha i ka ohana o ke kapena moku i make ai ma Ewa, oiai he lala oia no ia puali.

 

                LILO O PAUKAA.—Ma ke awakea o ka Poakolu iho nei, ua kuai ku dalaia ae ka Mahiko o Paukaa a me na pono a pau o ka aina, koe kekahi mau mea liilii, a ua lilo ia C.C. Hairasi no $16,400, oia no hoi ka moraki, ka uku panee a he mau dala keu maluna ae.

 

                Ma ka Poakolu iho nei, ua laweia ae imua o ka Lunakanawai Hoomalu o keia kulanakauhale, o Kamana, no ka hao ana i ke kala a kekahi pake maauauwa a me ka powa ma ke alanui Nuuanu, i kekahi la o kela hebedoma aku nei. Ua waihoia ka hihia imua o ke kiure o Okatoba ae nei.

 

                Ma ka Poalua iho nei, ua hoopomaikai mai ko ka lani i keia kulanakauhale a me kona mau awaawa a me na kula, ma ka hoohaule ana iho i na paka ua koikoi a hookelekele ae i kekahi mau alanui, a halana i kekahi.

 

                Ua hoolimalimaia ae nei ke kuna "Pauahi" i moku lawe ohua, no ka poe e makemake ana e holo i ka la e weheia ai ka Hale Hoole Wai Ona o Wailuku, ma ka la 2 o Okatoba e hiki mai ana. E haalele ana ka moku ia Honolulu, ma ka Poaono, la 28 o Sepatemaba, a holo i Kahului, no ka uku he ehiku dala.

 

                Ma ke ku ana mai a ke "Kilauea" i ka la Sabati iho nei, i ike iho ai makou i kona lawe ana mai i na ukana waiwai nui, i like ole me kekahi mau huakai ana mamua aku nei, me na ohua hoi i hiki aku i ka haneri a oi, o mua a me ko hope. Mai aneane no e like aku ka nui o ko mua poe ohua me ko hope.

 

                NA OHUA KAULANA O KE "KILAUEA."— Ma ke ku ana mai o ka mokuahi Hawaii maluna ae i ke kakahiaka Sabati iho nei, ua ike iho makou i ke kau ana mai o ke 'Lii wahine Kiaaina o Hawaii, R. Keelikolani a me ka hoi ana mai o ke Kiaaina o Oahu nei a me kana lede, ka Lunakanawai Widemana a me kana wahine a me ka huakai makaikai pele iluna o Mauna Loa.

 

                Ma ka po Poalua, iho nei, ma ka Hale Hoohainu ki o Liliikawai, oiai, e olioli ana na pake no ka la mahina poepoe o ka makahiki, aia hoi, ua hoonouia aku kekahi mau iwi omole a me na pohaku iloko o ke keena, kahi a ka pake e akoakoa ana. Ua haohaoia ka mea nana i hoonou aku, aka, ua loaa koke no kekahi keiki o Kekala kona inoa e paa ana me ka hope omole ua naha. Ua hopuia oia a ua laweia e hookolokolo imua o ka Lunakanawai Hoomalu.

 

                PUHI HALE. — Ma ka po o ka ia 9 iho nei, ma Waiehu, Maui, ua puhiia ka hale i noho ai o ke kaikamahine i pakele mainoino mai ai mai ka pepehiia ana mai a Kuheleaumoku, a ua pau i ke ahi. Ua pakele nae ke kaikamahine, no ka mea, ua hoihoi e ia ua kaikamahine la iloko o kekahi hale e aku. Ua manaoia keia pau ahi, na kekahi makamaka o keia pepehi kanaka e ola nei, i mea e make ai oia, ka hoike maopopo hookahi e ola nei. Ma ka holo ana mai o ke Kilauea mai Maalaea mai, ua lawe pu ia mai ua kaikamahine la i Lahaina no ke ku hoike.

 

                NA MOKUAHI NO KEIA AWA.— Ma ka auina ia Poaono aku nei i hala, ua ku mai ma ke awa o Kou nei, ka moku lawe lako ai Amerika, "Resaca," iloko o na la he 30 mai Apia mai, na mokupuni o Navigator. He 130 ka nui o kona mau kanaka, he 12 alii moku, he 9 pu kuniahi, 900 lio ka ikaika o kona mahu. —Ma ka la apopo paha, a i ole, ia la aku e ku mai ai ko Nu Kilani mokuahi mai no keia

awa a me Kapalakiko, a hui maanei me ko Kapalakiko mai mokuahi. —      Ma ka Poalua paha e ku mai ai ka I daho, a i ole, kekahi mokuahi e ae paha, mai Kapalakiko mai, me na eke leta, ohua a me na ukana no keu awa a me ko na panalaau.

                Ma ke ku ana mai a ke kuna Uilama inehinei mai Kau mai, i onoia mai ai, ua nui loa ka malamalama o ke ahi o luna o ka mauna, i oi ae mamua o ka mea i ikeia. Ke pii nei hoi ka ikaika o ke ahi o Kilauea.

 

                HIAMOE A KA WAHAHEE.—Ma ka Poakolu aku nei, i ka wa a ka Luna Kudala C.S. Bako e kudala ana i ka Mahiko o Paukaa i Hilo, a oiai hoi, ua piha loa o loko o kona rumi i ka poe i hele mai e koho, a e makaikai; eia ka, ua loohia iho la kekahi Pake kuonoono o keia kulanakauhale i ka hiamoe iluna o ka papa kuai, a i ka pau ana o ke kudala ana, puoho ino ae la oia, a haule aku la iluna o ka papahele, a kuia ae la kona ihu, a me ka waha i ka paia o ka hale, a waiho maule iho la no kekahi wa pokole, a ma ke kokua ana a kekahi haole i hoala ae, ua ohewahewa kana nana ana mai, a ke kahe awai mai la ke koko ma ka ihu, a ma ka waha. Nawai no i olelo e, he wahi ia e hiamoe ai?

 

                KA WANANA ANO OLE.— Ua haiia mai ia makou ka lono, ua Wanana ae o Waahia (w) mauka o Pauoa, e nalowale ana ka puu o Puowina, e kukuli ana na kahunapule haole imua ona, e naha ana ka hale paahao o Kawa i ka la e hookolokoloia ai oia imua o na lunakanawai. Aohe ana dala e uku ai i na lilo o ka aha, aka, aia kana dala i Tahiki kahi i waiho ai. O ia iho la ka wanana a Kaaiahua ma e kali nei i ke ko ana, me ka hoomanao ole i na wanana hupo a ia wahine mamua, a i hooko oleia hoi; a i papapau nui ai o Mahu ma i ka puni a kau i na kilepalepa kahakahana keokeo. Owai la ka mea o ka poe naauao e puni aku ana i kana? O ka mea wale no paha nana e malama nei i ka pa aupuni o Pauoa.

 

                KA UKU HOOPAI NO KE KOLOHE.—Me ke aloha a me ka minamina, ke hai aku nei makou i ka lehulehu, ua pupule loa ia o M. Kuhananui o Hana, a lunamakaainana hoi o ia apana no keia kau. He leta ka i loaa mai ia makou, a penei na olelo: "Waiehu, Sept. 13, He wahi manao i ulu mai e hoouna aku i wahi leta ia oe no kekahi mea hou ano nui a'u i lohe mai nei. Ma ka la inehinei, hiki mai la ka lono, ua pupule loa ia o Mr. M. Kahananui, a ua hookuu oia i kona wahi hilahila, a o ka huaolelo paanaau ma kona waha, Ua hiki mai ka Melenia. * * Mai hoopoina i ka hoolaha ae no ka pupule ma hunahuna mea hou. "Ua kanalua iki makou, aka, i ke ku ana mai o ke kiakahi, akahi no a maopopo loa, ua hehena ino loa oia. He kau Ahaolelo kupanaha keia. Mokumoku ka Aha Kuhina, make kekahi lunamakaainana a pupule hoi kekahi. Ke ao ia mai nei na mea a pau, e no i ka oukuu mau hoohiki.

 

                HE MANAO NUI AI KANAKA PAHA.—Ma ka manawa a ke "Kilauea" e ku ana ma Kealakekua i keia hoi ana mai nei, aia hoi, ikeia aku la kekahi mano nui, e kaalo mai ana mamua a ma na aoao o ka moku, he 8 kapuai kona loa. Ia manawa, i hooleiia aku ai kekahi makau nui me ke aho a he io puaa ka maunu. I ka haule ana aku no o ka maunu, o ka apo koke ae la no ia o ua mano la, ua hele wale paha a pololi. A he nui ka poe i kokua i ka mea nana ka makau ma ka huki ana a pili ma ka aoao. Mamua o ke kuu loa ana iluna o ka oneki, ua paheleia e ia ka opu i ke kaula, a nakiikiiia a hiki ole ke hanu. Kau iluna o ka moku, ookiia kekahi wahi uuku, a pakaia kekahi mau lala, a waiho a make iho la oia, me ka oni ole. Manao kekahi poe, ua make oia, a hoole kekahi mea, aka, no ka ikaika loa o ka manao o kahi poe, aole ona ola i koe, a he mea hoopilikia wale no ka waiho mai, nolaila, hoolei aku la lakou iaia. Aka i ke kaa ana no i ke kai, o ko i 'la onioni ae ia no ia, a kaepaepa ae la kona hiu. I ka ike ana aku o lakou e ola ana no, ki ia aku oia i ka pu no ekolu manawa, a ua ku wale no ia mau ki ana, aka, ua holo aku kela a nalowale. Malia paha, ke kali la ko i ala huhu i keia poe kolohe, aia pau nui lakou nei i ka heenalu, alaila motio mai kela.

                E ikeia ma kekahi kolamu hoolaha o ka pepa o keia la, ka hoolaha a ke Keena Waiwai i ka poe mea dala e makemake ana e hoopukapuka, ua hamama ke Keena no ka lawe ana i na puu dala mai ka haneri a hiki i ke tausani, ma ka haawiia ana mai o na bona, aupuni i ka mea dala, ma ka uku panee he eiwa keneta no ka makahiki; a e kikooia ka uku panee ma kela me keia hapalua makahiki, no ka manawa aole e emi malalo o elima makahiki.

                Penei ke ano, ina e waiho aku kekahi kanaka i ka waihona aupuni i hookahi hane ri dala, alaila, e loaa ana iaia he bona aupuni, no ia haneri dala, a no ka waiwai io e like me ke kumu paa. Aka, i ka hala ana, o eono malama, alaila, e kii ana oe e ohi i ka uku panee no ia manawa, a pela aku, a pau ka manawa. O ka malama loa nae ka pono i ka bona aupuni e loaa mai ana ia oe, aole waiho hemahema, o pau i ke ahi a haehaeia paha. No ka mea, ina e nalowale ana ua bona la, a i ole, pau paha i ke ahi, o kou poho no ia.

                Ma na aupuni nui o Europa a me Ame rika, ua hanaia pela; a ma ia hana ana, ua pau ka aie o ke aupuni i ka laweia a haaweia e ka lahui, a no ka lahui ponoi ka aie aupuni.

                Nolaila, o ko oukou maaamaalea ka pono a ike i kahi e malama maikai ia ai na bona kekahi mea nui.

                Ua hoahewaia o Kuheleaumoku imua o na kiu re o kona aina ponoi, no kona pepehi ana i ka elemakule a me ka luahine, ma ka po o ka la 17 o Maraki i hala; a e liia ana ma ka la 14 o Maraki 1873 maloko o Kawa.

                Ua loaa ma Laie kekahi kanaka Hawaii inu uwa, ua lele e ke aho, malia no paha i ka inu ana no i ka apu koheoheo a ka awa. Ke ao ia mai nei ka poe hookuli, he apu make ka ia.

 

Hawaii.

                Ua hoonoia aku hoi o Rev. J. Kahuila, i kahu no kela ekalesia kahu ole o Waihinu, Kau.

                HE MAU MEA MARE.—Ma ka po o ka la 2 o Sepatemaba, maloko o ka luakini o Waiohinu, ua mareia e Rev. J.F. Pogue, o Rev. G. P. Kaonohimaka, kahu o ka Ekalesia o Kekaha, Kona Akau me Miss. S. Kamahana ke kaikamahine a Mr. Kamookapu, no Pukini, Kau.

                HE MAU KAHUNAPULE HOU. — Ma ka la 18 o Augate i hula, maloko o ka luakini o Lanakila ma Kona Waena, ua poniia o Mr. Obede Nawahine e na lima o ka Ahahui Euanelio o Hawaii Komohana, a ua hoonohoia i kahu malama no ia ekalesia. Penei ka lawelawe ana o na hana maluna ona: la Rev. J. Waiamau ka haiolelo: ia Rev. G.P. Kaonohimaka ka pule hoonoho; ia Rev. S. W. Papaula ka lima akau e ke aloha; ia Rev. J.F. Pogue ka oleloao i ke kahunapule hou; ia Rev. J.D. Parisa ka oleloao i ka ekalesia, a ia Rev. O. Nawahine ka pule hookuu.

                —Ma ka la mua o Sepatemaba, maloko o ka luakini o Waiohinu, Kau, ua poniia o Mr. J. Kahuila, e kekahi Komi te o ka Ahahui Euanelio o Hawaii Komohana, a penei na hana: la Rev. O. Nawahine ka haiolelo; ia Rev. G.P. Kanohimaka ka pule hoonoho; ia Rev. S.W. Papaula ka lima akau o ke aloha; ia Rev. J.F. Pogue ka oleloao i ke kahunapule hou; ia Rev. J. Kauhane ka oleloao i ka ekalesia: ia Rev. J. Kahuila ka pule hookuu.

 

Hoike a ke Kauka no ka Halemai Moiwahine.

 

Halemai Moiwahine, Sept. 13, 1872.

I NA KAHU MALAMA O KA }

HALEMAI MOIWAHINE: }

E na Keonimana:—

                Ua loaa mai ia'u ka hanohano o ka hoike ana aku i ka Hoike o ka Halemai Moiwahine malalo iho, mai ka la 21 mai o Iune a hiki i keia la.

                O ka nui o na mai maloko o ka halemai i keia wa, he 93, oia hoi, he 43 na kane a he 31 na wahine, (Hawaii wale no) a he 18 na haole kane 1 wahine, he 10 o lakou poe uku. O ka poe maoli i ae ia aku e komo mai, he 96; mailoko ae o keia, he 54 kane, he 24 wahine, (Hawaii) a he 17 haole kane a me 1 wahine. He 248 na inoa hou i kakauia maloko o na buke, a he 2.487 na palapala kuhikuhi laau i hanaia. Poe i hookuuia, he 75, oia hoi, he 45 na kane a me 17 na wahine Hawaii a me 13 haole. O ka heluna kiekie loa o na mai i aeia e noho iloko o ka halemai i kekahi wa, he 96, a o ka haahaa loa, he 68.

                Iloko o keia manawa i haiia ae la, he 6 poe make, he kane wale no, 3 Hawaii a 3 haole: 2 o lakou i make, no ka mai ma ka hookui ana o na ami o ka uha, 1 no ka mai pira kaipuni, 1 no ka naha ana o ke poo, (ulia wale) no ka nawaliwali, a 1 no ka mai puu. Na mea i okiiia, eia, 1 i okiia ka a-a o ka wawae, 5 i okiia na puu pehu, 1 i okiia ke kiokio ma ka lemu a he lehulehu kekahi mau mai liilii e ae, i okiia.

                Ua hana hou ia iho nei he wahi hooluolu iloko o kekahi hale mawaho aku no na haole i noho loihi i ka halemai. O keia hana ana ae nei pela, ua lilo ia i mea oluolu no lakou, no ka mea, o kahi poe o lakou aole e hiki pono i ka pii iluna a me ka iho ana i lalo o ke alapii; aia wale no a hoonuiia aku ke keena mawaena.

                No ka nui loa o ka poe e ake mai nei e lapaauia malalo o ka malumalu o ka halemai, nolaila, he mea pono e hoolakoia mai a nui na moe hao, oiai ke kokoke mai nei e piha na wahi kaawale. He mea e hauoli ai ka ike ana iho i na kanaka a pau e noho mai nei, ke hoomaka mai nei lakou e ike i na pomaikai o ka Halemai Moiwahine. I mea e pili ai me ka manao a'u e makemake nei e kamailio aku, he pono ia'u e hoike aku, he nui loa ka heluna o ka poe mai i hele mai e komo iloko o keia wahi, mai na mokupuni e mai, no ka mea, ua hooia lakou i ka pomaikai o ka hele ana mai e lapaauia iloko o keia halemai.

                O na ohe wai i hookomoia mai nei, ua haawi mai ia i ka lako pono ana i ka wai, a ua hoopiia iluna. O ia wai i hoopiiia iluna ua lilo i wahi hoomaha oluolu no ka poe mai, me ka hoopokoleia o ka luhi nui. O ka nui o na laau lapaau i kauohaia i Ladana, ua loaa mai nei, a ke hanaia nei he keena waihona laau kupono. Ua nana kupono ia no hoi na keena e ae o ka hale a me ka pa a'u e mamao wale nei hoikeia aku ana e ke Komite makaikai, ka poe i hana paupauaho ole ma ka hooko ana i ka lakou makaikai ana.

                I ka hoopau ana, ke hai aku nei au ia oukou i ko'u mahalo kiekie ia Mr. T. Toel, ma kona lawelawe ana i kana oihana, me ka paupauaho ole, me ka oluolu a ano aloha kanaka i ka poe mai a pau o loko o ka Halemai nei, e like me kona manao ana i ka pomaikai like o keia hale a me na lala e ae o ka oihana i hooiliia aku maluna ona.

                O ia ano mahalo pu no hoi, ke kapiliia iho maluna o ka wahine malama mai nona ka inoa Mailehaiwale, nona ke ano e hiki ai ke mahalo wale ia no. Ua hoike oia iaia iho, he kokua i hilinaiia, aloha kanaka a hoopono i ka i ka hiohiona o kona lahui. Ke waiho aku nei me ka Mahalo.

ROBE RT McKIBBIN, JR. M.D.

Kauka o ka Halemai Moiwahine

 

He paakiki lalau.

                O ka paakiki lalau i huipuia me ka naaupo, oia ke kumu o ka hoopaapaa palena aina mawaena o Kaiapa a me Kamoiliili, o J.W. Leleano, (oia o S.W. Kealo) i hoike ae nei, ma ka nupepa Kuokoa, o ka la 7 o Sepatemaba nei.

                Aole no i ko ua paakiki lalau la a ua o Kealo i hoopuka ae nei i ka poheo kumu kihi ana; ua haule poholo po loa. O na dala he $15.00 a Kamoiliili ka i heo ia Kelia ma, o kahi nae a ko Kamoiliili aoao manao ai, no lakou ia wahi, aohe loaa mai, oi noke wale iho nei na ana aina a lakou — a, aohe no a ko ko lakou manao, ka ua mea he paakiki lalau.

                O ua o Leleano Kealo nei kekahi mea ikaika loa i ka hoopaapaa, me he wahi olali la, ka alapine lua ma ko Kamoiliili aoao, me ka olelo iho, "Ina e ko ana, e hoopii ia Kaapa ma a pela aku," no ka mea, he poe pakaha a pela aku. O ke kahunapule o keia wahi, ua kiia oia e Kamoiliili e nana i ka pono o keia, ma kona hoomaopopo ana, ua olelo oia, ua pono, a pololei ke ana ana a Naili a pela aku.

                Eia nae, kapa ia aku la e ka poe mahope o Kamoiliili, he kahunapule kokua hewa, he hoopili, a pela wale aku.

                Nolaila no paha o S.W. Kealo i hoike ae nei i ka inoa o ua kahunapule la, i mea e manao ia mai ai he kokua hewa io.

                E ike oukou e ka lehulehu, aia ka ino iloko o ka naau o ka mea nana i hoolaha pela; no ua kanaka la nana i olelo. " ua pono ko Kaiapa aoao."

                He mau olelo oiaio; ole no kekahi a Leleano Kealo i hoopuka iho nei, aka, no ko makou ike pono me na maka, a me ka lohe pono me na pepeiao, aohe he oiaio oia mau mea; a no ke ko ole ana no hoi o ko lakou paakiki, nolaila, ke hooki nei makou maanei; a na ka oiaio no e hoike iaia iho, a nana no e pili ma ka aoao i pono, a haalele ae i ka aoao pono ole, me ka hookamani ole, ka olelo ae nei makou, ua huli mai ke au o ka pono ma ko Kaiapa aoao. O na palena e waiho nei na hoike kumaka no ia mea. Me ka Mahalo.

Kahana, Koolauloa, O., Sept. 9, 1873

 

Makaikai ia Lanai.

E KA NUPEPA KUOKOA E; Aloha oe:—

                E oluolu oe a me kou mau hookele, e hooili ae i keia mau kuhikuhi o na wahi kaulana o Lanai, i ike mai ai na kini makamaka o kaua, mai Hawaii a Kauai, e hele ana e makaikai ia Lanai. A penei; mai Awalua aku, aia o Polihua ma ke komohana, a mau Awalua aku, aia o Keahiakawelo ma ka Hema, a ma ke komohana ae Nalehua o Kapoai, a me na lehua o Malulani, hoomaka e hele mai Keahiakawelo aku, hele ma ka Hikina Hema aku, a hiki i Kanepuu, a ma hikina ae o Kanepuu, o Hoopulapulamoa. alaila, nana aku ia Kihamanienie, a me ke awawa pali o Kaiholena, hele aku mai Hoopulapulamoa, o ke kula o Kaa, he elua hale pili e ku la ma nae o ke alanui o Kukuikahi mai laila aku, hele pololei aku i kahi o Holokahiki, e ninau ia Holokahiki i ke alanui e pii ai i Kaiholena, he wai ia, oia ka wai e inu ai mai Palawai mai, Kealii a me Pulehuloa, Kihamanienie, Kiekie, Nininiwai, a oia ko lakou wai auau, a hoohainu lio, o Palawai nae ka inoa nui oia wahi. Mai Palawai aku iho i kai Kohemano ma ka pali aku e pii ai a luna o Puuomanu, he Heiau ia, aia malalo o ke alanui o Hae, ke Akua ao Kahemakeole kekahi, alaila, nana ia kai o Kohemano, a me Kaohai, a mai Puuomanu aku, hele pololei a hiki i kai o na kumu Kou, he ulu niu o Kahemano, hele aku a hiki i ka loko o Lopaia, hele mai a ke one la o Makaiwa, ma ia hele ana mai a ka ulu niu e ku ana ka Luakini o Kahalapalaoa, kahi ia o ke kawewe i ka puhala, oia kahi

i make ai o Pahulu, a mamua mai oia wahi ilaila no Kaululaau i noho ai, ka eueu o Lanai, nana i pepehi ke Akua o Lanai, a malaila mai, no ko Iwa hale ia wahi. Hele mai a na wahi hale pili elua, o Lanaikaula ia, i na e ike ia Lanaikaula a me Lanaihale, alaila, puni ka o Lanai, pela ka olelo ia.

                Hele mai a hiki i Kaa, eono hale oia wahi, a o ka wai o Waiakapuaa. Hele aku, a hiki ma kekahi lae pohaku, o Laekahoomana ia, ilaila kahi a Kaululaau i hoopunipuni a i ke Akua, i pee ai iloko o ka Puakala, iloko o ka ale, a pau ai i ke Akua o Lanai, he oiaio paha aole paha? Alaila nana mai ia Maunalei, he umi na hale oia wahi, aia iuka olaila o Waikakulu, oia ka aina momona hookahi o Lanai, nui ke kalo, ko, maia, awa alani, uala, a mai Maunalei aku, hele aku a loaa o Kahokunui, elua hale olaila, hele mai he kula ia, o ke kula o Kaiolohia, ma keia hele ana, aole nui na hale oia wahi, o Kahaulehale, hookahi hale, o Kahue elua hale, o Honuaula eono hale, o Paomai hookahi hale alaila, puni o Lanai. A oia iho la na mea hou o kuaaina nei, i ike mai ai na opio puni mea hou o ke kaona o Honolulu, a me na wahi e ae a pau o keia mau Mokupuki he 12. He aina lokomaikai keia, kokua na kamaaina i ka lio no na malihini. Nolaila ke haawi aku nei makou i ko makou aloha pumehana ia Kamai, Hao, Palau, Iosepa, a me Naeole, no ko lakou kokua ana mai ia makou, i na lio, a me ka poe i hookipa ia makou e ai, oia hoi o Holokahiki, Lapaki, Ohua, a me Kekawewe, Ke hoi nei au i Molokai, a moe i Kawela. Aloha oukou. S.A. KANAKEAWE.

Waialuai, Molokai, Sept. 9, 1872.