Ka Nupepa Kuokoa, Volume XI, Number 36, 7 Kepakemapa 1872 — Ke Kai Hoee ma Koolau, Kauai. [ARTICLE]

Ke Kai Hoee ma Koolau, Kauai.

He wahi nu hou ka'u e hooili aku nei ia oe e nau ia e hai aku i ka poe puni nu hou o kaua e noho mai nei ma kela a ma keia wahi o keia pae aina. No ka mea, he mea hou ia i ka ike ana i na mea hou o kekahi mau wahi. Eia ua nu hou la. Ma ke awakea o ka la 23 o Augate, oia no hoi ka Poalima, a'u e kakau nei. Aia ma Pilaa ua ikeia he kai hoee ma ua la nei, a ua lilo aku a pakele ke ola o kekahi kanaka, o Kulu kona inoa. Penei ka moolelo no keia kai hoee: I ke awakea o keia la, ua hele aku au a me ko'u ohana ma ka hale o Piikalama, a i ko makou hiki ana aku i ka hale, elua wale no mea e noho ana i ka hale o Miss Laheamanu a me kona kupunakane. Aole i liuliu iho lohe aku la makou i ka hea ana mai a ko'u makuwahine, "he nuhou e! he nuhou e! he kai mimiki, ua lilo aku nei o Kulu i ke kai," a lohe makou i keia mea hou, holo aku makou a hiki ma ka pali o Mikiloa e nana ana i kahakai, no ka mea ua hele nui aku lakou i ka lawaia, a o ua Kulu nei he paeaea kana lawaia. A ia lakou e lawaia ana ike iho la lakou i ka mimiki ino o ke kai o kahaone, ia manawa kahea aku la lakou ia Kaulu a me Haole e hoi mai no ka mea, ua ike no laua aohe nalu, a he malie loa, aohe makani, aka olelo aku o Haole ia Kulu, e mimiki ke kai e hoi kaua, ae mai no o Kulu o ka hoomaka mai la no ia e hoi, aka ia laua i au mai ai o ka hoomaka mai la no ia e pii ke kai me ka hikiwawe loa a hala loa i uka me he la he 10 kaulahao ka loihi mai kahi o ke one mai a hiki i kahi hiki ole ia e ke kai i ka wa kahiko mai a i keia la hoi akahi no a ikeia. A o ua Kaulu nei loaa e kela i ka ikaika o ke kai a o ko ia la lilo aku la no ia iloko o ke kupikipikio mimilo o ke kai, ia manawa pihoihoi iho la ka poe mauka e holoholo ana a kii aku la i kekahi kanaka o Paniipuka kona inoa a nana i kokua i ke kii ana maluna o ka waa, a i kona hoe ana aku ua ane hiki ole iaia ke hoe pololei aku i ka waa, no ka ikaika loa o ke kai i ka mimiki aku. Ua hooikaika nui loa o Paniipuka i ka hoe ana a loaa o Kulu, ua aneane haalele mai i ka la i ka mea mahana, aohe ana huaolelo hiki ke hoopuka mai manawa ia laua i aneane mai ai e kau i ke one ikeia aku la kekahi mano nui e lana ana ma kahi no o Kulu i lilo ai i ke kai, ina paha i hoea mua mai i ka manawa a Kulu e au ana ina ua ola ko ia la la pololi. Me he mea la i kuu nana pono aku ekolu anana kona loa a o kona laula eha kapuai, pela ko'u hoomaopopo ana. Akahi no a ikeia keia kai pii ma Koolau nei a me na wahi e ae e kokoke mai ana, mai kahiko loa mai. Kupaianaha ka hana a ka Haku o na Haku iloko o keia mau la. Ua loheia no ke kai pii ma na wahi e ae o ko kakou pae aina nei akahi nae hoi a ike maka ia ma keia la. Oia iho la kahi nu houe hai aku ai ia oe e ke Kuokoa a me kou kapena nana e hookele. JOHN Ko.