Ka Nupepa Kuokoa, Volume XI, Number 34, 24 ʻAukake 1872 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

Aloha Makua--Ua hookoia.

-----

Ka Haiolelo a Rev. L. Laiana, ma Waimea.

Hanau la 16 o Iulai. 1872.

 

            A pau ka himeni ana, ku hou ka Makua, a wehewehe mai penei:

            Ua noho au maanei he 40 makahiki, aole au i noho aku ma kahi e, aole au i hoi aku i ka aina hanau e ike i na makamaka &c. Owau wale no paha ka misionari Hawaii i noho i 40 makahiki ma kahi hookahi, a ma ka oihana kahu ekalesia hookahi. Ma kinohou, he nui ke kihapai, Waimea, Kawaihae. Hamakua, na Kohala a pau. Nui loa na kanaka, he 17,000 paha. Aole lakou i naaupo loa, ua hapa naauao no. Aole lakou e hele olohelohe loa ana, ua paa iki no na kino i ke kapa Hawaii. Ua hele nae me ke kapa ole i kekahi manawa ma kahi akea no, ua paa nae ko waena i ka malo. Ka lole haole nuku loa ia. He mau kula no, ua loaa kekahi ike uuku o ka heluhelu palapala. He poe huli ma ka pono, a he mau hoahanau ekalesia kekahi, uuku loa nae. Nui nae ka naaupo, ka hemahema, ka nele, ka poholo ana iloko o ka pouli a me ka make. Nolaila kuu hele ana mai a noho maanei i keia mau makahiki, e imi, e ao, e hoonaauao, e hoolako, e hookuonoono, e hoala mai, mailoko mai o ka pelapela a me ka pouli, e hoohuli mai, a e alakai aku i na kanaka Hawaii i ke ola mau loa. Ma ia hana ua lilo koʻu mau makahiki ikaika, a me koʻu mau makahiki nawaliwali, a e lilo ana hoi ilaila ke koena o koʻu ola ana. Ina ua puka mai kekahi mau pono, a pomaikai no oukou, mailoko mai o kau mau hana, aole loa noʻu ka nani; no Iehova no; aole aʻu mea e kaena ai, aole loa.

            Ua hana oukou i ahaaina aloha na ka makua--ua hui pu ma ia hana, na kanaka Hawaii, a me na haole, na hoa aloha pu.

            I akaka ke kupono ana o ko oukou haawi ana mai i keia ahaaina aloha, ke ku nei au imua o oukou e hai iki aku i kekahi mau hana aʻu iloko o keia mau makahiki he 40. O kaʻu oihana nui, he oihana misionari no; aka, he nui na kokua e pili ana i keia oihana. Hookahi no kino, he nui nae na lala, a hui hoi na oihana. Ma ka hai ana i koʻu mau ano, i kaʻu mau hana, e kahea aku ana au i ka poe i ike maka e ku, a hooiaio mai ke hiki.

            1. Koʻu ano kanaka, a hoanoho. He kanaka no au, e like me oukou, me na kanaka e ae. Aole au he akua, ina he akua au, ina ua ike koke i ka olelo Hawaii; ina he Akua au, ma ua mau ka ikaika, aole loaa ka mai, ka nawaliwali, aka, ua loohia pinepine ia au i ka mai, i ka maka eha, i ka nawaliwali, a e make ana hoi kuu kino e like me ko oukou. Aole paha i hemolele koʻu ano kanaka. Ua malama no i na kanawai o ka aina. Aole paha oukou i ike iaʻu, ua hopuia, ua alakaiia imua o ka Aha Hookolokolo no kekahi hewa, no kekahi karaima. Aole paha i loheia he kanaka hoopunipuni au, a hooko ole i kaʻu mau olelo hoohiki. Nui na kuai a hoolimalima aʻu me na haole, a kanaka maoli--aole lakou i hoi mai i palapala aelike a kakau i na inoa: no ke aha ia? no ka manao paha, e hooko ana no ka makua i kana olelo, e like me ka mea maa ia ia. Ka noho malie, a akahai, a oluolu, a aloha, a hookipa, me ka ole, e ku ka mea ike a hai akaka mai. Ku no kekahi, a hooiaio mai--ma ke ano kanaka, a hoanoho, ua alakai pono ka makua i na kanaka, i na haole.

            2. Kuu ano Keristiano, ano haipule, ua akaka ia ia oukou, ka hapa a oukou i ike ai, oia ko waho. Aole i hemolele loa koʻu ano haipule, aole hemolele Paulo--pehea hoi au? Ua malama no au i na kanawai o ke Akua mawaho, ua malama i ka Sabati--Ua kupaa ma ka aoao mua; aole i huli ma ka aoao Farani, a ma ka aoao Moremona, a aoao ekalesia e ae. Aole hoi i puhi baka, a nau baka, a inu rama, a waina, a bia, a pota, a awa; aole hula, a hana pepa lealea a hele i ka heihei lio, i na nana ana i na lealea lapuwale, aole au i alakai hewa aku ia oukou ma ia mau mea. Ua papaiaʻku ia mau mea a pau, E ku hou kekahi e hoike mai i koʻu ano haipule, he kumu kupono paha ia, e hoohalike ai. Ua ku no kekahi a kokua. Hoomaha hou ka makua, a himeni hou ka papa himeni ma ka Hae Hoonani.

"Kai a mau i ka nani." &c.

            A pau ka himeni ana, ku hou ka makua, a hai i kopa ano.

            3. Kane mare. He kane mare au, o ka wahine mua, ua hala kahiko ia i ka lani; a eia mai ka wahine hou, kona pani. Ua akaka koʻu ano kane mare ia oukou. Ua alakai pono paha au ia oukou, i na kane Haole, i na kane Hawaii, ma ka malama ana i ke kanawai mare, ka malama pono ana i ka wahine, ka noho oluolu a kuikahi ana, me ka hoolako pono, me ke kokua pono. Aka, ua haalele pinepine au i ka whaine no kekahi mau la, a mau hebedoma, a kau i na hana kaumaha he nui wale maluna ona, iaʻu i hele ai e kaapuni ma koʻu kihapai. Hookaumaha au ia ia no kuu aloha ia oukou--i hiki ke hele a launa pu, a hai aku i ka ke Akua olelo ia oukou. Ua mau nae ke aloha i ka wahine; a no kona aloha ia oukou, ua ae oia e noho mehameha pinepine, a loihi, i hiki iaʻu ke hele a ike, a ao ia oukou.

            4. Kuʻu ano makuakane ponoi, a makuakane hanai. He makuakane au, he mau keiki ponoi kaʻu, he mau keiki hanai.

            ua akaka loa keia ano oʻu ia oukou. Ua ike i ke ano o kuu ao a malama, a alakai ana i na keiki ponoi, me ke ano hoi o na keiki. Auhea kaʻu mau keiki lohe aha ka lakou hana? Ua malama ponoia anei? Ua hookuu wale ia anei e hele lalau wale ma na la noa? ma na Sabati? Ua ao anei au ia lakou i ka hula, i ke puhi baka, i ka inu rama, &c? Ke kue nei anei lakou i na kanaka Hawaii me ke aloha ole, a ao ole ia lakou? Owai ka i ana i ko oukou mau kuleana, a unuhi i ka buke Helu na na kula, a kokua nui ma na Kula Sabati? Owai ka i ao i na kaikamahine hawaii ma Waialua? a e ao ana i na keikikane Hawaii ma ke kula nui o Hilo? Owai hoi ke noho pu nei me na makua, e kokua mau ana ma ke kula Haole, a ma ke Kula Sabati? Nawai keia palapala aloha makua i hooiliia mai e heluheluia imua o keia anaina hoa aloha, no ka hookapuia o ke kino, a hiki ole mai? E ku kekahi a heluhelu ia palapala--He palapala aloha keia na C.J. Laiana, i ka makuakane, a i ke anaina ma Imiola.

            A o na keiki hanai, he poe kaikamahine Hawaii ka nui. Ma ka makahiki 1838 ka hoomaka ana e lawe i na kaikamahine iloko o ko maua ohana, e ao, e hoonaauao, e hoomakaukau ia lakou no na oihana wahine, a makuwahine mahope. Ma ka hoomaka ana, okoa iki no ka noho a ai ana; a mahope, ua like pu no ka noho, ka ai pu ana, ka hanai ana, me na keiki ponoi no. He mau keiki Hawaii ka nui, a he mau keiki hapa haole kekahi; elua i kekahi manawa, 5, 7, 8, i kekahi manawa iloko o ka ohana; ua lilo kekahi i mau wahine na na kumu, a Kahukula, a loio, a lunakanawai, ua make kekahi, ke noho maikai la kekahi ma kahi e; a, eia no ke noho pu nei me maua, elima kaikamahine hanai. Ke aoia nei ma ka olelo Haole, &c.

            E ku iluna, oukou elima me na hoa kula haole e ae, a e mele mai ia makou ma ka olelo haole.

            "Marching on, Marching on, Glad as birds on the wing, &c."

            5, Koʻu ano haumana. He haumana ka oe! kainoa, he kumu oe i hele mai nei e ao mai ia makou! Ae, he kumu no, pehea la nae e hiki ai iaʻu, ke ao ia oukou, ke loaa ole ka oukou olelo? He hana nui ia, ka loaa ana o ka olelo Hawaii. He olelo paakiki loa paha keia, aia kela haole, Olohana (John Young) he wahine Hawaii hoi kana, ua noho he 40 makahiki maanei, aole nae i loaa ka olelo Hawaii. Pehea la wau? e ake no e loaa koke, i hiki ke kamailio, a ao, a pule, a haiolelo, a kakau lime, kakau buke, ma ka olelo Hawaii. E loaa paha, aole paha; ua loaa nae i na misionari mua, a i kuu hoa nei, Baluwina, e hoao paha. Ka hoao iho la no ia, a imi me ka ikaika i loaa koke. Paa na hua, A, E, I, a hiki i W, i ka hora hookahi, ma ka hora elua, ua loaa ka hookui, a po ka la, ua ike i ka heluhelu. Ka akaaka mai la no ia o ke anaina i ka hikiwawe o ka loaa o ka olelo hawaii i ka makua. Aole pela kamalii Hawaii. Na kumu aʻu, Baluwina, Manae, Hueu, (Geo. Davis) na kanaka a pau. Ma ke aoia, ma ke kamailio pu, ma ka ninau, ma ka lohe, ma ka heluhelu, ma ke kakau, loaa iki no, a ma ka pule elima, ku ka makua imua o ke anaina ma ka luakini, a hai i ka olelo a ke Akua ma ka olelo Hawaii. Me ka hemameha no nae--aka, ua ahonui kanaka, aole kanaka mai i kuu hemahema. Malaila mai kuu hooikaika ana i makaukau e ao, e hai, e haku mele, &c., ma ka olelo Hawaii, he olelo maikai no, he olelo ano mele, he olelo hope ole hoi.

            I kekahi mau makahiki, haalele au i kaʻu olelo ponoi, uuku loa ka nana ana, lilo kuu manawa ma na kakahika nui, ma na ao, ma na po aumoe ma ka huli ana i loaa pono ka oukou olelo. A ke mau nei no ka huli ana. A, pehea? ua loaa anei? Ka ae like no ia o ke anaina, ae, ae, ae. Ae, ua loaa iki no ia iaʻu, aole ane i pololei loa, aole pau ka hemahema, nui hoi na olelo i koe, aole i loaa iaʻu. Aole ma ka olelo Hawaii wale no kaʻu ao haumana ana, ma na buke hoonaukiuki ia oukou no ka ike ole i ko oukou mau ano a pau--na mea pili kahiko a pili mau i kanaka Hawaii. Ua huliau i ko oukou ano a pau, he 46 makahiki me ka loaa paha o kekahi, me ka loaa ole paha o kekahi. Ke huli nei no, no ke aloha i hiki ke hoonaauao, a hoola. Maanei ku ka papa himeni a mele.

"Hamau, e na hoa, ke a nei ka pu, &c."

            Himeni 343, a kokua pu na pahu, mena ohe.

            6. Kuu ano kumu. Kaʻu hana mua ia, o ke ao kumu ana. Ma ka noa ana o ka Sabati mua, kuu hoomaka ana e ao i na kanaka Hawaii, me oʻu mau hoa pu. Na elemakule ike ole kaʻu mau haumana mua, ma ka A a hookui ke ao ana. Ua loaa ka A, a me ka hookui iaʻu a hiki ke ao malaila. Eia ka maloko nei kekahi haumana kahiko ma ka A, a ke mau nei oia malaila. Aloha ino! He kanaka pono nae. A, mahope, ao no au i na kanaka makua me na kamalii ma na kula, a na mea hoonaauao he nui wale ke ano. Eia kekahi mau kula aʻu i ao ai.

            1. Kula la, no na makua a me na kamalii; ma ka olelo Hawaii, a ma ka olelo haole i kekahi manawa.

            2. Kula Sabati no na makua a kamalii, i na huiia na haumana Kula Sabati aʻu i ao ai iloko o na makahiki he 40, ua hiki paha i ka 4,000 a oi. A ke mau nei no kaʻu ao ana ilaila.

            3. Kula Himeni no na makua a kamalii. He kumu alakai himeni au, a hiki i ka wa i loaa i na kanaka Hawaii i makaukau ma ka oihana himeni. Alaila hemo au. E like me na kula la, kula la no au a loaa na kumu Hawaii i naauao, alaila hemo au a lilo ia oihana ia lakou, a i kaʻu wahine hoi.

            Nui kaʻu mau kula himeni, pakahi,palua, pakolu ma ka hebedoma hookahi, i uka, i kai, i waena, io, ia nei, i ka hui ana ma na hale kula, no ke aloha, i loaa na leo mele i kanaka, i kamalii. Ua poloke nae ka leo i keia wa, a hiki ole ke hapai ia oihana. Ke kokua nei no nae au malaila ma ka mea hiki.

            4. Kula Kumu a wae. Mai ka hoomaka ana, 1832, a hiki ia nei na kula kumu. Eia paha kekahi mau kumu i ao ia e aʻu ma ke kula kumu mua. Ina pela e ku ae oukou i luna. Ku no kekahi a ae mai, owau, a owau a owau hoi. Ae, ke mau nei ko ke Akua lokomaikai a hiki ke olioli pu kakou i keia la. He kula makahiki keia, he kula ma kela a keia makahiki, uuku loa na makahiki i haule. He kula loihi kekahi, he mau malama, he mau hebedoma no kekahi, he mau la ko kekahi. Mamua, akoakoa mai na kumu o Hamakua, a o Kohala ma Waimea, he haneri a oi loa aku, a na lakou no e malama ia lakou iho ma na hale a na kamaaina i hookipa alohaʻi. A ma Hamakua kekahi mau kula kumu. Ma Waimea nae ka nui. Owai na haumana o keia mau kula? na kumu no e ao ana; ka poe i puka mai mailoko mai o ke Kula Hanai o Hilo, O ke Kula nui o Lahainaluna, ka poe hoi i hele ole ia mau kula, a me ka poe e makemake ana e hele ia mau kula, a e lilo hoi i mau kumu. Nui na kumu i hoomakaukauia ma ka oihana kumu ma keia mau kula kumu. Na na haumana i malama ia lakou iho mamua--ia lakou ka ai, ka ia, &c. A ma na makahiki mahope iho nei, na ka Papa Hoonaauao i malama i na haumana. Ke mau nei no ke kula kumu, me ka hoomahuahuaia o na manawa kula, eha ka, manawa kula ma ka makahiki: a ke mau nei no koʻu kokua ana ma ke ao ma na kula kumu, no ka mau ana no o ke aloha.

            5. Kula Kahuna. He Kula Kahuna kakau! Ka i noa ma Wailuku wale no ke Kula Kahuna, i aoia e Rev. W.P. Alekanedero kou hoa! Aole malaila wale no ke Kula Kahuna. Nui na kula kahuna liilii ma kela a me keia wahi. Eia keia kahunapule ma ka awai nei me aʻu; ea, ma Wailuku anei oe i ao ai i  ka oihana kahuna? Aole; mahea hoi? ma ke kula kahuna anei oe i keia wa? Ae--He kahu ekalesia anei oe mamua? Ae--A ke kokua nei anei oe ma ia oihana i keia wa? Ae--O oe wale no anei ka i aoia ma ke kula kahuna a ka makua, a lilo i kahuna, a i kahu ekalesia? Aole--Aia ma Hamakua kekahi, aia ma Kauai kekahi. Ua ike maka anei oe i ka make emoole ana o kekahi haumana o ia kula i ka wa e kula ana kakou? Ae, ua ike au. Ua wehewehe iki ia ke ano o ia make ana. Mai ka makahiki 1836 kuu ao ana ma na mea e makaukau ai kekahi poe kupono ma ka oihana kahuna, a ma ka haiolelo ana ma na halawai, a, ma ka malama a hanai ana i na ekalesia.

            Nui na haumana, ua haneri, a henri, a haneri hou paha. Ua loaa no ka makaukau iki ia lakou ma keia oihana. Aole paha lakou a pau i poniia e ka Ahahui kahuna. Ua poniia nae e ka Uhane Hemolele, a ua lilo i poe haiolelo ma na halawai nui, a uuku hoi, mai Hawaii a Kauai. Nui no ka poe i make o lakou; a, aia no ke noho la kekahi poe ma Hamakua, a Hilo, a Kau, a Honolulu, a ma na wahi e ae; a, eia no kekahi poe k noho pu nei me ka makua, e kokua ana ia ia ma ka haiolelo ana i na Sabati a pau.

            A, maanei, ninau ka makua i kekahi haole ano Haiolelo ma ka aoao Medotaika Wesele, no ke ano like o ko lakou poe haiolelo, me keia poe haiolelo o kaʻu kula kahuna. Ae mai oia, ua like no.

            Aole ma kahi hookahi keia kula kahuna aʻu--ma na apana, na ekalesia he 14, 15, oʻu; iaʻu i kaapuni ai e ike i na ekalesia, ma ku pau ana o na halawai nui, ma na po, a aumoe loa kaʻu kula pu ana me na luna, na mea ui hoi e kupono ana i ka haiolelo, &c.

            6. Kula Kanawai aupuni. I ka hoopuka mua ia ana mai o na kanawai hou, i hooholoia ma ka Ahaolelo Aupuni, ma na nupepa a buke paha, nui na mea hou, na kanawai hou &c., nui ka pohihihi. Aloha makua au ia oukou; hoolako au iaʻu iho i na nupepa, a buke kanawai. (Eia hoi ua mau buke nei, hoike ka makua) a kula pu kakou i ike ina kanawai. (Eia hoi ua mau buke nei, hoike ka makua) a kula pu kakou i ike i na kanawai hou; o noho a loohiaia i ka hihia, a hoopaiia no ka ike ole i na kanawai. Nui kuu manawa i lilo i ka oihana kumu?

                                    (Aole i pau.)

---------------------------

Kula Kahunapule.

--------

            E like me ka hooholo ana o ka Papa Hawaii, e wehe ana keia kula ma Honolulu me ka haiolelo e Rev. J.D. Parisa ma ka rumi halawai o Kawaiahao i ka la mua o Okatoba ma ka hora 10 kakahiaka. O ka poe e makemake e komo maloko o keia kula, a e hoomakaukau no keia oihana maikai a nui, e hele mai oukou. Me ka hoaponoia e na Aha Euanelio Mokupuni, e hele mai ai na mea e manao ana e komo. Ina makemake kekahi e ninau a e kukakuka no keia kula, he pono me Rev. J.D. Parisa, a me Rev. J.F. Pokue e kuka ai, a e palapala ai.

                                    J.D. PARISA

            Honolulu, Iune 29, 1872.

----------------------------

            E malama pono i kou manao; no ka mea, ke holo pono ole ka lio o ke keiki piha i ka huhu. Aole o kana mai ka ino i hana ia ma keia ao, no ka manao huhu. Nolaila, e malama pono i kou manao.

----------------------------

Na Olelo Wehewehe no na Oihana a Na Lunaolelo.

-----------

            P. 20. "Ia manawa," ia manawa popilikia, ka wa a Parao i hoao e hoopio i ka poe Hebera. "Hanau ai o Mose." he kanaonokumamaha makahiki mahope mai o ka make ana o Iosepa, a he kanawalu makahiki mamua ae o ka haalele ana o ka poe Iseraela ia Aigupita; "Ua maikai loa ia," he maikai i na maka o ke Akua, oke ano maoli, "Maikai i ke Akua."

            P. 21. "I hooleiiaʻi mawaho," waihoia iwaena o na kaluha iloko o ka muliwai Nile, maloko o ka waa home. Ua maa ka poe o Aigutipa i ka hana an ai na waa noloko ae o ke kome. A ua hana ia no hoi ia mea i pepa. Isaia 18:2. "Malama iho la i keiki nana." O ka maikai loa paha o kona helehelena ka mea i manao ai ke kaikamahine a Parao e lawe iaia.

            P. 22. "Ua ao ia o Mose i ke akamai a pau o ko Aigupita." Ua kaulana ko Aigupita no ko lakou manao, a me ka ike; a ua lawe ia ke akamai mai ia wahi aku a i Phenicia, a mailaila aku a i Helene. A oia ua hookama ia o Mose iloko o ka ohana alii, ua loaa iaia ka pomaikai o ke ao ana i na mea hoonaauao o Aigupita. O Philo kekahi mea kakau moolelo iwaena o na Iudaio i ka wa e noho ana o Iesu ma ke ano nei, ua hai mai oia ua ao ia o Mose e ka poe kumu o Aigupita, aole nae o lakou wale no, ua ao ia oia e na kumu Helene a me ka poe Asuria a me ko Kaledia. Ua naauao no ko Aigupita ma ke anahonua, aohoku, ke ake akamai a me ka lapaau ana. Ua hele no kekahi o ko Helene poe ake akamai kau ana i Aigupita e imi ai i ka naauao. "Ua mana hoi ma na olelo, o ma na hana ana." Oiai aole i akamai o Mose ma ka haiolelo, he nuu ka olelo, ua makaukau no nae oia me na manao ikaika, ua ike ia keia ma na manao i kakau ia eia; a ua ike ia ma kona mau haiolelo i paa i ke kakauia, he ikaika loa oia ma ka olelo ana. O ko Setepano manao, a ma na hana oia keia, he kanaka ikaika loa ia ma ka noonoo a ma ka pono.

            P. 23. "A hala na makahiki ona he kanaha." I ka nana aku, ua maheleia ka wa o ko Mose ola ana i na mahele ekolu, a he kanaha makahiki o kela mahele keia mahele. O na kanaha makahiki mua, oia ka wa i lilo i kona noho an ahe keiki no ke kaikamahine a Parao. I ka lua o ke kanaha makahiki, ua noho oia ma ka aina o Midiana, e noho ana ma ke ano kahuhipa. He kanawalu ka nui o ko Mose mau makahiki i ka wa o ke Akua i kauoha ai ia laua me Aarona e hele aku imua o Parao a e kauoha aku iaia e hoouna aku i na mamo o Iseraela mai kona aina aku." Pukaana 7: 2 me 7. O ke kolu o ke kanaha makahiki, oia na makahiki ana i noho ai ma kawaeonahele ma ke ano kau kanawai a alakai no hoi no ka lahui o Iseraela, "E ike i kona poe hoahanau," e launa pu me lakou a e kokua ia lakou.

            P.24. "A ike aku la ia i kekahi mea e hana ino iaʻna," e kekahi o ko Aigupita poe hooluhi. E hahau ana ke kanaka o Aigupita i ka Hebera, malia paha e hoao ana oia e pepehi iaia a make. Pukaana 2:11. "Pepehi aku la i ke kanaka o Aigupita. Pela i hoike ai oia iaia iho ma ka aoao e kokua ana i ka lahui i hoino ia. Aole oia i makemake e "Kapa ia mai he keiki na ke kaikamahine a Parao; e koho ana ma ka pilikia pu me ko ke Akua poe kanaka, aole ma ka lealea pau koke o ka hewa; e manao ana hoi i ka hoino iaʻi he waiwai ia e oi aku ana mamua o ko Aigupita waiwai; no ka mea, ua manao aku oia i ka hoouku ia mai. Hebera 11:24--26. Na lealea o ka hewa ma ka hale alii o Parao--heaha la ko Mose mea i koho ole ai i keia mau mea? Eia, aole ia he mau mea e lawa ai ka makemake; no kekahi manawa wale no lakou. Ua makemake oia i ka mea i oi aku, he mea e lawa ai ka makemake, he mea mau. Luka 10:42. O ka hoouku ia mai kana i makemake ai, oiai e loaa ana ia ma ka hoopilikia ia a me ka hoino ia mai. He pono no kakou ke hoomanao i ka hoopomaikai ana o ka lani. Ua hoomanao no o Iesu i ka olioli i hoomaopopoia mamua ona ia ia i hoomanawanui ai i ke kea me ka manao ole i ka hilahila. Hebera 12:2. A he pono no hoi ke hoomanao kakou i ka hopena o ka noho ana mamuli o ka hewa. O ke kanaka waiwai i ahaaina nui i kela la i keia la he naaupo oia i ka mea ana i koho ai; no ka mea, no ka wa pokole wale no kona lealea, alaila hele aku la oia i kahi e loaa ole ai kekahi kulu wai hookahi e oluolu ai kona wela nui. I ko Mose hele ana e ike i kona poe hoahanau, pauku 23, a i kona pepehi ana i ke kanaka o Aigupita, ua alakai ia oia e ka Uhane o Iehova, elike me Samesona i kona pepehi ana i ka liona opiopio. Lunakanawai 14:6, a me kekahi mau manawa mahope, iaia i pepehi ai i ka poe Pilisetia. Pela i hiki mai ai ka Uhane o Iehova maluna o Oteniela, Lunakanawai 3:10, pela no hoi o Saula. 1. Samuela 11:6. I ka wa e kau mai ai ka Uhane o ke AKua maluna o kekahi mea e kono ana iaia e hana i na mea pono me na hana i ku i ka mahaloia. Na ka Uhane Hemolele e kono i ka poe hewa e mihi a e pule. Na ka Uhane Hemolele e alakai i ka poe Kristiano e hooikaika i Hemolele.                         (Aole i pau.)

-----------------------

            Mai hoomaunauna i kekahi minute o kou manawa; no ka mea, o ka minute o ka manawa he hoailonaia o ka lokomaikai.

----------------------

No Iapana.

------

He mau au hou i kuuhiia mailoko o kekahi leta na Rev. O.H. Gulika, Kobe, Iapana.

            Na Jeta. Ua hoopomaikaiia. He papa kanaka Iapana no lakou, he papa i hoohaahaa loa ia, ua kipakuia lakou iwaho o na papa e ae o Iapana, aole i aeia e huipu, launa pu, ai pu. Ka lakou oihana, ka hana ili, hahana kamaa, a kanu i na holoholona i make. Ko lakou nui 460,000. he lahui haumia ma ka manao o na Iapana: a noho kaawale ma na kauhale i hookaawaleia no lakou. Ua hooholo ke aupuni ma kekahi Ahaolelo mamua aku nei, e pau ko lakou noho kaawale ana. E huipu no, a launa pu, a ai pu, a hana pu me na Iapana e ae a pau. A, ua pau no ke kapu ana.

            Na wahine Iapana. Ua hoakeaia ko lakou pomaikai. Kapu loa na wahine mamua aku--aole hiki ke hele i na aina e. E paa mau ma ko lakou aina iho no I kela manawa, ua hooholo ke aupuni, e ae e hele pu na wahine me na kane i na aina e, ia Beretania ia Amerika, a pela aku. Hiki ke hele na wahine--na kaikamahine e aoia ma na kula nui ma na aina naauao. A ke hele la no. Malama o lilo kekahi mau kaikamahine i mau misionari wahine no Iapana. E alu pu na kaikamahine Hawaii. E imi i ka naauao, i ka makaukau i lilo i kumu ao, i misionari paha no na aina e.

            Na holo lio o Iapana. Ua hoonuiia. Mamua, uuku ka poe i neia e holo lio. I keia na kaikamahine Hawaii. E imi i ka naauao,  ka makaukau i lilo i kumu ao, i misionari paha no na aina e.

            Na holo lio o Iapana. Ua hoonuiia. Mamua, uuku ka poe i neia e holo lio. I keia manawa, ua ae ke Aupuni e holo lio na mea a pau, kane, wahine, keiki, aohe mea i hookapuia. E holo naauao nae, me ka uhi maikaiia o na kino, aole make holo wale me ka lole ole, me ka hoike i na wahi hilahila o ke kino. E aoia kanaka Hawaii e na Iapana, e holo maikai ke holo lio; mai holo ino, a heihei ino. E malama hoi na wahine, na kaikamahine i ko lakou mau kino i ole e ike ia ka olohelohe.

            Ka ai bipi. Kapu loa ka ka bipi ma Iapana mamua. Akahi no a aeia e ai ia ka io bipi. E ikaika ana paha na kino Iapana ma keia hope aku. Eia nae kekahi hana i hoomaka ia iho nei e nawaliwali ai paha na kino, o ke puhi ana i ka bia. Na na haole no i ao aku ia lakou ia hana. he hana nae e ino ai ke kino.

            Ka hana kupanaha ke pau ka hale i ke ahi! Ua pau kekahi mau hale a waiwai pu i ke ahi. Aloha na haole, na misionari i ka poe i hoopilikia ia, hooilihune ia i ke ahi, a kokua i mau haneri dala no lakou. Hoole lakou aole pono ke lawe, aole ae ke aupuni. A ninau na haole, heaha ka hana a ke aupuni ke pau ko oukou mau hale i ke ahi, a nele loa oukou i ka hale, i ka waiwai ole? Pane mai lakou, "Eia ka hana, o na makua nona na hale i pau i ke ahi, e nakiikiiia a paa ko lakou mau lima mahope ma ko lakou kua, a e alakaina ʻku lakou, a hahao ia iloko o ka hale paahao, a hahai na keiki me ka uwe ana. E hoopaahaoia, a e hahauia i ke kaula na ona o na hale i pau i ke ahi." Naaupo maoli na Iapana ma keia hana ino loa. E pau auanei nae i ka loaa ana i ka ke Akua olelo. E pule nui no lakou.

            Eia nae nu hou maikai loa no Iapana mai. Ua loheia. Ua hoopau ke aupuni i na kanawai a pau e kue ana i ka hoomana Keritiano. Mana keia mau kanawai hoopai, a hoomau i ka poe huli mai, a lilo i poe Keritiano iloko o na makahiki 300. Ua hoopau ia nae i keia wa; hiki no i na Iapana ke huli a lilo i mau haumana na Iesu me ka hoopai ole ia. Nui ka huhu, ka ukiuki o na kahuna hoomana kii i ka lohe, ua hooholo ke aupuni e hoopau i na kanawai kue i ka hoomana Keritiano--hoole loa lakou, a hooikaika loa e hoihoi hou ia ia mau kanawai--aole nae i hiki; ua paa loa ka manao o ke aupuni.

            E hoomaikai kakou i ke Akua ke hooiaio ia keia lohe. E holo ana ka pono Keritiano ma Iapana ma keia hope aku.

-------------------------

HAAWINA KULA SABATI.

----------

1872: HAPAHA Ekolu. Olelo ae a Paulo.

HELU XXXV. Sepatemaba 1.

KE KEA.

Pauku Baibala. 1 Korineto:18--25.

            18 No ka mea o ka olelo no ke kea, he mea lapuwale ia i ka poe make; aka, ia kakou, i ka poe ola, oia ka mana o ke Akua.

            19 No ka mea ua palapalaia mai, E hoopau au i ke akamai o ka poe akamai, a e hoolilo au i ka naauao o ka poe naauao i mea ole.

            20 Auhea ka mea akamai? Auhea ke kakauolelo? Auhea ka mea hoopaapaa o keia ao? Aole anei i hoolilo ke Akua i ke akamai o keia ao, i mea lapuwale?

            21 No ka mea, i ke akamai o ke Akua, aole i ike aku ko ke ao nei i ke Akua, ma ko lakou naauao ana; alaila manao iho la ke Akua, ma ka lapuwale o ka haiolelo             ana e hoola i ka poe manaoio.

            22 Ke noi mai nei na ludaio i hoailona; ke imi mai nei hoi na Helene i ke akamai.

            23 Aka ke hai aku nei makou ia Kristo i kaulia ma ke kea, he mea hina no na Iudaio, a he mea lapuwale no na lahuikanaka e.

            24 Aka, i ka poe i kohoia mai, i na Iudaio a me na Helene, o Kristo no ka mana o ke Akua a me ke akamai o ke Akua.

            25 No ka mea, o ka lapuwale o ke Akua, ua oi aku ia mamua o ke akamai o kanaka; a o ka nawaliwali o ke Akua mamua o ka ikaika o kanaka.

                                                                                                                        -----.-----

            Pauku Alakai.- Aole au e kaena, aia wale no ma ke kea o ko kakou Haku Iesu Kristo.

            Kumu Noonoo.- Ke ano pohi@@@ Keritiano i ka poe hookamaa.

            Ninau ano nui. Ua hilahila ano @@@ na mea nui o ko kakou nei hoomana@@@ Keritiano?

------------------------

            MANAO WEHEWEHE.--O ka mea @@ e wehewehe aku ma keia haawina, @@@ ano o ka mana ana o kanaka i ka mai @@ ka euanelio oia ka make ana o K@@@ hoowahawaha nui kanaka i keia ao @@@ kaq meaq, ua hui pu ia me ka @@@@hewa na kanaka a pau, aole i ae @@@@ kanaka i keia, nolaila ua hoikeike lakou @@@ hoowahawaha i kela ao ana.

------------------------

            NINAU.---Heaha ka mea nui ma ka @@@ lio e ao ia nei? Pane. O ka make @@ Iesu ma ke kea. O kela olelo no @@@ heaha ia i ka poe make? Owai ka poe @@@@ halo ole i na olelo no keia mea ano @@@ poe ola hoi, heaha ia olelo ia lakou. @@@.

            19. 20. Heaha ka mea i @@@@@@@@ aha ka mea i loaa ole i ke akamai o @@@@@ kanaka? Pane. O ka mea e oia ai ke @@@@@. Owai kekahi poe naauao o ka wa @@@@@ Pane. O ka poe Helene. Owai ka maopopo ole ia ma ko lakou naauao.

            21. Ma ke aha i makemake ke A@@@ hoola ai i ka poe e manaoio ana. H@@@ lapuwale o ka haiolelo ana?

            22. E imi ana na Iudaio ike ana wa paulo? E imi ana na Helene i ke aha @@@ ka i olelo mua i na Iudaio no ka @@@@ hoailona? (Mataio 16: 1-4.)

            23. Heaha ka Paulo mea i hoa ahi @@ ai? Heaha ia ma ka manao o ka poe i @@ a me ka poe Helene? Ma ka manao @@@@ mana io no ke Akua?

            24. Heaha ka mea i oi mamua o ka @@ ao o kanaka. Heaha ka mea i oi mau @@@ ka ikaika o kanaka. Ina pela, alaila @@@ ko kakou hilinai nui.

--------------------

            O ka uhane ke ola o ke @@@@@@ manaoio ke ola o ka uhane. O K@@@@ ola o ka manaoio.

-------------

"KA NUPEPA KUOKOA,"

HOOPUKA MAU IA MA HONOLULU

I kela Poaono keia Poaono.

$2.00

No na mahina he UMIKUMAMALUA!

$1.00 no na mahina eono.

ME KA HOOKAA MUA MAI.

----------

NA OLELO HOOLAHA—aole i oi mamua o 10 laina no ka hoopuka hookahi ana, $1.00; alua komo ana, he $1.50; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai.

KANIKAU—he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi—penei: he 25 lalani, $1.00; 50 lalani, $2.00; a pela'ku.

NA UKU NO NA OLELO HOOLAHA—ka uku pepa, a me ka uku o ke Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.

O NA UKU PEPA A PAU E HOOKAA MUA MAI NO—aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.

AIA KE KEENA O KA NUPEPA KUOKOA—ma ke kihi hema o ka Hale Hookipa Luina (Sailor's Home.) O na hora hana, ma ka eiwa o kakahiaka, a i ka ha o ke ahiahi.

H.M. WINI. (Luna Hoopuka.)

 

KA "NUPEPA KUOKOA."

Is published in Honolulu

EVERY SATURDAY,

$2.00 per annum, or $1.00 per six

months, in advance.

ADVERTISEMENTS not exceeding 10 lines, inserted once for $1.00; twice or $1.50; and $2.00 for one month; all advertisements must be paid for in advance.

KANIKAUS will be charged 1.00 per page, or 4 cts. a line. PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.

ALL SUBSCRIPTIONS must be PREPAID. No names, either of foreigners or natives, will be inserted on the subscription list, until paid for. This rule must be strictly adhered to, on account of the low subscription price.

THE OFFICE OF THE KUOKOA is in the South corner of the Sailors' Home. Office hours from 9 A.M. to 4 P.M.

L.H. GULICK.

For the Publisher.

Volume I, II, and III of the KUOKOA, bound, for sale, $3.50 each.

Persons having complete sets of the above, can have them bound by paying $2.00 each.

-----------------------------------------------------------------------------------------------------

Na Buke i Pai ia e ka Papa Hawaii 
 Eia na buke kuai, a me ke kumukuai.

Baibala nui no na Awai o na Halepule,                                  $4 00

" Ohana, ano nui, me na kii,                                       2 50

a me na Moohana,                                                      5 00

" Ohana uuku iho, me na Moohana, ili ulaula,            1 00

" Ohana, me na Moohana wale no,                             62 1/2

" Okoa,                                                                       50

Kauoha Kahiko, i paiia i ka M. H. 1838,                    25

Kauoha Hou, me ka pepa lahilahi o waho,                 12 1/2

Kauoha Hou, hapa haole (Haw. Eng.)                       25

Haiao,                                                                                     25

Hele Malihini Ana,                                                     25

Wehewehehala,                                                          25

Lira Hawaii,                                                                25

No ko ke Akua Ano,                                                  25

Lira Kamalii,                                                               25

Kumumua Hou,                                                          12 1/2

Moolelo Ekalesia,                                                       50

Hoike Palapala Hemolele,                                          25

Himeni Hawaii me na Leo Mele, 1834,                      25

Ninauhoike,                                                                12 1/2

Ui Kamalii no na Kula Sabati                                                 12 1/2

Kumu Leomele                                                           12 1/2

Haawina Kamalii, Buke 1, a me 2,                             12 1/2

Haawina Kamalii, Buke elua i huiia,                          25

Eia na buke i haawi wale ia.

Haawina Baibala.

Ui.

No ka Aoao Pope.

Hoike Pope.

Palapala Liilii Helu 4

Helu 4-Makemake anei oe i ke ola?

Helu 6-E hele i o Kristo la.

Helu 7-Ka hoi ana mai o ke Keiki Uhauha

Helu 11-No ka hoohiki wahahee i ke Akua,

Helu 16-Ka Eehia ana o ka Ahaaina a ka Haku a me ka Papekiko ana.

Helu 17-Mai hana ino i na Holoholona.

Helu 18-No ka mahi ana, kuai ana, a me ka inu ana i ka Awa.

 

Ka Davida Malo Kumumanao,

Ka Moolelo o Batimea Puaaiki.

J.F. POKUE.

Kakauolelo o ka Papa Hooko o ka Ahahui Euanelio o ko Hawaii Pae Aina.