Ka Nupepa Kuokoa, Volume X, Number 45, 11 November 1871 — Ka Ili ana o ka moku "Kate Lee." [ARTICLE]

Ka Ili ana o ka moku "Kate Lee."

Ma ka auina la o ka Poaha, oia ka la 2 o Novemaba, ua ili iho la ka moku kuna Kate Lee ma ke kapa kahakai o Kalaoa, Onomea. Ua hoopuku mai oia mai Onomea mai. e hoi ana i Hilo ; iaia i puka mai ai, he makani ikaika makai mai, aole hemo pono ka moku iwaho. Hooikaika ke kapena i puka iwaho aole nae he hiki, ua nee ka moku iloko o ke awa kahi a ka nalu e poi ana, ua huki aku la ka nalu iluna o ka pahoehoe, a pupuhi aku la i kumupali.

Ua pau ka pono a ke kapena, hoi luuluu i ke one o Hanakahi.

Nui na kanaka i hele mai e kokua i kona mau ukana. I ka hiki ana o makou i kahi i ili ai, e kapakahi manuhia mai ana na kia i kumupali. Kupu mai ka minamina me ke aloha i ka moku.

O keia ka moku nana e hoopomaikai ia Hilo nei, iloko o ke au i kaa hope iho nei. O keia moku, he moku holo loa kohu Kilauea no, hikiwawe na ohua, na ukana, na leta a me na nupepa, Minamina wale ! Ke kono ia mai nei ko'u puuwai e uwe pu aku me na ona moku. J. H. Hikuikapua. Puepaku, Hilo, Novemaba 6, 1871.