Ka Nupepa Kuokoa, Volume X, Number 45, 11 November 1871 — Page 4
| This text was transcribed by: | Rochelle |
| This work is dedicated to: | My Mom, Malia B Solomon |
Ka Nupepa Kuokoa
KE KILOHANA POOKELA NO KA LAHUI HAWAII.
No ka La Kuokoa
Leo-Father Land, Happy Hours, p. 134
1 Ke Akua Mana e,
Hoola mai
Ko makou aina nei,
Aina makai;-
Hoomalu pono no;
Na ino, e hoopau,
Hoomaikai mai.
CHO- E mau ka aina nei
A kuokoa;
E mau ka aina nei,
Mau, mau loa.
Mau no na kahawai,
Mau no na pua laelae,
Mau no ke aloha e,
Mau, mau loa.
2 Paa kou aupuni nei,
Paa no a mau;
Kou noho alii maikai,
Paa loa no.
Kuko oa aina e
Kou aina, kou makai,
E kuokoa nae,
Mau no kakou.
CHO-E mau ka aina nei, &c
3 Holo na pono ou
Ke kau na ao,
Holo a nani no,
Nani a mau.
Nou mai na ino e,
Paa nae ke aupuni nei,
Olino a laelae,
Laelae mau no.
CHO-E mau ka aina nei, &c.
No ka La Kuokoa
Kokoke ka la e hoomanao ai Hawaii i kona kuokoa ana; oia hoi ka la 28 o Novemaba.
He wahi manao paipai pokole ko’u no ia la. Mai hoolilo ia la i mea ole,i mea lapuwale, i mea lealea, heihei lio wale iho no.
Ua makemake ke aupuni e malama ponoia ia la. He la kulaia, he la hauoli, he la hoomaha-he la hookuu o na haku i ko lakou poe paahana- he la e paniia’i na puka o na hale aupuni, hale kula, hale hookolokolo, hale ohi dala auhau. He la hoomaikai i ke Akua no kona kokua, a haawi mai, a hoomau i na pono o ke kuokoa ana o ke aupuni.
A, ua makemake no kekahi poe e hana pela, e hooko i ka makemake o ke aupuni.
Makemake no kekahi poe e akoakoa iloko o na luakini, e hana i kekahi mau hana, e hai i na manao, e mele i na mele e kupono ana i ka la kuokoa
Aka, o kekahi poe, aole pela ko lakou makemake-he poe keakea i keia mau hana-he poe manao ole, hoowahawaha i ka la kuokoa-he mau luna aupuni no-aole lakou pani i na puka o na hale aupuni-wehe no-hana no-keakea i ka poe makemake e hele i ka luakini-kii aku e hele mai e hookaa i ke dala auhau-aole hele na luna aupuni, (luna haole) i na halawai maikai ma ia la-ua hele paha kekahi hapa-aka-ma ko’u ike maka ana-aole hele na luna haole ma ke kau wahi- me na haole a pau-ko lakou makemake, ka lilo ana i ka lealea-i ka heihei lio-i ke kukini wawae-i ka walaau wale iho no.
Kainoa, he poe alakai pono lakou i na kanaka maoli e ao, e kuhikuhi i ke ano pono o ka malama i ka la kuokoa.
Eia ka, he poe hoolalau lakou i na kanaka. E aho, e hoopauia keia la kulaia-o lilo na hana pono ole ma ia la, i mea e ukiuki ai ke Akua a hoohiki oia iloko o kona huhu, e hoopau i ke Kuokoa ana o ke Aupuni, a e hoihoi ia malalo iho o ka auamo o ka wa kahiko.
I ole nae e hana ke Akua pela, e ala ka poe aloha aina a e malama pono i keia la kuokoa, e hiki mai ana. Na’u ALOHA AINA.
No ka La Kuokoa
Leo-Rally round the flag, Happy Hours, p 62.
1 E kupuni i ka hae, boys,
Kapuni i ka hae;
La Kuokoa nei, e oli;
Hui, mai na awawa uli,
A, mai na kula mai;
La Kuokoa nei, e oli.
CHO-Hawaii mau loa,
Huro boys, huro;-
Holo na kipi,
Ola ke ‘Lii,
A, kupuni i ka hae boys,
Puni i ka hae;
La Kuokoa nei, e oli.
2 E hoolohe i ka leo
I hea e hele mai;
La Kuoloa nei, e oli;
E hoopiha i ka aina
I kamalii maikai;-
La Kuokoa nei, e oli.
CHO-Hawaii mau loa, &c.
3 Hui mai ma keia aha,
Ka poe aloha e;
La kuokoa nei, e oli;
Hui maina ilihune
A me ka poe waiwai,
La Kuokoa nei, e oli.
CHO-Hawaii mau loa, &C.
4 E hauoli ko ka Hema,
Hauoli ko ka Akau
La Kuokoa nei, e oli;
Pau, e pau na hana ino,
E mau ka pomaikai;
La Kuokoa nei, e oli.
CHO-Hawaii mau loa &c. Hawaii.
He leo kahea!!
Ina haumana ma ke Kula Nui ma Lahainaluna, ma ke Kula Kahuna ma Wailuku, ma na Kula Kaikamahine ma Kawaiahao, ma Waialua, ma Makawao, a, ina kahu ekalesia, i na Haiolelo, a me ka poe e ae nona ka pili ana o ka leo kahea; Aloha-oukou.
Ua paa ka hale, ua maikai, ua hoolako makaiia-he mau ona no, a he mau kahu nana e malama; eia nae ka hemahema, aohe ohua. He mau ohua no mamua-ua laweia’ku nae, a hoonohoia ma kahi e, a nele ka hale i ka ohua ole i keia wa.
Ua loaa ke aina mahi, he aina nui a palahalaha, he aina maikai hoi e hoohua ana i na haa maikai he nui wale ke mahi ia-pela ma ka nana manaoio aku;-aka, eia ka hemahema, aohe poe mahiai. He poe mahiai no ma kekahi hapa, a ma kekahi hapa, aole-e waihe neoneo ana no a nahelehele loa. Ua paa pu wale i na mea ino. No ke Akua no ka aina mamua; aka, ua lilo i ka diabolo.
Owai ua hale nei? Ke pane mai nei paha kekahi, o ka moku Misionari, o Hoku Ao. Oia no; ua koho pono oe. O ka Hoku Ao mua, ua ili ia, ua pau i ka nahaha. Nui ka uwe a me ke kanikau ana no kona poho ana. Aloha ino Maikonisia, me Nuuhiva! Aohe moku nana e lawe i na Misionari hou ilaila.
Ua ale hou no nae ka moku. Ua paa, ua maikai, ua hoolakoia i na mea e pono ai na ohua. Ua holo aku no ia i Maikonisia, me ka hapa nae o na ohua. Ua kaheaia mamua-ua imi ia- ua huliia, mai Hawaii a Niihau.
Ua loaa kekahi hapa o ka poe i makemakeia, he hapalua paha ka i loaa, a koe kekahi hapalua. Aole piha ke hale, aole piha ka papaaina-ua waiho wale ia ka hapanui o ka moku, o ka papaaina, o na noho.
Poho ea ke dala i lilo i ka hana hou ana ia Hoku Ao a nui, a maikai, a lako-poho ke dala i lilo i ka hookele ana i ka moku; no ka mea, ua like pu ke dala i lilo no ka hookele ana i na ohua he10, me ka dala i lilo no ka hookele ana i na ohua he20. Ma ka malama paha ka uku ana.
A, pehea? e kuaiia’ku anei ka moku i na haole no ka nele, a no ka hapa o na ohua? Ina pela, akaaka henehene mai paha na enemi, a olioli loa ka diabolo no kona manao e paa mau ana ka aina ia ia.
A, o ke kaulana o ko Hawaii mau ekalesia no ka hoouna ana i na misionari i na aina Pegana, e lilo paha ia i kuhihewa.
Pehea e hiki ai ke pale aku i keia mau mea? Eia ke mea e hiki ai; o ke ala mai a hoopiha i ka moku Hoku Ao, i na ohua.
Oia keia leo kahea ia oukou, ka poe i kakauia maluna iho. Aia ka moku ma Maikonisia i keia wa. I loko o Novemaba, Dekemaba paha, e hei mai ana, ke malama ponoia. A e hoomaha ana he mau pule paha, alaila e holo, ana ia i Nuuhiwa. A ke makemake nei ka Papa Hawaii e loaa kekahi mau ohua, elua kane, elua wahine, e holo pu aku e noho ma ia pae aina, e ao i kela poe naaupo. hoomanakii, ai kanaka. He pumea uhane nae; ua make Iesu no lakou; a ua kauoha oia i kana mau haumana e hele, e ao, e hoohuli, e hoola ia lakou.
He poe hoolohe no kekahi hapa o lakou, ua huli ma ka pono-ua haalele i ka hoomanakii, i ka ai kanaka, i ke kaua- ua lilo i poe haumana na lesu, ma ka hooikaika ana o na Misionari mua, o Rev J Kekela ma. Ua akaka ko lakou ano, he ano kanaka no, he ano kupono nae kekahi mau aina olaila, i ka Misionari ole. Ke kahea mai la nae i mau Misionari, e hele aku, e ao aku, e hoonaauao, e hoola. E loaa ana paha keia mau ohua eha iloko o keia mau pule, noloko mai o Lahainaluna, o Wailuku, na kane; no loko mai o Waialua, Makawao, Kawaiahao, na wahine paha; no loko mai o hea? o ka poe e haliu ana ke pepeiao i keia leo kahea, e pane oukou i ka Papa Hawaii; e wiki, aohe manawa i koe. E ala, e hoomakaukau i na mea e pono ai. Ina he mau mea i mareia, ua like ka manao o ke kane, o ka wahine, ua pono ia;-ina he mau mea i mare ole ia-e hoopalau e mare ia. E hoolakoia ke kino i na mea e pono ai-mai hele hemahema aku, me ka lole ole, koi lipi ole, pahi ole, o-o ole, &c., &c.
E hoolakoia ka uhane i ka naauao, i ka manaoio, i ka manaolana, i ke aloha makau ole, i ke ahonui, i ka hoomanawanui, i ka haahaa, i ke akahai, i ka ikaika, i ke kupaa a mau. E hoopihaia i ka Uhane Hemolele.
No Fatuhiva ma keia leo kahea, no ke kokoke loa o ka manawa.
I mea kokua i ke ala ana mai e hoomanao, ua kokoke no keia pae aina-aole loihi loa aku-aia no lakou ma ka Hema-ekolu, eha paha pule, a ku ka moku ilaila. A, o ka lakou olelo, ane like loa ia me ko Hawaii nei-aole pohihihi, aole paakiki-e hikiwawe no ka loaa.
Aole hoi i ai ia na kanaka Hawaii. Aole i kalua a ai ia kekahi misionari no Hawaii aku. Mai makau oukon o kaluaia oukou ke hele aku ilaila.
Na ke Akua oukou e malama, a e hoopakele e like me kona malama, a hoopakele ana ia Kauwealoha ma. Aole i pau.
No ka La Kuokoa.
Leo.-A Victory, Happy Hours. P 144.
1 Ke kani nei na pahu e,
Ma keia la maikai;
E ala mai a oli ae,
La Kuokoa nei.
Ke kani nei na mele e
Mauka, a makai;
Maanei, ma o, a ma na puu,
Nani ke kani mai.
Cho-Hooho pu na kini nei,
Huza, huza, e oli e,
Huza, huza, huza, e oli e,
Huza, huza, huza, e oli e.
2 E oli e na kamalii,
Ma keia la maikai;
Aloha e i ka Moi,
Aloha na pokii;
Aloha na makua e,
I ko ke ao Alii,
Na ia la i haawi mai
Ke Kuokoa nei.
Cho-Hooho pu na kini nei, &c.,
3 Ua mau na hana a kakau,
Ka maluhia e,
Na hana no ka naauao,
A no na kino nei;
Ua paleia na kaua o,
A me na hakaka,
Na home me na kihapai,
Ua mau a oni paa.
Cho-Hooho pu na kini nei, &c., Hawaii
No ka La Kuokoa
Leo-Few Days. Golden Wreath, p 214.
1 La Kuokoa no kakou,
E oli pu;
E kuokoa mau a mau;
Hoomaikai no.
Ka Moi, me na luna e,
E oli pu;
Na kanaka a me na’lii,
Hoomaikai no.
Cho-E pale i na ino;
Huro, huro;
Hoonani i na kino;
Malu no a mau,
Pua a kau ka Hae Hawaii,
Huro, huro;
Paa a kau ka Hae Hawaii,
Pai no, pai no.
2 Nana ke ao, mahalo no;
E oli pu;
Kaulana no ka naauao;
Hoomaikai no;
Hawaii nei, Hawaii hou,
Huro, huro;
Mahuahua mau a mau,
Pai no, pai no.
Cho- E pale i na ino, &c.,
3 E ko ka Hema, ko ka Akau,
E oli pu;
Mai Waiohinu a Niihau,
Hoomaikai no.
Eleu, eleu, a paio no;-
Huro, huro,
I kuokoa no a mau;
Pai no, pai no.
Cho-E pale i na ino, &c.,
4 Hooho oli e na puu,
Huro, huro,
Na kula ma na awawa no,
Pai no, pai no;-
E mau na pono o kakou,
Huro, huro;
Na’lii, na makainana pu,
Pai no, pai no.
Cho-E pale i na ino, &c., Hawaii
No ka La Kuokoa.
Leo-The Charge Happy Hours, p 140.
1
Ke kani na bele a o ma na puu;
Ala, ala a nauwe pu mai la;
Hui mai na keiki, na kanaka hou,
Me ka oli hauoli pu ae la.
O ke kani, ke kani ma o ma na puu, na puu a papu,
A, ma o ma na mauna oo, oo, oo, a o hou;
O ke kani, ke kani ma o, ma na puu, na puu a pahu,
A, ma o ma na mauna oo,oo,oo a o hou;
A hooho na leo, a oli pu no,
Oli pu me ka nauwe o ka ahahai hou;
A hooho na leo, a oli pu no,
Oli pu me ka nauwe o ka ahahui hou.
A mau, mau, mau, mau, mau, ka nauwe ae;
Kau ka hae a wewelo ae;
Kau ka hae a wewelo ae
Ma ke ao olino mai.
A mau, mau, mau, mau, mau, ka nauwe ae;
Kau ka hae a wewelo ae;
Kau ka hae a wewelo ae
Ma ke ao olino mai.
2
E akoakoa na kanaka hou
Ma ke kani ana’e o na bele,
Mai na puu, mai na kula, mai o, a mai o,
Holo mai me na manu lelele.
Ala pu, wiki mai, wiki mai me ka oli, ke oli pu no,
A oo, ma na puu ka huro, huro, huro, a huro;
Ala pu, wiki mai, wiki mai me ka oli, ka oli pu no,
A oo ma na puu ka huro, huro, huro, a huro.
Nee mai kamalii me na kanaka hou,
Na makua no oonei e hui oli pu;
Nee mai kamalii me na kanaka hou,
Na makua no oonei e hui oli pu;
A mau, mau, mau, mau, mau ka oli pu,
Oli pu a e nauwe mai,
Oli pu a e nauwe mai,
Nauwe me ka halelu;
A mau, mau, mau, mau, mau ke oli pu,
Oli pu a e nauwe mai,
Oli pu a e nauwe mai,
Nauwe me ka halelu. HAWAII.
Ka ka Baibala ao ana no na mea ona.
1. Heaha ka ka Baibala i olelo ai no ka waina?
Sol. 20:1. He mea henehene ka waina. he walaau nui hoi ka mea e ona’i; O na mea a pau i puni malaila, aole I naauao.
2. He auwe anei e kau ana maluna o ka poe inu i ka me ka waina?
Is. 5:11-22. Auwe ka poe e ala ana i kakahiaka nui, e inu i ka mea, awawa, a kakali hou a molehulehu, i wela ai lakou i ka waina!
Auwe ka poe ikaika i ka inu waina, a me na kanaka ikaika i ke kawili i wai awawa e inu ai!
3. Heaha ka i kakauia no na mea ona ma Eperaima?
Is 28:1-3. Auwe ka lei hookiekie o na mea ona ma Eperaima, ka pua mae wale o kona nani maikai, ka mea ma ke poo o ka papu momona, o na mea i ona i ka waina!
Aia hoi, ka mea ikaika, ka mea i hooikaikaia e ka Haku, nana no e hoohiolo ia lakou ilalo i ka lepo me kona lima, e like me ka huahekili e haule ana, e like hoi me ka ino nui e make ai, a me ka wai kahe he nui e holo moku ana.
Malalo o na wawae e hahiia’i na lei hookiekie o na mea ona ma Eperaina.
4. No keaha i kau ai keia auwe maluna o lakou?
Is 28:7. Ua kunewanewa lakou nei, no ka waina, ua hikaka lakou no ka inu awawa, ua kunewanewa ke kahunapule, a me ke kaula no ka inu awaawa, ua oki loa lakou i ka waina, ua hakaka lakou no ka inu awawa; ua kunewanewa lakou ma ka hihio; ua kulanalana ko lakou hooponopono ana.
5. Heaha ka i kakauia no ka inu ana o na lii i ka waina?
Sol. 31:4, 5. Aole na na’lii e Lemuela e, aole na na’lii e inu i ka waina, aole hoi na ka poe aialo e inu i ka mea ikaika.
O inu lakou a hoopoina i ke kanawai; a kapae i ka pono o ka poe pilikia.
6. Heaha ka palapala hooweliweli i kakauia no kekahi alii i inu i ka waina a ona? Dan.5:1,4,5,25-28. Hana iho la o Belehazara ke alii i ahaaina nui no kona poe alii hookahi tausani, a inu oia i ka waina imua o ua tausani la.
Inu iho la lakou i ka waina, a hoomaikai lakou i na akua o ke gula, o ke dala, o ke keleawe, o ka hao, o ka laau, a o ka pohaku.
Ia hora no, puka mai ia na manamana lima kanaka, a kakau iho la maluna ae o ka ipukukui ma ka puna o ka paia o ko ke alii hale; a ike aku la ke alii i ka hapa o ka lima e kakau ana.
Eia ka palapala i kakauia: Mene, mene, Tekela, Uparesina,
Eia ke ano o ia mea: Mene; ua helu mai ke Akua i kou aupuni ana, a ua hoopau ia hoi.
Tekela: ua kaupaona ia oe ma ka mea kaupaona, a ua ikeia kou mama ana.
Perese: ua mahele ia kou aupuni, a ua haawiia’ku, no ka poe Media n me ka poe Peresia.
7. Heaha ka olelo i kakauia no ka inu waina ana o na kahuna?
Oihanak. 10:8,9. A olelo mai la o Iehova ia Aarona, i mai la, Mai inu i ka waina a me ka mea ona, o oe a me kau mau keiki me oe, i ka wa e nele ai oukou iloko o ka hale lelewa o ke anaina, o make oukou: he kanawai mau no ia i na hanauna o oukou.
8 Heaha ke kanawai kahiko no ka Nazareta?
Nahelu 6:3,4. E hookaawale ia ia iho i ka waina, a me ka mea ona, aole ia e inu i ka vinega o ka waina, aole hoi i ka vinega o ka mea ona, aole hoi ia e inu i ka wai i kohu i na hua-waina, aole hoi ia e ai i na huawaina maka, aole hoi i na huawaina maloo.
Ina la a pau o kona kaawale ana no Iehova, aole ia e ai i kekahi mea no ke kamuwaina, aole i na anoano, aole hoi i ka ili.
9. Pehea i hanaia’i ka waina ma na mohai kahiko?
Nahelu 28:7. A o ka mohai inu o ia mea, he hapaha o ka hina no kekahi keiki hipa; ma kahi hoano kau e ninini iho ai i ka waina no Iehova i mohai inu.
10. Heaha ka hoopai ana i na keiki hookuli, a lilo i ka ona?
Kanawailua 21:20, 21. A e olelo aku i na lunakahiko o kona kulanakauhale, Ua hewa, a ua paakiki keia keiki a maua, aole ia i hoolohe i ko maua leo, ua pakela ai a ua ona.
11. O ka inu waina a me ka mea ona, he mea anei ia e waiwai ai?
Sol. 21:17. O ka mea makemake i ka lealea, e ilihune auanei ia, o ka mea makemake i ka waina a me ka aila, aole ia e waiwai.
Sol, 23: 20, 21. Mai noho pu oe me ka poe inu waina; me ka poe hoopalupalu i ko lakou kino iho.
No ka mea, o ka mea ona a me ka mea pakela ai e ilihune auanei oia; a no ka palaualelo e komo kekahi i na weluwelu.
12. Heaha ka olelo ao ma ke Kauoha Hou?
Luka 21:34 E malama hoi oukou ia oukou ia iho, o kaumaha auanei ko oukou mau naau i ka uhauha ana, a me ka ona ana, a me ka manao ana ma keia ao, o kau mai hoi ua la la maluna iho o oukou, me ka manao ole ia’ku.
13. Heaha na hope o ka inu ana i na mea ona?
Sol 23:29, 30. Ia wai la ka uwe ana? Ia wai la ka poino? Ia wai la ka hakaka?? Ia wai la ka nuku wale ana? Ia wai la na palapu loaa wale? Ia wai la na maka ulaula?
I ka poe e hoomau ana ma ka waina, i poe e hele ana e imi i ka waina i kawiliia.
14. Pehea e pakele ai ia mau hope?
Sol. 23: 31. 32. Mai nana oe i ka waina i kona ulaula ana, i kona aleale ana ma ke kiaha, i kona hu ana a maikai.
Mahope iho, e noho mai me he nahesa la, a e pa mai me he moonihoawa la.
15. Heaha ke ao ana no ka aluna pu me ka poe ona?
1 Kor. 5:11, Ke palapala aku nei au ia oukou, ina i kapa ia aku kekahi, he hoahanau, a ua moekolohe ia,a ua makee, a ua hoomanakii, a ua ahiahi, a ua ona, ua alunu; mai hoolauna aku oukou, aole hoi e ai pu me ka poe i hana pele.
16. Ola anei ka poe ona?
1 Kor. 6:10. Aole ka poe aihue, aole ka poe makee, aole ka poe ona, aole ka poe akiaki, aole ka poe alunu, aole e loaa ia lakou ke aupuni o ke Akua.
17. Heaha ka olelo hooweliweli i ka mea hoohainu i kona hoalauna i ka mea e ona ai?
Hab. 2:15. Auwe ka mea hoohainu i kona hoalauma, a e ninini i kou mea e wela ai ia ia, i ona oia, i nana aku ai oe i ko lakou olohelohe!
18. Owai ka mea mua i ona i ona ka waina i kakauia ma ka Baibala?
Kin. 9: 20,21. Hoomaka iho la o Noa e mahiai, a kanu iho la ia i ka malawaina.
Inu iho la ia i ka waina, a ona, a ua uhi ole ia oia i ke kapa maloko o kona halelewa.
19. Owai ka i hoohiki no kona manao iho no, aole oia e inu i ka waina?
Dan. 1:8. Ua paa ko Daniela manao aole e hoohaumia ia ia iho ma ka ai a ke alii, a me ka waina ana i inu ia: a noi aku la oia i ka luna o ka poe i poa ia i hoohaumia ole oia ia ia iho malaila.
20. Heaha ka hope o keia hoohiki a hooko ana?
Dan. 1:15-20. Aia ka hope o ua mau la la he umi, ua ikeia ko lakou mau maka, ua maikai, ua momona ka io mamua o ko na kamalii a pau i ai i ka ai a ke alii.
Ma na mea naauao a pau loa, a me na mea e akamai ai a ke alii i imi ai ia lakou, ua maopopo ia, ua oi pa umi aku ka lakou naauao mamua o na magoi a pau, a me na kilo ma kona aupuni a pau.
21. I nahea i hookumuia’i ka puali inuwai mua i kakauia ma ka Baibala?
Ier. 35:6,7,8. Alaila, olelo mai la lakou, aole makou e inu i ka waina; no ka mea, kauoha mai la o Ionadaba ke keiki a Rekaba ko makou kupuna ia makou, i mai la, mai inu oukou i ka waina, o oukou, a me ka oukou poe keiki, a i ka manawa pau ole.
Mai kukulu hale hoi oukou, mai lulu hua, mai kanu pawaina, aole na oukou ia; aka, i ko oukou mau la a pau, e noho oukou ma na halelewa, i nui na la o ko oukou ola ana ma ka aina a oukou i noho malihini ai.
Pela makou i hoolohe ai i ka leo o Ionadaba, ke keiki a Rekaba, ko makou kupunakane ma na mea a pau ana i kauoha mai ai ia makou, e inu ole i ka waina i ko makou mau la a pau, o makou a me ka makou poe wahine, a me ka makou poe keikikane a me ka makou poe kaikamahine.
22. Heaha ka olelo hoopomaikai i hoopukaia no keia puali inuwai?
Ier. 35: 18, 19. Olelo ae la o Ieremia i ko ka hale o ka Rekaba, ke olelo mai nei o Iehova o na Kaua, ke Akua o ka Iseraela, penei; no ka mea, ua hoolohe oukou i ke kauoha a Ionadaba, ko oukou kupunakane, a malama hoi i kona mau kanawai, a ua hana e like me na mea a pau ana i kauoha mai ai ia oukou.
Nolaila, ke olelo mai nei o Iehova o na Kaua ke Akua o ka Isaraela, aole e nele o Ionadaba, ke keiki a Rekaba, i ke kanaka e ku imua o’u, a hiki i ka manawa pau ole.
23. Heaha ka Petero olelo no ka waina?
Epeso 5:18. Mai noho oukou a ona i ka waina, nolaila mai ka uhauha; aka, e hoopihaia oukou i ka Uhane.
Halelu 1
Elua mahele ma keia Halelu.
I. O ka pomaikai o ka poe pono. Pauku 1-3.
Elua mea e akaka’i keia pomaikai.
(1) O ko lakou ano. (Pauku 1-2)
(a) Aole lakou i hele ma ka aoia o ka poe aia,
Aole hoi i ku ma ka aoao o ka poe hewa,
Aole no hoi i noho ma ka noho o ka poe haakei.
(e) He olioli nae lakou ma ke kanawai o Iehova,
A ma ia kanawai lakou i noonoo ai i na manawa a pau.
(2) O ko lakou hua. (Pauku 3)
(a) Me ka momona o ka hua laau i kanuia ma na kahawai, pela ka nui a me ka maikai o ka lakou hana.
II O ka poino o ka poe pono ole. Pauku 4-6.
(1) Ua like lakou me ka opala i puehu i ka makani, (Pauku 4).
(2) Aole e hoapono ia ai lakou ma ka hookolokolo ana,
Aole hoi i noho pu mai me ka poe pono mahope iho o ka hookolokolo ana. (Pauku 5).
(3) O ko lakou hope nae la make mau loa ia. (Pauku 6).
Pehea la, E ka poe heluhelu? He poe aha kakou? He poe pono anei? He poe hewa paha? Ua helu ia kakou i hea? Iwaena o ka poe haipule io anei? Iwaena o ka poe hoomaloka paha?
Ke loaa mai nei anei oukou i ka pomaikai o ka poe ma ko ke Akua aoao? Ke kali nei paha oukou i ka hope o ka poe kue iaia? Auwe!
O ka aoao o ka poe hewa, e make ana no ia.
Aloha Kamaiii.
He wahi hapa no ka Leta o Miss Seymour.
Ma kekahi kauhale Tureke, he mau hoole pope e noho ana ilaila, Ua heluhelu kekahi wahine i ka moolelo o Samuela i kekahi poe kamalii. Komo mai kekahi kaikamahine Armenia, eiwa kona mau makahikil akahi no a lohe oia i kekahi moolelo noloko o ka Baibala. Ua imi koke oia a loaa he wahi palapala. (Primer.) Ua heluhelu ia ia, a hoomaopopo i kona ano; alaila, makemake oia e kuai i Baibala. Hoole mai kona makuakane, e olelo ana, “Heaha kou makemake i ka Baibala?” I aku la oia, “Makemake au e ao e heluhelu, i hiki pono ia’u ke hele i ke kula o na kaikamahine ma Haroot.” I mai la ka makuakane, me ka huhu, “E hookomo ai i kou poo iloko ke ahi, mamua o kou hele ana alaila.” I aku la ke kaikamahine, “E ka makua, e hiki ia oe ke hoaa i ko’u kino wale no; no ka mea, e hele aku ko’u uhane ia Iesu la!”
I ka lohe ana o na kaikamahine ma Harpoot i keia mea, ua kokua mai lakou i kekahi mau dala, a kuai i ka Baibala a me ka Himeni, a hoouna aku iaia, me keia palapala;
“KO MAKOU KAIKAINA ILOKO }
O KRISTO, o MIRIANA: }
Ua hauoli nui makou, i ko makou lohe ana i kou moolelo. I ko makou palapala ana ia oe, ke hoike nei makou i ko makou makemake ia oe, e kupaa iloko o ke aloha o Kristo; a makemake makou e lohe hou ia oe. He nui ko makou aloha ia oe, aole nae makou i ike maka ia oe. Ke haawi aloha aku nei makou i keia Buke Hemolele ia oe; i mahuahua kou aloha ia Kristo, i kou heluhelu ana i kana olelo. Ua lohe makou, ua pilikia no oe, no kou aloha ia Iesu. Aka, e hoomanawanui iloko o keia mau popilikia, no ka mea, ma ka lani, e hauoli no oe no kou ehaeha ana no Kristo; no ka mea, oia ka mea i hoomanawanui iloko o na ehaeha loa ma ke kea, i mea e ola’i kakou. O Paulo kekahi i ehaeha nui no Kristo; aka, aole okana mai kona hauoli i keia wa. E heluhelu ,a Kormeto 11 mokuna umikumamakahi, a e ike oe i ka nui o kona mau pilikia.
Kou wau hoa aloha oiaio.
Na kaikamahine iloko o ke Kulahanai ma Harpoot.”
KA NUPEPA KUOKOA,
HOOPUKA MAU IA MA HONOLULU
Kela Poaono keia Poaono.
$2.00
No na mahina he Umikumamalua!
$1.00 no na mahina eono.
ME KA HOOKAA MUA MAI.
NA OLELO HOOLAHA- aole i oi mamua 10 laina no ka hoopuka hookahi ana, $1.00; alua komo ana, he $1.50; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai.
KANIKAU-he 4 keneta no ka lalani hookah- penei; he 25 lalani, $1.00; 50 lalani, $2.00l a pela’ku.
EA ULU NO NA OLELO HOOLAHA- ka uku pepa, a me ka uku o ke Kanikau, a haawiia no ma ka lima o na Luna o ke Kuokoa, a i oleia, e hoouna mai ia Pokue.
NA UKU PEPA A PAU E HOOKAA MUA MAI NO-aole e kauia ka inoa o kekahi haole a kanaka maoli paha, ma ke inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ke mea, he emi no ka auhau no keia nupepa.
AIA KE KEENA O KA NUPEPA KUOKOA-ma ke keena i noho mua ia iho nei e J. W. Aukina, maluna ae o ka Hale Leta. O na hora hana, mai ka eiwa o kakahiaka, a i ka ha o ke ahiahi.
H.M.WINI. Luna Hoopuku
“KA NUPEPA KUOKOA.”
Is published in Honolulu
EVERY SATURDAY.
$2.00 per annum, or $1.00 per six
months, in advance.
Advertisements not exceeding 10 lines, inserted once for $1.00 twice or $1.50; and $2.00 for one month; all advertisements must be paid for in advance.
Kanikaus will be charged 1.00 per page, or 4 cts a line.
Payments for advertisements, subscriptions or kanikaus, may be paid to any of the Agents of the Kuokoa, or may be enclosed in a letter to the Publisher.
All subscriptions must be prepaid. No names, either of foreigners or natives, will be inserted on the subscription list until paid for. This rule must be strictly adhered to on account of the low subscription price.
The office of the Kuokoa over the Post Office. Office hours from 9 A.M. to 4 P.M.
H. M. Whitney, Publisher
→ Bound Volumes of the KUOKOA, for sale at the office over the Bookstore-$3.50 each.
→ Persons having complete sets of the above, can have them bound by paying $2.00 each.
NA BUKE
HOOLAHAIA E KA PAPA HAWAII.
Baibala Hemolele Nui ili gula nani ma na kuhikuhi ma na aoao….. $12 00
“ “ Nui ili eleele kaekae wai gula………………………. 6 00
“ “ uuku iki iho “ “ “……………………….. 8 00
“ “ Pananaiki iho ili eleele “ “……………………….. 4 00
Kauoha Hou ili gula nani ma na kuhikuhi……………………….. 3 00
“ “ eleele kaekae wai gula……………………………. 1 00
“ “ “ …………. ………………… 75
Kauoha Hou Hapa Haole………………………………………….. 75
Lira Hawaii 1848 me ke kanawai…………………………………. 25
“ “ 1855…………………………………………………. 25
Moolelo Ekalesia…………………………………………………. 50
Haiao ili lahilahi…………………………………. ………………. 10
Hele Malihini ana…………………………………………………. 25
No ka ke Akua ano………………………………........................... 25
Lira Kamalii………………………………………………………. 25
Hoike Palapala Hemolele………………………………………… 25
Moolelo o Heneri Opukahaia…………………………………….. 25
Hoike Akua………………………………………………………. 25
Wehewehehala…………………………………………………… 25
Ninau Hoike ili manoaaoa……………………………………….. 25
“ “ “ lahilahi………………………………………….. 10
Kumumua Kula Sabati……………………………………………… 10
Buke Lawe Lima………………………………………………… 10
He Buke no ka Pope………………………………....................... 10
Ui Kula Sabati Hela 3…………………………………………… 25
“ “ “ “ 4…………………………………………… 05
“ “ “ “ 5……………………………………………. 25
Buke Euanelio & Ioane………………………………………….. 10
Himeni…………………………………………………………… 50
Himeni ili nani…………………………………………………… 1 00
Na Kauoha Hou Pakeke.
Ili Gula nani……………………………………………………… 1 50
Ili eleele kaekae nani…………………………………………….. 50
Ili eleele…………………………………………………………. 35
Kauoha Hou Pakeke me na Halelu.
Ili Gula nani………………………………………………………. 1 75
Ili eleele kaekae wai gula…………………………………………. 60
Ili eleele…………………………………………………………… 50
Na Halelu Pakeke.
Ili Gula nani………………………………………………………. 50
Ili eleele kaekae wai gula…………………………………………. 30
Ili eleele…………………………………………………………… 20
Ka Hae Hoonani (Buke Mele)…………………………………….. 25
Eia na buke haawi wale.
Palapala Liilii-
Helu 4-Makemake anei oe i ke ola?
Helu 6- E hele i o Kristo la.
Helu 7-Ka hoi ana mai o ke Keiki Uhaube.
Helu 11- No ka hoohiki wahahee i ke Akua.
Helu 16-Ka Eekia ana o ka Ahaaina a ka Haku a ma ka Bapetiso ana.
Helu 17- Mai hana ino i na holoholona.
Helu 18-No ka mahi ana, kuai ana a me ka iuu ana i ka Awa.
Ka Davida Malo Kumumanao.
Ka Moolelo o Batimea Puaaiki.
J. F. POKUE,
Kakauolelo o ka Papa Hooko o ka Ahahui Kuune@o o ko Hawaii Pae Aina.