Ka Nupepa Kuokoa, Volume X, Number 44, 4 Nowemapa 1871 — Page 4

Ka Nupepa Kuokoa.

 

Leo - Ye shall Shine as the stars.
Silver Song p. 53.

 

1 E alohi oukou me na hoku oluna,

Ka poe i hoohuli i na kini lalau,

A i kii olu ae i na hipa auwana,

I hoi lakou i ka pa o Iesu,

Ke kumu wai ola e kahe mau ana,

Ka pa uliuli e alakai ai,

I ke Kahu hoola, ke Kahu aloha,

A lilo lakou i mau hipa maikai.

 

2 Nauwe ae me ka puie malama pono,

A hana maalea, a akahai nae,

Me ka hoomanao ae la, he momi ka uhane,

He daimana nani ma ko Iesu lei.

Ke haliu nei na pokii i na kumu,

I lohe a ao maikai ia lakou;

A, ke ala mai nei me ke ake e huli,

A komo ano ma ka pa o Iesu.

 

3 O i wale ka uku e loaa mai ana

Mamua o ka waiwai a pau o ke ao,

Ke hoohuli oukou i na keiki hewa,

A kii i na hune i ola lakou.

E nalo e ae ko ke ao hanohano,

Ke dala, ke gula, e pau aku no ;

Koe nae ka lei nani ma o, ma ka lani,

Ka uku paa ia a mau no oukou.

 

4 A, nolaila e hana, e mau ka ikaika,

Mai emi i hope, a luana e ;

Lulu mai i na hua, e ao i na keiki ;

Mahope e kupu, a hua maikai ;

Mamuli kii mai la ka Haku e ohi ;

Mamuli e oki na la hana nei ; -

Hana mau oi kau la ka lama maluna ;

He hana a hiki ka wa e maha'i.

 

5 Hana mau, hana mau oi mau ka manawa ;

Ke pau la na hora pokole oonei ;

Koe nae ka manawa, na kau hope ole,

Me ona mau hana maikai oi ae.

Hamau ! ke lohea he leo kahea,

Ua pau koonei hana, e pii i ke ao,

A, alohi oukou me na hoku oluna,

Ka poe i hoohuli i na kini lalau.

HAWAII.

 

O Hoole i ka hanai kahu.

 

HELU 2.

 

            A, ma kekahi ahiahi mahope iho, hui hou Ioane ka diakona me Davida ka mea hoole i ka hanai kahu ; - Aloha oe, e Davida.  Aloha paha kaua.  Heaha kau e hoohalahala nei no na keiki a ko kakou kahu ?

            Ka, eia ka mua ; ua ike pinepine nu i kekahi mau keiki ana, e paani wale ana, he panapana pua, he kinikini hua, he kini popo, he hoolele lupe, a, loaa ole ia'u ka inoa o kekahi paani, he inoa haole, me he hula la nae ke ano, iluna ka lima, a ilalo, a i ka akau, a i ka hema - a huli - huli, a ku, a nee aku, a nee mai, a pai na lima, a hehi na wawae, a huro, huro, huro wale lakou.

            A - eia - alia, he hewa anei keia hana, i ko manao, e Davida? hewa anei na keiki ke panai ? mau diakona anei lakou ? he mau elemakule ? he mau luahine ? He kamalii Paulo, a i kona wa kamalii, hana oia e like me ke kamalii, wahi ana.  Ke ano no ia o na kamalii a pau, ua haawiia mai ia pono ia lakou, o ka paani. Paani no na keiki a ko kakou kahu, e like me na keiki e ae, e like me kau hoi, i ka wa paani ; a, i ka wa kula, hele no i ke kula, a lilo i ka noonoo, i ka hoopaa haawina, i ke ao i na mea paakiki, a eha ke poo - a hookuuia e hele iwaho e hoomaha ma ka holoholo, ma ke kinikini hua ; a maha iho, hoi i ke kula.

            Oia - ka lua ia o ko'u kanalua - a nui iki ae na keiki a ke kahu, o ka hele no ia o na keikikane i ke kula nui ma Hilo, a ma Lahainalua - a o na kaikamahine, i ke kula kaikamahine ma Waialua, a me Makawao, a ma Kawaiahao ; a nui ke dala i lilo i ka hoonaauao ana ia lakou.  Owau hoi, he mau keiki ka'u, aole nae e hiki ke hoouna aku ia lakou i na kula nui no ke dala ole.  Pau ke dala o ke kahu i ka hoonaauao ana i kana mau keiki.  A hoi mai lakou mai na kula nui mai, he mau lede ka, na kaikamahine, keokeo a palupalu na manamana lima ; ua akamai i ka paani ma ka Melodeana, ua hawawa nae i ke kopa lole ana, a me ka holoi pa.  Ua maa i ka ai ana i ka ai haole, a hoowahawaha i ka ai maoil, he liliha, he hoopailua, he luai i ka poi ; a hookiekie maluna o ka makuahine. A, o na keikikane hoi, he mau keonimana lakou - he lua ole ka naauao, a hookiekie, a lilo na oihana aupuni ia lakou, a nele ka'u mau kieki. A, nolaila ke hoole nei au, aole au e kakau hou i mau dala no ke kahu.

            Alia - ma kau mau olelo i hoopuka mai nei, na pono loa ke hoomahuahua i ka hanai ana i ko kakou kahu.

            Ke makemake nei kakou e loaa kekahi mau lede mawaena o na kaikamahine maoli.  Aole anei ? makemake anei oe e kau ka inoa lede ma na kaikamahine  haole wale no, a nele na kaikamahine Hawaii ? He poe hanohano na lede - a lilo lakou i poe wahine na na kahuna paha, na na misionari paha, na na haole maikai paha.

            A pehea? aole anei oe i makemake e loaa ka melodiana iloko o ko kakou luakini, a lohe pinepine i kona kani oli ana ? Ae, kuu makemake nui ia, wahi a Davida. A, nawai e hookani, ke ao oleia kekahi kaikamahine ? Ina ike ke kaikamahine a ko kakou kahu i ka paani ma ka melodiana. aole anei e pomaikai ana kakou ? Ae, akahi no au i manao ma ia mea.

            A, pehea ? aole anei oe i makemake e loaa na keonimana Hawaii, i poe akamai, naauao, makaukau ke lawe i na oihana aupuni ? Mamakeke anei oe i mau luna aupuni naaupo, hawawa ? A, e pau anei na oihana aupuni i na haole no ko lakou naauao ? a nele na kanaka Hawaii no ko lakou naaupo? Aole, aole.

            A makemake anei oe, e mau ka ai poi ana me na manamana lima malalo ma ka moena ? Kainoa, o ka pono no ia, e hele i na kula nui e ao i ka ai haole maluna o na papa kaukau, i maa ke hoi mai a mare me na haole, a hele paha ma na ahaaina haole - i makaukau e lawelawe me ka pahi, a me ke o, i ole e hawawa, a akaakaia ke ai pu.

            A, o kela mau hua au, ua hawawa na kaikamahine i ke kopa lole, a i ka holoi pa, ke hoi mai lakou mai na kula nui mai, he kuhihewa ia ; oia kekahi hana i maa ai lakou malaila, o ke kopa lole, aiana lole, holoi pa, burumi hale, humuhumu.  Eia ka hewa, i ko lakou hoi ana mai i kahi o na makua, ua hemahema na makua, aohe ai haole, aole berena, aole palaoa, aole lako ka hale i na pa, na pahi, na o, ka burumi, ka lole humuhumu a holoi ai. No ka hapa o ke dala hanai kahu.

            Nolaila, ke hooikaika nei au e hoonui ae i ke dala hanai i ko kakou kahu.

            I ehia a'u dala e kakau ai nou, Davida ? I umi anei ? Alia - ane au e  ae i ka umi, i pau ko kaua hoopau manawa ma ke kamailio loihi ana.  Aka, hookahi o'u kanalua ana i koe.  Ka ! nau ka i hoopau manawa ma ke kamailio ana.  Heaha keia kumu kanalua ou i koe ?

            Eia, hoohalahala wau, aole owau wale, he poe e ae kekahi, no ke ao, a papa ikaika ke kahu i ka hana hewa.  Nana kona maka ia'u i kekahi manawa, me he la, owau ka i hewa.  Ma na la noa, hele oia, a komo iloko o kela, a o keia hale, a loaa na ipu baka, na pua pepa, na omole, na hakaka, na manuahi, ma ka ike maka kekahi, ma ka lohe pepeiao kekahi - a ao mai, a papa mai no - ua pono no ia - aka, ma ka la Sabati, ku oia ma ka awai o ka luakini, a hoopuka i na hewa ana i ike ai, a lohe pepeiao ai iloko o kana pule ; a, ma ka hai olelo ana, hoike oia i keia mau hewa imua o kanaka a pau, weliweli ka nui o ka hewa - nana pono kona maka ia'u, a ia mea, ia mea, i ka poe ana i ike ai, ana i lohe ai - he mea oe. he manuahi, he puhi baka, he inu awa, he inu rama, he kokua, a hookipa hewa oe, a pela aku. A, pehea oukou e pakele aii keahi a Gehena ?

            Kulou ke poo ilalo, hilahila, baila ka huhu iloko o ka naau.

            A pau ka halawai, ka ninau koke no ia, nawai i oiania ia'u ke kahuna ? he wahahee, he hoopunipuni, he imi hala.

            A, halawai na luna mahope, a hoopuka ke ka kahuna i na hewa ana i ike ai a, ana i lohe ai - a, hooholoia, e kapae ia lakou iwaho o ka ekalesia, me ka hookolokoloia, me ka hookolokolo ole ia paha.

            A, nolaila - u'oki, u'oki, e hoomaha kaua.

 

Ua hanau hou ia mai anei oe?

 

            Ina e hanau hou ole ia ke kanaka, aole e hiki iaia ke ike i ke Aupuni o ke Akua, wahi a ke kumu maikai, a naauao.

            Pehea la oe, e kuu hoaaloha e. Ua hanau hou ia mai nei anei oe ? Ina pela ua palekana oe, a i ole, aole.  Aole oe e ike aku ai i ke Aupuni o ke Akua.  Ke pane mai nei paha oe, ae.  Ua hanau hou ia mai nei au, no ka mea, "Ua bapetiso ia mai au.  Ke hele nei au i ka luakini ma ka la Sabati, a me na halawai liilii.  Aole haule iho la kekahi.  Kokua aku la hoi i ka Mahinahou, a me ka hani kumu.  Aole a'u hihia i ke kanawai o ke aupuni."  Maikai, ka, kau, ea.  Aohe nae he haina ia o ka ninau.  Penei ; Ua hanau hou ia mai nei anei kou naau ?  Ua loaa mai nei anei ia oe ka naau hou ? Mai pale mai i ka niele.  Mai kuhikuhi aku i kekahi mau hana maikai ; hiki i ka poe aia ke hana, no ka mea, ina i loaa ole mai ia oe ka naau hou, makehewa kau mau hana maikai a pau.  Aole he mau mea lakou e hoolaulea aku ai ia oe me ke Akua, a komo ae iloko o ka pomaikai i hoomakaukauia mai no ka poe i hoomaemaeia ka naau.  Pohihihi, ka, keia, wahi a ke kanaka Hawaii ! Pela no paha.  Pohihihi maoli no i ka poe ike ole.  Aia nae ma ka buke i haawiia mai e ke kumu nui i hoomaopopo paka ia na hoailona o k poe, nona keia ano kupaianaha.

            Ke ninau mai nei anei oe, heaha la kekahi o ia mau hoailona ? He ninau kupono keia.  A hiki ia Ioane, ka haumana i aloha nui ia e Iesu e pane aku.  Penei kana, "O ka mea i hoohanauia mai e ke Akua, aole ia e hana hewa."  1 Iaone 3: 9. 5: 18. Pau ae la na kanaka a pau i ka hana hewa.  Ae, oia no.  Aka, o kekahi poe, hana aku la lakou ka hewa me ka i ini nui ; he mea oluolu keia ia lakou.  Me ka momona o ka manago i ke keiki Hawaii, nona ka hoao ana ia keia hua haole momona, pela no ka hewa ia poe.  Aole he mea e ae a lakou i ake ai, e like me ko keia mea awaawa.  Aole pela na kanaka a pau.  O kekahi poe, hana aku la lakou i ka hewa, aole nae me ka makemake.  He nawaliwali ke kino.  Ikaika ke kuko ino ; ke ano kino iloko o lakou, a hoowalewale ia lakou, O ka ae koke aku ia mamuli o ka hoowalewale, a lilo i ka hana hewa, a liuliu iki, ike lea iho la ka awahia o ua mea ono la, a o ka haalele loa no ia me ka hoopailua.  Nolaila, eia ka ninau.  E ka makamake e.  Ke hana nei anei oe i ka hewa me ka makemake?  Ono loa anei keia hua awaawa ia oe?  O kou mea anei ia i iini ia, e like me ko ka puaa makemake i ke kio-lepo ?  Ina pela, Mai hoopunipuni oe ia oe iho.  Mai manao mai ua palekana oe.  Ke hai aloha aku nei au ia oe, Aole ou wahi kuleana, aole ou wahi lihi iki iloko o ke Aupuni o ke Akua.  Aole pili iki keia hoailona mua o ka hanau hou ia mai ia oe. Ua nele oe i ka mea hookahi e makaukau ai ke kanaka no ke komo ana iloko o ka pomaikai mau loa.  Auwe! Aole palekana.  Ke kau mai nei i ka inaina o ke Akua maluna iho ou !! He nui na hoailona e ae i hoikeia e loane, a ma keia hope aku, e ike auanei paha i ka lua o na hoailona o ka poe i hoohanau hou ia mai.

 

Rama, Gini Waina.

 

            Aia la ma ia wahi Mokuaina o Amerika Huiia, kona inoa Konekekuke, he 2,592 kanaka i hoopaahaoia i na hale paahao i ka makahiki i hala aenei.  O ka nui o lakou i inu ole i na mea ona, he 108 wale no, aka.  O ka poe i inu, aole nae ona loa, he 2,370 lakou. Hilahila maoli ka hope o ka poe i inu mau i ka rama, aole nae ona loa. Hakaka aku, hakaka mai; kue aku, kue mai ; kui aku, kui mai.  Haunaele wale. Hale paahao ka hope, a i ole ; o ka hale mai pupule.  Auwe ! Poino !!   "He mea henehene ka waina, He walaau nui hoi ka mea e ona'i, o na mea a pau i puni malaila, aole i naauao.

            Aole na na alii e inu i ka waina, Aole, hoi na ka poe aialo e inu i ka mea ikaika;

            O inu lakou a hoopoina i ke kanawai.

            Mai nana oe i ka waina i kona ulaula ana,

            I kona aleale ana ma ke kiaha,

            I kona hu a maikai.

            Mahope iho, e nahu mai me he nahesa la,

            A e p@ me he moonihoawa la"

            Kula @ Aia ma Amerika Huiia he 92 mau Ku@ Kahunapule. O ka nui o na kumu no ua mau kula la, 400 lakou.  O na haumana i aoia'ku he 4,000. Nui ka!

            Luakini Hou.  Ua paa loa iho nei ka luakini o Punaluu, Kau, Hawaii, a ua hoolaaia oia ma ke Sabati, Sept. 16 - Ua paa pono ko waho, a me ko loko.

            "Ua piha ka hale o ke Akua i ka nani o Iehova,

            E komo iloko o kona ipuka me ka mililani,

            A iloko hoi'o kona kahua me ka halelu.

             E mililani aku iaia. E hoomaikai hoi i kona inoa,

            Ma na kahua o Iehova,

            E halelu aku oukou ia Iehova."

 

Umikumamalima Makahiki ma Tureke.

 

            Eia kekahi mau manao noloko o ka moolelo o Miss West, kekahi wahine Misionari Amerika ma Tureke ; ewalu nae o keia mau makahiki, ua noho oia ma Constantinople.

            He kumu o Miss West e ao ana i na wahine e heluhelu i ka Baibala, i ike lakou i ke ola o ka uhane ma o Iesu Karisto la.

            "Kokoke pau na makahiki elua, ua hele maua Miss Dwight e ike i kekahi ohana Aremenia, e noho ana iloko o ke kulanakauhale kahiko. I ka wa mamua, he mea make i ka haole e komo iloko o kela kulanakauhale.  E kamailio ana maua i ka make ana o kekahi hoahanau.  Pane koke mai kekahi wahine me ka manao nui, penei ; "Nani ka pouli o ka luakupapau ia makou mamua.  Haalulu nui no makou i ka manao o ka make! - a hele mahea? aole mapopo ia makou.  Aka, i keia wa, aloha i ke Akua, no ka mea, ua kau mai ka malamalama maluna o ka luakupapau. Ke hoomaikai nei makou i ke Akua, no kona hoouna ana mai ia oukou na Misionari, e ao mai ia makou ma keia mea. I ka make ana o ko makou poe aloha, ua maopopo ko lakou wahi e hele aku ai - a e ike hou auanei makou ia lakou."

            A pau na makahiki ekolu, hele pu maua Mrs. Parsons, ma ia hale aku ia hale aku, e noi ana i na wahine e akoakoa ma ka hale halawai i ka auina la. He 40 ka nui o ka poe i launa mai, a kekahi o lakou, aole lohe iki i ka leo o ke ola mamua'ku.  No ka mea, he kanawai ma kela kauhale ; - "Aole pono i ka wahine e komo iloko o ka luakini, mamua o kona hoohanau mai ana i na keiki elua." Nolaila, aole launa iki kekahi poe wahine me kela poe hoomana naaupo.

            Aka, i keia wa, ua komo lakou iloko o ka luakini, a nani ko lakou hoolohe ana ; ua kulou mai, me na lehelehe hamama, a e kahe ana ka waimaka ma na papalina o na luwahine.

            A pau ka halawai, kali no lakou ; aole makemake e hoi aku - a liuliu iki, apo mai kekahi luwahine ia'u iloko o kona mau lima, e i mai ana ; - "He anela o ke Akua no oe, ua hoounaia mai oe e ao mai ia makou."  Ua ninau pinepineia no au penei ; - "Aole ou wahi makuwahine?" Pane aku la no au, "Ae, he makuwahine maikai no." Alaila, ninau hou mai lakou, "Pehea la e hiki ia ia ke ae ia oe e hele aku i ka aina e?" Pane hou aku au, "No ka mea, ua aloha oia i ko oukou mau uhane, a nui kona makemake ia oukou e hele i ka lani ; ke pule aku nei oia i ka Haku no oukou i kela la i keia la."

            Oia ka mea i hooala koke mai i ko lakou manao ; - a nana lokou kekahi i kekahi, me he mea la, "Ina manao nui mai pela kona makuwahine, pono ia kakou ke manao nui ia kakou iho."  O ko'u makuwahine, oia ke poo olelo no na haiao he nui wale i kela poe wahine naaupo.  Ninau mai lakou penei ; "E hiki anei i kou makuwahine ke heluhelu?"  Alaila, ua hai aku au ia lakou ; "O ka Baibala ka mea e hooluolu ana ia ia i kona noho ana he wahine kanemake, a puni hoi i na popilikia he nui wale." Eia kana olelo hope mai ia'u, "E kuu keiki, ina o oe ka mea e hoohuli mai i ka pegana hookahi i ke ola, oia ka mea e hooluolu mai ia'u no ko'u haawi ana ia oe i keia oihana."

            Ma ka lokomaikai o ke Akua, ua kaheaia no au e hele a noho ma Harpoot, ma ka muliwai Euperate, e kiai a hooponopono i ke kula no na makuwahine, a me na kaikamahine.  He poe wahine lakou na na kane e hoomakaukau ana e hai aku i ka olelo a ke Akua.  Maloko o keia kula, o ka Baibala ka palapala i ao nui ia ; ua komo ia iloko o kela haawina keia haawina.  Aole au ike i kekahi mea e ae e hooala i ka manao, a e paipai, a e hoomaemae i na haumana, e like me ke ao ana ia lakou i ka Palapala Hemolele.

            A kokoke mai kuu wa e haalele ia Tureke, ua hele au i kekahi kauhale, o Malatia kona inoa.  I ka la Sabati, olelo ke kahunapule i na wahine penei ; "E noho pono oukou i ko oukou mau hale i ka la apopo, (Monede) no ka mea, e hele ana ke kumu e ike ia oukou."

            A i ko'u hele ana, loaa mai ia'u he 15 - a 20 paha ma kela wahi keia wahi, e kali ana, e lohe i ka olelo o ke ola ma ko'u mau lehelehe.

            I ko'u hai ana'ku ia lakou i ka moolelo o ko Iesu make ana ma ke kea, nui ka poe i uwe waimaka ; a i ko'u hoi ana, hahai mai lakou ia'u i ka ipuka, a noi mai, penei ; "E hai hou mai i wahi mea iki."

            Nui ka poe i hoomaka ia wa e heluhelu i ka olelo a ke Akua no lakou iho.

 

He mau olelo nane no kela Lahui, a KEIA LAHUI KANAKA -

 

1 A oi ka maka, aole hiki ke okioki.

2 A nui na eke ukana, make ka hoki.

3 A nui loa na sela, poho ka moku.

4 A nui loa ka pilali, wela ka luakini.

5 A nui na kuke, mo ke kupa moa ana.

6 E ike oe ia oe iho.

7 E ku kaawale ae oe, o make au i ka uwahi.

8 Olelo ka make i ke kanaka i okiia kona puu, ino loa kou helehelena.

9 A hala ka muliwai, poina ke Akua.

10 Noho malie a make i ka wi.

11 E noho hakanu, a lilo i mea naauao.

12 Aole e hana eha mai na lima keokeo.

13 Hana ka ilio hae ma ka la noa i ka mea keakea i kona hele ana i ka halawai ma ka la Sabati.

14 Nui na luakini, liilii na haipule.

15 A hala na makahiki he hookahi hane@, paa no na niho omo o ka hoomau hala.

16 E honi i ka lima hiki ole ke nahuia.

17 A holo moku mai ka wai me he Kaiakahinalii la, e huna i kau keiki malalo iho ou.

18 E huki malie, ua palupalu ke kaula.

19 E uhi i ka ipu hao, he puhi maloko.

20 A kaulua ia na hipa elua, e poholo i ke kai.

21 He kamelo eleele ka make e kukuli ana ma ka puka o kela me keia hale.

22 Ma ke alanui o Mamuli e hiki aku ai i ka hale o Ole.

23 Hoohaumia ka peni ino i ka paona pono.

24 Hui pu na manu o ka hulu hookahi.

25 Ina makemake oe e waiwai, Ma ka hora elima e ala'i.

26 Luhi ole, waiwai ole.

27 Ka hikina, ke komohana, Ka home ke kilohana.

28 A kaa ka aie, aohe mea e makau ai.

29 Aole he gula na mea olinolino a pau.

30 E hoolei i ke kanaka hoopukapuka waiwai iloko o Nile, a e hoea mai oia me ka i-a iloko o kona waha.

            Na ka poe heluhelu e imi i ke ano o keia mau olelo nane ; a e hai mai i kekahi mau olelo nane e pili ana i ka Lahui kanaka Hawaii, e like me keia, "Mai pii i ka lapa manu ole."

Hawaii.

 

Hoike o ke Kula Sabati o Wailuku.

 

            Ma ke Sabati, Okatoba 15 1871, ua hoike hapaha ke Kula Sabati o Wailuku ma ka luakini hoolepope.  Hoomakaia ka hana me ka himeni 258, na ke kahu W. Kahookaumaha ke alakai ana, a ia ia no ka pule,  Hoomakaia ka hoike ma ka papa akahi, oia ka papa "Hae Hawaii" o Mrs. Ekeka ke kumu.  He himeni ka hana mua a keia papa, oia ka himeni 185, Haawina Baibala ma Mareko 4:14.  Himeni hope, himeni 70.  Papa alua, oia ka papa "Sinai," Mrs, Mahiki ke kumu, ka lakou himeni mua, himeni 88, Haawina Baibala, Mat. 7: 1, Hoik. 9: 2, himeni hope 187. Papa akolu, oia ka papa "Hanohano," o Mrs. Malia ke kumu.  Hoomakaia ma ka himeni 238, Haawina Baibala, Ioane 3: 2, himeni 33.  Papa eha, oia ka papa "Abia," o Sepa Kapu ke kumu, himeni 76. Haawina Baibala, Ioane 8: 52, himeni hope 119.  Papa alima, oia o "Aitolele," o Mrs L.K. Kahoonani," Haawina Baibala, Luka 10: 38-42 himeni hope ma ka Haehoonani.  Papa eono, oia o "Kilauea" o Kuapaa ke kumu, himeni 126. Haawina Baibala, Mataio 3: 2, himeni hope 221. Papa ehiku, oia ka papa "Italia." o Hoopii ke kumu, himeni 45. Hawina Baibala Mataio 22: 14, himeni, "Kuu ka luhi." Papa ewalu. oia ka papa "Mekiko" o Pahoa ke kumu, himeni 2, ma ka leo elemakule, no ka mea he papa elemakule keia.  Haawina Baibala, Hoik. 14: 13, a ma ka Ui kekahi haawina.  Papa eiwa, oia ka papa "Puali o Iesu," o Mrs. Laahiwa ke kumu.  Himeni ma ka Haehoonani, "Oli au e ku a paio," Haawina Baibala ma ka buke Haawina Baibala, himeni, "Na koa pono," Papa umi, oia ka papa o "Anuenue," o Miss Kahele ke kumu, himeni Lila kamalii "Aloha kahi i kekahi."  Haawina kamalii aoao 45, himeni o Mililani.  Papa 11.   "Hamau ke kani nei ka pu,: o L. Makaiwi ke kumu ma ka himeni, "Mai paupauaho oe," ma ka Haawina ka lakou himeni,  "Puali a like."  Haa wina kamalii aoao 64, himeni "Kaiamau" a he moolelo no Molekekai ia Kaaea, a me ka moolelo o ka make ana o Abela ia Kawaihae, a o ka himeni hope, oia ka himeni mua.  Papa 12. Papa Pokii, o G.W. Keahuawa ke kumu himeni, "Ina he hauoli kou."  Haawina no ka moolelo o Satana, Paulo a me Solomona, himeni hope.  "Nani ke Kula Sabati."  Papa 13, oia ka papa o"Na opio," o S.W. Makaike ke kumu himeni, "La Hoike."  Haawina ma ka buke kamalii, himeni hope, "He momi." O ka pau ia o ka hoike ana o na papa, a mahope iho, ua ku mai o J. Kamakele, ke Kahukula Sabati, a paipai mai i na kumu a me na haumana, a pela no hoi o Rev. W. Kahookaumaha.  O na papa kula i hoikeia ma keia la, he 13, a he 13 no hoi kumu, a o ka nui o na haumana, he 94, huiia me na kumu he 13, ua like me 107 ka huina pau o na haumana.  Holo mua na hana o keia hoike, A o ka mua keia o ka hanaia ana o keia hana ma keia Kula Sabati.  Hookuuia ka hoike me ka pule o Keliolelo.

 

J. Kamakele,

Kahukula Sabati.

Waikapu, Okatoba 19, 1871.

 

Hoike Kula Sabati.

 

            E hoike ana ke Kula Sabati o Waimanalo ma ka la 16 o Novemaba, nolaila, ke kahea ia'ku nei na hoa Kula Sabai a pau, e naue mai e ike i na hana o keia kula Sabati ; oia no kekahi une e holo ai na pono uhane i mua, o ka lokahi like o na manao, e hooulu, a hapai like.

            A ke kahea pu ia'ku nei no hoi na manu hulu like, e lele like mai me na hoailona, ua emi ke kai. (oia keia lau oliva no ke aloha) no keia luakini o kakou, e pani ae ia luna a paa, no ka mea, ke waiho wale mai nei no na iwi.  Ua pau.

 

Kula Sabati o Kawela, Molokai.

 

E KA NUPEPA KUOKOA E; Kaoha nui oe: -

            E hoakaka pono mai e na Kula Sabati a pau mai Hawaii o Keawe a Kauai o Mano.  I pau ae ka pohihihi o na mau pokii o ke Kula Sabati o Kawela, Molokai.

            Ma keia Sabati iho nei, la 29 o Oct., 1871.  Ua ulu hou mai no na hoopaapaa he nui o na haumana o keia Kula Sabati, no kekahi pauku o ka Baibala.  Penei e heluhelu ai ua pauka la: "Ke olelo aku nei hoi au ia oe, O oe no o Petero, a maluna o keia pohaku e kukulu ana au i ko'u Ekalesia, aole hoi e lanakila mai na ipuka o ka po maluna ona." Mataio 16: 18.

            Eia ka ninau a kekahi Papa Kula Sabati i kekahi Papa: "Owai la ka inoa o ka pohaku a Iesu Kristo i kukulu ai i kona Ekalesia?"

            Haina like ole a na Papa Kula Sabati, "O Iesu iho no ua pohaku la." Pela ka haina a kekahi papa.  Eia hoi ka ko makou papa haina, "O na luna olelo - oia hoi na haumana he 12 a Iesu." A ma keia mau haina like ole elua, ua ulu mai ka hoopaapaa iwaena o na Papa Kula Sabati elua.

            Olelo Hooholo a ke Kahu Kula Sabati, e kokua ana i ka haina mua, oia keia: "O Kristo iho no ua pohaku la ana i kukulu iho ai i kona Ekalesia."

            A no ka pau ole o ko makou pohihihi no keia ninau ano nui.  Nolaila, imua o ke akea, na lakou e kokua mai i keia, Auhea la ka haina kupono o keia mau haina elua no keia ninau? Na oukou e hoopiha mai a hu ma ka nihomole.

J.M. KANOA.

Kawela, Molokai, Oct. 30, A.D. 1871.

 

HAAWINA KULA SABATI.

HELU XLVI. NOVEMABA 12, 1871.

NA KEIKI I ALOHAIA E IESU.

Pauku Baibala. Mareko 10: 13-16.

 

            13 Halihali aku la lakou i kahi mau keiki ia ia, i hoopa mai oia ia lakou: papa ae la kana poe haumana, i ka poe nana i laweaku.

            14 Ike mai la Iesu, alaila, huhu iho la ia, i mai la ia lakou, E ae aku oukou i kamalii ke hele mai io'u nei, mai papa aku hoi ia lakou, no ka mea, e like me lakou nei ke aupuni o ke Akua.

            15 He oiaio ka'u e olelo aku nei ia oukou, O ka mea aole e launa i ke aupuni o ke Akua, me he keiki uuku la, aole loa ia e komo mai ilaila.

            16 Hiipoi iho la oia ia lakou, kau ae la i na lima iluna o lakou, a hoomaikai iho la ia lakou.

            Pauku Alakai. - E aeia na kamalii e hele mai io'u nei, mai papa aku ia lakou; no ka mea e like me lakou nei ke aupuni o ke Akua.

            Kumu noonoo. - Ke aloha o Iesu no na kamalii.

            Ninau ano nui. - Pehea kakou e like ai me na kamalii?

            MANAO WEHEWEHE. - No ke aloha o keia mau makua i ka lakou mau keiki, a no ko lakou ike ana i ka mana o Iesu, nolaila i lawe mai lakou i ua poe keiki la iaia, i hiki iaia ke hoopomaikai ia lakou.  Ua manaoia o ka wa keia e haalele hope loa ana o Iesu ia Galilaia, a he ano nui keia laweia ana mai o na keiki, i loaa ai ia lakou kona aloha hope loa, me ka hoopakeleia paha i ke ino. Aole paha i ike na kamalii i ka menemene mau o na makua no lakou, o ili mai kekahi poino.

            I manao paha na haumana he mahaoi keia o na makua; i manao paha he makemake ole ko lakou Haku hanohano e hoopau wale i kona manawa me na keiki liilii, a nolaila ma ko lakou aloha kuhihewa ia Iesu, i papa aku ai i na makua, mai hoopilikia mai i ke kumu.  Ua lohe nae oia, a ua ike paha, a nolaila i hoopuka oia i keia mau huaolelo kaulana, oia hoi ka Pauku alakai o keia Haawina.

            Menei hoi kekahi olelo ana. "Ina paha oukou i like me keia poe kamalii, ke akahai, ka maemae, ka hilinai, ka haahaa o ka manao, ina ua makaukau oukou e komo i ke aupuni o ka lani."

            Eia na manao o keia haawina.

            1. He hoaaloha o Iesu no na kamalii.

            2. Aole e pono ia kakou ke hoowahawaha i na kamalii liilii.

            3. Ua huhu o Iesu i ka poe e pale aku ana i na keiki mai ona aku.

            4. He nui na keiki i komo i ke aupuni o ka Lani.

            5. He hiki no i na keiki a pau ke komo a ike ia Iesu.

            6. E alakai kakou i na keiki iaia, i huopomaikaiia.

            7. E lilo no hoi kakou i poe keiki liilii, ma ke akahai, ka maemae, ka hilinai, a me ka haahaa o ka manao.

            NINAU. - Nawai i lawe mai i na keiki ia Iesu? He mau keiki nunui anei? I laweia mai e aha?  Mahea o Iesu ia manawa? (Nana Manao Wehewehe.) Ua ae aku anei na haumana? Ehia lakou?   No keaha la ko lakou pale aku i keia poe makua? He lokoino maoli paha keia, he kuhihewa paha? O aha o Iesu?

            Pehea ko Iesu manao i kona ike ana i keia? Heaha kana mau huaolelo? Ua pili keia i na keiki hea? Ua hiki anei i na keiki o keia kula ke hele aku io Iesu la?

            O ka poe e komo ana i ke aupuni o ke Akua, ua like lakou me wai? Pehea i like?

            Ina e hai aku au i moolelo i ke keiki, ua hilinai anei ia i ka'u olelo? Pehea kakou i na olelo a Iesu?

            E hai mai i na manao o keia Haawina, e like me ka mea ma ka Manao Wehewehe.

 

KA NUPEPA KUOKOA,

HOOPUKA MAU IA MA HONOLULU

kela Poaono keia Poaono.

$2.00

No na mahina he Umikumamalua!

$1.00 no na mahina eono,

ME KA HOOKAA MUA MAI.

 

            NA OLELO HOOLAHA - aole i oi mamua o 10 laina no ka hoopuka hookahi ana, $1.00; alua komo ana, he $1.50; hookahi malama, $2.00.  E uku mua ia mai ke dala o na olelo hoolaha a pau e hoounaia ana mai e pai.

            KANIKAU - he 4 keneta no ka lalani hookahi - penei: he 25 lalani, $1.00; 50 lalani, $2.00; a pela'ku.

            KA UKU NO NA OLELO HOOLAHA - ka uku pepa, a me ka uku o ke Kanikau, e haawiia no ma ka lima o na Luna o ke Kuokoa, a i olela, e hoouna mai ia Pokue.

            NA UKU PEPA A PAU E HOOKAA MUA MAI NO - aole e kauia ka inoa o kekahi haole a kanaka maoli paha. ma ka inoa o ka poe lawe pepa ke ole e hookaa e mai mamua. K pono ke hiipoiia keia mau rula, no ka mea, he emi no ka auhau no keia nupepa.

            AIA KE KEENA O KA NUPEPA KUOKOA - ma ke keena i noho mua ia iho nei e J.W. Aukina, maluna ae o ka Hale Leta. O na hora hana, mai ka eiwa o kakahiaka, a i ka ha o ke ahiahi.

H.M. WINI, Luua Hoopuku.

 

"KA NUPEPA KUOKOA."

Is published in Honolulu

EVERY SATURDAY.

$2.00 per annum, or $1.00 per sic months, in advance,

 

            ADVERTISEMENTS not exceeding 10 lines, inserted once for $1.00 twice or $1.50; and $2.00 for one month; all advertisements must be paid for in advance.

            KANIKAUS will be charged 1.00 per page, or 4 cts. a line.

            PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.

            ALL SUBSCRIPTIONS must be PREPAID.  No names, either of foreigners of natives, will be inserted on the subscription list, until paid for.  This rule must be strictly adhered to on account of the low subscription price.

            THE OFFICE OF THE KUOKOA over the Post Office.  Office hours from 9 A.M. to 4 P.M.

H. M. WHITNEY, Publisher.

            Bound Volumes of the KUOKOA, for sale at the office over the Bookstore - $3.50 each.

            Persons having complete sets of the above, can have them bound by paying $2.00 each.

 

NA BUKE
HOOLAHAIA E KA PAPA HAWAII

 

Baibala Hemolele Nui ili eula nani me na kuhikuhi ma na a ao.....$12 00
"            " Nui ili eleele kaekae wai gula.....5 00
"            " uuku iki ihi " ".....8 00
"            " Pananaiki iho ili eleele.....4.00
Kauoha Hou ili gula nani me na kuhikuhi.....3.00
"             " eleele kaekae wai gula.....1.00
"             "  " ......75
Kauoha Hou Hapa Haole.....75
Lira Hawaii 1848 me ke kanawai......25
"       " 1855.....25
Moolelo Ekalesia.....50
Haiao ili lahiahi.....10
Hele Malihini ana.....25
No ko ke Akua ano......25
Lira Kamalii......25
Hoike Palapala Hemolele.....25
Moolelo o Heneri Opukahaia.....25
Hoike Akua.....25
Weheweheia.....25
Ninau Hoike ili manoanoa.....25
"         "          " lahilahi....10
Kumumua Kula Sabati.....10
Buke Lawe Lima.....10
He Buke no ka Pope.....10
Ui Kula Sabati Helu 3.....25
"    "       "         "      4......25
"    "       "         "      5......25
Buke Euanelio a Ioane.....10
Himeni            .....1.00
Himeni Ili nani.....1.75
Na Kauoha Hou Pakeke
Ili Gula nani.....1.50
Ili eleele kaekae nani......50
Ili eleele......35
Kauoha Hou Pakeke me na Halelu
Ili Gula nani.....1.75
Ili eleele kaekae wai gula.....50
Ili eleele......50
Na Halelu Pakeke
Ili Gula nani.....50
Ili eleele kaekae wai gula......30
Ili eleele.....20
Ka Hae Hoonani (Buke Mele)......25
Buke Wehewehe Huaolelo Baibala.....2.00
            "              "    "  Ili nani.....3.00
Eia na buke haawi wale
Palapala Liilii--
            Helu 4--Makemake anei oe i ke ola
            Helu 6--E hele i o Kristo la.
            Helu 7--Ka hoi ana mai o ke Keiki Uhauha
            Helu 11--No ka hoohiki wahahee i ke Akua
            Helu 16--Ka Kehia ana o ka Ahaaina a ka Haku a ma ka Bapetiso ana.
            Helu 17--Mai hana ino i na holoholona
            Helu 18--No ka mahi ana, kuai ana a me ka inu ana i ka Awa.
Ka Davida Malo Kumumanao.
Ka Moolelo o Batimea Puaaiki.
J. F. POKUE.
Kakauolelo o ka Papa Hoeke o ka Ahahui Euanelio o ko Hawaii Pae Aina.