Ka Nupepa Kuokoa, Volume X, Number 38, 23 September 1871 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

Pane ia J. Kawelau, maluna ae

o ka La.

            Aia ma ka Helu 22 o “Ke Au Okoa,” na manao o ka mea maa i ka hauhili, oia no o J. Kawelau, ka lua o na Papa Kula o Makawao, ua alala mai nei ka waha, me ka ninau mai, “Heaha ka mea i koe iho ai o kekahi mau haumana?”  Haina ia oe e ka mea maluna ae o ka La :  No ka ho ole o lakou e hele ai i ke kula i kahi loihi, a no ka liilii kupono ole hoi o kekahi poe i ke kau ana maluna o ka lio, oiai ua hemahema.  Oia iho la ka haina, i lohe ko poo e ka mea walaau maluna ae o ka puka uwahi.  Ina he kanalua, e hele ae no e ninau i na makua mea keiki, i maopopo ia oe, a mai hio ko waha i ka mea au i ike ole ai, aka, e kamailio i ka mea a kou maka i ike ai; a e hoomanao iho oe, ua poha ko lae i ke kauwila a Kawelo, pouliuli ka noonoo e ke hoa.  O kou manaohai i hoikeia, ua pili aku no ia i kou ike ole ana i ka manao o na makua; a no kou ike ole, ua manao oe, aole i hoowahawaha na makua iaia mamua, a hoike mai oe i kou manao hapala haukae wale.  O Naukana, ua noho loihi oia he kumu kula no Pulehu mamua, a o kona mau hope kumu, o ua makuahonowai no a me na wahine—oia anei ka ke Kahukula Nui i makemake ai?  A ina i pohihihi oe, e hele aku no e ninau i na makua mea keiki.  E ninau pu aku no hoi ia lakou, i ka nui o ka lakou mau hoopii ana inoa o A. Fornander, no ke kumuao i hoowahawahaia e lakou.

            E J. Kawelau, i ka wa e noho kumu ana o L. Pikao, ua hiki na haumana i ke 60 a oi, a ia J. Nakookoo, ma kahi o ke 50 a oi, a i keia wa, ma ka meridiana o Ladana.  E hoomaopopo iho oe e ke hoa, no ka hoowahawahaia anei aole paha?  Na kou ike maka e hai mai.

            Aole au i opu inoino i ke hoa, aka, he hoakaka ana ka’u i ka mea ku i ka pomaikai o ka lehulehu o ka Apana, oiai no lakou na dala iloko o ka waihona, i haawiia no ka kumuao, oiai me ka ike no au o kuu maka i hoike aku ai.  Akahi no au a ike, o oe Ke Kahukula Nuio keia mau la, ka mea ike i ka pono o ke kapulu, a onou koke iho i ka mea a na makua i hilinai ole ai i mea alakai hewa i ka noonoo o ka lakou mau keiki; hohono i ke kumu o ka laau a Kekuaokalani, hamohamo i ka lau ieie.  Aole au i manao, he pomaikai ko ke kanaka, ina e kapulu ana oia i kana mau hana, aole hoi paha e hihi, o ka holu i ka puuwai o Liua ma, i ae ai hoi oe e J. Kawelau, he pomaikai mai ka lani mai.  Mai manao oe e Kawelau, o na manao hoike i ka oiaio, he pai ia.  Hauhili ka ai a kawelea ia oe, kapala hoi ka ele na ke kea ka ai, aia ka pono o ka nui o ke kamailio ana aku i ka ilihau.  E ke hoa e, o ka Mokuna 9, Pauku 9 o ke Kanawai hoopai Karaima, oia kahi a ka Papa Kula i lawe mai ai e kapili ia’u, mamuli o na manao lili, i kapae ia ae mai ka oihana ae, a onou iho ia Hunona ma, ike ia ka noa.  A o ua pauku la, ua pili wale no ia no ka hakaka, aole hoi no ka hoopai ana o ke kumu i ka haumana ma ke ano me he makua la i kana keiki.  Eia no hoi; aole oe i hele mai imua o ka Aha, e hoike mai i ko’u nakaka ana me ka haumana, aole no hoi he hoike e ae i hele mai pela; aole no hoi he hoailona o ka eha i kau iho maluna o ka haumana imua o ka Aha, aka, ua lawe mai no ka Lunakanawai i kona manao hoopilimeai ia Hunona ma, a kapili mai ia’u, e like me kona manao i noi mai ai, e ae aku au i ko’u hewa imua o ka Aha Hookolokolo, a e hoopai mai ia’u i elua dala.  Ike ia ka noa e pili ana ia Hunona ma, no ka mea, aole au i ae a hiki i ka hopena; kapili mai o L.K. e like me kona hoopilimeai ia Hunona ma.  A ina o ka pauku Kanawai keia, nana e hooponopono i na kala mai Hawaii a Kauai, alaila, ke hai aku nei au imua o ka lehulehu, ua hihia na kumu kula a pau ma ke Karaima, no ka hoeha uuku aku i ka haumana ma ke ano ao, a e hoopololei i na hana a ka haumana maloko iho o na palena o kona mana, (e nana pono e na kumuao ia kanawai.)  A ina ma ka Apana wale iho no o Makawao ka hooponopono ia ana o na kula ma ia kanawai, alaila, he kapulu no ia i ike ia, a he lili ana no hoi, i mea e onou iho ai ia Hunona ma, no ka mea, ua pilikia ka noho ana o keia mau la, aole wahi e pono ai, aia ka pono o ka loaa ona wahi pa-i kalo, ola na moopuna.

            Eia hoi; aole no i hui pu na makua me ka Papa Kula e hoopau ia’u, aka, o ka Papa Kula wale no ia i kona manao, e like me ka’u e hai aku nei, e pili ana ia Hunona ma; a o na makua, eia no lakou mahope o’u a hiki i keia la, a he makemake no lakou e hana i palapala hoopii, e hoi hou aku au i Pulehu, aka, aole he mea kupono nana e lawelawe i ka lakou mea i makemake ai, oia hoi ka hana ana i palapala hoopii.  Aole no hoi i hoopii aku na makua i ka Papa Kula, e hoopau ia’u, nolaila, e hoomanao oe e Kawelau, ua mamao loa na makua mai ka Papa Kula mai, aole lakou i hui pu e hoopau ia J. Nakookoo.  A ina he kanalua, e hele aku no e ninau i na makua, i maopopo ia oe mai hoopiha wale i ka nupepa i kou mau manao kuhihewa.

            Aole au i hoopuka i ka olelo, “i mea wale aku no au;” ku ia hana a Kawelau i ka hoopunipuni a me ka wahahee, maka’u ole i ka hoopunipuni piha hewa ka pepa—“Mauna ke aloha i ka u-a.”

            E J. Kawelau e; piha hewa ka nupepa i ka nui o kou wahahee, hoike i na manao ino hapaia wale! ia nai, me kou manao, o kou hoopunipuni, oia ko ka lehulehu mea e pomaikai ai, a e ike ia ai oe, he kanaka ua hoonaauaoia ma na haleao.  Akamai ka imina o ka hoopunipuni, noeau ka imina o ka wahahee.  He pono ke ao oe ia oe iho, mai wahahee! Ku no oe i ka naauao a me ke akamai.  Aole au i paa i ka Halepaahao o ke Aupuni, i lohe mai ko poo e ka mea hanohano maluna ae o ka La, (J. Kawelau.) Aole au i pepehi i kuu wahine, i lohe mai ka puka nui o ko pepeiao, aka, hapala wale mai oe, no ko eha i ka paluku ia e ka iwia o ka hoki, he puni ka alala e awe wale ai.

            O ke kamailio ia no ka mea e pili ana no ke kula o Pulehu, no ka manao i mea e kauo pono ia ai na hana, i pomaikai na dala o ka apana, aole no ka manao e hoino, a makee aku, i kou pomaikai mai ka lani mai no ka mea, elua lima o ke kanaka ma ka honua nei.—A ina he manao ko J. Kawelau (ka lua o na Papa Kula) a me ka Papa Kula e ike i ka manao o na makua o Pulehu, alaila, e hele aku ilaila, e hoohui i na makua, a e ninau i ko lakou manao, a e pau no ko kakou kuhihewa, i na ua hoowahawaha ole ia ua kumu la, alaila ua pono oe, aka hoi, ina ua hoowahawaha ia, alaila, ma ka aoao o na makua ka’u kamailio ana, no ka mea, ua lohe no au i ko lakou mau manao.—A na lakou no ia hoopia ia Abraham Fornander, a hoopii ia, a me ke kuleana hea i hoonoho hou aku ai o J. Kawelau ma?  I nui ke aho i maopopo.—Aole anei ma o Hunona ‘la, i olu ka noho ana o ka aina pilikia, ola i ke ahe a ka makani, aole wahi pono ai, ua wela o Kanepuniu i ka la, a ia Wailuku ka pono i kahi paikolo, ua loaa mai la kahi hapaha ia kapilimeaiki ma.  A oia ka mea i noi mai ai i Palapala Kumu o 1.  Nakookoo e hoihoi aku no Mr. Naukana, Kahaha!  E hoololi ia ana ka paha ko Naukana inoa o I. Nakookoo?  Noeau no kela hana.

         Eia no hoi kekahi, o oe e J. Kawelau, ka mea e ao ana i na keiki liilii Haleakala School, ua palukuluku ino iho la oe i ke keiki a Elia a mahuka aku la i ka po, alaila, pili ka la i Papaenaena, palolo ko waha i kahi e, ike ole i ka papa holu i ka puuwai.  Ma ka haawina o ka pepeiao, ua pepehi oe i ke keiki mahoe a K. Kauhi Kuelaka, a ua lawe mai ka makua i ke keiki mai Haleakala School mai, no kou ao pololei ia oe iho, holo i ka lala a hoi i ka muku, pololei no kau ao ana la hai, a me kau ao ana ia oe iho.  Ke kauoha nei au ia oe, mai halihali hou mai i kou mau wahahee, i ka nupepa he mea no ia.  Ua pau ka'u kamailio ana no keia mea, na ka pololei o na hana e hoike mai, me ke aloha a me ka mahalo.

                                                                           Nalimalawelawe.

[Ke manao nei makou, he lapuwale wale no na olelo hoopaapaa a keia mau mea.  Aole he mau olelo hoonaauao ka laua, aka, he ake waha kole.  Nolaila, e pau olua maanei, ua ikeia ke na aoaa elua.  L.H.

Na Mea Hou o Makawao, Maui.

NUPEPA KUOKOA; Aloha nui oe; --

         No kuu ike ana i keia mau la, he mau wahi nu hou ano nui iki, nolaila, ke hapai aku nei au maluna o kou kuamoo ahonui, nauia e ahonui ae i ike mai ai na makamaka o kaua.

HALEKULA KAIKAMAHINE O MAKAWAO.

         Iloko o keia mau mahina hapa e nee nei, ua ike ia aku ka hiolo nui ana mai o na kaikamahine i ke komo ana mai iloko o keia Halekula; me he mea la, aole paha e hiki i ka puni ana o ka makahiki, halahu mawaho o kahi i kau pale ia ai.  Ma ke Sabati mua aku nei o Sepatemaba i hala, ua ike ia ae ma ka luakini o Pokela, ua mau manu hulu like la, i aneane e hiki aku ko lakou nui i ke kanakolu.  Nolaila, ua hu mai ke aloha o na kupa o keia uka iuiu, no na la i hala aku, no ke kau ia J.P.G. me kona kaikuahine, ka makua nana i hoopunana mua ma ua home la.  Auhea oukou e na makua mea keiki, e makemake ana e hoihoi mai i keia halekula, e awiwi oukou, i loaa ia oukou kahi kupono, o haule auanei i ka hope waa.

KA PAHANA O HAIKU.

         Ma ke awakea Poakahi, la 4 o Sepatemaba nei, pakele ke ola mai lilo.  Ma kela la i haiia ae la maluna, ua haule ia e na hunahuna ahi o ka puka uahi iho o ka hale wilikou o ka pahana o Haiku, a kau maluna o kekahi auwai e pili ana maluna o ka hale wiliko ponoi, ia manawa, ua holapu ae ka ula o ke ahi maluna oia hale wiliko, a mamuli o ka ike koke ia ana e ka lehulehu paahana, ua hoopakeleia ia pilikia nui.  Ua nui na kanakaka a me na haole i kokua mai no ia pilikia.

HALE PAU AHI

         Ma ka la 28 o Augate i kunewa aku la, ua hoopoinoia e ke ahi ka halepili o Pupuka (k), no Pauwela, Hamakualoa, me kona pahu pinika.  O ke kumu nae i pau ai i ke ahi, na kekahi keiki liilii i lawe me kekahi ahi koe, e koekoe ai ma ka paia o ka hale, me ka ike ole o kona makuahine, ua pauhia ia oia e ka hiamoe i ke awakea, i puiwa oia i ka wela o ke ahi, i ala ae ka hana, e a ana ke ahi maluna o ka hale, aole e hiki ke hooki aku i ka hana a ke ahi.  Oa ua Pupuka nei, ua hele oia ma kekahi wahi e aku, i kona lohe ana, ua pau kona hale i ke ahi, ua hoi mai ia me kona kulu waimaka e helelei ana, e like me na kulu paka ua koikoi o ka hooilo.  I kona hiki pono ana aku i kahi a ke ahi e a holapu ana iluna o kona hale, ua huro ae ia me ka leo nui, “Auwe!  Poino au e!!  pau kuu hale i ke ahi a me kuu pahu pinika hoi.  Poho! poho!! poho loa au no ka pau ana o kuu pahu pinika a me kuu pahu  malakeke.”  Pela oia i hoopuka ai i kana mau huaolelo kaumaha hana uko ole.  Auhea oukou e ka poe hana pinika, mai hana e like me keia Pupuka, i ka oi o kona aloha i kana mau pahu pinika a me ka pahu malakeke.  Me ka mahalo.  J.P.K.

He hakahaka maluna o ka moku.

         Ma ke awakea Poakahi iho nei, he hakaka weliweli ka i hanaia maluna o ke kalepa kiapa Amerika Frances e ku ana ma ka nuku o Mamala, mawaena o kekahi loina moku a me na alii malalo iho o ke kapena. Me he mea la, ma na hoike i puka mai, he ano haunaele liilii mau wale no ko na luina mai ka manawa mahope iho o ka haalele ana ia Honokaona a ku wale no ianei.  Penei ke ano o ka haunaele: i ua awakea nei, ua pili kekahi kiakahi lawe ukana mai ke moku mai, ma ka aoao o ka moku, a ua hooiliia na ukana maluna ona, a o ka piha hope no hoi ia.  Hoi aku la ka malama moku ma ke keena mahope i lalo, e kakau i palapala no ia mau ukana i hooiliia maluna o ke kiakahi a haalele iho la i ka hulipahu e hilinai ana ma ka palekai, e nana ana i ka hookuukuu ana iho iluna o ke kiakahi.  Iaia e nana ana ilalo, paa mai la kekahi o na luina ma kona mau wawae, a owala mai la iluna o ke kiakahi, ua puholehole oia, a iaia i hoao ae ai e ku iluna, e hoolei iho ana ua luina nei nana i owala aku ai, me kekahi palaka moku nui, me ka manao e pa ma ke poo, aka, pa e ma ke kipoohiwi.  Ia manawa koke no, lalau aku la kekahi luina e ae i ka laau he manapaika, a holo aku la i ka malamamoku e pepehi ai.  Pepehi aku la keia kana ka i ka malamamoku a paholehole, i kona wa i lohe ai a pii ae  iluna.  O ka haole nana i kiola i ka hulipahu ilalo o ke kiakahi, manao iho la ia, aole ka hulipahu e hiki ae iluna o ka moku, holo aku la oia e kokua i kona hoa powa, e pepehi la i ka malamamoku.  Ia manawa, hoea mai la ke keiki o ke kapena me ka pu panapana a haawi aku la i ka malamamoku, a na keia mea make i papalu aku i ka enemi e pee ma kuono; a na ke kokua ana mai o kekahi luina me ke keiki o ke kapena, i hoopaa iho i kekahi o na mea hoohaunaele me ka hao.  Ia manawa, hiki ae la ka hulipahu iluna o ka moku, a iaia e kokua pu ana me ka malamamoku i ka hoopaa i hao i ka haole i loaa, holo hoi ka lua a loaa he upa nui, holo mai la e hahau i ka hulipahu, a moku pu iho la ma ke poo.

         Ua oi aku ka ehaeha loa o na aliimoku a pela no hoi na luina.  I uka nei ke kapena, a i kona hoi ana aku iluna o ka moku, ua lawe kokeia mai na luina hoohaunaele i uka nei, a hoopaaia ma ka hale paa.

         Ma ka Poakolu a me ka Poaha iho nei, ua laweia ua mau luina nei imua o ka Lunakanawai Hoomalu.

I NA LUNA "KUOKOA!”

         Ke kaheaia aku nei na Luna a pau o ke “Kilohana Pookela o Ka Lahui Hawaii,” e ohi aku i na uku nupepa no ka hapa hope o ka poe lawe Kuokoa i koe, a e hoouna koke mai i ka Luna Hooponopono ma Honolulu.  E wiki a eleu mai oukou.

OLELO HOOLAHA.

E ike auanei na kanaka a pau owau o ka mea nona ka inoa malalo iho, ke papa aku nei au i ka poe waiwai, na haole, na pake a me na kanaka a pau o kela ano keia ano,  mai hoale mai oukou i kuu wahine mare ia Mrs. MAEHU, no ka mea, ua haalele kumu ole mai keia ia’u, a ina e hoale mai oukou iaia, maluna no ona ko oukou poho, aole au e hookaa i kana aie.                  IOSIA KEOLA.

         Naohi, Wakapu, Sept. 15, 1871.                        512 2t*

KA HIAAI PAU OLE!

 

CORA DE LAMOND!

KA MOI WAHINE O NA

HANA KUPUA.

Ua hiki mai keia Wahine Kaulana Kilokilo

         hookahi o ke ao nei, i kokuaia kana

                   mau hana e kona hoahanau

M’LLE. CHRISTINA!

A E HOOMAKA ANA I KANA MAU HANA KUPUA

MA KA BUFAMA HALE I KEIA AHIAHI,

Poaono, La 23 o Sepatemaba!

NO NA PO EKOLU WALE NO!

UKU KOMO—No na noho mamua, $100.

          “       “     No na noho mahope,   50.

                                               23-1t

OLELO HOOLAHA.

E IKE auanei na kanaka a pau, owau o ka mea nona, ka inoa malalo iho nei, ke papa aku nei au i ka poe waiwai, haole, pake a me na kanaka a pau o kela ano keia ano, mai hoale mai a hookipa paha i kuu wahine mare ia MRS. KAENAKU, oiai ua haalele mai keia i ka olu o Kaukeha a me na mea a pau i hoolako ia, a ua hele aku ia mamuli o ke koi a kona puuwai.  Ina oukou e hoaie iaia, maluna no ona ko oukou poho.

                                                                 W.H. KAMAKAIMI.

         Opihihali, Kona Hema, Hawaii.                                           512\2t*

Ilio Nalowale!              $20 00, Makana!!

NALOWALE MA KA POALIMA.

Sepatemaba, he wahi ILIO PEPEHI IOLE uuku, he eleele ka hulu, a ua okila na pepeiao. O “JACK” kona inoa.  E haawiia ka uku i haiia maluna ke hoihoi mai i ua Ilio ia ia

         512 3t                                                                 F. BANNING, ma Peleula.

I KA POE AIE LOLE.

E NA KANAKA, PAKE, HAOLE, a me ka poe a a pau i aie mai i na waiwai mailoko aku o kuu HALE KUAI LOLE ma Hanalei, Kauai, ke kahea aku nei au ia oukou e hele mai e hookaa ia’u iloko o na MALAMA ELUA ma Hanalei, Kauai, a e hooponopono pu hoi.  Ina aole e hookaa koke mai, mamua o kuu holo ana i Kina, alaila e waiho ia no ka ohi aku i na aie maluna o Apoe kuu kaikaina ma ka hale kuai

         4t*                                                                               KOKA, (Pake.)

Hanalei, Kauai, Sept. 16, 1871.

OLELO HOOLAHA.

E IKE auanei na kanaka a pau ke nana mai i keia, ke papa ia aku nei na mea holoholona, Lio, Bipi, Hoki, Kekake a pela aku, e hele ana a e hoopoino ana paha i na mea kanu maluna o kuu mau aina, ola o KULIHAI, he aina @lodio, he 36 eka a me K@louha, he aina kuai he 9 ½ eka.  A o keia mau aina, aole ia he mau aina kula, ke hoolilo nei au he aina mahi @ua.  O ka mea a mau mea paha e kue ana i kela Olelo Hoola, e ukh oia i hookahi dala, ($100) no ke poo.  A i ole e loaa mai ka uku, e hookomo no au i ka pa aupuni, ke loaa ia’u a i ko’u Luna paha.  Ua kapu pu na kanaka a pau e hele ana maluna ma ke ano kue i na olelo o keia Palapala Hoolaha.  A ina e loaa kekahi, e hopu no au ma ke ano aihue e like me ke Kanawai.                                 MANUELA (Haole Pukiki.)

         Kuliha@, Hamakua, Hawaii, Sept 11, 1871.                                        512 1t*

OLELO HOOLAHA.

E IKE auanei na kanaka a pau, owau o ka mea nona ka iona malalo, no ko’u minamina i ko’u ola kino, a oia no hoi ka waiwai nui a ke Akua i haawi mai ai ia’u e noho ma ka honua nei, nolaila, he hoolaha aku nei au no Nahakuelua, Kamaunu, Haaliilo, Kamaikakio, Kahalekui, Waiahole a me Kauhaiulei.  Penei ke kumu hoolaha: O keia poe nona na inoa maluna, he poe opu ia ino me ka hoopuka mau i na olelo hooweli imua o’u.  Ina wau e loaa ana i kekahi o lakou ma kahi mehameha, he oiaio e pepehiia ana wau a make, nolaila, ulu ka maka’u maloko o’u.  A no keia mea, ke hai akea aku nei au i na kanaka a pau, e na@a mai i keia olelo hoolaha, e makaala mai, ina e loaa ana @ u i ka pilikia pepehiia ma keia hope aku, alaila, e hopu koke ia keia poe, ke ole nae e loaa pono ka mea nana i pepehi ia’u.  E hoomaluia wau a me ko’u ohana a me ko’u mau waiwai a pau malalo iho o’u, i mea e pomaikai ai ka lahui o ke Alii Kamehameha V., malalo o kona Kumukanawai.                                        MANUELA (Haole Pukiki)

         Kulihai, Hamakua, Sept 11, 1871.                              512 1*

OLELO HOOLAHA.

 

L.A. LLOYD.

Oia hoi o Kamaki.

HALE KUAI MEA AI O NA ANO A PAU.

E loaa no i na mea a pau loa na mea a ko lakou naau i iini nui ai o na

Mea ai o kela ano keia ano,

ke kipa mai lakou ma ka hale kuai o ka mea nona ka inoa maluna ma ALANUI PAPU, Helu 76, ma ka aoao ma Ewa, e kupono ana i ka Hale Aupuni ma Honolulu Hale, me ke kumukuai oluolu loa i ko kanaka makemake.

Na Berena paa, Palaoa wela,

         Ko, Laiki, Kulina ai a ka moa.

Na Mea Hoomomona lio o kela ano keia ano,

         Na Waiu bata,

                   Waiu paa o Kaleponia,

         me na mea ai a pau loa a na Haole

                   o kela ano keia ano.

         Ina he poe ma kahi loihi e makemake ana i mau mea e kupono ai no ka lua o ka inaina, pono no ke kauoha mai, a e hooili koke aku no ma ka moku.

         Honolulu, Sept. 21, 1871.

         512                                                  3ms

“KILAUEA” NO KAUAI!

E HAALELE ana ka mokuahi “KILAUEA” ia Honolulu nei, ma ka Poaha, Okatoba 12, ma ka hora 3 auina la, no Kauai.  E ku ana ma Hanalei, Waimea, Koloa a me Nawiliwili.

                                                                 SAMUEL G. WAILA,

Honolulu, Sept. 14, 1871.                        (519 3ts)              Agena.

KUAI HOEMI LOA!

Ke Kuai nei ma ka Hale Kamana o

Mr. WILLIAMS,

NA MOE,

         PAPAKAUKAU,

                   OLEPELEPE,

                            PUKA ANIANI

a me na mea o ia ano, ma na kumukuai EMI LOA. E naua ma

                                     C.E. WILLIAMS.

         Honolulu, Sept. 12, 1871.               510 3m

$5.00 MAKANA!

Ua nalowale he lio kane ulaula, hao kuni ma ka uha hema o hope, N O O Manoa kahi holo mau o keia lio.  E ukuia keia uku makana, ke loaa a hoihoi mai i ka lio la

                                                                           KEOKI Kuai Bipi.

         Aianui Nuuanu, Honolulu, Sept. 7, 1871.                                     510-2t*

OLELO HOOLAHA PAPA!

MAI keia la aku, ke papa aku nei au i na kanaka a pau, aole e hopuhopu a hooholo wale i ko’u mau lio a me na lio e ae malalo o ka’u malama ana, me ko’u ae ole aku, no ka mea, aia ka malama o na lio malalo o MAHALO ko’u kanaka, mai keia ia aku.

                                                                           SAMUEL ANARU.

         Kailua, Oahu, Sept. 6, 1871.                                                510 6m

HONOLULU DISPENSARY

         LAAU LAPAAU HAAWI WALE, no na mai a pau o keia ano keia ano, ma ka Hale Kauka o

G.P. JUDD.

Helu 31, Alanui Papu, Honolulu.                                         509 2ms

OLELO HOOLAHA.

E IKE auanei na kanaka a pau ke nana mai i keia, ke papa ia aku nei na mea holoholona, Lio, Bipi, Hoki, Kekake, a pela aku, aole e hookuu wale a nakii maluna o kuu aina hoolimalima, e waiho la ma Waikiki waena, i kapaia KAMOKU 2, KAPUNA a me kuu aina kuai e pili ana me ko Kawainui.  Aole hoi e lawaia na kane, wahine a kamalii ma na loi o ua mau aina la.  O ka mea kue i keia mau olelo, e hopu no au a hoouku iaia i Elima Dala, ($5.00).                                                 HAE (pake).

         Sepatemaba 1, 1871.                                                                      509 4t*

OLELO HOOLAHA.

UA NALOWALE HE KI HALE NUI.  Ua manaoia ua haule mawaena o ke Alanui Papu a Beritania paha.  Ina ua loaa ae i kekahi poe a hoihoi mai i ka mea nona ka inoa malalo iho, e loaa no ka uku.

                                                                                             W. HUMPHREYS.

Alanui Papu, Honolulu, Aug 28, 1871.                                505 .f

OLELO HOOLAHA.

E IKE auanei na kanaka a pau, o keia kanaka o Kekumu ka inoa, he makuakane no

Mrs. KAHALEHILI,

ka’u wahine mare, ua kii pinepine mai e hoowalewale i ka’u wahine, e hoi ma ka hale o ka makua ma Pauoa e imi waiwai ai.  Ua haalele mai i ko maua wahie moe, nolaila ke papaia aku nei na haole, pake, pukiki, kanaka, laka, aole loa e ho@ iaia, mamuli poho oukou, no ka mea, aole au e hookaa i kona mau aie. 

                                                                                    AHIONA (Pake)

         Honolulu, Aug 24, 1871.                                            608 4t*

HALE KUAI LOLE HOU!

E WEHEIA ANA I KEIA POAONO.

SEPATEMABA 16.

NO

KAMAKI A ME PEREDA,

HAYSELDEN BROTHERS,

Na Keiki ma ka Hale Kuai o Ake mamua.

Ke kono aku nei laua i na kanaka o

Honolulu,

A me ka Lehulehu a pau, me ka kukala

aku, ua lilo aenei ia laua kela wahi

maikai ma ke

Kihi akau o na huina o na Alanui

Papu a me Alii!

ME KA MANAO E HOOLILO I

Hale Hoahu a Kuai Lole

MALOKO

Ke oleloia mai nei, ua piha pu ke Kaona i

na Hale Kuai, aka, ke hilinai nei

laua, mamuli o ka hoo

manawanui loihi ana i awili pu ia mai me

ka oluolu a me ka hoolohe a me

KA MAIKAI O KA LOLE

E Kuai ia aku ana!

Ka mea e loaa mai ai ke kokua, a hoohuliia

mai ka lehulehu, i ka wa a lakou e ike ai.

IA OUKOU

E NA WAHINE!

KA MAUA E KAU NUI AKU

NEI, E KOMO MAI.

105                                                                                       3ms

 

HE HOOLAHA HOU!

E WEHEIA ANA KA

HOOPAHEEHEE HUILA O HONOLULU,

NO KA LEHULEHU, I NA PO A PAU,

koe na po Sabati a me ka Poalima, e hoo

maka ana mai ka hora 7 a hiki i ka hora 10 P.M.

                   Palapala Komo             -                  -                 -                  25 keneta.

                   Palapala Hoopaheehee -                  -                 -                  25  “ 1 hora.

         24      Palapala Hoopaheehee -                  -                 -                  $4.60

         12      Palapala Hoopaheehee -                  -                 -                  2.50

NO KA POE HUI.

         He uku haahaa ke kau ia maluna o ka poe Hui o na Lede a me na Keonimana, ma ka la, ka hebedoma a me ka malama, me ka haawi pu ia aku ia lakou o na pono o ka Hale, kukui a me ka hoopaheehee ana a me ke kono ana aku i ko lakou mau hoaloha.

NA MANAWA HOOPAHEEHEE.

         No na Lede a me na Kaikamahine, i na la a pau, mai ka hora 4 a hiki i ka hora 6 o ke ahiahi.  Aohe makaikai e ae ia e komo.  O ke komo ana, aohe uku, a o ka hoopaheehee ana, he 25 keneta.

         E malama pono loa ia ka maluhia, aole hoi he mea e hopohopo ai ko makou poe hoopaheehee.

                                                                                    WILLIAMS & WALLACE.

         Aug. 19, 1871.                                                                               508 tf

JUDD A ME LAYTON.

[ALANI KAUKA A ME LEITONA.]

NA MEA KUAI MEA AI O NA LAKO AI A

a pau, na mea ulu a me na mea hoomomona lio.

Halekuai malalo o ka Hale Mu, Alanui Papu, Honolulu.

                                                                                    475 ly

E. O. HALL & SON.

[E. O. HALL A ME KE KEIKI].

NA MEA KUAI LAKO HAO, LOLE,

         NA PENA, AILA & NA LAKO KALEPA.

Halekuai ma na huina o Alanui Moi a me Papu.         475 ly

HALE KUAI NU HOU!

HALE KUAI

O

UILAMA

MAUKA O MAEMAE,

 

Malaila na mea a pau e kualia’i.

501 6m

 

OLELO HOOLAHA.

KE kahea aku nei au ia oukou, e hele mai ma ko’u hale hana

         Kuia Pepeiao,

                   Komo Lima,

                            Pine,

                                     Komo Lima Gula,

                                               Komo Dala o ua ano

a pau—Eia hoi, ina paha he mau dala keokeo a ulaula ka kekahi, e makemake ana e hana i komo, e lawe mai a na’u e hana aku, me ka noho pu mai no hoi o ka mea nona ia komo, e nana i ka’u hana, aia a pau ka’u hana ana, alaila, hoi ka mea komo.  Ina he mau komo kahiko ko oukou, e lawe mai no, a na’u e hana aku.  Ina e apiki ka mea komo ma ka lawe ana aku i kekahi mea ike, e hoihoi mai i ke komo no’u, a e lawe aku i ka’u dala ulaula a keokeo paha.  Ina hoi he mau komo dala ko oukou, e makemake ana nae e hana i ka wai gula e lawe mai na’u e hana, a ina e hemo ka wai gula a’u i hana ai iloko o na mahina he 11, e lawe mai no a na’u e hana hou aku me ka uku ole, a ina e pau na mahina he 12, aole au e haoa ia komo.  Aia ko’u hale hana ma Alanui Nuuanu.

         Honolulu, Mei 12, 1871.                 (493 6m*)                     AKI (Paki)

OLELO HOOLAHA.

KE papa aku nei au i na mea Lio, Bipi, Hoki, Miula a holoholona e ae paha, mai hookuu i ka lakou mau holoholona e hele e ai i na mea ulu maluna o na apana aina o Maalani ma, i haawiia mai ai ia’u ka malama, e waiho ia ma ka apana o Hamakua, mokupuni o Hawaii, no lakou na inoa, KUILEI, na A’U elua, na PAPAKE elua.  O keia mau aina elima, ke waiho aku nei au ia mau aina ia KALILI ko’u Hope, a’u i hookohu ai i ka 1870, iaia ka malama a me ke kiai no na mea komohewa a pau, a oia hoi ko’u Hope ma ke Kanawai.  He mana kona e hopu aku i na komohewa a pau maluna o ua mau aina la, a e koi aku i ka uku no ke poo hookahi i o na holoholona i halia maluna, @ Hapalua ke uku koko mai ka mea holoholona, a i ole @ mai, e lawe koke ia i ka Pa Aupuni, i Hookahi Dala no ke poo hookahi.  Oia ka uku no ke poho o ka aina, a o na holoholona e ae, he hapawalu no ke poo hookahi.  E lilo kei i Kanawai, mai kona la e puka ai ma ke KUOKOA.                                                        E.P. KAMAIPELEKANE.

         Honolulu, Iulai 22, 1871                                                      503 4t*

E NA KANAKA A PAU

         E maliu mai, ke poloai aku nei au ia oukou a pau e na kanaka e lawe mai i ko oukou mau kamaa buti na’u e hana hou a auilii a oki paha i na he loihi, no ka hana hou ana i na kamaa i ano kahiko e hana no wau me na lii pipi Palani paa maikai, eia kekahi aole i maopopo ia’u ka manawa-e hemo hou ia mai aole wau e hana ana ia kamaa.  Eia kekahi na’u e hana i puu aulii maikai i 75ct ka uku ina hala na malama elua a ekolu paha a ano kahuli iki e hoihoi hou aku i ka 75ct oia a me a’u hele pu maua ma ka hale Hotele aina na’u e uku 60ct.  Eia kekahi e malama oukou ina pepa e haawiia aku ana ia oukou.  Eia kekahi ina he mau noho paniolo kahiko ko oukou e lawe mai na’u e hana me ka uku oluolu.  Eia kekahi he nui na lala noho lio-maanei mau kaula keehi—a pela aku.

         Eia kekahi ina wau e kali a hala na malama ekolu, alaila e lawe no wau i ke kamaa, o oukou i ka hale kudala no ka mea he haiki ko’u hale humu kamaa.

                   O wau no me ke aloha

                                                                                             AGIU (Pake).

         July 1st A. D. 1871                                                                        501-6m.

PAPA KUHIKUHI MANAWA HOLO

O KA

MOKUAHI HAWAII

 

“KILAUEA.”

HAALELE ia Honolulu i na Poakahi a pau—Hora 5 P.M.

         “      Lahaina i na Poalua a pau—hora 7 kakahiaka

         “      Maalaea                 “        “        10    “

         “        Makena               “        “        12 awakea.

KA HUAKAI HOLO I HILO

HAALELE ia Honolulu i na Poakahi aha o ka malama.

         “   ia Kawaihae i ka Poalua ae hora 9 P.M., a me Mahukona i ka hora 11 o ia po.

HULI HOI ANA MAI HILO MAI.

HAALELE ia Hilo, Poakolu.                                               Hora 5 P.M.

         “        Mahukona, Poaha.                                     “   4 A.M.

KA HUAKAI HOLO I KONA

HAALELE ia Kawaihae na Poalua                                     Hora 9 P.M.

HULI HOI MAI KONA MAI.

HAALELE ia Kealakekua i na Poakolu                              Hora 12 awakea

         “      Kailua i na Poakolu                                      “    6 P.M.

HULI HOI LOA ANA I HONOLULU.

         “        Kawaihae i na Poaha a pau                      “   12 awakea

         “        Makena i na Poalima a pau                       Hora 6 A.M.

         “        Maalaea     “        “                            “   9  “

         “        Lahaina i na Poalima a pau             “        “     6 P.M.

SAMULE G. WILDER (WAILA),

491 tf                                                                                    AGENA

HALE KUAI WAIPUOLO!

NA MAKAMA O WAIALUA a me KOOlauloa, Aloha oukou—Ua ku hou mai ka Hale kuai e lako ai oukou i na

MEA HAO,

Na Laka Puka, Ami Puka o kela ano keia ano.

         Kui-wai, Helu 3, 4, 5, 6, 8, 10, 12, 20

                   Kui i kuiia, Helu 4, 6, 8,

                            Kui-nao mai ka liilii a ke nui,

                                     Koi-lipi, Koi liilii, Koi kakia aho,

                                               Hamare maikai, Pahiolo, Makau lawaia.

NA LOLE,

         Ahina-nao, ekolu ano,

                   Leponalo o kela ano keia ano,

                            Keokeo eha ano,

                                     LoleUwewahine.

                                               Lole Kaleko Nu Hou.

NA MEA AI,

Palena, paa, Mea Ono,

         Ko Helu 1 & 2, Ko keokeo,

                   Kafe no Kona, Ti-lau,

                            Paakai hoohu palaoa.

NA LAAU O KAUKA JAYNES.

Haale, Laau kunu, Laau hoomaemae koko,

         Laau hamo, Carminative Balsam (laau hooapaa hi)

                   a me kekahi mau laau e ae he nui wale.

E hooikaika ana ko oukou makemake, e lako kakou

i na MEA HANA MAIKAI, ma ke kumukuai emi!

                                               S. N. EMERSON.

Waialua, Iune 27, 1871.                                     500 tf*

HALE KUAI BUKE HOU!

MA KA HALE LETA MUA,

A MA HONOOLULU HALE,

MEA HOU A HALE KUAI MANUAHI.

Ua lawe ae nei o H.M. Wini, i ke Keena

Nui i haaleleia iho nei e ka OIHANA LETA,

a ua hanaia iho nei a paa i

HALE KUAI BUKE,

e like me ka hana ana ma na aina e,

kahi e loaa ai i ke kuai, na

BUKE HAWAII ME KA NA HAOLE.

NA BUKE KULA HAWAII A HAOLE,

         Na PAPAPOHAKU me na BUKE kakau,

                   Na KII NUI a liilii,

                            Na ano PEPA kakau a pau,

                                     Na PENI me na INIKA,

                                               Na POO LETA

         a me na mea heluhelu a kakau maikai.

NO IA MEA, E HELE MAI A IKEMAKA I

kuu Hale Kuai Buke Hou, a kuni

iho i na Buke maloko olaila.

E LOAA NO NA POO LETA HAWAII MA

loko o keia Hale Kuai.

Me ke aloha.

HENERE M. WINI.