Ka Nupepa Kuokoa, Volume X, Number 38, 23 September 1871 — Page 2

Ka Nupepa Kuokoa

KE KILOHANA POOKELA NO KA LAHUI HAWAII.

 

Na Hiohiona o ka Apapa o Honoipu.

-

E KA NUPEPA KUOKOA E; Aloha oe:-

            O ka inoa mua nae o keia apana o Punepa, no ka mea, ilaila ka hale halawai a me ka hale kula kahi i ku mua ai, aka, i keia wa, ua hooneeia aku la ma ka ehukai o Honoipu.  Aia iloko o keia apana he 10 mahele, 2 Punepa, 2 Kokoiki, 2 Upolo, 1 Honoipu, 2 Puakea, 1 Kukuipahu.

NO NA PUNEPA.

            O keia wahi, he wahi oneanea a kakaikahi na wahi hale, ehiku hale, he ekolu no wahi, he wai hapa kai; aia a ua ia a loko o na poho pohaku, alaila, kii aku ko laila kamaaina a pioo ae a loko o na huewai, alaila loda ko laila wai, nolaila I kaulana ai keia aina o “Nailinawaiole,” ma keia wahi e waiho nei na mea kaulana o ka wa kahiko, a me ka heiau o Mookini.

NO KA MEA KAULANA A ME KA HEIAU O MOOKINI

            O ka pali o Kapaaheo, o keana Kaualehu, o Puoleole. o keana o Apala, o Awanuka, o ka poho pohaku o Mookini, oia kahi a na tausani, moo I holo ai e pee i ko lakou ike ana ia Hiiaka i ka poli o Pele i ka wa a lakou e olohu ana, a me na mea kaulana e ai he nui wale, a me ka heiau o Mookini.  He pa ani a maikai keia o ka hana ia ana, he 40 ½ enaua kona loa, 19 ½ anana kona kaula, 3 ½ anana kona kiekie, 2 anana ka manoanoa o kona kumu, 1 ½ anana ka palahalaha o luna o kona welau; 3 no nae aoao kiekie, o na aoao laula elua ma ka Akau a ma ka Hema, a me ka aoao loa ma ka Hikina; a me ka aoao loa ma ke Komohana, he haahaa ia; anana kona kiekie, he nui no na mea kaulana o loko o keia pa; I ka po hookah no ka ka hanaia ana o keia pa e Kamenehune, a mai Pololu mai ka pohaku o ka laweia ana mai, no e ana ka o ua po nei, haahaa ai kekahi aoao.

NO NA KOKOIKI

            Ua like no keia apana me ko Puuepa, a o na wahi hale nae o keia 8, o ka nui o na kanaka he 19, ke huiia na makua a me keiki a me na malahini.  O na mea kaulana o keia apana, oia no ke awa o Kapakai, kahi e luana ai o na alii o keia wa; a nolaila i kaulana ai ia olelo.  Ahu iho la ka hoka i Kapakai.  O Hikapoloa kekahi mea kaulana ma keia apana; oia kahi I pepehi ai o keia kananka o Hikapoloa is kona mau kaikoeke, a pau no ia lakou I ka ai ia, nolaila I kaulana ai keia olelo, “O ke kaikoeke a ka hauaino.”

NO NA UPOLU

            Ua like no keia aina me kela mau mea I hoakakaia e la mamua, o kekahi hapa nae o keia wahi ua mahiaiia, a ua hoopuuiia i ka pa, ua uliuli pono ua kihapai uala. A ke ohi nein a kanaka I na hua ohana o ka honua.  7 no hale, he 12 kanaka ke huiia na mahua a me na keiki a me na malihini, aia ma keia apana ka lae laulana o Kanamee, ka lae kaulana o Kohala-Akau.

NO HONOIPU.

            He wahi maikai no keia, ua panoa no nae; O ka wai o keia wahi, he wai na ka ua, e malama ana koonei kamaaina I na papa waa i mau ha wai no lakou, I ka wa e ua iho ai a pa aku ka paka o ka ua I ua papa waa nei, a kahe aku na hunahuna wai iloko o na mea i hoomakaukau ia, alaila, loaa iho la ona wai.  O na hale o keia wahi 9 a o na kanaka he 24, ke huiia na makua a me na keiki a me na malihini.  He wahi ku moku keia i ka wa maikai, aka, I ka wa ino pu no ke kai.  Ua nui kupono ole ka uala ma keia wahi ua kanu nui ia, ua lako pono i na ki a kaunu, ua hoopuniia na kihapai i ka pa nui, I ole e hoopoinoia e na holoholona.

NO KA HALE KULA A ME KA HALE HALAWAI.

            Ma keia wahi e ku nei ke kulana hanohano, ua maikai kona helehelana ke nana aku ua hoomakaukau pono ia, ua lako o loko o ka hale i na mea e pono ai o ke kula a me ka halawai, a ua maikai pono kona pa i ke kana ia i na pua; no keia hale kula na keiki nana i kii nialu i ke dala a Hanare, o Maliu a me na kaikamahine, i wawahiia ai ka maluhia o Hanare, o Maliu no, i hookolokoloia i keia mau Augate aku nei i hala.

NO NA PUAKEA.

            He aina panoa no keia, a ma kekahi hapa mae o ka aina ua mahiai ia, o ka uala ka ai nui ma keia aina, he hapa ke kalo.  O na hale o keia wahi he 10, ke hui ia ne ko ka pa hana o Hanare Co., a o na kanaka he 27, ke hui ia na makua me na keiki a me na malahini.  Ua like no ka wai o keia wahi me ko Honoipu, a o kekahi hapa mae he mau lua pono pohaku nunui, 3 a 4 paha mau barela o kekahi mau lua.  O ka mea kaulana ma keia aina, “oia no ke kai henalu o Puakea;” aia ma keia wahi ka mahiko pakalaki o Hanare Co,.

NO KA MAHIKO

            O keia mahiko no Hanare Co., 5 aenei makahiki o kona hooikaika ana ma keia hana.  Ia mau makahiki ua puka no, aka, I keia makahiki, haule poho iho la kela no ka haki pinepine o ka nihooiho o ka Nau, a no ia pilikia i noho aie ino loa ai kela malalo o kekahi mau haole, a Moloki okoa I kona mau waiwai a pau, aole nae I kaa ia aie ona a hiki i keia wa; I keia wa ua kaawale kela ma ka la o Kawaihae, aia ilaila kahi i hoohanaia ai no ka hewa moe naha I kekahi mau kaikamahine, a me ka haawi wai ona; a ua lilo ka hooponopono o kona waiwai ia Keoni o Pukaalani o Waimea maiana; a i keia mau pule aku mei ka wili ana a keia Keoni, a ua holo pono.

NO KUKUIPAHU.

            He wahi panoa keia a oneanea; aohe wai maoli a keia wahi, ma kahakai no he wai kai, a ma kulakula ae he wai maoli iloko o ka lua hphe pohaku nui; ahoe nae he wai puna, he wai no na ka ua; aole I mahiia ka aina; o ke kula o keia aina, he kula hanai hipa na ka haole, o ka mahiai ana o ko laila poe, aia ma.  Puakea a me Honoipu.  O ka nui o na hale ma keia wahi 6, a o na kanaka he 23, ke hui ia na makua me na keiki a me na malihini.

NO KA PONO O KA HAKU MA KEIA MAU WAHI.

            Ma keia mau wahi I hoakakaia mamaua ae nei, ua ala no ma na hana pono, ua piha pono ka hale halawai i ke kakahiaka Sabati a me ke ahiahi, i ka pii ana nae i ka pule, o na keiki ka hapa nui, a o na hoahanau, aole e hiki aku i ka ehihu.  Oia kahi mea iki o ke kuaaina.  H.W.K. KALAMA.  KOHALA Akau, Sept. 14 1871.

 

Kei no loa o kekahi Alanui o Makawao, Maui.

 

E KA NUPEPA KUOKOA E: Aloha oe:--

            E oluolu paha oe e ka nupepa Kuokoa, e ahai aku i keia wahi puolo, i ike mai ai ke kini lehulehu hele huakai malihini o kaua i le ino loa o kekahi alanui o ka apana o Makawao.

            Ma ka'u hele ana ku me kou poe hoa iloko o keia mau la wela ino o Wailuku, a hiki aku i Hamakua- a i Makawao, ua ike au ua maikai loa ke alanui mailaila aku a hiki i Makawao; aka, aia ma ke alanui e hele ai i Kula kou hoohalahala me ke kaumaha i na Luna Alanui o ka Apana o Makawao, no ke ino loa o ke alanui.

            Aia ma ke alamui mauka iho o ka halekula kaikamahine o Makwao, i hoomaka aku ai ke ino o ke alanui a hiki loa aku i lehu, i ike iho ai au i ke ino loa o ke alanui, ua piha pono hoi i na pohaku nunui.  I ka nanaku, he ano hiki ole i no kaa bipi ke hele malaila, no ka mea, ua piha pono i na pohaku nunui ke alanui.

            Aia no hoi ma kou hiki ana aku i kaonoulu, i ike iho ai au i ke ino loa o ke alanui; aole hoi e hiki i kekahi kaa bipi ke hele mai a hiki i Pulehu.  Ma ka olelo mai a kekahi poe o laila, “Ka hana ia ana no o kahi alanui i ka manawa ia Sniffin (Lipine); i make aku nei ka hana o Sniffin, aohe hana iki ia o kahi alanui, mailaila mai a hiki wale i keia Manawa.”

            Ua ike no paha oukou ia Likine (Sniffin), kela luna alanui, luna auhau, luna helu, i make ai ma Kalepolepo, i ike ole ia ai ka mea nana i pepehi iaia a make.  O lipine, o kekahi no keia o na luna alanui maikai loa, mai Kula loa mai a hiki loa i Makawao, me ka malama loa o keia luna i ke alanui a hiki wale I kona la i make ai.

            Ua ike pono loa no hoi au i ka maikai o ke alanui ia Manawa, ua like loa me kekahi mau alanui o ke kulanakauhale, ke kau wahi aa ole o ke alanui.  I keia luna alanui hou iho nei hoi, aohe no a hana iki ia o ke alanui.  O ke alanui wale no e kokoke ana i kona wahi, ua pau ia i ka hanaia.  Kupaianaha ka hanaia keia wahi Luna Alanui.  Ea! “Ahu kupaianaha i ka la o Mana.”  Me ka mahalo.    Jos. E. Hart. Wailuku, Maui, Sept. 15, 1871.

 

He wahi kaniuhu kou

 

E KA NUPEPA KUOKOA E; ALOHA OE;--

            Oiai, aia iao e hoonanea ana i ke kaupaona malie ana i ke au ‘i hala me keia au, aia hoi, aole no e like ana.  Ua loaa nai iau kahi manao kaniuhu, me ka nalu malie iho iloko o kou puuwai.

            Oia hoi keia, o kou nana ana i kela au me keia au e nee malie nei, aole no hoi he like.  A elua no ia mau kumu.  Oia hoi, na Manawa elua.  E nana mau ia nein a kanaka naauao.  O ka wa kahiko a me ka wa hou, oia hoi keia mamawa a kakou e hono nei.  Aia a nana aku kakou i ka wa kahiko; aole i kana mai o ka nui o na kanaka, ua manao ia, ua oi aku ka nui o na kanaka oia Manawa mamua o keia au.

            Oiai, ma kou ike a lohe ana, ekolu a eha kanaka o ke kihapai hookah a ua paa loa no hoi ka aina i na kanaka; A he Manawa kaua no hoi ia.  He malama pono no hoi na makua i na keiki, na kaikamahine a me na keikikane.  Ia nanawa no hoi o ke kane a a me kana wahine, he hookaawaleia kahi moe i kekahi Manawa, a me ka laua ai ana, a he kahuimu no ke kane i ka ai a ka wahine a moa mamua mahope ka ke kane.  Ina hoi he mau keiki ka laua, he kaikamahine a he keiki kane, kahuimu no ke kaikunane i ka ai a kona kaikuahine mamua a moa, a mahope kana.

            Ia Manawa no hoi, he pepehi wale ia kanaka, aole mae he emi iho, oia mau no; pau aku kekahi poe i ke kaua, koe iho no ka hapa nui.  Aia a nana aku kakaou i ka Manawa i hooluhiia ai ka Iseraela e Parao ke alii o Aigupita, me kona manao paa e hoemi ia lahui, aole nae pela, e oia mau ana no, me he waipuna la e hoomau ana i kona pipii ana.  Aole anei pela ko kakou poe kupuna i kela wa i hala?  Ua pii no ka nui o na kanaka, no ka malama pono i ke kino; aole nae pela i keia Manawa, ua kuokoa ke kanaka maluna iho o kona aina, no ka mea, ua uuku na kanaka, ka mea nana e mahi ka aina.  I keia Manawa no hoi, ke emi nei no, no ka nee mau mai o ka mai i na kanaka, a he mau kumu no hoi ia e emi ai keia lahui; a o ka malama pono ole no hoi kekahi o na makua i na keiki a lakou a me ka ohana; pwla hoi, aia a malama pono ia na mea kanu, hoomau ma o ia i ka wai, e mau auanei ka ulu ana.

J.W.H. KUKAPU, Hilo-uka, Sept 5, 1871.

 

 Ka Nupepa Kuokoa.

 

PUBLISHED EVERY SATURDAY-$2.00 A YEAR.

Henry M. Whitney

Publisher and Editor.

(Luna Hoopuka.)

JOS. U. KAWAINUI,

            ASSOCIATE Editor.

(Luna Hooponopono)

 

HONOLULU, SEPATEMABA 23, 1871.

 

            Ua hiki mai ka Manawa e pono ia kakou e noonoo no ko noh ana aku no ka wa e hiki mai ana.  Ua komo nui mai ka hoonaauaoia ana no ko kakou lahui, a ke hoomauia aku nei ka pii ana.

            Ke hoikeikeia mai nei na hana maikai e pono ai i ke kanaka kea o no kona mau la hope aku, i mea e kokua mai ai i kona ola ana.

Ua nui na hale kula e hoonaauaoia ai na kamalii Hawaii ma na mea naauao, ke hoikeike mai nei ke kauka kamana i kana mau mea kapili hale, o ka amara i kana mau haunare hao, o ka mea hooniniu mekini i kana mau huila, o ka loio i kana mau buke kanawai, o ke kahunapule i kana oihana laa, o ke kapili moku i kana mau lopi okomo, o ke anaaina i kana panama, o ka mahiai i kana oo palau, a pela aku a pela aku.

            O keia mau hana a pau, ua hiki, wale no lakou ke hanaia e ka mea i oleloia, “he mana ka naauao.”

            Hapa Keneturia aenei a keu na makahiki o ko Hawaii nei hoomalamamalamaia ana, a o ia no paha ko ke kanaka komo ana aku i ka heluna o na la I kapaia, “ua oo kupono.”

            O na hana i kuhikuhi aenei maluna, he mau hana e hoopomaikai ana i ko ke kanaka ola ana aku ma ke kino.  Ke puka mai nei ko kakou poe i hoonaauaoia ma na kula me kahi ike i loaa ia lakou,--o ka hapa nui nae ua nalowale wale me ka ike ole ia aku.  Ua huikau ae la.  O kahi oihana mahuahua i loa a i ka poe i hoonaauaoia, o kahi kumukula la.  Aka, iloko o keia manawa, ua piha unuia oihana, a ua waiho wale ka nui, aohe oihana loaa.  O ka lakou hana paha ka ka poe i nele, o ke kaa maluna o ka moena, a pau ae ka heluna o ko lakou mau la; a o na hana hoi e hiki ai ke hoopomaikai mai i ka lahui, e like me na kamana, amara a me na hana like, aole no he mau kula o ia ano.

            Ke manao nei makou me ka maikai, o kea o ia ana o na keiki opio, ma na hana i hoikeia maluna a me na mea like, ua kuponoia i ka makemake o ka lehulehu a me ka lahui, aole hoi, e like me na dala, e hoomaunauoa wale ia nei ma kekahi mau mea e ae, i pili paa ole mai ka pomaikai i ka lahui, a hoomau ole mai hoi i ka aina, i na inoa hanohano, he akamai i na hana noiau a pau.

            O ka waihoia ana aku o kekahi mau keiki nunui o ke Kula ma Keoneula, maloko o ka lima o kekahi poe i akamai ma na hana i hoikeia maluna, e ao ia mai ma ia mau oihana, ke ae pu ka Papa Hoonaauao, ua oi ae ia mamua o ka laweia ana aku maluna o na mahiko, e pani i na hakahaka o ka poe Manihiki a poe e ae paha, i ikeia o ke kanu ko, ka holehole a me ka lawe laina ko kahi hana.

 

            Ka Halawai ana o na Emepera o Geremania a me Auseturia.

 

            O ka hoana e ia ana o ka halawai o na Emepera o Geremania a me Auseturia, ma kahi i kapaia o Gasteine, e kokoke la i Salzburg, me he mea la, he halawai ano nui ia, mamua ae o ka halawai lulu lima wale iho no.  Me he mea la, he mau helehelena noonoo pili aupuni ikaika, ke hanaia ana malaila.  Ke houpuupu mai nein a kanaka alaa huli mea hou, e komo pu ana iloko o ia noonoo ana na mea e pili ana ia Roumania.  Iua io pele, alaila, o ka lawe io ia ana mai e noonoo i ka mea i ike mau ia, “Ka ninau o ka Hikina,” no ka mea, o ke kaiki wale ana ia Roumania, aia malaila ko Rusia nee mua ana mai i ke kowa o Bosoborasa, (Bosporus) ma ka mea ikaika.

            O ka aina nona ka inoa Roumania, aia no ia ke noe nei mawaena o ka muliwai Dunube ma ka hema, na mauna o Kapatiana ma ka akau a me ka muliwai Puruia (Pruth) ma ka hikina akau.  O ke Kai Eleele ma ka hikina, a o Tureke e nohoia la e na Helene ma ke komohana.

            Elua ona mau mahele Aina nui, o Walacia (Wallachia) ma ke komohana hema, a o Moldavia ma ka hikina akau.  O keia mau mahele aina elua, ua like kona iki me ko ka mokuaina o Missouri ma Amerika Hui.  Aia hoi maluna o ia ili aina, e noho ana na kanaka, he 3,500,000.

            Nana kakai mauna o Kapatiana i alai ae ia Walacia mai ka okana aina mai o Auseturia nona ka inoa o Traanaselavania.  Ma ka heme iho o Walacia e moe ana ko Tureke apana o Balgaria; ma ka hema aku olaila o Rumelia, kahi e ku la na Kulanakauhale Adrianople a me Konotinopela.  Ma ka hikina aku o Moldavia, e kahela mai ana ka aina paapu i na kanaka o Rukini, i hoomauia ka aina, e na muliwai Boresine (Borysthenes) a me Deniseta, (Doeister) aka, o ka okana aina pili loa mai o Russia, o Besarabia, e waiho kahelahela ae la ma na kappa o ka nuli wai Peruis.

            O ka lehulehu o na kanaka o Roumania, he poe hoomana Helene, a no ia mea, mamuli o ka hipuu paa o ka aoao hoomana (no ka mea he naaupo,) ua pili loa ia Russia.  Ma ke keneturia i hala aku, ua lilo mai ia Russia ma ke kaua ka okana o Moldavia, a ua hoomalu oia he wa pokole loa, aka, ua hookuuia aku ma ke kuikahi, a ua uhi mai ka mana o ka ke Suletana o Tureke hana mai kona mamo mai, i ka hoomalu ana, ahiki wale mai i ka hapalua o keia keneturia.  Mai ka 1711 ahiki i ka 1812, ua lilo i ka Emepera o Russia ma kana mau kaua, o Bessarabia, oia no hoi kekahi hapa o Moldavia Tureke.

            I ka 1826, ua hanaia he kuikahi e haawi ana i ka mana no ke koho ana i poe Hospoda (Hospodars) oia hoi na inoa hoohanohano i hookauia aku no na alii e hoomalu ana ia Walacia a me Moldavia; aka, aohe i emo iho lawe lina ikaika ae la no o Russia, a lilo iaia i ka 1828, a paa iho la malalo o kona malu a hala he makahiki.  A i ka wa i hanaia ai ke kuikahi ma Adrianople, e haawi ana i na kanaka o ka aina he mana e kono i alii nana lakou e hoomalu, a e hoopau ana i ka mana o na Puali koa Rukini a me Tureke e noho mai, nolaila, ua noho mai me ka maluhia malalo o kekahi alii no ka aina iho a hiki i ka 1848, ala hou main a hoopaapaa, a komo hou mai no o Russia me konamau koa, a noho maluna o ua mau okana aina la, a kapae ae la i ke kuikahi o ka 1849.

            Ma ke kuikahi hoi o Parisa I hanaia ai i ka 1856, ua hookomo pu ia ka noonoo anan ia Roumania ma ka ahakuka o na mana nui o Europa.  Mamauli o ka noonoo ana o keia Ahakuka, ua kohoia o Alekanedero Couza i alii no keia mau okana aina a pau kona ola.  Ua hooia aku ke Suletana o Tureke ia hooholo ana a pela no hoi o Farani, aka, aole nae ia i oluolu i ka manao o na mana nui e ae o Europa.  Ua noho alii mai o Couza ahiki i ka 1866, a ia Manawa, hoowahawahaia mai la ua Couza nei e na aoao o na makaainana, a ua ulu mai he kaua kuloko, a knonia mai la ia e haalele i ka noho ana alii.

            No ka nele ana i ke alii ole, nolaila, ua koho like ae ka Ahaolelo o na Makaainana ia Couna Flanders ke kaikaina o ka Moi o Blelgiuma i alii no lakou, aka, ua hole mai ke Couna i ka lakou koho ana.  I ka malama o aperila 1866, kohoia iho la ke Keiki Alii Kale o ka ohana Hohenzollem, a kaikaina hoi o ke keiki Alii Leopolo i mea ia iho nei i Moi no Sepania a kaua ai o Farani me Perusia-mamuli o ke koho lokahi ana a na makaainana.  I ka huiana o ka Ahakuka o na mana o Europa, ua kue mai lakou i keia koho ana, ua kue i ke kuikahi i hanaiia.  Hoopaa no nae ka Ahaolelo o Roumania i ka lako koho ana ia ke Keiki Alii Kale, a no ia mea, ua ae pu mai no hoi ke keiki Alii i ka lakou kohoana.  Ia Haulelau no, lawe ae la ke Keiki Alii i ke kalaunu, a hoohikiia iho la ia malalo o kana oihana.

            Hoomakaukau mai nae ke Suletana i kona noho alii ana, a olelo mai, e kipaku ia Kale ma ka ikaika o kona mau koa; aka, ua papaya aku nae ke Suletana, aole make hana wale mai, nolaila, ua oki pu wale oia, a no ia mea, ua hooiaioia ka manao o Ke Keiki Alii Kale a me kona mau Hooilina.

            I ka noho alii ana o keia keiki alii, he keu aku ka puhipuhi ahi, a ua kupono ole i ka makemake.  He alii Katolika oia, a no ia mea, ma kea no hoomana, aohe ana aoao e  oluolu ai.  Ua ae aku oia e hoopai ikaika loa i na Iudaio.  Ua hoopilia mai oia e Tureke no ka hoohaunaele ma Bulgarin, a pela no hoi o Auseturia i hoopii, mai ai, no ka hooweliweli e hakihaki I ke kuikahi o Teranaselavania a me kona ake nui, e hoohui aku ia okana aina me kona.  I ka nana ana iho i ka haunaele, ua nawaliwali oia, a o kea no kamalii a kaukau alii ona malalo o Rusia, pono ai oia a puipui ai ko ka Emepera pono.

            Iloko o na malama ekolu I hala iho nei, koi pinepine ua Keiki Alii nei e waiho i kona noho alii, aka, aole nae hiki iki; a uamanaoia, no ko Russia a me ko Perusia mau mana i paa hou ai iaia.  Mai ia Manawa mai a hiki i keia wa, ke hoomakaukau nui nei o Russia, me ka makaleho no paha maluna o Tureke, a me ka manao e hooponopono huo no keia ninau nui o ka hikina, ma ka lele ana mai ia Auseturia, a lilo hou o Roumania ia Russia.

            O keia iho la paha ke kumu nui o ka halawai ana o na Emepera o Auseturia a me Geremania a me ke kauoha ino ia ana o ke Keiki Alii Bisimaka, na Kuhina Auseturia Von Beust a me Andrassy a me ke kokua Kuhina o ko na aina e o Geremania, e hele i ka halawai a na Emepera ma Gastein.

            E haka pono ana ke ao hooponopono aupuni maluna o ka halawai a keia mau Emepera me ka waiwai, no ka mea, malia paha o hiki aku ka hopena i ke kaua koke ano, a i oleia, o ka hoopaa i ka maluhina o Europa no na makahiki loiki, mamuli o ka hoopanee loa ia ana o ko Russia manao kaua.

 

“PO KAENA I KE EHU O KE KAI”—Oia ke poo o ka olelo pane a S.W.Kalia I ka olelo a S. Kaaiai i puka ma ka helu 36 o keia nupepa, no na mea e pili ana i ka pahu pila  o Kaliki i hana ino ia ai.  No ka pilikino o ka pene o keia palapala i ka haiolelo o Kalihi, oiai, aole nana i hoolaha i kela olelo mua, nolaila, ke manao nei makou e kapae ai i kau pane e G.W.Kalia.  Aole ia he hana naauao kou hauhili wale ana maluna o ka mea aole nona ka haioleleo akea au e lele kamoko mai nei.  Ua ike makou i ka mea nana ka pane ma ka helu 36, aole nae ka mea nona ka inoa au e nuku ino mai nei.

NU HOU KULOKO.

Oahu.

 

Mai poina ka lehulehu i ka nana ae i na olelo hooluha e puka nei ma ka nupepa.

 

I ka weheia ana o ka Hale Kuai Lole o Komo ma laua o Fereda, ua ike mai ka lehulehu ia laua.

 

Ke aneane mai nei paha e hoi main a keiki o na kai loa o Aukaki a me Arita, ke pa kukiki mai nei hoi ka makani

--

O ke kolu paha keia o na hebedoma o ko ke kuna Pauahi hana hou ia ana.  Ina no nae hoi e paa ae, alaila, he moku hou oia.

 

KILAUEA NO HILO.—Ma ka hora 5 o keia Poakahi ae, e holo ana ke Kilauea ma kana huakai holo i Hilo

 

Ma ka auina la Poakahi iho nei, ua holo aku ke Cometa i Kapalakiko me na waiwai i hiki aku ke kumukuai ka $16,272,

 

Apopo, e ku mai ai ka mokuahi Mose Tele mai Kaleponi mai, me na nu hou.

 

Ua hiki hou mai nei no he mau noku lanahu no keia awa, a eia ke hoolei mai nei i ua ukana la.

 

Ma ka mokuahi o Uwepa o ka la 11 o Okatoba, e hoi mai ai ka Luna Hoopuka o ke Kuokoa mai kana huakai makaikai aku nei ia Amerika Hui.

 

I keia mau la iho nei, aole i holo lea ka hana a ka Mekini hana hau, no kekahi mau hemahema.  Malaila makou kahi i makaikai ai i Poalua iho nei.

 

Oi mamao aku nei ka heihei lio a ei ae no ma Kula o Kahua ia e hono mai nei i ka holo o ka lio.  Ma ke ahiahi Poalua iho nei ka ikeia ana aku.

 

Ma ka Poakahi iho nei, ua laweia a eke kao kakaia pou uapo a hiki ma ka muliwai o Kamika, ma kahi o ka uapo a Haaliliamanu.  I laweia ae ia e kakia I na pou uapo o kahi e hanaia la.

 

Eia o Kaulu ke kope lepo nei ma o iho o ka uapo mokuahi ma Ainahou.  O ka lepo e loaa ana iaia nalaila, ke laweia mai la e hoopiha mauka iho o ua uapo hou la, a hooku a aina iho ia kai naele.

 

Ma ka auina la o keia Poaono, e haawi ana ka Poe Hookani Mele maloko o ka hele, i kekahi anaina, e hoike i ko lakou makaukau ma ia mea, maloko o ka luakini o Kawaiahao.

 

Ma ka Poakahi iho nei, ua ku mai la ma keia awa, ka noku kiapa kalepa Hawaii R.C.Wale iloko o na la he 117 mai Beremana mai, me na waiwai i kau ia mai ma ko Kale Olelo e ma inoa.

 

Ma Ulakoheo, aneane hiki aku ke kumukuai o ka awe hee nui hookah i ka elua dime ina ua na wahine pakaukau ake bipi e hana mikioi mai.  Ehia la mau poke, o kahi nioi iho la, kahi lau limu ae, o ka make a lilo no ia o ke dime.

 

Ke Kau Kiure.—Ma ka pule mua o Okatoba aenei, e weheia ai ka Aha Hookolokolo Kiure o Oahu nei ma Honolulu.  Ia wa, e laweia mai ai o Moluhi, kela pepehi wahine mainoino ma waiahole, a hookolokoloia.  Ina i ku ka hewa, alaila, ua makaukau ka amana nooa e kau lia ai.

 

NA OLAI.—Ua hiki main a lono i Honolulu nei, ma ka hora 12 a me 20 minute, o ka la 13 o Sepatemaba nei.  Ua hoonaueue iho he wahi olai uuku, ma Waimea a ma Kailua, Hawaii.  O na ukali no paha ia a na la poluluhi iho nei o kakou i hala.

 

KA HOTELE HOU.—Ma ka Poaono iho nei, ua hoau iho ka poe paahana o ka hotele hou i ua hale la, a ua konoia mai lakou e olioli a e lealea a palahuli kea lo ilalo i ka ka mea o ka uakauka o ka nuku i pahee o ka meainu, a poina ka uku hana o ka pule o kekahi poe aole i ohi.

 

KE KINIPOPO.—Ma ka Poaono aku nei I hala, he la ia a na hui kinipopo kamalii i hoana e ai e ulele, aka, no ka hiki ole mai o ka hui o na kamalii kanaka, polaila, ua poholo pu iho la.

 

KA HOOLELELE PA.—O ka hoolelele pa a ka poe i hoomaamaa i ka lelele pa maluna o na lio, ua hala aku la ia me ka lealea ma ka Poaono aku nei i hala me ka poino ole o kekahi, a malia paha o kaupiuai hou iho ia poe lealea.

 

MA KA UKA WAOKELE—Ma ka Poaono o ka hebedoma i hala, ua malama ae kekahi poe opiopio o na aoao elua o na kamaaina haole, i wahi paina liilii ma ka uka waokele o Manoa, a maloko hoi o ka hale o ke Kama ailii wahine make I hala.  Ua holo aku ia poe, a komo iloko o ka ulu laau, I hoopaluia e ka ua kuahine.

 

LAUKANAKA.—Ua laukanaka loa ka uapo o Kamika i keia mau la i ka hele ia e na lio, kaa a me na wawae kanaka, no ka paa o ka uapo a Haaliliamanu i ka hana a na kamanae kapili hou nei.

 

Ua loaa mai ia makou kekahi palapala mai Kohala mai, a o na olelo maloko, e koi ana i kekahi luna haole hou i kohoia no ka Mahiko o Kohala, e hoopau ae.  No ko makou i ka mea nana ia palapala, mai kakau huo maii na manao o ia ano, o poho hewa ka kuhi.  He hewa ka oe ka palapala aku i na ona nona ia waiwai.  Heaha auanei ko makou wahi lihi iki.

 

E haiolelo ana o D.K.Kahanu a me Nopoliona Nihi maloko o ka luakini o Kawaiahao, i ka po o ka la apopo, (Sabati) no ke ino o ka wai ona.

 

I ke ahiahi o ka la 6 o Okatoba, i ka hora 7, e haawi ana ke Kula Nui o ke Ehukai i po nui.  A e hooliloia na loaa no ka aie o ka apana o ia kula

 

He akahele ole na kanaka i ka haku ana i na manao pane hoino wale aku i kona hoa kanaka ma ke kappa inoa ana aku, oiai aole lakou i ike.  E oki ia hana.

 

PAU I KAUAI.--       I keia mau pule i hala, ua ike iho makou i ka pau i ke kakahe i ka holo i Kauai o kekahi mau moku kuna holoholo pili aina i hele ole ma ia mau awa o Kauai.  Ua lohe mai nae makou, no ka nele ukana o Hawaii a me Maui.

 

Ua ku ae ma Hanalei, ma ka la 15 o keia malama, ka moku kuna Cussie Lyons, he 38 na la mai Iapana mai, el holo ana i Honolulu nei.  He elua haole maluna ona, me ekolu lapana.  Ua ku loa mai nei i Honolulu.

 

HANA IO.—Ua hiki mai io makou ka lono, ua hoopaiia e ka lunakanawai J.W.Nakuina o Hanalei, o Kahiamoe, he $80.00 a i ole makahiki ma ka hale paahao, no ka hihia hana wai ona.  Aia ka hana a ke keiki hou la.  Pehea la ka hoopai a ka Lunakanawai mua o ia apana?

 

Ua ninau main a keiki o Molokai i ka ninau ma ke Alaula.  “Ua laewia ae anei ka hoomaikai mai a Maria aku?”  Haina.  Aole i laweia ku a hiki i kona la make, a mailaila mai a hiki aku i ka la nui o ka Heku, ina nia o Maria ma ka Parediso e noho la.   J.W.Moiliili.

--

E KALUAAHA E.—E hai aku oe e ke Kuokoa ia Kaluaaha i ka haina o ka ninau a lakou.  “Heaha la ke koilipi a luane e waiho ana ma ke kumu o na laau?” Mat. 3:10.  Eia ka haina.  “O ka inaina o ke Akua.” Oia iho la ka haina a ke Kula Sabati o Kamoiliili i Oahu.  J.W.Kamoiliili.

 

NELE LOA.—A hiki loa mai i ka hora o ko makou hoi ana e pai i ka kakou pepa o keia la, aole no i hoike mai kekahi o na mokuahi mai Kaleponi mai i kona mau helehelena.  Kokoke e akahi malama o ko kakou noho nele ana i na mea hou ole, a me he mea la nae, e piha loa ana ka nupepa o keia pule aku i na mea hou.

 

KA MOIWAHINE O NA HANA KUPUA.—Ma ka po Poaha iho nei, ua wehe mua ia imua o ke anaina nui, ma ka Hale Hoole Waiona o Buffama, na hana akamai a kupua a ka Moiwahine o ia oihana, oa o  Cora de Lamond, ka wahine kaulana hookah ma ke kilokilo ma kea o nei.  Ua kupinaiia kana mau hana i ka ponei maia wahi hookahi.  O ka wahine i hoopania-kona kau ana ma ke ea, oia kekahi o kana mau hana akamai, aole nae ma ke ano kupaa, aka, ma ka ikaika o ka Magenta o ke kila.  He mau hana maikai wale no kaua i hoikeike mai ai, pela e hana aku ai i na hana mana kupua a pau nap o ekolu.  E hele ae e ike no oukou iho.

 

KA ULUAOA HIMENI.—Iloko o keia mau la ma Honolulu nei, aole paha e emi malalo o ekolu mau Papa kula himeni, malalo o na alakai ana a ka poe i maamaalea iki ma ia hana.  Aia ma ka apana o Kapalama, o J.Kalama ke kumu, he 14 haumana; ma ka apana o Kunawao, o S.Taua ke kumu, he 60 haumana, he huiia na luaui kane a wahine me na opio; a ma ka apana o Pauoa, o D.Keaweamahi ke kumu, he 11 haumana.  O ka makou e kau leo aku nei, e hooikaika a loaa ia ike, aole ka hana a haule pu wale iho e like me kekahi mau uluaoa himeni ma kekahi mau wahi e ae.

 

HOI MAI KA AINA HANAU.—He mea no paha e alohaia ai ka hoi ana mai o kekahi o na welo a ke one o Hawaii nei, oia ke kaiki kane mua a Kalauki pake, o keia kulanakauhale i hoi a make ma Kina, mahope iho o ka hala ana o na makahiki he 21 ma ka aina o kona makuakane.  O kona makuahine, he wahine Hawaii maoli nei no.  Ua noho oia ma Kina a hapai i kekahi hana, a o ka mea waiwai nui paha, o kona noho ana e ao i ka hoonohonohohua, a iloko o na makahiki loihi ehiku i noho ai oia, he mea ulele hua kepau.  Ua hiki iaia ke olelo Beritania me ka maikai.  Aloha ino ka hele ana i ka aina malihini, a haupu ae ka manao e hoi i ka aina hanau, e ike i kona mau hiohiona, a e hanu hou i kona mau ea oluolu.  Oia ano keiki Hawaii, ua hiki ke aloha ia.

 

Maui.

HAPAWALU KENETA MA NA WAI EHA.—Ma ka Poakahi la 4 o keia malama, ua ike au i kekahi Hapawalu keneta ma na wai eha nei.  Ma ka lima o kekahi kanaka malihini, P.Kaenaena.  O kahi i loaa mai ai iaia mai loko mai o na Hale Pake, a ua haohao no ko makou mau maka malihini i ka ike ana i keia hapawalu keneta.  Ua kau ia i na hua helu keneta 12 ½ , a me na hua kuni elua e kau ana ma kekahi aoao W.P. Pae mai la na leo kamaaina, he hapawalu maikai ken a.  Ua puni na wai wha nei i ken a hapawalu keneta.  Ina oukou e hele e kuai ma na wahi a pau o na wai eha nei, e lilo anan no.  A ma ka Poalua ae la 5, ua lawe aku au e kuai ma ka hale hui o Waihee, a ua lilo aku no i kau me i makemake ai.  Eia wale no ka mea nui a kou manao i anoi ai.  O ka laha ana o na mea ino ma na wai eha, aole he nele dala ma keia mau wai, he pepa alualu ka mea mua i hoolah ia ma keia mau wai, he pauku kepau kekahi, he keneta hou keia aole paha e paa keia makahiki.  P.Keahi.

Waiheu, Sepatemaba 1871.