Ka Nupepa Kuokoa, Volume X, Number 27, 8 July 1871 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

Ka Uwe o ke Kaikamahina makapo

1.Aole au la i uwe

no ka ike ole ae

i na manu lele mele nei,

i na pua aala mai;

aole no nae oʻu manaʻo,

aole he maikai;

ae au he nani ko lakou,

me kaʻu i lohe ai.

2. Aole au la i uwe

no ka hiki ole ae

ke nana i ke ao laelae,

i na mauna i paa mau i ka hau,

i na puu i uli mai;

he nani no nae ko lakou

me iai haiiaʻi.

3. Pau ole nae i ka maikai

na manu lele nei

aʻu i hoolohe oli ai,

pela kuu lohe e.

Ua lohe hoi, na pua nei,

mau ole ka maikai,

pa ka makani wela e,

a mae, a helelei.

4.He wahi muli aloha koʻu,

oia kuu alakai,

i kahi o na manu o,

me na pua aala mai;

akaka kona kapuai,

me kona leo pu,

na kona lima makalii

i kai malie iaʻu.

5.  He mau makua aloha koʻu,

kahea olu iaʻu,

a apo mai a honi no

i ke keiki makapo.

Aole au la i uwe

no ka ike ole ae;

ke aloha ole ia mai

ke kumu o ka uwe.

6.  Ina i lohe ole iaʻe

ka leo olu e,

he leo hoomaewa nae,

a loiloi mai,

kaumaha a eha kuu naau,

a ane moku ae,

a kahe na waimaka oʻu,

a lilo i ka uwe.        Hawaii.

 

He Kupueu i ka Moni pahi!

            Hiki ka, ke moni i na pahi!  Ae, pela ka moolelo no kekahi kanaka, Keoni Kumine kona inoa, he luina moku no Amerika.  Pehea la e hiki ai ke moni i ka pahi?  he pahi aha la?  pehea ka nui?  pehea ka loihi?  ehia pahi i moniia? he aha ka hope? pehea ka hoopili ana?

            He pahi kanikani no, he pahi pehu, he mau iniha ekolu, eha, elima paha ka loa, uuku iho paha kekahi.  Na mea e hiki ai ke moni--

1. O ke kaena ka mua-Ua lohe oia i uka ma kauwahi o Farani, a lohe, he kanaka malaila i oleloia e hiki ke moni i na pahi; he oiaio, he hoopunipuni paha kana moni ana.  Hoi o Keoni maluna o ka moku, a olelo kaena, ka, owae hoi kekahi, e hiki iaʻu ke moni i ka pahi, aole i kela kanaka Farani wale no.

2.  Ka inu rana ka lua-Paipai kekahi e hooko i kona kaena ana; hana oe-i ike makou i ka oiaio, ka oiaio ole o kau olelo haanui.  Makau iki oia mamua i ka hoao, aka, hilahila oia i ka hoao ole, o kapaia he kanaka hohe wale.  Nolaila, i mea e pau ai ka makau, inu oia i ka rama a nui a hewahewa wale ka manao, me he pupule la.

3.  Ka hoao ana ke kolu,  Iloko o ka on a, lalau oia i kona pahi kaaikani a hoo iloko o kona waha a pahee wale aku no ia ilalo o kona puu a nalo loa iho la.

            Ko ka, kau olelo kaena-ua moniia kekahi pahi hookahi, aole ana ko makou makemake; hiki anei ia oe ke moni i mau pahi hou? ae, hiki no, homai na pahi pela a pau maluna o ka moku.

            Imiia a loaa ekolu pahi hou, a, ua pau lakou i ka moniia, iwaena ka o ka paipai a hehi olioli o na hoa.  (Naaupo lakou.)

            A hala na makahiki eono, ia ia e noho ana ma Bosetona, e inu rama ana oia me kekahi poe ma kekahi po, a kaena hou oia no kona hiki ke moni i na pahi, a, i akaka ka oiaio, lalau oia i kekahi pahi a moni koke iho no.  A no ke koi mai o na hoa inu rama lapuwale, ua pau na pahi he 14 i ka moniia ma ia mau la iho.

            A mahope iho, holo oia i Enelani, a ua holo e kona kaulana mamua.  Miki koke mai, kekahi poe lapuwale, a koi ia ia e moni i na pahi i ike lakou.  HIlahila oia i ka hoole i ko lakou koi ana a hoaikola mai lakou ia ia; lalau oia i na pahi elima, a pau lakou i ka moniia a ma ka po hookahi.  A ma ia la ae, koi hou mai kekahi poe oia ano lapuwale hookahi e moni hou; kanalua iki nae oia mamua, aka, no ke koi ikaika ia, inu oia i ka rama a on a, a iloko o ka on a ua moniia 13 pahi pelu, he mau pahi nui kekahi.  Ke kanakakolu-kumamalima keia o na pahi i moniia.

            Ke oki no keia o kona moni pahi ana, kanakolu-kumamalima pahi i loko o kona opu, Auwe! he kupueu io keia i ka moni pahi! A, heaha kona hope?  Nui loa kona pilikia a kupaka me ke nahu ino, a hele ke kino a wiwi loa, aole liuliu a make iho.

            Ma ka hoopili ana--

            1.  He kanaka kaena anei oe, a aa e hana i kekahi mea nui a paakiki e like me ka moni pahi?  Mai kaena oe-ke kumu ia o kekahi mau hana naaupo, a lapuwale loa.

            Kaena kekahi põe no ka hiki ke inu i na kiaha, na omole rama, he nui wale me ka on a ole.   Kaena kekahi no ka hiki e lele kawa, a lelepali a hohonu loa me ka make ole.  A, mahope hoao lakou e hooko i ka olelo kaena; a i ka hoao ana, make iho-Naaupo ea.  Kaena o Alekanedero ka nui, ke ʻlii o Makedonia, e hiki ke inu he 12 omole rama; i ka hoao ana e hooko, make e oia, aole pau na omole 12.

            2.Ina he hewa, he lapuwale kou kaena ana, mai hoao mahope e hooko, e waiho aku; mai hilahila i ka hooko ole o henehene a hoaikolaia.  E aho ia i ka make.

            3.  Mai koi aku oukou i kekahi poe e kahana i kekahi mau mea e pili ana i ka make ke hanaia.  Mai hele a nana ia mau hana me ka paipai olioli ke hanaia me ka make ole.  A make iloko o ka hana ana, pili ke koko o ka mea make i na lepa o ko oukou mau aahu,- na oukou i koi, a hele e ike.

            4.  Ke manzo nei anei oukou, o na pahi wale no ka i pau i ka moniia e ka rama?  a he mea kahaha ka keia o ka moni ana i na mea nui a oolea loa e like me na pahi pelu kanikani?  Kii kekahi kanaka inu rama i ke kauka e hele mai e nana iloko o kona puu.  Nana ke kauka iloko o kona puu, a hoole, aole au i ike i kekahi mea malaila, o ka ulaula loa wale no.  Kahaha, he hale pohaku holookoa ilaila, ua moniia e au.

            Ma koʻu inu rama ana, ua nui loa koʻu aie i ka rama ma ka hale kuai, ama keia ua lilo koʻu hale pohaku i mea hookaa i koʻu aie.  He oiaio ka, ua moni oe i ka hale pohaku nui.

            Nui wale ka waiwai i moniia e ka poe inu rama-nui na hale, nui na aina, nui na bipi;-ehia la bipi iloko o ka opu o mea? nui ka opu! he opuahao! daimonio maloko.  E wikiwiki i ka inu i ka laau hoolualuai, i luai ia iwaho o make.  Pau ke dala, he 10, 100, 1.000, 10.000, i ka moniia e ka rama; a hui a hoa o awa, o okolehao, baka-o pioma i ke kokua ana ia rama i ka moni, a moni , a moni a nalo ke poo, ka opu, na wawae, ke kino a pau, me ka uhane pu.  He mau kohola nui keia, e o, e pepehi a make.  Naʻu o Moni pahi e mihi ana.

 

HAPA O KA MOOLELO O KA HALAWAI MAKAHIKI O KA AHAHUI

Euanelio o ka Pae Aina Hawaii,

I ka malama o Iune, M.H. 1871.

 

            O na inoa o na lala i hiki mai i keia halawai, ua paiia ma ka aoao 4, o ka nupepa Kuokoa, Iune 17, pela na inoa o ka Luna hoomalu a me na kakauolelo.

            Eia kekahi mau Konite i kohoia e ka Lunahoomalu:

            1.  Komite Imi Hana-J.F. Pokue, J.D. Parisa, M. Kuaea.

            2.  Komite no na Halawai haipule.  L. Kamika, J.N. Paikuki, S. Waiwaiole.

            3.  Komite no ka Hoike Makahiki a keia Aha Euanelio Hawaii.-T. Koana, W.P. Alekanedera, H. Manase.

            4. Komite no ka papa helu ekalesa.  H. Binamu, E. Helekunihi.

            5.Komite pai Moolelo.-J.F. Pokue, E. Kekoa, P.W. Kaawa.

            Eia na mea a ke Komite Ini Hana i hoike mai:

            1. He hapalua hora haipule mamua o ka hoopanee ana i ka hana, o kela la keia la.

            2.  Na hoike kihapai.

            3.  Hoike makahiki a ka Papa Hawaii a me ka Puuku.

            4.  Na palapala hoopii.

            5.  No ka hooponopono ana o na hana a ka Ahahui Euanelio.

            6.  He mea pono anei i na ekalesia e lulu dala no ka pono o ka hele ana o na kahu, a me na elele, i ka Aha Euanelio ma Honolulu?

            7.  No ke kula kahunapule.

            8.  O na dala i luluia e na ekalesia Hawaii i ka wa e kaapuni ai kekahi misionari mai na aina e mai, nowai la ia dala?  nona iho anei?  no ka Papa Hawaii paha?

            9.  No na kokua.

            10.  No ka Opiuma.

            11.  No ke Alaula.

            12.  No na dala Jubile i waihoia ma ka waihona o ka Papa Hawaii.

            13.  No ka hookomo ana i na hoike kino no na moolelo Baibala, ma na aha himeni kokua dala no na hana o ka ekalesia. 

            14. No ka halepule o Silama.

            15.  He mea pono anei i keia Aha ke lawe i ka hana haiao a na makua, ma keia hope aku, anana?

            16.  Heaha ka manao o keia Aha ma ka palapala pule malama a Laiana makua?

            A pau ka noonoo ana, a me ke kuka pu ana i ke Kumu Hana 6;-ua waiho mai o Rev. M. Kuaea i kekahi olelo hooholo;

            Hooholoia.-Ke manao nei keia Aha, he mea pono i na ekalesia e lulu dala no ka pono o ka hele ana mai, a me ka hoi anaʻku o na kahu a me na elele o ka Ahahui Euanelio Hawaii, i ka Ahaolelo Makahiki, i ole e hooemi ke dala o ka waihona o ka Papa Hawaii, i haawiia mai no ka hoolaha ana i ke aupuni o ka Haku maloko nei, a mawaho; a na na Aha mokupuni e hoomaopopo loa i keia hana.

            Kumu Hana 2, "Na hoike kihapai."

            Heluhelu mai o Alekanedero i ka hoike a ke Komite imua o keia Aha, penei: "Ua hookumuia na hoike kihapai imua o ka Aha misionari i na halawai makahiki i ka wa-he kakaikahi na ekalesia ma keia mau mokupuni.  I keia wa, ua ano e, he 60 paha ekalesia i keia wa, a ua hookumuia na Aha mokupuni ma Hawaii, ma Maui, Ma Oahu a me Kauai.

            No laila e Hooholo kakou-e waiho kakou i na hoike kihapai na na Ahahui mokupuni, a e hoike pakahi mai na Ahahui mokupuni, a e hoike pakahi mai na Ahahui mokupuni ia kakou i kela makahiki keia makahiki; e hoike ana i ke ano nui o na kihapai ma kolakou mau kalana; koe na papa heu, ma kela me keia kaho e hoike imua o keia Aha.  Ua hooholoia.

            Kumu hana 11.-No ke Alaula

            Mahope o ka noonoo ana, a me ke kuka ana, na waiho mai o Rev. W. Kahookaumaha i kekahi olelo hooholo, pene:  Ma ka manao o keia Aha, o na kahu ekalesia, a me na kahu kula SAbaati e hooikaika iwaena o na ekalesia, e lawe nui na kanaka i ke Alaula.  Ua hooholoia.

            Kumuhana 12.-No na dala Jubile&e.

            Ua waiho mai o M. Kuaea i kekahi olelo hooholo. 

            Hooholoia.- O na dala a pau i lulu ia no ke kia hoomanao Jubile, e hooliloiaʻku i na buke elua i makaukau i keia manawa.  Buke wehewehe o Mataio: a me ka Buke kuhikuhi pauku.

            Kumu hana 7.-No ke kula kahunapule.  A pau ke kuka ana no keia kumu hana, ua haawiia i kekahi komite e noonoo, a e kamailio pu na makua e noho paa ana ma Honolulu nei, aole nae loaa ka mea i makaukau e hapai i keia hana nui: nolaila, eia ka mea a ke Komite i haawi mai i ka Aha: "E noi aku ia Rev. C.B. Aneru e kokua mai oia i ke kula kahunapule ma Wailuku: a e hooikaika nui kakou a pau e alakai i na kanaka ui kupono ma na mea e makaukau ai lakou i ke ao aku i kanaka."  Ua aponoia.

            Kumu hana 13.-No ka hookomo ana i na hoike kino no na moolelo Baibala, ma na aha himeni kokua dala no na hana o ka ekalesia.

            Hooholoia.-Na ka manao o keia Aha, o ka hoike kino ana i na mooleio Hemolele o ka Baibala, i mea e loaa mai ai ke dala, ai mea hoi e alakai aku i na kanaka iloko o na hana lealea o keia ao, aole ia Iesu:-e pono i keia Aha e kauoha aku i na kahu ekalesia. mai ae aku e hana i keia hana ma na kihapai o kakou.  Ua aponoia.

            Kumu manao 16.-Heaha la ka manao o keia Aha, no na kumu pule hui no kela me keia la o ka malama, a Laiana makua?

            Noi mai o L. Kamika e paiia iloko o ka nupepa Kuoka, a me ka nupapa haole, a ma kekahi mau pepa liilii hoi, e waiho iloko o ka Baibala no ka pule ohana.

            Kokua mai o Koana ia Kamika, a pakui hou mai, penei:-"E paiia i 500 kope ma ka olelo Hawaii, a 500 kope ma ka olelo Beritania."  Ua hooholoia.

            Noi mai o W.P. ALekanedero, e malamaia ka hebedoma mua o a Ianuari, M.H. 1872, i hebedoma haipule;-a e malama ia hoi ka Paha hope o Feberuari i la haipule no na kula.  e pule pu me na Kristiano a puni ka honua nei.  Ua hooholoia.

            Kumu manao 3.-  Hoike makahiki a ka Papa Hawaii, a me ka Puuku.  "Ua nana pono ke Komite i ka moolelo o ka hoike makahiki a ke Kakauolelo o ka Papa Hooko o ka Ahahui Euanelio o ko Hawaii Pae Aina, a me na Pae Aina o maikonisia, a me Nuuhiva.

            A ke hoike nei ke Komite i ka manao mahalo no ka ke Akua mau hana, ka holo ana o kona aupuni, a me ka laha mana ana o kana Euanelio nani, ka mea e pomaikai nui ai na uhane o kanaka.

            Ke nee nei ka manawa, aole ku mau ma kahi hookahi: pela no ke aupuni o ka Haku i kukuia, a hoolahaia ma keia Pae Aina, a me na Pae Aina o Maikonisia, a me Nuuhiva.  Ke hele nei no na hana o ka pono imua,  Aole nae i nele i na mea alalai, a me na keakea, ua loaa no ia mau mea, a ua halawai no me ia mau pilikia: aka, aole nae i paa mai ka laha mana ana ʻku o ka ke Akua pono; ua hu aku no, me he wai kahe la, i paa ole i ke keakea ia e na pohaku a me na opala.

            He nui na mea e maopopo ai ka hele ana imua o ko ke Akua aupuni, i ikeia na ka hoike makahiki a ke Kakauolelo a ka Papa Hawaii; aole nae e hiki ke hoike pakahi aku ia mau mea;p aia no ma ka moolelo o ka Papa e ikeiaʻi ia mau mea.

            Ua pono ia kakou ke hoomaikai nui aku i ke Akua, no ke kokua pu ana mai ma keia hana nui, ma ka lima o kana poe kauwa liilii.  A he pono no hoi i ko kakou Papa ke hoonui hou ae i na hana e pono nui ai ko ke Akua Aupuni, ma keia Pae Aina, a me na aina e.

            E. Kekoa }Komite

            T. Koana} Komite

            Eia hoi ka manao o kekahi Komite.  "Ua nana akahele maua i ka palapala hoike makahiki a ka a Puuku o ka Papa Hawaii, o E.O. Holo, a ua pololei ka hana ana."

            J.D. Parisa}Komite

            M. Kuaea}Komite

            Poalima, Iune 15, hora 10 kakahiaka.  Ua malamaia ka Ahaaina a ka Haku, Rev. T. Koana a me Rev. E. Kekoa na mea nana i lawelawe.

            A pau ka ahaaina, ua noho ka Aha ma ka hana mau.

            Heluheluia ka moolelo Hawai, a ua aponoia me ka hooponopono.

            No ka hoopanee.  Ma ke noi o Alekanedero, aia a hoopanee keia Aha, e hoopanee a hui hou i ka Poakahi elua o Iune, la 11, M.H. 1872.  Ua hooholoia.

            Ua malamaia ka hapalua o ka hora ma ka haipule-alaila ua hookuuia keia Aha, e hui hou i ka la 11 o Iune, M.H. 1872, ma ka hora 10 kakahiaka.

 

He wahi manao kumu no na mea nui ma loko o ka ke akua olelo.

Na Davida Malo.

 

            Ua lohe au, ua olelo iho oukou, Aole e ala hou mai ke kino.

            alia oukou e olelo ae pela, a e noonoo iho i akaka.  Pehea laoukou i ike ai ia mea?  He mana no ko Iehova e hanaʻi pela: he manao no kona e hanaʻi pela, no ka mea, ua paa ma kana olelo ke kakauia.  E noonoo pono oukou, ua kanu iho paha oukou i kekahi kumu maia uuku: ua kanuia ma ka lepo, aohe mea e ae e kokoke ana, o ka lepo o ka lewa.  A ulu mai no ia i kumu maia nui, elua paha anana ke kiekie, a hua mai i ka opuu maia.  Nohea mai keia mea nui?  Noloko mai anei o ka lepo?  E i mai paha oukou, ua ulu wale mai no ia.  Ae aku no au, ae, ua ulu wale no, a pehea kona ulu ana?  E hiki anei ia oukou e hooulu mai, a e hoonui mai i ka mea kanu, ia oukou wale no?  Aole no e hiki.  A heaha i amua mea, e lilo i kumu maia?  ma ka milimili ana, he wai ka nui, a o ka lepo maoli kekahi.  A o ka mea e hiki ia ia ke hoolilo i ka lepo a me ka wai i kumu maia, aole anei e hiki ia ia ke hoala hou mai i ke kino o ke kanaka?  E nana oukou i ka ulu laau: nawai i hookupu mai kolaila mau laau?  I ka ulu ana, heaha ka mea e komo aku ai i mea e hooulu mai ai?  O ka mea nana a hiki ia ia ke hooulu mai a nui, aole anei e hiki ia ia ke hoala mai i ke kupapa, a e hookomo hou i ke ea iloko o ia mea?  O ka mea nana i hana mua na mea a pau, aole anei e hiki iaia ke hana hou i kekahi mea ke naha ia, a ke make paha>  Ua hiki no.  A o ka mea nana i hana na mea a pau, oia no ke Akua, a ua hiki no ia ia ke hoala hou mai i ke kupapau, e like me kona hooulu ana mai i ka maia maloko mai o ka lepo, a e like hoi me kona hookupu ana mai i ka ululaau noloko mai o ka lepo.

            Nolaila, o ka oukou olelo ana, aole e ala hou mai, ea, ua hala ia manao ana.  Ua maopopo ia mea i ak apoe noonoo, no ka mea, i ka po e hiamoe ai na kanaka, a i kakahiaka, ala mai, a pela no na hua i kanuia ma ka lepo e ka poe mahiai, a waiho no ma ka po o ka lepo, a i ka ulu ana mai, ulu mai no maka la, pela no ke ala ana mai o na kanaka i ka la mahope, no ka mea, na ka po e moe ai, ma ka la e ala ai.

            Ina e paa ko oukou manao, aole he Akua, e kupu wale mai no na mea kanu, aole na ke Akua e hookupu mai, aole anei e ala wale hou mai ke kupapau ke kanuia?  Owai ka mea e hiki ke hoole?  aole e like ka manawa e ulu mai ai ka anoano ke kanuia, ulu koke mai kekahi, a loihi loa ke kupu ana o kekahi mehe niu la.  A pehea la oukou e ike ai, aole e ala hou mai ke kupapau kanaka?  A in a e haalele oukou ia manao, a hooiaio mai he Akua no, aole anei e hiki ia ia ke hoola mai i ke kupapau e like me kona hookupu ana i ka laau a me ka weuweu, a me kela me keia mea?  Ua maopopo, e hiki no.

            Eia ka ke Akua olelo:  "E ninau mai au anei kekahi.  Pehea la e hoolaia mai ai ka poe make?  E hele mai lakou me ke kino hea?  Ke, he lapuwale!  Aole i hoouluia ka mea au e lulu nei, ke make ole ia."  1 Korineto 15:35,36.  "Pela no ke ala ana mai o ka poe make.  Ua kanuia oia ma ka palaho, ua hoalaia mai oia ma ka palaho ole.  Ua kanuia oia ma ka ino, ua hoalaia oia ma ka nani: ua kanuia oia ma ka nawaliwali ua hoalaia mai oia ma ka mana: ua kanuia oia he kino maoli, ua hoalaia mai oia, he kino uhane."  1 Korineto 15:42-44.

            No ia mea, o ke Akua, o ka mea e hiki ia ia ke hookupu mai i ka laau a me na mea kanu a pau, mailoko mai o ka lepo, e hiki no ia ia ke hoala hou mai i ke kupapau kanaka ma kana olelo, ua akaka kona manao e hana pela ma keia hope aku.

            4.  Ua lohe au, ua olelo iho oukou, Aole he la nui mahope.

            Alia oukou e olelo ai pela. No ka mea, aole paha oukou i ike i na mea e hanaia makeia hope aku. E ike pono ana anei oukou i na mea a pau e hanaia mai i ka la apopo? Aole paha kakou i ike.  Nolaila, e noonoo pono, aole hoi e olelo wale, aole he la nui mahope.  Ina paha e kau aku ai ke alii nui i kekahi kanawai, aole hoi he hope o ia kanawai, malama no kekahi poe a malama ole kekahi, aole e ahewa ia ka poe malama ole, pehea ia kanawai?  aole anei he mea ole?  A in a he mea ole ke kanawai, pehea ke ano o ke alii nana i kau ai ke akanawai?  He mea ole no hoi ia. A ina he mea ole ke alii, a he mea ole hoi ke kanawai, aole anei he haunaele, a he ku e, a he kaua, a he inoino ka noho ana?  Oia no; pela ke ano o na aina a pau loa ina aole hope o ke kanawai, he haunaele, he ino ka hanaana, aole maluhia iki.

            No ia mea, he mea mau n oi na alii maikai a pau, e kau pu me ke kanawai i kekahi hope, ke malama ole ia ke kanawai, Pili kekahi uku ana o ke kanawai i ka paahao ana, pili kekahi i ka uku ana i na dala, a i ka hemo ana o ka aina, a pili no kekahi i ka make.  A o ka hope o ke kanawai, ea, oia ka mea e maluhia ai kekahi aupuni, i haunaele ole.  A o ka la hookolokolo, oia ka la e hoike mai i ka poe malama, a me ka poe malama ole i ke kanawai.  I ole he la hookolokolo, aole he mea e hoomaopopo ai ka like ole o ka poe hewa me ka poe pono.  No ia mea, o ka la hookolokolo, oia ka mea a pono a i ke aupuni.

             A ua akamai anei na alii o ka honua nei ma ka hoomau ana o ke aupuni, a ua hawawa anei o Iehova o ke alii nui o na alii a pau?  He mea pono anei i na alii ma kela aina ma keia aina ke hookolokolo pinepine i na kanaka, i kinaiia ka hewa, i uluia ka pono, i maluhia hoi ke aupuni, aole anei he pono ia Iehova ke hookolokolo mai i ke ao nei i mea e pono ai kona aupuni nui?  Auhea ka hewa? Nolaila, in a hea mea maikai ka hookolokolo ma na aupuni o keia ao he mea maikai no hoi ia i ka pau ana o ka honua nei, a i ka noho pono ana i kela ao.  Owai ka mea e ike pono, a e hiki ia ia hoi ke hoole, aole pela?  Aole la nui mahope, aole la hookolokolo?

            Nui na mea e akaka ai ka manao, he la nuino mahope.  He la hookolokolo no.  A ma ka ke Akua olelo, ua maopopo.  E heluhelu oukou malaila.

            "Aka, i keia manawa, ke olelo mai nei i kanaka a pau ma na wahi a pau loa, e mihi.  No ka mea, ua paa i kona (ko ke Akua) manao ka la e hookolokolo ai i ko ke ao nei me ka pono na ke kanaka (o Iesu Kristo) ana i ka olelo ai; ua hoike pono mai hoi ia i ka oiaio o ia mea i na kanaka a pau, i kona hoala ana mai ia ia, mai ka make mai." Oihana 17:30,31.

            "Aia hiki mai ke keiki a ke kanaka me kona nani, a o na anela a pau pu me ia; a laila, enoho iho ia maluna o kona moho alii nani.  A e hoakoakoa mai na lahuikanaka a pau loa imua o kona alo; a e hookaawale ae ia ia lakou, i kekahi poe mai kekahi poe ae, e like me ke kahuhipa i hookaawale aku i na hipa a me na kao.  Mataio 25:31, 32.

            Auhea oukou e ka poe e hoole ana, aole uhane o ke kanaka, he kino wale no?  A me ka olelo ana ae, aole o ke Aku amaka lani?  A me ka olelo ana ae, aole e ola hou mai ke kino a hui hou me ka uhane?  Aole hoi he la nui mahope?  E noonoo oukou, no ka mea, eia ka manawa ike ua haʻa ka manawa naaupo.  A ke inaina mai la ke akua i ka poe e manao ana pela, ke kau mai la ka hoohewaia maluna o oukou, a ke noho nei oukou  malalo pono iho o ka hoohewaia, no ka mea, aia no maloko o ka naau kahiko a me ka manao kahiko. 

            Auhea oukou e ka poe naau hoomaloka? He Akua no maluna ma ka lani, a ma na wahi e ae no a pau, o Iehova ka inoa.  A he Akua nui o Iehova, aole he Akua e ae, oia no ka Haku maluna o na mea a pau, ke Alii maluna o na ʻlii, oia no ka mua loa, oia no ka hope loa, oia no ke kumu i paa ai na mea a pau, oia ka mea pau ole a mau loa aku no, aole loa oia e pau iki.  A no ke kipi wale ana o na kanaka ia ia ma ka haalele ana, ua inaina io mai oia.  Aka, ua haawi mai kana keiki ia ia iho i kalahala no na kanaka, a ua lilo o Iesu Kristo i mea uwao mawaena o ke Akua a me kakou, oia no ka i make ma ke kea no ka poe hewa e like me kakou nei. 

            Auhea oukou, ea, ke kali mai nei Iesu ia kakou a pau, a ke imi mai nei ia kakou a apau, a ke ao mai nei oia ia kakou, ke huli mai nei oia ia kakou, ua makemake oia e ola no kakou a pau loa.  Ea, ke kali mai nei Iesu ia kakou a pau, a ke imi mai nei ia kakou a pau, a ke ao mai nei oia ia kakou, ke huli mai nei oia ia kakou, ua makemake oia e ola no kakou a pau loa.  Ea, pehea kakou?  Ke kupu ae nei anei ko kakou manao ia ia?  Ke amanao nei anei kakou e hahai maluna on a?  A in a e hahai kakou mamuli on a me ka manao oiaio akua ia ia, ke hoomau nei kakou ma ka naau hou a me ka manao hou, a ina kakou mamuli oia mau mea, ea, ke noho nei kakou malalo o ka hooponoia maluna pono iho o kakou a pau. 

            Auhea oukou? Ke ola nei ka Mesia iwaena o kakou.  Owai ka Mesia hou a kakou e kali aku ai?  Owai ka inoa ole e ae i haiia make ao nei?  Owai ke kalahala e ae i kakou elohe ai?  Owai ka mea uwao e ae iwaena o kakou a me ke Akua?  Owaika mea e ae i make ma ke kea no kakou?  Owai ka mea nana kakou i kuhikuhi mai i ke alanui e hiki aku ai i ka lani, a me ke alanui e hiki aku ai ilalo o ka po mau loa?  Owai ka mea nana kakou e hoopakele mai keia ao ino aku?  Owai ka mea i lanakila maluna o ka make a me ka hewa?  Ia wai la i haawiia mai ai ka mana o ka lani a me ka honua nei?  nawai la e hookolokolo i na anela o ka lane a me na anela o ka po?  Nawai la e lawe aku i ka honua nei a me ka lani mai o kakou aku?  Nawai la e heluhelu mai ka buke o ka make, a me ka buke o ke ola  a ke keiki hipa?  Aole anei ia Iesu wale no kei amau mea?  He oiaio no, ia Iesu wale no keia mau mea a pau loa.  Ua i mai ka palapla hemo lele.  "oia no ka Haku o na mea a pau."

            O ka malama ana i kana, he naao io: o ka hoopili aku ia Iehova ua maemae; o ka paulele maluna on a, ua ola loa oia ia ao aku ia aku .  O ka hoopili ana ma muli o kana mau kauoha wale no, ua lakoia i ke ola mai keia ao aku a i kela ao. 

            Aka, in a e hoomaloka kakou, ea, e loaa auanei ia kakou ka hope oia mea.  Inea e hoomau kakou ma ka manao kahiko, a me ka naau kahiko, a me ka hoole ana, aole Akua, aole he uhane, aole he la hookolokolo mahope aku, ua maopopo no, he poe kamalii kakou na ke diabolo, a ke hoomakaukau la ia kakou iho no ka lua ahi, a me ka make mau loa.

            Ke aloha aku nei kuu naau ia oukou no ka oukou make ana.  Ke menemene nei kuu naau no ko oukou holo kiki ana ma ke ala e hiki aku ai i ka make, a me ko oukou pee ana ma kahi i hookapuiaʻi e Iehova.

            Auhea oukou?  E hele koke kakou ia Iesu la, e halele loa i ka naau kahiko, a me ka manao kahiko, a me ke kuko kahiko.  A hele kakou me ka naau aloha imua on a a me ka haawi io maoli aku  ia kakou iho nona, nona wale no, nona mau loa. 

            Ano la, heaha ka mea i koe?  Heaha ka mea pohihihi?  He aha ka mea e kali aku ai?  He aha ka mea hookaulua aku ai ?  No ka hemahema anei?  No ka ilihune anei?  No ka lako ole anei?  Aia ia Iesu ka waiwai a me ka hanohano, me ke ola loa o ka uhane.

            Auhea oukou, ea? Ka huki ikaika nei koʻu manao ia oukou, a ke hoolohe nei no oukou.  E make auanei oukou ma ko oukou hewa, nolaila i palapala iho au i keia manao.  Ua pau koʻu ia oukou i ka oukou wale iho no ka i koe.

 

KA NUPEPA KUOKOA,

Hoopuka mau ia ma Honolulu

kela Poaono keia Poaono.

$2.00

No na mahine he Umikumamalua!

$1.00 no na mahine eono,

Me ka hookaa mua mai.

 

             Na olelo hoolaha-aole i oi mamu a o 10 laila ae ka hoopuka hookahi ana, $1.00; alua komo ana, he $1.60; hookahi malama, $2.00.  E uku mua ia mai ke dala o na olelo hoolaha a pau e hoounaia ana mai e pai.

            Kanikau-he 4 keneta no ka lalani hookahi-penei: he 26 lalani, $1.00; 50 lalani, $2.00: a pelaʻku.

            Ka uku no na olelo hoolaha-ka uku pepa, a me eka uku o ke Kanikau, e haawiia no ma ka lima o ka Luna o ke Kuokoa, a i oleia, e hoouna maiia Kauka Kulika.

            Na uku Pepa a pau e hookaa mua mai no-aole e kauia ka inoa o kekahi haole a kanaka maole paha ma ka inoa o ka poe lawe pepa ke ola e hookaa e mai ma mua.  E pono ke hiipoiia keia mau rula, no ka mea, he emi no ka auhau no keia nupepa.

            Aia ke keena o ka nupepa kuokoa-ma ke kena i noho mua ia iho nei e J.W. Aukina, maluna ae o ka Hale Leta.  O na hora hana, mai ka eiwa o kakakahiaka, a i ka ha o ke ahiahia.

                        H.M.  WINI.  Luna Hoopuka

 

"KA NUPEPA KUOKOA."

In published in Honolulu

Every Saturday,

$2.00 per annum, or $1.00 per six

months, in advance.

 

            Advertisements not exceeding 10 lines, inserted once for $1.00, twice or $1.60; and $2.00 for one month; all advertisements must be paid for in advance.

            Kanikaus will be charged $1.00 per page, or 4 cts. a line.

            Payments for advertisements, Subscriptions or Kanikau mau be paid to any of the Agents of the Kuokoa, or may be enclosed in a alter to the Publisher.

            All subscriptions must be prepaid.  No names either of foreigners or natives, will be inserted on the subscription list until paid for.  This rule must be strictly adhered to on account of the low subscription priced.

            The Office of the kuokoa of the the Post Office.  Office hours from 9AM. to 4 PM.

                        H. M. Whitney.  Publisher

>Bound Volumes of the Kuokoa, for sale at the office over the Bookstore-$3.60 each

>Persons having complete sets of the above, can have hem bound by paying $2.00 each

 

NA BUKE

Hoolahaia e ka Papa Hawaii

 

Baibala Hemolele Nui ili gula nani me na kuhikuhi ma na aoao        $12 00

" "        Nui ili eleele kaekae wai gula                         5 00

" "        uuku iki iho, " "                       8 00

" "        Pananaiki iho ili eleele            4 00

Kauoha Hou ili gula nani me na kuhikuhi      3 00

" "        eleele kaekae wai gula                        1 00

" " "                  75

Kauoha Hou Hapa Haole        75

Lira Hawaii 1848 me ke kanawai       25

" " 1856           25

Moolele Ekalesia                    50

Haiao ili lahilahi                      10

Hele Malihini ana                   25

No ko ke Akua ano                25

Lira Kamalii                            25

Hoike Palapala Hemolele       25

Moolelo o Heneri Opukahaia  25

Hoike Akua                            25

Wehewehehala                       25

Ninau Hoike ili manoanoa      25

" " " lahilahi                             10

Kumumua kula Sabati            10

Buke Lawe Lima                    10

He Buke no ka Pope               10

Ui Kula Sabati Helu 8            25

" " " " 4                                    05

" " " " 5                                    25

Buke Euanelia a Ioane            10

Himeni                                    50

Himeni ili nani                        1 00

 

Na Kauoha Hou Pakeke

 

Ili Gula nani                1 50

Ili eleele kaekae nani              50

Ili eleele                      35

 

Kauoha Hou Pakeke me na Halelu

 

Ili Gula nani                1 75

Ili eleele kaekae wai gula        60

Ili eleele                      25

Ka Hae Hoonani (Buke Mele)            25

 

Eia na buke haawi wale.

 

Palapala Liilii -

            Helu 4 - Makemake anei oe i ke ola?

            Helu 6 - E hele i o Kristo la

            Helu 7 - Ka hoi ana mai o ke Keiki Uhauha

            Helu 11 - No ka hoohiki wahahee i ke Akua

            Helu 16 - Ka Eehia ana o ka Ahaaina a ka Haku a ma ka Bapetizo ana.

            Helu 17 - Mai hana ino i na holoholona.

            Helu 18 - NO ka mahi ana, kuai ana a me ka inu ana i ka awa

Ka Davida Malo Kumumanao.

Ka Moolelo o Batimea Puaaiki.

            J. F. Pokue,

Hakuolelo o ka Papa Hook@o ka Ahahui kuane Hooko Hawaii Pae Aina.