Ka Nupepa Kuokoa, Volume IX, Number 50, 10 December 1870 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE IX.  HELU 50.     HONOLULU, DEKEMABA 10, 1870.     NA HELU A PAU 471.

 

KA NUPEPA KUOKOA,

HOOPUKA MAU IA MA HONOLULU

kela Poaono keia Poaono.

$2.00

No na mahina he Umikumamalua!

$1.00 no na mahina eono,

ME KA HOOKAA MUA MAI.

 

NA OLELO HOOLAHA--aole i oi mamua o 10 laina no ka hoopuka hookahi ana, $1.00; alua ko@o ana, he $1.50; hookahi malama, $2.00.  E uku ua ia mai ke dala o na olelo hoolaha a pau e hoounaia ana mai e pai.

KANIKAU--he 4 keneta no ka lala i hookahi--penei: he 25 lalani, $1.00; 50 lalani, $2.50; a pela ʻ ku

KA U@@ NO NA OLELO HOOLAHA--ka uku pepa, a me ka uku o ke Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.

     NA UKU PEPA A PAU E HOOKAA MUA MAI NO--aole e kauia ka inoa o kekahi haole a kanaka maili paha, ma ka inoa o ka poe lawe pepa ke ole e hooka@ e mai mamua.  E pono ke hiipoiia keia mau rula, no ka mea, he emi no ka auhau no keia nupepa.

AIA KE KEENA O KA NUPEPA KUOKOA--ma ke keena i noho mua ia iho nei e J. W. Aukina, maluna ae o ka Hale Leta.  O na hora hana, mai ka eiwa o kakahiaka, a i ka ha o ke ahiahi. 

                                                                                    H. M. WINI, Luna Hoopuka.

 

"KA NUPEPA KUOKOA."

Is published in Honolulu

EVERY SATURDAY,

$2.00 per annum, or $1.00 per six months, in advance.

 

ADVERTISEMENTS not exceeding 10 lines, inserted once for $1.00 @@@@@ or $1.50; and $2.00 for one month; all advertisements must be paid for in advance. 

KANIKAUS will be charged 1.00 per page, or 4 cts. a line.

PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher. 

ALL SUBSCRIPTIONS must be PREPAID.  No names, either of foreigners or natives, will be inserted on the subscription list, until paid for.  This rule must be strictly adhered to on account of the low subscription price

THE OFFICE OF THE KUOKOA over the Post Office.  Office hours from 9 A. M. to 4 P. M.

                                                                                    H. M. WHITNEY, Publisher

            Bound Volumes of the KUOKOA, for sale at the office over the Bookstore--$3.50 each.

            Persons having complete sets of the above, can have them bound by paying $2.00 each.

 

DILLINGHAM & CO.,

- NA -

MEA HOOKOMO MAI A KUAI I NA MEA HAO, NA MEA hana ai, Lole, Pena, Aila, a me na waiwai a pau. 

Helu 95.  Alanui Moi, Honolulu.                              427 6ms.

 

Noho Lio!     Noho Lio!

O NA NOHO LIO MEKIKO A MAKEPONO LOA I humuhumuia me na ili Kaleponi, e loaa no ma ka Hale Hana Noho Lio o

DALTON & BLAUVELT,

430--ly*                                                                       Ma Alanui Moi, Honolulu

 

OLELO HOOLAHA.

 

KE PAPAIA AKU NEI NA MEA A PAU O PAPAAKO-ko me Haleaha, na aina e waiho ana ma Koolauloa, Oahu, aole e hookuu wale i ko lakou mau holoholona maluna i na wahi i hoikeia ae la maluna, ina e komo hewa ka Lio, Bipi, Hoki, Puaa, Miula, e uku lakou pakahi dala, ($1.) ina e hoopau i na mea kanu, e uku hou no e like me ka nui o ka poino a poho.  A ina he Hipa, Kao, Moa, he hapaha pakahi no ke poo, a ina he Manu Kaka, he hapalua pakahi no ke poo, a lua he kanaka kuleana ole, aole hiki iaia ke hele ma na wahi i hai ia ae la maluna, a ina e ku-e kekahi, e uku no ia no ke komo hewa $1.00.  E hopu no ka maua mau Paniolo, oia o Pamawaho me Kauahikaua-                                                AKOWAI, AHUNA, NUO, Pake. 

Haleaha, Koolauloa, Ian. 22, 1870.                                        426--1y

 

HALE PAI KII!

AIA KO ʻ U HALE PAI KII MA

MONIKAHAAE,

Mawaena o ka HALEKUAI BIPI a me ka HALEKUAI MEA AI o S. SAVIDGE ma ke Alanui Papu.  He emi loa ke kumu kuai o na KII.                                                                                  H. L. KEIKI (CHASE.)

422-1y                                                                                     Mea Pai Kii.

 

NA LAAU LAPAAU

A DR. JAYNE.

OIA NA

LAAU KUNU,

LAAU HOOPAU NAIO ME NA KOE

LAAU HOOPAA HI,

LAAU HOOMAEMAE KOKO

LAAU HAMO--PENIKILA,

HU ʻ ALE OLA.

AIA MA KAHI O

KAKELE me KUKE,

Honolulu,                                                        422

 

NA BUKE

HOOLAAIA E KA PAPA HAWAII.

 

Baibala Hemolele Nui ili gula nani me na kuhikuhi ma na aoao.....$12 00

Baibala Hemolele Nui ili eleele kaekae wai gula.................................5 00

Baibala Hemolele uuku iki iho, kaekae wai gula.................................8 00

Baibala Hemolele Pananaiki iho ili eleele............................................4 00

Kauoha Hou ili gula nani me na kuhikuhi...........................................3 00

Kauoha Hou eleele kaekae wai gula....................................................1 00

Kauoha Hou eleele..............................................................................   75

Kauoha Hou Hapa Haole....................................................................   75

Lira Hawaii 1848 me ke kanawai........................................................   25

Lira Hawaii 1855.................................................................................  25

Moolelo Ekalesia.................................................................................  50

Haiao ili lahilahi...................................................................................  10

Hele Malihini ana.................................................................................  25

No ko ke Akua ano..............................................................................  25

Lira Kamalii.........................................................................................  25

Hoike Palapala Hemolele.....................................................................  25

Moolelo o Heneri Opukahaia...............................................................  25

Eoike Akua..........................................................................................  25

Wehewehehala.....................................................................................  25

Ninau Hoike ili manoanoa...................................................................  25

Ninau Hoike ili lahilahi.......................................................................  10

Kumumua Kula Sabati........................................................................  10

Buke Lawe Lima.................................................................................  10

He Buke no ka Pope...........................................................................  10

Ui Kula Sabati Helu 3.........................................................................  25

Ui Kula Sabati Helu 4.........................................................................  05

Ui Kula Sabati Helu 5.........................................................................  25

Buke Euanelio a Ioane.........................................................................  10

Himeni.................................................................................................  50

Himeni ili nani....................................................................................1 00

 

Na Kauoha Hou Pakeke.

 

Ili Gula nani........................................................................................1 50

Ili eleele kaekae nani............................................................................  50

Ili eleele...............................................................................................  35

 

Kauoha Hou Pakeke me na Halelu.

 

Ili Gula nani........................................................................................1 75

Ili eleele kaekae wai gula......................................................................  60

Ili eleele................................................................................................  50

 

Na Halelu Pakeke

 

Ili Gula nani.......................................................................................... 50

Ili eleele kaekae wai gula......................................................................  30

Ili eleele................................................................................................  20

 

Eia na buke haawi wale.

 

Palapala Liilii--

            Helu   4--Makemake anei oe i ke ola

            Helu   6--E hele i o Kristo la.

            Helu   7--Ka hoi ana mai o ke Keiki Uhauh@

            Helu 11--No ka hoohiki wahahee i ke Akua

            Helu 16--Ka Ee@ia ana o ka Ahaaiua a ka Haku a ma ka Bapetizo ana

            Helu 17--Mai hana ino i na holoholona

            Helu 18--No ka mahi ana, kuai ana a me ka inu ana i ka Awa

Ka Davida Malo Kumumanao

Ka Moolelo o Batimea Puaaiki

                                                            J. F. POKUE,

            Kakauolelo o ka Papa Hooko o ka Ahahui @@anelio o ko Hawaii Pae Aina.

 

Ka Nupepa Kuokoa.

 

KA MOOLELO

- O -

KAMAAKAMAHIAI,

KA NIUHI AI HUMUHUMU

O KAHULUI I MAUI, KE PU@@I

NAU OKAOKA HOI O KONA MAU

LA KOA, KAHILUHILU HOI O KONA WA UI.

 

     O Puke i Anehola a me na momona a pau o ka aina hoohepa i ka olelo ana, a noho aku lakou, a nakui (hoihoi) ae la ke keiki o ka paia ala i ka hele i ke kaapuni ia Kauai, a hele aku la ia (Kaaeamoku) me ka lehulehu e ka huakai a hiki i Haena, halawai laua me Koleanuimakaukai, o keia wahi kanaka, no Niihau, i kii mai ia Kamaakamahiai e hele e kokua ia lakou, oiai ua hiki ke kipi ka powa ilaila, a ua pi-o-o ka hakuaina o Niihau, a ninau ana ua wahi Koleanuimakaukai nei, ea! aole paha oukou i ike i kahi i noho ai o Kamaakamahiai?  Pane aku no hoi o Kaaeamoku, ua ike no au, a heaha kau ia ia?  e kii aku ana au e hele i Niihau, ua pilikia makou i kela mau kanaka ikaika hoi, wahi a Kolea, (Kaaeamoku) aole oe e kii i kuu makua, owau no ke hele e kaua me ia mau kanaka, i koa no a pau keia mau olelo, o ke kena ae la no ia o ua keiki nei e hele aku i ka huli waa e pau pono loa ai lakou a pau, he mea ole wale no ke kena a ke alii, a lana ana na waa i ke kai, a kau aku la ua keiki alii nei iluna o na waa a me ka nui o ka ohua a holo nui aku la, mai ia la ahiahi hoea ana i Niihau, i loa no a hehi ka wawae o ua keiki nei i ke one o Halalii, o ka huli ae la noia o ke alo i Kauai a ka hea aku la i ka laau penei:

            E Kukao-o--e

            Kaohiakumakua i ka nahele,

            I moe i ka wai o Iao a lelo ka io,

            E hea au e lohe oe

            O ka lono ka pono a hele mai

            I koalaala kakahiaka i ka onohi kanaka.

     I loa no a pau ae ke kahea ana a ua keiki nei, o ka wa no ia o ua laau nei i oili ae ai mailoko ae o ka hale i hoomakaukauia no ua laau nei, a kapalulu ana ma ke alo o Kaaeamoku, a lalau iho la ua keiki nei i ua laau la a oniu ae la iluna me he wahi mea uuku la, a hele aku la lakou ma ia kaha o Kaula ma, a halawai ana me ua mau kanaka nei, i ka wa no a ua keiki nei i ike aku ai ia lau ʻ la, oia no ka wa i pane ae ai i kana olelo pahapaha, penei:  Ina he pepeiao ko olua, e hoolohe mai, i keia la olua e ike ai i ke keiki kui hala o Puna, kai olelo i ka mahiki, eia ka laau nana e kaka aku i na iwi o olua, a pau no hoi keia mau olelo a ua keiki nei, pane mai no ua mau kanaka nei, ina he aa oe e hakaka pu kakou ea, alaila e kapae ko laau, e hana lima maoli no kakou, i loa no a pau ae ia olelo a laua la, o ke kiola aku la no ia o ua keiki nei i ka laau, a lele aku la me he Naia lele makalae la,a i ole ia me he Anekelope la paha e lele ana ma ke kowa o na pohaku nui elua, oia lele no o ua keiki nei a paa ana kekahi kanaka, a wili ae la no i ke poo a moku, me ka hoopuka ae i kana olelo kaena, a make na ʻ u na Kamaakaaea, na ka pahoa oi lua o Puna i ka malie, a make ae la ia Kolohe, koe aku hookahi, a ike hoi ua keiki nei i ka holo o kela kanaka, o kona huli aku la no ia a hahai aku me ka mama nui a loaa aku la, a paa i ka poho o ka lima, ia wa i pane ae ai ua kanaka nei, e! e ola au i makamaka nou no keia aina, i noho oe a kulia kou manao hele mai ma keia wahi , ua loaa ke kamaaina owau, aole hoi e kuleleiwi ka noho ana, oiai ea, o ko ʻ u kumu nui no i hele ai e luku i na hakuaina o Niihau nei la ea, no ka aua ia ʻ u i ka aina, ua haawiia no ka poe a pau loa a koe owau hookahi, nolaila la, kupu ko ʻ u manao inoino e kii e pepehi i na hakuaina o keia wahi, a he nani hoi na ua hiki mai la oe ka mea nona ka aina, e pono ia ʻ u ka malama o ko aina, ke holopono nae keia mau olelo a ke kauwa imua o kou alo, alaila, ua pono ae la, ina no aole, e make no hoi au, kahaha! nawai hoi ka make ana aku o na mau olelo ku i ke aloha au e hana mai nei mamua o kuu alo, e ola oe i Konohiki no keia aina, a i kamaaina hoi no keia wahi ke nakui ae ka manao e hele mai.  Eia nae ka ʻ u mea kauoha aku ia oe, o kahi i-a, noho no oe a manao ae ia maua me kuu makuakane me Kamaakamahiai, lawe ae no oe i ka i-a, a o hoi a noho i ko hale, kukala ae oe uo lilo ia oe o Niihau nei mai ia ʻ u aku, hai aku oe i ka inoa o kuu kupunakane o Manouli, mai huna oe, o lilo auanei kau mau olelo he palau, he hoopunipuni imua o na makaainana, a pau keia mau olelo a ua keiki nei, o ka huli aku la no ia hele ana a loaa aku la ka lehulehu o ka huaka i, a hoi pu nui aku la a pae i Kauai, a hele kaapuni aku la a puni o Kauai, a noho iki iho la no i ka poli o ka ma@@@, a mahope iho o kona hoi loa no ia i Hawaii me kona lehulehu o ka hele ana mai @ ka hoi mai la no ia o ka huakai a li@@@ ana i Mokapu i Oahu nei, a mai nei aku a hoi loaa ana i Hawaii i kona one hanau.  "Pau ko kakou hele ana me keia keiki, e huli kakou a i hookahi a kakou mea e kainuu hele ai, oia hoi o Kahelekulani ma me ke keiki o ka mauna anu o Waialeale." Ia laua i noho ae ai he kane a he wahine aia no laua iluna o ka eheu o na manu kahi i paia lewa hele ia ai, o i noho aku no hoi laua me ka oluolu wale no, aole hoi he ino, aohe hoi he mea nana e kaiele i ka paona kaumalie o ko laua mau manao iini, a no ka nui loa o ke aloha o Kahelekulani i kona kahu hanai akua, oia no hoi o Kamehaikana, nolaila, hapai ae la oia i keia mau lalani mele penei:

            Aloha wale kuu hoa laumakani,

            He makua no ka wao ke noho ia,

            Noho aloha kaua i ka poli o ka ahihi,

            Hoohihi ka manao koi ana ia loko,

            Me he mea la e i ae ana e hele au,

            E hoi aku a ka poli o ka makua,

            Kuu makua i ka hale wai o ka uka,

            Ola kaua i ka i-a laulele wale aku no,

            I ka ai eli i ka honua ke ola,

            Ola ai kaua ke noho la,

            E noho oe a manao mai,

            Maliu iki mai oe iaʻu--e,

                        Aloha no--e.

     A pau no hoi keia mele, noho iho la no hoi ia a liuliu iki iho la no ka noho ana, me he mea la no e koi maili mai ana la no ke aloha o ka makua ia ia, a uwe iho la no hoi o ua o Kahelekulani a pau ka uwe ana, hapai ae la ia i keia mau lalani mele ma ke oli puukani ana aku penei:

            Waienuhea wale hoi oe la e ke aloha,

            Kanihina mai hoi a ka moe a loaa au,

            Ke kono nei i kuu waimaka e hanini,

            E aneane ana no wau e uwe,

            He uwe aloha i ka makani keahu,

            I ke aheahe a ka leo o ke kai,

            Me he mea e i mai ana la iaʻu ka leo,

            Eia au o ka noe a hiki aku,

            Hiki ke aloha ke hoa lau makani,

            Ka mea nana e hoala koʻu po-e,

            Ala ka po noho-u i ko hiki mai,

            A hiki mai no oe pono au-e,

                        Aloha no--e. 

     I loa no a pau keia mele a ua pua nei o ka Ohawaiuli i ka nahele, pane mai la no hoi ke kane, owai la na mea au e uwe nei? he ane paha la he kane kau e uwe nei, oiai ua noho wale aenei no hoi kaua a ua loihi no ka wa a kaua i pili ai, akahi no au a lohe aku e oli mai ana oe, e kuhi ana anei oe he mea pono ia no koʻu manao, o kau e hana nei la ea, he ku loa ia i ka hoohaehae ana, oiai ua piha loa au i ka manao a me ka lia nui, pane mai hoi ka wahine, aole au e uwe ana he kane kaʻu, aole loa no, e uwe ae ana au i ka makuahina o kaua, oia no hoi ka moo a oukou i makau ai ia oukou i hele mai ai, ina no hoi eiae no ke noho mai nei la ea, e ike kino ana oi ia ia, e hike mai ana i o kaua nei, me ke kino wahine maikai, nolaila e hoopau ae i kou manao kuhi lalau, a no keia mau olelo a kana lei aloha, akahi no a aka kuu mai ka manao o ua keiki nei o ka aina pali kawahawaha, a i ka pau ana ae no o ka laua mau papa leo ana, a hoolai malie iho la laua, pa-e ana ka leo o ua Kupua nei o ka pali ma ke oli ana mai ma ke mele penei:

            Aloha wale ka leo o ke Kahuli leo lea,

            Aia la ke hone mai la i ka pili o ke ao,

            E uwe ana i ke aka lawe a ka manu,

            He uwe aloha i ka pili makua o ka uka,

            Ke hea mai la iaʻu ka leo o ka Iiwi,

            E uwalo mai ana iaʻu e hele aku,

            Eia au a hiki aku e ka lehua i ka uka,

            Owau ooe ka ke aloha e kono nei,

            Huhuhui a kaua i ke kai o Keauau--e,

            E au ka malihini o pulu i ka ua,

            E lawe kahi kapa e huna ma ke kua,

            O ike auanei i ka ua la makau,

            Hopuhopualulu ka huakai hele,

            Hahaki hewa i ka pua o ka lehua,

            Hapuku i ka lau me ka pua,

            Puia ka huakai hele e ka ino--e,

                        Ua ino au--e.

     Aia ma keia mele, e hai mai ana o Kamehaikana, e hele mai ana no ia me ke kino moo, nolaila ia i hai mua mai ai e huna aku o Kahelekulani i ke kane, o ike auanei ke kane a makau a hole paha, pela mai kela, i ka lohe ana no hoi o ua keiki nei, aole loa ia i hopohopo a makau iho, ua olelo aku la no ia i ka wahine, aole make pee, pela no laua e noho ai a hiki mai, a ua nani no ia mea i ka manao o ka wahine, aka, aoao aku la no ka wahine, i noho kaua a hiki mai ka makuahine o kaua, mai noho oe a makau iki, i pii auanei ka moo iluna ou, mai makau oe, aia a hoi ka moo a moe ma kuu alo, alaila, o ka pau ana ia o ke kino pahaohao, a pau no keia mau kuhikuhi ana a ka wahine, o ka ae wale no hoi ka ke kane, a meha iho la no hoi ko laua leo; pa-e ana no ka leo mele a ua Kupua nei penei:

            Eia au la e Koolau wahine,

            E ka makani lawe aala i ka wao,

            Puia pu ai ka nahele i ke onaona,

            Noho-u no kai o Kaohao,

            Ke kuhi la no kai o Mokolea,

            Aole aia la ma ke kaha o Malaeakuli--e,

            He kuli anei ko olua he lohe ole,

                        A lohe aku anei huna iho--e.

     Ma keia mele no hoi a ua Kupua nei, e mai ana i ka lohe ole o na hanai, o kona makemake loa o ka pee aku o ke kane, ia wa no hoi ka puukani o ka pali Koolau i oli aku ai i kana mele penei:

            Aohe i makau Mahiki i ka ua,

            Aole i hopo i ka ino o ka puukolea,

            I loa no i ka ua awa i ka ihe mai,

            He malie wale no kai o Waipio,

            E akahele nae ka helena a ka malihini,

            E nihi no o Hina i ka puukolea,

            O ka hele no ka pono a noho malie,

            Aohe hoi ke kolohe i ke one o Wahinekapu--e,

                        Ua kapu.         (Aole i pau.)

 

NU HOU ANO NUI O KE KAUA.

 

(Koena mai kela pule mai.)

     Nantes, Nov. 5--Ua loaa mai nei i keia la na lono mai Parisa mai, maluna o na baluna, e hoike ana, ua hoopuka ae na lala o ke aupuni Pale Lahui, he olelo kuahaua i na makaainana.  Eia ka lakou: "E haawi mai ia makou i ka makou mau mea e hana aku ai.  Ke noho nei makou ma ke kulana pilikia loa, ka mea like me ke auhulihia ana o ka la 4 o Sepatemaba, e panee mai nei maluna o makou, aka, ke noho nei nae makou ma ka oukou hoopono ana.  Ua hana makou i na hana nui a oukou i hooili mai ai.  O ka mua, oia ke Pale i ka Lahui, oia no paha ko kakou manao a pau.  E hooneoneo aku no makou i ka poe karaima a pau e hoonioni mai ana malalo o ka hoopai kukonukonu a ke Kanawai."

     Ua kukala hou ae hoi o Favre, o ka mea wale no e pakele ai ka lahui, o ka hoolohe i ka na alii koa a e hoolohe i na Kanawai. 

     Eia ka Generala Trechu mau huaolelo i pane aku ai i na koa Kiai Lahui, no ko lakou mahalo ana mai i ke Generala: "Na ka Ripubalika hookahi wale iho no e hoopakele mai ia kakou.  Ina ia e make ana, e make pu kakou a pau."

 

KA MOI UILAMA I EMEPERA.

     Balina, Nov. 5--Ke manaoia aku nei, e hoi mai ana ka Moi Uilama i Balina nei, ma ka la 11 o keia malama.  Ke hoomakaukau nui nei na kanaka ma na wahi a pau o Geremania, e apo aloha aku iaia i Emepera no Geremania a puni.

 

HE KAUA HAHANA KAI HOOUKAIA.

     Dole, nov. 5--Aumoe.--He kaua hahana kai hooukaia i keia la, ma ke alaloa mai Dijon a hiki i Sana Iean.  Ke ki-pu mai nei na Perusia me na pukaa a me na pu Mitarelia (pu wili) a hiki loa mai i ka hora 7 o ke ahiahi nei, aole nae i neeu mai na Perusia iluna o ke kahua a na Farani i hoouka aku ai. 

 

ME HE MEA LA ELUA ANO O KE AUPUNI PALE LAHUI.

     Ladana, Nov. 5--Ua hiki mai kekahi lono ku i ka wa mai Versailles mai, e hoike ana, me he mea la, e paani mai ana ke Aupuni Pale Lahui.  Ua kukala ae lakou i na kanaka, aole loa lakou e ae aku ana i ke kuikahi ma ka hoolilo ana aku i kekahi aina o Farani, aka, ma ka Thiers hoike ia Bisimaka, ke olelo mai nei, ua manao na lala a pau o ke aupuni, na ka Aha Elele e hana i Kuikahi ma ke kumu e hoolilo aku ai i na aina o Reine a me ka uku i na lilo o Geremania me ke ano uku huikala, a aole lakou he poe lala o ke Pale Lahui e hoole ana ia kumu ke hooholoia. 

 

AOLE E HOI KA MOI I GEREMANIA.

     Ladana, Nov. 6--No ka nui o na kauoha ana mai a no ka lohelohea nui loa o na kukakuka ana a ko Geremania a pau, ma Versailles nei, nolaila, ua aneane hiki ole, ke kauoha aku i ka Ahaolelo o Geremania, e hui mai ma kahi hoomoana o ka Moi nei, e like me ka mea i manaoia.  No ka hiki ole hoi i ka Moi ke kaawale aku no ka mea ma ke Kumukanawai Hui o Geremania a pau he Alihikaua Nui Loa no Geremania, a ua makemake ia hoi e noho pu mai, ua konoia mai ia aole e hoi aku i Geremania. 

 

HAALELE WALE IA KE PALE LAHUI O PARISA.

     To@a, Nov. 6--[Ma ka lono waea o na nupepa]--Ua loaa mai na lono mai Parisa mai a hiki i ka la 3.  Ua haalele o Henri Rochefort i kona noho ana lala no ke aupuni Pale Lahui, no ke Kuhihewa i ke kumu o ke koho balota ana o na makaainana no ke aupuni a lakou e hilinai ai.  Mahope iho o kona waiho ana mai, aole ia i ike iki ia. 

     Aole e halawai hou na lala o ke aupuni Pale Lahui maloko o ka Hotele de Ville.  Ke hoohalawai na hoa ia lakou iho, maloko o ka Hale noho o kekahi o lakou. 

     Ke eli nei o Generala Keratry o na koa Farani ma ke Komohana i mau auwaha e pale ikaika aku ai i ka enemi.  Ke komo wale mai nei na koa pualu i kona wahi.  Ua hoolakoia kona puali me na pukuniahi oluna mai o na moku. 

 

E KINAIIA ANA PAHA O GARIBALADI.

     Nu Ioka, Nov. 6--Ua kakau mai ka mea kakau o ka nupepa Taribiune e hele pu la me Generala Garibaladi, ma ka la 1, a eia kana:  "Ke puhemo mai nei ko makou kulana i keia a me kela la.  Ke hoomahuahuaia mai nei no ko Garibaladi mau koa me ke paumeume, a hookahi bataliona aohe mea kaua, no ka akiaki a me ka manao lili o na aliikoa Farani a me na luna aupuni pu.  Ua nana kee mai ka Alihikaua nui o Besaneon i ko Garibaladi hoike ana aku iaia.  Ua hoounaia mai kekahi poe e nana i na alahaka a loaa no he paa, aka, i ka po ana iho, manao iho la ke aliikoa Kiai e hoohiolo ia po.  Ua hiki mai nei he mea ana aina mai Besaneona mai me na kauoha e hoohanee i na alahaka e moe nei mawaena o Besaneona a me Dole, a noia mea, ua moku kahi a Garibaladi e holo aku ai, ina e auhee ana ia.  He ekolu a Garibaladi noi ana aku nei e hookuu mai iaia, hooleia mai nae."

 

PIO KA PAPU MORTIER MA BREISACH.

     Versailles, Nov. 6--Ahiahi.--O ka papu Mortier ma Breisch, ua haawi pio ia mai ma ka la, Sabati.  O ke kumu i haawi pio koke mai ai, no ke pahu ana o kekahi poka iloko a aaia e ke ahi.  He 220 na koa Farani a me 2 mau pukuniahi i lilo pio mai iloko o na lima o na Geremania. 

 

HOAHEWA AKU A HOAHEWA MAI.

    Toua, Nov. 7--Ke olelo nei ka nupepa Monitieur: "No ka ae ole mai o Perusia e hookomo i ka ai iloko o Paria i hookahi la, aole hoi he ae mai e koho na aina o Alas@ce a me Loaraine i mau Elele no laua no ka Aha Elele, nolaila, no Perusia ka hewa o ka hoomau ana aku i ke kaua.  Na Perusia ka hoole i ke kapae i ke kaua."  Ke hoopuka nei na nupepa o keia wahi ia Bisimaka, no ka papalua o kana noi, aka, ake mai nae e kuka no ke kapae ae i ke kaua, i mea e loaa ai ka manawa iaia e lawe hou mai ai i na koa kokua a wanana e nana e lele aku maluna o ka Puali Kaua o Loire, ka puali ana e alualu aku nei me ka hahaiia e na pomaikai.

     Barusela, Belegiuma, Nov. 7--Ua hiki mai kekahi lono ku i ka wa, ua olelo o Bisimaka iloko o na la elima o ke kukakuka ana me Thiers, ua hooholo laua ma na mea a pau o ke kapae ae i ke kaua, koe wale no ka hanai aku ia Parisa i ka ai.  No ka manao o Bisimaka, he hoopomaikai ana aku keia i ka oihana koa, nolaila, ua noi aku oia, e hoohalike na pomaikai.  No ka hiki ole i na hoa o ke Aupuni Pale Lahui ke hana i keia, ua kauoha mai nei ia Thiers, e hoop@@ wale aku i ke kukakuka ana no ke @@@@@ kaua. 

 

KA HELU ANA I NA KANAKA O LOARAINE.

     Rheins, No. 7.--Ua kauoha mai nei ke Kiaaina hou o ka Apana Aina o Loaraine, (oia ke Kiaaina Perusia i hoonohoia aku ai) e halu i ka nui o na kanaka a pau oia okana aina i ike i ka lawelawe i na mea koa, me ke kau ana i ka hoopai mainoino no ka mea komo mai e hoole. 

 

NA KAUOHA E HOPU KINO IA BAZAINE.

     Ladana, Nov. 7--Ua kauoha aku nei ke aupuni Pale Lahui o Farani, i na mana aupuni o Perusia, e hopu kino ia o Ilamuku Bazaine a me na alii malalo ona, ma na wahi a pau e loaa aku ai lakou, a e hoopaa paahao.

 

KA MANAO O KE KEIKI ALII LEOPALD.

     Nu Ioka, Not. 7--Ua hoouna mai ka mea kakau o ka nupepa Elele mai kahi hoomoana mai o ka Moi, i ko laua kamailio ana me ke Keiki Alii Leopald, (ke Keiki Alii i mea ia ai e holo Moi no Sepania) ina aole e kapaeia ke kaua mamua o ke kau ana o na pukoniahi nunui a na Geremania maluna o na kahua i hoa@o e ia no lakou, alaila, e hoomaka koke ia no ke ki poka pahu ana i ke kulanakauhale o Parisa me ka hookaulua ole. 

 

KA BISIMAKA HOIKE NO KA HAULE ANA O KE KAPAE KAUA.

     Ladana, Nov. 8--Ua hooana aku o Couna Bisimaka i na Kuhina noho o Perusia e noho ana ma na aupuni e i kana wehewehe ana no ka haule pu ana o ke kapae kaua, penei:

     "Ua hoike mai nei ke aupuni Farani ma o Thiers la kona Elele Kuhina i ko lakou makemake e kapaeia ke kaua ma na kumu a Geremania e waiho aku ai, ma na kumu kupono.  Ua pane aku au e hoike mai o Farani i ka manawa e kohoia ai na Elele.  Ua ae aku o Geremania e haawi aku i na mahalo ana a pau e koho ko lakou mau okana aina i mau elele no lakou iho, a ina paha, iloko o na aina e paaia nei e Geremania.  Mahope iho o keia, puka aku la o Thiers a holo aku la i Parisa, aka, ua halawai aku oia me Generala Trochu mawaho loa mai o Parisa.  Ua kali aku makou, a i kona hoi ana mai i Versailles nei, aohe wahi mana iki o @@ Thiers nei e hooko ai."

 

KA PAPA IKAIKA A UILAMA.

     Mahope iho o ka nele ana o ke kukakuka no ke kapae i e kaua, ua hoopuka ae ka Moi Uilama he kauoha, e papa ana i na mea a pau aole e ae ia e puka mai a e komo aku kekahi i Parisa.  He 5 mau kanaka i hopuia iho nei, e hookolokoloia ana ma ke kanawai koa. 

 

NA LANAKILA A NA PERUSIA.

     Wahi hoomoana o ka Moi, Nov. 8--Ua hoike mai o Generala Tr@sakw i kahi hoomoana o ka Moi nei, inehinei, ua ho@uhee aku kona mahele koa Perusia i na koa Farani Ki pololei ma @a hakaka ana a pau ma ka la 2 mawaena o Colmar a me Bolfort.  Ua hoike pu mai hoi oia, no ka hakaka pinepine ma Rougemokt a me Petit Magny, mawaena o na Perusia a me na koa Farani Mobile.  Ma ia mau hakaka ana, ua make he 50 aliikoa a me 100 koa Farani.  Ma ka Poaha, ua hoopuniia ka papu o Beffort.  Ua weheia ka holo ana o ke kamailio mawaena o Generala Werder a me lakou. 

 

INA E POINO O PARISA NOWAI KA HEWA?

     Balina, Nov. 8--Ke hoahewa nei na nupepa a pau o Balina, ua nupepa nupuni a me na nupepa ku i ka wa, maluna o ke Aupuni Pale Lahui ina e kipoka pahuia ana o Parisa.  No ka mea, ua hoole mai nei na Farani i na kumu akaka i waihoia aku. 

 

KA MANAO PAAKIKI O NA FARANI.

     Vienna, Nov. 8--Ke hoike mai nei kekahi mea kakau nupepa, ke hana nei no o Farani me he mea la aohe i hopepe i na auhee he nui.  O kona ano a me kona hooponopono ana, oia mau no me he mea la na na puali Farani wale no ka lanakila a eia la imua o Balina kahi i hele ai. 

 

HE UKU NO KE POO O BAZAINE A ME NAPOLIONA.

     Ladana, Nov. 8--Ua hoolaha ae ka nupepa Les Droits de l ʻ Homme o Montplier, he uku makana, e ukuia ka mea e loaa na poo o Bazaine a me Napoliona, a ua wehe pu ia he papa inoa o ka poe nana e haawi ia makana ma ka lakou hookupu ana. 

 

KA POINO MA GEREMANIA.

     Ladana, Nov. 8--Ua loaa mai i keia la, he palapala mai ka mea kakau mai o ka nupepa Honua, a mailoko mai olaila, i laweia mai ai keia mau olelo malalo iho:  "Ke pii mai nei ka maewaewa ma Geremania nei mailoko mai o ka hooloihi wale ia ana aku o ke kaua, aka, oia poino aole i aa iki na nupepa o Geremania, no ka mea, aohe he aloha i hoikeia e keia aupuni paa malalo o na kanawai koa.  Ke paholaia nei ka aina e ka neoneo a me ke ano ino, a he mea kanalua, pehea la ka loihi a na inaina o ka lehulehu e paaia ai e ka mana koa.  Ma na wahi a pau, ua neoneo.  He umi o na tausani e uhi nei i na kapa kanikau.  E paopao ana no paha o Perusia ia Farani me ka make nui, aka, eia oia ke paupauaho mai nei a pehea la auanei oia e lanakila ai.  E hiki koke mai auanei oia e lanakila ai.  E hiki koke mai auanei ka manawa a ka Moi o Perusia e like ai me ke kulana o ka Emepera Napoliona mahope iho o na la hoouka kaua 14, 16 a me 18 o Augate, ka manawa a ka Emepera i aa ole aku ai e huli hoi i Parisa me kahi puolo ole o ka lanakila, i mea e hoolaulea aku ai i na kanaka no na lono auhee i hoike e ia aku.  Ke ake nui loa nei hoi ka Moi U@@@@@@ e oi loa kona lanakila mamua o kona huli hoi ana aku i Balina kona kulanakauhale alii.  Ina aole ia, e olepeia auanei kona noho alii e like me na moe uhane a ka Emepera. 

 

KA HAUNAELE MA PAPEGINANA, FARANI.

     Mai kekahi mea kakau mai ma Perpiginana, i kakauia ma ka la 4, i loaa mai ai keia malalo iho nei: 

     "Ua hoomaka ke kaua kuloko maanei me ka weliweli.  O ke aliikoa Kanela e noho luna ana maanei, ua lele ia aku nei e ka puulu kanaka i kap aia lakou iho, he poe, "Ulaula," a oki iho la.  O ke alakai o kekahi mau koa, ua haule pu iho maluna o ia mainoino hookahi.  O ka Meia o keia wahi, o M. De Bardas, ua pehiia i ka pohaku a make loa mawaho o kona hale.  Aohe au i ike i kekahi haunaele e like me keia ka weliweli.  O kekahi keonimana, ua alualuia mai e kekahi poe powa, a ua pepehiia me ka hamare kimo poo a ka pee pepehi pipi.  U@ akoakoa mai nei na koa e hoomalu i keia haunaele.  Ua pani kuia na hale.  O Generala Barral, ka mea iaia ke alakai o na koa pukaa ma Saraboro, ua hopuia ma Frenoble ma ke kumu he kipi i ka Ripubalika.  Ua kaihuakai ae ka poe powa a imua o ka hotele i noho ai, a hooho aku la, He poe makou no ke aupuni!  E make ke kauwa a ka Emepera!"