Ka Nupepa Kuokoa, Volume IX, Number 46, 12 November 1870 — Page 1

KA NUPEPA KUOKOA

KE KILOHANA POOKELA NO KA LAHUI HAWAII.

 

BUKE IX.      HELU 46.       HONOLULU,  NOVEMABA 12, 1870.        NA HELU A PAU 467.

 

        KA NUPEPA KUOKOA,

HOOPUKA MAU IA MA HONOLULU

 

I kela Poaono keia Poaono.

$2.00

No na mahina he Umikumamalua!

$1.00 no na mahina eono,

ME KA HOOKAA MUA MAI.

_____

 

NA OLELO HOOLAHA - aole i oi mamua o 10 laina no ka hoopuka hookahi ana, $1.00; alua komo ana, he $1.50; hookahi malama, $2.00.  E uku mua ia mai ke dala o na olelo hoolaha a pau e hoounaia ana mai e pai.

KANIKAU - he 4 keneta no ka lalani hookahi - penei: he 25 lalani. $1.00; 50 lalani, $2.00; a pela 'ku.

KA UKU NO NA OLELO HOOLAHA - ka uku pepa, a me ka uku o ke Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.

NA UKU PEPA A PAU E HOOKAA MUA MAI NO - aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua.  E pono ke hiipoiia keia mau rula, no ka mea, he emi no ka auhau no keia nupepa.

AIA KE KEENA O KA NUPEPA KUOKOA - ma ke i noho mua ia iho nei J. W. Aukina, maluna ae o ka Hale Leta.  O na hora hana, mai ka eiwa o kakahiaka, a i ka ha o ke ahiahi.

 

H. M. WINI. Luna Hoopuka.

 

________________________________

 

"KA NUPEPA KUOKOA."

Is published in Honolulu

EVERY SATURDAY

$2.00 per annum, or $1.00 per six

months, in advance.

 

___

 

ADVERTISEMENTS not exceeding 10 lines, inserted once for $1.00 twice or $1.50; and $2.00 for one month; all advertisements must be paid for in advance.

KANIKAUS will be charged 1.00 per page, or 4 cts. a line.

PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.

ALL SUBSCRIPTIONS must be PREPAID.  No names, either of foreigners or natives, will be inserted on the subscription list, until paid for.  This rule must be strictly adhered to, on account of the low subscription price

THE OFFICE OF THE KUOKOA over the Post Office.  Office hours from 9 A.M. to 4 P.M.

H. M. WHITNEY, Publisher.

@  Bound Volumes of the KUOKOA, for sale at the office over the Bookstore - $3.50 each.

@  Persons having complete sets of the above, can have them bound by paying $2.00 each.

 

______________________________

 

DILLINGHAM & CO.,

-- NA--

 

MEA HOOKOMO MAI A KUAI I NA MEA HAO, NA MEA hana oi, Lole, Pena, Aila, a me na waiwai a pau.

Helu 9@, Alanuui Moi, Honolulu.                      427 - 6@@.

 

________________________________

 

Noho Lio! ___ Noho Lio!

O NA NOHO LIO MEKIKO A MAKEPONO LOA I

humuhumuia me na ili Kaleponi, e loaa no ma ka Hale Hana Noho Lio o

DALTON & BLAUVELT,

430 - 1y*                Ma Alanui Moi, Honolulu.

 

_________________________________

 

OLELO HOOLAHA.

 

KE PAPAIA AKU NEI NA MEA A PAU O PAPAAKO - k@ me Haleaha, na aina e waiho ana ma Koolauloa, Oahu, aole e hookuu wale i ko lakou mau holoholona maluna i na wahi i hoikeia ae la maluna, ina e komo hewa ka Lio, Bipi, Hoki, @. @, e uku lakou pakahi dala, ($1.) ina e hoopau i na mea kanu, e uku hou  no e like me ka nui o ka poino a poho.  A ina he Hipa, Kao, Moa, he hapaha pakahi no ke poo, a ina he Manu Kaka, he hapalua pakahi no ke poo, a ina he kanaka kuleana ole, aole hiki iaia ke hele ma na wahi i hai ia ae la maluna, a ina e ku-e kekahi, e uku no ia no ke komo hewa $1.00 @ hopu no ka maua mau Paniolo, oia o Pamawaho me Kauahi-@.                            AKOWAI, AHUNA, NUO, Pake.

Haleaha, Koolauloa, Jan. 22, 1870.                     426-1y

 

_____________________________________

 

HALE PAI KII!

 

AIA KO'U HALE PAI KII MA

MONIKAHAAE,

Mawaena o ka HALEKUAI BIPI a me ka HALEKUAI MEA

AI O S. SAVIDGE ma ke Alanui Papu.  He emi loa ke kumu kuai o na KII.         H.L. KEIKI (CHASE)

422-ly                             Mea Pai Ku.

 

____________________________________

 

NA LAAU LAPAAU

A DR. JAYNE

OIA NA

LAAU KUNU,

LAAU HOOPAU NAIO ME NA KOE

LAAU HOOPAA HI,

LAAU HOOMAEMAE KOKO,

LAAU HAMO - PENIKILA,

HU'ALE OLA.

AIA MA KAHI O

KAKELE me KUKE,

Honolulu,                               422

 

________________________________

 

NA BUKE

HOOLAHAIA E KA PAPA HAWAII,

 

______

 

Baibala Hemolele Nui ili gula nani me na kuhikuhi ma na aoao…..$12 00

    Baibala Hemolele Nui ili eleele kaekae wai gula….5  00

     Baibala Hemolele uuku iki iho, kaekae wai gula….8 00

     Baibala Hemolele Pananaiki iho ili eleele……….4 00

Kaneta Hou ili gula nani me na kuhikuhi……3 00

Kaneta Hou eleele kaekae wai gula……….1 00

Kaneta Hou eleele……….  75

Kauoha Hou Hapa Haole………………….  75

Lira Hawaii 1848 me ke kanawai…………..  25

Lira Hawaii 1855………………………..  25

Moolelo Ekalesia …………………………  50

Haiao ili lahilahi…………………………  10

Hele Malihini ana………………………..  25

No ko ke Akua ano……………………  25

Lira Kamalii…………………………….  25

Hoike Palapala Hemolele………………….  25

Moolelo o Heneri Opukahaia……………….  25

Hoike Akua…………………………….  25

Wehewehehala…………………………..  25

Ninau Hoike ili manoanoa…………………  25

Ninau Hoike ili lahilahi…………………..  10

Kumumua Kula Sabati……………………  10

Buke Lawe Lima………………………..  10

He Buke no ka Pope……………………..  10

Ui Kula Sabati Helu 3……………………  25

Ui Kula Sabati Helu 4……………………  05

Ui Kula Sabati Helu 5……………………  25

Buke Euanelio a Ioane……………………  10

Himeni………………………………..  50

Himeni ili nani…………………1 00

 

Na Kauoha Hou Pakeke.

 

Ili Gula nani……………………………1 50

Ili eleele kaekae nani…………50

Ili eleele……………………………….  35

 

Kauoha Hou Pakeke me na Halelu.

 

Ili Gula nani……………………………1 75

Ili eleele kaekae wai gula………………….  60

Ili eleele………………………………..  50

 

 

Na Halelu Pakeke.

 

Ili Gula nani……………………………  50

Ili eleele kaekae wai gula………………….  30

Ili eleele……………………………….  20

 

 

Eia na buke haawi wale.

 

Palapala Liilii-

Helu  4-Makemake anei oe i ke ola?

Helu  6-E hele i o Kristo la.

Helu  7-Ka hoi ana mai o ke Keiki Uhauha.

Helu  11-No ka hoohiki wahahee i ke Akua.

Helu  16-Ka Eehia ana o ka Ahaaina a ka Haku a me ka Bapetizo ana.

Helu  17-Mai hana ino i na holoholona.

Helu  18-No ka mahi ana, kuai ana a me ka inu ana i ka Awa.

Ka Davida Malo Kumumanao.

Ka Moolelo o Batimea Puaaiki.

J. F. POKUE,

Kakauolelo o ka Papa Hooko o ka Ahahui Euanelio ko Hawaii Pae Aina.

 

–––

 

Ka Nupepa Kuokoa.

KA MOOLELO

 

-O-

 

KAMAAKAMAHIAI,

 

KA NIUHI AI HUMUHUMU

 

O KAHULUI I MAUI, KE PUHI

 

      NAU OKAOKA HOI O KONA MAU

 

LA KOA.  KAHILUHILU HOI O KONA WA UI.

 

_____

 

"Kahaha, kakahele loa aku la ka hoi au imua mai poina hoi o hope."

Ia Kahelekulani hoi e hookohi ana i kana mahahiapo, uwa mai ana ka pihe o waho e hooho ana, ka waa uala e! ka waa ula e!! a pela no lakou i hookanikani pihe ai a hiki wale i ka pae ana mai o ua waa nei, a ninau mai ana ia Kamaakamahiai, a kuhikuhi aku la no hoi ka poe kamaaina, aia i Kauai, i ko lakou la lohe ana aku aia i Kauai, lilo loa iho la ia mea i mea kaumaha i ko lakou manao, me ka olelo mai, kahaha! pau no hoi ka moana i ka huli ia i ka makua ou la e Kalani, pau mai nei o Maui, a kau mai nei kakou i Oahu nei, a ke kuhi loa ia nei no i Kauai, a heaha la hoi, e hele no kakou a hiki i ka loaa ana o ko makuakane la e ka haku, a pau ae la no hoi keia mau olelo a lakou, ia manawa lakou i ninau mai ai, auhea la o Olopana?  aia no i ka hale wahi a kamaaina aku, i mai hoi lakou la, e aho makou e moe apopo makou hele, a ae ia aku la ia olelo e ka poe o ka aina, a lele mai lakou a kau i kahonua mai luna mai o na waa, a kaikai ia mai la he wahi hale uuku mai luna mai o ka pola o na waa a ku ana i uka.

A lilo iho la ua wahi hale nei i mea haohao loa na ke Oahu, me ka hele maoli aku no a kokoke a ninau aku la, he hale aha keia?  hai mai la na poe Hawaii nei, he hale ia no ko makou haku aia no iloko kahi i moe ai, a hoi aku la lakou a hiki i ka hale, a komo no hoi lakou nei iloko o ka hale, o ka wa no ia i oili mai ai o ke keiki a kakou i olelo aenei, a hemo ke keiki, akahi no a weheia aku ka puka o na wahi hale uuku nei, i hapai ia mai ai mai luna mai o ka waa, a puka mai la he keiki i oi ae o ka oi a me ka nani, a hele ana i waho.  "O keia keiki a kakou e ike ae la la ea, o Kaaeamoku no ia, ke keiki a Kamaakamahiai me Kapaiaala.  Ke kaikamahine a Nalualele ke lii o Hawaii, e imi ana i kona Papa."  Auwe!  mai paia hoi ke poo la e kuu haku, a ku no hoi ua keiki nei i waho, ia wa i ninau mai ai o Keauka penei:  nawai keia keiki?  hai mai lakou la, na Kamaakamahiai me ia nei (Kapaiaala) a pau ae la ka manao kanalua o keia poe a pau loa, a noho aku la lakou me ka hookipa maikai loa ia e na kamaaina alii, a hiki i ko lakou wa i kau aku ai iluna o ka waa, a i ka wa nae hoi e noho pu ana me Olopana ma, ua lilo o Kaaeamoku i mea makaikai nui loa ia e ke Koolau a puni, a ua lilo ia i mea kaao mau ia i ka waha o na mea a pau loa, no ka ui a me ka nani, iloko oia mau la e noho ana i Koolau, ua na na aku o Keauka i ka ouli o ua keiki nei, a ua ha-hai aku no hoi ia e like me kana ike i loaa ia ia, me ka olelo aku, he keiki nai moku keia keiki, he koa, he ikaika, a he keiki keia e ku ana i ka moku, ina he wa kaua keia, pela kana (Keauka) ha-hai ana i kana ike, a hala aku la lakou la, ia wa i ninau mai ai o Keauka ia Olopana, owai la ka inoa o ko kuakahi?  pane aku o Olopana, i kuu manao ea o Keakaoku, no ka mea, ua loaa ia'u ka hihi-o, a ua ike aku no au i ke aka o ka laau a kuu hunona, nolaila, oia no ka'u inoa i manao ai, ke pono nae ia i kou manao, no ka mea, eia no au mau kau mau kuhikuhi, mai mua loihi loa mai a hiki i keia la, ina no oe ua ike he hewa ia inoa ea, ua pau ae la no, ina no hoi he maikai, o ko'u olioli loa no ia o ke kapaia no o Keakaokalaau a kona kupunakane nana mai ia, pane mai no hoi o Keauka, he inoa maikai loa no hoi ia, aole au e hoole aku ana ia inoa, o ka inoa iho la no ia, a holo ae la ka inoa o ka hiapo a Kahelekulani, o ka wa no ia i hao aku ai o Keauka i kana hanai a noho aku la i kai o kahi a kakou i olelo mau aenei, a o kona wahi no ia i hanai ia ai a nui a kanaka maikai, me ke ao ia i kekahi hana ike.

Oia hoi ke puhi pu'a oe'oe, a ua kaulana loa hoi o Keakaoku i ke akamai i ke puhi ana o ka pu'a, a no ke akamai loa o ua keiki nei, ua kena ia na kahuna kuawaa e pii e kalai i pu'a na ua keiki nei, a he aha la ia i na kahuna ke pii la, ke pinana la i na kuahiwi i ka laau kupono e kalai ai i mea lealea na ka poopuna kuakahi a Olopana, ua lewa na kuahiwi o Oahu nei i ka huki ia e na kahuna, aole wahi mea a loaa iki, a no ka loaa ole ana o ka pu'a nolaila, ua kukala ia o Koolau a puni e huli i pu'a kamani, a i ole ia i ohe paha a i mea e ae paha, a ua hooko no na mea a pau ia olelo alii, ua hele na kane a me na wahine e huli, a loaa aku la keia kanaka e hele mai ana me ka niu, e lawe ana i pu'a na ke alii, ua hana ia no ua niu nei a maikai, mai Waianae mai ua kanaka nei, oka hele aku la no ia o ua kanaka nei a hiki ana i Alele, a haawi aku la i ua pu'a nei ana i lawe mai ai, a loaa aku la ia mea i ka lima o ua keiki nei, o ka hoomaka ae la no ia e puhi, a i ke kani ana o ua pu'a nei i Alele, ua lohe oluna o Nuuanu a me lalo o Kualoa, a ua lilo ia mea kani i mea uluhua loa i ka manao o na kanaka i lohe i ke kani o na mea nei, a ua lia mau ka po a me ke ao, me ka manao e loaa aku ke kino o ka mea e kani ana, aole nae lakou i halawai mai me ia mea kani, no ka mea, aia wale no i ke ahiahi poeleele e kani aku ai ua pu'a niu nei, aka, oia mea kani o ke Koolau, i kekahi ahiahi hoi hookani aku la ua keiki nei, penei ka hookani ana:

Ua lai-e!  ua lai ke kaha o Koolau,

I ke kaomi a ka makani kehau,

Moe malie ka ale i ka moana,

Ua kapu Mokapu i ka malua,

Ua kapu Nuuanu he Kolowalu,

Aheahe ka leo o ke Kahuli,

Loio ka leo o ka hekili,

E Kahele, e Kahele,

E Kahelekulani-e,

Eia au la o Keaka,

O ka leo kapu o na lani,

Keiki leo hano i ke kaha o Koolau nei la,

Owau-ia.

 

A i ka lohe ana o ua wahi wahine nei i ke kani a me ka lealea maoli o ka hana ana mai a ua lani nei, o kona ku koke ae la no ia a hoi ana iloko oia pouli o ka po a hoea ana i na hale, i loa no a komo aku ua wahi kahu nei, o ka ninau koke mai la no ia o ua alii nei, ea, ike pono loa aku nei oe i ka mea nana ua mea kani nei ea, ae aku la no hoi kahi kahu, ia manawa no i puana ae ai o Kahelekulani i keia mau lalani mele aloha i kana keiki, penei:

 

Aloha wale ka leo ua makani,

Ka leo heahea o ka ua Apuakea,

E hea ana i ke ao makani kualau,

Mapumapu aloha i ka lawelawe malie,

Hoa'loha ke kino ka maka o ka ohia,

Ka ulupewa makani halaoli,

Ke heahea mai la i ke kaha lauhoe,

I ka lauhoelauhoe a ka manu-e,

O oe ia-e, a o oe no-e.

 

A pau keia mele a ua wahine nei o ka nani a me ka maikai, ia no i pane ae ai oia i kona kahu, e kii aku i ka poe kahu kane e hele mai e auamo iaia i kai o Mokapu, a hala aku la kahi kahu, hapai hou ae la no keia i ke mele, penei:

 

Eia au a hiki aku e ka malie,

E ka onohi ula i ka maka o ka la,

Ka liko pua hoi o ka lama kopii,

I ku no a pua i ka nahelehele,

O ke ano o ka laalaau ka'u i ike,

O ka leo o ka manu ai pua-noni,

E kikiko'u ana i ke kaha o kaupea la,

O oe owau pili kaua-e, e pili-no.

 

I ka pau ana ae la no hoi o keia oli ana, halulu ana na kahu kane me ka manele e auamo ai i ka lakou mea nui o ka lakou alii, a makaukau no hoi ka manele, a kau ana ua wahine alii nei iluna o ka manele, o ka hele aku la no ia a hiki ana i kai o Mokapu, a ma ke kua ponoi iho no o ka hale kahi e noho ana o kana hanau kama, kahea aku la ia ma ke mele i kana keiki, penei:

Auhea wale ana oe e ke aweawe lehua,

E ke kihi lau aala o ke kiele,

Ka maka upolu o ka lehua i ka ua,

Nonohe wale i ke kehau kakahiaka,

Ke hoopuluia mai la e ka naulu,

Pulu aku la paha a'u pua i ka uka,

I ka lawe kaiele ia e ka manu-e,

Eia wau la-e.

 

A lohe no hoi ke keiki i ka leo o kona ma kuahine, apakau ae la ia i kana pu'a, a ani peahi ae la.

 

O oe ia e Kahele,

E ka wohi kapu o Haena,

Ke kuhi aenei no wau,

He mea e la mawaho,

Eia no ka o oe-e,

Owau hoi.

 

A pau ia mau mea i ka hana ia, hoohiki loa aku la lakou nei i kauhale, a hookuuia iho la ua pua nei o ka hilu ilalo, a komo aku la iloko, a ike mai la no hoi o Keauka ma i ko laua luhi mua, wehe ae la laua i ka pili o ke a luna a me ke a lalo o ko laua mau waha, a uwe helu mai la me ke kapalili e kaa ana ilalo, e kulapa ana iluna, e oni ana i o ianei.  A pau no hoi ka la kou ku-o ana, a uhai aholo aku la lakou ia koena po i ke ala ana a hele ana i ke ao, a i ke ao loa ana mai no hoi, o ka no ia o Keakaoku i hele mai ai a noho i ka ua o kona makuahine me ka paa no o ka lima o ua keiki nei i ka pu'a, a lalau ae la i ke poo o ka makuahine, a huki iho la a honi, a kuo hou ae la ka makuahine, oiai akahi no a hui kino laua me ke keiki mai ka hemo ana mai a hiki i keia la a laua e hookulukulu wai-maka nei, a pau no hoi ka uwe ana, hapai ae la ka makuahine i keia mele inoa o kana keiki ma ke oli ana ae penei:

 

Anoano ka la a ke aloha i hiki mai ai,

Ka nihina mai a ka moe io'u nei,

Wehe mai ana i ka poli me he ipo la,

Ko ana ka hanu ala o ka Mokihana,

Ka hanu wai-anuhea i ke koekoe,

Aala kupukupu ka uka o Malamanui,

Hiolani ke ono o ka mauu i ka makani,

He kino u'i aa o ka malualuakele,

He kino he a-a no ka laau-e a-e,

Hoolau ana ke aloha i ke kino,

Koi ana ia'u e hele maua,

E pii no au a kau ilona,

I noho alii no no'u ke aloha-e.

 

A pau no hoi keia mele, huli ae la oia a olelo aku la ia Keauka ma, aohe paha he leo o ka haku a olua, ae mai la o Keauka ma, ia wa i ani peahi ae ai na lima o ua keiki nei i kana pu'a, a kani mai la penei:

 

Hoolailai ana ke ao makani,

Ke ao opua i Mahele ana,

Ke lualai la me Kaiolohia,

Eia au la ua kupanaha,

Ua lawe aku ka po i ko'u leo,

Ua koe ke kunou me ka awihi,

He aloha ka leo ke pane aku-e,

Owau hoi.  (Aole i pau.)

 

_____

 

NU HOU ANO NUI OKE KAUA.

 

_____

 

NA NU HOU I KUEMI HOPE AI NA PERUSIA MAWAHO O PARISA, AOHE OIAIO.

 

_____

 

HOOKAULUAIA KE KIPOKA IA PARISA.

 

_____

 

Ua lilo pio o Soissons i na Perusia me 4,000 koa Farani pio.

 

_____

 

UA KOMO KINO O GEN. GARIBALADI

ILOKO O NA PUALI KOA FARANI.

 

_____

 

KE KAUKOLO NEI O MISIMAKA I NA AINA O ALASACE

A ME LOARRAINE E LILO NO GEREMANIA.

 

_____

 

He kaua alua ma Orleans a auhee hou na koa Farani.

 

_____

 

Ke auhauia nei na kulanakauhale o Farani i lilo pio mai ia Geremania.

 

_____

 

Ka nui o na koa eha, make a lilo pio o Farani ia Geremania.

 

_____

 

Ma ke ku ana mai a ka moku Geremania Akau Theresa iloko o na la he 15 mai Kapalakiko mai, ua loaa mai ia makou na nu hou mai ka la 15 mai o Oct. a hiki i ka la 20.  He elima la ka-lohi mai na nu hou mai o ka mokuahi.

 

NA PERUSIA MA KA HEMA O PARISA.

Tours, Farani, Oct. 15.-Ua loaa mai he palapala mai Parisa mai i kakauia ma ka la 11, e olelo ana.@  Ke nee nei na Perusia ina ka puali nui ma ka hema o Parisa, a ke hahai aku nei na koa Farani Mobiles mahope o lakou me ka hakilo i ko na Perusia nee ana.

O na koa Farani haalele wale i ko lakou mau laina koa a holo aku, ke kipuia nei lakou ke loaa aku.

Ua hoopukaia kekahi kauoha maloko o Parisa, e hoohehee i na pa kala a pau o ka Hale Alii a hoolilo i mau dala maoli.

Ke hana nei na mana aupuni o Parisa, ma ke kauoha ana i mau pukuniahi Kila a nui loa, oia na pukuniahi Kila a nui loa, oia na pukuniahi e hiki ke lele ka poka i 9,000 metere.

O ko na Paisa manao i na wa a pau o ko lakou lele wale ia aku no e na Perusia e hoopuni nei ia lakou, aka, no ka awiwi ole mai o na Perusia, nolaila, ke hoomakaukau nei na Farani e lele e aku e kaua i na Perusia.

 

KO NA GEREMANIA MANAO NO PARISA.

Ladana, Oct.15.-O ka hoomakaukau ana e ki poka pahu ia Perusia, he mea hiki ole no ia ke kaua aku, ke ole e hoounaia, he puali kaua nui, no ka mea, aia me na koa he nui e hiki ai ke hoohikihiki i na pu kuniahi nunui e kau maluna o na puu, a e huki ma na awawa.  Mamua o ka hoomaka ana e kipu aku ia Parisa, o ka ulupa e wale no i na papu ka mua alaila, lele aku iloko o ke kulanakauhale.

 

KA NUI O NA KOA GEREMANIA MA FARANI.

Nu Ioka, Oct. 15.-Ua hoouna mai kakehi mea kakau nupepa mai Ostend mai i ka hoike oiaio o na koa Geremania ma Farani:  O ka heluna pau o na koa Geremania maloko o Farani, ke huipuia mai me na koa ku i ka wa, mai ka hoomaka ana mai o ke kaua ahiki i ka la 10 o Okatoba, he 650,000.  Mailoko mai o keia heluna, he 520,000 wale no i kupono no ke kaua.  Ua maheleia keia ma na puali liilii he 13.  Eia ke noho nei ma Geremania ponoi, na kanaka i paa i na mea kaua, a i makaukau e hele imua e pani i ka hakahaka o ka poe make, a e noho hoi e kiai ma na kapakai, a malama hoi i ka maluhia o ka aina, aole e emi malalo o 250,000.

 

KA NUI O NA KOA FARANI.

 

Ua hoouna mai kekahi mea kakau mai Boulogne mai i na mea pili aupuni mai Lillie, Rouen, Tors a me Lyons mai, e hai ana i ka nui o na koa, a penei:  He 475,000 ma Parisa a ma na wahi pili koke mai; 90,000 he mau koa io lakou, aia me Bazaine ma Meza a me Toneville; 170,000 mau koa mawaho o Parisa a me Meza.  Me ka helu ole i keia, ua haawi aku ke aupuni he 852,000 mau pu i na kanaka a pau a puni o Farani.

 

KE KAUKOLO NEI NO O BISIMAKA I NA AINA O ALSACE A ME LORRAINE NO GEREMANIA.

 

Ladana, Oct. 15.-Ke hoomau nei no o Couna Otto Von Bisimaka i ke koikoi i na aina o Alsace a me Lorraine, e lilo mai ia Geremania ma ke ano he mau aina i lilo mai ma ka ikaika.  Ua paulele loa ke Kuhina hou o ko na aina e o Farani, oia o Jules Favre, no ka pii ae o ka maamaa o na wahi koa o Farani i ka paikau, nolaila, ua olelo oia, e make ka lahui kanaka mamua o ka ae ana aku, e lilo ia mau aina.

 

KA PUNI ANA O SOISSONO A ME VERDUNA I NA KOA GEREMANIA.

 

Ladana, Oct. 15.-Ua hoomaka ka hoopuniia ana o na kulanakahale o Soissons a me Verduna, e na koa Geremania.  Ua pa-e mai na lono, ua lako pono ua mau kulanakauhale Farani la, i na lako kaua.  Ua lawa hoi i na pu-kuniahi nunui a me ka poe akamai i ke kipu ana.

 

No Generala Garibaladi.

 

Aia o Generala Garibaladi ma ke poo o na koa Farani Irregulars.  Aohe hoapono ona i ka na Perusia mau kii o ke kaua.

 

NELE FARANI I KA LAKO KAUA OLE.

 

Ua loaa mai he leta mai Tours mai, i kakauia ma ka la 14 o Oct., e olelo ana:  Ke makemake nui ia nei kekahi mea maanei a he kanalua ia nae, no ka uuku o na lako kaua.  O na olelo malalo iho, he mau olelo oiaio loa ia:  Mahope iho o ka lilo pio ana aku o 200,000 mau pu kaupoohiwi i na Perusia ma Sedana, ua hoouna aku ke aupuni o Farani i na kauoha i Enelani, e hoopiha mai i ka hakahaka o kela mau pu i lilo.  Ua loaa mai kekahi mau pu, aka, aole nae o na pu i manaoia aku ai.  Ke haawi nei o Farani he 250 hapaha Farani no ka pu raifela Amerika hookahi.

 

HOAANO KAUA A HOLANI A PIO WALE.

 

Ua loaa mai kekahi lono mai Hague mai e olelo ana, he uluaoa pioloke kai hoea ae malaila, no ka loheia ana, he makemake ka Moi o Holani, e aa e kaua me ka Moi o Perusia.  Ua piooloke pu ka Aha Kuhina, aka, ua papaia aku ua alii la mai aa wale aku e kaua.  ua hoolana mai ka Hooilina Alii i na Kuhina, ina aole e koho na kuhina i ka lakou aoao e makemake ai, alaila, e minamina ana o Holani i kona hana pono old.  Ua hoopii koki na Kuhina i na kanaka, a ua puka mai na leo o na makaainana aohe na ka Moi e aa e kaua, aia na na makaainana.  Nolaila, ua pio wale a hamau loa ua alii la me ka hoka.

 

AOHE KAUA LANAKILA A BAZAINE.

 

Ladana, Oct. 15.-Ua loaa mai i ka nupepa Standard, he lono ma ka waea olelo, mai Tours, Farani mai, e hoike ana o na lono no ka lanakila nui i loaa ia Bazaine ma ka lono i hala, aohe i maopopo lea.

 

HOOPUNIPUNI KE KUEMI HOPE O NA PERUSIA MA NA WAHI MAMUA O PARISA.

 

Versailles, Oct. 16.-O na lono mamua iho nei i hoolaha hoonuinuiia e na nupepa Farani no ka lanakila o na Farani ma na hoouka kaua mamua o Parisa, a hookuemiia na Perusia i hope, he hoopunipuni wale no.  I haku olelo wale no na Farani, i mea e lana mai ai na manao koou o na Farani e noho make mai nei.  Ke noho nei no na Perusia maluna o na kahua mua a lakou i noho ai, mai ka la 19 mai o Sept.  He elua wale no mau wahi kaua kihakahaka i ulele iho mawaena o na kiai o waho loa, ma ka Poaha a ma ka Poalima, i keia pule.

 

NELE PAHA AUANEI O PARISA I KA AI OLE.

 

Ua loaa kekahi buke hoomanao a kekahi kamaaina o Parisa, i na Perusia, a maloko olaila, i ikeia iho ai, ua maopopo, he elua wale no malama e lako ai lakou i ka ai, a nolaila, ke manao nei na Parisa, e hooikaika e kaua e mai, a ma ia mau hoeu kaua mai, e holo ai i o a ia nei na Perusia, a malie o hakahaka kou wahi.

 

AOHE ELUA LANAKILA NUI A NAPOLIONA III ILOKO O KA NOHO ALII HOOKAHI ANA.

 

Tours. Oct. 16.-Mawaena o na palapala i loaa iloko a ka Hale Alii o Tuilleries, he palapala i kakauia mai e ka Emepera wahine ia Napoliona, mai Aigupita mai, (oia paha ka hele makahiki ana a ka Empera wahine i ke ala wai) e olelo ana penei.  "E manaoio mai oe ia'u, aole loa e loaa elua mea ano nui iloko o ke ola hookahi ana o kekahi kanaka."  O ke ano o keia, e papa e mai ana ka moiwahine, no kona ake puni hanohano e hookiekie ae iaia maluna o kekahi mau poo aupuni. 

O ka lono hope mai Parisa mai, ma ke ano koa, oia, ka hele makaikai ana mai o Generala Trochu ma ke komohana hema o ke kulanakauhale.  Ua maopopo iaia kela wahi e paa pono ana i ke pale aku i ka enemi.  Ke paikau mau ia nei na kamaaina o Parisa i ka po a me ke ao.  Me he mea la, ke aneane aku la e pau loa na kane o Parisa i ka paa i na mea kaua.

Ua oiaio loa, ua hoomaopopo ia mai nei ka luku ia ana o ka Hale Alii o Sana Cloud.

Ma ka la 10 o Oct., ki ia mai la kekahi poka pahu mai ka papu mont Valerien mai, a haule iho la iloko o Sana Cloud, nahaha liilii na aniani nana a komo pu mai la ka poka ma ke keena moe o Napoliona I.  Hoahewa loa na Perusia, i ko na Farani hana ino e ana ia lakou iho.

 

AIA NA AINA O ALSACE A ME LORRAINE MALALO O NA KANAWAI O PERUSIA.

 

Ladana, Oct. 16.-O na kanaka o na aina o Alsace a me Lorraine o Farani, i lilo mai ia Geremania, ke oleleia mai nei e na Perusia, aia malalo o na rala a Perusia.  Ke hikiwawe aku la ka malu o ka aina e like me ka wa mua, a o na kanaka ke ohi nei lakou i ka lakou mau hua; o ka baka nae ka mea nui loa.  Ke olelo mai nei hoi na Farani, e nana aku ana lakou ia Lorraine me he aina lilo pio la ia geremania, nolaila, aole loa e ae ia kekahi e hele ma o a maanei, ke loaa ole na palapala ae.

 

KA LOAA MAU ANA O NA KOA KOKUA I NA GEREMANIA MAWAHO O PARISA.

 

Ladana, OCT. 16-Ua hoouna mai ka mea kakau o ka nupepa Taribiune mai Balina mai, e hoike ana, o ka puali e hoopuni nei ia Parisa, ke loaa mau aku nei ia lakou na kokua nui loa, oia na koa ku i ka wa a me na koa kiai ponoi i noho iho nei ma Saraboro.  Eia ha nui, o na koa o ka puali helu 13 mamua o Toul a me ka mahele koe nui (division) o Badena, e hele aenei ma Troyes a me ka puali koa pualu, i kukuluia ma Silesia, ka puali e kapaia aku ana o ka helu 15.  O ko lakou heluna a pau, he 100,000.  O ka puali helu 14 malalo o Gen. Werder i pio ai o Saraboro, ke hele nei imua mai Alsace Luna ae e hele ana e kue aku i ka puali kaua o Rhone, i manaoia ke ku la na Farani ma Laiana.

O ka mea wale no i hookaulua ai i ke ki poka e ana aku ia Parisa, o ko Bisimaka hookokohi.  No kona manoa paha e komo i Parisa ma ke ano aupuni i mahaloia kela.

 

KA LIKE OLE O NA MANAO O BISIMAKA ME GENERALA MOLEKE.

 

Ladana, Oct. 16.-Ua palapala mai kekahi mea kakau o ka nupepa Herald mai Balina mai, he lono lauahea kai nunu iho malaila, e hoike ana, mawaena o kahi hoomoana o ka Moi, ua loheia, ke koi ikaika la o Generala Moleke e ki po-ka e no ia Parisa, aka, o ko @ a me ke Keiki Alii Uilama manao, e hookaulua iki, a pau iho i ka pololi.  O ka Bisimaka a me ka ke Keiki Alii i hoopuka ai, aohe mea e makau aku ai mai na koa Farani mai, a ua hiki no ke lawe aku i ka hapaloa o na koa e hoopuni nei, e hoopuni i na kulanakauhale @ @ kahi e o Farani.