Ka Nupepa Kuokoa, Volume IX, Number 35, 27 ʻAukake 1870 — Page 2

Ka Nupepa Kuokoa

KE KILOHANA POOKELA NO KA LAHUI HAWAII.

 

KE KUOKOA, HONOLULU, AUGATE 27, 1870.

 

NA NU HOU O KE KAUA.

 

[Koena ma ka Aoao 4 mai.]

 

E HOI MAI ANA KE KEIKI ALII LUI.

 

            Parisa, Aug. 7 – Ua hoopuka ae ka nupepa La Liberte, e haalele ana kekahi kaa-ahi i keia ahiahi, a e hoounaia ana e kii i ke Keiki Alii Imperiala.  Ua mahalo makou i kona hoi ana mai, a ua olioli, ina aole ia i hooholo nona iho i keia haunaele weliweli. E loaa ana i ka enemi a ia lakou na umauma o na kanaka.  Aole loa e loihi aku ana ka houluulu ana i Aha Hookolokolo mawaho ae o ia wahi.

 

KA HAUNAELE KIPI MA KA PUUWAI O PARISA.

 

            Parisa, Aug. 8 – Ke manaoia aku nei, e lele mai ana kekahi haunaele i keia ahiahi maluna o ke kulanakauhale ma kahi o na kalepa waiwai e wawahi dala ai.  Ua kipakuia na kanaka mai kela wahi aku, ma ka hora 2 o keia auina la, e ka puali kiai o Parisa.  Ua paniia na puka oihana i keia ahiahi a po, a aohe no paha he hana i hanuia.

 

            Ladana, Aug. 8 – Ke olelo mai nei na palapala mai Parisa mai, i kulike ai me na Kanawai koa, ke hoopaapaa la na kanaka ma na alanui no ke kaua.

 

            Parisa, Aug. 9, Hora 10 P.M. – Ua hoolaha ae ka nupepa La Liberte, no na mea i ikeia i keia la ma ka Hale Ahaolelo.

 

            Ma ka hora 1, ua puuluulu ae na kanaka mamua iho o ka Hale Ahaolelo, ma ka heluna nui, i hiki aku paha i ka umi tausani.  E ku malie ana no na kanaka me na mea kaua ole, aka, ua lohe mau ia aku na leo e hooho ana, i kela a me keia wa, “E pio e Perusia, a e lanakila e Farani.”

 

            Puka mai la o Fery, a huro ia aku la ia, a hoomaka mai la e kamailio penei: “E na hoaloha, e noho malie.”  Ia manawa, hiki mai la ka Ilamuku, Baraguay d’Hilliers a me na alii koa o na koa kiai.  Ua hooho ia mai lakou e na leo huro a olioli.  Ke pii nui loa mai la nae ka nui loa ana o na leo hooho, a lohe ia aku la na leo hooho a uwa e hoopuka ana, “E lanakila o Rokefoka,” mai ka poe koho mai o Belleville, i hele mai nei e hoopioo.

 

            Ma ka hora 2, ua poai ae la ka laina koa a puni ka Hale Ahaolelo, a kukuluia mai hoi he mahele kaua lio.  Ua hoomaikai ke anaina ia lakou, ma ke kahea ana mai, “Imua i ke alo! I ke alo!!”  Hoopaaia iho la ka hoolaha ana aku ma ke alahaka e hele ana mai ka Hale Ahaolelo aku, a kena aku la na makai i na kanaka e naholo aku.  Wahi ae la ka mahele kaua lio, a kiauau ae la ma ke alanui, a haalele iho la ke anaina, aka, hoomau aku no nae i ka uwauwa.

 

            Ma ka hora hope loa, puka mai la kekahi puulu koa kiai, a haawiia aku la ia lakou na huro ana, “Imua i ke alo!”

 

            Ladana, Aug. 8 – O na nu hou mai Parisa mai, ke ulu ae nei me ka hahana i na hora a pau.  Aole loa e ae ia na lono e ae e hoounaia mai ma ka waea olelo, aka, o na lono pili aupuni wale no.  Mai na palapala a me na ahailono mai, e loaa mai nei na mea hou.  Aohe i emi iho na okuku haunaele ana, a ke manao kanalua ole ia nei, aole paha auanei he puali kaua ma Parisa e hiki ai ke hoomalu i keia haunaele.  Ke manao nei ka poe Ripubalika, ke kokoke mai nei ko lakou hora e lalau ai i na mea kaua a kue aku ia Napoliona, aole ia Perusia.

 

            Parisa, Aug. 8 – Ua hoopuka ae na Kuhina he olelo kuahaua, penei: “E na Farani, ua hai aku makou i ka oiaio a pau; o ka oukou koe o ka hapai i ka hana; he mea pono e hooho ae i hookahi leo mai kela pea a keia pea o ka aina; e ae aku kekahi e make no kekahi ma ke kokua ana i ke kumu nui i hoikeia.  Ua haule iho kekahi o ko kakou mahele koa imua o na koa o ka enee nee papa mai ma ka heluna nui; aole i auhee ka puali kaua; e kokua aku kakou a hiki i ka hopena o ka manawa e hoopomaikaiia mai ai: e kue aku kakou me ka puliki paa loa; e ae aku i na kanaka a pau o Farani, i aumo ole i na mea kaua, e holo aku i ka hikina e kokua i ko oukou mau hoahanau; e hoolilo ia Farani i hookahi.  E ka lani e hoopomaikai mai i ko makou mau lima.”

 

            Ua hoopuka ae ka nupepa Press, i kekahi olelo a penei:

 

            “Ke komo ia mai nei o Farani e kaua.  Ke noi mai nei na nupepa Demokaraka o Parisa, e lalau na kanaka a pau o Parisa i na mea kaua, a e kukuluia he mau Komite Pale aku mai loko mai o na Luna Ahaolelo mai Parisa mai, a e kono koke ia na kanaka aloha aina e ala a e komo mai me kakou.  Eia ka aina iloko o ka pilikia.”

 

                                                | Avenir,

                                                | Clock,

            Kakania e na nupepa   | Democratique,

                                                | Rappel Revel,

                                                | Siecle.

 

 

            Ke kakau mai nei kekahi mea kakau nupepa mai Parisa mai ma ka la 8:

 

            “I keia kakahiaka aohe kanaka huhu ole, i ke awakea ae pii hou ka huhu, a i ka po ana iho, ua oi loa ae ka hoonaukiuki a he haunaele wale no koe.  Ua kaheaia mai nei makou e na mana aupuni, me na nu hou ole, oiai, ua hiki no paha i na kanaka ke hoaano aku mai na auhee ana mai ia Perusia, aka, aole nae lakou e hoomanawanui loihi aku ana i na hoinoino a me na inea a ke aupuni hookaumaha.  O na nu hou o ke auhee ana o Farani ia Perusia ma na kaua i hooukaia, ua hiki e aku la na lono i Ladana a me Nu Ioka, he mau hora, mamua o ka hoike ia ana mai i Parisa.”

 

            Ladana, Aug. 8 – Ua olelo ia ae, ua loaa hou ia o Napoliona e ka mai kahiko no ona.

 

NA NU HOU HOPE LOA MAI KE KAHUA KAUA MAI.

 

            Ladana, Aug. 9 – Ua loaa mai ka palapala pili aupuni malalo iho i kakauia ma Homoboro, iloko o Palatinate ma ka hora 9:45 A.M. o ka la 8 o Augate, a penei na olelo: “Inehinei, mahope iho o ka pau ana o ka hoouka kaua, ua auhee aku la ka enemi iloko o ka pupuahulu a me ka hele e-e o na koa.  Ua hoao mai nae na koa pu-kaa o Farani e kukulu iho ia lakou ma ke kulana Niedeborona (Niderbronn).”

 

            O ua kaona la nae, ua lilo i na koa o Baravia.  Ua hoemuia aku ka enemi ma ke alanui e hiki aku ai i Bite (Bitche).  Ua lawe pio mai la na koa kaua lio o Wurtembuga, i na lako mea ai a na koa Farani a me na pu kuniahi eha ma Reikehofa (Reichshoffen).

 

            O na make a me ka poe i eha ke kaua o na Farani, ua paa pu ke ala o ke auhee ana aku o lakou.

 

            I keia kakahiaka, ke noho nei makou iloko o Hagenau, kahi i haalele ia iho ai e ka enemi (oia o Farani).  Ke hoohalua nei na puali koa o Geremania ma na kapa elua o Sa (Saar), aka, o na wahi o Foabaka (Forbach) a me Sagumine, ua lilo e mai ia ia makou (Perusia) mahope o kahi keakea uuku ana mai a Farani.

 

            Parisa, Aug. 9 – Ma ke kaua ma Besewille (Bischwiller) he 140,000 na koa Perusia i lele mai maluna o na koa Farani he 33,000 malalo o Generala McMahon.

 

            Meza, Aug. 9 – Eia ke ku puuluulu a ke nee papa mai nei na koa he hewa i ka wai o Perusia ma ke alo ponoi iho o Meza, ke kulanakauhale a na koa Farani e kiai nei, a ua manao ia e hoouka kaua nui ana malaila.  O Generala Bazaine, iaia ke alakai ma ia wahi.  Ano, ua hala aku ka Emepera i kahi noho o na poo kaua o ke kahua o Bazaine.

 

            Ladana, Augate 8. – Ke kau nui mai la na maka o na koa Perusia ia Meza a me Sana Avolda.  Ke mau la no ko Generala McMahon emi ana i hope a hiki aku i Neki..

 

            I ka po nei, ua hoohauoliia na kulanakauhale a pau o Perusia a me Geremania, a ua ho-a ia na ihoiho kuikui ma na kauhale a pau, he hoike ana ia a na makaainana kiai kauhale i ka lanakila o ko lakou mau hoahanau a pilikana ma ke kaua nui o ka la 6.

 

            Meza, Augate 7. – Hora 5:20. – I ka manawa e kaua ana i nehinei, ua puhi ae la na koa Perusia ia Foabaka i ke ahi.

 

            Parisa. – Ua kauohaia aku ka Ahaolelo o na makaainana a me na alii, e halawai ma ka Poaha, la 11 o Augate.  Ua hoike mai ka lono mai ka Emepera mai ma ke kahua kaua, no ko Generala McMahon auhee mai a me kona moku pu ana a kaawale mai ka puali holookoa aku.  Aka ma ka ka Emepera hai mai, he hiki wale no ke houluulu ia e hoohui.

 

            Aia na koa Perusia ma o aku o ke alo' a ke hele mai nei lakou imua i Parisa.  Ke olelo nei na Farani, e hoouka kokeia ana kekahi kaua weliweli loa.

 

            Nu Ioka, Augate 9. – O ke ano nui o na lono i loaa mai, ua huipa ino ia o Farani me na make he nui, a e ia lakou a pau iloko o ke auhee nui.  I waena o ka puali ua hoemuia mai, a o ka welau akau, ua pioo a oki puia mai la mawaena, ua lawe aku la na Perusia i na koa Farani i pio he nui loa me na pu kuniahi a me na lako kaua a haaheo ae la no ko lakou lanakila.  Ke kahea nei o Napoliona me ka leo nui ia Farani e ala e hoopakele i ka aina, a oia ponoi no, ke hoomakaukau nei no ka hakaka ikaika loa.

 

NA LONO PILI AUPUNI A FARANI.

 

Kahua Kaua, Meza, Aug. 7 – Hora 8:30 A.M. – E paa ana makou o ko makou kahua hoomoana keia, a he mea pono loa, e ae koke mai o Parisa a me Farani i na hana nui o ke aloha aina.  Maanei, aole i lilo aku ko makou mumule aole hoi ko makou manao paa, aka, o ka hoao ana, he paakiki loa.  O Generala McMahon, i kona auhee ana mai, mahope iho o ke kaua o Kasofena, (Kirschshoffen) ia manawa hookahi no, o ke alanui e hele ai i Neki ua paa i na koa auhee, a o na puali koa malalo o Generala Farosada kai waena o ka make.  Ke hoomakaukau hou nei oia me ka ikaika no ke pale aku i ka enemi.

 

            O ka Alihikaua Nui, Mekia Kenerala aia aku la imua o ka puali kaua.

 

            Ke hoopuka aenei hoi ka nupepa Figaro, he 21 mahele koa hele wawae o Farani, 8 puali kaua lio, aole i komo iloko o ke kaua; a o ka huina pau loa o ia mau koa, ua hiki i ka 220,000 wale no.

 

            Parisa, Augate 8. – Ua piha o Parisa i ka haalulu no ka nu hou mai mua mai o ke kahua kaua; a ua hooho ae na leo "e lalau i na mea kaua!" "e lalau i na mea kaua!"  Ke kuka nei ka Emepera wahine me na alii ma Turlerie.  Ua hoi mai nei ke Keiki Alii Lui, mai ke kahua kaua mai.

 

            Parisa, Augate 9. – Ua hoopuka ae na Kuhina i keia olelo hoolaha aupuni: "Ke houluuluia nei ko kakou puali kaua.  Ke hoopihaia mai nei na naau i mokumokuahua me na manaolana hou, aka, o ka pioloke, oia ka mea e hoonawaliwali iho ai i ka manao maikai o ka puali kaua a kue aku paha auanei iaia.  E ala e Parisa, e ia ka puali kaua mawaena o na ahi elua.  Ua hoomakaukau makou no ke pale aku i ka enemi mai Parisa aku.  Ke kokua mai nei na Ahaolelo ia makou.  E kokua ae e hoomalu na kamaaina manao maikai i keia pioloke o Parisa.  O ka poe makemake e hele i ke kaua, e hoolakoia lakou i na mea kaua a hoouna kokeia aku i ka Hikina ia manawa hookahi.

 

HOOMAIKAIIA O UILANA E KONA MAU MAKAAINANA.

 

            Balina, Augate 9. – I nehinei, i ko ka Moi kaalo ana ae ma Neusa, ua haawiia mai la iaia na hoomaikai ana me ka huro huro ia.  Ua paa na alanui i na kanaka e wehe ana i ko lakou mau papale, a e kunou aku ana, a hooili aku la i ka Moi me na pua a uwa nui lua ole ae la.  Huli mai la o Couna Bisimaka a me ke Kuhina Kaua ma na aoao a haawi mai la i na aloha ana a me na hoomaikai ana, no ka Moi.

 

            Ua paiia he olelo hoomaikai na ka moi Uilama i ka Puali Kaua Helu 2 o Perusia, nana i kipaku ia Generala McMahon mai kona kulana aku a lanakila ai na Perusia, e hoike ana i kona aloha i ua puali la.

 

E AHA ANA O PARISA?

 

            Ladana, Augate 10 – Mai ka mea kakau nupepa mai o ke Tribiune ma Parisa, keia mau olelo malalo iho nei:

 

            "Aohe peni nana e aa e kakau i ka haunaele ino maloko o ka Hale Ahaolelo.  Ua lohe mua ia mamua o ka hoomaka ana o kekahi mau lala lehulehu o ka hale, ua hiki mai kekahi kauoha mai Meza mai e hoopau i ke Kuhina nui Ollivier, a e huli ana ka Emepera i hoonana ai ia Parisa ma ka mohai ana i ka hewa nui a kona mau alakai (Kuhina) Aka, o Ollivier, aohe ona kuukuu iho no ka manao hewa ana i lawe ai maluna o ka mea e hiki ole ai ke alo ae.  Ua komo mai oia i ke Keena me ka mino a-ka, aka, e haalele ana oia me ka mae, haalulu a me ka naka.  O ka poe hapa nuku ikaika ma ko Favre manao hoike no ke kipi kuloko, ua ike e ia e paniia mai ana ko Ollivier hakahaka e na Kuhina maemae a manao hoohalikelike.  O na Kuhina e komo hou mai ana, ua oi ae ko lakou hemahema mamua o na Kuhina puka aku.  O ke kohoia ana i mau Kuhina hou, he mea hoolauwili wale iho no ia, aka, aole paha e hala hookahi pule a pau ina e lanakila ana na Farani i kekahi kaua nui.

 

HAUNAELE KA AHAOLELO O FARANI A HOOPAUIA NA KUHINA

 

            Parisa, Aug. 9 – Ua weheia ka Ahaolelo i ka hora 2 o keia auina la, o Schneider ma ka noho.  Mahope iho o ka pau ana o na hana mua, ku mai la o Ollivier a olelo mai la:

 

            E na hoa Ahaolelo:  "Ma ka olelo kuahaua a ka Emepera, ua hoike mai ia i kona manao ia oukou, ina he mau hana holo pono ole kekahi, na ku Emepera Wahine e kahea aku ia oukou, e hui mai me ia; aka, aole nae makou i kakali a ikeia ke kulana, aka, ua ae like ia, mamua o ke kahea ana aku nei ia oukou."

 

            [Pane pakike mai la ka lunamakaainana Feuro.]  Hoomaka hou o Ollivier:  "I kahea aku nei makou ia oukou ma ka hoailona mua o ka pilikia.  Ua hookui mai la kekahi o ko kakou mau puali koa me na hoi hope ana, aka, o ka hapa nui ke noho pu la aohe i nee.  O ka kakou mau kena ana, ko kakou mau pale ana a me na lako kaua, aohe i lalauia.  Ke noi aku nei makou ia oukou, e kokua mai i ka hoala ana i Puali Koa Kaua nui."

 

            [Pakike mai la o Pier:  O na mohai ana a pau aole me oe.]  Hoomaka hou o Ollivier:  "Ua hoomakaukau makou: ua hiki ia makou ke hoolako i na mea Kaua i 450,000 mau koa.  O Parisa a me na wahi i makau ia, ke ku nei ma ke kulana i paa i na kiai.  Ke manaolana nei o Perusia e pakui hou mai maluna o kona mau pomaikai ma ka hoohaunaele kuloko; aka, o kona ake nui, aole e ko ana.

 

            "Ua hiki no ia kakou ke pale no kakou iho.  Ma ka huaolelo hookahi, he mea ano aloha aina ole, ma ia wa, ke kau ana iho maluna o na mea hoino pilikino.  O ka hoahewa wale mai, he kanalua makou i ka pane aku, aia wale no a he mea pili i ka mea a kakou e makemake nei e hapai.  Ina aole na Hale me makou, [Hookamumu a walaau ia mai la] ua makemakeia e hoike mai ma ka hoomaka ana.  Mai hoolilo wale kakou i ka manawa no ka hoopaapaa.  O keia ka'u e noi aku nei, a malia paha, o ko'u manawa hope keia ma keia noho kiekie, mai hookakaolelo: e kipaku mai ia'u ina ua manao oukou he pono."  Walaau mai la ka aoao hema o ka Hale Ahaolelo, me ka hooho mai "ae" "ae."]

 

            Ku mai la hoi ka lunamakaainana Dumaulin, a noi mai, e hooiaioia na hana ana a ka Aha Kuhina.

 

            Ku mai la o Gen. tochu a me Jules Favre a noi mai la ia manawa koke no, e hapaiia na mea pili aupuni.

 

            Lele e mai la kekahi luna, o Paulo de Cassagnac a olelo mai la, ina he Kuhina ia, ina ua hoounaia imua o ka Aha kuka o ke kaua na kanaka e hapai ana i keia ano hana.

 

            Hoomaka mai la ka hamumumu mawaena o na hoa, a ku mai la o Picarad e noi, e ninauia ka hoahewa i na Kuhina a me na lala o na oihana aupuni.  Ulu mai la na kahea ana ma o a ma o.

 

            Noho ae la o Cassagnac ma ka noho no ka manawa, a hoole mai la oia i na noi aku, me kona olelo mai, a na ino aku a keia aoao, he mea ia e ala mai ai na ino ma kela aoao mai.

 

            Mahope iho, o i hooikaika wale aku o Ollivier e kamailio, aohe lohe ia mai, nolaila olelo iho la ia iloko o ia huunaele:  "Ke i mai nei kekahi o ko'u mau hoa Kuhina ina paha e hiki lakou ke ki ia aku."  [Hooho ae la ke Kuhina o Ko na Aina e:  "He pono e ki ia lakou a pau."]

 

            I keia manawa, hooneenee loa aku la kekahi lunamakaainana, o Estancelin kona inoa, a imua o ke Kuhina o Ko na Aina e, wiliwili aku la i ka puupuu imua o na maka, a hoomakaukau aku la iaia; a ia manawa, lele mai la na hoa o ka aoao Akau mai ko lakou mau noho mai, a hoomalielie a uwao ae la i ka haunaele.

 

            Kau iho la ka Peresidena i kona papale, a iwaena o ia hamumumu, ua hoopau ia ka hana no ia manawa.

 

            Ia kuu iki ana iho no o ka hamumumu noi koke mai la no o Jules Favre, e noonoo kokeia na mea i makemakeia e hana, aka, ua hooleia e 190 kue 54 ac.

 

            Hapai mai la hoi o M. Clement Duvoernois i ka hana mua o ka la, ina oia ka noonoo ana no ke kokua i ka ohi ana i na koa, e hapaiia.

 

            Hoole mai ke Kuhina nui Ollivier i ka hapai ana, a ua waihoia na na Kuhina e hooholoholo.

 

            Ma ke noi a Ollivier, ua hoomaha ka Hale, i hiki ai ia Ollivier ke hui me kona mau hoa Kuhina.

 

            Mahope iho o ka hoomaha ana, hoi mai la o Ollivier, a olelo mai la:  "I ke alo ponoi o ka ninau ana imua o ka Aha Kuhina, ua hoihoi aku na Kuhina i ko lakou mau palapala hookohu pakahi, a ua ae mai la ka Emepera Wahine e lawe aku.  Ua hoikeia mai au e hai aku, o Generala Palikao, oia ka mea i haawiia ka mana e koho aku i na Kuhina hou.  [Paipai ae la.]  A no makou iho e hiki no ia makou ke ae aku i na mea a pau a ka aina e noi mai ai, a mai ka wa mai hoi e koho kokeia ai ko makou mau panihakahaka; a o na popilikia e loaa ana ia lakou, e haawiia aku no ia lakou ko makou kokua.

 

UA ALA MAI O FARANI

 

            Parisa, Aug. 9 – Ua ala mai na kanaka o Farani e pale aku i ko Perusia komo ana mai i Farani.  Ua hoike pili aupuniia ae, he 2,000,000 kanaka o Farani i makaukau e maki imua, a 1,000,000 poe ku i ka wa.  Ke kahea mai nei na kanaka no ka houluulu ae ma kahi hookahi a i mau luna alakai.

 

            Aohe kaua ma ka la 8. O na lono hope loa mai ke Kahua Kaua mai, aia ka Puali Kaua ma Meza kahi i houluulu ai, a ua manaoia malaila ka hoouka kaua hou aku.

 

UA PUNI IA PERUSIA O STRASBURG.

 

            Ladana, Aug. 9 – Ua loaa mai kekahi lono i keia la, mai Kalasaluhe mai, e hoike ana, ua poai puniia ke kulanakauhale o Saraboro ma Farani e na koa Geremania Hema, he 60,000; a e haawi pio wale mai ana paha o Farani, no ka mea, he uuku wale no na wahi koa kiai o Farani malaila, he 7,000 wale no paha, koe nae na koa ponoi o ke kulanakauhale, he nui no lakou i na e kaheaia aku ana.

 

            Ke hoomaka mai la ka nee papa ana o na koa Perusia mai Sa Lui a me Tereve mai.  Ua manao ia aku o ke Keiki Alii Ferederika Kale ka Alihikaua nana e alakai ana, a e hamo koke mai ana lakou maluna o na Farani ma Meza.

                       

            Saraboro, Farani, Aug. 10 – He maluhia wale no maanei, aka, ke hoomau nei no nae ka hoomakaukau ana i na mea e pale aku ai.

 

HOOPAAKIKI O NAPOLIONA A MAKE A LANAKILA.

 

            Ladana, Aug. 10 – O na olelo o na waea mai Parisa mai, o ka Poalua a me ka po nei, aohe ano hou ae.  Me he mea la o ka Emepera ka mea i koiia aku e hoi mai, ua hoole mai ia, e hoi aku ana ia me ka make, a i ole me ka lanakila.  O na hale a me na laau ma na wahi a pau mawaho aku o 5,000 iwilei ke kaawale mai Meza aku, ua pau i ke kua ia i lalo.

 

            Parisa, Aug. 10 – Ke manao ia nei e hoonoho i mau kia no ke aupuni, a o Generala Trochu ke poo kiekie loa.  Ua konoia aku ka Emepera e hoi mai e hooponopono hou i kona aupuni; aka, o kona hoole ana, ua manao ia ua oiaio.

 

            Parisa, Aug. 9 – O ka hua i loaa mai i ke kaua onehinei, no ko ka Emepera nele akamai i ka ike kaua.

 

            Ua lawe pio aku o Perusia i na koa Farani, he lehulehu loa.

 

            O ko Perusia hele ana imua, ua keakeaia e na kauhale kakaikahi, i piha i na koa o Farani i ku i ka pu.  O ko Farani make, ua oi loa aku mamua o ka mea i kohoia aku.

 

            Ke malamaia la na koa pio o Farani e Perusia me ka maikai.

 

HOLO PAHA AUANEI KA EMEPERA WAHINE.

 

            Ladana, Aug. 9 – hora 3:30 – Ma ia hoolaha a ka nupepa Pall Mall Gazette, ke hoomakaukau la ka Emepera Wahine a Napoliona e holo no ka makau.

 

            Ladana, Aug. 10 – Ua ku mai nei ke Keiki Alii o Farani i Ladana, a ua hoonohoia aku oia ma ka Hale noho o ke Kuhina noho o Farani malalo o ka malama ana a W.F. Kamika, ko ka Emepera Wahine Agena i hilinaiia.  Ua lawe pu aku o Kamika i na waiwai momi kumukuai nui a me na daimana o ke Duke o Nu Baranekewika (Newnswick).

 

NA ALII KOA FARANI I MAKE I KE KAUA.

 

            Parisa, Aug. 10 – Ua hoopuka ae ka nupepa La Liberte, o na hoa a pau o na ukali o Generala McMahon, ua pau i ka make a i ole ua ku i ka pu ma ke Kaua o Bisiwila, (Bischwiller.)  O Kanela Grammont, ke kaikaina o ke Kuhina o Ko na Aina e i hoopau ia, ua ku ka lima a ua okiia, o Kanela Absek ua ku i ka pu a e make ana; o Kanela Espenilles, ka ahaiolelo o ke Keiki Alii, ua nalowale, aohe ike ia; o Couna Vague Septend a me kekahi mau alii e ae, aia mawaena o ka poe i haule make maluna o ke Kahua Kaua.

 

NA KUHINA HOU O FARANI.

 

            Parisa, Aug. 10 – Iloko o ka Hale Ahaolelo o Parisa, ua hoike mai o Gen. Cruet i na inoa o na Kuhina hou, oia keia:

 

Couna Palikao, Kuhina Kaua.

Delatour Duvergne, Kuhina Kalaiaina.

Henry Cheverau, Kuhina Nui.

De Generourly, Kuhina o na Aumoku kaua.

Ploce Malle, Kuhina Waiwai.

Jerome David, Kuhina o na Hana Hou.

Jules Brole, Kuhina Ao Palapala.

Clement Duvernois, Kuhina Kalepa.

Bassor Bellault, Peresidena o ka Ahakukamalu.

 

KA MAKE WELIWELI O FARANI.

 

            Ladana, Aug. 10 – E lawe ana o Generala Cumout i kekahi puali koa Farani malalo ona.

 

            O ka Mahele 77 o na koa Farani, i ka pau ana o ke kaua nui a mahope iho, he 80 wale no koa e ola mai ana a 4 mau alii.

 

            Nu Ioka, Aug. 10 – Ua lono lauaheaia ae maanei, ua oki pu ia mai la e ke Keiki Alii Ferederika Kale me kona mau koa, ka puali koa nui o Farani, ma na laina mawaena o Meza a me Neki.

 

            Ano no i hiki mai nei ka Lunahooponopono o ka nupepa Soir ma Parisa, (Aug. ?) mai Foabaka mai, a ke olelo nei oia, ua ike maka oia i ka luku nui ia o ka Puali koa o Frossard, a ke makau ole nei oia i ka olelo ae, he 30,000 na koa Farani i make, no ka pau ana o ko lakou mau alakai i ka make, a ua kanikau lakou me na leo hope, ua make lakou ilolo o ka lapuwale.

 

NO NAPOLIONA KA HEWA.

 

            Nu Ioka, Aug. 10 – Ua oleloia ae, e kali ana o Generala McMahon he mau la, e puhi i ka ululaau ma kona alo, kahi ana i manao wale aku ai e puka mai ana na Perusia malaila, aka, hoole ka Emepera ia manao, nolaila, aole i puhiia ka ululaau.  [Aole nae i hoikeia mai, ua puka io mai na Perusia malaila.]

 

HOOPUNIIA O MEGA.

 

            Balina, Aug. 11 – "O Meza, ua poai puniia e na koa Perusiai a o ka mea e manao ia aku nei o ka haawi pio wale mai no o ka Puali Kaua holookoa o Farani."  Aka, ina e like me na lono, aia malaila na koa Farani nona ka heluna mawaena o 250,000 a me 300,000, alaila, he hiohionaia o ka hoouka kaua weliweli mamua o ka ae wale ana mai o Farani e pio.

 

NU HOU HAWAII.

 

            Keena Kuokoa, Honolulu, Aug. 27 – Ke manao nei makou na Lunahooponopono, ua hoolawaia aku nei a kena ko oukou makemake no na nu hou o ke kaua ma Europa, a o ko makou makemake hoi koe a oukou e ike iho ai, oia ka hookaa mai i na uku Kuokoa no keia makahiki, i hoihoi ai makou no ka uku pono ia o ke ola o ka nupepa.

 

NA LUNAHOOPONOPONO.

 

 

KA NUPEPA KUOKOA.

 

HONOLULU, AUGATE 27, 1870.

 

Ke Kaua mawaena o Farani a me Perusia.

 

            O ke ku ana mai o ka mokuahi Ekake i ke aumoe, oia ka hora 1 o ka la Sabati, me na lono no ke kaua ma Europa, mai Balina, Parisa a me Ladana mai, ua hoike lokahi mai lakou no ko Perusia lanakila ma na kaua i hooukaia; a no ia mea, ua kukui ae la ka holo o ka lono maluna ko kakou nei kulanakauhale, a o ka hauoli a me ka waipahe no ka lanakila, ua hohola iho no ia maluna o na kamaaina Geremania e noho nei mawaena o kakou; he oiaio, he elele o ka olioli kai hoounaia mai io lakou, mai ko lakou aina makua mai, e hapai ana no ko lakou lanakila, i na hoouka kaua, a i hooukaia hoi ma ka lepo o Farani aole ma Perusia.

 

            Ua hoopiha iho nei makou i ko kakou nupepa me na nu hou o ka hoomakaukau kaua a me ka hoouka kaua io ana, a ua piha loa.  Nolaila, o ka poe i hoomanao i na nu hou i hoopuka mua ia i kela mau pule i hala, ua hahai aku no keia mahope olaila, ahiki i ka hoouka kaua io ana.  Me he mea la, he elua ano o ka makou hoopiha ana i na nu hou, oia ma ke ano nu hou a ma ke ano hoonohonoho pono ana i ka hele ana pololei imua, aole ke alakei wale aku e like me ko kekahi mau nupepa o makou, aka he nee papa ka makou.

 

            Ma ka hoomanao i na mea i hoolaha muaia, na Farani ka aa i ke kaua ia Perusi a me ka poe kokua iaia, i hoikeia ma ka la 16 Iulai i hala.  Ia manawa koke no, ua pupuahulu koke na aupuni elua, i ka awiwi i ko laua mau koa e hele imua i ka palena mawaena o kekahi a me kekahi aupuni.  Ua manao ia ina e hakaka keia mau mana nui o Europa, he make ahulau ana ia no ka lahui, oiai, he mau aupuni hoomakaukau kaua mau no laua a elua, aka, aole nae i manaolana loa ia e ka hapa nui o ko ke ao, ko Perusia hoaano ana e kaua, a aole no hoi i upu e ia oia ke lanakila ana i ke kahua kaua mua a laua e kaua ai, aka, ma ka lono hope i loaa mai na ka pu kuikele ka ai aole na ka pu Chassepota a ka Farani.

 

            Mai ka la mua mai i kukala ia ai ka aa ana a Farani e kaua, ka hoomaka ana e hoomakaukau i na koa, ka liuliu o na lako kaua, ka aahu i na kapa koa, ka paa i na pahi a me na pu, a i ka la 30 o Iulai, ua ku kekahi ma kekahi aoao o ka palena o kona aina iho a pela no hoi kekahi, ma Reine; a mamuli o na lono waea, ua pahola aku na koa Farani a noho maluna o Saraboro ma ka palena hikina, a i Keonevile a i na kulanakauhale mawaena o ia mau wahi, oia o Bita, Sana Avolda a me Meza.

 

            Ma keia la 30 o Iulai, ua hiki kino ae ka Emepera ma ke kahua kaua; a ua manao wale ia ma kela wa, mawaena o 250,000 a hiki i ka 300,000 na koa o Farani, e akoakoa ana ma kela mau wahi i hoikeia ae la.

 

            Ma ia wa hookahi no hoi, aole i emi iho ko Perusia eleu a puahi no ka hoouuulu ana i kona mau koa ma kela a ma keia wahi maluna o kona aina.  Ma na lono mai Parisa mai maloko o ka waea, he 300,000 Perusia ma Tereve, 100,000 ma Ululaau Eleele, 200,000 ma Meine, 100,000 ma Kelewiga a he 80,000 ma kahi e kokoke aku ana i Balina.  Ina he oiaio keia, alaila, o ka huina o na koa Perusia i makaukau ia wa, he 780,000.

 

            Ua manao hou ia, ua hiki hou mai he mau koa, ma na huina hio mai Tereve, Meine a me ka muliwai Toule ma ka la 31 o Iulai, a ua oi aku mamua o 400,000 ke hui pau loa ia me na koa mua ma ia mau wahi.

 

            Mai ke kulanakauhale mai o Meine, holo i ka hema, he lalani mauna i kapaia o Vosege.  O ka manao o ka Alihikaua nui loa o Perusia, o ka mahele ia o ka puali kaua nui i ekolu mahele, a maki aku imua, a e hoonohonohoia ka mahele ana o na puali e like na poo penei:  O ka puali mua, malalo o ka Hunona a Victoria, oia ka lei alii o Perusia, Ferederika Uilama, e nee kona puali ma ka hikina o na lalani mauna Vosege e kokoke aku ana i Reine; o ka lua, malalo o Generala Bitenfila (Bittenfield) a e hele ia ma ka laina ma Tereve aku a i Meza; a o ke koiu, malalo o ke Keiki Alii Ferederika Kale, e hele kona puali mawaena o kela mau puali elua.  O Generala Moleke, oia ka mea nui maluna o keia mau puali.  A-e ia keia kuhikuhi ana me ke kuikahi a hoomaka na puali e hele.

 

            Ma ka la 2 o Augate, hiki like mai la na puali nee imua ma Sabarukena ma ke alahaka o ka palena o Reine, a he mau wahi mile e hia la ke kaawale mai ka palena mai o Farani.  Hoomaka koke no ka hakaka, aka, he elua wale no paha a ekolu mau wahi hora, ua emi mai ka Perusia mai ke alahaka mai, a noho iho la ka Farani malaila.

 

            Ma ka la 3 a me 4 ae, ua hoomaka hou ke kaua ma kahi i kapaia o Weisenabuga ma ka palena ponoi o Farani a ma ka hikina aku hoi o na lalani mauna o Vosege.  Ma keia wahi, ua hoomaka ke kaua o ka puali koa o ka Hooilina Alii o Perusia me na koa Farani a lanakila iho la, ua keiki Lei Alii la maluna o ka enemi.  Auhee aku la na koa Farani, a no ka nui o ka pupuaholu o ko lakou hee ana, waiho iho la na Farani i ke Generala Donay i ke kahua kaua ua make.

 

            Alualu wikiwiki aku la na Perusia, a ma ka la 6 ae, i ka wehe ana ae o kai ao, hoouka hou ia he kaua, oia ke kaua nui o Hagenau, i hoopuka pau ia kona moolelo mawaena o ko kakou mau mea hou o keia la.  O ka lua keia o ko Generala McMahon hee ana imua o na Perusia, a ua lilo keia hee alua ana o keia Generala akamai loa o Farani, i mea e hoohilahila ai i na manao koa o Farani.

 

            Mahope o ka lanakila ana o na Perusia ma keia kaua, ua nee aku no lakou e maki imua; a ma na lono waea hope loa, he hoouluulu la e poai puni i ke kulanakauhale o Meza iloko o Farani ponoi.  Malaila ke kaua e manaoia aku nei, e hooukaia ma ka la 12 ae, aka, o ka mea paha e kaua ole ai, o ka emi hou mai o na Farani i hope.

 

            O ke kulanakauhale o Meza, he 65,000 ka nui o na kanaka, a ke ku la ma ka muliwai o Mossele, 170 mile ma ka Hikina ponoi aku o Parisa.

 

            He mea maopopo, ina e lanakila ana na Perusia ma kela kaua hou aku e manao wale ia la, alaila, o ka lakou wahi e ae wale no e olelo ai e hele, "imua i Parisa," a lawe mai i ke kulanakauhale alii o Farani.

 

            Ma na lono hope loa, ke pioo la o Parisa, a ke awiwi la na hoomakaukau ana e hoopuni i ke kulanakauhale me na mea e pale aku ai.  Ke hele wikiwiki loa la na Geremania imua, a o ka mea e hanaia, he pono no e hanaia i ka wa hookahi.

 

            Ua manaoia mamua iho nei, e paa ana ke kaua ma ka palena o Reine, eia ka e nee loa mai ana i ka puuwai o Farani.  O ke kumu o ko Perusia lanakila mai nei, no kona akamai maoli no i ka lawelawe i na mea kaua, a no ka lokahi maoli no hoi kekahi o na makaainana, no ka mea, iloko o na pule elua, mahope iho o ka aa ana mai o Farani, ua makaukau o Perusia, he 800,000 koa e ku ana ma ke kahua kaua.

 

            O keia lanakila ana mai nei o Perusia, he pakui ana mai no ia no kona kaulana i ke kaua iho nei mawaena ona a me Auseturia.

 

            O na kuhikuhi ana i na wahi e hele aku ai na koa o Perusia, ua hana e ia no i Balina, a he hooko wale ana no ka na Alhikaua e like me ka mea i hooholo lokahiia i o ka lilo loa.  Ma keia hapai lokahi ana i keia hana nui, i loaa mai ai ia lakou ka lanakila, aka, i na he hana na ke Akua mai, e hoikeike ana i ko ke Aupuni Hoole Pope mana, alaila, he hana okoa ia.

 

            O na manao kuee no ke kaua mawaena o na haole Geremania a me na haole Farani ma ke kulanakauhale o Kapalakiko, he ulu nui ae nei, aka, aole nae he hookui hakaka i lonolonoia.  Ua hoopuka na haole Geremania ma Kapalakiko i keia mau huaolelo:  "E haawiia he elima tausani dala i na Geremania i ka haole Farani makau ole, nana e pii a loaa kela Hae Perusia ana i uku ai he $500.00, (Kakau inoaia) Iosepa Emeric."

 

            Ua hoopukaia ma kekahi nupepa haole, ua make kekahi paele waiwai ma Honolulu nei, a ua ili aku kona mau dala, i kekahi paele hana keaka.