Ka Nupepa Kuokoa, Volume IX, Number 21, 21 May 1870 — He Mele Inoa no Pusieta Keliaukai. [ARTICLE]

He Mele Inoa no Pusiela Keliaukai.

Auhea oe e pua-rose lani Kuu pua kau ma ka hikina, Eia no au o Kekeli Kela moku oi o ka holo, Nana i kuehu ka moana, Kaawale ai na mokupuni, Kue o Farani me Mareka, Ike oe la i ka mea maikai, E kuhi ana paha oe la, O ka pua hookahi kena, E ai ia'u e ka manu, Eia mai no ka uleu, Ka papa akahi o Hana, Ka iwaiwa o Lanihuli, Haina mai ana ke kaona, No Pekipeki no he inoa. Auhea wale oe e ka ohu, Halii o na kuahiwi, Ua lohe mai au i ka leo I ka pane ana mai lohe au, Ua ko aku la i Milolii Ua pii aku la i ka opua, Aohe hana a Ailana, Ke iho nei o Kekeli, Pilipili aina ole mai, Ke hao ae la i ka moana, Ua ike ae la e ke kapena, O ka holo no ia Anome, Nana i alo na hau anu, Na hau anu o ka uka, Haina mai ana ke kaona, No Pekipeki no he inoa. No pua lilia ke aloha, Ka pua oi ma ka hikina, Nana i alo na lae ino, Na pukoa ku o ke kai, Aole no au e hopo ana, I ke kuaua o ke kau, I ke kawewe ana iho lohe au, Pau ka hana a ke kupuinoo, Mai noho oe a hana mai, I ke aupuni kipi o Mareka, O ka Alabama mai keia, Nana i alo na kai anu, Haina mai ana ke kaona, No Pekipeki no he inoa. Auhea wale oe e ka noe, Kuu hoa pupuu o ke anu, I mehana i ka lau laau, I ka lau apo a ke alaha, I aloha i ka pua iliahi, Eia no au o ka Eu, Nana i aloha ke kaona, Aole no au e hopo, I ke kihapai lehulehu, A na koa e alo nei, Hopo ole i ka ua kuahine, I ka leo mali a ke kahuli, Haina mai ana ke kaona, No Pekipeki no he inoa. Na mea haku MRS. M. N. KEPALEILIAHI MRS. E. K. KAHIHOKU. Hana, Maui, Mei 12, 1870.