Ka Nupepa Kuokoa, Volume IX, Number 7, 12 Pepeluali 1870 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

Daughter of Zion, awake from thy sadness

11.

1. Ala'e mai kou u, e ka Pua a Ziona !

E ala, ua holo na enemi ou ;

 Ua ao ma kou puu ka hoku o ke oli ;

E ala, ua hala kou po hooluoluu

2. Ikaika na koa i kaua ia oe,

Ua eo no nae i ke Lii mana ou,

Ua hee me ka opala ke nou ka makani,

Ua hee no na lio, na kaa kaue pu.

3. Ka Pua a Ziona ! hapai me na lira

Ka Mana o lesu i lanakila'i ;

Hooho ! ua pio na mana hooluhi ;

Hauoli ! Ziona ! ua hookuuia'e

           

                        Hawaii

Spirit Divine, attend our prayer

8-6

1. Uhane mau! hoolohe mai,

A launa me makou,

E iho me kou mana e,

E iho mai ano.

2. E iho me he lama e,

I ao ae na naau ;

A nau makou e alakai

I kahi ola mau.

3. E iho me he ahi e,

Hoomaemae ia makou,

I lilo na uhane nei

I luakini nou.

4. E iho me he hau aiai,

Hooaiai ia makou,

Hoomaū mai i ulu ae

A hua maikai no.

5. Me he makani e iho mai

E hoohaalulu ae

I ko na aina, ko na kai,

I huli nui mai.

                        Hawaii.

Come holy Ghost in love.

--------

6-4

1. Nee mai, ka uhane mau

Me na kukuna ou,

I ao makou ;

He maikai lani kau,

Homai i oli ao

No na naau luuluu,

Ho mai ano.

2. Nee mai, ke Hua maikai,

Me makou e launa'i

A haawi mai

I maha no makou,

I malu ma ke ao,

I oli ma ka po,

Hoona maikai.

3. Nee mai, ka Lama Ao,

A kau maluna mau

O makou nei ;

He ao olino kou,

Ma na kukana ou

E pau ko makou po,

A pomaikai.

4. Hapai i na manao,

Na kuko e hoopau,

Me na luuluu ;

Hoohaahaa i na naau,

Paipai i ala mau

A noho makaukau,

Ke hea lesu.

                        Hawaii.

We've no abiding city here.

8.

1. Aole wahi paa maanei,

Nolaila ko ke ao uwe ;

U ole nae ka mea maikai,

He maha kona maluna'e

2. Aole whai paa maanei ;

E paa maanei, me e ka auwe !

He hune, eha luuluu nei,

Iluna kahi e maha'i.

3. Aole wahi paa maanei,

Na hoa malihini e,

Kuonoono ole no.

E ku a naue i ke ao.

4. Aole wahi paa maanei,

E imi i kau hale e,

Ziona ia Iesu ke Lii.

Kauhale ao, a mau loa'e.

5. Kauhale malu, nani e !

Pau no ka luhi ; pomaikai ;

I mau eheu i lele au

I ou la, ia kauhale mau.

6. Hamau ! kuu uhane e kali e

A hiki mai wa maikai ;

E hana mau a kii lesu

E kai ae ia'u ia meha mau.

                                    Hawaii.

            Ma ka mokuaina o Ohio, ma Amerika Huipuia , be eono haneri kanaonokumamakolu na Halekula i kukuluia i ka makahiki i hale iho nei, i wahi e hoonaauaoia ai ka lakou mau keiki e huli ana i ka naauao. A pehea la boi ma Hawaii nei? Ehia la mau Halekula a na Kahukula palaualelo i kukulu iho nei, i wahi e ao ia ai na keiki Hawaii ? Aole paha. Malia no paha, aia no maloko o na wahi hale hakahaka, e pukapuka mai ana na paia, me he la ua ki wale ia i na poka.

            Ke hoomakaia nei e eli i alanui holo kaa ahi malalo ae o ka honua. ma ke kulanakauhale a Nu loka. E akahele, mai eli loa iho a hohonu.

 

HE KAAO NO KAUILANI.

Ke kupueu o ka uka uaokele o

Kowakini i Wailua. Kauai. a me

kana poe mamo aku.

HELU 13

            [Mamuli o ke kono ana mai a ka lehulehu e hoopuka i Kaao a moolelo Hawaii a haole ma ko kakou nupepa. a no ka mea hoi, no ka lehulehu ka nupepa, nolaila. ua ae aku makou e hoopukaia ke Kaao Hawaii malalo iho nei.   Aka. ke noi nei makou, o na olelo maalea a me oa olelo hoomanamana o ka wa kahiko, aole no ia he mea na kakou e manaaoio aku ai : he hoike ana ia i ke ano hupo loa o ko kakou lahui i kela wa.   O na hewa a me na olelo pelapela, e kapae loa aku ka haku Kaao ia mea mai kona kakau ana mai.]

            A pau ke oli ana mai a ua waa la, hoopuka aku la o Laukaieie i kana olelo penei : "I hea ia aku nei hoi paha oe e hoi mai i waa no na hanai a kakou e hoi ai i Kauai ; i ka aea loa no hoi kekahi ou, aohe no hoi o ka noho koke mai maanei ae la, nana mai ana o na hanai a kakou,"

            I wa koke no ku a waa ae la o Mauoki, a ike ia aku la he mau hookele e noho ana iluna, ua kupa a kamaaina wale i ka holo moana ana, aohe paki kai wahi a ka olelo, a o ko laua mau inoa o Mapunaku a me Owaikahiki, ua ai wale paha oe i ka momona a na'lii o na aupuni e aku i nanea loa ai oe, hele aku la no hoi paha a ahu ka olo o ko auwae, wahi a Kaniaula ia Mauoki, Aka, hoolale koke mai la o Mapunaku ia Kaniaula e hooili na ukana a makaukau kakou i ka holo aku, a he mea ole hoi ia i ka lima o na kanaka o Waialua, aole i emo kau ana na ukana, a kau nei ma kela helu iluna o ua waa nei.

            Aka, ia Kamami i kau ai iluna o ka waa, kupu mai la kona aloha i kana keiki ia Kekauila i ka noho i Oahu, a uwe iho la ia me ke kulu o kona waimaka e hiolo ana ma na papalioa nohenohea i ka ihu anu.

            A hoomaka mai la na hookele e hana i  ka laua hana, o ka laua mau hoe he mau laau loloa, e hous maoli ai no ka i ka honua, a ku no iluna ua mau kanaka nei e pahu ana me kou laua ikaika, aole no hoi i emo pae ana ko lakou waa i Wailua, Kauai, a lele oku la o Kamamo ma i kapa a pii aku la a hiki i Pohoula hoomaha.

            Aka, o ka waa o ua poe nei ua nalo aku la iloko o ka opu hohonu o ka moana me ua mau hookele la no, mamuli no o ke aupuni Hawaii iloko oia kau a nee loa aku la i Kahiki ; a e ike no oujou mahope aku i ka hana a ua waa kupua nei o ka moana, a pela no i na inoa e ae ma ka hope o ko kakou kaao ke hiki aku ia wahi o keia kaao, aka, aole e lilo ia mau olelo e poino ai nou e ka mea e heluhelu ana, he ano naaupo ia no kela wa o kuu lahui. Aka, ua nui a lehulehu wale na olelo ku i ka haumia a me ka pelapela i wahio ia e ka oukou wahi kauwa nei e like me ka mea i papa ia mai ma ko kakou kukini mama ; in a e hoopuka pu ia me na olelo a pau, aole no e pau i hookahi makahi a oi aku ke hoopukaia keia kaao.

            Ua lawa ae la ka nana ana ma kela mau mea, e hoi hou ae kakou e ike i ko Lepeamoa ma hiki ana imua o kona mau kupuna hanai. A hoomaha iho la lakou a kuu ka luhi ka maloeloe a me ka nae, a pii aku la lakou ma ke kula e waiho la ma ka aoao hikina akau o Wailua-kai maluna aku o Papalae a me Pohoula, a ua loaa no paha i na kamaaina olailo ka inoa o ua wahi la ; a hiki ana lakou i Lanikuhana ma ka aoao hikina o Nounou, e noho mai ana o Kapalama me kana kane me Honouliuli a hui aloha pu iho la lakou me ka nui o ka alala ana.

            A ninau aku la o Kamamo ia Kapalama. auhea ka hoi o Keahua? Aia no la i uka o Kawaikini me ka moopuna a laua, aohe no a ike iki ia mai i kai nei wahi a Kapalama. A noho pu iho la lakou a hala na la elua, a i ke kolu o ka la o ka noho ana ia Kauai aiua awaawaa lehulehu, hoounaia kekahi kahu (a-i-puupuu) e kii ia Keahua ma e iho mai e ike a e hui aloha pu me ke kaikamahine, me ka moupuna Kamamo a me kana kane me Waialua, aole no hoi i emo hiki ana ke kauwa i uka o Kawaikini, a hai aku la i na kauoha a pau i ka elemakule alii o ka uka a me kana wahi puali ( wahine ) a me ka laua moopuna, a huli hoi mai la ia a mahope mai no hoi o Kauhao ma o ka iho ana mai a hui aloha iho la me Kamamo a me Waialua, me ka uwe ana e like me ka uwe a Hawaii nei i keia wa, (he uwe hamama e nui ai ka leo.)

            Eia ka mea haohao i ko Keahua ma maoao, aole o Lepeamoa iloko o keia hui aloha ana, aia no ia i kona kino eepa kahi i noho ai, nolaila aole o Keahua ma i ike i ka laua makahiapo. Aka, o ka Kamamo hana o ka hanai no iaia mai kona la i hiki ai i Kauai a hiki i keia la e olelo ia nei. A i kekahi la a Kamamo i hanai ai i ua moa nei e like me ka mea mau a lilo i kino kanaka, kiia o Keahua ma e hele mai e ike, a hele mai la no hoi e ike. Aka aia no o Kawaikioi ke noho la no i ko Kamamo ma hale e hakilo ana i na helehelena o Lepeamoa, oiai, ua ike aku la oia i na ano a pau i ka manawa a Kamamo e hanai ana iaia.

            A mahope iho, hoi aku la o Kamamo i kahi a Kawaikini e noho nei e hakilo ana hoi i ke ano o kona kupunohine moa, a hoopuka mai la ia i kana olelo imua o Kamamo penei : Akahi no hoi ua nui o ua kino o kuu kupuaohine o Lepeamoa, e aho paha e hana aku au a lilo i kino kanaka maoli i kela wa keia wa. aole o'u makemake i kino moa kona. Ia wa hele aku la o Kamamo a hai aku i keia mau mea imua o Lepamoa, a pane mai o Lepeamoa imua o Kamamo, in a he akamai kona i ka hana i kuu kino a lilo i mea maikai oia no ia i kona manao ; a ina no nae hoi e pau keia ano kino o'u la, alaila pau ko'u wahi mana aole wahi mana e koe.

Ka hana on a a Kawaikini ia Lepeamoa a lilo i kino kanaka wale no.

            A hoi aku la o Kamamo a imua o Kawaikini a hai aku la i keia mau mea a pau loa, a hana iho la o Kawaikini penei : Kahea aku la ia ia Keaulewa e hookuu mai ia wai hookanaka, a hookuu ma no hoi kela e like me ka mea i kauohaia aku iaia. (Ua hoomaopopo no hoi paha oukou e ka poe i lawe i ke Kilohana Pookela o ka Lahui, mai ka hapa o kela makahiki i kunewa aku nei i ka aoao mau o ka honua a hiki i keia makahiki o ka Haku 1870. ua hai aku au ma kekahi oia mau helu i ke ano o keia Keaolewa.)

            Nolaila, e nana ae kakou i ka lapaau ana a ua iwa kiani nei o ka uka i kona kupunohine, a penei oia i hana, oiai, ua waiho ia mai la imua o ke alo o Kawaikini ua wai la, a hopu aku la ia ke kino moa o ke kupunohine a hooluu iho la iloko o ua wai nei mau lima a lele ana ka ua kino eepa nei a Kapukaili i uka o Kapahi, a o kona inoa no ia a hiki i keia la o Lepeamoa, he pohaku nae i ke like me ka moa, a i maakemake e ike e hele no a i Kapahi ninau i na kamaaina malaila, aole lakou e hoole mai i keia.

            A ia wa ike aku la o Kawaikini i kana mea e hana nei he kino kanaka, (he wahine) a pane aku la ia, "Ae o ko'u makemake ia o keia kino, aohe pono o kela kino ou he mea ai na na'lii a me na makaainana. " A kahea hou no keia penei i na kupuna o ka lewa : E ka maka o ka Hokuloa, e lawe oe i kuu leo a hiki i Nuukaiakea, a oia kai la popoia a ka poho o ko lima kiola mai i kai puku pau no kuu kupunohine no Kalehuamakanoe. A lohe aku la o Hokuloa i keia leo o kana moopuna, a hele aku la ia a imua o Kahikipalenaku ka mea nana e malama ana ua kai la ia wa. A i aku la ia, E! ua hilahila i ka kakou milimili alii o lalo o Kauai, a pane mai kela na Pamano nana mai o Manokalanipo, i noho aku ai ia Nuukaumakalani na laua mai o Pihanakalani i a loaa mai o Kaleikoki wahine, a nana mai keia hanauna. Ae mai la kela, Aole io no o ka haku. A ia wa kiola ia mai la ua kai la a ke alo o Kawaikini, (he keu no hoi a ka helelei ole o keia kai aka, mai manao nui ka poe e heluhelu ana he mea na oukou e hooiaio iho ai, e heluhelu no na me ka noonoo no i ke ano o ka huaolelo kaao.)

            A hehu ia iho la ua o Kalehuamakanoe, (ua kiloiia kela ino mua ona) i ua kai la, a auau iho la ia Waiola a ae hou ae a waiui, a lilo iho la keia i kino ui e like me ke ano mau o na olelo ana o keia kau he ui, he nani a he maikai, &c. A kauoha iho la o Kawaikini i na makua ia Kamamo ma penei: I noho auanei a i kii mai o Makaiwa ia olua hoi ia ilaila. E hoi ae au i ukua ke hea mai nei na lehua o Kaawakoo e hoi aku i ka uka lilo o Kawaikini, (aia no keia wahi i uka o Wailua.) a hoi aku la kela me kekahi mau kupuna me Leialoha w., a me Kupulupulu ma a hiki i Kawaikini a noho iho la.

Ka ike ana o Kawaikini i ka hana a kona kaikunane i ka heiau i Waialua, Oahu. Ka hoao ana o ua keiki nei me Kapikookalani ma ka moeuhane a hele kino aku.

            A ia Kawaikini e noho nei i ka uka, ike aku la ia i ka hana mai a ke kaikunane i ka heiau ana, a ku na pou mua o ka heiau, hoomaka mai la kona kino e ka luhia a ka hiamoe i kela la i keia la, a na kona makuakane wale no i hana ka heiau. Aka, iloko o keia wa e hooninipo ia nei ko kakou Kekauila e ka hiamoe, looa iho la ka uhane o kekahi wahie ui e noho ana i Kahikikukuma i hoikeia ae la hoi kona inoa mamua, a hana io mai la ka lia iaia i kela la i keia la, aohe no hoi he hiamoe ana e nele i ka loaa mau o ka uhane e ua kaikamahine la ia Kekauila.

            A mahope iho aneane ae e paa kana heiau, makakau oia e hele aku e huli i kana mea e lia nei. aka, pauhia hou ia iho la ia e ka hiamoe. a ia wa halawai mai la ka uhane o Kapikookalani me ia a olelo mai la penei : "Mamuli o ke kono ana mai a na koii a ka manao e hapahapai ana i ko'u apahu kino, e i ana e hoohuiia kaua i ke kaula gula nani hemolele o ke ola kino ana, me kuu manao paa e lilo oe i hoa no'u e lai ai o na kaunu a ka manao o keia noho ana." A pane aku la ko Kekauila uhane imua ona. Ae, he oiaio kau mea e pane mai nei imua o kuu kino uhane nei, o ko'u manao paa ia o ko lilo na'u. a pehea la kaua e hui ai me kino kanaka, oiai he malihini kou mau helehelena imua o ko'u maka i keia wa, a o hea hoi kou aina hanau i hiki kino aku ai au ilaila ke pau ae kuu umu? A pane mai la kela penei : " Aia ko'u aina i Kahiki o Kahikikukuma ko'u aina ponoi o ko'u mau makua o Kahikipalenaakane ko'u makuakane, a o Hailaniwahine ka ko'u makuahine, a o ko HAilaniwahine mua o Oneoneihonua a o Kamonilani kana kaikamahine, a o ke'lii oia aupuai o Kaimanaholo, (Moi) a i manao oe e hele ae e ninau i keia aupuni a me ke'lii. a e ike no oe i na hana a ke'lii nui oia oia aupuni, he alii maikai, aole hana i na mea e pono ole ai o ka manao o kona mau makaainana he nui kona aloha ia lakou." A pela iho la i olelo mai ai uhane kaikamahine la ia Kekauila. A puoho ae la ia mai kona hiamoe ana aia ka! he moeuhane kana, a mahope ana aia ka ! he moeuhane kana, a mahope iho hooko oho la ia i kana mea i kauohaia mai. a makaukau iho la ia e holo i ua aina la, a kauoha ihola keia i kona makuakane. Ke hele nei au e imi i ka meai loaa ai ia'u i ka uhane, aka, i keia wa ana e makaukau ana hiki ana o Laukaieie, a olelo aku la keia, e aho paha e lawe oe ia'u i Kahiki i ike aku au i na helehelena o kuu ipo e lia nei o ka pu, a kohu paha keia mau wahi lalani mele penei ia Kekauila.

            " Auhea wale oe e ka halia.

            E ke ano aloha i hiki mai,

            Hookahi no a Kekauila upu iloko,

            He manao uluku i ke hoa. &e."

Ae mai la no hoi o Laukaieie i kona manao, a kau iho la ia iluna o kona hokua a lawe haaheo ia aku la ma ka ili o ka moana kai lipolipo,  no ka mea, (ua ike oukou e ka poe e heluhelu ana i ko Laukaieie ma ano i hai mua ia, a pela iho la no.)

            Ua hala na po elima o ko ia nei alo ana i ke anu a me ke koekoe, a pela no hoi na ao a ike ana keia i ka mauna o ua aina nei, a pae aku la no hoi laua a hele aku la a hiki i kauhale, ninau keia e like me ka mea i aoao ia mai i ka moeuhane, a hai mai la no na kamaaina e like no me ia, a ninau aku i kahi i noho ai ua kaikamahine la, a kuhikuhi ia mai la no a hele loa aku la keia alaila, aia hoi ike ami la ua kaikamahine la iaia nei a kahea mai la, a komo aku la keia me ka malo pulu i ka kai a wehe ia ai la ia malo a hune hou ua malo.

            A hai ae la o Kapikookalani imua o kona mau makua penei : O ka'u kane ike uhane keia a ke ikemaka nei hoi iaia i keia wa ; a heaha la hoi auanei wahi a na makua ? A hoohiki ia iho la o Kekuaila e lilo i kane, a pela no hoi o Kapikoookalani e lilo i wahine a mau loa,  a o ka mare ana no ia oia wa, a  maopopo ae la ua hookoia na iini a ko laua mau manao.  Hoi mai la oia e hana a paa loa  i ka heiau ana, a hiki oia i Oahu a hana no hoi i ka heiau a paa loa aole mea koe.  (Aka, iloko o keia mau hana a pau a Kekauila i hana ai, ua aniani wale noia ia Kawaikini i Kauai i kana ike mai.)  O ke ao wale no ko Oahu a o ka po aia no i Kahiki, a pela laua i noho ai a hapai kana wahine, a olelo ka makuakane o Kapikookalani e oki ke poo o ke keiki ke hanau mai ; a kui aku la ke kaulana o keia olelo a ua kanaka la a puni o Kahiki, ia wa nui loa ke aloha o Hailaniwahine  i ka hua o ka opu o ka laua kaikamhine, me ka olelo o ua kanaka la he wahi keiki alii ole keia wahi hunona, e pono e pepehi kana keiki.  A hele aku la Hailaniwhaine a imua o Oneoneihonua, olelo aku la e like me ka mea i hai ia ae la maluna ; a pane mai o Oneoneihonua, " Aole he pono o ka olelo a ke kane a kaua e oki ke poo no o ka olelo a ke kane a kaua e oki ke poo o ke keiki a ke kaikamahine a kaua ke hanau mai ia pela, he mau alii nui kona mau kupuna no Kauai, no ka pili o na mahana i ka pae kapu o Iao."  He kilokilo nae o Oneoneihonua pela ka olelo mai a ka mea nana keia kaao. 

            Samuela K. Kapohu.

                                               

Ka Hakaka a me ka Haunaele ma Hilo

            E ke Kuokoa; Aloha oe: -Ma ka la 31 o lanuari, oia ka la Konohi a na pake ma Hilo nei.  Ua ulu ae la ka hakaka a me ka haunaele ma Hilo nei.  Na Bila Auwana a me kana punalua i hoala i keia hana ino.

            Ua pepehi aku la o Bila Auwana a me kana punalua i kekahi makai, o Kaikui, a eha loa, pakele mahunehune ke ola; a me kekahi mau mea e iho i hele aku e uwao. A ikeia keia haunaele, kiina mai ka Hope Makai Nui, i kona manawa i hiki aku ai me na makai a me ka poe kokua oia ka manawa i nui loa ai ka hakaka, a hopuia kekahi poe kokua mahope a keia hakaka ana..  I keia wa i ikeia aku ai o Bila e nou mai ana me ka pohaku a me ke koi, me ka olelo pu mai i ka poe e hooikaika ana e hoopau i keia hoohaunaele, e ki mai i kona pu.  I ka hora 8 p.m. ua pau keia haunaele, a ua paa i ka hale paahao ka poe i hopuia.

            I kakahiaka ae, la mua o Feb., hookolokoloia a hoopaiia ka poe i hoopaiia mai.  O Bila, hoopiia $70   me na koina $3.62 1/2.  O kana punalua $50 me na koina.  A o kekahi poe iho ua hoopiia no e like me ka manao o ka Aha Hookolokolo he pono.  Ua hiki paha i ka haneri kanaono dala a keu, ka huina dala maluna o ka poe i hoopaiia, ke ole au i kuhihewa.

            Feberuari la 2. He hakaka ma Onomea. Ua hoeha aku o Mr. Keiki, ka luna nui oia pahana nei. Aka o ka ona no ke kumu o keia mau hana ino.                    J. W. K. Kaukahena.

            Punahoa, Hilo, Feb. 3, 1870

                       

Wahine hanau kupanaha.

            Eia ma Keawewai, Kawaihe.uka, Hawaii, kekahi wahine i hanau mai i na keiki kupanaha ekolu, o Nauka ka inoa o keia wahine.  Penei ke ano a'u i lohe pono ai i ke kane mare a ua wahine nei: Elua malama mamua aku, aohe hanawai o ka wahine, a haohao ke kane no keia noho wale aole hanawai; aka hoi, ua maopopo no i ke kane ua hapai no kana wahine. A hookahi malama mahope iho o ka hanawai ole ana, o ka hoomaka koke mai la no ia o ka nahunahu keiki, e like me ka mea mau i na whaine hapai keiki.  Hookahi pule o ka nahunahu ana, aole no i hemo koke keia mea e nahunahu nei, a i ka Poalima oia ka la 7 o Ianuari ma ka auina la ; ua hemo aku kekahi mea nui keokeo, he meea keokeo e like me ka puupuu ko aiai, he poepoe nae kona ano, aole i ka lea a me ka laua.  Manao iho la nae ua Nauka nei ua pau ka pililkia, eia ka aole.  Ke waiho a mai loa nei nae keia, mai ka la i nahunahu ai a hiki i keia la.

            A me ke ahiaki o ka Poaoono ae la 8 a Ianuari, hemo hou kekahi keiki.  Penei nae kona ano:  Ua like ia, me ke ano a ka muhee, eono iniha ka loa a eha iniha ka laula; eia nae aole i ikeia ke poo, a mahope he mea ua like me ka hiu i-a, a o kona ili e hoopuni ana iaia he ulaula, me he ili la o ke kumu ula o loko o ke kai.  E oni ana no nae keia keiki me he poo la no ka peelua ai koali o na kula, pela ke au o kahi omolemole o mua.  A manao hoi ua Nauka nei o ka pau ae la hoi keia, aole ka! eia no ka he keiki kupanaha hou no koe e hoolauwili nei; a moe ia po a ao ae la Sabati ia, hemo hou aku ana kehaki keiki.  Penei kona ano i ka wa o ka hemo ana aku:  4 iniha ka loa, a o ke anapuni ua like ia me ka nui o ka manamana lima, a houhou ia nae e Paniani oia ke kane a ua Nauka nei i ka laau, panee hou a ku ka loa a hiki i ka ehiku iniha; a ua  like no kona helelena me ka puhi oilo hou, a me he puhi iniiniki la o Hamakua, a ua ike no hoi me ke puhi kapa la ke au o ke poo, e oni pakaawili ia e like no me kana mau hana a pau a me kona hiohiona; pela no keia mau keiki ano e i hoohapaiia iloko o keia wahine.

            O keia mau mea kupanaha ekolu i hanau ia, ua lawe pakahi ia lakou e kanu; a ke manao nei au, ina e kiiia aku keia mau mea aole ma kahi i kanu ia ai, ua hoi keia mau keiki kupanaha iloko o ke kai.  Ke hoomanao ae nei au i ka olelo a Ioba.  Na Iehova i haawi mai i keia mau hana kupanaha ma o keia wahine la.  E hoomaikaiia ka inoa o lehova.

            J. W. KAIKAI

Paepae, Kawaihae-uka, H., Feb. 1, 1870.

Heaha ke Aupuni !

            E noho ana kekahi Lunakanawai, ma ka moku aina o Nu loku, ua laweia mai kekahi hihia waiwai imua o kana Aha Hookolokolo.

            O ke ano nui o kela hihia, he hihia hiki ole ke hanaia, no ka mea, he nui na dala i hoopiia ma ka palapala hoopii, ua hiki aku ka huina o na dala i ka elua haneri.

            I ka wa i hoomakaia ai ka hana ana. a kukuluia na hihia o na aoaoa elua, o ka aoao noi a me ka aoao hoole. ua waiho mai ka loio i kona manao e hoikeia na hoike a pau o na aoao elua, a mahope iho o ka pau ana o na hoike, ua noi ka Aha, e hoike mai ka loio o ka aoao hoole aole he aie. pane mai ka loio," E hana oukou i ka oukou hana a pau," a mahope iho haawi mai oia i kekahi ninau i ka Lunakanawai, " Heaha ke Aupuni?" wahi a ka loio o ka aoao hoole, pane mai ka Lunakanawai," He aina ke Aupuni," helu akahi oe ia'u pela ka loio o ka aoae hoole aie.  Olelo hou aku ka loio i ka Aha Hookolokolo, " Elua a'u ninau i koe, alaila hoopuka aku au i ko'u manao ia oe. Elua. Heaha ke kanawai? Ekolu. Heaha ka Lunakanawai?"

            I ka pau ana o ka ninau a ka loio o ka aoao hoole aie, pane mai ka Lunakanawai, he mau ninau pohihihi no kau e ninau mai nei, aole he kupono no keia hihia. Pane aku ka loio. Eia ko'u manao ia oe. e like me ka pohihihi o ka  ninau. pela ka hiki ole ia oe ka lawe i keia hihia i waena o kau aha Hookolokolo. A hala na minute elima hoike mai ka Lunakanawai i kona manao. Ke mahalo nei au i ka ninau a ka aoao kue mai ia kakou i keia la, no ka mea, he oiaio no aole he kupono o keia hihia e hanaia ma keia Aha, nolaila, ke hoopuka nei au i ko'u manao hooholo, e hoopau i keia hoopii.

            Nolaila auhea oukou e na Lunakanawai o Hawaii nei, mai hookolokolo hemahema oukou, o lilo oukou i poe hana ino i ka pono o o na kanaka, a pela na Lunamakaainana e olelo nei, " e koho mai ia'u i pau na pilikia o oukou." I ka hiki ana aku ilaila, me he kii ala ke ku mai aole he pane iki. Eia ma Wailuku nei, he nui oia poe hana i mau balota he 14 paha ko lakou nui, e akahele e Hawaii o piholo i ke kai hohonu.          Me ke aloha.

            February 1, 1970.                    Waihee Opio.

                       

He mau wahine hanau nui

I KE KUOKOA; Aloha oe ;

            Eia ma Nakolu, Hana, Maui Hikina, kekahi mau wahine hanau nui i na keiki, o ke kaikuaana no a me ke kaikaina, o ka huina o ka laua mau keiki he iwakalua. A eia no ke ola nei lakou a pau, aole au i hui mai me na keiki i make elua, o na mea no i ola ka'u e panee aku nei ma ka Nupepa Kuokoa, i ike mai ai na mea a pau e noho ana mai kela pea a keia pea o na maokupuni o Hawaii nei.

            O ka inoa o na makuahine, o Kahula w., a me Opae w.. o ka inoa o ka laua mau kane o Keaonui k., a me Kauhini k., he opiopio no ko laua mau kulana aole i ano oo, a ke koko hou nei no ka laua mau wahine. Ina paha e ano oo iho aneane e hiki i ke kanakolu ka laua mau keiki. A ke mau ko laua ola kino ana ma keia ili honua paa ; a ina pela hou ae kekahi mau wahine hanau nui o ka Apana o Hana nei, alaila, o ka pii ino ana ae no ia o ka lahui iluna. Mea kuu ike ana i ka noho ana o keia mau ohana, he oluolu maikai ko lakou noho ana me na makua. Oia kahi mea hou o keia apana kuaaina, a he nui no na mea hou o kuu pilikia, nolaila, mahope hoouna hou aku au i na mea hou o ka Apana o Hana nei.      Me ke aloha.

                                                                                                                        L. K. K. K.

                                                                                    Hana, Maui Hikina, Ianuari 26, 1870

 

Heaha mai nei kela hana a na Kuhina.

            Ma o ka lokomaikai o ke Kuokoa helu 5, o ka la 29 o Ianuari, ua ike iho ai i ka mea hou o ke kulanakauhale alii. oia ka hoohaikiia ana o ka Mana Koho Balota. ke kolu hoi o na mana nui iloko o keia aupuni, wahi o ke Kuhina Waiwai paha. Aole ka e hiki i kekahi kanaka ke haawiia mai ka palapala ae koho balota ke hookaa oia i kona auhau i ka la hope o ka malama o Dekemaba. He keu mai nei hoi o Kuhina ma.

            Eia ma ka apana o Wailuku nei, ua lohe mai au mai kekahi kumukula mai, aole ka ia i aeia e koho balota no kona hoihoi ana mai i kona auhau i ka malama o Dekemaba iho nei. Ua hoole mai ka Luna Auhau i ka mana hiki ia ia ke koho i ka mea i manao ai e koho aku i Lunamakaainana. Aka he haohao ko'u i ka hana ana o na Kuhina i keia makahiki, a ke ninau nei au ma ke akea, Ua ku anei i ke kanawai keia hana a Kuhina ma? I kumu hoike nae o ka puu nae o ka lae o ke Kuhina Waiwai. E nana i ka olelo hooholo a ka Lunakanawai kiekie Hartwell ma ka hopii a Hanale Kamikana Esq. A maia olelo hooholo a ka Lunakanawai Kiekie ke paipai aku nei ko oukou makamaka e makaala oukou e ka poe i hookaa iho nei i ko oukou mau auhau i ka malama o Dekemaba e lawe aku no i ko oukou mau balota ma ka la koho e hiki mai ana mai nana aku hoi i ka hoole mai na Luna Nana koho maia la. oiai. ke ike nei kakou aole i ku i ke kanawai ia hoohaiki ana pela.

            No ke kokoke ana mai o ke kau Ahaolelo o keia makahiki, ke nonoi nei au ma o ka lokomaikai o na lunamakaainana e puka ana o keia Kau, e ninau lakou a e kuka hoi me na Kuhina no keia mea e hoopaapaaia nei e hooikaika hoi e nana pono ia mea, oiai ma ia kumu oukou e hiki aku ai i ka hale Ahaolelo. Ke hooki nei au me ke aloha i ka lehulehu.                

John M. K. KAMAKA

            Wailuku Feb. 2. 1870

[Ua hala ka manawa pono i kela pule, aka, ua loaa hope mai nae keia. L.H.]

 

Kokua ia Nakiakaunu

            I ka manawa i haawi aku ai o B. Manoa i ka Ninau ana i na haumana ana, oia hoi kela a Nakiakaunu i hoolaha ai ma ka Buke 8 Helu 40 Aoao 2. e hai ana i ka like ole o ka loaa me ka na haumana. o kana 10 kapuai, o ka na keiki hoi. 4 1/5 kapuai ka loa o ka la. A, ke pane nei kela o ka'u ( Naahumakua.) 10 kapuai , o kana hoi 4 1/5. Laiau mai o Mohola.

            Ua ike au i kau olelo pane ma ka buke 9 helu 2, e olelo ana ma 1/3 4/12, ma 1/6 3/12. Huiia 7/12, lawe mai ia huina. koe 4/12, puunaueia koena iloko o 12/12 puka 2 3/5. aia malaila kuu pane i lohe ko lae i ka uniu. maloko o 12/12 me 1 mea okoa, alaila puunaue o 3/12 puka 1/5 kapuai oia ma 1/12 hoonui me ka puuokoa, ua like me 12/5 puunaue o 5/5 i ke kapuai iloko o 12/5 puka 2 3/5 oia lou laulau, aole i hiki i Pololu.

            Eia hoi keia Nuohooho ou, i ka puunue ana o 5/12 iloko o 12/12 , puka 2 3/5 nona o 2 kapuai, auhea ke kumu o ia hana, aole anei o kou lalau me ka ike ole, oia ke kumu o ko hoopilimeaai, mai noho oe a olelo nau ka loaa 4 1/5 aole i pono kau hana ana, ua holo ko noonoo i kahi e, a ke olelo nei oe, i hoopunini au i ka lilo o ka Halekula ia oe. aole pela, o ko lalau ko mea i hoolahaia ai e kela wahi Kaaka o Waipuhi, oia la i lohe ko puka i ka maha. Me ka puuwaiolu o ko'u aloha i na Keiki hoolelo hua kepau o ka Hale Pai. Ua pau me ke aloha. Ke hoi ne ka Ea pii pali o Puna.   M. Z. Naahumakua

           

            Ke kamailio ia nei, e hooholo i laina mokuahi, mawaena o ke kulanakauhale o Livapulu a me Inia Hikina, ma ke ala wai aku o Sueza.

            Ke manaoia nei, e hooholoia i laina mokuahi holo loaa mawaena o Amerika Huipuia a me Europa, no na la elima wale no ke holo ma kela moana akea o ka Atelanika.

            O ka inoa o ka Pope e kapa aku ai i na Bihopa a pau i akoakoa aku imua o kona alo i keia wa ma kana aha halawai hui. "e kuu mau Kamalii."

            I ko ka Pope mau makahiki opiopio, he misionari oia i ke kulanakauhale o Lima Peru, ma Amerika Hema.

NA BUKE

I HOOLAHAIA E KA PAPA HAWAII

 

Baibala Hemolele Nui ili gula nani

            me na kuhikuhi ma na aoao                                         $12.00

Baibala Hemolele Nui ili eleele kaekae wai gula                       5.00

Baibala Hemolele uuku iki iho kae wai gula                              3.00

Baibala Hemolele pananaiki iho ili eleele                                   4.00

Kauoha Hou ili gula nani me na kuhikuhi                                  3.00

Kauoha Hou ili eleele kaekae wai gula                                      1.00

Kauoha Hou ili eleele                                                                    75

Kauoha Hou Hapa Haole                                                              75

Lira Hawaii 1848 me ke kanawai                                                 25             

Lira Hawaii 1855                                                                          25

Kumu Leo Mele ili manoanoa me ke kanawai                              25

Kumu Leo Mele ili lahilahi                                                           10

Moolelo Ekalesia                                                                           50

Haiao                                                                                             25

Hele Malihini ana                                                                          25

No ko ke Akua ano                                                                       25

Lira Kamalii                                                                                  50

Hoike Palapala Hemolele                                                              25

Moolelo o Heneri Opukahaia                                                        15

Hoike Akua                                                                                   22

Wehewehehia                                                                                10

Ninau Hoike ili manoanoa                                                            50

Ninau Hoike ili lahilahi                                                                 20

Ui Kamalii Kula Sabati                                                                 10

Kumumua Kula Sabati                                                                  20

Haawina Kamalii Buke 2,                                                             10

Buke Lawe Lima                                                                          20

He Buke no ka Pope                                                                     15

Ui Kula Sabati Helu 3                                                                   25

Ui Kula Sabati Helu 4                                                                   15

Buke Euanelio a Ioane                                                                  10

Himeni                                                                                                      50

Himeni                                                                                                     100

NA KAUOHA HOU PAKEKE.

Ili gula nani                                                                                1.50

Ili eleele kaekae nani                                                                     50

Ili eleele                                                                                         35

KAUOHA HOU PAKEKE ME NA HALELU.

Ili Gula nani                                                                                  50

Ili eleele kaekae wai gula                                                              30

Ili eleele                                                                                         20

Buke Wehewehe Huaolelo Baibala, elua ano

Buke Wehewehe Ano Mataio

NA HALELU PAKEKE.

Ili Gula nani                                                                                  50

Ili eleele kaekae wai gula                                                              30

Ili eleele                                                                                         20

EIA NA BUKE HAAWI WALE.

PALAPALA LIILII—

            Helu 4—Makemake anei oe i ke ola?

            Helu 6—E hele i o Kristo la.

            Helu 7—Ka hoi ana mai o ke Keiki Uhauha.

            Helu 11—No ka hoohiki wahahee i ke Akua.

            Helu 16—Ka Eehia ana o ka Ahaaina a ka Haku a me ka Bapetizo ana.

            Helu 17—Mai hana ino i na holoholona

            Helu 18—No ka mahi ana, kuai ana a me ka inu ana i ka Awa.

Ka Davida Male Kumumanao.

Ka Moolelo o Batimea Punaiki

                                                L. H. Kulika.

Kakauolelo o ka Papa Hooko ka Ahahui Euanelio o ko Hawaii Pae Aina.