Ka Nupepa Kuokoa, Volume VIII, Number 46, 13 November 1869 — Ka Nupepa Kuokoa. NA HUNAHUNA NO KA MOOLELO HAWAII. [ARTICLE]

Ka Nupepa Kuokoa.

NA HUNAHUNA NO KA MOOLELO HAWAII.

Kaulana ae la ka lohe ma o a maanei, no ka hiki ana mai o Kaumualii. Pela no ka hoomakaukau ana o ke kulanakauhale i na lako a pau e pono ai ka hookipa ana mai i ka malihini. Pela i hiki mai ai na waa i-a o na aina o na'lii ma Ewa a me ko ke'lii mau aina no na loko papohaku a me na puuone mai olaila. I ka auina la ana ae, ua piha loa ka uapo o Pakaka a me na wahi e ae i na kanaka, no ka hoomakaukau ana i na waa a me na waapa o ke'lii a me na'lii e holo ai iluna o ka moku—elua mau waa kaulua, ekolu waapa a hookahi kaukahi. Wae ae la ke'lii i na kanaka kupono eha no ke kaukahi, a o Kekuaokalani ka lima, a o ua no hoi o Kamehameha ke ono, mahope ia o ka waa a me kahi puaa ai waiu mai ka makuahine ae, ma ko ia nei alo no ia. Ee mua ae la lakou nei a pau iluna o ka waa mamua ae o ka hapaiia ana, oiai o kau ana no iuka o ka aina. Ku lalani ae la na kanaka mai mua a hala i hope, a lima kahi wale ia ae la no ua waa nei a lana ana iloko o ke kai. Pela na mapuna hoe o na kaulua a me na waapa a me na kaukahi nei i o like iho ai, a oili mua aku la no ua kaukahi nei mamua o na waa e ae a pau. A ike mai la ko ka moku i na waa e mahoa aku ana, oiai ua hiki e ka lono i o lakou la mai ke Kapena aku. A i ka huli ana o na waa i ke awa pono mai Ulakua ae, hemo hookahi aku la ke kaukahi mamua, a kaalo ana ma kuanalu o ke Awalua, maloko ae o Mamala, a hoea ana i Kukuluaeo, a pili loko aku la ma ia kuanalu, a hala hope ana ka moku ia lakou nei, me ka ike ole ia mai o lakou nei e ko ka moku, oiai ua lilo nui lakou i ka nana i na kaulua a me na waapa, me ko lakou manao aia maluna o kekahi o ia mau kaulua a waapa paha ua 'Lii nei. A oiai he makani aoaoa makai mai ia la. I ko lakou nei kaa ana nae makai aku o ka moku, he hapa mile paha ke kaawale, a oiai hoi e aokoke mai ana na waa e pili i ka moku e paka iho ana ua alii la i ka waa i na aio ale, o ka pae iho la no ia, a pili mua ana lakou nei ka moku mamua o ka pili ana mai o na waa e ae. O ko ia nei (Kamehameha) alake ae la no ia, a ku ana maloko o ka pelekai me ka puaa ma kona lima. I nana ae ka hana o ko ka moku poe, e ku ana ke 'Lii me ka puaa ma kona lima, i ae la lakou, "Eia ke'lii la." Hookuu aku la ua 'Lii nei i ka puaa, oiai ua ku ae o Kaumualii iluna. Ua oleloia no hoi, ua holo pololei ua wahi puaa nei a ke alo o Kaumualii. A pela ke'lii i noi ae ai ia Kaumualii, "homai ko lima." A pela laua i ike maikai ai me ke aloha oiaio. Aole no oia i liuliu ia wa ma ka moku, oiai i hakalia wale no i ke aloha ana i na alii a pau o Kauai. Hai koke aku la o Kamehameha i kona hoi iuka, me ka i

aku, "E hoi e ae au mamua, a hoouna mai i na waa e kii mai ia oukou a me ke ʻLii." Ua kuhikuhi pu aku no hoi ke'Lii i ko lakou awa e pae mai ai. Ia Kamehameha ma i huli hoi mai ai, lilo iho la ko ka moku i ke kamailio nui ana no ke ano akamai maoli o ua Kamehameha nei a me kona oluolu no hoi, no ka mea, ua kuhi hoi lakou aia ke'lii maluna o na waa e holo pono mai ana, a lilo nui ana kakou ilaila e nana ai, eia ka ma ka moana mai ko lakou ala e haele mai nei. A ia lakou no e lilo nui ana i ke kamailio, maalo mai ana na waa maloko o ke awa, e ku mai ana ia lakou. E au a e wawe lakou la, a pili ana na waa i ka moku. Mamua o ka pae ana mai o ko ka moku poe, aia na waa ia ua hele a komo i ka ia. e lana ana ma kahi e kapaia nei i keia wa o "Ainahou." Ike ae la oia i ka waapa mua i maalo ae mai ka moku ae, a pae ana iuka ma kahi pae waapa, a o kekahi waapa mahope ae. A i ka wa e kani ana na pu mahope iho o ka pae ana o ka waapa mua, lohe ae la ia he leo keiki e uwe ana ma ka waapa elua ae, eia ka auanei o Kahekili a Kaumualii nei laua o Namahana. O ka make paha o lakou kona manao, a pela no ke ano keiki a pau i ka nana ana. Aole no hoi i hulia ma ia hope iho, o ka napoo aku la no ia o ka la, a ia wa i halihaliia ai ka ia a pau aku la iloko o ka hale laau kaupoku ole e ku koke ana i ke awa. A molehulehu wale hoi aku la na waa a pae ma ko lakou mau wahi iho. Ua hookipaia ae la o Kaumualii ma ma na hale e ku koke ana ma Pakaka, i oleloia e kakou mamua aku nei; a malaila pu no hoi o Kamaholelani ma, a pela no hoi i ka poe i pili i ua mau alii la, malaila pu no lakou a pau, a o Kalua a me Puaaiki, ma ko Papa hale laua ma Kaoaopa. Lilo ae la keia mau la i mau la nui no ka makaikai ana i ua mau alii la a me na ohana alii e iho o ua mokupuui la o lalo. Ua oleloia no hoi, iloko o na la mahope iho o ke ku ana mai o George Kaumualii, ua pii aku oia ma ka hale o Mr. J. Davida e luana ai a e kamailio ai ma ka olelo haole. A iloko paha o ia wa, a he wa e ae paha, ua oleloia, ua papa 'ku o J. Davida ia Kaumualii, i ka i ana aku hoi, "Mai pii oe iuka o Waikahalulu e auau ai, o make auanei oe ia Naihe." No keia mea, ua puiwa koke ae la ko Kaumualii manao, a oia no hoi ka mea nana i hoopokole i kona mau la o ka noho ana ma Honolulu nei. A pela oia i noi ae ai i kona hoi i ke'Lii. Ua kuka nui laua i ke kumu o keia noi koke ana a me ka noho ana me ko laua noho mau ana a make wale laua a ili i ko lau mau hooilina a hope paha. Aka, e nana mai i ke'lii (Liholiho) a olua me ko kaikuahine, (Kaahumanu) a oia kona hooilina. Malaila pu no hoi o Kalanimoku kahi i kuka pu ai no keia mea. No keia mea, e mahalo ae kakou i ke ko io ana o ka ia la wanana ana mamua o ko lakou holo ana mai. A no keia mau mea no hoi i kuka poko ia, pela ka makaukau ana o na mea pele kino mamua o ka hoi ana o ia huakai a ke aloha pumehana hoahanau o ka pae aina hookahi, a i mau makua ai hoi no ka lehulehu a mau hoalauna me ko na aina e mai. Aka nae paha ea, i hoomauia'i paha ka noho haipule oiaio ana ma keia pae aina, a ke ike nei kakou i ka ulu loa ana a mahuahua ka pono. I ka pau ana o ia huakai i ka hoi aku me ka maluhia, ua kaohi ae o Papa ia Laulapohu, he aikane na Kahee, e noho iki a maluna o na peleleu o Papa e hoi aku ai, me na lako no ua mau kahu la o ke'lii Kaumualii. I ka lako ana o na mea a pau i manaoia, pela o Opunui a me ka luaui o ua keiki nei a me Kaulapohu a me ko laua la mau hoa kahu waa, no ka mea, ua hoopihaia ia mau waa i na ukana paikukui o Halawa, Molokai mai, i ka upena a me na aho lawaia. Pela ko Waipio i Ewa a me na aina o Hawaii mai, oia ka mamaki, ouholowai Olaa, a pela aku. Ua hiki aku keia poe ma Wailua, i Kauai, oiai aia no o Kaumualii ma malaila kahi i noho ai, e luana ana i ka waihalau o ia aina wai o Kauai. A pela i hoikeia ai na mea a pau i laweia aku e ia huakai hope i hiki aku ai malaila. A malaila no hoi i make ai o Opunui ke kahu waa po-

noi o ua mau waa la, i ka inoa o Halemanu. Ua oleloia, ua make oia no ka pakela kuulala loa, e lilo nui ana hoi i ka lealea a me ka uhauha. Pela paha ia i waihoia aku ai ma "Waihoikaea ka iwi o kamahele." Aia no iluna aku o Nounou, o Waihoikaea, ma ka aoao hikina o ua puu la. I kona make ana aku a mahope iho, a na ka luaui (makuakane) ia huakai i hoihoi mai a pae ola mai ana lakou a pau me ka maikai, a lahui mai la na mea o Kauai mai, no ua Opunui la a me ka maikai hoi o na makamaka o ia aina. Ua oleloia mai nae, he mau pilikana no kona makuakane malaila, a oia paha ke kumu o kona holo pu ana me kona kokoolua. Ua mahaloia oia e ko Wailua poe no kona akahai, oiai kona mau la o ka noho pu ana me lakou. Ka make ana o George J. David. Ua oleloia mai, ua make oia no kona hai ana ia Kaumualii, pela ka hauwawa, aka nae hoi, he mea mau no ia i na wa e noho pegana ana keia lahui, ke kuhiwale aku no, "i make ia no ka mea," wahi a ia kau lapuwale. Aka, ma ka nana ana iaia, ua ano elemakule no, ua paa pono kona poo i na oho keokeo o like me ko ka Mea Kiekie i hala e aku a me ko Keoni Miki hoi iloko o keia mau la. Pela no hiohiona mai o ia elemakule. Ua nui na'lii a me na maka hanohano i komo pu iloko o ia kumakena nui ana, a malaila pu no hoi ke'Lii Kamehameha a me na puali koa e malama ana iaia. Pela no ka nui o kona huakai hoolewa mai kona mau hale noho ae ma Aienui, a waiho ia kona kupapau ma Kewalo, ma ka aina o Alekanedero kekahi haole, ua make mua aku oia, a oia no hoi ka haole nana nana i hoomaka mua i ke puhi ana i ka rama ma keia pae aina, a ma Makaho kona wahi i hana ai ia hana. Aole no hoi i kana mai ua mea he nui hewahewa o ka rama i puhiia, ke hele la a komo ka moku kiakolu o Keoua Lelepali, i ka wa i hoi ai ke'Lii i Hawaii, i kono hoi loa hope ana i kona aina hanau. Ka make ana o Kalaniakua. Ua oleloia, ua make oia no ka hilahila i ka panepane pinepine ia e Liliha, no "na'lii hale ole, e noho nei ma ka malu o moua me kuu kaikunane, (Kamehameha) ke'lii nona ke aupuni, a lawe wale ae nei no e pepehi i ka mana keiki, na pio a maua i lawe ai a ola ia Iao nei." A no ka mea hoi, ua hapai ka ua Kalaniakua la na Kamehameha, a ua make e no iloko o ka opu. Nolaila paha na mea i mea i puka ai o kela mau olelo maluna ae, ina pela ka oiaio o ia manao wale ana. I kekahi la hoi, ua hoouna malu aku o Liliha i ka moopuna, (Liholiho) e hele a waha ma ke kua o ua Kalaniakua nei, oiai oia e noho ana me na haiawahine ma ke akea, e kamailio ana ma kela mea keia mea e like me ke ano mau o na'lii. A ia lakou e nanea ana, waha ana ua keiki nei ma ko ia la kua, alaila, o ko ua o Kalaniakua wa no ia i lalau ae ai a hoonoho iho la iluna o kona mau uha. A o Liliha hoi, aia no oia e nana mai ana. A no ko ia nei hana pinepine ana paha pela, ua piha ke kiaha o kona ukiuki no ia ano, he makee alii nona iho, aole e lilo ae ia hai ia mea. (Aole i pau.)