Ka Nupepa Kuokoa, Volume VIII, Number 31, 31 Iulai 1869 — Ka Nupepa Kuokoa. HUNAHUNA MOOLELO HAWAII. [ARTICLE]

Ka Nupepa Kuokoa.

HUNAHUNA MOOLELO HAWAII.

A no keia mea, nune wale iho la no lakou nei i ka hope o ia mea, aka, o ua keiki nei nae, aohe ona kamailo iki mai no ia mea a me ka makuahine, no ka mea, ua ike no ke keiki i ke ano o ia mea, e like me ke aoia ana mai e kona makuahine, "e hoomanawanui," a pela no keia i hana ai. Mahope iho o ka pau ana o ka oihana paikau, ua hoalaia ae na kaua oo-ihe, a he hana weliweli no hoi i ka nana aku. Aka, ma ka nana ana aku nae i ka poe i maa ma ia mea, aohe no hoi he akamai a koe aku. E kaua mau ana kela a me keia aoao i na ahiahi a pau, me na ihe hau i wahi ole ia ke poo—a o ke akamai paha ke kumu o ia pale ole ia ana. Me he wai auau la ia mea i ka poe i ike; a he mea makemake nuiia ia poe. HOI ANA I EWA. I ua keiki nei a me ka makuahine i kau ae ai ma ka waa, a holo aku la a hala ke awa o Kou, nonoi ae la ke keiki i hoe nana e hoe ai, a ua loaa mai no iaia. A na ka makuahine no i aoao aku i ke ano o ka hoe ana, a pela no i makaukau ai ua keiki nei ma ka hoe ana; a no kona maamaa iki no kekahi mamua i ka hoehoe waa wiliwili, oiai ua hoolako ia no e na makua a lako. Ia lakou nei i pae ai ma Ewa, a hala paha he mau la, ua pau na loina a me na hana a na makua, ua hoi hou mai na lakou i Honolulu maluna o ka waa. I ka hala ana iho ia lakou nei o na hebedoma elua a ekolu paha, a ma ka la i o Muku, pau ana ua mau alii nei i Waikiki i ka heenalu, a ahiahi wale, hiki ana ma Laeahi, a o Hilo ae ke ao. He hale okoa no ko ke'lii makua, a he hale okoa no hoi ko ke'lii opio; aia nae ma ka hale o ke'lii opio ua keiki nei me na makuakane pu ma ia hale hookahi. Ma ke ao ona ae o Hilo, a i ka mehana loa ana ae, kahea mai ana ka makuakane, (Papa) E Ii—e. O, wahi a ua keiki nei. O ke ku ae la no ia o ua keiki nei, a hele aku la a noho ma ka aoao o ka makuakane, oiai e moe papu mai ana oia ma kekahi hapa o ka hale, a malaila no hoi lakou a pau, a o kekahi hapa no hoi o ka hale i ua alii opio nei, a e nana mai ana no hoi iaia nei. Pane mai la ka inoa me ka ninau mai, "O Kamokupanee, a o Lualewa, owai kau mea makemake o laua i kou manao?" Aohe hiki i ua keiki nei ke pane, oiai aohe i maopopo iaia ke ano o ia ninau, A liuliu wale, paneia mai ana e kekahi mea, Aohe paha i maopopo i ke keiki ia ninau. Ua hahaiia mai ke ano o ua ninau la, a penei ka haina, "O Kamokupanee, oia ke 'Lii makua, a o Lualewa, oia ke 'Lii opio." A no keia mau mea elua a ia la i hahai mai ai, ua kupilikii loa ka manao o ke keiki no keia ninau ma ke alo o kahi o laua la, no ka mea, hahai ae la kela, "O ke'lii makua, oia ke'lii waiwai, a o ke'lii opio, aohe ana waiwai." A no ka hiki maikai ole i ua keiki nei ke pane ma ka aoao kupono i kona ma-

kemake ke kono, ua pane ae oia me ka i ana iho. Me Lualewa no hoi paha wau. Eia mai hoi ka ia la iaia nei, "He alii waiwai ole keia a kaua la." Wahi hoi a ke keiki. "O ka hoolohe no hoi paha ka pono o ke alii waiwai ole, i waiwai ai no hoi, alaila, waiwai pu no hoi me ke kanaka." Piha loa ae la ko loko o ka hale i ka hoapono i ko ia nei manao, a o ua alii opio nei no kekahi i hoapono aku ia manao. Elua la o ko lakou noho ana malaila, a hoi mai la ia huakai i Honolulu. A ia wa koke no, lohe ka makuahine ia mau pane ana a ke keiki mai kona makuakane ponoi ae, alaila, olioli loa iho la kela, no ke ano naauao o ia pane ana, a me he mea la e ao aku ana ia mau olele i kana 'Lii. LAWE KE 'LII OPIO I UA KEIKI NEI. Oiai e ulu ana ke akamai o na kaikamahine a ka poe lawaia a ke 'Lii makua, no ka ukeke, a ua piha o kai o Kakaako i ka poe hoolohe, no ka lealea maoli o ka lakou ukeke mai, ma ko lakou mau waha na niau a me na apana ha launiu lahilahi; a o ua keiki nei kekahi ilaila i na ahiahi a pau e nana ana malaila. A i ua keiki nei nae e nanea ana, hiki hiki ana ke kii a ka makuahine, oiai ua hiki ae o Kalaiheana ma ko lakou hale, he elele i hoouna ia mai e ke 'Lii opio, e kii mai i ua keiki nei. A hai ana iaia ka elele, a lohe no hoi oia i na huaolelo, a nolaila, aohe ona minamina a koe mai ke haalele iho ia anaina, a nolaila, ua hookaulua iho no oia, aka, no kona kii pinepineia mai, nolaila, kuka ae la oia i na manao elua iloko ona, i ka pono o kona noho mamuli o ka makemake i ka lealea, a o ka pono ke hoolohe i na kauoha a pau a ka makua; aka, aia nae ka hapa nui o kona manao ma ka lealea. A loihi wale ia kuka ana, a ua ekolu a eha paha elele i hoounaia mai ka makuahine mai, alaila, hoopau ae la oia i ka manao makemake ma ka lealea, a o ka hoolohe wale no ka pono. Ku ae la oia a hoi pu aku la me ka elele i ka hale. O ke kino wale no keia o ia nei e hoi nei, aka nae, aia no ka eleele paa o kona manao ma ka lealea, imua a i hope kona mau kaina wawa; a pela mau no a hiki ana i ka hale, aia hoi, ua hala e aku ka elele i hoounaia mai ke'lii mai. A ike mai la ka makuahine i ko ia nei hiki ana aku, i mai la oia, "hoi mai la ka oe?" A pela no keia i ae aku ai. A i hou mai la ka makuahine, "Ia nei iho nei ko makuakane, a hoi aku nei, i kii mai nei ia oe, e hoi oe me ke'lii, kahi a maua i ao aku ai i na mea a pau e pono ai oe ma ka hoolohe a me ka malama, no ka mea, aole oe na maua; oia nae hoi, ua imi iho maua a loaa oe, alaila, e lilo oe i kanaka no ke'lii e pono ai a me na'lii a pau a ko makuakane, e like me kau ae ana imua ona, a imua hoi o keia alii au. A ma ia ae ana au, ua kiiia mai nei oe e like me ko'u makemake a me kou makuakane i ao aku ai ia oe. A ua ike no hoi maua, ua hoolohe mai oe i ka maua ao ana ia oe." O ka laua ao ana iaia, aole me ka hoopai, aole no hoi ma kekahi ano e ae, no ka mea, ua nui ko laua menemene ana nona, a no ka maopopo no hoi ia laua ke ano maikai o ka laua keiki, ma kana mau hana imua o laua. A no ka mea hoi, ua ike ua keiki nei a laua i kekahi mea kamahao, he malo hulu manu, ua piliia ka hulu mamo me ka hulu akakane, a ua hakuia maluna o ka upena nae, a he pae niho kanaka ma kona poo. Ua ike oia i ka wa a kona makuahine e kaulai ai. A i kekahi manawa, e pii ana lakou iuka o Kipapa, mai Kumelewai aku ma Waipio uka, i ka hana auwai mahina, a kau ae la ma kona kua ka makuahine i ua ope malo nei a laua, hookomo i kona mau poohiwi i na aweawe o ia mea a paa, a ao mai la i ka pane ana, "E noho—e!" a pela aku i ko lakou wa e pii ana me ka maalo kanaka ole, no ka mea, ua hala e ka nui o kanaka mamua, a o lakou wale no keia e pii nei; eia ka auanei he pakela loa aku ia hana ma ke alo alii, aole i kana mai. Pioo ka mea akahi akahi a noho ae ma ke alo alii no ia mau hana, oia ka anoho a me ka hoalu ana ilalo i ke kapa a kihei paha, a oia wale no ke kalahala o na mea a pau loa e maalo ana ma na alanui. A ina no he paa lole ko kekahi mai luna a hala ilalo, o kona pono wale no ka moe iho ilalo; a pela no hoi i ka mea e lei ana i kekahi

mea ma kona a-i a me ke poo paha, o ke kala ae no ka pono a kiola ia mea, i ka wa e anohoia ae, alaila oe i ka hoopai a ka make. A i ua keiki nei no hoi e kamailio pu ana me ka makuahine, pau loa ae la kona manao i ka lealea ana i paulele nui loa ai. Mamua nae o ka haalele ana iho o ke keiki i kona makuahine, i ae la oia. "Pehea la wau e hana'i, ke puka mai kuu aloha nou a me ka makuakane, oiai ke kaawale nei au, a e pau ana paha ko kakou noho pu ana?" I mai ka makuahine, "Mai manao mai oe ia maua, o ke'lii wale no kou nmakuakane a me kou makuahine, iaia kau ai a me kau i-a, ke kapa hoi a me ka malo." I hou mai la ke keiki. "A pehea au ke hele mai e ike ia oe i kekahi wa, oiai e noho koke ae ana paha oe e like me keia wa?" He pono no i ka wa pono, aka, o ka oi loa aku no nae o ka pono, o kou noho pu no me ke alii, me ka hoomanao ole mai ia maua, ina paha maua e noho koke ana e like me keia wa, a ina no hoi ua mamanao aku ma kahi e, wahi a ka makuahine. Ma keia mau kamailio ana a laua, ke aneane aku la e kaalo aku ka la ma kela aoao o ke kuahiwi o Kaala, ia wa, pane mai ka makuahine, ''Ua po oe." Homai ka ihu, wahi a ke keiki. Pela no laua i hoopau ai i ka noho pu ana, a ku ae la ke keiki a hoi aku la i kahi o ke'lii. Mamua nae o kona hiki ana aku i kahi ona i kiiia mai ai, ala mai la iloko ona ka noonoo ana i na rula a pau a kona mau makua i ao mai ai iaia mamua. Ma kona hoomanao ana nae i keia wahi ana e hele ai, oia no kahi ma ke alo aku o ka Hale Hookolokolo, a he kapakahakai, a he lehulehu wale na hale heiau e ku ana malaila, ua paa i ka pa paehumuia kela a me keia hale, a he mau kii laau ke ku ana mawaho o ia mau pae humu, he mau kii ano wahine ia, a e kau ana imua o lakou ka maia iholena a popoulu hoi. A me ia no hoi na maia maoli e kau ana imua o na kii ano kane ma ka lele, maloko o ka pa paehumu laau lama. A ma ke kua o ua poe kii laau ano kane la, he anuu, ewalu iwilei paha ke kiekie, a he eono iwilei ka laula; a ua paa ia mea i na mahele oloa keokeo a puni, i omauia ma na aho a pau i hoahoia a puni ua anuu la ma ka aoao akau o ka hale. A pela no hoi ke opu, ua like no kona kiekie a laula hoi me ko ka anuu; ua uhi maoliia nae ia i na kapa aeokahaloa, me he kapa moeloia la; a o na lala liilii laau lama, ma kona poo maluna, me he oho kuwalawala la a wanaoa hoi i ka na nana aku; e ku ana ia ma ka aoao hema o ka hale, a e huli ana kona alo i na kii a me ka anuu, a mawaena o ia mau mea mai o a o, ua kipapa maikai ia i na pohaku a puni, a mawaena pono o laila ka puka pa a me ka hale. A o ka hale hoi, ua uhiia i na la-i maloo, a ua like ke ano o ka hanaia ana me ko Hale o Keawe ma Honaunau, i Hawaii. Aia malaila kahi noho mau o ua alii opio nei. Ua kapaia ka inoa o ia hale, o Hale o Lono. He nui no hoi na hale e ae o ia ano, a ua uhiia no i na la-i maloo; pela no hoi i na laau pou a oa hoi, he laau lama wale no. Pela no hoi ke ano heiau Hale o Lono; a elua hale paehumu e ae, a o ko laua inoa e kapaia ana, Hale Hui, Hale o Kaili. O ka hale hui, no ke'kua hui ia, hale o Kaili, no ke'kua o Kaili, a malaila e noho ai ia mau akua. Iaia nei nae i kokoke aku ai ilaila, ua ike aku la i na laau lama elua i peaia ma ka puka o ka pa e komo aku ai, a mawaho ae paha o ia mau laau. Aka hoi, mamua nae o kou komo ana aku, e wehe mua ae oe i kou kapa e aahu ana i kou ili. A oiai nae hoi, aole ia i lihi koke aku i ua mau hale la, hemo e ae la no kona kapa, a hele aku la, a ku ana keia ma ka hale a-i-puupuu mawaho mai, eia ka auanei malaila ua alii nei, e kakali ana o ko ia nei hiki aku. A ike ia mai la nae keia e ko loko o ka hale, pela lakou a pau i kahea mai ai iaia nei e komo aku maloko. A pela no hoi keia i komo aku ai a noho iho la ma kae kapuahi e a ana. Ua popo ae la no keia i kona wahi kapa i hele aku ai, a noho a malihini iho la no keia. Aka, o ke'lii nae a me ka poe hoi a pau o loko o ka hale, launa oluolu mai la iaia nei. Poeleele loa iho la, a o ke'lii a me na kukui e a ana ka malamalama o ia wa. A pau ke paina ana ma ka hale mua a ia nei i komo aku ai, a ma ia hope iho,

eu ae la ke'lii a hoi aku la i Haleolono, a pela no hoi keia i naue pu aku ai a noho pu ana me lakou. Iaia nei nae e hele pu ana me lakou la, hoohalike aku la keia me ka lakou la hele ana, a ua like no hoi ia me na rula i hahai mua ia mai ai iaia e na makua. Ma ke ao ana ae nae, ike maopopo iho la keia i na mea a pau i oleloia ae nei maluna. Pela iho la hoi keia i kamaaina mua ai i na noho'na alo alii. Aka nae, o keia alii ka oi o na kapu alii, no ka mea, ua huiia na ano kapu alii elua iaia, i olelo ia ai e kakou mamua aku nei, oia ke kapu moe a me ke kapu wohi. No Keopuolani mai ka moe, a no Kamehameha hoi ka wohi. (Aole i pau.)