Ka Nupepa Kuokoa, Volume VIII, Number 23, 5 June 1869 — Ka Nupepa Kuokoa. He kanikau no A. Keohokalole. [ARTICLE]

Ka Nupepa Kuokoa.

He kanikau no A. Keohokalole.

O ka lehiwa lahui hua kanawao, Ka lalani kawowo alii na o I, I hooluai luai i na moku, I kowili hoohua i hapuu a puu, I hoolau aewa ia Kuaanaa a I. - O I! - No ia! - O I no ia nei o ka momole uaua, O ka wiwo ole o ke kaili akua, I noho ia Maa i kaha i kahu Noho Kukailimoku ulu iluna o Maa, Noho wanana i ka lilo o ka aina, Lilo ka moku o Hulu ia Kuakane, O ka pule mana a Maa i ke Akua, Eia, eia ka ai a ke'kua, E Kunuiakea e Kukailimoku, He ai ola, he ai mana, he ai ola loa, E ola ia oe e ku ko-o, E au ke ola a kanikoo, E kanikoo a palalauhala, A haumakaaiole a ka i koko Kau ola ia e ke Akua e, E Ku! E Kunuiakea! E Kuko-o! O ka pule ia e ola ai, I haalele ai ke akua ia Wahiawa, Hoi ke'kua noho ia Molokai I kaumahaia e Lanikaula, I laila pau ka halau awa a ke kahuna, Lele kau i ka moku o Hawaii Kuauli, Loaa I i Hilonuimaaukele, Kuhikuhi i Hale i Heiau Kapu, Kapu heiau o I ia Makaoku, He pa leo ka aina o nei alii, Hooili Iwikauikaua ia I i kona moku, I Pakini pau kauoha o ka moku, Lilo ka waiwai ke kukui o Iwiwkauikaua, Lawe I i ke kukui aimoku, I ka hoano alii i ke awakea, Lilo pu Pohokano ke kukui aumoe, Lilo pu iaia o Kahikaua, Na wai ka hoole he Poe a loa, He hoole lalau he ike ole alua, He ike ole ia Piikea ia Umi, Na kukui hele lua o ke awakea, He ike ole ia Makua ke kukui alii, He ike ole ia Halepo he kukui alii, O Malaopu ke'lii o Kaoi ke kanaka, O Kaiakekua ke kukui. O Maukaa no ke'lii o Kaoi no ke kanaka, O Kaawaloa ke kukui. O Naihe ke'lii o Keaweaheulu ke kanaka, O Kawaihae i Kohala nui ke kukui, Huli ke au ia Kamehameha ekahi, Lilo ke aupuni ia Liholiho a no ke kukui, O Naihe no ke'lii o Kanemaikou ke kanaka, O Kaopuaua i Kanaha ke kukui. O Naihe no ke'lii o Kanemakou ke kanaka, O Kahuku i Oahu ke kukui. O Aikanaka ke'lii o Unualoha ke kanaka, O Nihoa akahi ke kukui. O Aikanaka no ke'lii o Kaunahi ke kanaka, O Nihoa alua ke kukui. O Aikanaka no ke'lii o Kuakini ke kanaka, O Nihoa akolu ke kukui. Huli ke au ia Kalani Kualiholiho, Noho aimoku o Kauikeaouli a no ke kukui, O Keohokalole ke'lii o Keakuanui ke kanaka, O Makao i Kohala ke kukui. O Kaliokalani ke'lii o Kapule ke kanaka, O Mokuula i Lahaina ke kukui. O Kaliokalani ke'lii o Keohokalole ke kanaka, O Luakaha i Nuuanu ke kukui. O Kaliokalani ke'lii o Kaaua ke kanaka, O Halealii i Haliimaile ke kukui. I a ke kukui i ka loaa o ke kanaka, He kanaka no ka mooalii ka lawe kukui. I laila hele mai ko Lunalilo kukui, O Peleuliokalani ke kanaka, I laila kai hou kukui o Piikea o Umi, Kukulu laua na'lii i ke awakea, He kukui ko I he kukui no Iwikauikaua, A e a no he Iwikauikaua he Iwiwkauikaua no, He hiki ke lawe i ko Iwikauikaua kuku, O ko I kukui ke lilo ole ia lakou, Nenenele na'lii i ke kukui ole, Hoi o Lonokae a kae o ka ipukai, Hapapa wale na lima ka poeleele; Koe ka laau o nei alii, I hookoe ia he ike alii, He welina ia Kalani makua, O halawai na laau i ke alanui, O ae ia ka auhau ka laau alii, He Auhau kona he Hoohanau ko ia nei, Ka laau awaawaina alii, He laau akua he laau makamaka ole.

He mea ike mau ia no ke ahi, Ke kukui a na'lii e kaeko nei, He kaeko ike ole he hukihuki wale. He inaina makehewa he lili hoohewahewa, Ka ke ao lalau a ke kuauhau ike ole; He ike ole he hoopololei i kuamoo; He ike ole he lala ko ke kumu; I ulu ka laau i ka hoolala; I pono ke'lii i na kanaka; O ke kanaka ka mea e ola ai ka aina; E ola na'lii lawehala ole ia Ku. E Uli e, e uli i ka poe waha a. E ola, i ola e Kunuiakea - a - Ko ola - E Ku - - Eia la. - Na Kauwelua