Ka Nupepa Kuokoa, Volume VIII, Number 21, 22 May 1869 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE VIII. HELU 21.

HONOLULU. MEI 22, 1869.

NA HELU A PAU 390.

 

KA NUPEPA KUOKOA

HOOPUKA MAU IA MA HONOLULU

I kela Poaono keia Poaono

$2.00

No na mahina he Umikumamalua!

$1.00 no na mahina eono.

ME KA HOOKAA MUA MAI.

 

            NA OLELO HOOLAHA – aole i oi mamua o 10 laina no ka hoopuka hookahi ana, $1.00; alua komo ana, he $1.50; hookai malama, $2.00. E uku mua ia mai ke dala o na olelo hoolaha a pau e hoounaia ana mai e pai.

            KANIKAU – he hapalua dala ka uku no ka aoao hookahi o ka pepa leta, oia hoi 4 keneta no ka lalani hookai – penei: he 25 lalani, $1.00; 50 lalani, $2.00; a pela’ku.

            NA UKU NO NA OLELO HOOLAHA – ka uku pepa, a me ka uku o ke Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.

            O NA UKU PEPA A PAU E HOOKAA MUA MAI NO – aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.

            AIA KE KEENA O KA NUPEPA KUOKOA – ma ke kihi hema o ka Hale Hookipa Luina (Sailor’s Home.) O na hora hana, ma ka eiwa o kakahiaka, a i ka ha o ke ahiahi.

L. H. KULIKA. (Luna Hoopuka).

 

“KA NUPEPA KUOKOA.”

Is published in Honolulu

EVERY SATURDAY

$2.00 per annum, or $1.00 per six

months, in advance.

 

            ADVERTISEMENTS not exceeding 10 lines, inserted once for $1.00 twice or $1.50; and $2.00 for one month; all advertisements must be paid for in advance.

            KANIKAUS will be charged 1.00 per page, or 4 cts. a line.

            PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.

            ALL SUBSCRIPTIONS must be PREPAID. No names, either of foreigners or natives, will be inserted on the subscription list, until paid for. This rule must be strictly adhered to, on account of the low subscription price.

            THE OFFICE OF THE KUOKOA is in the South corner of the Sailors’ Home. Office hours from 9 A.M. to 4 P.M.

L. H. GULICK

For the Publishers

@@ Volume I, II, and III of the KUOKOA, bound, for sale $3.50 each.

@@ Persons having complete sets of the above, can have them bound by paying $2.00 each.

 

KA NUPEPA KUOKOA.

Na Hunahuna o ka Moolelo Hawaii.

HIKI KA ELELE I O PUPUAKEA LA MA KAU.

            I ka halawai maka ana ona me Pupukea. I kauoha mai ko kaikuaana e haele kakou ma ka mauna a hui aku me lakou ma Waimea, no ka mea, ua pau na alii a me na kanaka ilaila, owau wale no kai kii mai nei ia oe.

            A no keia mea, ku ae la o Pupukea a hele, a lawe pu ae la i kana kumu laau palau, a me ka ilio no ka lolo ana, a o ka elele no hoi i hoounaia mai ai, a he mau kanaka e ae no hoi. Ua hiki aku paha i ka elima ko lakou nui o ia hele ana mai. Ua hala paha na la eha a elima paha o ko lakou hele ana a hiki aku la i Waimea. Pela no ke kakali ana o ke kaikuaana a hiki nui ana lakou nei i ka po.

            Ma@@a ae nae o ko lakou nei hoohiki loa ana aku i kauhale, ua hoomoana iho la lakou ma kahi mamao mai, no ka lolo ana i na hauna laau palau ana i ao ai, ma ke kalua ia ana o ka ilio i lawe po ia mai e lakou mai Kau mai. A ma ia lolo ana, ua ike ia no ka maikai. A ma ke ano ana iho o ke ahiahi, a hohola mai la ka po maluna o ka aina, hoopuka loa aku la o Pupuakea ma i kahi o ke kaikuaana e hoomoana mai ana me na’lii, na koa a me na makaainana.

HOOLAHAIA KA LOHE.

            A hiki ka lohe i ka aoao mua, ua hiki mai nei o Pupuakea i keia po, nolaila, apopo no ka la po@o e hoouka kaua ai na aoao elua, ma ke kahua kaua i hoomakaukauia.

            Ma ke ao ana ae hoi, ua akoakoa koke ae la na aoao kaua elua, mamuli mai o kela koa nui keia koa nui, e like no paha me ka laua hana mua ana, aka, he noho nae ia ilalo, a he k@ hoi keia iluna.

            Ua oleloia, o ka Makaku hauna, o ka io ma ke alo pono kahi e paa ai ke kumu o kana laau palau, a pela no hoi ka hauna o kana. A o ka Puapuakea hoi, ua waiho ae oia i kana laau palau ma kona aoao akau, a o ke kumu ma ka lima hema, a pela hoi ke kumu o ka laau a ia nei, aia no ma ka lima akau. A no keia hana a ia nei, ike mai la ke kumu, me ka i mai, “E Kanaloakuaana e, haahaa ka laau.” I aku hoi o Pupuakea, “I ka hale pau ke ao ana a ke kumu.” Iloko no keia mau hua olelo ana i hoopuka aku ai, o ka laau pu no kekahi, a hue ana ma ke alo o ke kumu, a pakele ana. A no ia mea hoi, hala loa ae la ka laau mahope oia nei. Ia wa no, e hoomoe koke mai ana o Makaku i kana hauna, a pa mua iho la o Pupuakea. Ia wa koke no hoi, e koo ae ana keia i ka laulau o kana laau i ka lepo, oiai ua kunewa iho la keia i ka pa mua ana i ka Makaku hauna laau. A no ko Pupuakea pa mua ana i ka Makaku laau, olioli loa iho la oia, a nolaila, lilo ae la kela i ka oniu laau ana, e hookahakahe ana hoi, ma o a maanei.     

            A ia Pupuakea paha e moni ana i ke koko o kona ukiuki, pane hou mai la kana kumu kaka laau, “Hookahi no ka laau o ka ui e Kanaloakuaana make!” Ia lohe ana aku o ia nei i ka ke kumu kaukau ana ae, e hao ae ana heia i kana hauna mai ka lepo ae, (he hue lepo ka inoa o ia hauna) a pa ana hoi i ke poo o Makaku, ma kona maha hema, a haule koke iho la kana laau, me ka olapa ana ma o a maanei. Ma ia pa ana, holo a make aku la o Makaku. A ike mai la hoi ke kumu a Pupuakea i ka holo ana o Makaku, me kona manao paha aole la i make, a nolaila, kahea mai la oia, “E Kanaloakuaana, lilo hoi ko hoa paio.” Huli koke ae la o Pupukea i kona mau poho lima iluna, a i mai la oia i ke kumu ao laau ana, “Ua make, ua kukai ae nei ka ila o’u lima.” O keia hua olelo ka mea e kamailio nui ia nei, “Kukai ka ila o Pupuakea.”

            Ua olelo ia, he hapaha mile paha ka loihi o kahi a ua Makaku la i holo aku ai a haule a make loa aku la. Ua olelo ia no hoi, ua naha a puni kona puniu poo, no ia pa ana me ka ikaika. Ikaika io no nae hoi kela, oiai aole oia i make koke iho ma kahi ona i pa ai, aka, ua ka aku kona aho a hala he hapaha mile.

            E like me ka make ana o ke koa nui o kela aoao kaua, pela no ka luku nui ia ana iho o lakou, nohe, nao ai i ka papaa, i ka ka mea o ka hoomauhala na ole ae.

            Ua oleloia no hoi, o na koena o ka aoao kaua i auhee, e ake ana e hoi i Maui, ua naholo aku i kai, i kahi i kau ai o na waa o lakou. A ia lakou i hiki ai ma kai, aia no ka lanakila e hahai koke ana mahope o lakou. A ike ae la nae lakou i ka lana mai o na pai-malau aku, a kuhi paha he waa, aka, i ka pii ana aku, e poho iho ana ilalo, a o ka make ka hope o ia kuhihewa ana. A ma keia mea, ua kaulana keia a-e pai-malau ana o Kamalalawalu ma. A oia iho la ka uku hoopai kupono o ka mea hookahe i ke koko hala ole. Ma keia kaua ana, e hiki paha ia kakou ke hoomanao ae no ke kaua ana mawaena o Davida a @e Golia.

            Eia hoi kekahi; ua oleloia, ua pakele aku ka o Kauhiakama, (ka mea nana ka olelo kaulana, “Leiwi Kohala i ka nuku na kanaka”) no ka pakela mama. Ma Kona ka kona holo ana. A o Hinau no hoi, no Kona no oia, a he kanaka mama no hoi, a oia ka mea nana i alualu aku mahope ona, oiai e holo ana kela mai ke kahua kaua aku, a oiai no hoi aohe kanaka o Kona, no ka mea, ua pau loa i ke kuahauaia i ke kaua ma Waimea. Pela iho la laua nei i u holo mehameha ai laua a loaa wale ai o Kauhiakama ia Hinau. A no ko ia la ano pio mai ke kahua kaua mai, nolaila, aohe ona manao ae e ola ana oia. Holo aku la ne hoi o Hinau a loaa kela, ninau iho la, “O Kauhiakama anei oe?” Ae aku la no hoi o Kauhiakama. Pane hou iho o Hinau, “Mai makau mai oe ia’u, aohe make ana aku i koe.” A no keia leo, mohala pono ae la kona mau maka, a lana ae la kona manao i ke ola. A mamuli no hoi o keia ano, i hookipa maikai aku ai o Hinau ia Kauhiakama. Kupono wale keia hana maikai ana; mai luna mai no paha. Pela wale no ko ia nei huna ana a hiki wale i ka wa i makaukau ai na waa a me na hemahema a pau o ka waa, a me na lako kino no hoi o ua alii opio nei. I ka makaukau ana o ia mau mea a pau, ho’e ne la keia ia Kauhiakama maluna o ka waa, me kekahi mau kanaka kupono 3 a 4 paha mai iaia nei aku. I ua alii nei nae i kau ae ai iluna o ka waa, ninau mai la oia, “Owai kou inoa?” Pane aku no hoi keia, o “Hinau.”

            Mahope iho o ka Hinau hai ana aku i kona inoa, alaila, komo iho la paha ka manao hopohopo iloko ona, o ike ia auanei kana mea i hana ai, nolaila, i aku la oia ia Kauhiakama, “E ke’lii, a i hiki ola oe i kou aina, mai hookaulana iki oe i kuu inoa, no kau’u hana maikai ana iho nei ia oe; no ka mea, i kou wa e hookaulana ai i ko’u inoa, alaila, e maopopo ana no ku’u mea i hana iho nei nou, ma kuu hoopakele ana iho nei i kou ola, alaila, e kii ia mai ana ko’u ola a e lawe ia no kou ola.”  

            A pau ae la ka laua kamailio ana ma ia mea, huli aku la ua alii opio nei me ka olioli, no kona ola maikai ana ia Hinau. A me he mea la aia no malaila kona manao nui, me ka manao no hoi, e hoi no oia a hiki i Maui, a e hookaulana ana no oia ma ka inoa o Hinau, ka mea nana; hoopakele iaia, aka, o ka Hinau kauoha hoi, hoopoina loa iho la kela.

HOOKAULANAIA KA INOA O HINAU.

            I ka hiki ola ana aku o Kauhiakama i Maui, ua nui na hauoli ana o na kanaka i koe aku o laila i ka huakai kaua, no ko lakou ike ana mai iaia, mai ke kahua kaua mai a ka make nui, no ka mea, aole lakou i manao e ola ana ia. Aka nae, ua lohe wale no lakou, ua nalowale loa o Kauhiakama, eia ka ke malama maikai ia nei e Hinau.

            No keia hana maikai ana a Hinau, ua lilo ae la ia i mea nui imua o ua alii la, a imua hoi o ka ohana alii a me na aial@. A no ka manao nui o ua alii nei pela, ua kapa iho oia o Hinau ka inoa o ka hale, a pela hoi i ka waa ana i holo mai ai, a i ka ilio a me kela mea keia mea ana e kapa aku ai, o Hinau wale no, a kaulana loa ae la ka inoa o Hinau ma Maui Hikina a puni. A no ka lilo nui o ka manao o ua alii nei ma ka hookaulana ana, poina loa iho la ke kauoha a Hinau iaia. A ma ka nana aku nae i kana hana, me he mea la ua like no ia me ka hana hupo a Kamalalawalu kona makuakane; pela no hoi paha keia i ka kakou ike iho, no ke aloha ole i ka leo kaukau i hai mua ia mai ai iaia. 

HIKI KE KAULANA O HINAU I HAWAII

            A maopopo ke kaulana o ko Hinau inoa a me ko Kauhiakama ma Maui a puni, pela no i hoomanaoia ae ai, na ua Hinau nei no i hoopakele i ke ola o Kauhiakama; a pela no hoi keia mea o ka make, i hopu koke iho ai ia Hinau, a make iho la. Ka i no a hala kana mea i ao aku ai ia Kauhiakama, eia io no ka e lilo io ana no kona ola no ko ia la ola.

KE KAUA HOU ANA.

            Ma keia mea, ua hoala hou ia ke kaua ana me ko Maui poe alii. A ua oleloia no hoi, ua kauohaia na’lii o ka mokuaina o Kohala a pau, e holo e kaua aku ia Kauhiakama ke’lii o Maui.

            A no keia kauoha, pela i hao aku ai na’lii o ia mokuaina, a pae ana ma Hana i Maui, a hoomaka koke no i ke kaua. A ua oleloia nae, ua pio o Kauhiakama, a ua mo-kuia kona kino make iloko o ke kai me he moku la. A no keia hana ana pela a na’lii o ua aina lae makani Apaapaa la, ke hao mai papa paakai lua ka moana. Ua manao wale ia nae hoi ia mo-ku ana ma ke kai o ia kino make, i mea e kapaia ai, he inoa Kalanimoku, a nolaila mai paha ko Kalanimoku inoa.

            Maanei hoi kakou e na hoa lawe nupepa “Kuokoa” e nana pono iho ai a e hoomaopopo ai hoi i keia mau kuhikuhi, mai a Keakealani mai, Koihala, Lonoikamakahiki, Kamalalawalu a ia Kauhiakama hoi, no ka mea, ua popilikia maoli ma ka nana ana, a ua ahewaia, ua popilikia a ua make no hoi, no ka mea, aole lakou i malama i ke kauoha maikai o ke aloha, nolaila, ua pili ka poino i ka mea aloha ole, i ka mea nana i aloha maoli mai; nolaila, ua ili ae ke koko o ka mea pono maluna o ka mea hana hewa, a no ka mea, he wa naaupo ia, aole i ike i ke Akua oiaio, aka, ua like no ka Iehova hoopai ana, mai ka wa naaupo a i ka wa naauao, he oia mau no a hiki i ka hepena o keia ao.

(Aole i pau.)

He Palapala Hoike hana mawaena

O NA PAKE MA KA MOKUPUNI

Oahu, na S. P. Ahiona

 

NO KE KAAPUNI ANA I KA MOKUPUNI O

OAHU A ME KA KE AKUA HANA.

 

            Mar.23.  Mahope o kuu ai ana i ka aina kakahiaka me Mr. R. F. Bickerton, ua waiho aku kuu mahalo iaia, no kona kokua aloha mai i na mea pili i ka pomaikai o kuu kino, alaila holo hou au ma Waikane, a hookipa ma ka hale o Rev. Kaawa, malaila kuu nanea wale ana a ai wale no ka aina awakea; a aui ka la , hoomakaukau e holo no Kualoa, ua ukeli pu mai no o Mr. Kaawa me Mr. Pueueu, kekahi luna ekalesia o Waikane, i ka hiki ana o makou ma ka hale wili ko o Kualoa, ua halawi au me Mr. Waila, a ua hoikeike aku au iaia i ka Palapala e like me ka’u hana mau, a ua oluolu no oia e ae ia’u i ka launa aku me kona mau pake, a me ka hapai i ka halawai paha no lakou, nolaila, ua kakali no au a hoi mai na pake mai ko lakou hana mai, ma ia manawa, hoomakaukau i halawai no lakou ma ko lakou hale halawai malaila.

            Ua hookani ia ka bele halawai, akoakoa mai na kanaka he nui loa, na kane a me na waihine mai Waikane mai, a pela no ko Kualoa poe ponoi, me na pake, a me na lapana aku, ua hele a piha loa ka hale halawai a hu aku i waho.

            Ma ka halawai kanaka ka’u i malama mua ai, me ka haiolelo ana, a pau ia, hapai au i ka pule pake, a me ka hai poo olelo ana. I ka pau ana o kuu haiolelo pake, a o ka olelo Iapana ka olelo paipai hope loa, aole no nae i loihi ka namu Iapana ana, oiai, ua haiki kahi ike ia’u ma ia namu, aka ua mau no ia wahi a ka olelo Hawaii, aka nae, ua hauoli loa ke anaina okoa no ka ike maka no paha i ka hana maikai, no ka hana o ka Haku i ko na aina e, a i ka pau ana a ka halawai, hookuuia ka aha me ka maluhia. Ua po nae ka la, aka, no kuu lohe ana, aia o Kahana e waiho kokoke mai ana, nolaila ua paa kuu manao e holo aku ilaila e moe ai i keia po, a ua mau no ko Rev. Kaawa, me Mr. Pueueu holo pu ana a hiki makou ma Kahana, hookipa mua ia makou ma ka hale o ko makou hoahanau oiaio iloko o ka Haku, oia a Rev. E. Kekoa ke Kahu ekalesia, malaila halawai makou me ke aloha, a me ka hauoli, malaila i weheia ai ko makou mau noho lio, ma ia wa, ua kauoha ae o Mr. Kekoa i hona ohana e hoomakaukau no ko makou paina ahiahi, aha, no kuu lohe mua, aia malaila o Mr. Ami pake, (keiki a Apakana,) nolaila, ua noi koke au ia Rev. Kekoa, e alakai ia’u ilaila.

            Ua makaukau o Ami e hiamoe, i kona ike ana ia’u, ala hou oia, a hookipa oluolu loa mai la, me ka lalelale koke i kona Kuke e hoomakaukau koke i ai na’u, a me kuu mau hoa hele kekahi, a pela no hoi o Rev. Kekoa, ua noi mai o Mr. Ami iaia e noho pu i ko makou papa kaukau aina ma ia ahiahi.

            A i ka pau ana o ka makou paina ana, loihi no ko makou luana ana ma ka hale o Ami, alaila, hoi aku na hoa o’u mai Waikane mai, me Rev. E. Kekoa ma kona hale e moe ai, a owau hoi, ua aua o Mr.Ami e moe malaila.

            O keia pake o Ami, he pake opiopio no, he keiki hanauna ponoi oia a Apakana ka pake kamaaina loa ma Hawaii nei, ao ke kalepa ana, a me ka launa kino ana me na mea hanohano, a me na mea haahaa, he pake i ike nuia a keia pae ai@@ a pau hona inoa kaulana, a ua hoi oia i Kina i ka makahiki i hala aku nei, a ua waiho kela aina nui o kela Ahupuaa nui okoa, o Kahana i Oahu na kona keiki (Nephew,) oia ua Ami nei, oia ka luna nui malaila, he nui na pake a me na kanaka malalo-ona, no ka hanai holoholona ana, kanu laiki, a pela aku. Ua noi pinepine mai oia mamua, e holo aku au ma kona aina e makaikai ai, aka no kuu paa i ka hana ma kahi e, nolaila aole i hookoia kana noi, aka o keia ahiahi, hiki au ma kona wahi, no ka huakai o ka hana a ke Akua; nolaila, ua olioli loa kona naau i ka ike ia’u ilaila, a ua kipa maikai no me ke aloha.

            Ua olelo mai no o Rev. Kekoa ia’u no kona mahalo, i ke ano oluolu o ua Ami nei, me ka malama, i ka ka Haku hana malaila, oiai, o ka hale pule a me ka hale o ua o Mr. Kekoa e ku nei, maluna no o kona aina, ma ka wa wa mua, ua oluolu no o Mr, Apakana i ke ku ana o ka hale o ke Akua malaila, a pela no keia wa i ua Ami nei, aole he wahi meheu iki i ka manao hookeekee a me ka huhu hoi, a he pake hele pinepine no hoi i ka pule, a me ke kokua i na hana a pau no ke aupuni o ke Akua. Iloko o kona keena hookipa a’u i ike aku ai, he baibala nui e waiho ana, a he buke himeni, rila himeni, Kauoha Hou, buke Moolelo Ekalesia, a me ka pahu pila kani, me he mea la he hale kela no ka poe haipule. Ua ike oia i ka heluhelu palapala Hawaii, a ua ohi no oia i ka nupepa o kela ano a me keia ano. Ma kuu kukakuka pu ana aku me ia i na hana maikai a ka Haku, ua mahalo mai i ko kakou aoao oiaio, ua makemake kona naau i ko kakou hoomana, aka, me he mea la hookahi no mea i koe, oia kona haawi i kona naau a pau a me kona ikaika a pau, a me kona waiwai a pau na ke Akua Kahi-Kolu; aka ke lana nei nae kuu manao, e hoohanau hou ana ka Haku i kona naau, i lilo oia i kaawa oiaio imua o ka Haku Iesu Kristo.

            Mar. 24. Ala kakahiakanui au, puka aku iwaho o ka hale, alawa kuu maka i uka i kai, i o a ia nei, no ka hiohiona o ka aina o Kahana. Ua kokoke na kauhale kahakai, he @@@ lae oioi elua ma kela a me keia aoao, a he huli aku ke alo i kai, oia ka hikina akau, a he kuahiwi ma ke kua mai, he aina palahalaha, he muliwai, he loko ia, a me na lei he nui wale i kupono i ke kanu raiki a me ke kalo, me he mea la ua ekolu haneri eka aina i kupono no ka mahi raiki a me ke kalo hoi. Eia hou, aia ka wahie mauka, a he ai no hoi ma ka loi, a he ia momona mai no ko kai, heaha ka mea i koe, ua lawa no na waiwai a pau ma ka aina.

Aole i pau.

 

He wahi Moolelo pokole no ka @ol@

ANA AKU O KA “HOKUAO” I KA

Pae Aiua o Nuuhiwa.

 

MAKE KEKA@I KANAKA I KA PU.

            I ka po mamua aku o ko makou hiki ana mai malaila, ua ki ia kekahi kanaka i ka pu a make loa ia. Hele aku la kela kanaka, a me kana waihine i ka aha inu rama, a ona iaua, hoi mai la i ko laua hale, a moe iho la mawaho o ka hale, a pauhia. Aumoe, hiki mai la ka enemi ki i ka pu, lele ka p@ka, a ku i ke kua o ke kane, a komo a puka ma ka umauma, o ka make no ia. Aloha ino! Aole nae akaka ka mea nana keia, mahuka, a nalowale iho la ia. He kaua paha ka hope o keia. Pela ka manao o ka poe kamaaina.

PAKELE MAHUNEHUNE KA LUINA.

            I ko makou hoike kula ana ma ka luakini, lele mai la kekahi luina o ka moku i uka, a makaikai, liuliu iki, halawai pu kekahi mau kamaaina me ia, a hooweliweli aku la iaia, a oniu mai la i na pahi me ka hooweliweli, a noi mai i kona pahi. Aua aku la ia, a huhu loa lakou. Makau ka luina, a huli, a holo. Alualu aku lakou, a hiki ia i ka pohaku ma ke kahakai, lele aku la ia i ke kai, a au aku la i ka waapa a pakele.

O MANUWA.

            He wahi keiki kane o Manuwa, he 12 makahiki paha kona. He keiki oluolu, makemake i ka ike. Kamailio pu maua me ia, a noi aku iaia e hele i ke kula hanai ma Puamau.

            “Makau au,” wahi ana. ‘Makau i ke aha?’ “Makau o kalua ko laila poe ia’u, a e ai iho i kuu kino,” wahi ana. ‘Ka! mai makau oe, e hele aku a e nui ae ko ike, a me ka naauao.’ “Aole au e hele, wahi ana, o kalua lakou ia’u a e ai iho. Aole au e hele.” He wahi mea ia e alalai ai i ka holo ana o ke kula hanai no ua keiki kane. Makau lakou o kalua ho Puamau poe ia lakou a ai iho i ko lakou kino.

KUE KO AKUONA I KO PUAMAU.

            Aia i ka makahiki 1868, holo aku la o Kekela me kekahi mau kamaaina o Pumau; 6 kane, 3 keiki kane i Akuona. Kii aku o Kekela i mau wahi haumana no ke kula hanai. Pii ae la ia i ka hale o Hapuku. Kauoha aku la i kanaka e noho malie ma ka waapa. Aole nae lakou i hoolohe. Lele aku la i uka a ohi i ka pulapulu, a lawe aku i ke Kahuna Pope, a loaa mai ka paka. Liuliu iki lohe mai la o Kelela penei: Eia maanei na kanaka ou. Ke manao nei ko nei poe e pepehi, a e kalua, a e ai iho ia lakou. E hoi koke aku oukou. Imi iho la o Kekela i na kanaka a loaa, kena aku la ia lakou e holo o make oukou, a o ko lakou holo aku no ia. Alualu aku la ko Akuona poe. Mama nae ko Puamau a hiki i ka hale o kekahi makamaka ma kahi e ae, a nana lakou i hoonalo a noho, malu mai la a hiki ka waapa ia wahi, a hoee aku ia lakou i ka waapa a hoi aku lakou i Puamau, a ola mahunehune lakou Aloha ino! Nani ka hihiu o ka poe ai kanaka.

HANAMENU.

            He kahawai maikai keia. Ke awa ku moku ma Hivaoa, aia no ia wahi ma ka aoao Komohana Akau o ka aina. He mau kanaka no malaila, a ua like loa lakou me ko Akuona. Elua Kula, a elua mau hale pule; no kekahi ahi kekahi hale pule, a no kekahi alii okoa kekahi. Ma ia mau hale pule na kula. O Honiae ke kumu o kekahi, a o Daniela Tauefitu ko kekahi. Na laua hoi i hapai ae ka oihana Misionari ma ia Kahawai, no ka mea; aole he Misionari Hawaii malaila. He 23 mau hoahanau ne keia Ekalesia. O ka Ekalesia nui ia o na ekalesia a pau ma ka pae aina o Nuuhiva. He olulu ka noho ana o kanaka. Aole au i lohe mai i ke kue ana o kekahi alii i ko kekahi. He inu Rama nae kekahi hapa o na kanaka, e like me ko na kahawai e ae ma Hivaoa. Ma ka la Sabati, halawai mai ka na haumana o na kula elua ma ka halepule hookahi; ma ka halepule makai i kekahi Sabati hoi, ma ka halepule mauka i kekahi. He lehulehu na kamalii, aole nae lakou i hele mai i ke kula. Aolo o lakou makemake i ka naauao, o ka hewa, oia, ka lakou i makemake ai, a paa ka manao i ka hahai ana mamuli o keia mea e make ai ko lakou kino a me ka uhane pu. Auwe! Kupanaha ka paakiki o ka naau! Heaha la ka mea a wawahi ai i keia mea oolea? Na ke Akua wale no keia. A lawe aku oia i ka naau pohaku mailoko aku o ko lakou io, a haawai aku i ka makemake, alaila haliu mai lakou i ke Akua a e hoolaia no lakou.

            I ka le 4 o Aperila, he la Sabati no ia, hiki mai ka moku ma Hanamenu, a kakahiaka pae aku la makou i uka, a halawai pu me Honiae laua me Daniela, a me na kamaaina he nui. Aia lakou maloko o ka halepule, a pau ae la ka halawai haipule o lakou. Ninau aku la au ia lakou no ka noho ana, no ka hana, no ka kula, a pela aku. Oluolu mai la ko lakou noho ana, wahi a lakou. Hookahi pilikia nae, oia ka make o Elizabeta, ka wahine a Daniela. Ua make ia i ka la 26 o Novemaba. He wahine haipule ia, a he wahine i mahaloia e kanaka no kona ano pono. Lana ae la kona manao i kona wa make, a make iho la iloko o ka Haku “Pomaikai ka poe make, ke make iloko o ka Haku, ma keia hope aku, he oiaio, wahi a ka Uhane, i hoomaha lakou i ko lakou luhi; a ke hahai nei no hoi ka lakou mau hana me lakou.”

            Hora 10, puhiia ka pu, a komo ae la na kane, wahine, kamalii i ka halepule; he 50 paha ko lakou nui maloko, a pela no hoi mawaho. He 45 haumana no na kula elua. He 35 wele no i hoikeia ma ia la; 15 heluhelu ma ke Kauoha Hou, 13 i ka Pi-a-pa, 2 i ka Haawina Kamalii, 4 i ke Kumumua Hawaii, a ehiku mau mokuna okoa o ka Baibala i hoopaanaau ia a i haiia mai. Mahalo aku la makou ia poe i hoopaanaau i na pauku Baibala. Pau ae la ke kula Sabati, hai aku la au i ka olelo a ke Akua ma ka olelo Hawaii, a na Kaiwi hoi i unuhi ae i keia a i ka olelo Fatuhiwa. Hoolohe no ka poe maloko, a o ka poe mawaho, hele aku la lakou i o a ia nei, kamailio kekahi i kekahi, puhi-baka, akaaka, a pela aku. Like loa no me ka hana a kekahi poe kanaka Hawaii i kekahi manawa. He la Sabati maikai keia. Oli li ka naau i ka launa ana’ka me ia poe haipule. Pau ae la ka halawai, kuhikuhi aku la na kamaaina ia makou i na mea kaulana o ia wahi. Malaila no i ike ia ai ke kupapau o ke’lii. He alii ikaika keia. He koa, a kue i na haole. Ua oleloia mai, he umi haole i pepehiia e keia alii a make loa lakou. Auina la, hoi mai makou i ka home ma ka “Hokuao,” a malama i ka halawai pule haole, e like me ka makou hana mau.

PUAMAU.

            He kahawai ia ma ka Hikina Akau o Hivaoa. He 700 kanaka no keia kahawai, wahi a Kekela. Ina pela, ua hoomahuahua ae la kanaka i na makahiki i hala ae, no ka mea, i ka makahiki 1867, o ka huina o kanaka malaila, he 546, wahi a Kauwealoha. He mau kanaka hiuhiu keia poe, he pakike, a he hilahila ole na kaikamahine. Kaulana no ka aihue, powa, pepehi kanaka, kalua a ni iho ka hoi. Aloha ino! “Ua lapuwale lakou i ko lakou manao ana, a ua hoopouliia hoi ko lakou naau hawawa. Ua piha lakou i na hewa a pau, i ka moekolohe, i ka opuinoino, i ka puniwaiwai a me ka hana ino; ua paapu hoi i ka huahua, i ka pepehi kanaka, i ka hakaka, i ka hoopunipuni a me ka manao ino. He poe aloha ole, he poe makona, he poe lokoino.” Auwe! Kei ke kolohe o ka poe Pegana! He nui nae ka mana o ke Keiki-hipa a ke Akua! E hiki iaia ke hoomaemae i ka naau pelapela o ko laila poe, a e hoomakaukau mai ia lakou i noho pu aku me ia ma kona wahi hemolele, “Na ke koko o Iesu Kristo Kana Keiki, e huikala mai i na hewa a pa@.”

            He Ekalesia uuku ma keia kahawai; he 4 wale no hoahanau; he 2 kanaka Hawaii, hookahi wahine hapa Hawaii, a hookahi wahine Nuuhiva. Ma ka makahiki 1868, mahope iho o ka haalele ana aku o ka “Hokuao” ia wahi, he Kula La no ma Puamau, he 15 haumana; 8 kaikamahine, 5 wahine, a 2 kane. A hala @e la elua malama, pau loa lakou i ka haalele, a hoi aku i ka lealea, i ka inu rama a o@a, a hana wale aku mamuli o na mea lapuwale. Pela no hoi na haumana o ke Kulahanai keikikane. Hookahi haumana wale no i koe ma ia kula.

(Aole i pau.)