Ka Nupepa Kuokoa, Volume VII, Number 42, 17 October 1868 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

            MAKE I ALOHAIA. - Ekolu mau palapala i loaa mai ia makou mai Kohala mai, mai kekahi poe makamaka mai o makou, oia hoi o W.C. Punahoa, Samuela Aiwohi a me kekahi makamaka e iho o ua aina haa heo la, e pili ana i ka make ana o kekahi keikamahine papa o ia wahi; a penei ka moolelo i haiia mai: “Ma ka auina la Poakolu, Okakopa 7, ma ka hora 2 o ka auina la, maneleia aku ia o Miss Hana Waipa Kaheleloa, e na lima menemene ole o ka make, a ua hoi aku la oia i ka hale puanuanu a hale koou e ke kino. Ua hanauia no oia ma Kohala a malaila no kahi i hanaiia ai a nui, a mahope hoouna ia mui oia ma ke kula haole o Kahehuna, a malaila oia i ao ia ai no kekahi mau makahiki loihi. Mahope o kona noho hou ana aku i kekahi mea kula e ae, ua hoi aku oia me kona mau makua a me na kupuna ma Kohala kona aina hanau. O ke ano o keia kaikemahine, he oluolu, he aloha makua, he heahea i na makamaka, he hookipa i na malihini.” Ua makaukau oia no na mea o keia ao, aka, hookahi paha mea i koe iaia, o kona makaukau no kela Aupuni @@@. Pehea, ua makaukau io anei ia i hele aku la?

 

Kauai

 

            MAKANI KONA MA KA MOKU O LALO. -  Ua loaa mai ia makou he palapala mai a A.K., @@, o Waimea, e hui ana i ka ikaika o ka makani i pa iho malaila ma ka la 3 iho nei o keia malama me ka haule lokuloku pu iho o na paka ua. Ua pau i ka hina na laau i @@ ana, a ua alaa pu ia eha hale ma Waimea. O luna iho o kekahi aoao o ka luakini e ku la malaila ua naha; o ka elua hapa @@@ paha o ia aoao i naha. Ua hooleiia ka pili, na oa a me na pale i lalo o ka honua.
            Ma Lihue, ua pau ke ko i ka hina i lalo, a he mau tausani dala ke poho no ia hoohiolo ana. O ka ohe wai a Mr. G.N. Wilikoki i hoomoe ai, ua haihai liilii.
            Ma Koloa, ua kaikoo mai ke kai, a ua poi mai i ka uapo, a lawe aku la nana e malama, a he mau hoopoino e ae kekahi i hanaia malaila. Ehuehu loa aku nei ka hoi ua Kona nei malaila.

 

Na mea Hou o ke alo Alii.

 

            KA MOI KAPUAIWA. ALIIOLANI. - He oluolu maikai ko kakou Alii Aimoku i keia wa, aole ona omaimai, a ke ike mau ia nei oia e holoholo kaa lio ana ma na aluna ahiahi o keia mau la kikiki a ka la e noke haalele nei. O ko kakou maha no ia o kona oluolu mau mai pela.
            KA MEA KIEKIE KA MAKUA ALII. - Eia no ko kakou Makua Alii maluna o ka moe e waiho nei. O ke ola ka lohe ia ma o a maanei, aka aohe nae i eu ae kona mau kapuai e hele. Ke waiho nei e like me ka ike a na Kauka.  Ma ka lohe pono mai e loaa hou ana he mau makahiki nona ma keia honua, pela ka ike a ke Kauka: aka aole ana nae paha e like ka ikaika o keia mau la iho nei ona mamua.
            NA MOI WAHINE KANEMAKE. Eia no ka Moiwahine Hakaleleponi K. Kapakuhaili malalo o kona malu hale Haimoeipo ma Honolulu nei, kahi i hooluolu ai ia ia i keia mau ia palupalu a kino ekahi.
            Aia no hoi ka Moi wahine Emma Kaleleonalani ma kona malu hale, kahi i hoonanea ai, me ke kino ola oluolu kupono.
            Na Pua Alii. Eia no na pua alii a pau ke ola oluolu nei, oia na Kamalei Haku Pauahi Kamakaeha, Likelike a me ka Hon. D. Kalakaua.

 

HUNAHUNA HUIKAU

 

            Ua hoohui ae kekuhi Hui ma Nu Ioka ia lakou iho, me ka pau dala nui elima miliona, ($3,000,000), a ua kapa ia lakou iho, “Ka Hui Hoomoe Waea Olelo o Inia Hikina,” me ka manao e hoohui i na awa ku moku nui o ka Emepera o Kina ma ka waea-olelo : a mahope aku, o hooloihi aku i ka hoomoe ana i na waea ma na kulanakauhale iloko loa aku oka aina.  O ka waea hoomoe moana i manaoia ai e hana aku, eiwa haneri mile ka loa, a e hui ana na kulanakauhale malalo iho me ua waea nei, oia ke kulanakauhale o Kanatona, me hookah miliona kanaka: Makao, he 60,000 kanaka; Suwatona, me 200,000 kanaka; Amoe me 250,000; Fu-cu me 1,250,000; Wau-cu me 300,000; Ninipo me 400,000; Hana Siana me 1,200,000; Sanahai me 1,000,000-Huina pau o na kanaka, he 5,910,000. O na kalepa kuwaho o kela mau awa ku moku, ua hui ia mai, he $900,000.000 no ka makahiki; a o na kalepa kuloko, he oi loa aku. Ua ike ia, o ka ae ana aku o keia Hui, na ke Aupuni o Kina i haawi wale mai, mamuli o ka Hon. Burlingame hooikaika ana. O na alakai o keia Hui, he mau kalepa kuonoono a akamai no Nu Ioka a me Piledelapia; a he poe ano hana maoli lakou a pau.
            Ua hoike akea ae ka Ahahui Hoomoe Waea Olelo o ka Atelanika, mahope iho o ka la 1 o Sepatemaha, o ka uku o na huaolelo e hoouna ia aku ai mai ke kulanakauhale aku o Nu Ioka, he $11.66 ma ke gula, no na huaolelo he umi, ina ma na wahi a pau o Beritania kahi i hoounaia aku ai.
            Ke hoomaka nei na kamaaina o Panama e hai aku i ke lakou makemake, e ae aku i ka hoohui ana me Amerika Huipuia.
            Ma ka la 8 o Sepatemaha, ua holo aku na Elele o Iapana i Europa, maluna o ka mokuahi Iara.
            Ke olelo ia nei, eia no ke kaikuana o Haku Alabati, ke kane mua a Victoria i make, me ka manao e lilo i kane alua na ua Moi Wahine la, aka, ke keakea ia mai la nae ia manaolana ona e ke Kanawai paa o Enelani, me ka hoole pu ia mai no nae e ka Moi Wahine.
            O na manao no ka hoomahuahua hou ana i na koa o Auseturia, ke liuliu loa nei e hoolawa pono iho. O na koa ku mau i keia wa, he ewalu haneri tausani paha.
            Ua hoike aku ke Kuhina Kaua Suwada i ka Ahaolelo, ke kukakuka nei laua me ke Kuhina Noho o Beritania ma Wasinetona, no ke kuikahi Panai Like, mawaena hoi o Amerika Huipuia a me Canada.
            Ke kukakuka nei o Rotakaila, ka haole Iudaio dala nui o ke ao nei no kekahi Hale Alii e kukuluia ana, e kokoke aku ana ma Napele: a ua haawi aku oia i mui milione dala no ia Hale Alii.
            I ko ka Moi Wahine Victoria hele makaikai hope ana mai nei ma Europa, ua hele oia malalo o ka inoa hoohanohano Countess o Kent, no ka mea, o kona makuakane, he Duke ia no Kent. Ka hele ana no hoi o na 'Lii Aimoku o na aina naauao.
            O ka Haku o Wale, ke keiki makahiapo hoi a ka Moi Wahine Victoria, i mare ai me ke Kaimahiue Alii a ka Moi o Denemaka, ua hanau mai nein a laua elua mau kaikamahine.  Pii no ka ohana Moi o Beritania, a me he mea ia no hoi, aole paha e hala ana i mau makahiki loihi ma keia hoope aku, u e pau pono an ke Aupuni o Europa i keia ohana.
            Ua haawi hookupu aku ka Emepela Napoliona, he hookahi tausani hapaha Farani, no ke Kia Hoomanao o Cobadena.
            E kue ana na kulanakauhale o Hunegari i ko ka Pope mau manao, Aohe lakou e ae, e keakea mai a hoomakaukau mai o Auseturia a me Roma i kou lakou Ahaolelo.
            He kanalima na Kakauolelo o ka Oihana Kaua o Farani, i hoounaia aku e holo makaikai ma na wahi ma ka Hikina e imi, ina he kupono ia mau aina no ka houluulu ana a hoomoana ana o na koa.
            Ua hooponopono hou ia ae nei, e hoomoe hou ia ana he Waea Moe Moana, mawaena o Malata a me Alexanaderia.
            Ma Canada, ua puhiia na ululaau i ke ahi, a ke a koke mai la mauka o na kauhale, nolaila, o na kanaka kalepa, a hana lima o ke kulanakauhele o Geotikaona, ua hooki lakou i ka lakou mau hana, a hele lakou a pau e kinai i keia ahi ai ululaau.

            O na Lei Moi, a me na kahiko a me na mea nani e ae o ka Moi Teodoa o Abisinia, i make ai iloko o ke kaua, ua laweia ae i Enelani, a ua pau lakou a pau i ka hiki ae. Elua mau Lei Moi; hookahi no ka wa ana e noho mai ai i ka Noho Alii, a hookahi no kona manawa ahuai wale iho no paha.

            Aia ma Makesuketa kekahi kanaka e ola nei, he hookah haneri me kumamakahi ka nui o kona mau makahiki.  O kona inoa, o Davida Hanamaluhia (Makepeace).

            HE MAU OLULO MA KA MOANA. ---Mai loko mai o ka nupepa haole o ke Aupuni, ua ike iho makou i kekahi mea weliweli i hanaia i keia makahiki.  Ma na la mua paha o Feberuari, ua haalele iho kekahi moku Peru ia Kalio, ma Peru, a holo aku la i ke kauwahi mokupuni mamao aku, oiai elua la e holo ai a hiki aka ilaila. Aia hoi maluna o ua moku nei, he kanalima pake pahana, e makemakeia ana e lawe e hoohana ma na mahinaai. Aia pu no hoi maluna o ua moku nei ka ona waiwai non aka moku me keua kuene pake pu no hoi, me na dala pu no hoi maluna, he $20.000. I kekahi la ae no hoi mahope iho o ka haalele ana ia Kalio, o ka lele koke mai la no ia e ua poe pake nei maluna o no luina, a lilo aku la ia lakou.  Pepehi iho la lakou i ke kanaka ku hoe a me ka Hulipahu, a hoa uku la ilalo o ka moku i na luina. Hoolei mua aku la hoi ke Kapena a me ka Malamamoku i na papa noho iloko o ke kui, me ka manao e pakele laua ma ka au ana, aka, ia laua i lele ai, e hookuu koke iho ana no na poe pake nei i ka waapa, a kiiia aku la laua nei, pepehi ia iho la laua nei a make. Noho pau iho la no ka Ona moku ilalo, mahope o ka moku, me kau pupanapana.  O na luina hoi, lawe ia aku la ilalo, pepehiia mai la a make, a kiola ia aku la iloko o ka moana. Lawe ae la ua poe pake nei i ka hookele ana o ka moku. A hala na la he 73, hoea aku la lakou ua na mokupuni Kurile, komo aku la i Aukati, (kahi o kohola) a paa iho la ka moku i ka hau no na la eono. Hoopiha nui iho la i na pahu i ka wai, no ka mea, ua kokoke a pau ka wai o na pahu. Hoomau aku la no lakou i ka holo ana i ka Akeu, me ka ike ole @se i kahi e hele ai, no ka mea, aole no lakou i ae ia i ka hooholo moku. Ma ka la 23 o Aperila, ku lakou ma Keone-Kuha, ma ke Kaikoone Hikina Akau; a malaila i kiolaia aku ai ka ona moku a me kahi kuene pake, a noho iho la laua mawaena o na Ilikiai, me ka hoomanawaenui i he ana a me ke koekoe o keia wahi. Hiu ae la ko lakou heleuma, a hole aku la i ke Komohana. Ilaila pau ka ikeia anao keia moku, a nalowale aku la.  Ua manao nae ka poe holo-kai, aohe no lakou e mamao loa aku, no ka mea, ua nahaehae na pea, a ua pau ka ai; nole no hoi lakou i ike i ka hookele ana i ka moku nolaila, ua hoopae no paha lakou i ka moku i ke aina, a ua kaaua like iho ia lakou ma waena o na Ilikini. He nui no na hehedoma a ka Ona waiwai a me kahi kuene pake ana i honu ai e hala ne ka mekepoaiunia pololi main a Ilikini mai. A mahope iho, ua loaa laua i kekahi moku o kohola a e hiki mai ana paha ua mau olulo la i Honolulu nei, ke ala kokoke ia laua e hiki ai ma kahi e kokuaia mai ai.

 

Lalau maoli e Hua----a!!

 

            Ua lalau loa o Hua-a i ka hoopili ana i ke kumumanao ana “O ke kahua mamua mahope kukula” i ka mare, a me ke kahua o ke mare, a me ke kuona o ke kumumanao ana i haku ai, oia hoi ka mare ana o T. Puuohau ua me na kaikamahine a Waialua (H. Periscilla a me Noelo) no ka mea, aole o ka palapala mare a me ka lako, a me ke kuonoono o ke kane ke kahua o ka mare ana, he mau mea pili wale no ia.
            Eia ke kahua io o ka mare ana a ke Akua i kauoha mai ai, o ka hooulu i ka lahui, o ka maluhia o ka noho ana a me ka malama ia o ke ola.
            O ka hale e kukulu iho ai maluna oia kahua, o ke makemake, o ka oluolu, o ke alohe io o ke kane me ka wahine, kekahi i kekahi mamua o ka mare ana.  He mea ole ka lako a me ke kuoaeono a ke kane mamua o ka mare ana, ke ole ka makemake ka oluolu a me ke aloha like o na aono elua mamua o ka mare ano.
            Ina o ka lako, o ke kuonoono o ke kane mamua o ka mare ana ke kahua, me ka nele o ka makemake, ka oluolu ke aloha, alaila, ua kuai maoli i aka wahine e ke kane, a ua mare i aka wahine me ka waiwai o ke kane, o ka haalele no ia o ka wahine i ke kane me ka hewa ole, ulaila, ua wahahee ke kauoha a ke kahuna, e malama ke kane i ka wahine a me ka wahine i ke kane, i ka wa ai, ka wa wi, i ka wa lako, a i ka wa ilihune, i ka wa ola a me ka wa mai. A o ka no ho ana oka wahine he hoomanawanui wale iho no me ka oluolu ole, aloha ole makemake ole. Ua like ka mare me ke kupapau!
            O kekahi mea e kupono ai ke kukula ana i ua hale nei, o ka mare i ka wa oo, oia ka 27 makahiki o ke kane a oi aku, a o ka 18 makahiki no ka wahine a oi aku. O ka mare me ka pili ole o ko laua koko i ka ha o hamauna mai ke kupuna hookahi mai.
            O ke kaupuku ana, oia ke kii ana i ka palapala mare malalo a ka mana aupuni. O ke komo ana o ka hale a me ke oki ana o ke piko o ka hale, oia ka hoohiki ana o na aoao elua e malama kekahi kekahi, i ka wa ilihune, i ka wa ola a me ka wa kako mai, a na ke kahuna e haawi aku i ka ae ana e lilo laua i hookahi io ma ka aoao o ke Akua. A o ko laua lilo ana i io hookah, na laua aku no ia e hoohui a e hoolaha, a e hoopiha i ka honua i mea nana e hoonani aku i ke Akua. A o ka lako a me ke kuonoono, he mea pili waho wale no ia, nole ia o ke kahua o ka mare ana, a nolaila, ua lalau o Hua-a i ka olelo ana o ka palapala mare, o ka lako a me ke kuonoono ke kahua o ka mare ana!
            Eia kekahi lalau o Hua-a, o ka ninau ana i ka oihana a na kane ia hai, kainoa e ninau aku i na mea i mare ia, a ioa makua paha o na kaikamahine, a ioa kumu paha a na kaikamahine, “nawai o lakou ka makemake e mare koke!” Ina ua pane pololei ia mai “no na kaikamahine no,” no ka mea, na noi aku na kane e hoopalau i hookah makahiki alaila mare, ua palapala mai hoi na kaikamahine e mare e no mamua o ko laua puka ana, a ma ke kuku pu ana imua o na kumu, ua hooakaaka na kane i ko laua hemahema a me ka ilihune, olelo na wahine, “aole o maua manao ma ia mea,” a no ka ike ana o na kumu ua pa aka manao o na kaikamahine e mare koke, ua ae na kumu. Ua hai ia aku ia manao i na makua o na wahine, a ua hele mai na makua, me ka manao kanalua a hole hoi, me kekahi mau kumu o ia hole ana, a ua hai ia ae imua o na kaikamahine a me na kumu, alaila, ninau aku ua makua i ua kaikamahine a laua, ua pane mai na kaikamahine, “ua paa ko‘u manao e mare, a ina he pilikia maluna o‘u ia, ua hale ole oe e kuu makua.” He hoike na kumu na makua na kaikamahine no keia mea.
            Eia hoi, ma ko lakou mare ana a hiki i keia la a‘o e kakau nei, aole i lohea ua hakaka a koe lakou kekahi i kekahi, no ke kumu a Hua-a e hoohalahala nei, oia hoi ku ilihune o na kane, no ka mea, o laua ia e hoopulu ia mai la e ka wa Kanilehua, he noho lai wale iho no i ka pohu o ka oluolu a me ke aloha, a me ke kuikahi.  O laua la hoi e hoopoe mai la I ka hekuawa o Wailuku, he noho malie wale iho ao i lai o Hauola, o kahi unene a uhouhene i ka pua koolau o Malama, no ke aloha a me make o kekahi i kekahi, aole no ka hoowahawaha o ka wahine i ka ilihune o ke kane, no ka mea, aole ona manao ia mea, ua haawi ia iaia iho e ilihune no ka Haku, a no ke ola o kona lahui.
            Eia hoi, he nui ka poe i puka mai Lahainaluna mai a mare koke i ka wahine, a ke oluolu mai nei ko lakou noho ana. E nana ia Rev. J. Kekela me Naomi, a me Rev. S. Kauwealoha me Kaaiawahia, Hon. Mr. Naiapaakai me kana wahine, a pela aku. Pela hoi ka poe i puka mai Kahehuna ae a me Kapuaahou, ua mare koke no kekahi poe i ka wahine, a ke oluolu mai nei ko lakou noho ana. E nana ia Mr. Kahooluhi e noho mai la i ka ua Kanilehua, pela no hoi e J.Wl Nakuina e noho mai la i ke ehukai o lalo, a me kahi poe e ae, he oluolu no ka noho ana, ua heohua, ua hoolaha, e hoopiha ae ana i ke emi e ka lahui Hawaii.  O ka iini nui no ia o ka poe nana i kukula i ke kula Kaikamahine o Waialua e anoi mai la i Amerika, o ka lilo eia kula i kumlau hoolaha lahui, a hoolaha ike, hoolaha maemae, hoola uhane no keia lahui a me na lahui o ae o keia moana.
            Heaha ia ka mea i hoolaha akea ai o Hua-a i keia mare maikai ana, aole kue iki i ke kanawai o ka aina a me ke kanawai o ke Akua, ua oo pono na kane a me na wahine, aole hoi i pili i ka ha o na hanauna, ua makemake, ua oluolu, ua aloha kekahi i kekahi, a ke noho oluolu mai nei no hoi. No keaha la i hana ole iho nei pela ia Leleo i ka mare koke ana me Loe, kekahi kaikamahine o ua kula la? he pilikana ole paha i laila, ano ai ua pili kaikuahine paha kahi o laua nei iaia, nolaila, ua makee kaikuahine iho la paha, a nolaila keia hoohalahala akea ana. A i ole ia he moeuhane mua paha e lilo kekahi o laua nana, a no ka lilo e ana ia laua la, nolaila, haku hoi keia i kama kumumauao, a o ke kaona no nae kela. Nani no ka maalea o Hua-a i olelo ia ai “Nani wale no hoi ku a kii a he oi wale aku no o Hua-a.” No ko ia nei Hia-a hoi paha i ka minamina, nolaila, hopu keia i inoa kapakapa nona o Hia-a i hoololi iki ia‘e o Hua-a.

            Owai la keia mau keiki ana i ninau aku ai? O na hoa no paha ona o Kahehuna a me Kapunahou. Ae, e kuonoono io ana no oukou, a e noho oluolu ana me na wahine a oukou, no ka mea, ke hoahu nei i puu dala nui no ka hale, aina, a me ka lako o ka noho ana. E nani io ana ku a kii, a he oi wale aku no ua o Hua-a. Me ke aloha. W.B. KALA. Lahainaluna, Oct. 2, 1868.

 

Kula Hanai Ohana ma Wailupe

 

E ka Nupepa Kuokoa e; Aloha oe:

            Ua hookumu ia iho nei ma Wailupe; inalalo o ka malu o ke kahu Ekalesia a me ka hooponopono ana a ka Ahahui Kula Kuokoa o ka mokupuni o Oahu, he kula hanai ohana no na keiki kane a me na kaimahine o keia Apana a me na Apua e ae ke makemake mai na makua.
            Eia na Rula i kau ia no ke komo ana a me ka noho ana o na keike maioko o keia kula.
            1. Ua ae ia na keiki a pau e komo mai me kela kula mai ke awalo makahiki a hiki i ka umikumamakolu makahiki.  Aole wale o na keiki noho pono malalo o na makua, ua ae ia no na keiki e ae.
            2. Hiki no i na keiki ke lilo i haumana no keia kulak e kakau inoa mai ka makua ponoi, a o ka makua hanai piha o ke keiki malao o kekahi palapala ae like i hanaia e ke kumu a me na makua a i ole ia ma ke kakau ana paha malalo o keia mau Ruia e hokie ana i kona ae io ana.
            3. O ke ao ana na haawi wale ia aku ia i na keiki me ka uku ole. Na na makua no e hoolako i na aahu a me na moena, ka uluna e moe ai a me ka ai e ai ai i kekahi wa. Ina i ike ke kumu na hemahema ke keiki i kekahi mau mea e pili ana i na makua ma ka hoolako ana i na keiki, ua hiki no i ke kaina ke hoolako, a na na makua e hoihoi mai i na lilo mahope.
            4. E ao ia ma keia kula na buke hoonaauao a pau i pai ia ma ka Olelo Hawaii, e ao pu ia no hoi na hana e makaukau ai ke keiki i ka wa e oo ai. Na na makua no e hoolako i ka lakou mau keiki i na buke kula e pono ai ka imi naauao ana, ina hemahema na ke kumu no e hoolako a na na makua e hoihoi mai i ko ke kumu mau lilo mahope.
            5. E hoomaopopo no hoi e na makua e hoouna mai ana i ka oukou mau keiki ma keia kula, ua lilo ka oukou mau keiki i ke kumu, ua paa malalo ona a hiki i ka wa e ike ia ai ka makaukau kupono no kekahi kula oi ae, a hiki no i ka wa a ke kumu i manao ai e hookuu aku. Ina e lawe wale ka makua i kana keiki me ka ae ole o ke kumu e uku mai no oia a o lakou paha i $5.00 no na malama ekolu, a he $20.00 no ka makahiki hookahi no ke ao ana, a me ka uku ana mai no hoi i na lilo e ae.
            O keia mau Rula i hoike ia maluna oia na Rula paa a ke kumu i haawi ai no keia kula a o kona kanawai paa iho la ia. Mamuli no nae o ka hooponopono ana a ka Ahahui Kula Kuokoa o ka mokupuni o Oahu. K.

 

Pono ole ka Ekalesia a Petero.

 

            E ke "Kuokoa;" Aloha oe:
            Ua ikeia ma Waipio nei ke kue ana o ka Ekalesia a Petero i ke kanawai o ke Akua ma ka uhai ana i ka malu o ka la Sabati – ka la a ke Akua i kauoha mai ai i na kanaka e hookapu. Mamuli o ke alakai ana a ke kahuna pope, ua kukuluia inehinei, ma kahi e ku nei ka luakini pope, he ahaaina maoli; a malaila i akoakoa ai na haumana pope me kekahi poe e ae i kauoia e ka makemake o ka opu.
            Ua kapaia ua ahaaina nei he ahaaina komo hale, aka, i ko'u manao ana, he ahaaina kue keia i ka malu o ka la Sabati, a he hana hoohihia hoi i na haumana o na Ekalesia e ae. Ua aeia anei na kahuna pope a me ka lakou poe haumana e hehi i ka la Sabati?
            O kekahi mea i hanaia i ua la la, oia o ka hookomo ana mai iloko o ua ekalesia nei o Petero, kekahi poe hoahanau hihia i kapaeia mai ka Ekalesia aku o Kristo. Ka opala a Kristo i luai aku ai, ahu iho la ia iloko o ka opu o Petero. Hemolele ka! ua ekalesia nei a Petero. *
Waipio, Oct. 5, 1868.

 

HE KANAWAI

 

            E HOAKAKA AI I KA UKU O NA LUNAMAKAAINANA.
            E HOOHOLOIA e ka Moi a me ka Hale Ahaolelo o ko Hawaii Pae Aina i akoakoa iloko o ka Ahaolelo Kaukanawai o ke Aupuni:
            Pauku 1. Ma keia ua hoopaaia ka uku o na Lunamakaainana i elua haneri me kanalima dala no kela a me keia kau Ahaolelo.
            Pauku 2. E lilo keia i kanawai i ka manawa i oleloia maloko o ke Kumukanawai.
            Aponoia i keia la 24 o Iune, M.H. 1868.
            KAMEHAMEHA R.

 

MARE.

            Oct. 14, ma Kawaiahao, mareia e Rev. H.H. Pareka o Lutanelo W.K. Kealakai k.  me Mele Kamaka w. No Honolulu nei laua.
            Oct 14. ma Honolulu, mareia e Rev. H.H. Pareka, o ono Kahoku@@@ k. me Na@@@@ 2. No Waikiki-waena laua.

HANAU.

            Oct. 6, ma @@@@ Molokai, hanau o Kolea w. na D W Kaiue me Mrs. H K @@@.
            Sept. 12, ma Waiehu, hanau o Wailua k. na @@@ k. me Kawaewae w.
            Aug. 11, ma ia wahi ae hanauu o Kekamu w., na Puahao k. me U@@@ w.
            Aug. 24. – malaila no hanau o Wahinemakakua w. na Maka@@ k. me Moew@@.

MAKE.

            Oct. 5, ma Manoa make o Maahi w.
            Oct. 7, ma ia wahi no make o K@@@ w
            Oct. 9, ma Kapala make o Moku k.
            Oct. 1 ma Waiehu make o Kamahua k.
            Sept. 10, malaila no make o K@@ k
            Sept. 16, ma ia wahi ua make o Pohua @
            Aug. 2, ma ia wahi hookahi no make o @@@@
            Aug. 30, ma keia wahi no make o Paahao k.

 

OLELO HOOLAHA

           E KUAI KUDALAIA ANA ELIMA LIO, a 1 Hoki, ma ka Pa Aupuni i ka Poaono, la 21 o Oct. hora @@@ awakea – Lio kane alau@a hao ano e akau, 1 hema – Lio k @@@ kua puka, hao ano LUU akau – Lio kane ulaula elua hao ano e akau – Lio kane @@@ kuapuaa ihu keokeo hao ano e akau, MNK hema – Lio k ulaula hao CB akau – Hoki 2 ulaula hao ano e akau, ano e M hema.

 

UA NALOWALE

           KA LIO KANE ULAULA O Mr. W.A. Kiha ma Wailupe, hao kuni ma ka uha akau mua NN. Ina o ka mea e hoohoi mai e uku ia ekolu dala.
W. A. KIHA
359 -1t Kumukula o Kaumaapili.

 

OLELO HOOLAHA.

            O KE KAI LAWAIA O KAOLAE, Ulehawa, Maili, Pokiahua, Kohemalii, Kaliai e @@@@ ma Waianae, ua kapu i na ano kanaka a pau oa ka holo ana maluna o ka waa ma ke ano lawaia ma ua mau kai la me kuu ae ole. $5.00 ka uku ke loaa ia'u a i ko'u hope paha. 1 mile mai ka ae one aku a ka moana, oia ko'u palena mai, aole nae i pili kela olelo i na kanaka ma na waa holo lawaia ole ma ia mau kai. KEAUHULIHIA.

Kapua, Kailua, Oct. 12, 1866. 339-2ts

 

KE KAUNU A NA MAKAMAKA HAWAII.

O NA ANO LOLE HOU MAKEPONO LOA!

            UA LOAA MAI NEI IA'U KEKAHI mau Lole Hou Maikai Loa, a ua makaukau au e kuai aku i na Kaikamahine maka palupalu a me na Keonimana o ka "Mokupuni o Keawe nei," no ke kumukuai makepono loa. E naue mai no e na mea a pau, eia ko'u Hale Kuai ma ka aina nona ka olelo kaulana,
"E HOI KA OLU I WAIPIO."
E hele mai oukou e ike maka no oukou iho, o manao mai hoi auanei oukou he kalekale wale aku no.
D.W. STILES (KAILA)
Waipio, Hawaii, Oct. 10, 1868. 339-4ts

 

OLELO HOOLAHA.

            E IKE AUANEI NA KANAKA A PAU O kela ano keia ano, owau o Kealaiki, ke papa aku nei au i ka poe waiwai a pau loa, mai hoaie mai oukou i kuu wahine mare ia NAWAI. No ka mea, ua haalele mai kela ia'u, a i k maua wahi moe, a ua hele wale aku kela me ke kumu ole, nolaila, ke papa aku nei au, mai hoaie iki oukou iaia o pilikia auanei oukou, no ka mea, aole au e hookaa ana ia aie; ina e hoaie oukou iaia, maluna no o oukou ia poho.
KEALAIKI.
Kahalii, Hilo, Hawaii, Sept. 28, 1868. 248 2ts*

 

OLELO HOOLAHA.

            E IKE OUKOU E NA KANAKA HAWAII a me na haole, a me na pake a me na pukiki ma keia olelo hoolaha, mai hoaie mai oukou i kuu wahine mare ia Kaluna no Niulii, Kohala Akau, Hawaii nei oia, a ua haalele kumu ole mai ia'u, a ua holo mahuka aku oia i Maui me kuu ike ole. Ina oukou e hoaie mai iaia, maluna no ona ko oukou poho, aole au e hookaa iki i kona aie ma keia hope aku mai ia la aku o ka puka ana o keia olelo hoolaha ma ka Nupepa "Kuokoa." D.H. KAAIAKAWAHA.
Niulii, Kohala Akau, Hawaii, Oct. 1, 1868. 338-2t

 

AHI-KOE! AHI-KOE!!

            O KA POE NONA NA INOA MALALO iho, na Agena no ka Poe Hui Hana Ahi-koe o Kapalakiko, ua loaa a ke kuai aku nei laua i kela manawa i keia ano Ahi-koe maikai loa, a ano e hoi. Ua hoomakaukau ia, i elima kakini iloko o ka Piula Kini hookahi, a ua pono loa ia ke hoouna aku i na Oihana Kalepa Kuloko a Kuwaho hoi. Me laua nei e kuai aku ai. 357-4t WALKER & ALLEN.

 

OLELO HOOLAHA.

            E IKE AUANEI NA MEA A PAU MA KA la 21 o Sepatemaba, M.H. 1868, o S.M. KAMAKAU, no Honolulu, Mokupuni o Oahu, i kulike ai me ka Pauku 3 o ke Kanawai, "E hoomahuahua ai i ka ike iloko o keia Aupuni. no ka loaa ana o na kope o na Palapala Aina a me na Buke, i ka mea ponoi iho a me ka ona o ia Buke," i hooiaio ia ma ka la 31 Dekemaba, M.H. 1864, ua waiho mai oia iloko o keia Keena Oihana, i ka inoa o kana Buke,
"KA MOOLELO HAWAII"
o na pono a pau o ia Buke, ke hooiaio nei nona ponoi iho.
            I hoike no kela, ke kakau nei au i ko'u inoa, ua hoopili mai hoi i ke Sila o ka Oihana Kalaiaina, ma Honolulu, Oahu, i keia la 23 o Sepatemaba, M.H. 1868.
556-2ms (Signed) F.W. HUTCHINSON, Kuhina Kalaiaina.

 

LOIO! LOIO!
LEO WOLFF,
LAHAINA, MAUI.
342 6ms*

 

KUKUI! KUKUI!!

            UA MAKEMAKE AU I NA HUA KUKUI i wehe ia ka alualu oolea, a o ka io wale no o loko, i umi tausani (10,000) paona. A o ka uku no ka paona hookahi, he elua keneta me ka hapa (2 ½) ma Honolulu nei. E wiki mai! E wiki mai oukou! GEO. MCLEAN (Keoki Bolabola). 250 3m

 

HALE KUAI LOLE HOU!!

            UA WEHEIA AE NEI MA KE ALANUI NUUANU, ma o iho o ka Hale o McLEAN, he Hale Kuai Lole Hou. Malaila e loaa ai na Kamaa a me na Buti o na kamalii a me na wahine. E kuai makepono ia na lole a me kela mea keia mea.
JOS. DAVIS & CO.
327-6m

 

HALE MU!
HALE KUAI MEA AI!

            HE OLUOLU LOA KE KUAI ANA O NA mea ai ma keia hale, i lohe oukou e na makamaka Hawaii a pau! RAIKI no Waimea, Kauai mai, PALAOA maikai loa, KAMANO io ula no Keamolewa mai BIPI uaho no Kaleponi mai, KOPA keokeo – KOPA ulaula, AILA Honua! AILA Kohola, KOPE – PAAKAI, AI no na Lio a me na Moa Na mea ono he nui wale o kela ano keia ano. PIA NO HAWAII MAI, PIA AI - A he nui loa no na mea ai maikai e ae. Nolaila la ea, e na makamaka, e hele mai no me kahi dal e ike maka no oukou i keia mau mea i halia ae la maluna. Me ka mahalo, I. BATALETA. 370-3ms

 

E HOLO MAU ANA KE "KILAUEA"

I keia hapaha Makahiki, e like me keia malalo nei.
E hoomaha ana i keia pule ae, Sept. 21, a e hoomaka ana ma kana huakai holoholo mau. E haalele ana ia Honolulu i ka
Poakahi Sept 28
Poakolu Okat 5
Poakahi Okat 12
Poakahi Okat 19
Poakahi Okat 26
Poakahi Nov 2
Pokahi Nov 9
Ma ka hora @ ponoi o ke ahiahi, a e ku ana ma
LAHAINA,
KALEPOLEPO,
KEALAKEKUA,
KAILUA,
KAWAIHAE,
a me MAHUKONA
Ma ka hoi ana mai, e haalele ana ia
KEALAKEKUA ma ka awakea Poakolu.
KAILUA, ma ke ahiahi Poakolu.
KAWAIHAE & MAHUKONA, ahiahi Poaha.
Ku hou ma HONOLULU i ke kakahiaka Poaono.
E hoopae ia no na ohua o MAKENA.
WALKER & ALLEN
Honolulu, Sept. 19, 1867. NA EGINI
316 3m

 

No Hilo.
KA MOKU KUNA
"MELE HILO,"
O Ballastier ke Kapena.

E HOLO MAU ANA KEIA MOKU I KE Awa maluna, no na ukana a me na ohua e ninau ia HULIPAHU, (L.L. TORBERT) 318-tf

 

E KUAIIA AKU ANA KA MOKU KUNA
"MERE HILO"

nona na tona 48 14-95, i kapili hou ia iho nei i ke keleawe, a hana hou ia iho nei na hemahema a pau, a hoolakoia he mau mea hou, a ke holoholo nei mawaena o Hilo a me Honolulu nei. E kuaiia aku no i ka poe e makemake mai ana. No na mea aku i koe, e ninau ia L.L. TORBERT (Hulipahu)
ma Honolulu, a ia J.H. CONIA (Koni) ma Hilo. 338 tf

 

S. MEGNIN
MEA KUAI LOLE MAIKAI
A ME
NA ANO LOLE HOOHIE A KA MANAO.

Na Kamma, Buti, na Papale Kapu a me ano Papale.
            E hele mua maanei mamua o ka hele ana aku i na hale e, a e kuai makepono no aku no wau. Aia makai iho o ka Roiala Hotele ko'u Halekuai Lole. E wehe ia ana ka puka i keia la.
Honolulu, Ian. 4, 1868 346 6m

 

KALE N. SPENCER
HANALE MCFARLANE OPIO
C.N. SPENCER MA
NA KOMISINA KALEPA.

E LOAA MAI ANA NO IA MAUA NA MEA i hoounaia mai o na Mea Ulu o keia Mokupuni e like me na Ili Bipi, Ili Kao, Kope, Pepeiao Laau, Pulu, Ko-paa, a me na hua ai e ae, a e hooliloia no ke kumukuai pomaikai loa E kuaiia na waiwai o hoounaia aku e like me ke kauoha.
344 1yr

 

NA LAAU LAPAAU
A DR. JAYNE.


OIA NA


LAAU KUNU,

LAAU HOOPAU NAIO ME NA KOE,

LAAU HOOPAA HI,

LAAU HOOMAEMAE KOKE,

LAAU HAMO-PENIKILA,

HU'ALE OLA.

AIA MA KAHI O
KAKELE me KUKE,

Ma Honolulu 327-tf

NA BUKE
HOOLAHAIA E KA PAPA HAWAII

 

Baibala Hemolele Nui ili eula nani me na kuhikuhi ma na a ao.....$12 00
"            " Nui ili eleele kaekae wai gula.....5 00
"            " uuku iki ihi " ".....8 00
"            " Pananaiki iho ili eleele.....4.00
Kauoha Hou ili gula nani me na kuhikuhi.....3.00
"             " eleele kaekae wai gula.....1.00
"             "  " ......75
Kauoha Hou Hapa Haole.....75
Lira Hawaii 1848 me ke kanawai......25
"       " 1855.....25
Moolelo Ekalesia.....50
Haiao ili lahiahi.....10
Hele Malihini ana.....25
No ko ke Akua ano......25
Lira Kamalii......25
Hoike Palapala Hemolele.....25
Moolelo o Heneri Opukahaia.....25
Hoike Akua.....25
Weheweheia.....25
Ninau Hoike ili manoanoa.....25
"         "          " lahilahi....10
Kumumua Kula Sabati.....10
Buke Lawe Lima.....10
He Buke no ka Pope.....10
Ui Kula Sabati Helu 3.....25
"    "       "         "      4......25
"    "       "         "      5......25
Buke Euanelio a Ioane.....10
Himeni            .....1.00
Himeni Ili nani.....1.75
Na Kauoha Hou Pakeke
Ili Gula nani.....1.50
Ili eleele kaekae nani......50
Ili eleele......35
Kauoha Hou Pakeke me na Halelu
Ili Gula nani.....1.75
Ili eleele kaekae wai gula.....50
Ili eleele......50
Na Halelu Pakeke
Ili Gula nani.....50
Ili eleele kaekae wai gula......30
Ili eleele.....20
Ka Hae Hoonani (Buke Mele)......25
Buke Wehewehe Huaolelo Baibala.....2.00
            "              "    "  Ili nani.....3.00
Eia na buke haawi wale
Palapala Liilii--
            Helu 4--Makemake anei oe i ke ola
            Helu 6--E hele i o Kristo la.
            Helu 7--Ka hoi ana mai o ke Keiki Uhauha
            Helu 11--No ka hoohiki wahahee i ke Akua
            Helu 16--Ka Kehia ana o ka Ahaaina a ka Haku a ma ka Bapetiso ana.
            Helu 17--Mai hana ino i na holoholona
            Helu 18--No ka mahi ana, kuai ana a me ka inu ana i ka Awa.
Ka Davida Malo Kumumanao.
Ka Moolelo o Batimea Puaaiki.
J. F. POKUE.
Kakauolelo o ka Papa Hoeke o ka Ahahui Euanelio o ko Hawaii Pae Aina.