Ka Nupepa Kuokoa, Volume VII, Number 38, 19 September 1868 — Page 1
KA NUPEPA KUOKOA.
KE KILOHANA POOKELA NO KA LAHUI HAWAII
BUKE VII. HELU 38. HONOLULU, SEPATEMABA 19. 1868. NA HELU A PAU 355
KA NUPEPA KUOKOA,
HOOPUKA MAU IA MA HONOLULU
I kela Poaono keia Poaono.
$2.00
No na mahina he UMIKUMAMALUA,
$1.00 no na mahina eono.
ME KA HOOKAA MUA MAI.
NA OLELO HOOLAHA—aole i oi mamua o 10 laina no ka hoopuka hookahi ana, $1.00; alua komo ana, he $1.50; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai.
KANIKAU—he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi—penei: he 25 lalani, $1.00; 50 lalani, $2.00; a pela'ku.
NA UKU NO NA OLELO HOOLAHA—ka uku pepa, a me ka uku o ke Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.
O NA UKU PEPA A PAU E HOOKAA MUA MAI NO—aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.
AIA KE KEENA O KA NUPEPA KUOKOA—ma ke kihi hema o ka Hale Hookipa Luina (Sailor's Home.) O na hora hana, ma ka eiwa o kakahiaka, a i ka ha o ke ahiahi.
L. H. KULIKA. (Luna Hoopuka.)
“KA NUPEPA KUOKOA."
Is published in Honolulu
EVERY SATURDAY,
$2.00 per annum, or $1.00 per six
months, in advance.
ADVERTISEMENTS not exceeding 10 lines, inserted once for $1.00; twice or $1.50; and $2.00 for one month; all advertisements must be paid for in advance.
KANIKAUS will be charged 1.00 per page, or 4 cts. a line.
PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.
ALL SUBSCRIPTIONS must be PREPAID. No names, either of foreigners or natives, will be inserted on the subscription list, until paid for. This rule must be strictly adhered to, on account of the low subscription price.
THE OFFICE OF THE KUOKOA is in the South corner of the Sailors' Home. Office hours from 9 A.M. to 4 P.M.
L. H. GULICK.
For the Publishers.
Volume I, II, and III of the KUOKOA, bound, for sale, $3.50 each.
Persons having complete sets of the above, can have them bound by paying $2.00 each.
Ka Nupepa Kuokoa.
HE MELE KOIHONUA NO
KEKAULUOHI.
-
NA KEAWEAHEULU KALNIMAMAHU A ME KEKAHI
POE ALII E AE I HAKU.
-
Ua hanau ia o Kekauluohi o Mano, o Kekahaikaaoaokapu o Ku, o Kekaha o Ku ma laua o Lono, i ka makahiki 1794, ma Kona, Hawaii. O Kaheiheimalie Hoapiliwahine ka makuahine, a o Kalanimamahu a Kalanikupuapaikalaninui ka makuakane.
Ua noho Kuhina Nui oia i ka A.D. 1839, a make iho la i ka A.D. 1845, ma Pohukaina, Honolulu, Oahu.
-
MAHELE II.
KAMAULEULE BOTI A ME KAMEHAMEHA I.,
NA KAHUNA NANA E OKI A E KALAI
KA WAA.
7. Ka aha hoa ka aha lanalana,
O Hoowilianoo ka aha hoa,
O Hauhanalanieku ka hauhana,
Palea i Maalaiki ka pale,
Palea aku i Ahualaka, i Nuupale,
— E ola Kalani—
O ka pale o ke koi pili i ke a-u,
He kamani ke au he aha ka lanalana,
Mamaka mai kalai waa,
Ka imi laau i ka nahele,
8. Ke kua waa i uka o Kalahupueo,
Halaulani Hilo, o Hilo ka malama,
Ua Hilo i ke ku o Nana,
I ke poo o Nana nui nahoahoa ke'lii,
I ke kukai o ka moku,
I ke kaupule i ke kua o Makalii,
I kawa i ka pili o Welehu,
O Lono o ka hoku e miha'i ka lani,
Ke kahuna mailoko o Mana ka moo,
Ka hanau kahuna mailoko o ka nalunalu,
9. Hoohua nalu hoomanamana,
Ka leo o ke kahuna.
Ke pane ae i kona lani o ka malie,
Paihi ka lani, aohe leina ua ia e ka po,
Hoi ke ao a ke kuahiwi,
Hoi ka malie ka opua i Awalau,
Hoi ka ua i Maheleana,
Hoi ka makani a Kumukahi,
Hoi ka pauli makani kualau,
Hoi ka waa hooulu he awa kaikoo,
10. Hoi ka waa i ka lae makani,
Hoi ka wai ko kai a Manawainui.
Iloko o Manawainuikaioo,
Pohu ke kai ku ka moana,
Ku kaka ka i-a a ka malie,
Kupono ka limu naue ole,
Ku ka ekaha ku moana.
Ku ka mai! ku ka halelo,
Ku ke koa uli ke koa kea,
Ku ka puna, ku ke koa i ka moana,
11. Ku kaunaoa; ku ka papaiaoa,
Ku ka ilio, halawenaino he'lii,
Ku ka wana ku ka halula.
Ku ka nohu, ku kuku ke kokala,
Ke kuku iluna o ka moku,
O kalaniomaiheuila,
O Kekahaikaaoaokapu o Ku,
O Kekaha, o Ku ma laua o Lono,
O Kekauluohi o Mano ia nei—la—
MAHELE III.
O HAAHUMANU KE KAHUNA WAHINE NANA E LOLIA E PU KA WAA (o ke Aupuni ke ano) A ME NA'LII NANA E HOA KA WAA.
1. O homeea ke koi imua i ke kahuna,
Ia Auau ia Ku.
I ka hanau mai paliku ke kahuna,
Iaia ke koi ka malukoi o ka laau,
O haumapu, o hoaloia, o hooma,
O Kahikomakua ke au,
E Kona—e— i paa koi,
A kua e Kohala, o oki Koolau,
Kua ia ka waa o Hilo,
O Hilo laau kele ka piko.
I ka hihi i ka pea o kona aina.
2. Pokea mai a moku i ke koi,
Ka mole o Makahanaloa.
Ka paiaa o Leleiwi.
Hina mai o Puaaloa,
Ke kumu i Heleleikamuimuia,
He kulana o Mawae,
He mamala o Paieie.
He aina Keawewai i Puulapalapa,
Pokea mai a moku Puu me Kau,
Ma na lae laau o Hilo.
3. Kua ia ka eulu o Laa,
O hemu koi hahae ka waa,
Ka i ka niao ka alihi o ka waa,
Kau ke kikoni ka palahe o ka waa,
Kua ia ke koi lele ka mamala,
Kikoni mai mua a hope,
Mai ka ihu a ka momoa,
A kahuna kalai waa,
A kahuna hooki waa.
A kahuna kupa waa;
4. Ke kupa la ka omaka a ka wai,
Ke kuaua mua'kau o Hilo,
Ke kike la koi a kahuna hooki waa,
E Kumauna—e— e Kua ana,
E Kupulupulu, e Kumokuhalii,
E Kukaohialaka—
O Laka, o ke kahuna kua waa,
O Laea, o ka wahine kuhikuli,
Nana e lohia e pu i ka waa,
Nana e hikiikii i ke kaula,
5. O ke kapa kaula o Mahiulu,
Kino kaula ka la makaakaa,
Pu ke kaula a paa i ka lima,
Hooulu ka waa o ke'lii,
O Laea wahine i ka pu o ke kaula,
O uhao ka laau a pi ka wai,
A komo kanaka,
I paa kaula i ka lima,
Uhia ka ieie iluna,
Ku-ku-lia i Kaniakea;
6. Hamau ka leo ka iki, ma ka leo nui,
A uuina a paapaaina,
Ka hooulu ana o ka waa e hiki ai,
Ke ku-ku-amu ke ku-ku-wawa-
Ka pihe a Laka a Wahieloa,
Koia i koi i ka nuku awa,
Kapae ka waa i ka halau,
I ka halau kalai waa o ke'lii,
O Kalaninuiahilapalapa,
He kanaha ka loa,
7. Kanalua ka wa,
He umi ka laula,
Hoopili ke ahakea paa loa ka waa,
Hoouka ka wae o ka hoku ke ao,
Hnopua ke ao, onohi ke ao,
Kaalelewa iluna,
Ka malama e kau mai nei,
O ka iako mua ia o ka wau,
O ke koa kumu ole o Kahikikolo,
O ka iako loko ia o ka waa,
8. O ke Kamani i Pakaalana,
O ka niho e ku i Lelehana,
O ka iako hope ia o ka waa,
He Luukia ka aha mamua,
O Ahaula ka aha, lanalana,
O Kahelehonua ka aha i ka ako nui,
I kuwa o ka iako iwaena,
Oneula ka aha lanalana—
(Aole i pau.)
-
KA MOOLELO O NA KAMEHAMEHA.
-
NA S.M. KAMAKAU.
HELU 89.
-
NO KA NOHO ALII ANA O KAUIKEAOULI
MALUNA O KE AUPUNI, A UA KAPAIA
O KAMEHAMEHA III.
-
I ke kaua ana o Kamehameha me Kalanikupule ma Nuuanu, i ka malama o Aperila, o ka makahiki 1795, ua make a me ka luku ia o Kalanikupule a me ke Oahu a pau. Ua nui ka poe i lawe pio ia mai, a he nui no hoi ka poe i holo i ka nahelehele; he nui na'lii kane a me na'lii wahine i pio. Oia no o Kapooloku ma, Kalola Ihukaikai ma, Kalilikauoha ma, Kakae a Kahekili ma, o Kalaikuahulu ma, o Kaeleowaipio ma, ka hanauna alii, na kanaka a me na wahine o ka aoao pio. A lohe ua poe pio nei, aia ke ola o ka wahine punahele a Kamehameha, oia no o Kaahumanu—O ke kanaka make, a hele i o Kaahumanu la, ua ola ia kanaka. A no keia lohe ana pela, ua hele nui ka poe pio i o Kaahumanu la. A pela no ke kaua ana a Kamehameha ma Hilo, me Namakeha, ua nui no ka poe pio i hoola ia, no ka mea, ua hookaulana ia na ola nui a Kamehameha.
1. O ke akua o Kamehameha, o Kukailimoku, a o na aina o ua akua nei, he puuhonua ia; o ke kanaka make a holo a komo i ka aina o ke akua, ua ola ia kanaka, aole e hookahe ia ke koko. O na mea lawehala a pau o kela ano keia ano, ua pili i ka pilkia a me ka make, ua holo nae oia a komo i ka aina o ke akua, ua ola oia, ua pau kona pilikia.
2. Pela ke kanawai Mamalahoa, he ola nui hoi ia no ka lahui i ka wa kaua, i ka wa luku, a i ka wa o ke pio. A kukalaia ke Kanawai Mamalahoa, ua pau ka make, komo i ke ola.
3. O ke kolu o na ola a Kamehameha, oia no o Kaahumanu. Ua hoolilo aku hoi o Kamehameha ia Kaahumanu i akua nona, (wahi paha a ka olelo wale). O na mea pio i kupono no ka make, a i pane ko Kaahumanu waha i ke ola, ua ola ae la. Ua hoolilo ia ko Kaahumanu mau aina, i mau aina puuhonua: Oia o Puunau ma Lahaina, o Waipukua ma Waihee, o Kaluaaha ma Molokai, a pela aku. Ua lilo ko Kaahumanu mau aina a pau i mau aina puuhonua, a i mau aina hoohalahala. Ina e pepehi kekahi kanaka a make loa kekahi iaia, a ina hoi i loaa ole mai kela kanaka i ka poe hookahe koko o ka mea i make, alaila, holo pololei aku oia i ka aina puuhonua i pakele kona ola.
Pela no kekahi kanaka makapo mamua iho o Kamaukani, oia no hoi ka wa a Kamehameha e noho ana i Oahu, oia ka makahiki 1811, ua aihue kekahi kanaka i ka lokoia a Alapai Maloiki, i kapaia o Alapai Kupalupaliimano, iaia kekahi aina ku iloko o Waihee, o Koiahi ka inoa, a he lokoia ko Koiahi e pili ana i Kiao, ua aihue, ia ka ia o ka loko a ua o Alapai, a ua loaa ua kanaka nei, o Paki ka inoa. Ua lawe ia oia imua o Alapai, ua hookolokolo ia, a ua ku ka hewa, me ka ae ua hewa, ua aihue i ka ia a ke alii. Ua hooholoia ke kanawai no ka aihue, oia hoi ka poalo iu o na maka. Ua kapu ka pepehi ana i ke kanaka, he kanawai ia no Kamehameha. Poalo ia ae la na maka o ua kanaka nei, a noho pu iho la na makapo nei me kekahi kanaka kalai waa, ma Paukanila, ma ka aoao akau o Waihee. I kekahi ahiahi nae, mama ua kanaka makapo nei i ka awa o ke kahuna kalai waa. Inu no ua kahuna kalai waa nei, aka, hoomaalea iho la ua makapo nei aohe i inu i ka awa. I ka ona ana nae o na kahuna kalai waa nei i ka awa, haha hele aku la ua makapo nei i ke koi iluna o ka waa, a lona iho la ke koi lipi; a o kona haha hele hou aku la no ia i ke poo o ke kahuna kalai waa, a loaa iho la, ua hiamoe loa, no ka mea, ua oki mai la ka ona a ka awa. Haha hou iho ia a loaa ka a i, a o oki iho la i ke koi, a kaawale aku la ke poo. Kokolo aku la ua makapo nei, a he hapalua mile paha, komo aku la i ka aina puuhonua, o Kukuipuka ka inoa. He aina ia no Kukailimoku ke akua o Kamehameha. A ike na kanaka ua make ke kahuna kalai waa, ua imi koke ia keia kanaka makapo e pepehi, aka, ua loaa aku nae oia ua komo i ka aina puuhonua.
Pela no kekahi poe kanaka ekolu, i pepehi ai a make ke kanaka, oia no hoi ka wa o Kamehameha i Oahu. Ua holo kela poe kanaka i ka aina puuhonua o Paunau ma Lahaina; no Kaahumanu ia aina. Elua nae kanaka i mama loa ka holo ana a komo i Paunau, a o ke kolu o ke kanaka, ua loaa koke iho la no hoi i Pahumanamana, a ua pepehi ia iho la e ka poe hookahe koko.
[I malu paha ka aihue o ka wa kahiko, no ka poalo ia o na maka o ka poe aihue. Ua kapu ka pepehi kanaka, ua noa ka poalo maka.]
Ua like o Kaahumanu me he akua la no Kamehameha, a ua lilo kona mau aina i puuhonua e ola ai ka poe lawehala, a i puukalahala hoi e ola ai ka poe pepehi naaupo i ke kanaka.
4. O Kaahumanu no hoi ka wahine pookela a Kamehameha, a o kekahi hapa no ia o kona noho aupuni ana. O ka Kaahumanu mau olelo, oia no ka Kamehameha e hooko. O Kaahumanu no hoi kekahi e komo iloko o ka Aha Kukamalu. I ka make ana nae o Keeaumoku ma Kapapoko, i Koko, oia hoi ka makahiki 1804 ua ili iho maluna o Kaahumanu, ka mana e hiki ai ke komo iloko o ka Ahaolelo. O kona mau kaikunane hoi, aohe i komo i ka Ahaolelo, oia hoi o Kahekili Keeaumoku a me John A. Kuakini, i ke au o Kamehameha I.
I ka pau ana o na Kuhina Nui o Kamehameha i ka make, ua koho ia na Kuhina hou, oia hoi na keiki i kupono loa a ua poe Kuhina mua la, oia hoi o Kaahumanu, Ulumeheihei, Koahou a me Huiha Naihe; a o na'iii e ae i komo i ka Ahaolelo, o Kalaimamahu, o Hueu Kalanimoku, o Kalanimalokuloku i Kepoookalani, oia ke alii i ae wale ia, aia no i kona makemake ke komo i ka Ahaolelo.
Ia manawa nae, ua lilo o Kahumanu i mana nui iloko o ka Ahaolelo, a oia hookahi wale no ke'Lii Wahine i ae ia ma ke komo ana i ka Ahaolelo. A o na'Lii a pau o ka Ahaolelo, ua kau ko lakou manao a pau maluna o Kaahumanu; a o kana mau olelo a pau, ua haka pono loa mai na maka o na'lii iaia. Eia paha ke kumu, o ka like loa o kona mau manao me ko na Kuhina makua i pau e aku i ka make mamua. I ka loaa ana o ka aina, a o ka mokuaina, a o ke ahupuaa paha, a o ka iliaina paha, a o kekahi waiwai e ae paha, alaila, ua lawe ia ka lohe imua o na'lii ohana a pau. A pela no hoi ke kaana like ana o ka lakou loaa ia lakou iho, mai kahi loaa uuku a ka loaa nui. Ua lilo lakou i poe aloha ia lakou iho, a ua noho hale aku kekahi no kekahi, a ua noho hale mai hoi kekahi no kekahi; pela wale no ka noho ana o na ohana makua alii a pau, he poe aloha.
Pela iho la ka noho ana o na ohana alii a pau i ko Kaahumanu imi hale ana ia Kamehameha. Ua nana mai kela a me keia ohana alii, he poe makuakane, a he poe kaikunane. O Kaahumanu ka imihale, he lau a he mano na'lii, he poe aloha nae ia lakou iho.
Ke ninau nei ka mea kakau Mooolelo: Ua like anei ka noho ana o ke au i hala me ko kela wa? He au awahua, a nonohua paha keia ea? O kela poe anei mamua ka pili pono i keia mau ninau?
5. He alii wahine'haaheo o Kaahumanu; a aohe paha he wahine o na'lii wahine i oi ae mamua o Kaahumanu ma ka haaneo, i ke au o ko Kamehameha noho aupuni ana. He puni ala, he puni nani, he puni maikai, he haaheo, he hookano, he hookiekie, he uilani, he manao nui ia ia iho i kona kilakila, i kona pookela, i kona oioi pakelakela ma ka ui, ka hiehie a me ka nani iuiu onaona e like me na maka o ka manu nunu.
(Aole i pau.)
-
KA MOOLELO
NO KA
MAKAIKAI ANA A PUNI KA HONUA.
-
I KAKAUIA E
WILLIAM HOAPILI KAAUWAI.
HELU 4.
-
No ke ano oluolu maoli no o ka noho ana o Panama, i hiki pono loa ai ia makou ke makaikai i na wahi kaulana a pau. a no ka loihi iki no hoi kekahi o ko makou noho ana ilaila. A, aole paha he mau mea kupono i ka ike ia, a mau wahi pana hoi o ia aina, i ike ole ia e makou, ina o ka kakou mea ia i makemake ai, o ka heluhelu i na Moolelo, mai ko lakou hoomaka ana, a hiki i keia wa, oiai he mau Kaao loihi okoa no ia, a he mahea no hoi ka heluhelu anu, a le-a-le-a maoli no hoi ma kekahi mau wahi, aku, no ka okoa o ka kakou mea e makemake ai, nolaila, e kamailio no kakou ma na mea pili i ka kakou Moolelelo, a waiho aku no ko Panama mau mea i koe na ko laila poe, Toneiahuanu ma.
I kekahi ahiahi o ko makou mau la malaila, i hele ae ai ke Kiaaina a me kana Kakauolelo, e ike i ke Alii Wahine. Aole i loihi loa kana noho ana, a aole no hoi ana mau olelo ano nui; Eia wale no, o kona hoike ana mai i kona olioli, no ka hiki ana aku o ke Alii Wahine ilaila, aka, he minamina loa ia wahi ana, no kona hiki pono ole, ke olelo a nui loa ma ka olelo haole, i hiki ai ia ke hoonanea i ke Alii. A o ke aloha mai la no ia, hoi ana. He mea maikai okoa no hoi ka ia Alii, he uluhua ole i ka noho loihi mai. O kona oiwi he maikai no, he ano puipui, a he pololei a kanaka koa no hoi, he ano piipii paa kona lauoho, a uliuli hoi, pela no kona mau kuemaka a me kona mau umiumi; he nunui maikai na papalina, he ohaha ano oluolu kona helehelena, he ili keokeo hauliuli nae, me he la he 5 paha kapuai me 11 iniha kona kiekie, i ka'u koho aku, a he 40 paha kona mau makahiki a emi mai ilalo. Kahaha hou mai no paha oukou ke hai hou aku au i kona inoa Paniolo, o Mea! Owai iho nei la hoi la, poina loa iho la ka hoi au? o Ae! oia, o ka inoa ia.
I ke kakahiaka o ko makou holo ana ma kela aoao, mahope iho o ka hoomakaukau ana a me ka hoouka ana i ko makou mau wahi ukana maluna o na kaa nana e lawe, ua akoakoa aku makou a pau ma ka hale o ke Kanikela Pelekane, kahi a ke Alii i noho ai; a mai laila makou i hele aku ai, a hiki i kahi o ke Kaaahi e ku ana. (O ka maka mua loa keia o ko makou ike ana ia Akamai lua ole o keia ao,) nana aku, "hewa i ka wai na kanaka," (wahi a Kiwalao ma, laua o Kalaiopuu, aloha no hoi ia mau wahi haole, hoa-kamai-hawaii,) hookui ae no ia i kana, hou ae no hoi kela i ka ia la, onou ae no hoi ia nei i ka ia nei, a hele a he "aiwaiwa ka ua no hihimanu." I hookui I-a paha i ka maka-ha, pulu ka-e-e a ko laila poe aho-loa, aole la he Lau-a-u-a pulu ole i ka malo; Aole o ka hookui hoi a kanaka, eia ka he poe pie-pie-le kekahi, he poe makaikai wale mai no hoi kekahi, he poe Luna hoi kekahi me na koa, ao makou aku hoi me na ohua a pau loa, hu-hu-hui a na maka i Kou, wahi a ka poe kahiko.
O ke Kaa i hookaawale ia no ke Alii Wahine, a me makou, a me ka poe e ae a pau i ae ia e ukali ia ia, ua hookapu ia ia Kaa i na ohua e ae a pau, aole e hiki ke komo, aka, o na Kaa e ae, he noa wale no ia i na mea a pau e like me ka Helu o ka Pepa (ticket) a kela mea keia mea; ina he 1 a he 2 paha, nolaila, mamua o ko makou hele ana aku e komo iloko o ke Kaa, me ka hookeke ka hiki ana aku iwaena o na kanaka (i pono loa i ka huhu ole mai o ko laila, poe, i ka hookeke ia'ku, lokomaikai no lakou ma ia mea, aole he wahi kaawale iki a hiki loa i ka puka e komo ai iloko o ke Kaa, me ke a-ume-ume ke komo ana aku iloko o ua Kaa nei o makou. (me he kanaka waiwai la ka hoi wahi a ke Keiki a ke kanaka ) Aka, i ka pau pono ana o makou iloko o ua Hale lele nei o Keaka, i haawi ia mai ai no makou, oia ke kikiolo mai nei no hoi kahi poe iloko o kekahi mau Kaa e aku, akahi no a maha ae ka pili o ka hanu, i ke kupilikii i na kanaka o na aina a pau i akoakoa ae ai ilaila ia wa; me ka hopohopo no hoi kekahi no ke ano malihini, ia mau huikau ana a pau, no ka akahi-akahi. (O mea iho paha auanei i kahi mea 'Lii, o ka haule no ia i ka hope Kaa-ahi?) Ia wa i hiki lea ai ke haka pono mai i na mea a pau o loko o ia huikau, alaila, pau maoli ae la no hoi ka waimaka hihiu a malihini, a eia no ka hoi, "he olu wale no hoi he wai ko alo;" aole hoi e liilii, ua hele ia mai a, "le-i-wi Kohala, i ka nuku na kanaka."
Ia wa no makou i ike aku ai i ka akoakoa pono o na mea kuai o na ano a pau loa. Mai na mea aahu, na mea ai, na mea inu, na mea heluhelu, a me na mea e ae no a pau loa, i manao ia he kupono no na ohua. Ua hoolako ia a akoakoa malaila. Ei aku ka auanei ka "pakelakela Hilo i na hia loloa," i mua aku, kuhihewa e iho la no ka manao, o keia ka maoli, aole-ka! A pau pono na hoonohonoho ana, hookuekuene ana, a hoolai, U-i-na mai ana ku Hokio, e hoe-hoene ai, me he Ipu-hoe-hoe la, he mea ku kena la, a kuene ana a kuene, a loli o ke oki aku la no ka ia, oia no oe ia
Hao na kepa 'ke hau o Lihue
Huki na kaulawaha o Haleauau,
Mokumoku i ka holo ino a Kalena,
Ke holo la i ke kuhi o Kanoenoe,
I moe a au i ka uka o Malamanui,
I ke kipalale a ka wai-ahulu
Mai Waimea no a Wahiawa—e
He wa olelo ka ko oukou o mui nei,
Aia makou ua hiki aku la i Apinewale—a.
O ka moe ana a ke Alanui o na Kaaahi, ua like loa no ia me ka waiho ana a ke awaawa o ka muliwai e kahe nei, mai keia moana, a hui me kela moana, a nolaila, he a-anapuu a he a-anakee, me he "Waiho lalahu la ka wai o Waialoha." A ma na wahi a pau o ia lapuu ana, he akahele iki no ka holo ana; a he hoomaha iki no hoi ma kekahi u au wahi, no ka nanahu a me ka wai. He maikai loa ka maka o ka nana ana ae ma na aoao elua o ka muliwai, a ma na wahi no hoi a pau a hiki loa ma kela aoao. He oluolu maoli no ka manao o ka poe puni makaikai ke ike aku, no ka mea, me he mea la e hoonohonoho mauli ia mai ana no na mea a pau a ka naau e iini aku ai e ike i kela manawa keia manawa e makemake ai me ka hiki wawe loa. Alawa ie, he mau hale me na kihapai; kilohi aku hoi, he mau mahinaai me na pa holoholona; awihi iho ana, he mau waapa Kakahi (chajris) e holo ana i ka muliwai; a e helu aku au a aole e pau na nana ana a ka maka, oiai ka mahu e lawe ana i na lalani kaa i piha i ka nanahu, na ukana a me na ohua hoi. Amaiwa no hoi na mea he kupanaha, o ka imi ana a ke akami, a le-le-le-le ana makou me he manuia; elua wale no hora me 36 minute, hoi ana makou i kehu o ke kai o ka Moana Ateranika, i lawe ia mai e ko laila makani. I hoea aku ka hana, eia ka makou i Kolona.
I keia wahi wela ikiki no hoi keia a makou i ike aku ai. Aole no i nui loa na wahi hale o ia kulanakauhale, no ka mea he wahi wale no ia i hana ia, i mea e kaua mai ai i na kaaahi maanei aku, a ma na mokuahi hoi ma o mai; no ka hoolapa ana i na ohua; ka hoahu ana i na ukana a me ka hoolako ana hoi i na mea a pau a makaukau ai na huakai o kela wahi keia wahi, e hele ana, a e hoi mai la no hoi ma ia alanui.
O ka inoa kamaaina ka oia wahi o Kolona (Cologne), aka, no ka hoomaka mua ia ana o ka wehe o ke alanui-hao-kaaahi a makou i holo aku ai malaila mai, a ia wa no hoi i kukuluia'i ke kahua o ke kulanakauhale a makou i ike aku ai, oiai he opilopilo, a pohopoho ha-loko akaakai wale iho no ia wahi mamua, a ke waiho la no kekahi aoao pela i keia wa, aole no i hoopiha ia. He hana luhi loa ka, ka hoomaka ia ana o ua alanui nei a makou i hulei aku ai (oia no oe i ka hee-holua ana 'la, noho ana) me ka inea maoli; a mamuli wale no ka o ka hoomanawanui o ka Buna Nui nana i hooikaika i kanohi, oia hoi o Mr. Apinewale, (Mr. Aspinwail) i paa ai ua alahao nei, mahope o ka make ana o kekahi poe he lehulehu, no ka nui o ka luhi i ka hana ana malaila; a o ua Luna Nui pu la no hoi kekahi i make, no ka hooikaika loa ana ma ia hana nui; nolaila i kapaia ai ka inoa o ia kulanakauhale, o Apinewala, i Kia Hoomanao, no kona hoolilo ana i mau loko akaakai i aina, a me ka waiho ana i kaula paa nana e hookui i na Moana nui elua o ka Honua nei, ma o ke alanui la a kakou i kamailio ae nei maluna.
Pomaikai wale no hoi ko ka Honua holookoa a pau loa i kona ahonui, i kokua ia e ke dala a ka poe a pau i hui pu me ia ma ka hapai ana ia hana nui; makepono io no hoi ke kapaia ana o ia kulanakauhale mamuli ona, ua luhi maoli. "E ua Lani e, moe ia me ka maluhia." Pela ae hoi kahi mea i ko kakou mau akaakai o Waikiki nei; aohe olelo ana aku e, "Haele nui i Hamohamo, i kahi nui o ke ahuawa;"—O ia hoi ha! Nawai hoi ia ahuawa ke pau aku i ka mahiai ia: Mea loa nae paha auanei na wahi apu-awa o kakou i ka mauu ole ea? Kahaha! kii no hoi paha ka mauu i Ewa, i ka aina lehulehu o ke awa, maha o loaa mai na mauu a Kakohe ma, pahee kela o na apu ke inu aku, ka ua hoka ana o ka mauu maikai la, moai ka puu ke moni, aku, oia no oe o ka "wai a ka naulu la," ke
Kohi i ka welawela o ka lai,
O kuu ike wale aku no i ka hala,
Ua hoo-pa-pa-kai wale i Haena—e—
Ena ka maka ahiu me he puu noa'la,
I ka ike i kana mea i aloha'i—e-a—
He mau hora wale no ko makou noho ana i keia wahi, mamua o ko makou holo ana malaila aku. Mamua nae o ko makou lele ana mai ke kaa-ahi aku, ua paapu loa ka poe i akoako mai, ma ke alanui e hele aku a hiki i ka mokuahi; na kane, wahine a me na kamalii; he i poe malihini kekahi me na kamaaina no hoi. O ka hapa nui nae paha oia poe i akoakoa mai, he poe paele wale no, me he la na peno ia e ka la, a
"Eleele Hilo—e—
Pano-pano i ka ua."
I ka hele ana aku a makou, haualaoa lua ua poe paele nei, e hio haele nui mai ai ma o a maanei, me ka hookeke launa ole no hoi; lilo ilaila e a uume nui ai, hehi hewa kekahi iluna o ka pulelo o ko ke'Lii Wahine kapa, a na'u no i pale ae i na o Kona-ia-Hauliuli; e namunamu mai ana hoi keia me na maka haakokoe, e akaaka ia aku ana hoi e a'u kana haakokoe mai; o ka mea koke iho la no ia e lei i ke pohue—i ka walaau loa ana mai nae hoi kekahi, a lakou no me Honomaele ma, ka-ka-kau ana makou iluna o ka mokuahi, na kii ke Kaina (Tyne) ka inoa, hoomanao ae la, o Iamaika ka ihu i koe.
I ka hiki ana aku iluna o ka mokuahi o makou e holo ai, hoikeike mai ana ke Kapena i na rumi a pau i manaoia no ke 'Lii; he mau rumi nunui maoli no, a he ano, maikai no hoi, i na aniani hoonani, e kilohi ae ai, me na kinohinohi wai gula i hoonionio ia, a kuuwelu mai hoi na paku silika, me na kaula-puu onionio; a he kohukohu a Halealii maoli no o uka nei i ka nana aku. I olelo wale ai no hoi ha na haole, "he mau Halealii lana ko lakou mau mokuahi lawe ohua." Ea! maikai maoli io no. Ka i no paha o ka nani wale hoi ia. "E ia aku ka hoi ka muimuia o Palehuna," nana aku makou a he
He nani hemolele ka pali o Lehua,
Ka pahee i ka wai o Pohakomo,
He wai honi ili no ka ua-kapa-a-hoa,
E hehi ana i ka lau o ka laau,
ka ua mea no hoi he maikai, a ke akamai a me ka naauau i hana ai. Hooluolu iki iho la no ka wela, a iluliu iki, o ko'u hele hou no ia iuka i ka makaikai, a noho no ke Alii me ka'u wahine iluna o ka moku, oiai ua hui aku la no na haole a