Ka Nupepa Kuokoa, Volume VII, Number 34, 22 ʻAukake 1868 — No na Palapala. [ARTICLE]

No na Palapala.

KAI MIMIKI! KE OLAI! A ME KA UWILA.He nui wale na palapala i loaa mai ia makou iloko o keia pule hookahi, no keia mau nu hou kupaianaha loa, e ike mau ia nei iwaena o ko kakou aina. Mai ia Joseph Kawainui mai e noho mai la i ka ua Kanilehua o Hilo, no ke kai mimiki nui malaila, i ka la 14 o keia malama, a ahu wale na kuapa i ike ole ia mamua i ka wa kai maloo, a hamo ia aku hoi na amaama momona o Waiakea loko, puehu i kai, a mai a J. S. Kekukahiko mai hoi o Kona Hema Hawaii, no ko laila kai mimiki, ma ia la hookahi no, a mai ia Rev. G. W. Pilipo hoi o a nei ae o Kailua Kona Akau, no ke kai mimiki, ke olai, a me ka uwila malaila, ma ia la no, a mai a W. Kahookaumaha mai o ka ua Nahu hoi o Kaanapali, no ke kai mimiki malaila, ma keia la hookahi no, a mai a D. W. Kaiue mai o Waialua Molokai no ko lakou ike ana i ke kai mimiki, a me ke olai ikaika loa malaila, i keia la hookahi no, a ma Honolulu nei no hoi iloko o keia manawa hookahi no, a ma na kuaaina aku nei o keia mokupuni, ua loheia mai no. A o Kauai ka mokupuni i kou, aole paha i hoea aku ke kai mimiki ilaila, aohe nae i hiki mai ka lono mailaila mai. A no ka nunui launa pono ole o keia mau palapala, a no ko lakou like loa ana mamuli wale no o ke kumu hookahi, nolaila, ua owili ia e makou a paa, a ua hoomoe loa ia ma ka Papa, a o ka poe nae nana i kakau mai, ua mau palapala la, ua mahalo no makou i ko oukou hoike ana mai ia mau mea hou, a no ka lawa loa ana o ko kakou ike, nolaila, ua manao makou, aohe paha he waiwai nui o ka hoolaha ana aku. NO KE OLAI NUI.-Ua hoolaha aku makou ma ka pepa o kela pule i ka makou lohe mai no ke olai nui ma ka la 22 o Iulai i oi ae i ke olai nui o ka la 2 o Aperila, o ka pono loa, aohe olai e ae i oi loa aku ka ikaika me ko ka la 2 o Aperila, oiai ua ano e ke kulana ona palipaa; a ua paialewa na moku, a ua pulumi ke kai i kahi hapa o Kau; a o ka hele no ia e olelo ia nei.