Ka Nupepa Kuokoa, Volume VII, Number 33, 15 August 1868 — NU HOU KULOKO [ARTICLE]

NU HOU KULOKO

Oahu. AHAHUI EUANELIO. - E halawai ana ka Ahahui Euanelio o ka Mokupuni o Oahu i ka pule mua o Sepatemaba, poalua la akahi, hora umikumamakahi kakahiaka, ma Kaneohe. Ke kno ia aku nei na Hoa Lala a pua loa o keia Aha e hele makaukau mai i na Haawina, e eleu mai, mai lolohi. H. KAUAIHILO Lunahoomalu. MAI PUUPUU LIILII. - Ua lohe ia mai, aia ma Kapalakilo, he laha nui nei keia mai puupuu luuluu, a ua nui loa na haole i loohia ia e keia mai ahulau, a o na Pake, aole lakou i loaa iki ka, a o ka Papa Ola ma kela kulanakauhale, ke hana ikaika loa nei lakou, mea e laukiha ole ai keia mai luku iwaena o na kanaka, pomaikai wale ia poe i ka makaala o ko lakou Papa Ola, a pehea la hoi ko kakou nei wahi Papa Ola, eia ka pilikia la ke lohe ia mai nei, "a i kahi e ka ua hana e ke pulu" wahi a ka olelo. HAAWI WAI ONA. - Ma ka Aha Hoomalu o keia kulanakauhale, i ka poakahi iho nei, ua hookolokolo ia kekahi kanaka Hawaii, o Kalili ka inoa, ka mea nona ka Hale ai "Hawaiian Club" ma ke kihi makai o ke Alanui Maunakea, no ka haawi ana i ka wai ona i kekahi poe, a ua hoopaiia oia, $100.00, a e $3.00 a oi aku no ke Koina, a i ole e hoo kaa ia mai, e hoohanaia oia ma ka hana oolea hookahi makahiki. E na makamaka, a laa ka pilikia la, ka lalama i ka mea ino. UA HELE MA KAUAI. - Maluna'ku nei o ke Kuna Neti Mela, (Nittie Merrill) i ka poalua'ku nei, ua hala aku la ka hookele nui o ko kakou Kilohana no Kauai, e kipa iki ana oia ma Koloa, a malaila ae i Lihue, alaila paha, hoi loa mai, aole nae no ka lealea a me ka hooluolu kino wale keia hele ana, aka, i holo aku nei oia e ike i ka halawai ana o ka Ahahui Euanelio o ia Mokupuni mamuli o kana Oihana Luna Kakau Leta ao ka Papa Hawaii, a mawaena hoi o na ouha i holo aku la o Rev. E. Kekoa kekahi, a me ke Kahuna Farani o Koloa, o Aukakeko paha kona inoa. A ma ka lokomaikai o na Lani e malama i ko lakou hele ana a pae aku i ka aina. KAI-HOEE MA HONOLULU NEI. - Ma ka hora 6 o ke kakahiaka o nehinei, la 14 ua ike hou ia ke kai-hoee ma Honolulu nei, a ma ka hora 7.25 us emi hou aku la ke aki me ka hiki wawe loa, a ahu wale na kuapa, hi-o kekahi mau moku e ku ana i ke awa no ka ili ana, a hala he mau minute, pii hou mai la ke kai, a o ka wahine e lawaia papai ana, holokiki i kula me ka hooponopono ole. Elua a ekolu paha hana ana a keia kai mimiki, ua pau ka makou ike ana, aka, aole nae i pau kana hana. He mea hou keia i ike ia maanei. Piha pu na uapo i na kanaka makaikai i hele mai e ike i keia mea kupanaha he "kai-hoee," oiai ua lohe wale ia mai no na kai-hoee ma ka mokupuni o Hawaii i ike ia ai ma Hilo, Puna, Kau, a me Kona, a he kumaka maoli hoi keia. A no keia mea i hoomanao iho ai makou penei: "Mimiki ke kai ahuwale ka papa lima e-a" Hawaii. OLAI NUI. - Ma ka la 22 o Iulai, ua ike ia kekahi Olai nui ikaika loa ma Hilo, i oi aku mamua o ke olai nui i ka la elua o Aperila, aole nae i lohe ia mai na mea i hoopilikia ia. NU HOU MA HILO. - Ua palapala mai o J. Upa ia makou o keia wahi, a peni ke ano nui o kana palapala. - I ka poaono aku nei la 8 o keia malama, nui loa ka ikaika o ka Hekili, a me ka Uwila ma Hilo nei, aole o kana mai, ua ike ia aku ka aa mai o ke ahi iloko o na ao panopano i na hora elua a oi ae, a ua helelei mai hoi ke ahi maluna o na wai, a ma ka moana, maluna o ka loi kalo a Nuuanu o Wainaku, ua maloo haalele, me ka ike maka ia aku no o ka helelei ana mai, a ina ka o ka helelei ana mai o ke ahi uwila a maluna ona hale, aohe opala koe. Kupaianaha na hana a ke Akua ma keia Mokupuni, a me he mea la hoi, he wahi laau hahau e hoopai ana i ka aina.