Ka Nupepa Kuokoa, Volume VII, Number 32, 8 August 1868 — Page 2

KE KUOKOA, HONOLULU, AUGATE 8, 1868

FOREIGN NEWS.
-

                By the Schooner "Alaska" from Portland we received ten days later news.
                On the 4th of July the President of the United States issued the expected Proclamation of universal amnesty to all the remaining political offenders of the late rebellion including Jeff. Davis himself.
                The new articles of impeachment presented of Stevens in the House have been referred to the Judiciary Committee.
                Mississippi it is reported has given a Democratic majority of over ten thousand.
                The Democratic Presidential Convention which met in New York, after 19 unsuccessful ballots in none of which appeared either the name of Chase or Horatio Seymour, on the 22d bollot went unanimously for Seymour, after which General Blair was nominated to the Vice Presidency. The California Democratic papers accept the nomination of Seymuor but leave Blair out, being too well acquainted with him. A nurnber of so-called Republicans, who recently joined the Democratic Party are dissatisfied with the nomination of Seymour; otherwise, his name is very acceptable to the party he represents.
                From Europe there are rumors again of a serious conspiracy in Spain. Many arrests of prominent individuals have been made. Austria has disbanded 30,000 of her troops. There are reports also of further complications in Japan, a number of the Damios combining against the Mikado.

-
NU HOU KUWAHO.
-

Ua hoolaha ae ka Peresidena Ioanesana o Amerika Huipuia, ma ka la 4 o Iulai, he olelo e kala ana i na kanaka a pau i hui pu malalo iho o ke kaua kipi. A iloko o keia kala ana, o Jeff Davis pu kekahi. Ua kanalua loa kekahi poe o na makaainana aloha aina, i keia kala ana a ka Peresidena i na lawehala a pau loa.
                Elua halawai kuka nui ana o na makaainana o na aoao elua. O kekahi aoao o na makaainana, ua manao lakou e koho ia kenela Kalani i Peresidena, a o kekahi aoao hoi o na makaainana i ko lakou halawai nui ana me ko lakou mau Luna ma Nu Ioka, ua manao lakou e koho ia Semoa (Seymore) i Peresidena. Ma ka malama o Novemaba, oia ka manawa e koho ia ai e na makaainana, a ia wa e akaka ai ka mea a laua e lilo i Peresidena. Aka, aole nae he kanalua iki ke Kuokoa i ka hai aku, o Kenerala Kalani (Gen. Grant) no ke puka mai ana.
                NO SEPANIA.—He lono ka i hiki mai mai Sepania mai, o ka poe i kipi mai nei i ka Moiwahine, o lakou no a pau he nui wale kai hopu ia no ke kipi, a ke hookolokolo ia nei lakou.
                No IAPANA.—Ua lohe hou ia mai, ua pii hou ke kai o ia Aupuni, ke kaua hou nei, a hele loa aku ana paha i ke kaua nui ana.

-
Ua ike maka iho nei au.
-

                He malihini au, akahi no a ike i ka Hoike ana o keia kula, nolaila, manao iho la au he makepono kuu luhi i ke kakau ana, a hoouna aku ia oe e ka mea kino lehulehu, e lawa pono ai na kini o kaua e nanea mai la i ka "Ua Kanilehua" a kaalo loa aku i ka mole olu o Lehua, i na mea au i ike iho nei.
                He la malie, a maikai ka la i Hoike ai, ua kalae ka lani, ua ahuwale luna o Haleakala, a he makani ikaika nae mai ka Hikina mai, e lawe mai ana i ka leo o na Pupukanioe i mea e hoonanea ai i na pepeiao o na Iwa maka palupalu o "Mauna Olu."
                Ma ke kakahiaka nui o ua la la, hoomakaukau iho la au a me ko'u wahi associte e nau aku e ike i na mea a lakou i hookomo ai iloko o ka pahu paailiona o ka naauao: Oiai e noho ana au ma ka malu Hekuawa o Wailuku, me ke ano hopepe, o ko ka malihini mau.
                Ua hiki aku au ma kahi e hoike ai, mamua ae o ka manawa: Aole nae i kuu iho ka nae o kuu wahi lio, ike aku ana au i ke kai huakai ana mai o na kaikamahine me na Hae Hawaii, e like me ka nui o na classs; nolaila, hoomanao ae la wau i kekahi wahi pauku himeni i haku ia no ka Hae Hawaii e ka mea haku mele kaulana (Lyons) a penei no ia.
"Ae, e hui ma ka Hae boys,
Hui ma ka Hae,
Paa mau ka Hae Hawaii nani,
Huro like ko ka Mauna,
Huro pu ko Kahakai,
Paa mau ka Hae, Hawaii nani,
Cho—Hawaii boys
Huro boys Huro,
Auhee ke kipi paa mai ka Hae,
Ae, e hui ma ka Hae boys,
Hui ma ka Hae,
Pau mau ka Hae Hawaii nani."
                Aole no hoi i liuliu iho, komo lakou iloko o ka halepule, kahi i hoomakaukauia no lakou a kohu moa uakea la ke nana aku. Ua hoomaka ia ka hana ma ka pule ana, a pau ka pule, hoikeia na mea a lakou i ao ia ai. Ua hoomakaukau ia he wahi ahaaina lulu dala no ka Luakini; mahope nae o ka pau ana o ka hoike, ua haiolelo kekahi mau mea.
                Iloko o na mea a pau i hoike ia, nui kuu mahalo, no ka holo mua ana o kuu mau kaikuahine imua ma ka olelo haole.
                Ke hoomanao ae nei au i o'u mau wahi pokii e pu e mai la i ke anu o Akikahaulani, i ka lakou nei pakake mai hoi. Nolaila ke paipai nei au i na kaikuahine o kakou; E hele imua, alaila, na lakou nei e hele, hele mai hoi oukou. E malama i keia mau wahi olelo. "Onward and Upward."
                Me ka Luna Hooponopono ke aloha, a me na keiki hoonoho kepau. Ke hooki nei ao maanei, ua uhi Kuawa i na pali. Me ke aloha no. E.S.T. KIKALAEKA.
Wailuku, Maui, Iulai 25, 1868.

KA LUNA Hooponopono, - - L.H. KULIKA.
KA HOPE LUNA HOOPONOPONO, J. KAWAINUI.

POE HAKU MANAO NO KE KUOKOA.

Rev. L Laiana (Lyons) | S.M. Kamakau,
Rev M. Kuaea. | Rev. C.B. Anelu.
D. Malo, (Lokoino.) | (Andrews.)

Na Nupepa Kuokoa.
HONOLULU, AUGATE 8, 1868.
Ko kakou Aha Kiekie.

                Mai ka wa mai i make ai ke Kokua Lunakawai Mua o ka Aha Kiekie, he nui ka nune ia, a me ke ake nui ia e ike i ka mea pono e hookohu ia i pani no ia hakahaka. Ua aneane ae nei e alua makahiki ka waiho hakahaka ana, me ka hookohu ole ia o kekahi mea i pau ai ia pilikia. Ma ia manawa ua lono ia ae, ua kauoha ia aku kekahi mea i ka aina e, a ma keia muli koke iho nei no la i lohe mai ai makou, he mau ia kali wale ia no keia nona.
                Mahope koke iho no o ka make ana o ka Lunakanawai Robikana, ua olelo ia ae. ua haawi ia aku kona kulana ia J.W. Aukina Esq., a nana mai ka ole. I ka haalele ana iho nei o ke Kokua Lunakawai Alua, ua wae akahele ia ke kanaka e koho ia ai i pani ka hakahaka o kahi i haaleleia, a o ka Lunakanawai Kiekie wale no ko ka Noho, a no ke kokoke loa ana mai o ke Kau jiure, e pono e koho koke ia kekahi mea, a ake nui hou ka Noho e loaa;—a he nui maoli no ka hopohopo o hookohu ia kekahi mea alahakahoka, a i ole ia kekahi punahele o ke Aupuni. He akaka anei, ua hookulanalanaia ka Noho iwaena o ka manaolana a me ka makau? He pomaikai maoli hoi keia ua ae mai o Mr. Aukina i ka lilo ana i kokua lunakanawai alua no ka Aha, a ua hui lokahi ia hoi ia manao me kona kanaka; ke i mainei nae hoi kekahi poe, no ia manawa wale iho la no ka manawa a ka Aha i makemake nui ai. O ka maumaua ana mai o na loliloli iloko o ke aupuni, ma ka make, a me ka haalele ana mai o na Kokua Lunakanawai ke kumu nana i kono mai e loaa ae kekahi mea kupono loa ma ua mau wahi la.
                O ke kanaka mua a makou i ike io aku ai la, oia no ka Loio Kuhina, he keonimana, a makou i hoohalahala ai i kana mau hana e pili ana i ko ke Aupuni pono, aka ma kana mau hana e pili ana i kana oihana Loio Kuhina, ua ike kona naauao loio; a mamuli o kona oluolu, a me ka maikai o kana mau hana imua o ka Aha a me na hoa o ka Aha Hookolokolo i loaa ai kona mahaloia e lakou. Aka, aole no oia i makemake i ka hanohano o ka Lunakanawai, me ka uku makahiki he $4,000, oiai he $5,000 kona uku no ka oihana Loio Kuhina, a na komo hoi i ka hanohano o ka Aha Kuhina.
                O ka lua o na mea a makou i manao ai, oia no ka Lunakanwai Hoomalu o keia Kulanakauhale, ia ia makou i nana hou ae ai, mai keia Aha aku e koho ia ai kekahi mea no ka Aha Kiekie, he kanaka a ke aupuni i ike ai he kupono ole no oihana hanohano.
                Oia iho la ke ano e holo ai na hana. E nana ae ke aupuni iwaena o na loio i mea kupono e koho ai, a o ka hopena oia mea he koho ana i ka mea kupono.
                Ke hoike mai nei ke Kau i hala i ka pono o ka hoomakaukau ana i ka mea kupono i kalakalai ia no ua mau Kulana Kiekie la; a e ao mua ia oia ma ka nono ana he Lunakanawai ma ka Aha Hoomalu. A ua hakilo aku no makou i kekahi o na Keonimana opiopio e hoomaamaa mau mai nei imua o na Aha Kiekie, a ua pono no oia ke Kohoia no ka noho Lunakanawai Hoomalu.
                O ke Koho ana me ke akahele loa no e pono ai, o kekahi mea nui no hoi i kanaka i makaukau loa i ka olelo Hawaii a i kuluma hoi i ko lakou noho ana. A o kahi i oi aku ai o ko ia nei kupono ma ke ano o ka hanau ana me na Kanaka Hawaii. A o kona inoa maikai i keia manawa a me kona ano ua oleloia he hoopono, a me ka naueue ole mahope aku. A he mea nui hoi ia e malama ia ai e na hanauna e hiki mai ana, no ka inoa maikai i mahaloia ai ko kakou Aha Kiekie ma Hawaii nei a me na wahi e ae.

-
Ka La Hoihoi E-a.
-

                O ka la hoihoi ea, oia no paha ka ia Hoihoi ola no ka aina holookoa, a no ka Moi pu hoi, he la ia e hauoli nui ai, a he la hoi i ike nui ia kona kaulana ana ma keia Aupuni. Iloko aku nei o na Kau i hala, ua ulu moakaka lea mai kona hoohanohanoia, a me kona hoopailani makamae ia ana e ko makou mau Moi Ilihia, a iloko iho nei o ka makahiki 1867, aia hoi, ua hala aku la ka nani, a me ke aloha ia o ka aina hanau, mai ka aina'ku, a e ulu aku ana paha kona nalowale loa ana ma keia mua'ku.
                A no ka mea hoi; ke ike lea nei ko makou mau maka, aohe olelo kuahaua iki o ko kakou Kuhina Kalaiaina e pili ana no keia la, aka, o ka Poalima maikai wale no o na aoao Katorika elua, oia kana i kahea mau, e pani ku ia na Hale Oihana Aupuni a pau, a e hooliloia hoi i La Kulaia no ka aina holookoa. A no ia nele paha, nolaila hoi; aohe ke Aupuni i malama i kona la,—aohe i pani ku ia na ipuka o na Hale Oihana Aupuni, aohe i noho hoomaha kona mau Luna malama, aohe i hoopaaia na ipuka o na Hale kuai a me na Hale paahana i ka wa pono, aohe i hookuu ia na paahao e noho hoomaha i keia la, aohe i haawi mai o Puowina, i kona mau leo aloha, aohe ike ia'ku o ka Hae i kaili wale ia, e welo hoohie ana i ka makani, a he ole loa no.
                Nolaila, he mamina, a he minamina loa makou e noho nei, mamuli nae o ko makou ano aloha i keia lahuikanaka, a me ko kakou aina hanau, i ko kakou haalele wale ana ia kakou iho e noho ho-pe-pe mau pela, malalo aku o ka hoopili wale i ko hai lokoino, a aloha ole mai hoi i ka amo aku a na maka Hawaii. Iole keia la me ka ea o ka aina, auhea ia ke ola o ka aina? Iole o Adimarala Toma me ka Hae o ka aina, auhea la ka nani o ka aina, a me na pono o ka aina? A ke hai aku nei makou ia oukou, aole loa keia aina maikai iloko o ka poho lima o ka kakoa mau milimili Lani i keia mau la, kala kahiko i au wale ka ia i heo mua'i ia Beritania lima nui, ma kahi huini o ka maka pahikaua a Lo Geoki. A no ka hoihoi ia ana mai o ka ea o ka aina ma ka la 31 o Iulai o ka makahiki 1843, e Adimarala Toma, aia hoi, ola'e la kakou, pau iho la ka noho pio ana, me ke kaumaha, pau ka noho hope-pe ana o kahi makuakane me ka makuahine, walaau mai na kama liilii, ola kakou, pau ka holo hele ana i ka nahele, pau ka pee ana iloko o na Ana me na lua, pau ka alala ana, ua olale la ko kakou Moi, ka mea i kaumaha nui ia e ko kakou naau, i ke kaili pio ia'ku me he enemi la no ke kaua kipi.
                A eia ka hoi e haalele loa ia ana keia la nui, e malama ole ia ana e ke Aupuni, a e hoolilo ole ia ana hoi i La Kulaia no ka aina holookoa, he mea kupaianaha ia i ka ike aku, aka, aole loa nae e hiki iki ana ia makou, a me ko makou mau puuwai aloha aina, a aloha Alii hoi, ke kinai kumu ole aku i keia la, mamuli o ka papa wale ia mai, he ole loa, aka, e malama ana no makou, a e hoomanao ana no hoi e like me ka mea mau, a hiki wale aku i ka hulihia ana o ko makou aina hanau, ma ke alanui aku o ka hele loa ana, alaila, oki ka makou malama ana.
                Ua ninau wale makou i ke kumu o keia hoopauia ana, aole nae haina akaka ia mai, aka, kuhikuhi pa-e-e ia 'ku, no ka hilahila o ko kakou Kuhina Peletane, a me na haole Peletane, e noho ana malalo iho o ka maluhia a me ka lokomaikai o keia aina, a no ka hoohilahila'ku hoi i ko lakou Aupuni, a me ko lakou Moiwahine, na kumu o ka hoopau wale ia ana.
                Heaha la hoi, ina pela ka manao ana o ko Beritania poe, he hana hoohilahila keia, ia lakou aku no ia, aka, aole loa nae pela ko makou manao, no ka mea, aole maluna o ke Aupuni holookoa o Beritania keia hoopilikia ana ia makou, aka, maluna hookahi wale no o Lo Geoki, a i ka lohe ana o kona mau Luna Aupuni a pau loa i ka ia nei hana ino, o ko lakou hoihoi koke mai no ia i ka ea o ka aina ma ka lima mai o ka mea lokomaikai io. A o ko makou malama ana i keia la, oia no ko makou hoohanohano ana ia Adimarala Toma, a me ke Aupuni o Beritania, a aole hoi ma ia ano wale no ko makou malama a hoomanao ana i keia la, aka, he la hoomaikai hoi i ke Akua lokomaikai, no kona aloha ana ia makou, a he la hoomaikai no hoi a mahalo loa'ku i ke Aupuni o Beritania, no kona hoihoi ana mai i ka ea o ka aina, a hookahi wale iho no a makou huaolelo mau e hoopuka nei.

"UA MAU KA EA O KA AINA I KA PONO."
"E OLA KA MOI I KE AKUA."
-
Ka Papa Helu o na Ekalesia.
-
[Koena o kela pule.]

                Ka ekalesia o Kaupo. O Rev. B.W. Kaawa ke Kahu, he ekalesia nui loa no ia, i oi aku na hoahanau i ko Waimanalo, a emi mai hoina kokua, no ka mea, o ka nui o na lala hihia ole, 149 na dala kokua $120. wale no 50-100 hapahaneri, a ma Waimanalo hoi 89 wale no hoahanau, eia nae nui loa na kokua i keia makahiki, $333.48 imua o ka poe nana e huli mai nei puu nui. E ko Kaupo mau haipule hoomaauea, aole anei oukou hilahila la ina ekalesia liilii hooikaika i ka hana pono ke hele la a pakolu a oi aku dala na ka mea hookahi. Ee e hooikaika ka pono i olelo ole ia ka inoa, mai noho a minamina o nele loa auanei wahi a Solomona ke alii naauao.
                Kipahulu. He kanaka makua ke Kahu o keia pa hipa, a ke malama nei oia i na ohana 231, a o na dala kokua $149.25 i keia makahiki ua like me $0.64 keneta na ka mea hookahi, mai hiamoe oukou e Puhi ma no ka mea he wa hana nei ka wa e ola ana. Koolau. O Rev. S. Kamakahiki ke Kahu, 349 na ohua o ka Haku, $810.12 na kokua a ia poe ua like me $2.32 na ka mea hookahi, o ka oi paha keia o na ekalesia i hala'ku mai ko kakou hoike ana i ka awarika a kela mea keia mea a hiki i keia manawa, e ko Koolau poe mai hoopau i ka oukou hana no ko oukau oi ana'e ia aka hoomahuahua hou aku. Ka ekalesia o Hana.—Aohe o makou oluolu iki i keia ekalesia nui aloha ole ia lakou iho a me hai no ka mea hoi ma ka Papa Hoike Helu o keia makahiki ua ikeia o ka nui o na hoahanau e noho hihia ole nei ma keia Kihapai 370 a he $30.12 wale iho no wahi dala na ia poe lehulehu ua like me ewalu wahi keneta na ka mea hookahi i ka makahiki $0.08 a he elua keneta i ka hapaha makahiki. Heaha la nei a ko Hana poe, no ka loaa ole paha o ke Kahu nana lakou e hooponopono a he koe-a maoli iho la no paha, a ina io pela alaila ke i mai nei o Solomona ia oukou penei: "Hoohelelei kekahi nui hou kana, aua hoi kahi i ka mea ku ole i ka pono, o ka nele ka hope." E ko Hana poe, mai hoopalaleha oukou i ka hana maikai, no ka mea, i ka wa pono, e ohi auanei oukou i ka hua, ke hoonawaliwali ole, wahi a Paulo.
                Ka ekalesia o Honuaula. O Rev. H. Manase ke Kahu, 269 na lala hihia ole, $143.62 kokua, a na ka mea hookahi $0.52, keneta. E ko makou makamaka mai hoolilo loa ae i ka nana a kekahi haku ou, a honuku i ko ka uhane, ma ka nana'ku i keia pa pa helu, he hapawalu pakahi na kela a me keia hoahanau i ka hapaha makahiki, he keu ka nele.
                Ka ekalesia o Waihee o Mr. L.W Papalimu ka Luna Haiolelo. O ka nui o na hoahanau 146 wale no, a o na dala hoi i kokua ia e lakou $1143.87. (nui maoli)ua like me $7.83 na ka mea hookahi i keia makahiki, aneane elua dala i ka hapaha. O ka oi hookahi paha keia o na ekalesia ikaika maoli mai Hawaii a Niihau, ina nae mailoko ae o ko lakou waihona aloha pono-i keia mau kokua, aka, ua lohe pinepine mai makou, he ekalesia hoahaaina mau kela, a ina io pela, alaila, aohe no oukou iho ko oukou ikaika aka no waho mai kahi, a ma kela pule aku nei no hoi. ua hoolaha aku makou. "He ahaaina bele liilii ma Waiehu," kekahi hapa o ia ekalesia, a ua loaa na dala $165.00, a laa io hoi paha la, mai hilinai hewa makou i keia puu dala nui na oukou wale no, eia ka, na hai ka paapu, e hooikaika nae no oukou iho, a e hoomau aku no hoi i ka oukou kula loaa, ke kihi ki.
                WAILUKU.—O Rev. T.G. Kakina ke Kahu, 299 na lala hihia ole, $615.50 i keia makahiki, ua like me $2.06 na ka mea hookahi, a he hapalua pakahi i ka hapaha, ua mahalo ia, hoomau aku a oi ae i keia makahiki e hiki mai ana. Ka ekalesia o Lahaina, o Rev. D. Baluina ke Kahu, 497 na hoahanau, na dala kokua $818.87 1/2, na ka mea hookahi i keia makahiki $1.64, ua like hoi me $0.41 i ka hapaha ikaika no ko Lahaina poe, ua mahaloia.
                Ke Kihapai o Lahaina, o Rev. S.E. Bihopa ma na Kahu, aole i loaa mai ia makou ka Papa Hoike Helu o keia ekalesia, nolaila aohe a makou mea e kalai aku ai i keia puu kaua o ka malamalama.
                LANAI.—O Rev. N. Pali ke Kahu, he kanaka makua keia, ua palupalu, o ka nui o na hoahanau ma keia Kihapai, 106, a o na dala i kokua ia e lakou $27.00 wale no, ua like me $0.25 wahi keneta na ka mea hookahi, a eia nae ka mea kupaianaha, ka ike aku aohe a oukou dala Mahinahou, aohe wa hi keneta hookahi no ko oukou luakini, aohe kokua e ae, a aohe hoi dala no na Kula Misionari Kuloko, a he ole loa, o keia mau dala he $27.00, no ko oukou Kahu wale no, a ina pela, alaila, eia ka ninau. E ola anei ke Kahunapule a me kona ohana nui i keia mau dala i ka makahiki? Aole loa no, a he kumu maopopo ia e uhu ai ko kakou mau Kahu Ekalesia e hele i kahi e, no ka pololi mai ia oukou, a i keia makahiki ae e ike makou i ka hua o keia paipai ana, e holo imua ka oukou hana ma na kokua a pau.
                KALUAAHA.—O Rev. A.O. Polepe ke Kahu, 419 na hoahanau hihia ole, aka, $1,489 nae na dala i keia makahiki hookahi wale no, ua like me $3.55 na ka mea hookahi, ikaika maoli, E ko Kaluaaha poe, ua mahalo makou i ko oukou ikaika, aka, hoomau aku, mai emi hope no ka lilo ana o ko oukou wahi Kahu Opio i Kaumakapili.—HALAWA, o Rev. Nueku, ke Kahu, he ekalesia nui keia, i oi aku kona mau lala mamua o ko Kaluaaha, 436, eia nae, ua emi loa na kokua e $563.25 wale no, a he $1.29 na ka mea hookahi. E ko Halawa poe e, he poe nui oukou, uuku nae na pe-hu, uuku hoi o Kaluaaha, makena wale na palahaku, e hooikaika ouko ma keia hana.

-
NU HOU KULOKO
-
Oahu.

                KE KILAUEA.—Aole e holo ana ke Kilauea i keia pule ae, aka, e hoomaha iki ana oia, a ma ka la 17 o keia malama, alaila, hoomaka hou kona eku ana, ma kona mau awa ku mau. -
                KA LUNAKANAWAI KAAPUNI O OAHU.—Ma ka Poalua iho nei o keia pule, ua holo aku ko kakou Lunakanawai, Hon. W.P. Kamakau no kana Oihana Hookolokolo Kaapuni, e kipa mua'ku ana oia ma Waianae, a malaila'e a i Waialua, a e huli loa aku ana paha i na Pali Koolau. -
                Ua ike iho nei au, maloko o ka Nupepa Kuokoa o keia pule i hala ae nei. He wahi manao kue na kekahi poe o ke Kaona nei, i ka hoolaha hewa i ka hoomana Katolika. I ka hai iho ua kii mai kekahi kahuna Katolika e hoi hou aku ke Keiki opio i komo i ka Himeni. He wahahee ia olelo ana pela. Aole mea nana i olelo mai pela.

UA HOOMAEMAEIA.—Mawaho iho o na puka komo aku o Kawaiahao, ua kahili ia a maikai, a ua lu ia aku i ke one akeke, one eleele, a ua nani maoli ka waiho ana mai i ka ike aku, a ua lono mai makou, na ka Mekia W.L. Moehonua a me kana mau keiki ka i Hoomaemae, pomaikai no ia ekalesia mamuli o ka mikiala o keia Mea Hanohano ma na hana pono.

KE ALII KIAAINA OAHU.—Aole no i liuliu aku nei ka laua huakai me kana Aliiwahine, "o Liliu," a o ka hoi koke mai no ia, maluna o ke Kuna Kate Lee, i kela Sabati aku nei, Aug. 2. A ma ke ahiahi iho nei o ka poalua, ike aku ana makou i ke Kamalei a kakou, e hololio ae ana, ua hele no a maikai pono ke ola o ua lani la.

                KA NUI O KA UA.—Ma Waikiki, o ka nui o ka ua i haule mai, mai Maraki a i Maraki. 51.85 iniha wai.—
                A mauka hoi o Nuuanu, i kahi o Hon. G.P. Judd, iloko o ka makahiki 1865, na haule mai 37-97 iniha wai, a i ka makahiki 1866 mai, o ka manoanoa o ka wai 55.25 iniha, iloko o na mahina elua, Dekemaba, 18.80 iniha, a i Mei hoi, 10.43 iniha.
                Iloko o Iune, 1867, a i Iune hoi o keia makahiki, ua haule mai, he 60.59 iniha ua, mauka o Nuuanu, a ua like keia me 452,280 barela no ka eka hookahi.
                A ma Nu Ioka hoi iloko o na makahiki 13 i hala aku nei, o ka Awarika o ka haule ana mai o ka ua, 48,11 iniha.
                HE KOE LOIHI.—Ua poloai mai ko makou makamaka o na Pali Koolau, S.E.K. Papuai, i ka hemo ana o ke koe nui mai ka waha aku o Kaainiu, o ka loihi o ke koe 10 1/2 iniha, 1 iniha ke anapuni o waena, 1/4 iniha ke anapuni o ke poo a me ka hiu, nui io no kena koe. -
                HE HALE HOOPAA LAWEHALA KA MA KANEOHE.— UA lono mai makou, e kukulu ia ana he Hale hoopaa no na mea hewa ma Kaneohe, a o na lako no ia hale, oia na laau kahiko o ka Halewai Hoopaa Lawehala ma Honolulu, ua waewae me na wahi opala maikai iki ae, e hoouka ia ana no Kaneohe. Pomaikai io ia apana, i ka loaa o ko lakou Hale hoopaa i na mea hewa.

LUNA KUKALA HOU.—Ma ka poakolu aku nei o kela pule, ua hoomaka ae o Hon. Samuela G. Waila i ke Kukala ana, mamuli o kona ano hoa hui me E.P. Adamu, o ka mua keia o kona lawelawe ana ma ka Oihana Luna Kukala, a i ko makou lono mai, na eleu kana hana ana, aiwa loa paha a maa lea iho, heaha la ia ka pakika, ua mahaloia kana hana e na haole o keia kulanakauhale.

                Ua loho lauahea wale mai no makou, ua nahunahu ia ka ka manamanalima o kekahi haole hana ma Haiku Maui, e kekahi kanaka Hawaii, a ua palupalu liilii, (heaha iho la la hoi ka hala?) Aole no i lono ia mai ke kumu o keia hana lokoino ana a kela wahi taata, mai kekahi mai o ko makou makamaka Rev. H.H. Pareka e nanea mai la i ka lokua e ka ua ukiukiu o Makawao. -
                PALAPALA NOHEA LA.— Ua lona mai ia makou kekahi palapala nona ke poo i oleloia. "Berita Hoole wai ona," a ua kakauia na inoa o na kanaka he kanaono a keu malalo iho o ua Beriata, ua kanalua nae makou i ka hoolaha aku, no ka mea, aole no i akaka iki ia makou kahi o kona hele ana mai, ua hoomoe loa ia ke poo ma kahi uluna o ke Kuokoa. -
                NO KA POPOKI.—He wahiholoholona maikai loa nei ke hoolaka pono ia, a he ino loa no hoi ma kekahi ano, ke hana kolohe mai. I ka poalima aku nei o kela pule, makai o Apua, ua popoi ae kekahi popoki elima keiki moa, a ua pau loa lakou i ka make aohe koe, akaka no hoi ka olelo.—"Miki ke Owau no ka hemahema," nolaila; ua huhu ke Kahu nana ka popoki a me na moa, a ua liia ka lawehala maluna o ka laau, e ole o Kaulainamoku, pakele ai ke Owau mai make.

HALAWAI A NA UNIHIPILI.—Heaha la ia mea ka Unihipili? Heaha hoi.—Ua lono mai makou, iloko aku nei o na malama i hala, ua halawai pu ae na Unihipili a pau loa, o na wahi Unihipili o keia Mokupuni, ma ke kahawai waokele o Kawailoa-uka i Waialua ae nei, a o ka lakou mau hana i hana'i ma ia uka iuiu, o na hana no ia a ka lapuwale, a he mea hilahila loa ia makou ke hoike aku, no ka mea hoi, aole loa ia he mau hana no ka malamalama, aka, no ka pouli no. -
KA EKE LETA O KEIA MOKUPUNI.—I na makahiki mamua aku nei, aole hiki ae ka Eke Leta ma Waianae, aka, e hele ana no ma na pali Koolau, koe o Waimanalo, a i Waialua, a malaila mai a i Ewa, a hiki hou i ke taona nei, a i keia mau la, ua lono mai makou, ke holo loa nei ka mea Lawe Leta a i ka Apana o Waianae, ina hookahi palapala no ia wahi, hiki no ka mea Lawe ilaila. Pomaikai wale ka hoi oukou e ko Waianae poe, ina o ka pomaikai keia a ko oukou Lunamakaainana i hooikaika ai no oukou i keia kau iho nei, he ma-u pono no ia.

NA KOA O HALEALII.—Ua lono mai makou, ua oi ae ke kulana o na Koa ponoi o ka Moi i keia kau, i ko na kau i hala aku nei, no ka mea hoi, ke hoomakilikili ae nei lakou i ke ano o ka noho ana, a-i ana, a me ka moe ana, e like me ko na haole, aka hoi; hookahi a makou mea i hoowahawaha loa'i i ka lohe ana mai, i ko lakou wa a-i, a me ka moe ana, aohe pule i ke Akua.—E na Koa kiai poo, mikioi ka hui oukou a hoolili lua ma na hana o ke kino, a i ko ka uhane hoi e ola ai, hoopalaleha loa, e lako oukou e pono ai ma na hana maikai he nui.

NA HUA MANAGO.—Ua ike nui ia aku ma kela mau la i aui aku nei, a me keia mau la no hoi e naue nei ma na makeke a ma na pipa alanui no hoi o ke kulanakauhale nei, keia mau hua ono, makena wale, a o kekahi mau hua ai e ae, he kakaikahi loa. Ua ike aku no hoi makou, e kuai ia ana he kanakolu a oi aku a emi mai no ka hapawalu, aka, aole nae pela i ka wa nele loa aku nei, oiai ma na hale pake, eono a he umi i kahi manawa no ka hapawalu. Ola maoli ka poe ono manako i keia mau la, a ke uu hele mai nei na kanaka makua a me na kamalii ma na alanui, ua oki oe i pakelo ana.

KE HAELE NUI NEI I KA LEALEA.— Ua palapala mai nei kekahi makamaka o na Pali Koolau ia makou, D.F. Lalaekalesiaonalamahope, o onei o Hakipuu, ke hele nui nei ka na kaikamahine maka palupalu, na elemakule a me na luahine pu no hoi o keia Apana i ka pepa pili ahi-pele, i ke ao a me ka po e noke nei. Aohe io aku la no paha e ole ana, i loaa ai ona wahi ahi puhipuhi baka. Aloha ino na wahi keiki a me na makua o ia apana. I loa no ka i ke Kahu a kaawale mai nei, o ka hiki mai la no ia o ka lono, "Ke haele nui nei i ka lealea." A no keia leo i pa-e mai, hoomanao ae la makou , kekahi olelo nane kaulana penei: "Ina kaawale ka Popoki mai na Iole ae, e paani no lakou ma kahi ike ole ia." He oiaio na ha keia lohe, aole paha, aka, ina io hoi paha keia lohe, aole paha, aka, ina io hoi pela, alaila, "E na punahele, mai hoomahui i ka hewa, aka, i ka maikai no."
KE AUMEUME NEI NA HOOILINA.—O ka mea nana i hele mai a hai i na Luna o ka Nupepa "Kuokoa." "Ke aumeume nei na Hooilina o kalaikawaha, ua lalau loa, a na wahahee aku no hoi ia kanaka i na Lunahooponopono o ko kakou Kilohana, no ka mea, aole loa no lakou i aumeume e noho nei, aka, o ke keiki mua nae kai olelo aku i ka makua, i kona wa e ola ano, aohe pono kou hooili ana ia makou, i kou mau opala, no ka mea, aohe pono kou mau noonoo i keia manawa, aka, e waiho maile pela, a na ka poe ola na ka hooponopono, a o ka hoolaha ia ana i ko lakou aumeume, ua wahahee maoli ia kanaka, a ua hoino wale hoi ia ohana. Aole no lakou i noho kue e noho nei.

HE POE MAMA AWA I KE ALANUI.—Ia makou e luana iki ana ma ke kihi makai o na huina Alanui Alii, a me Nuuanu, i ka liu la poeleele o ke ahiahi poakolu aku nei, aia hoi, halawai maopopo aku la ko'u mau maka me'kekahi puulu kanaka nui, a me hookahi wahi wahine e nau awa hele ana e ke alanui, ua hele wale na waha a puua ia mea lepo, a kuhi iho la au he mea ai e ae la, i ka hookolo ana'ku mahope, holo mai ana ka hohono, eia ka, he awa no. Ahea la ka kakou ao ae, a haalele aku ia mea kanaka o ka ili, oi loa aku ka pono ke nau hele kakou ma ke alanui i na mea ono, mamu'e o ka nau ana i na mea ino e poino ai ko kakou mau kino. -
I KA POE HAKU MANAO.—He nui wale na palapala i loaa mai ma ko makou mau lima, aohe nae i kiko pono ia, aole no hoi i mahele pono ia na hopuna olelo, aole no i hooponopono ia ke kakau ana, ua hui aku a hui mai, a maopopo ole ka manao. Ke haohao mai nei paha ka poe nana ia mau palapala i ka hoopuka ole ia aku. O ke kumu iho la no ia la, o ke ino o ka oukou hana ana mai Ina he mau manao no ka poe ike ole i ke kakau, he pono no ke hoolimalima aku i ka poe ike, a i ole ia, i kekahi paha o ko oukou mau makamaka ano naauao, a ua lakou no e kakau mai, a kiko pono hoi, i ole ai e luhi wale na keiki kukulu hua a me makou hoi kekahi i ke kakau hou ana i wa oukou ino i hana ai, nolaila, e hoomanao e na makamaka, o ka lohe no ia e hai ia aku la.

S.P. AHIONA O LAHAINA,—Ma ka la Sabati aku nei o kela pule, Augate la 2. ua haiolelo ae ko kakou makamaka o ka malu ulu o Lele, a hua mea loa hoi o ka Lahui Pake i huli mai ma ka pono, ma ka halawai po o Kaumakapili.
O kana Pooolelo, aia ma Iakobo 4:17, O ka mea i ike i ka hana pono, aole nae i hana, he hewa no ia nona. Ua pili kana mau olelo wehewehe i ke pooolelo, a ua mahaloia no hoi e ke anaina holookoa, malaila na Pake o ke kulanakauhale nei, i aneane aku e hiki i ke kanakolu. E huli io paha auanei na Pake ia ia nei, o ka pono no ia. A ma ka la 15 paha o keia malama, alaila, hoomaka oia e kaapuni iwaena o na Pake paahana ma ka Mokupuni o Maui ka mua, mamuli o ka Oihana Misionari Kuloko i haawiia aku e ko kakou Papa Hawaii.

                KA OIHANA KUHINA,—Ma ka holo ana'ku nei o ka mea hanohano, His. Ex. C. Dc Varingny ke Kuhinu o na Aina e i kona aina, nolaila hoi, ua oluolu i ko kakou Moi ka hookohu ana ia ia i Elele, a i Kuhina Kuikawa ma Europa, no ka manawa, a ua waiho aku oia i kana Oihana o ko na Aina e i ka Loio Kuhina ka hooponopono, a o ka Oihana Waiwai hoi, maluna o ke Kuhina Kalaiaina, a hoi mai o His. Ex. C.C. Harris i heo aku nei i Amerika. Mai pono loa no ka hoi ka Oihana Kuhina, i na Kuhina elua, a i ole ia i ka mea hookahi no hoi, a maluna iho o na Kakauolelo, na hana nui o ka hooponopono ana i ka oihana.
                Hele a o ka hana mau nei a na Kuhina o ka Moi, maalahi wale lakou la, noho i Hawaii nei a hala na makahiki elua, momona, ku ae holo ana i ka aina e, a wiwi i ka aina e hoi mai, ua pau na makahiki elua, he ohi wale no i ka puu dala nunui a lakou i hooholo iho nei, akamai maoli, Ka! e waiho aku la ke akamai o ka haole a hea.
                A he wahi Aupuni akamai no hoi nei i ka hoopunahele e hoomoamoa ai i na haole o na aina e, e kapa ana ia lakou iho, he poe aloha aina, a momona, puipui na kino, pea'e no lakou la heo ana, a heaha iho kau. Ahea la kakou Hawaii hookanaka'e, ina'ku ka poe aloha io i ka aina o na Misionari mai Amerika ma,—a, malama iho.

-
Maui.

NA WAI EHA.—He mau aina uliuli like na Wai-eha nei i na lau o na ko. O ka paa no ia mai Waikapu a hiki i Waihee. He poe mahiai na keiki, wahine, a me na kane o keia mau aina. Ke imi nei na keiki i ko lakou mau pono iho iloko o na la hoomaha o na kula. -
NA WAHI PANA O WAIHEE.-I ka Poakahi iho nei, la 27, na pau aku kekahi poe haole malihini o Honolulu mai i ka makaikai mauka o Manoahi, me kekahi mau pua rose o Mauna Olu; a i ko lakou luana ana iho, na haawi lakou he paina liilii, (picnic) malaila. O ka puni no hoi a kamalii o ka mea-ono, oia iho la na wahi mea ai.

KA LA 31 O IULAI MA NA WAI E HA.—Ke liuliu nei na kanaka paahana a pau o na Wai eha nei, e hoomakaukau i mau ahaaina no ka hoomanao ana i ka la ihoihoiia mai ai ko lakou Hae Hawaii, i laweia e ka lima kakauha o Lo Keoki, a hoihoiia mai e ka lima maemae o Adimarala Toma. Pono no ko oukou hoomanao ana, no ka hoihoi houia ana mai o ko oukou kahakahana e kapalili nei, aka, heaha ka hana a ke Aupuni no keia la? He lomaloma haalele me he mea la he makau kakou ke hoomanao.