Ka Nupepa Kuokoa, Volume VII, Number 31, 1 August 1868 — Page 4

KE KUOKOA, HONOLULU, AUGATE 1, 1868.

Ka Nupepa Kuokoa.

Marchin g On.

----- Gol den Censer.

1. Kai a mau, kai a mau, kai mama like nae,
E na kamalii kula, na koa maikai:
Me ka hae o ka ike e kau maluna'e,
Me ka pu kani oli e kai oli ai.

Cho.---Kai a mau, kai a mau, kani oli ae, kani oli ae.
Kai a mau, kai a mau, paio no ka lei, ka lei maikai.
Kai a mau, kai a mau, kani oli ae, kani ole ae,
Kai a mau, kai a mau, paio no ka lei, ka lei maikai.

2. Kikoo mau, kikoo mau, kikoo like no nae,
Me ka iini nui e naauao ae,
Me na leo paipai o ka poe makaikai,
Me na hae kuhi imua e kai oli ai.

Cho.— Kai a mau, kai a mau, &c.

3. Paio mau, paio mau ma ka hoonaauao.
Me ka pale koa'e i ka Diabolo,
Me ke lii, naaupo, ke alii hoolalau
A me ona mau koa, na ino a pau.

Cho.—Kai a mau, kai a mau, &c.

4. Mele mau, mele mau, mele like no nae,
Ma na kula Sabati, na kula e ae,
Me na leo maikai e hoonani mau ai
I ke Lii o ka lani, ke Lii e ola'i.

Cho.— Kaia mau, kai a mau, kani oli ae, kani oli ae.
Kai a mau, kai a mau, paio no ka lei, ka lei maikai, &c.

HAWAII.

No na olelo a Lanikaula.

[Koena manao ]

Ke olelo mai nei oe, o ka ae ia ana o keia Kanawai, oia ka ka mea emi ai o ka paa paina i na dala ewalu, ke hoomanao nei au i na olelo a ka Loio Kuhina imua a ka Ahaolelo Kuikawa, wahi ana, "aia a ae ia keia Kuikahi Punailike, alaila, emi ke kumukuai o ka-lole a me na mea like e ae," a i kau hoi, aia a haawi aku ko kakou aupuni i na he kanalima tausani. (50 000) a me ka waiho hoaie mai o ua poe la ia kakou i ua puu dala nui la no na mahahiki he 25, a ma keia hana, ua oi aku ka ukupanee mamua o ke kumupaa; a pehea oe i ike ai i ka makepono o ka lolo ma ka lilo nui ana aku o ke dala? A owai hoi o olua me ka Loio Kuhina ka i pololei ma keia olelo hookahi no ka emi ana o ka lole? O oe anei a oi ala paha. Ua manao au, ua pololei maoli ko ka Loio Kuhina wehewehe ana ma na mea e pili ana i ua Kuikahi la, a he alanui io paha ia o ka emi ana, a he ano akaka hoi, aka, o kau mau wehewehe, aole ia i hoomalamalama ia makou a me na makaainana nana oe i koho.
     Ua hoopili kuhihewa oe i ka olelo a ke Kahuna, "E hoolei i kau barena maluna o na wai a hala na la he umi, a loaa hou mai no ia ia oe." Ua pili keia ma ke kokua ana i ka poe nele maoli, a i manawalea ia hoi me ka manao pono ohumu ole; a pehea keia? he poe nele io anei ka Hui nona keia mau Mokumahu ? Aole, he poe waiwai loa keia i oi aku mamua o ko kakou loaa aupuni, he eha haneri tausani ko kakou, a he umi miliona ko lakou la; ua kupono anei kakou ke kokua aku ia lakou la me ko kakou ike aku ua nui aku ko lakou la mamua o ko kakou? ua ko anei na dala i oleloia e keia Kanawai, a me ka ukupanee aku me ke Kuikahi o kakou a pau ? Aole loa. Ua ko anei me ke Kuikahi like o ka hapanui o ka lahuikanaka? Aole no. He oiaio keia olelo ia ana mai, "o ka leo o na kanaka, oia ka leo o ke Akua." O keia hoohalike au, ua like ole, a ka mea pono wale no ia oe, o ko moni hou aku.
     Aole a'u olelo "ua pupule ka Moi a me kona Aha Kuhina," a mai manao oe, he hiki ia'u ke olelo aku i ka olelo ino ia hai; a pehea la hoi e hiki ai ia'u ke olelo pela i ko kakou imi-hale i koe, oia ka Moopuna hookahi i koe a Kamehameha. Ua ike au, ua oi aku ka maikai o ka wehewehe ana a na Kuhina no keia Kanawai mamua o kau; a oia wehewehe ana nae, aole no ia i hoohuli i ko makou manao minamina dala, a makee aina a me ke aloha Alii e hooholo aku ai i keia Kanawai. Ua hoole makou me ka manao kuokoa hookamani ole, no ka mea, ma keia hoole ana a makou, a ina o makou ka hapanui iloko o ka Ahaolelo, a make keia Kanawai, aole no e lilo aku he puu dala nui ia hai, aole no hoi e ulu ana he wahi manao hookau mai o ka lia ia kakou no kekahi mea e hoohopohopo ai, aole no hoi e ku iho ko kakou aupuni iluna o ka waha o ka upiki e hamama ae ana malalo, aole no hoi he wahi noonoo ana ae, a olelo ae, he pilikia e kakali mai ana ia kakou.
     Ua olelo oe, ua pili ole kuu hoohalike ana no kahi paa kamaa hookahi. Ua kupaa loa au ia hoohalike ana me ko kakou aupuni; o ke kanaka e haawi ana ia hai i kahi mea i kupono nona wale no, he uhauha ia, a he hoomaunauna wale kona ano; ua like oukou pela ka poe i ae wale i keia hoolilo nui ana me na kumu akaka ole o ka pomaikai o kakou ma keia Kanawai; a o ka oukou haawi ana i keia puu dala nui no ka pomaikai o hai, he hoomaunauna ia a me ka uhauha wale. I ka hoohalike ana i ko kakou aupuni a me kona loaa, ua kupono ia mau loaa nona wale no, a o kona mau hemahema wale no kana e hana ai, a e hoolako ai iaia iho. Pehea oe i ka makua mea ohana, ina ua hoolako oia i ko hai hemahema me ka hoopau ole i ka hemahema o kona ohana iho? Aole anei ou manao he kanaka aloha ole ia i kana mau keiki, a i kana wahine paha ? ua ane like oukou pela. Ina oe he kanaka e kaahele ana ma ko kakou mau mokupuni, a e ike auanei oe i ka waiho me ke ino o na alanui, na alahaka, na alapali, na muliwai, na palekai, aole i lawa pau ia mau mea i ka hoomaikai ia. Ua maikai kekahi a ua ino kekahi. Ua lohe kaua oiai kaua e nonoho ana i na ka Ahaolelo, oia ke noi nui a kakou ma na palapala hoopii a me na olelo hooholo, i puu dala no na alanui, na alahaka, na alapali, na uapo, na mouo, na halehookolokolo a me na hemahema kuloko a pau. Ua haawi kakou no kekahi hemahema, a ua koe kekahi, a ina la hoi e hoihoi kakou i keia puu dala nui no keia hemahema o kakou, ina la ua pono loa, nolaila, ua kupono loa keia hoohalike, a he hoole manawaino wale iho no nau ka like ole.
     He kuhihewa oe ke olelo iho ia oe iho, a ia oukou paha he poe aloha aina oukou; o ko oukou aloha iho la anei ia o ke kapulu i ko kakou aina e waiho ino ai, a e haawi aku i keia puu dala nui no ko hai pono.
     Ke olelo nei oe. "O ka ae ana i keia mea he mokuahi, oia ke ki e wehe ai i ka pomaikai kalepa o kakou." Ke manao nei anei oe, ma ka la i hooponoia ai keia Kanawai, akahi no a hoomakaia ka oihana kalepa i o kakou nei? a akahi no a pomaikai ae la kakou? Ike lea au i kou kuhihewa a me ka auwana wale o kou manao; a ma kahi hea la o kou kino i puka mai ai keia ano manao poeleele. He maa umi makahiki i hala ae nei o ka waiho hamama ana o ko kakou aina no ka oihana kalepa, ua pae kahiko mai na waiwai kalepa o na aina e i o kakou nei, a ua komo aku hoi ko kakou i o lakou la. E nana i na halekuai, piha pono na kulanakauhale kaulana o kakou, a ua komo mai hoi ma na kuaaina nei; a o ke kalepa hea kau e olelo nei, aia a ae ia ka mokuahi, alaila, ua hemo ae la ke ki o ke kalepa ana. Ke olelo leo nui aku nei au ia oe, ua lako oe a me kou ohana i na paalole komo, a lole aahu mai ka poe kalepa mai, ua hoouhiia oe i na paalole kane o na keonimana ano Europa, a pela hoi na wahine; a me kou ike ana ia oe iho ua lako, pela oe e nana aku ai ia hai, mai ka mea e noho ana i ka NOHO ALII a hiki i ka lopa kuakea. E ike nae oe, aole na ua Laina Mokuahi nei ia mau paalole, a apalole o kela ano keia ano a kakou e olelo nei, ua lako kakou, a ua kuonoono; ua nani kakou a ua hanohano. O na mokupea ka mea nana i wehe mua i ka poho kalepa i o kakou nei, a he poe ia nana i lawe mua mai i na waiwai o waho no kakou, a ua nui wale na waiwai o kakou i kuapo aku me lakou no na pomaikai a lakou i haawi mai ai. Mamua aku o ka hoomaka ana o ke kaua nui o Amerika Huipuia, ua makepono na waiwai Kahiki i kuai mai ai me kakou, a me he mea la o ua kaua la ka mea nana i hoopii ae i ke kumukuai o ka lole, a ke olelo nei nae oe, aia a ae ia ka Laina Mokuahi, alaila ka emi, aohe pilikia o kakou no ka ae ia ana o ka laina mokuahi, no ka mea, ua hamama no ko kakou mau awa komo no lakou ke manao lakou e holo mai ma ko kakou mau kai, aka, o ka mea nui e kamailio ia nei, o ka uku aku me ke dala no ko lakou holo ana mai, oia ka pono ole.
     Ua hilinai nui oe no ko ka Moi apono ana i keia Kanawai, a ua lilo paha ia i Opuupuakala nui no ua o Kaululaau e haupeepee ai, aole e pono ia oe e hoopili ilaila no ko kaua kamakamailio ana, o kou ike ponoi i ka pono o kou aoao i koho ai, a e hoike mai oe i kau pono, a e pale hoi i ka'u me na olelo akaka, a pela paha ka hana a ka poe paio manao e hana nei, aole nae oe pela e paio nei no ka'u mau olelo i hoopuka ia e ke Kuokoa, aka, ua kii aku oe i ko ka Moi apono ana i keia Kanawai, i kumu pale mai nau i ka'u olelo, i hookomo mai oe i keia mau olelo kohu ole, "ua hoole makou i ka ke Alii," he poe enemi makou i ke Aupuni a me ka Moi, a pela aku. Me kou ano naauao io anei oe i hookomo ai i keia mau olelo e pani mai ai ia'u ? Aole anei e haanui ana oe ia makou, e lilo makou i poe hoinoia, a e manaoio ia mai ai he poe kue Moi makou ? He nele manao paha nou i komo koke ae ai oe iloko o ko ka Moi apono ana, i lilo ia i wahi, puuhonua nou e malumalu ai. O ko ka Moi apono ana paha, ua apono ia no na kumu maopopo iaia, malia he nui loa ka wa o ko lakou kuka ana a ua ike lakou he ane pono, a malaila kona koho ana aka, aole nae paha i like me kau mau wahi kukui o-a ka io ole. He menemene no hoi au i kou kii aku ia hoapono ana a ka Moi i wahi nou e paio mai ai, a ua manao paha oe o kau wahi wehewehe iho la ia e akaka ai, ua naauao kou wehewehe ana i keia Kanawai. He akaka lea oe ma ko'u koho aku, ua kauo ia oe me he kaa la mahope o ka hoki kauo, a me he moku la i hoohuliia e ka hoeuli, no ka mea, ua pili wale kou kamailio ana a me kou koho ana.
     Ma ka nana ana i kau mau olelo e Hon. C. K. Lanikaula mai ka mua a i ka hope, me he eke la ua piha i ka welu, a me he puu opala la i inaina ke ahi.
     Aole keia mau wehewehe au he mea e hiki ai i ka lehulehu ke olelo aku, ua koho oe me ke ano hoopololei a hoopono hoi. Me ke aloha no. G. W. P.
     Kona Akau, Iulai 15, 1868.

KE KAA NUI LAWE KANAKA.— Ua pale hoi ka ike mau ia o Kekaiea i keia mau la ma na alanui o ke kaona nei, a ke haohao nei ka poe i ike mau iaia, aohe no makou i lono mai i ke kumu o kona hapakue ana i keia mau la, aka, he lio ole paha nana e huki i ua o Kekaiea.

He wahi moolelo pokole o ka Oihana
Mi sionari ma ko Nuuhiwa Pae
Aina : e Rev. L. Kamika.

Ua hoomakaia keia oihana i ka makahiki 1863 e ka Ahahui Mi sionari Hawaii, no ke noi ana mai o Makuunui, kekahi alii no Fatuiva.
     E lua Kahu Ekale sia, a elua Kumukula, me ka lakou mau wahine ka i hoounaia i kinohi, oia hoi o Rev. J. Kekela me kana wahine, Rev. S. Kauwealoha me kana wahine, J. W. Kaiwi me kana wahine, a me L. Kuihelani me kana wahine.
     Ua hele pu me lakou kekahi haole o Mr. J. Bikanele, he kamana no ia, ua manao oia e kokua aloha ia lakou ke loaa ka hana kupono ia ia.
     O Rev. B. W. Pa reka ka elele i hele pu, a kokua ia lakou e hoomaka i ka noho ana, a me ka hana ana iwaena o kela poe naaupo. Ua hoolimalima ia ka moku Beritania kia elua o "Royalist" kona inoa, Kapena Harris, no na dala elua tausani e lawe i ua mau Misionari la, a me ko lakou ola makahiki i Fatuiva, a maopopo ko lakou noho ana ilaila, alaila, e hoi hou mai i ka elele i Honolulu nei.
     Ua holo aku lakou i ka la 16 o Iune, (via Tahaiti) a ua hiki aku i Fatuiva i ka la 26 o Augate, elua malama a me ua la keia he umi i ka holo ana ilaila.
     Ua hoonoho pu ia lakou a pau ma Oomoa ma ka aina o Matuunui, a ua noho pu lakou malaila i na makahiki ekolu a keu ae. Ua ao lakou i ko laila olelo. A ua hoomaka hoi lakou e ao aku i na kanaka i ka olelo a ke Akua, a ua malama hoi i na halawai Sabati.
                I ka makahiki 1856, ua hoolimalimaia ka moku "Keoni Ana" (40 tona) Kapena Tebar e lawe i ke ola makahiki i o lakou la, o Rev. L. Kamika ka elele. He 36 na la e holo ana i Fatuiva, ua ku ka moku ilaila i na la he umi, a i ka hoi ana mai he 14 na la. Elua kanaka ka i komo iloko o ka Ekalesia ma Oomoa ia wa, a i ka malama o Augate ua make ka wahine a L. Kuaihelani.
     I ka makahiki 1857, o ka moku "Hoku Ao," Kapena Moa ka i lawe i ko lakou ola makahiki i o lakou ia. Rev. J. S. Emesona ka elele. Ua hele ia wa o Rev. A. Kaukau me kana wahine e huipu me ka poe paahana. O Namakeha kekahi alii me kana wahine, a me ka laua kauwa, a me J. E. Kamalani (Chamberlain Esq.,) oia ka poe i hele ohua.
     Iloko o ko lakou halawai ma Hanahi, ua hookahunaia o J. W. Kaiwi e hai aku i ka olelo a ke Akua. Hookahi kanaka ka i komo i ka Ekalesia ia wa.
     I ka hoi ana mai o "Hoku Ao," o Mr. Bikanele laua o Kuaihelani ka i hoi mai. I keia launa ana ma Honolulu nei, ua hookahunaia o Mr. Bikanele a lilo oia he lala maoli no ka Ahahui Misionari Hawaii.
     I ka makahiki 1868, o ka "Hoku Ao," Kapena Johnson ka i holo aku, a he 40 ko lakou mau la a hiki i Fatuiva. O Rev. A. Bihopa ka elele, oia ka wa i hele hou ai o Rev. J. Bicknell laua o L. Kuaihelani me kana wahine hou. Ua hele hoi o Paulo Kapohaku a me L. Kaiwi, a me ka laua mau wahine e hui me na Misionari ma kela Pae Aina. Elima kanaka ka i komo iloko o ka Ekalesia ma Oomoa.
     A hoi mai ka moku, o Rev. James Kekela a me kana keikikane, o Hunnewell ka i holo ohua mai.
     I ka makahiki 1859, o ka "Hoku Ao," Kapena Brown ka i holo aku. No ka hele hou ana o Rev. Kekela, nolaila, aole elele okoa i keia makahiki.
     A hiki aku lakou i Oomoa, ua lohe o Kapena Brown ua ili ka moku okohola "Twilight" kona inoa, Kapena Hathaway ma Hanamenu. Nolaila, holo koke aku oia ilaila e kokua i ka poe pilikia. He 81 na la o keia holo ana aku a hoi hou mai i Honolulu nei.
     I ka makahiki 1860, i ka la 28 o Feberuari ka holo ana aku o "Hoku Ao," Kapena Brown a hiki aku i Tahuaka i na la he 24. Rev. T. Koana ka elele. Ua launa aku o Mr. Koana i kahi o na Misionari ma Tahuaka, ma Hivaoa a me Fatuiva. O ko lakou halawai makahiki, aia no ia ma Hanaiapa. Elua mea ka i huipu me ka Ekalesia ma Puamau i keia makahiki. He 77 na la o "Hoku Ao" i kona hole ana aku a hoi mai i keia makahiki.
     I ka makahiki 1861, eia ka lima o ka holo ana aku o "Hoku Ao," a o C. W. Gillett ke Kapena, a o Kauka Kulika ka elele. Oia ka wa i holo aku ai o Z. Hapuku me kana wahine e huipu me kolaila poe Misionari. Elima kanaka ka i komo iloko o ka Ekalesia ma Oomoa i keia halawai makahiki.
     Ua kahea ka Ahahui Misionari Hawaii ia Paulo Kapohaku e hoi mai i keia wa no kona pilikia makapo, a hiki ole iaia ke hele i o a ianei maluna o kolaila mau pali. A ua hoi mai no laua me kana wahine. O Rev. James Bicknell kekahi i hoi mai i keia wa. Aole liuliu, a ua palapala mai oia, e noi ana i ka Ahahui Misiona ri e hookuu iaia mai keia oihana aku. A ua hookuu ia no e ka Ahahui.
     I ka makahiki 1862, eia ke ano o ka holo ana o ka "Hoku Ao" i ko Nuuhiva Pae Aina, o C. W. Gillett ke Kapena, a o Rev. D. Balauina ka elele. O G. W. Laioha me kana wahine ka i hele e huipu me na Misionari i ka lakou oihana. Hookahi kanaka i huipu me ka Ekalesia i keia wa.
     Ua kaheaia o L. Kaiwi e hoi mai, no ka mea, ua haalele kana wahine iaia a me ka laua mau keiki. Ua kaheaia hoi o Rev. L. Kuaihelani e hoi mai, no ka mea, ua hemahema oia ma ka oihana Mi sionari.
     I ka makahiki 1863, i keia wa, ua hoolimaima ka Papa Hawaii i ka moku kialua "Manuokawai." Kapena Bent e lawe i ke ola makahiki i o lakou la, a o Re v. B. W. Pareka ka elele. He 45 na la o ua moku la i kona holo ana mai Honolulu nei aku a i Uapou.
     I keia makahiki, 1,000 kanaka ka i pau i ka make i ka mai puupuu liilii ma Nuuhi va;

a 500 hoi ma Uapou.
     Ua kukakuka pu ka elele me na Mi sionari, a ua hooholoia ka manao, aia a hiki mai ka makahiki 1868, alaila, e lawe hou i ke ola makahiki i o lakou la.
     I ka makahiki 1865, o ka "Hoku Ao" Kapena James ka i holo i keia wa. Ka Mea Hanohano Ioane Ii ka elele. He 30 na la a hiki i Uapou. O Rev. J. Bicknell ka i hele ohua, a i kona hoi ana mai, ua lawe mai oia i na kanaka Nuuhiva he iwakalua, me ka manao e ao aku ia lakou i ka pono o Iesu Kristo; i makaukau auanei lakou e hoi hou i ko lakou aina hanau, e ao aku i ko lakou poe kanaka i ke ola ma o Iesu Kristo ia.
     I ka makahiki 1867, o ka "Hoku Ao Hou" Kapena Binamu ka i lawe i ko lakou ola makahiki. Rev. T. Koana laua o Rev. B. W. Pareka na elele. Miss C. P. Pareka, Miss M. O. Kekela, Mr. B. H. Nagle a me na kanaka Nuuhiva eiwa, oia ka poe ohua. He 35 na la a hiki i Uapou, a he 24 na la o ka launa ana me na Misionari ma kela Pae Aina.
     I keia wa, ua hookahunaia o Mr. Z. Hapuku; eha Ekale sia hou ua hoomakaia, kekahi ma Hanavave me na kanaka elua, kekahi ma Atuono me na kanaka ekolu, kekahi ma Hanamenu me na kanaka he umi, a o kekahi hoi Hakatu me na kanaka ewalu.
     Ehiku ka poe i huipu me ka Ekale sia ma Puamau, a he umikumamawalu ka i huipu me ko Oomoa Ekalesia. O ka huina pau loa i komo iloko o keia mau Ekalesia mai kinohi mai he 62 ;—a elima o lakou ua pau i ka make, koe 57 e ola ana me ka hihia ole.
     I ka makahiki 1868, o ka "Hoku Ao Hou," Kapena Adolph Tengstrom, a o Rev. L. Kamika ka elele. Ua holo mai Honolulu

aku nei i ka 26 o Maraki, a ua hiki i Ua pou i ka la 1 o Mei, he 36 na la. O Samuela Kapaha he kanaka no Nuuhiva ua hele ohua.
     Eia kekahi mau hoailona o ka ulu ana o ka pono ma ko Nuuhiva Pae Aina, i keia makahiki i hala ae, eono na luakini hou i kukuluia, a o ke kokua aloha mai o kanaka, ua like ia me na dala hookahi hane ri me kanakolu. ($130)
     He kanalima na kanaka i bapetizoia, a huipu me na Ekalesia. O ka huina pau loa i keia wa mai ka hookumu ana mai he 112. Eono o lakou ua pau i ka make, a ehiku ua kapae ia, koe 99 e ola ana me ka hihia ole.
     No ka nawaliwali o Rev. J. W. Kaiwi, ua hoi mai oia e lapaau, a e hoomaha i hookahi makahiki.
     He umikumamakahi la me ka hapalua o ka la o "Hoku Ao Hou" i kona holo ana mai mai Uapou mai a hiki i Honolulu nei.

He Kanikau Aloha keia nou e Kiope

Puawahie Kapule.

He kanikau aloha keia nou e Kiope Puawahie,
Kuu wahine i ka wa pokeo o ka wa kamalii.
Mai ka nohona Opiopio o ka wa naaupo loa e!
Kuu wahine i ka waihuihui anuanu o Kalepolepo,
Mai ka lai hulilua la o Kamano nei la,
Kuu wahine i ka ia anuanu o Huainiu e!
Mai ka wai au anuanu huihui maeele o Waiakea,
Kuu wahine i ka ua haaheo mai iluna o ka Ulu.
Kaumaha luuluu kuu kino e noho nei ia oe la e!
Haalele mai nei oe ia'u i ka hoa pili ke kane aloha.
Hele hookahi aku la oe i ke ala hoi ole mai,
Noho hookahi hoi au i keia ao pau wale,
Hookahi kokoolua o ke kaikamahine a kaua ;
Kuu wahine i ke One haaheo o Waiolama e !
Ke malama nei au i kou aloha aole e pau ;
E hoonalonalo iho ana aole e nalo,
E hoonana ae ana i ke aloha o kuu hoa aole e na.
Me he ahi'la no Kilauea ke aloha e noho ia nei.
Ka maeele lua ia i kuu nui kino e!
E lohi apa nei la i kuu manao,
He manao ka ke aloha o kuu wahine ke hiki mai.
A hiki mai no kou aloha e uwe ko au e! kuu wahine;
Aohe wahi aloha ole a'u e noho nei la,
He aloha ka noho ana o ke kane me ka wahine,
I ka hooponopono ana i na mea o ke kino o ka noho ana,
Auwe kuu wahine e! Kuu wahine hoi e!!
Kuu wahine i ka uluniu o Mokuola e.
Mai ka ia haaheo la ma ka moana,
Ke hukiku mai la la i ka ilikai o Hiloone, aloha wale,
Kuu wahine i ke one loa o Punahoa e!
Aloha ia one a kaua e hoolai ai maluna o ka lio,
Kuu wahine o ke ahiahi Poaono o ke kaona e,
Mai ka Pele kuilua la o Haili;
Mai ka Piana kani hone la i ka iuiu,
Kuu wahine i ka uka anuanu nahelehele o Kumukukui e,
Oia wahi a kaua i alo ai i ka haukololio o ke aumoe.
Kuu wahine leilehua o Mokaulele e!
Ke hoopulu ia ae la e ka ua liilii o Makahuna,
Huna na maka o kuu hoa la nalowale loa ;
Pau ka pili ana o ke kane me ka wahine aloha,
Ua haalele mai nei oe ia'u me ke keiki a kaua,
O kau mea nui no ia o ke haikamahine aloha;
He hoku haule ole ia nau i ka wa e ola ana oe;
Kuu wahine i ke kula loa o Puainako e! kou hoa;
Kuu wahine i ka ohia loloa o Honokowailani,
Mai ka ua noe halii mai i ka nahele e,
Kuu hoapili o ka aina ua nui o Hilo nei;
Mai ka ua aweawe lua la ma ka moana,
Mai ka ua nihi hele ae makai o Leleiwi e,
Kuu wahine i Kauakanilehua o Panaewa,
Ke lei haaheo mai la i ka liko o ka Lehua,
Auwe kuu wahine e! kua hoapili o ka aina e!!
Kuu wahine i ka Iliilinehe o Paki e, kuu wahine,
Kuu wahine i ka pahoehoe lehuaula o Hope e,
Aloha o Malio i ka papalohi o Maukele,
Hele ka Uhane o kuu wahine la hele hoi ole mai;
Haalele ka uhane i ka hoapili o ke kino la e,
Aloha ke kino ka hale e noho ai ka uhane o kuu wahine,
Kuu wahine i na puu o Pele i Honolulu e,
A ka lae o Kookoolau pau ka ike ana ia Hiloone,
Kuu wahine, ka ululehua o Kuaokala e, kuu hoapili,
Kuu wahine aloha i ka uluniu o Keahialaka,
Kuu wahine i ka pahoehoe o Malama e!
Kuu wahine i ka lai hulilua o Opihikao,
Kuu wahine i ke ana-wai pouli ke komo e, kuu wahine.
Kuu wahine i ka niu-moe o Kalapana e kuu hoapili;
Aloha ia'u na wahi a kaua i hele pu ai,
Aloha o—e, aloha no hoi au ke kane aloha e,
Kuu wahine i ka pali o Piikea e, kuu wahine aloha.
Kuu wahine i ka papa kahulihuli o Wailuku e.
Mai na Lehua lei la o Mokupane,
Mai ka wai au la o Waimalino,
Kuu wahine i ka piina ikiiki la e Amauulu,
Mai ka uka anuanu la o Puueo,
Kuu wahine i ka ai lauoho loloa o kanahele e!
Ola kaua i ka ai uahi ole a ka haole,
Kuu wahine i kahi ai uuku me kahi ia uuku e!
Auwe kuu wahine e! kuu hoa hele hoi e!!
Aole oe he wahine he hoa make no kahi e hele ai.
Kuu wahine i ke kai hanupanupa o ka moana,
Mai na ale hulilua la o Alenuihaha,
Hopohopo mai kaua kupilikii ka manao e ;
Kahulihuli ka ale o Pailolo i ka wa ino,
Aloha ia'u ke kai o Mamala oia moana a kaua i holo ai,
Kuu wahine i ka Pelekani Boy i Waialua,
Kuu wahine i ka u i kukala hale o Honolulu,
Kuu wahine i ka ia mililima o Ulakoheo e,

Mai ka huikau lua la e na kanaka,
Kuu wahine i ke alanui kikeekee o ke kaona,
Mai ka Pele kuilua la o Kaukeano,
Mai ka wati hai manawa la e Kawaiahao,
Kuu wahine i ka hale imi ola o ka Moiwahine,
Oia wahi a kaua i noho ai aloha wale,
Kuu wahine i ka uka anuanu o Nuuanu e!
Mai ka la hiki anuanu ae maluna o Konahuanui,
Mai ka Ohu paapu mai la i ke kuahiwi,
Kuu wahine i ka waihuihui o Waihi e.
Kuu wahine i ka malu laukoa o Kolowalu e!
Mai ka piina ikiiki la e Kahaukomo,
Hoomaha aku kaua i ka nuku o Nuuanu,
Huli aku nana i ke koa mokumoku o Heeia,
Kuu wahine i ka hala lei o Kekele e!
Mai ke Kaweluholu o Lanihuli la i Kamakani,
Kuu wahine i ka waihuihui o Waikahalulu,
Kuu wahine i ka pukuilua la o Puoina,
Mai na la nui ia o ke Aupuni Hawaii,
Kuu wahine holoholopo o ke ahiahi o Honolulu,
Mai ka hale hulahula la o Keopu aloha wale,
Kuu wahine aloha i ka lai o Kaakopua,
Oia wahi a kaua i noho ai me ke aloha,
Auwe kuu wahine e! kuu hoamake hoi e!!
J. W. K. WAHINEOLE K. Kalepolepo, Hilo, Iulai 14, 1868.

Ke kaua ana, a me ka hoopio ia ana
o Ma gedala, Ahusinia.

[Mai ka Nupepa Uniona mai o Sakaramo to.]
HELU 2.

I ka lohe ana o ka Alihikaua Nui o na Pelekane

i ka leo o ka pu mai luna mai o ka puu, hoomaopopo iho la ia, aole no i holo aku o Teodoa—a me kona mau waiwai a pau i Goiama e like me ka mea i loheia mai ; holo ae la hoi oia ia manawa a hiki i kahi o na pu kuniahi kila i hookahua pono iho ai, a haawi ae la i ke kauoha i na puali pukaa mauna * * e ki koke aku i na pu, a ua hoomaka koke ia ka hoolele ana i na poka poha me ka hoomaha ole no na ho ra eha : oia hoi, mai ka hora ekahi mai o ka auwina la a hiki i ka hora elima o ke ahiahi, a ia hora no i kauoha ia ae ai na koa e pii aku iluna o ka puu malalo o ka malu pohina o ka uahi pu.
     O ka Puali 33 o na poe Europa ka hikimua o ke alakai ana i ha koa, a he mau poe pokaa uuka wale no kai pii pu aku me lakou i mea nana e wawahi i na puka pa o ka Pakaua. O keia poe puali koa, me he hunalele la ia o ke kaua i hoounaia aku no ka makolukolu o ka poe kaua o luna mai o ka puu, a ua hoomau aku no hoi lakou i ke ki poka ana me he paka la no ka ua, i na maka uhekeheke o ka poe Abusinia. Ke noke mau nei no na kuniahi, na poka hoopoha, a me na ahi kao welo i ka lakou hana me ka pinapinai launa ole, a ua uhiia iho la ka piko holookoa a pau o Magedala e ka uahi o na poka poha i hoolei ia aku iloko. I ko lakou hiki ana aku ma ke kumu o Magedala, ehiku mau pu kuniahi i ikeia e waiho ana malaila ua lawe ia ae la mahope mai o lakou, oiai hoi, wahi ae la ua Puali 33 nei i eono kolamu, a pii aku la me ke kuihe ole o ka manao. I ko lakou ike ia ana mai mawaho mai o ka puka pa o waho loa o Magedala, a o ka hapalua hoi ia wahi o ke kiekie o ka puu—kipu nui mai la na Abusinia ia lakou mahope mai o na puu ahua pohaku, a me na pa laalaau i hanaia i wahi e hoomalu ai i ka pa-kaua. Ia wa i hoomaka hou ai ka Puali 33 i ke kipu, me ka hikiwawe loa i na pu kaupoohiwi a Sinidera i hana ai; a i ka nana mai a ka poe maluna o Salanagini me he mea la he 10,000 kanaka ka nui o ua poe Puali 33 la e hoolale ana i na ai a ka make, oiai he 709 wale no ko lakou nui. Iloko o na minute he umikumamalima o ke kipu ana aole kekahi Abusinia hookahi i koe e ola ana, o ka poe nana e malama ana i ka puka pa.
     He mea kahaha loa ia ia Teodoa ka ike ana mai'i keia poe 700 i puukiuki ia a kahi hookahi, aohe ka he wahi mea hookahi i make o lakou. I ka loaa ana o Teodoa i ka eha ma ka wawae hema, hoi aku la oia iluna a mahope o ka puu mauu maloo kona wahi i hoomaha iho ai, a oia ka wa i naha ai o ka puka pa o waho i na Ailiki a o ka lalama koke ia aku la no ia o ka puu a hiki ana i ka puka pa o loko aku. He puka pa ikaika ia, me ke pani laau paa i kukulu ia mawaena o ua ohuku pali nui elua, a o ke ano i ka nana aku me he pali pa pohaku la, a he iwakalua hoi mau haole Europa maloko mai nana e hoopaa, a e kiai i ua puka-pa nei. I ka nana aku o keia wahi wale no kahi e hiki ai ke komo iloko o ke kulanakauhale i kukuluia ma ke kiekiena, aka, he mea liilii wale iho la no ia i na Ailiki ohelo wale ia aku la no na wahi hakahaka a me na pukapuka liilii o ka puka pa me na elau o ka pume me ka huro, hu za ana, a komo aku la ka waha o ka pu iloko ki ia aku la me na poka ma na wahi a pau e hiki ana ke ki aku. Wahi ia aku la ka puka pu me na pu a pau iho la i ka nahaha, a o ka pinana ia ae la no ia, a lele ana iloko o ka pa, me he poe tiga la iloko o Magedala, e okioki aua i ua Abusinia me ke ku paila o ua mea he make.
     I ka ike ana o Teodoa, e hookokoke mai ana kona hopena, i ae la ia. "Aohe o'u makau no na poka poha, aka, o keia poe ki-pololei aole e hiki ia'u ke ku imua o lakou," hoo ae la oia i kana pu panapana iloko o kona waha, a me ia mea i hoopuehu ae ai oia i kona lolo. A i ka manawa i kukulu iho ai ka Puali 33 lanakila i ka hae o Beritania, e kowelo ae maluna o na pa pohaku o Badajo a ma na wahi kiekie hoi o Salavera, hooae la lakou i ko lakou mau leo, me ka huro loihi ana, a huro like mai la me na kaoo koa e pii mai la i ke kumu o ka puu, a hiki loa aku i ke kahua i hoomoana ai lakou, elua mile ka loihi mai luna mai o ka puu a hiki ilaila, kui aku la hoi ka wawalo o ka leo a puni na puu o Salanagini, Fala, a me Selase,

a i ka ike ana mai o ka poe Gala oiai lakou e pii mai ana e hao wale i na waiwai o Magedala kaulana kahiko, luliluli iho la ko lakou mau poo a hoi wikiwiki aku la i na wahi poopoo nalowale o lakou ma na puu malalo aku. O ka huro mua loa ia ana no o ka hae Belekane ma ke Kahua Kaua koko o Watulu, a oia no ka lua ma ka puu kaua o Magedala.
     I keia manawa no, ike ia aku la na koa Ailiki e holo maki kuku ana, me na poo i hoalu iki ia iho malalo o na elau o na pu iwaena o na alanui ololi a pau o Magedala, me ka hooweliweli ia o na mea a pau e ko lakou mau hiohiona hae, a me ka wiwo ole. Pau iho la na wahine i ka moe ilalo o ka lepo, a makau hoi na kamalii pee aku la iloko o ka poli o ko lakou mau makuahine ; a o na poe koa keia, na poe koa lanakila maluna o na Ferinehe i ka wa mamua, kulou haahaa mai la lakou imua o na poe koa lanakila o ka puu kaua o Magedala. He ma-u wahi hoohanohano iho la ia i haawi ia mai i na koa lanakila he mea i loaa kakaikahi i kekahi poe uuku wale no mamua. E pili ana i kahi o ka puu mauu maloo kahi i waiho ai o ke kino o Negasa, Nui Teodoa, ka Emepera, o A binia, aohe hanu i koe ua hai ka wawae.
     Pela ke kaua ana a hiki i ka hopena o Ka Moi Teodoa, e like me ke kaua ana o ke koa io, aia no a pau ke ola, alaila pio iho la. Hooponopono ae la na koa i kona kino make a hoouku ino aku la maluna o kekahi kua laau. Opi mai la i kona mau lima maluna o kona umauma, a hoomohala pono aku la hoi i na wawae, ku po-e ae la lakou a puni kona kino make ana i hana ino ai. He haawina io no keia no na 'lii hanaino e hiki ai i na koa punihaniha ke olelo hookiekie ae imua o ko lakou alo, oiai hoi, hookahi wahi koa puliki ulaula Pelekane i hoopuka ae he mau wahi lalani olelo nuku pokole o ka olelo Latina, e kohu ai no ke palapala ia iho maluna o kona pohaku hoomanao, penei; "Si c semper tyrannis " pela e make ai na 'lii hanaino.
     He lole aahu ano haekaeka kona kapa, me ka palule keokeo, a he lole wawae no hoi. Aohe wahi mea ai iki o loko o kona opu, ua kua-i ia ae a ike ia ka nele maoli no, kakau okoa mai no hoi na iwi aoao, a me na iwi uha o ka papakole. Aka o na helehelena nae o ka maka a me ka papalina o ua Moi make la ka oi loa aku o ka nani iloko o Abusinia.
     He lae kiekie kona a akea no hoi, me na kuemaka i kikohu paa ia e ke kuoo a me ka noonoo hohonu, a ma kona ihu ke alina o ka manao puni koko, me na lehelehe ololi, a aiai mai la kona mau niho keokeo, a pio pono hoi kona auwae, ua kahi ia a nemonemo. Ua maheleia kona lauoho iloko o na owili lauoho nunui ekolu, me he mau huelo la ekolu e lewalewa ana ma kona kau. Elima kapuai kona kiekie a me umi iniha, a mio pono hoi kona mau kipoohiwi. Aole he kanaka eleele o Teodoa, aole hoi he halenalena, aka, he like me ka wai hooluu o ka inika howai, a me he mea la he kanalima ka nui o kona mau makahiki.

NU HOU PULUPULU!

NO KA MAHUAHUA ANA O KE KUMUKUAI PULUPULU ma na aina e, e haawi aku no au maloko o na malama elua o Iune a me Iulai, no ka PULUPULU SI AILANA maikai mua-

Ehiku (7) Keneta no ka Paona Hookahi.

a eono (6) a elima (5) keneta paha no ka paona Pulupulu ano maloo. E lawe ma kuu Hale Oihana Pulupulu.

OLELO AE-LIKE

 Me ka manao e kokua i ka mahiai ana o ka PULUPULU SI AILANA, ua makaukau au e hana i Olelo Aelike me kekahi mau kanaka mahi Pulupulu, a me kekahi poe Hui paha, e kuai mai i ko lakou mau Pulupulu a pau, e ohi ana iloko o na makahiki elua a hiki mai ana, e like me ka uku kupono. Ina ua makemake oukou e hana i Olelo Ae-like, e hele mai no oukou e hui pu me a'u. A uhea oukou e na kanaka mahiai Pulupulu iloko o ka wa i hala-mai kanalua oukou, aka, e hapai hou i keia hana.
H.M. WINI.
Honolulu, Mei 20, 1868. 338-2m