Ka Nupepa Kuokoa, Volume VII, Number 31, 1 ʻAukake 1868 — Page 1
KA NUPEPA KUOKOA.
KE KILOHANA POOKELA NO KA LAHUI HAWAII.
BUKE VII, HELU 31. HONOLULU, AUGATE 1, 1868. NA HELU A PAU 348.
"KA NUPEPA KUOKOA,"
HOOPUKA MAU IA MA HONOLULU
I kela Poaono keia Poaono.
$2.00
No na mahina he UMIKUMAMALUA,
$1.00 no na mahina eono.
ME KA HOOKAA MUA MAI.
NA OLELO HOOLAHA—aole i oi mamua o 10 laina no ka hoopuka hookahi ana, $1.00; alua komo ana, he $1.50; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai.
KANIKAU—he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi—penei: he 25 lalani, $1.00; 50 lalani, $2.00; a pela'ku.
NA UKU NO NA OLELO HOOLAHA—ka uku pepa, a me ka uku o ke Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.
O NA UKU PEPA A PAU E HOOKAA MUA MAI NO—aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.
AIA KE KEENA O KA NUPEPA KUOKOA—ma ke kihi hema o ka Hale Hookipa Luina (Sailor's Home.) O na hora hana, ma ka eiwa o kakahiaka, a i ka ha o ke ahiahi.
L. H. KULIKA. (Luna Hoopuka.)
KA "NUPEPA KUOKOA."
Is published in Honolulu
EVERY SATURDAY,
$2.00 per annum, or $1.00 per six
months, in advance.
ADVERTISEMENTS not exceeding 10 lines, inserted once for $1.00; twice or $1.50; and $2.00 for one month; all advertisements must be paid for in advance.
KANIKAUS will be charged 1.00 per page, or 4 cts. a line.
PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.
ALL SUBSCRIPTIONS must be PREPAID. No names, either of foreigners or natives, will be inserted on the subscription list, until paid for. This rule must be strictly adhered to, on account of the low subscription price.
THE OFFICE OF THE KUOKOA is in the South corner of the Sailors' Home. Office hours from 9 A.M. to 4 P.M.
L. H. GULICK.
For the Publishers.
Volume I, II, and III of the KUOKOA, bound, for sale, $3.50 each.
Persons having complete sets of the above, can have them bound by paying $2.00 each.
Ka Nupepa Kuokoa.
HE MELE KOIHONUA NO
Kalua i Konahale Kuakini.
NA KEKUPUOHI ME KEKAHI POE ALII E I HAKU.
Ua hanauia o Kalua i Konahale J. A. Kuakini, ma Kahaluu, Kona Akau, Hawaii, i ka makahiki 1791. O Namahana i Kaleleonalani ka makuahine, a o Keawe Kaiana a Ahuula ka makuakane. Oia ke Alii Aimoku o Hawaii.
Ua make o J. A. Kuakini, ma Hulihee, Kailua, Hawaii, i ka malama o Dekema ba, o ka makahiki 1843.
83. I ku i ka waawaa o ke kapu,
E ike oe auanei i ka moa i kau i ka uahi,
O Kalani—Kalani—Kalani—
O Kalaninuieeaumoku,
Nana mai keia alii o Kuakini,
I kalani kua o ke alii,
84. I ku i ke kai malino a ehu,
O ka malina lai hinupawa o Palaha,
O Palahaiki a Moenewakalani,
Oia ka uhane holo pu me ka ia,
Uhane moe wai o Keihialaka,
Laka ole hoi oe ia'u.
85. Mamua-la—e—imua-no-
Ulu mai ka manawa i ke aloha,
Piha i ke kuko, i ka mihi, me ka manao,
Haiki loaa wahi noho ole,
Hooke i ka pili houpo o ke kanaka,
Haipu ka iwi pona maka i ka uwe,
86. Paa ole i ka mokuhia e ka waimaka,
Me he apana ie loko i ke aloha,
Mai paaoao hana hemo ke kino-e-
He hemolele oe, he hemolele oe,
He hemolele oe no ka lokomaikai,
No ke ahonui, aole wahi koe,
87. He koe ole ia nei, iwaho wale no-e-
I waho-oe-e--
Iwaho Kaula me Niihau i ke kai,
He keiki hii Lehua na ka makani,
I hanau ia mai e ka naulu,
Makua i ka unulau ke koolau,
88. Lau ka pihe a ke'kua i Kalaihi,
Wawa no, ikuwa i ka laalaau,
Hoopahaohao hewa i Kealia,
Mai nane au, mai lilo ia pua,
I ke aka luhe a ka pua kaiaulu,
Pua maka nonohe waililula-e-
89. He la hanu ae nei no ke aloha,
I ui wale ae nei hoi ilaila,
Loaa no ia'u e waiho ana-e-
E waiho wale-e-
O Kekukapahelua a Umi,
O ke kapu na Umi o Keawenuiaumi,
90. Na Umi o Kamolanuiaumi,
Noho ia Kaumaka i ka maka ia,
I kai paha oe loaa o Kanekeawe,
O ke alii ewe ia,
Nona hoi ke kupuna koa o Kekoa,
Na Kekoa o Ohiaokalani,
91. O Kalani kupono, ponoi, pololei,
Kekee ole, aohe napanapa,
Lulo ole ia Keawe,
O Keawe keiki kapu a Ahaula,
Nana o Kaiamamao i hanau,
O Kahoukapu i ke koki o ka lani,
92. O Kalaninuieeaumoku alua,
Alua mau makuakane alii,
Ia oe iho nei no lahui ia,
Lahuiia a paa, kauluaia na'lii,
Kupee keia Keawe,
Kue ma Kalanikauleleiaiwi.
93. O na'lii kuhaulua mai ka wao,
Mai ke kuahiwi mauna anuanu Lihue,
O ka hau oki ka uhi e anu ai,
E huihui ai koekoe maeele,
Ka la kea, ka la e wela ai ka honua,
O ka la kuhaoa ia o Makalii,
94. E hahana ai holo pee i kahi malu,
Malumalu malu ole i ke 'lii,
O Kalanikuihonoikamoku.
O ka ua paka kahi paka lua,
Pakapaka ua, paka ua, kulokuku,
Kulokuaiku aku o Kukapu,
95. O Kukapu a Kauaua,
Nana o Makuikumoho,
Ka nalu i ka moana uli,
Na nalu nui i puni, i huki popoi,
I holo i puka mawaho,
O ka lala kapu, o ka lala iho oe,
96. Halala hiki manamana na'lii,
O ka lau i Maui, o ka lau liko kapu,
E ole e kukupu o Umikalakaua,
Na Kalakauaehu a Kiha.
O kana mau keiki mahana ia,
O Kawau ma laua o Kiha,
97. He mau mahana aimoku no Maui,
I ai i ka moku a kaa ka niau,
A kaa kalolo o ko laua noho ana,
Nononoho a moe na keiki,
A noho a kaikuahine, hoao kaikunane,
O Kalaniulukaikahonua a Kiha,
98. Mahana no ia hanau ana,
O Paukai a Kihamahana no.
Hanau mahana ka hua a na'lii,
Aole hulukoo kanapi,
He koo waa wale no,
Ke pookela i ke kua o ka lani.
99. Ke koloa au wai, poo wai mapu,
O ka mapu wai kukaniaau o Lono,
O ka lono hakahaha leo o Waahia,
He aahia kulanipua o Haka,
O ka hakahaka i ka moe ia Ewa nei,
He wawa ko hope nei,
100. E hele la oe, hele no,
Hele hoonianialau konale waho,
Hoihoi iloko ka oi a ke kolohe,
Ahu kekee liilii a ka moe,
He moe ia i ikea i ke akea,
I ka la hoi i laila pau ke ano,
101. No ka pau ole ia e hone hou la,
Ke hoi kokua aku i ka hewa,
O ka hewa ia o ka hone liilii-e-
He hone oe he ho a—e-
E akaka lea ka pono o ka pono ia,
O ke kanaka i laka mai,
102. A laka ka hoi maunauna-e- he mau-na-e
Malahia ka pua o ka mamane,
Ka pua o ke koolau o ka ulu pua,
Ua pupua mohala wale i ke awakea,
Ua ehu wale i ka la o Kaluehu,
Ehu ula ka wiliwili me ke aalii,
103. Ua mohala na maka i ke aa,
I ke ala hele mauka o Auahi—e—
Ahiahi ano, laka ka lokoino,
Ka manao ole i ka mea aloha he hoa,
He hoa manu nene, he hapaina ino,
He hoi no a paumaele ka hale.
(Aole i pau.)
KA MOOLELO O NA KAMEHAMEHA.
NA S. M. KAMAKAU.
HELU 82.
NO KA NOHO ALII ANA O KAUIKEAOULI
MALUNA O KE AUPUNI, A UA KAPAIA
O KAMEHAMEHA III.
KA LILO ANA O KUINI LILIHA I HOPE NO
BOTI KAMAULEULE.
Eia kekahi hana nui a na'lii iloko o ia mau la, o ke ao aku i na kanawai waha i kau ia e Kaahumanu penei :
1. "Ua kapu ka pepehi kanaka, ka powa, ka hao wale, ke kaili wale, ka pakaha wale a me ka aihue.
2. Ua kapu ka moekolohe, ka hookamakama, ke kaili wale i ka hai kane me ka hai wahine, ka lawe nui ana o na'lii konohiki a me ka poe aiahupua i na wahine lehulehu a me na kane lehulehu, ua kapu ia ; e lawe pakahi ke kane i wahine, a pela hoi ka wahine i hookahi kane, a e mare ia laua. A o na mea i hoao paa ia mamua o ka laha ana o ka laha ana o ka olelo a ke Akua, ua like no laua me na mea i mare ia ke Kanawai o ke Akua, ua paa no laua.
3. Ua kapu ka hoomanamana i na'kua liilii, i ka laau, pohaku, mano, i na unihi pili, i na aumakua a me na'kua liilii lapuwale, a i hookahi Akua o Iehova, oia ke Akua e hoomana ai.
4. Ua kapu ka hula, ke olioli, ke mele—Ua kapu na olelo pelapela, a me ka hoikeike o na wahine i kahi lehulehu a me ka auau o na wahine i kahi kanaka.
5. Ua kapu ke kanu awa, aole e kanu ma ka aina ; aole e inu i ka awa na kanaka a me na'lii.
6. Ua kapu ka hana ana i ka rama, ke puhi ana i ke ki, ka hoowaawa ana i ka uwala, ka ohia a me na mea e ae.
7. E huli kakou i ka pono, e malama kakou i ka olelo a ke Akua. Ke hele luahine nei au me kuu alii e hoohuli ia oukou ma ka pono o ka olelo a ke Akua. Ua minamina au i ka olelo a ke Akua i ka hiki ana mai i ko'u mau la luahine. Eia kuu kauoha ia oukou, e pule oukou i ke Akua no kuu Alii---A oia ka oukou Keiki."
O na kanawai waha iho la keia a Kaahumanu a me kana mau olelo kaulana ana i haawi ai i ka Moi Alii Kauikeaouli Kamehameha III., i keiki na na makaainana.
Oia na kumu nui a Kaahumanu a me ka Moi Kauikeaouli a me na'lii i hele pu i ke kaapuni, a puni o Molokai. Ua kaulana o Paia-opio, ke konohiki iaia o Halawa. Ua makau o Kaahumanu a me na'lii i ke kaikoo nui aiwaiwa o kela aina nalu nui o Halawa, aka, ma ka hana mikioi me ke akamai a kela keiki o Halawa, a kahi keiki a Paia ai kuala.
I ka holo ana o na'lii a paa i Lahaina, a hui pu me na'lii haipule o Maui, a me na hoahanau ekale sia o Lahaina. O Lahaina, ke kulanakauhale o Maui a me Hawaii nei. Nolaila ka poe kaulana iloko o ia mau la no ka naauao a me ka haipule. Eia ka ke kumu o ia kaulana, no ka piha i na'lii, a i ka noho makaainana ana o ka aina, e like me ko keia wa, alaila, puka mai ka olelo a ka poe kahiko, "O Lahaina lau ulu." Aole no na'lii wale no o Lahaina ke kaulana, no kekahi poe koikoi malalo iho, a ua hapaia e ka haipule. O D. Malo, Daniela Ii, o Oneo, Kalaikoa, Pikanele, Puaa kaohana, a me Kau-a ke kumu o Borabola, a me na hoahanau ekalesia a pau; a o Batamia Puaaiki ka oi ae, he makapo ia, a oia nae ka hua mua o ka ekalesia o Lahaina. Pela no hoi na hoahanau wahine o Lahaina.
Na Ha riata Nahienaena a me Maria Hoapili i hapai ae iluna, o ka hele ia a keikei Kau i ke ao a ka makani. "Hanohano iluna ka pali O Wailau." Ua kapaia keia poe o na ilio nahu maka a Hoapilima. O na hoa ai ia, o na hoa ohumu ia, o na hoa kukakuka ia, o na hoa walea ia. Ua lilo keia poe me he poe iliohae la ke lohe ae i kekahi mea pilau. " I hae no ka hoi i ka haku."
E hoi hou ae kakou e noonoo i ke kumu o keia kaua kuloko a me ka hiolo wale ana.
NO KE KAUA KULOKO I KAPAIA O KAPAHIKAUA
A ME KA HIOLO ANA.
O ke kumu o keia kaua kuloko i kapaia o Kapahikaua, penei :
1. O ke kaili ana o Kaahumanu i ka Moi Alii Kauikeaouli mai a Liliha aku.
2. O ka olelo ana a Kaheihemalie Hoapili-wahine, he wahine ona rama, a he wahine kipi—mai hooloolo o ku i ke A'u.
O ke kumu akahi, ua wehewehe mua ia aku nei mamua, a e nana oukou ia mau wehewehe.
I ka holo ana o Kaahumanu a me ka Moi Kauikeaouli a me na'lii a hiki i Maui, a kuka olelo iho la me Hoapili ma no ke kaili ana o Kaahumanu ia Kauikeaouli mai a Liliha mai. O ke kumu nae o keia kailiia ana, o ka inu o Liliha i ka rama, a o kona alakai i ke'Lii i ka inu rama me ka lealea ; a o ka loaa pono ana aku no kekahi o Liliha me ka wahine aialo a me ka wahine a na'lii i holo pu me Boti, ua pau i ka ona i ka rama ma Ewa. Oia iho la no ke kumu o ke kailiia ana o ka Moi Kauikeaouli.
Olelo aku nae o Kaahumanu ia Ulumeheihei, "E holo paha oe i Oahu e ao i ko kaikamahine, e hoopau i kona inu ana i ka rama, i ka ona, i ka uhauha a me ke alakai ana i kekahi poe ma ka inu rama?" Olelo aku o Hoapilikane, "Heaha aku auanei ka'u hana e holo aku ai i Oahu—Ua ike iho la no oukou na alii, ua pono ole kana hana ana, a ua kaili mai la no oukou ke poe na ke'Lii, a heaha aku auanei ka'u e hana aku ai iaia. He kanaka kuu kaikamahine, a o oukou no ka poe nana ke Alii." He wahi manao kanalua ko Hoapili. Olelo mai nae o Kaheiheimalia, ''He manao kanalua ko Hoapili i ke kaikamahine ana. Owau ke holo i Oahu, a ike aku i kuu kaikamahine ( ia Kinau.") Olelo aku la hoi o Hoapili ia Kealiikuni Kekauonohi, "I holo o Kaheiheimalia i Oahu ea, o oe pu kekahi e holo i Oahu, malie o hana ino mai o Kaheiheimalie i ko makuahine."
I ka malama o Iune, holo mai la o Kaheiheimalie i Oahu maluna o ka moku Hooikaika, a o Kekauonohi kekahi i holo pu mai. I ka wa i holo ai o Kaahumanu me ka Moi Kauikeaouli a me na 'lii i ke kaapuni, ua hoomalu o Liliha i kona noho ana, aohe inu i ka rama, a he kula ka hana, a he ao palapala. O Punihaole ke kumu kula, a oia no hoi ke Kahunapule a Liliha, a o kahi Apii kekahi, a ua huipu ka aialo me na wahine a ka poe i holo pu me Boti, a o lakou ka poe haumana kula.
I ka hiki ana mai o Kaheiheimalie a me Kekauonohi i Oahu, a halawai pu me Kahoanoku Kinau, a me Kekuanaoa, a o na hoahanau ekalesia a me ka haipule, a pau ko Kinau mau hoa haipule a mau hoa ohumuhumu a kuka i ka pono o ke Akua. Ua huli o Kinau a me Kekuanaoa i ka pono ia manawa, a ua lilo hoi laua i mau hoahanau ekalesia ia manawa, a ua hahai laua ma na kapuai o Kaahumanu. Aka, i ka wa o Boti, aia laua ma kona aoao kahi i lulumi pu ai ma ia aoao. O Kekauluohi nae a me Kanaina kai hahai mua ma ka pono.
Pii aku la o Kekauonohi e halawai pu me Liliha ma ka hale o Poliokeawe maloko o ka pa o Pelekane A pau ka uwe ana, ninau aku la o Liliha ia Kekauonohi, "Heaha mai nei ka olua huakai i holo mai nei ?" Olelo mai o Kekauonohi, "I holo mai nei maua me Hoapiliwahine, i ka olelo ana ae nei a Kaahumanu ma, ua hele oe i ka hewa a me ka ona rama, a ua alakai oe ia Kauikeaouli i ka hewa a me ka inu rama, a ua alakai oe ia Paki e hana hewa pu, a me kekahi poe alii a me na kanaka a me na wahine a pau, nolaila, holo mai nei o Hoapili e olelo i ke kaikamahine ( Kinau) e huli i ka pono, e kupaa ma ka pono a Kaahumanu. He wahi kauoha no hoi ka ka makuakane o kaua ia'u. (Ulumeheihei) oia no hoi ke kumu o ko'u holo ana mai nei. (Aole i pau.)
HE MOOLELO
---NO---
HAMANALAU,
HANAI A HAWEA.
I laweia mailoko mai o ua kaao kahiko Hawaii nei.
HELU 17.
I ka pau ana o ka Ahaolelo ana, ua hoi aku la kela mea keia mea, a ka la apopo ae. e hoounaia na kukini mama e hai aku i ka lohe mai o a o o na palena o Waialua e huli i kela a me keia ano waiwai kahiko, e like me ke kulana, a me ka mea e loaa ana ia ia, a ia lakou paha mai ka poe kiekie, a hiki i ka poe haahaa, mai na'lii a hala loa i na makaainana, ua hele a kuapapa nui ka lohe ma o, a maanei o na wahi a pau i noho kanaka ia. Me mea emoole wale no nae ia i na makaainana aloha alii, a makee Haku, no ka mea, o ka olelo kauoha a na'lii ia manawa, he dala ka kihikihi nui loa ia e malama ia ai, he menemene lakou ke haule kekahi wahi leo alii ilalo, mai ka waha mai o ko ke Alii mau puali, a poe koa hoi. He oki loa aku hoi ka lohe mahui wahi leo alii mai, a pane ponoi mai ke alii, he hoihoi loa aku hoi ia, he kanaka wahi alii ka olelo. (E nana ae kakou ia Malaihi ke keiki a Mokuhia ke Kiaaina o Hawaii; komo oia iloko o ka puka olelo a Keakuawahine. Penei ka Keakuawahine olelo ia Malaihi. Nana ae oe auanei ia'u a e kunou mai ana kuu poo la e-a, e kamailio ana maua me Kamehameha, a ua ae mai o Kamehameha i ko'u manao; ae naaupo o Malaihi. I ka hele ana o ua o ino o Kekuawahine, a ma ka puka o ka hale o Kamehameha, e noho mai ana no lakou ia ; he poe hoa olelo okoa no ko Kamehameha e olelo nei ; kunou e o Kekuawahine mawaho, hoohio e ke kino, kuhikuhi na lima ia Malaihi, a i kekahi wahi e ae. I pono nae i ka nana ole mai o Kamehameha ma, a ina e nana mai hoolalau kela, akamai no ka poe puka olelo oia wa, e hoolilo ana i kana olelo i olelo na ke Alii, pono no ia e like me ko lakou ike ana. A i ka hoi ana'ku a Kekuawahine a hai aku ia Malaihi i ke ano o ko laua kamailio ana me Kamehameha, a me ka i ana'ku no i ka hua o ka lea, ia'u e kunou ana la ea, ua ae mai nei o Kamehameha, e hoi ae a noho alii iho no ia Hawaii, he lani no iluna a he honua no ilalo ; ina e hiki aku kekahi kanaka, a'lii nui paha, pepehia iho a make loa ; hu no hoi ua puka olelo a ka poe loio kahiko. Ia hoi io ana no a Hawaii, e holo naaupo aku ana hoi o Kaneihalau mamuli o ke kauoha a Kaahumanu, e hooko io mai ana no o Malaihi a me Mokuhia ke Kiaaina i keia mau olelo we-a a Kekuawahine, no ka ukiuki o na'lii o Hawaii e noho ana i Oahu nei no keia hana ana pela no ke pai wale ia o na hoaaina o lakou e noho ana ma Hawaii o Mokuhia. Ina ua hewa keia wahi olelo hookapeke wale a ka poe kakau, e kala mai no, aole no i pau loa, oiai no Hamanalau ka moolelo.)
KE KOKOKE ANA I KA MANAWA E HUI AI
KA MEA E HOAO ANA, A ME KA
HOOKOIA ANA OIA HUI.
Ke kokoke mai nei ka manawa, ua hoolakoia ae la a makaukau na mea a pau loa, aole wahi hemahema i koe, a aia no nae ka kakou keiki puhi olali o ka hema i uka no kahi i noho ai i kona home oluolu, a hiki i ka la e loaa ai, oia no ko kakou la e ike ai iaia e hele mai ana me kona nani nui. A ma keia wahi nae e hoomaopopo ai kakou i ka hana a ua keiki noho kuahiwi nei. I ke ahiahi ana iho, apopo ae ka la e u hoao ai, kamailio mai la o ua o Hinahelelani i na wahi kupuna pekeia. Hoi no hoi auanei olua a ko olua wahi moe malie no i ko olua hale, mai hooho olua, a mai holoholo no hoi mawaho, e hoohanawai no olua ma kahi kupono. He ae wale no ka ua mau kupuna a hoa noho no hoi o ua uka oopu nui la, hookahi no oopu lilihia, a kohu weliweli maoli, ono ole mai ka ai, o ke ki wale no ia o ka ae i ua mea ka hoi hemomona o ka oopu o uka o Wahiawa, a me Oahunui, malia no i walea ai lakou malaila. I ke ano ana iho o ke aumoe, kamumu ana o waho o ka hale, a iku-wa ana ka leo o ka poe e-epa o ka aina o Apoluona ma. Pane aku la o Hinahelelani.
Owai keia e halulu, halulu mai nei ma ke kala o ka hale o makou me o'u mau kupuna, o ka hana ana i moe lealea o ka po, a owai la hoi keia poe e walaau mai nei. Pane mai lakou la me ka leo h oomakau-kau, o makou keia, o Limuhuna, o Limukele, o Limanaiea, o Kulukapii i hoounaia mai nei makou e ko makou alii e lawe mai i ke oho o Hinahelelani. A pehea ka i-i-ana oia mea, wahi a Hinahelelani. Kai no hoi o ke oho o Hinahelelani, oia no oe i ka limuhuna la, hele a Hunahuna-lauki, kulu ka pii o Moanauli, wahi a lakou la. "Alele a pili." Pau ue ana keia mea a hoi aku la ia poe kanaka. Hiki hou ana no ua poe, halulu ana no mawaho. O ka ia nei hana no ka ninau, o ka lakou la no ka olelo mai, o makou keia o Uhumakaona, o Mohoe-a, o Makaalawa, o Nanapono, i hoounaia mai nei makou e ko makou alii e lawe mai i ke kahiko nani o na maka o Hinahelelani. A pehea ka i-i-ana oia mea e. Kai no hoi o na maka o Hinahelelani, ka, onaona, oia no oe i ka mohoe-a la, oluolu ke nana mai. "Alele a pili," hoi aku ana ia poe. Halulu hou ana no ua poe mawaho. O makou nei o Kanae'na'e, o Kamokihana, o Kekupukuku, o Kekupaoa, Kaihuanu, Kamahunaalii, Kamailelaulii, Kahalaomapuana, o Kahamuala ; i hoounaia mai nei makou e ko makou alii, e lawe mai i na mea ala a pau, a e hui pu aku me ka hanu o Hinahelelani. Heaha ka i-i ana oia mea, wahi a Hinahelelani. Pane mai lakou la me na huaolelo haanui a haano-u hoi. Kai no hoi o ka hanu o Hinahelelani, oia no oe i ka mokihana la, a-ala i ka ihu anu ka uka o Kawela, paoa i ke ala ka hanu o Hinahelelani.
I lawa no ia oe a hoohalawai aku, o ke kokoke mai no ia o Halaki, ke Alii wahine o na pua o ke kula, (a-ala io aku la no, ua ohi ia mai ia no na mea ala a ku i kahi hookahi.) Alele a pili, hoi aku ana keia poe; halulu mai ana no ua poe. Owai keia poe hele o ke aumoe, e hoohalulu nei ma ke kala o ko makou hale me o'u mau kupuna, wahi a Hinahelelani. O makou nei o Kihipeahi, o Kihipepeiao, o Kihikihi, o Nakihi, o Kihikaupea, o Kihimakakoloa, i hoounaia mai nei makou e ko makou alii e lawe mai i ka nani a me ka maikai o na kihipoohiwi o Hinahelelani. Heaha ka i-i-ana oia mea, wahi a Hinahelelani. Kai no hoi o na kihipoohiwi o Hinahelelani, oia no oe ina kihipeahi la. Hala aku ana ia poe ; halulu mai ana no ua poe, o ka ia nei hana no ka ninau ; o ka lakou la no ka pane mai. O makou nei o Lahalalahaalena, o Palahalaha, o Kehakeha, o Hookuai, o Ioalii, i hoounaia mai nei makou e ko makou alii e lawe mai i na mea hoonani, a e hui pu aku me ka umauma o Hinahelelani. Heaha ka olelo ia ana oia mea. Kai no hoi o ka umauma o Hinahelelani. Lahalaha lua ke nana'ku, oia no ka hoi ka palahalaha la, hele lua a ku-ai. Alele a pili; hele aku ana ia poe ; hiki mai ana no ua poe hou. Owai keia poe e hele nei o ke Aumoe o ka po. O makou keia o Naoiwi, Kaoiwilani, Kaoiwiloa, o Hakaoiwi, o Palanaiki, i hoounaia mai nei makou e ko makou alii e lawe mai a kupololei, i ka nani a me ka maikai o kahi oiwi kino o Hinahelelani. Heaha ka i-i-ana, a me ka olelo ia ana oia mea. Kai no hoi o kahi oiwi e Hinahelelani, oia no oe i kahi kii milimili la, kupololei lua kahi oiwi, pouli ke kua mahina ke alo, ka mea i hana ia a maikai e ku i ka poho o ka lima aohe e i ae e-e hina iho, i hina iho no hoi paha i ka olelo o kekahi aoao e nukee ai, huki malaila e oloolo ai; (pela io aku la no, aia no la hoi a like ka hana ana o na kaula awe-awe, aohe e alolo ka haawe e ha-ke ai kuu pa-i.) Alele a pili, hala aku ana ia poe. I lawa no a hala aku ia poe ma ka nahelehele; halulu hou mai ana no ua poe moe-one. O ka ia nei hana no ka ninau, o ka lakou la no ka pane mai. O makou keia o Polinahe, o Nahenahe, o Halehale, o Lahilahi, i hoounaia mai nei makou e ko makou ali, e lawe mai i ka nani a me ka maikai a e hui pu aku me ka poli o Hinahelelani. Heaha ka olelo ana no ia mea, wahi a Hinahelelani. Kai no hoi o kahi poli o Hinahelelani, oia no oe i ka hele a polinahe la, lahilahi lua kahi poli ke hala aku, aohe hoi he nui ino e opu keke ai, a hookuolo, aohe hoi he wiwi ino, e lao-lao ai, laalaau, eha ke hoouka ia mai ; o keia hoi, nolunolu pepe i ka lomia e ka inuwai. Alele a pili, pau ae ana ka hana a ia poe hooki-wala-o o ke aumoe, hiki mai aua no ua poe hoohuki pepeiao. O ka ia nei no ka hooho, o ka lakou la no ka pane mai. O makou keia o Kapeke, o Oloolo ; o Puhiomale, a me Oloko, i hoounaia mai nei makou e ko makou alii e lawe mai i ka nani, a me na mea maikai a hoohui aku me na u-ha o Hinahelelani. Heaha kona olelo ia ana. Kai no hoi o na u-ha o Hinahelelani, oia no oe i ka puhi omole la ka hele a oloka, nepunepu lua ka hoi ua mea he maikai, nemonemo, ahu ka olo. Alele a pili. Hala uku ana ia poe, hiki hou mai ana no ua poe hoomalana lauoho, o ka ia nei hana no ka ninau ; o ka lakou la no ka pane mai.
O makou keia o Nukumoi, o Ihumoi, o Moilii, o Nukuiki, i hoounaia mai nei makou e ko makou alii e lawe mai i na mea nani a hoomaikai a hoohui pu aku me na kuli o Hinahelelani. Heaha kona olelo ia ana. Kai no hoi o na kuli o Hinahelelani, oia no oe i ka nuku moi la, hele a muo-iki. Alele a pili, hala aku ana ia poe, hoea hou mai ana no ua poe ka-o-o loloa o ka po. (Ma ke-ia wahi ke hooki nei au i ka helu ana e like me na olelo kamailio a Hinahelelani me kona poe e-epa a kakou i lohe aenei, aka, he nui no na mea i hanaia i ua po la, mai ke ano ana iho o ke ahiahi molehulehu a hiki i ke kakahiaka, ua pau loa no na lala a pau o ke kanaka. Aka, ua lawe aenei no wau ma ka mea ano nui, he mea makehewa ia'u ke helu papa aku, e hoopakuwa wale ai, ua lawa loa kakou i keia mau olelo maluna aenei.)
I ka pau pono ana ae o ua mau hana nei o ka po, i ala ae ka luma o ua mau wahi kupuna nei o ua o Hinahelelani, i nana'ku ka hana ia waho, ua paa hou ua mau hale nui, ua paa na haiau, e ole-ole mai ana ka waha o kii iloko o ka hale heiau, ua maikai pono na alanui, ua akea kahi e hele ai, ua niniia a maikai, e ku ana na punohu ma kela aoao, a ma keia aoao o ke alanui, e waiho ana he wahi moena kupanaha, ma kipaepae o ka hale moe o ua moopuna, o Hoopaneeikaloa, o Heleikalaula. I nana'ku ka hana o laua nei i ka waiwai o loko o ua mau hale nei, ua hele a piha a hu ma ka nihomole, e lawa ai no na kanaka he kini-lehu, a hoohelelei wale aku. Ua lako pono no hoi ko Hinahelelani mau kahiko kino, aohe hua holo i Kahiki i-o Koea la i ua mea hoi he eueu o keia keiki kuawaa o ka uka waokele a ka laau ala i noho ai, he loaa ole paha ia Poki ma a me ka poe kua laau ala i ka wa iho nei o Kaahumanu ma. Manao au ua pee i ka nahelehele ua poe Akua hoaiki nei. A oia iho la ua mea kamahao a ua mau kupuna nei i ike ai, a he mea eehia no ia i ka laua nana ana, a me ka ike ana.
I ke ala ana ae o ua keiki nei ua kiekie ae la ka la e kupono ana paho i ka hapalua o ka hora 9 a me 10. Ia wa no hoi i hiki aku ai ua mau kupuna, a i nana aku ko laua nei hana ; he aiwaiwa loa aku ka hoi ua mea he nani a me ka maikai o keia wa i oi ae mamue o ka wa i hala, oia no ka hoi oe i ka moho-ea la, ua mea he onaona o na maka, aohe wahi nani ole i ka laua nana aku. Ina he eheu ko laua, i na la paha ua like me ka manu, a ma ko laua nei paulehia, aohe o laua nei pane leo aku ia Hinahelelani a loihi wale, me he mea la ua maule, a o ke kunou poo wale aku no ka laua imua o ua moopuna me he kolea la.
I ka oluolu pono ana iho o ka paulehia ana, a me ka makahehi o ua mau wahi elemakule nei, pane mai la ua moopuna a laua. Pehea kakou, ua makaukau paha no ka hele ano, ae aku la no laua. I ka hele ana a Hinahelelani, ua kahiko ia oia i na mea maikai a pau, e ku-like ana me kona kulana, a kona helehelena oiwi maikai. I lawa no a hookuene pono iho ka noho ana a Hinahelelani iluna o ua wahi moena nei, e panee ae ana kela i ka loa, hele ae ana i ka laula, a o ua mau kupuna no hoi, ma ka laulau wale mai no o ua wahi moena nei, uhi paa ia iho la lakou nei e ka papalu maka punohu ula a me ka ua koko, ka alewalewa, a o na anuenue ewalu e hikikii ana ma kela a me keia aoao, he nani maoli no ke nana aku, a e uwa ka naonao a e haalele wale, a me na mea uhane ole a pau. I lawa no ia lakou nei a u-haele nui aku, na ka laau no i hina ma kela aoao, a ma keia aoao, na ke awawa no i piha ae, na ka puu no i palaha iho mamua ae o lakou, hele wale kela a ililaumania, he mau kaula-hao paha elima ko lakou nei kaawale mamua iho, ua hoi hou ae la no e like me ke kulana mua, a e like me ka loihi o ka wa maikai mahope, a pela no hoi ka loihi o ka wa maikai mamua. I ko lakou nei hele ana, aole no hoi he wikiwiki loa e like me ke kaa ahi, aole no hoi he lohi loa e like me ka lio nuha, aka, he panee malie kupono wale no e hele ai no hoi ka lau nahelehele i ka nana aku a ka poe e noho ana iluna o ua wahi kaa moena nei o lakou. Aole i pau.