Ka Nupepa Kuokoa, Volume VII, Number 27, 4 July 1868 — Page 1
KA NUPEPA KUOKOA.
KE KILOHANA POOKELA NO KA LAHUI HAWAII.
BUKE VII. HELU 27. HONOLULU, IULAI 4, 1868. NA HELU A PAU 344.
"KA NUPEPA KUOKOA,"
HOOPUKA MAU IA MA HONOLULU
I kela Poaono keia Poaono.
$2.00
No na mahina he UMIKUMAMALUA,
$1.00 no na mahina eono.
ME KA HOOKAA MUA MAI.
NA OLELO HOOLAHA—aole i oi mamua o 10 laina no ka hoopuka hookahi ana, $1.00; alua komo ana, he $1.50; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai.
KANIKAU—he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi—penei: he 25 lalani, $1.00; 50 lalani, $2.00; a pela'ku.
NA UKU NO NA OLELO HOOLAHA—ka uku pepa, a me ka uku o ke Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.
O NA UKU PEPA A PAU E HOOKAA MUA MAI NO—aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.
AIA KE KEENA O KA NUPEPA KUOKOA—ma ke kihi hema o ka Hale Hookipa Luina (Sailor's Home.) O na hora hana, ma ka eiwa o kakahiaka, a i ka ha o ke ahiahi.
L. H. KULIKA.
(Luna Hoopuka.)
KA "NUPEPA KUOKOA."
Is published in Honolulu
EVERY SATURDAY,
$2.00 per annum, or $1.00 per six
months, in advance.
ADVERTISEMENTS not exceeding 10 lines, inserted once for $1.00; twice or $1.50; and $2.00 for one month; all advertisements must be paid for in advance.
KANIKAUS will be charged 1.00 per page, or 4 cts. a line.
PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.
ALL SUBSCRIPTIONS must be PREPAID. No names, either of foreigners or natives, will be inserted on the subscription list, until paid for. This rule must be strictly adhered to, on account of the low subscription price.
THE OFFICE OF THE KUOKOA is in the South corner of the Sailors' Home. Office hours from 9 A.M. to 4 P.M.
L. H. GULICK.
For the Publishers.
Volume I, II, and III of the KUOKOA, bound, for sale, $3.50 each.
Persons having complete sets of the above, can have them bound by paying $2.00 each.
Ka Nupepa Kuokoa
He Inoa no Salatiela Kihapiilani
IWIKAUIKAUA.
-
Auhea wale oe ka Piana la-e-a,
Ka hoehoene i ke ahiahi la-e-a,
Mai kuhi mai oe e iala la-e-a,
E nele ana oe ianei la-e-a,
Eia ianei ko pono la-e-a,
O ka uku kaulele hooi la-e-a,
H ike no oe ke hoao la-e-a,
Ke hoomaka iho e hana la-e-a,
Keu aku a ko mikiala la-e-a,
A ko lawelawe pono ole la-e-a,
Ua hiki ua lai o i nei la-e-a,
Ua olu maikai ka nohona la-e-a,
Ua anoano kapu mai luna la-e-a,
Ua kilikili hau mai oe la-e-a,
Ke noe mai nei ka na hele la-e-a,
Haina ka Inoa i lohe la-e-a,
Oulumaheihei Hoapili la-e-a,
O ka Ona nui o Wailuku la-e-a,
O ka helu ekahi o Maui la-e-a.
NA NAONOHIELUA.
Auhea wale oe e ka Ohu la-e-a,
Kipu mai la i Kaala la-e-a,
Ala mai Lihue me Kalena la-e-a,
Hooho mai hale auau la-e-a,
Pehea iho Kokoloea la-e-a,
Ea mai o Kaahupahau la-e-a,
O ka olali o Puuloa la-e-a,
Ehia iho mea minamina la-e-a,
O ka ela hamau i ka leo la-e-a,
Mai Pane ae oe o makani la-e-a,
Ike ole ia aku Halawa la-e-a,
Aina i ka mole o Ewa la-e-a,
No Ewa oe no ke awa lau la-e-a,
No ka lihi kai au i ka wili la-e-a,
No Honolulu i Kapuukolo la-e-a,
Haina ka Inoa i lohe la-e-a,
Oulumaheihei Hoapili la-e-a,
O ka Ona nui o Wailuku la-e-a,
O ka helu ekahi o Maui la-e-a.
NA KEAPO.
Auhea wale oe e ke Ao la-e-a,
Hoolai i ka lewa o ka lani la-e-a,
Nana i kii ae ka Opua la-e-a,
Pili aku ai me Kaawela la-e-a,
Hoi mai noho me Poloula la-e-a,
Keu aku o Ukali a ka hua la-e-a,
Ka hone i ke alo o Makalii la-e-a,
O kela oi aku o ke Koa la-e-a,
O Aukelenuiaiku la-e-a,
I ka alo aku i ke ehuehu la-e-a,
Pau na kupu eu o luna la-e-a,
Nana i kaha na Pali paa la-e-a,
O ka pali hopu hoi o Hawewe la-e-a,
Ua noa i ka manu a Ku la-e-a,
Ka Iwa na maka o Kahai la-e-a,
Haina ka Inoa i lohe la-e-a,
Oulumaheihei Hoapili la-e-a,
O ka Ona nui o Wailuku la-e-a,
O ka helu ekahi o Maui la-e-a,
NA KEKAULA.
Auhea wale oe e ka la la-e-a,
Hiki ae ai ma Kumukahi la-e-a,
Kaupono ae la i Maukele la-e-a,
Hoi ae ma Hanakaulua la-e-a,
Nana i lawe mai ka makana la-e-a,
A loaa mai au ia nei la-e-a,
I ka lai hoi o ke Kaona la-e-a,
I ka nana wai ulaula la-e-a,
A ooe a owau kai ike la-e-a,
Ka mania o ke kiaha ela la-e-a,
Lawa ole iho kuu makemake la-e-a,
Koi aku ka manao i ke Kini la-e-a,
Kaohi ka wela i kuu puu la-e-a,
Naua i hapai kuu kino la-e-a,
Lana koi ae ai ka manao la-e-a,
Haina ka Inoa i lohe la-e-a,
Oulumaheihei Hoapili la-e-a,
O ka Ona nui o Wailuku la-e-a,
O ka helu ekahi o Maui la-e-a,
NA HAILI.
Auhea wale oe e ka Wai la-e-a,
E niuiu ai e ka Huila la-e-a,
Puahi launa oi nei la-e-a,
Ka ii oi'la he puua la-e-a,
Kamau kiaha i olu la-e-a,
I Pahee ko puu ke moni la-e-a,
Mai kuhi no oe na hai la-e-a,
O ko mikimiki ana iho la-e-a,
A he mea wela ole o ka maka la-e-a,
Au i pulale iho ai la-e-a.
Eia e ka pono e penu kai la-e-a,
Ma ka piko ma kahi momona la--e-a,
A he ole ko Alunu iho la-e-a,
E haawi ko lokomaikai la-e-a,
I lehulehu na hale kipa la-e-a,
Haina ka Inoa i lohe la-e-a,
Oulumaheihei Hoapili la-e-a,
O ka Ona nui o Wailuku la-e-a,
O ka helu ekahi o Maui la--e a.
NA LAWER.
Auhea wale oe Hawaii la-e-a,
E ka heke o na Mokupuni la--e-a,
Eia o Maui o Kama la--e-a,
Ke pani Awa o na hono la-e-a,
Hoi ai ka wai Iao la-e-a,
E pipii ka huna i Kanaloa,
Ke loku la i Molokini la--e-a,
Ua hiki ka Hoku i Lanai la--e-a,
Ua anapu ka wela i Molokai la--e-a,
Malamalama aku la Oahu la-e-a,
Ikeia Kauai o Mano la--e-a,
Kooiho ka manao i Lehua la-e-a,
Ma ka latitu o Niihau la--e-a,
Hailapu ke aloha i Kaula la--e-a,
E lele pauki i Nihoa la-e-a,
Haina ka Inoa i lohe la-e-a,
Oulumaheihei Hoapili la--e-a,
O ka Ona nui o Wailuku la-e-a,
O ka helu ekahi o Maui la-e-a,
NA KAUMI.
-
KA MOOLELO O NA KAMEHAMEHA,
-
NA S.M. KAMAKAU.
HELU 78.
-
NO KA NOHO ALII ANA O KAUIKEAOULI
MALUNA O KE AUPUNI, A UA KAPAIA
O KAMEHAMEHA III.
-
He nui no na olelo mawaena o Boti a me Kekuanaoa—A hoopau ae la o Boti i ke kaua, aku, aole no e kaua, he kaua no Ulunui, a i Hanakewa i Uluoa.
Ua hoi mai la o Kekuanaoa e hai ia Kaahumanu ma i ka ae ana o Boti e hoopau i ke kaua, a pau wale iho la. A hoi mai la no hoi o Boti a noho iho la ma kona pa halu ma Pelekane. O ka lapaau ka hana nui, a ua hoakoakoa ia mai ka poe akamai i ka lapaau a me ka hoonoho iliili, niu hoi o Kaoo ma, Kuauau ma, Kinopu ma, Kahiole ma, Nahinu ma, Kekaha ma, Hewahewa ma no hoi a me kekahi poe kahuna e ae. He akamai io no nae o Boti i ka loina o ka lapaau a me ka waiki ana.
Iloko o na malama mua o ka makahiki 1829, ua hoomaka iho la o Boti e hana i ke alanui aupuni, mai ka puka o ka pa mauka o Pelekane ka hoomaka ana, mawaho o ka aina o Kahehuna, a hiki ma Auwaiolimu, a iho ma ke kahawai o Pauoa, a ma kela aoao o Kulokohonu, a iho i Kaheiki, a pii ma kela aoao o Alekoki, a holo pololei i Kawananakoa. A o Keaniani hoi, ua hoomaka mai ia ma ka nuku o Nuuanu, a koino i ka hau o Kahaukomo. O ke ano nae o ke alanui o Nuuanu i ka wa kahiko, ua hihipea ia e ka hau, a ua poeleele, a ua paa loa o luna, a malalo, ua pohopoho loa e like me na loi-kalo.
Ua olelo ia o Nuuanu, he alanui maikai i ka wa kahiko, he kulanakauhale maikai e ku ana ma kela a me keia aoao o ke alanui mai Kahapaakai a hiki wale aku hoi i Hapuu, he manienie akiaki ma kela a me keia aoao o ke alanui; he mau kihapai maikai, e ulu ana ke kalo, ka uala, ka maia, ka awa, ka wauke, ke ko, ke olona a me ka momona o ka aina.
He nui na luakini waihau e haipule ai na kanaka, a ke waiho nei na kahua kaulana mai Kahapaakai a hiki i ka nuku o Nuuanu. He mau haiau kaua, a he mau haiau hoomanalo i ka aina, wahi a ka olelo a ka poe kahiko.
O Nuuanu no hoi, he kahua kaua maikai i ka wa kahiko—A i ke au no hoi o Peleioholani, oia no ke kahua kaua ana i kaua ai me Alapai Nui a Kauaua ka Moi o Hawaii. A pela no i na'lii mamua aku a mahope mai. I ka ulu ana o ka hau, ua hihipea ae la i ke alanui, lilo iho la ka nani o Nuuanu i wahi pohopoho, a ua noho ia e ka poe powa a me ka poe kaili wale.
O Keaniani ka mea nana i hoakea mua ia ke alanui, a ike mua ia ke akea, a me ka malamalama o ka la—I maikai ai hoi ke alanui e kauo mai ai ke koena laau o ka Luakini pou nui o Kawaiahao. Ua kalaiia ke koena laau ma Koolauloa, a ma ka wau mai a pae i Kaneohe, a ua kauo ia mai ma ka pali o Nuuanu.
Hoomaka hoi o Boti i kana hana ana i ke alanui ma kai aku nei a hiki i Kaalaa, e iho aku ai i ke kahawai o Kaheiki, aia hoi maluna o ka auwai, e ku ana kekahi pohaku, oia ka Boti ma e uneune ana a hoolele aku i kahi e, oiai ua kupono ua pohaku la i ke alanui, aole nae hoi i kupono loa, ua ku aui iki no. Hele mai la nae kekahi kanaka a olelo mai la ia Boti, "Auhea oe e ke alii, e waiho oe i keia pohaku pela, no ka mea, he kiai keia na ke akua i waiho ma keia wahi, aia no ka hale o ke akua, (kuhikuhi kela ia Kaheiki, e kau mai ana iluna.) He kiai keia no ka hale o ke Akua, a o Hoeu ka inoa o keia pohaku. Ke makemake nei hoi oe e hoolele i keia pohaku i kahi e, aka, eia ke ano o keia pohaku, e hoeu ia ana oe e lele i kahi e, aole paha oe e noho ana ma Hawaii nei, he pomaikai paha nou ke hala ka makahiki, alaila e hoeu ia no oe."
Pane kikoi mai la hoi kekahi mau wahi keiki muki baka o Boti, oia o Hohopa me Hukiki. Pane hou aku no ua kanaka nei, "E malama olua, o kaia olua i ka puakala."
I ka hana ana o Boti i ke alanui a hiki i Luakaha ma Nuuanu, ua loaa kekahi wahi kio pohaku ma ke alanui, a manao iho la ia e kiola a hoolele i kahi e, aka, hele mai kekahi wahi kanaka kilo kuhikuhi puuone, a olelo mai la ia Boti: "E waiho malie pela i keia kio pohaku, no ka mea, o Kumanamana ka inoa o keia pohaku, a o Pohakumanamana kekahi inoa; aohe alii nui e hiki ke wehe i keia pohaku, no ka mea, he pani keia no Kapapaikawaluna, aia hoi malalo o keia pohaku he ula ka ia; a o ke kumu keia o ka wai o Kunawai, Kahoakane, Koula a me Kewalo." O Luau ka inoa o keia kanaka e olelo nei ia Boti.
I ka lohe ana nae o Boti i keia mau olelo, kena koke ae la oia i na kanaka e hue i ua pohaku nei. I ka huai ana, me ka eli ana i ka lepo, ua aneane he umi anana ka loa, a pela no hoi ka laula, aka aole nae i pau mai kona mau palena, a he mea hiki ole hoi ke hoomaopopo ia kona nui a palahalaha hoi, a haalele wale iho la o Boti i kona manaolana. Kuhikuhi hou aku o Luau ia Kukuipuka a me na kupua e ae mauka aku.
NO KE KOMO IA ANA O KA LUAKINI O KAWAIAHAO.
I ka noho ana o Boti mauka o Nuuanu i ka mahiai kalo, mai Kahapaakai a hiki i Makuku, e iho aku ai i Keawawapuahanui. Aia hoi, ku mai la kekahi manuwa Amerika, o ka Tiniseni ka inoa, o Kapena Pineha ke alii moku, a o Rev. Charles S. Stewart ke Kahunapule maluna, a oia no hoi kekahi Kahunapule a ke Alii Wahine Keopuolani i lawe pu ai i Maui iloko o kona mau la.
I ke ku ana mai nae o ua manuwa nei, ua paa iho ka luakini pou nui o Kawaiahao. He hale kahiko loa o ke oki ana o ka laau. Na Koolaupoko i hana a i kalai ka laau, a o Keaniani ke alii o ka poko. I ka makahiki 1825, ua hoomakaia ke kalai mua ia ana o ka laau mauka o Paupalani, i Wahiawa, a o ke koena a me na lako e ae o ka hale, ua hanaia ma Koolaupoko a me Koolauloa. A ua kukuluia i na malama hope o ka makahiki 1828, a i na malama mua hoi o ka makahiki 1829, ua paa ka hale, a ua hana ia ka Awai, a ua uhiia i ka weleweka ulaula, a he mau kia ipukukui ma na aoao.
I ke ku ana mai nae o ua manuwa nei, ua ee aku la ka Moi Kauikeaouli a me kekahi poe alii, a holo aku la i Lahaina. O keia holo ana nae a ka Moi i Maui, e kii ana i ke kaikuahine, ia Hariata Nahienaena a me na'lii a pau o Maui, oia hoi o Kekauonohi, Keluahonui, Hoapilikane me Hoapili-wahine, Kaukuna Kahekili Kahionamaka a me na'lii e ae a pau o Maui. O kekahi moku hoi, (Makauwahie) ua kii i na alii o Hawaii, ia Kuakini, Keoua, Kapulikoliko, Naihe, Kapiolani, Kekupuohi, Kahahana, Akahi ma, Luahine ma hoi, a me na'lii no a pau o Hawaii. Pela no hoi ko Kauai poe alii, o Kaikioewa ma, Keaweamahi, Ahukai Kauukualii, Haakulou ma, Namaha ma, a me ko Kauai poe alii no a pau. A o keia kauoha ana i na alii a pau, no kauhauhua o na Keiki Alii Moi, oia no o Kauikeaouli a me Nahienaena.
I ka akoakoa ana mai hoi o na'lii a pau ma Honolulu, ua hakuia ka poe kahili kahiko, oia hoi o Eleeleualani. Hawaiiloa. He umikumamalua kahili nui, eono ma kela aoao, a eono hoi ma keia aoao.
I ka la 3 o Iulai 1829, oia paha ka Poalima, ua komo ia ka Luakini ma Kawaiahao, me ka hoike ana o na'lii i ka Hua me ka Hookahakaha. Penei hoi ka hana ana: Ua hanaia kekahi manele, he akolu paha anana ka loa, a hookahi paha anana me ka hapa ka laula. La haliiia o luna i ke kapa i kinohinohiia, a i hooluuia i na wai hooluu o kela ano a me keia ano, a ua hoope ia hoi i na waiala, hele kela a pulupe aala onaona i ka hanu. Ua kipapaia a nolunolu maluna o ka manele, a o ka Ahuula Halakea o lahu maluna iho, a noho iho la na'Lii maluna iho. Ma ke poo o ka manele o Hariata Nahienaena, a mahope lea hoi ka Moi Kauikeaouli.
O Boti a me na'lii kane a pau loa, ia lakou ka auamo o ka manele; (he poe alii hanau wale no o ka aina, aole e ko mo kekahi poe alii i hoalii wale ia). Ua owiliia hoi ka hu-a o ke kapa mai ka manele aku, aia hoi na'lii wahine o Kaahumanu ma, Kinau ma, me na alii nui o ka aina, e auamo ana i ka hua. He hapa mile paha ka loa.
O na kahili nui ma kela aoao keia aoao o ka manele, a oi aku imua, a emi mai i hope. A o na koa ma kela a me keia aoao o ka huakai, a me na koa o luna o ka manuwa, a me Kapena Pineha a me na alii manuwa a pau a me ka poe puhi ohe, me dimebala a me na pahu kani a me na mea kani e ae he nui. He kanaono ka nui o ka poe i hookaawaleia ma na mea kani.
Ua kahikoia ka Moi i ke kapa alii gula, a ua uhi ia iho hoi i ka aahu ahuula hulumanu mawaho. Pela ke komo ana i ka Luakini, me ka puka ana iwaho, a me ka hoi ana a komo i ka Halealii.
I ka himeni ana maloko o ka Luakini, na Rev. H. Binamu i hoolaa, a ua akoakoa pu mai no hoi na Misionari a pau Na ka poe hookani puhiohe a me ke kani ana o ka pahu a me na mea a pau, na lakou i himeni ka leo hoolea iloko o ka Luakini me ke kupinai o na leo me ka hanohano eehia. A i ka pau ana o ka aha pule anaina, ua hookuuia ka Aha'Lii me ke anaina holookoa. A puka aku la na'lii, me ka auamo ana i na Keiki Alii Moi. Iloko o ia la, ua hookaulanaia ae o Kuhooheihei Paki, no kona ikaika i ka auamo hookahi ana ia Eleeleualani, oia hoi ke kahili nui hookahi o Keopuolani.
A ma ia la no hoi, ua hoohanohano ae o Kaahumanu i kana moopuna ia Ruta Keelikolani. Ua hanaia kona hua, me kona kahili nui o Poouliuli, me kekahi pukui uhiuhi a mamo, a ua auamoia no hoi oia iluna o kona Hua.
(Aole i pau.
-
No na olelo a Lanikaula.
-
Ua ike au i kau olelo ma ke Au Okoa o keia pule no na mea e pili ana i ka Laina Mokumahu, e pane ana i na olelo a kou hoa kauwa a ka lehulehu. Ke ike nei nae au, he oiaio na olelo nupepa o ka wa i hala i olelo pu ia'i oe he hoopilimeaai, no ka mea, ua huli oe ma ka aoao kokua i keia Kanawai, ma ko lohe ana ua makemake ia e ka Moi a me kona Aha Kuhina i keia Kanawai. Ua kuhi au he kanaka kuokoa oe, a he waha oiaio no na makaainana o Molokai a me Lanai, aole ka. Ua manao no hoi au he kanaka naauao oe, e alakai ana ia oe iho, oiai no hoi, ua loaa ia oe ka ike o ko Molokai a me ko Lanai poe i hilinai ai, aole nae oe pela.
Aole au i poina i kau haiolelo maloko o ka malu hale o H.A.P. Carter, kekahi haole kuonoono o Honolulu nei, a he haiolelo hoi e pili ana no na dala e haawi manawalea ana no na Laina Mokumahu. Ua hoole oe me he olelo paa la, aole e haawi ana i wahi dala hookahi no ua laina mokumahu la, aka nae, ke kue nei oe ia oe iho. Ke manao nei no hoi au, i hookahi no olelo ana a ke kanaka olelo oiaio, i hookahi koho ana, i hookahi hooholo ana, aole nae oe pela e ke hoa. Ke manao nei no au, e like me ka'u olelo mua, he aloha aina oiaio au, a pela no kuu aloha io no kuu Moi a me ko'u hoa makaainana, aole au e komo ana a pulou iho i ka uhimaka o ka mea hookamani; ua ike no au he mea hoohihia ka aelike, a he mea hoopilihua i ka manao, no ka mea, o na kanawai honua a pau, he mea loli wale ia, a ina e ike ana kakou ma keia hope aku i ka pono ole o keia hana ana, aole e hiki ke pale ae, no ka mea, ua paa ko kakou aina iloko o ka aelike, alaila, he elua mea e hoeha mai ai i ko kakou manao; ina e hoole ana i ke Kanawai ma keia hope aku, alaila, o ke komo aku la no ia o keia aina a pau a me ka poe o luna iho iloko o ka lima o ka hui o ko na aina e, a o ko kakou lilo no ia i waiwai na lakou; a ina hoi e hiki ole ke hoopauia, alaila, e hoehaeha mau ia auanei ka naau o kakou a me ka kakou mau keiki ma keia hope aku.
Ua nele anei au i ke aloha i kuu aina a me kuu Moi, a me kuu aloha i ko'u lahui iho, no ko'u koi aku ia oukou e hoole like kakou i keia Kanawai? a me ka hai aku hoi i keia mau pilikia. Ua kuhihewa oe i kou hoopili ana i ka Palapala Hemolele, no ko makou hoole ana i keia Kanawai, a ua hoole ka makou i ka ke Alii, no ka mea, ma ka hana Kau Kanawai iloko o ka Hale Ahaolelo, aole he Kauoha Moi malaila, aole no hoi i hoohaiki ia ka pono wahaolelo o na makaainana e ko kakou Moi—ua waiho akea ia mai kela hoa keia hoa e kamailio e like me kana i ike ai. Ua manao ka paha oe ua Kakau mua e ka Moi i kona inoa malalo o keia Kanawai, a mahope hele mai ka Moi iloko o ka Ahaolelo, a Kauoha mai la i ua hoa a pau. "E hooholo oukou i keia Kanawai, no ka mea, ua aponoia e a'u" a hoole aku makou, alaila, ua hoole ia i ka ke Alii? aole pela keia hana. Ua mahele kaawale ke Kumukanawai o ko kakou Moi i na mana kaawale ekolu iloko o kona aupuni—O ka mua—O ka Mana Kau Kanawai—oia ka kakou i hana ai, aole kekahi mau mana e ae iloko olaila; he enemi anei makou i ke aupuni a me ka Moi, no ko makou hoole ana i ka mea a makou i ike ai he pono ke hoole, ma kahi he manu kiekie ko makou hiki ole ke keakea ia mai? Aole! Aole au e ae iki ana i keia olelo au, he enemi au no kuu aina iho, he haaheo au, ke pono a ke make paha ma na kapuai o kuu Moi a me kuu aina, ina o kona hopena ia, aole no hoi au e alo ae ana no na mea e ili mai ana. Ua kapae ae au i kau huaolelo "enemi" i kahi hiki ole ia'u ke ike aku.
Ua olelo kaunu oe no ka nui o na pomaikai e loaa ana ia kakou no na Mokumahu a oukou i kiola iho nei i na dala, "he moakaka lea loa," e like me ka la i ke awakea a me ka mahina puka mai i na po o Kulu. E kuu hoa, ua ike au i kau mau mea e olelo nei, aole nae ia he mea e akaka ai, no na dala a oukou i hoolei iho nei ka loaa ana oia mau pomaikai, no ka mea, ua hoike akaka mai Ua poe nona ka mokumahu imua o ke Komite Kalepa—E holo mau ana no keia Mokumahu mawaena o Kapalakiko a me Honolulu no na makahiki he umi, a ina e loaa ana, a e pomaikai ana, aole no ia loaa ana no na dala a oukou i haawi iho nei iloko o ua Kanawai la. He oiaio keia, e loaa ana ia kakou na pomaikai ili wale mai, mai keia mau mokumahu mai, aole nae ia loaa ana mai no na dala i haawiia iloko o keia Kanawai; a o ka ili ana aku o na hua ai me ka palaho ole maluna o kela mau mokumahu, aole no ia i lawe ia aku ma keia Kanawai, ina e Kanawai ole ana, alaila, e holo mai ana no ua Moku la, a e lawe aku ana no i ua mau hua la; a ina e emi ana ke kumukuai o ka lole ma keia hope aku, a i keia wa paha, aole no ka oukou Kanawai keia emi ana, no ka mea, he emi no keia e ike ia ana noloko mai o keia holoholo mau o na moku, aole nae no na dala i lilo aku la.
Aole o nei Moku wale no na mea nana e lawe keia mau ukana mai o kakou aku a i Kaliponia, aka, he mau mokumahu e ae no e holo mau ana mawaena o Kina a me Panama, a me he mea la, o kakou ko lakou wahi e oioina ai, a e ili mai ana no na waiwai hou e hoopomaikai ai ia kakou mai Kina mai kekahi, a mai ka Hikina mai hoi kekahi; a he mau mokumahu e ae no hoi kekahi e holoholo ana ma keia hope aku, mawaena o Iapana a me na aina Hikina, a ma keia mau moku e holo mau mai ana, he nui na pomaikai ili wale mai me ko kakou lilo ole aku, nolaila, o ko oukou ae ana aku i keia mau dala, he mau dala lilo wale aku keia no na pomaikai e loaa wale mai ana. Ke manao nei hoi au, he oi loa aku paha ka pomaikai e loaa ana ia kakou mai na mokumahu mai e holo ana ma na Laina mai Amerika a i Kina a me Iapana. He kikowaena io ko kakou mau mokupuni iloko o keia Pakipika nui, a he puu oioina hoi no ka poe hele moana.
Ua lako kahiko kakou i na waiwai mai na mokupea mai, a i ka wa mamua loa aku nei, ua loaa e no ia kakou ka makepono o na lole i kuai ia mai; aole nae he mau mokumahu iloko oia manawa, a nolaila, he au no ka manawa ka makepono a me ke poho, ka pii a me ka emi; aole keia he rula paa, aia a uku ia aku kekahi Laina Mokumahu me ke dala, alaila, e mau loa ana ka makepono o ka lole ia kakou.
Ua olelo oe. "E uku ana ka Hui ke hai ka. Aelike." Ua manao ka paha oe he poe hupo loa ka poe nona na mokumahu, e ae wale mai ana lakou la i ka olelo aelike a lakou la i ike ai he mea e pilikia ai lakou la, aole lakou la e ae wale mai, me he kaa la mahope o ka lio kauo. He oki loa oe o kau manao ana aku, aia iloko o laila e waiwai ai kakou, aole anei oe i ike i ke akamai o kela poe, "ua hala aku la ka Puulena " aia ia Laina Mokumahu he $50 000, a nau no hoi e uku aku i ka ukupanee pokeokeo wale.
Ua kuhikuhi mai oe i ka poe mahiko. Heaha kau ilaila? Ua ike anei oe i ka puka a me ka holo mua oia hana me ka pilikia ole? Ua ike hoi oe i ka mahiko ma Lahaina, pehea ia? aole anei i haule ino? aole anei i haule me na mahiko a pau iloko o ka lilo nui a me ke poho? I hoohalike anei oe i ke Kanawai o na Mokumahu me ka Mahiko, no ko ike pinepine a lohe pinepine paha i ke poho a me ke kudala ia o kela aina keia aina mahiko, a me ko lakou mau wili no ka oi aku o na lilo i na loaa, a lilo ai na aina mahiko ia hai, a hoonele i ka mea nona ia wahi? pela paha auanei ka pomaikai o ua kanawai nei au e helu nei i ka nui o ka pomaikai ole wale. Ua kokua keia hoohalike au i ko makou aoao, a pela paha auanei ka hopena, a ina aole pela, e noho ana kakou iloko o ka pilihua e like me ka'u olelo mua.
Ua olelo oe, "e mahuahua ana na loaa ma na dute o na waiwai i lawe ia mai e lakou," ua aneane no paha e haiki ia pomaikai au e haanui nei, no ka mea, he like no no keneka dute o ka waiwai i lawe ia mai e na mokumahu hoopau dala a me na mokupea holo mau, aole no e oi aku ke dute o ko ka mokumahu imua o ko ka moku maoli ma ua waiwai like, a pehea la hoi oe i ike ai e mahuahua ana ko ka mokumahu mamua o na moku e ae. Ina hoi e holo io ana na Laina Mokumahu e hoomakaukau ia mai la e ko Beritania a me ko Farani e holo mai ma keia moana, a e kipa io mai ana i o kakou nei, aole anei e like ana no ke dute me ko na mokumahu i lilo ai ke dala? aole anei i oi aku ka pomaikai o ka loaa o ko kakou waihona mai loko mai o na waiwai i lawe ia mai e na mokupea e holo mau mai nei, a me ko na Laina Mokumahu e ae e holo mai ana a kipa mai i o kakou nei, mamua ae o ka Laina Mokumahu i lilo ai o ke dala? Ua mahuahua na loaa e ike ia nei i na makahiki i hala ae nei noloko mai o na waiwai dute i lawe ia mai e na mokupea, a heaha iho la ka hewa oia, ina no hoi e holo mai ana no keia mau mokumahu me ka uku ole o kakou ia lakou?
Ina e hookuu aku kakou i keia mokumahu holo mai malalo o kona holo ana ma kona aelike me ke aupuni o Amerika, ina no la ua lilo keia hapa pomaikai i loaa mai ia kakou me ke dala lilo ole aku, a o ka kakou hana o ka humuhumu eke wale no.
Ua olelo oe, "ua kue ka makou no ke ano pilikino," pilikino la ia wai? ina ona anei o ka Laina Mokumahu? Kue anei i Ke Kapena? Aole a makou kue pilikino—O ka'u haiolelo e kue ana no keia Kanawai imua o ka Hale Ahaolelo okoa, aole au i kue no ko'u ano enemi i na ona o ka Laina Mokumahu, aole no a makou kue me lakou, aole no i hoopuana ia mea iloko o'u he kue pilikino, aole no hoi he manao kue i na Kuhina ma ke ano pilikino, he ole loa no—Ua kokua pu kakou ma ka hooholo pu ana ma ka hapanui o na Bila Kanawai a na Kuhina; a he poe lakou a'u e mahalo ai no ko lakou noho makaukau, makaala, ahonui. Ina paha ua kue kekahi o makou i keia Kanawai ma ke ano kue pilikino i na ona o ka Laina Mokumahu, a ina Kuhina paha, aole ou i huipu me lakou ma ia ano, he oki loa no, a ua kuhihewa oe ke hoopaakiki mai. Ua kue au e like me ka'u i manao ai, aole hoi na hai au i ao mai.
Ua like no au me oe ma ke ake ana e holo mua ai ke aupuni, aole nae au i like me oe, e hooholo mua i ka hoolilo aku i kekahi puu dala nui ia hai me ka pau ole o ko loko nei mau hemahema. Ina ma ka hooholo