Ka Nupepa Kuokoa, Volume VII, Number 24, 13 June 1868 — No ka Lokomaikai. [ARTICLE]

No ka Lokomaikai.

Kumumanao i hakuia a heluheluia e Miriama Likelike Kapili i ka la Hoike o Kawaiahao. Iune 10, 1868. O ke aloha, oia no ka mole o ka lokomaikai, no ka mea, ina aole i komo ia mea he aloha i ka naau, aole e loaa keia mea he lokomaikai. Na ka lokomaikai a me ke aloha i hoopalupalu ka naau paakiki o ke kanaka a lilo i mea olu, me he wai la e hoopulu ana i na kihapai maloo. O keia mau mea elua, he makana no ia na ke Akua Mana Loa i haawi mai ia kakou. No ke aha ka mea a ke Akua i haawi mai ai i keia mau mea a kakou e ike nei? Ka la me kona nani, ka mahina e hoomalamalama mai nei i ka pouli, na mauna, na puu, na awawa, na muliwai, na laau a me na pua nani aala onaona. Na ke Akua no i hana keia mau mea nani, a ma kona lokomaikai ua haawi mai i kela a i keia mau mea, i mea e pono a e lealea ai kakou. No ka lokomaikai a me ke aloha o Ka Makua o ka lani ia kakou i haawi mai ai i Kana Keiki Hiwahiwa i kalahala no kakou. A pehea hoi kakou e hoike aku ai i ko kakou aloha i ua Keiki la? Ma ka hana ana i kana mau mea i kauoha mai ai oia hoi ka hoaahu i ka poe ilihune, hanai i ka poe pololi, a ao hoi i ka poe e noho ana i ka pouli. Na ka Mea Kiekie Loa i haawi i naau lokomaikai i na mea a pau, a kakaikahi ka poe i loaa ole nei mea he lokomaikai. Ua ike ia ka lokomaikai a me ke aloha o kekahi poe ma ka hapai ana i mau Aha Himeni a me kekahi mau hana e ae no ka poe pilikia o Kau. Ua lohe au i ka hana maikai a kekahi keiki o Hawaii nei o H. Opukahaia kona inoa i noho ma Amerika, a mamua o kona make ana ua kauoha aku oia i kekahi o kona mau hoa imi naauao e huli i mea nana e lawe mai ka Palapala Hemolele a ke Akua i kona one hanau. Ma ia hope mai, ua lawe ia mai ka malamalama ma keia Pae Aina e na Misionari. Aole anei he hana lokomaikai ka kela keiki i kona lahui? Ko'u manao he hana aloha a me ka lokomaikai ka kela keiki, no ka mea, ina aole e hiki mai ka malamalama o ke Akua, ke noho nei no kakou i ka pouli, aole e like me kekahi mau hana malalo. Mahalo makou i ka nui o ko oukou lokomaikai ma ka haawi ana i Aha Himeni a me kekahi mau hana e ae i mea e nani ai a e maikai ai ko makou Kula. Aloha.