Ka Nupepa Kuokoa, Volume VII, Number 16, 18 ʻApelila 1868 — Ka Nupepa Kuokoa. He mele no Kualii, Kulanipipili, Ku-LANIOAKA, KUNUIAKEA &c. [ARTICLE]

Ka Nupepa Kuokoa.

He mele no Kualii, Kulanipipili, KuLANIOAKA, KUNUIAKEA &c.

I haku ia e Kumahukia a me Kaiwiokaekaha, na kahu ponoi o Kualii; ma ke kaua i Kunia, ma Keahumoa i Lihue. Ua hanau ia o Kualii ma Kalapawai, ma Kailua, Koolaupoko, i ka A. D. 1555. O Mahuluanuiokalani ka makuahine, a o Kauakahi a Kahoowahaokalani ka makuakane. Ua waiho aku au i ke Kumuuli me Kumulipo no ka mohai ole ka ! Pela paha oukou. S. M. KAMAKAU. 7. O Kauai nui moku lehua, Moku paneelua iloko o ke kai, Moku paneelua iloko o Kahiki, I halo ia Kahiki ia Wakea, Konohia, Kau mai ana Kona i ka maka, O hookumu ilalo o Kumuhonua, O nakeke ka papa i Hawaiiiakea, O kuhia i ka muo o ka la, Ke kau mai la ka la i Kona, Ke moe e mai la no Kohala— O Kahi—ki, Ia wai la o Kahiki? Ia wai la? Ia Ku no— 8. O Kahiki moku kaialoa, Aina a Olopana i noho ai, Iwaho ka la, ilalo ka aina, O ke aloalo o ka la, O ka moku ke ike mai, Ua ike oe? Ae, ua ike, Ua ike hoi au ia Kahiki, He moku leo pahaohao ko Kahiki, No Kahiki kanaka i pii a luna, A kuamoo o ka la ku iluna, Keekeehi iho ia lalo, Aole kanaka o Kahiki, Hookahi o Kahiki kanaka he haole, Me ia la he akua, Me a'u la he kanaka, A he kanaka no ia pa ia kaua, he kanaka, Hookahi ia e hiki e hala, Hala aku la o Kukahi la o Kulua, O Kukahi ka po o Kulua ke ao, O haki ana ka ai, Kanikani ai a Manu, Hoolohe mai ana Manu o lanakila, Malie ia wai Lanakila? Ia wai la? Ia Ku no— 9. Ilaila ka ua, ilaila ka la, Ilaila ka hoku makahalo, O Kaula, o Haikala o Kau, O kahi a ka la o Puna, O Hilo, o Hana, o Lanakila, O Hooilo ua ino pele, O ka makani, Ia wai ka makani? Ia wai la? Ia Ku no— 10. Puhia ka makani a Laamaomao, O ke ahe a Koolauwahine mai lalo, O Kauai ka'u i ike, O ke kiu ko Wawaenohu, O ka hoolua ko Niihau, O ke Kona ka makani ikaika, O ka Aoa ka makani ino, O ka makani halihali, Wai pua kukui, Ke laweia la e Lonomuku, E paka ilalo o Hana—e. O ia koolauwahine o lalo, O Kauai, ke paka! ilalo o Wailua la. O ka u—a, Ia wai la ka ua? Ia wai la? Ia Ku no—. 11. Iluna ka ua o Puuanalua, Ku i ke kao o Maiku, Hoolewa ke ao o ke kaina, I moe a ka ua i Kunalo, I pakakahi ka ua i ka ili, I iliki ka ua i Kananaola, Pahee Mahiki ke ka ! la, Ua luia e ka ua e hina, Halulu ai ilalo o Maheleana. O ka punohu a ka ua kai Kahalahala, O ka pokii a ka ua, E ua ka ! i ka lehua la. O ka La— Ia wai la ka La? Ia wai la? Ia Ku no— 12. I puka ka la ma Kauiki, I hawewe ka 1a i Kaupilioloula, Ke kohokoho la kamalii,

Ke na'unu'u la i ka ia, Ka la kieke pua o Hilo, O ke kua o ka la kai hulia iluna, O ke aloalo o ka la kai lawea ilalo, O ka malu o ka la kai kaa iloko, O ke aka o ka la kai hele iwaho, O ka mehana o ka la, Ke hele nei maluna o ka aina, A kau aku la i Lehua— O ke kai— Ia wai la ke kai? Ia wai la? Ia Ku no— 13. I nu mai kai i Kahiki, I meha kai i ka aina. I poi ke kai i ke kohola, I poha ke kai i ka puao, I nehe ke kai i ka iliili, I lawea ke kai i ka lima, I kiki ke oho i ke kai, I ehu ke oho i ke kai lia, I lelo ke oho i ke kai loa, I pala ke oho i ke kai kea, He kai lihaliha ko ka puaa, He kai momona ko ka ilio, He kai likoliko ko ka inoa, He kai ala ko ka anae, He kai hohono ko ka palani, He kai heenalu ko Kahaloa, He kai hopuni ko Kalia, He kai au kohana ko Mamala, He kai au a ka puuone. He kai kaha nalu ko Makaiwa, He kai ka anae ko Keehi, He kai alamihi i Leleiwi, He kai awalau kee Puuloa, He kai puhi-nehu puhi-lala, Ke kai o Ewa e noho i ka lai, O Ewa nui a Laakona, O Kuikealaikauaokalani, He kai maokioki ko Heeia, He kai o hee ko Kapapa, He kai kuu honu ko Makawai, He kai ohaika ko Kualoa, He kai nei ko Kaaawa, He kai huliamahi ko Waialua, He kai ahiu ko Kahana, Wehe kai ia Paao, Ikea Paao i ka waihi, Ikea ka hiwa mai lalo o Kona, O Kahiwa—ia, mai lalo o Kona— (Aole i pau.)