Ka Nupepa Kuokoa, Volume VII, Number 6, 8 February 1868 — Page 2

KE KUOKOA, HONOLULU, FEBERUARI 8, 1868.

NU HOU KUWAHO.

                      Ua hooholo ka Ahaolelo nui o Amerika Huipuia he Olelo hooholo e kauoha, aku ana ia Adimarala Thatcher e ae aku i ka hoomaikai ana a ka Moi o Hawaii.
                      Ua ku aku ma ke kulanakauhale o Havana kekahi mokuahi Beritania mai Mekiko aku, a ua hoihoi aku oia i na pilikana a pau o ke Kuhina Elele o Beritania.
                      Ua lono waleia ae, o ke kumu o ka haunaele kipi ma ka anemoku o Iutakana, na, ka eueu Santa Ana i hoalaala.
                      Ekolu mau moku kuna kaua e pani paa ia ia Sisala ma Iutakana, a ua kauohaia o Generala Diaza e hele i ke ahua kaua.
                      Ua lono waleia ae, e kokoke ana ka Ahaolelo o ka Ripubalika o Mekiko e hoomakaukau hou i na Puali kaua a hiki 18,000 mau koa ma ka lilo kupono i ka $400,000.
                      Ua hiki aku ka lono i Ladana, ua hoi hope mai ka Puali koa Beritania i hoounaia ai i Abisinia, a aia lakou ma Senafe, mai ka la 7 mai o Dekemaba.
                      Ua ae ia ka hookuu ana aku i na Kuhina mua o Italia a e hoomaka hou ia ana he Aha Kuhina hou malalo o Meneberea.
                      He nui loa ka mai ma lena o na koa Farani i hoounaia ai i Italia. Kahi mea apiki loa no ia, o ka pau e mai i ka make, aole e ike i na paka nau a ke keiki Garipaladi.
                      Ua paa loa ka manao Victor Emanuela e hoolilo ia Roma i Capitala no kona Aupuni. Auwe no ka hoi e' i hea iho ka hoi auanei ka Pope.

HUNAHUNA HUIKAU.

                      Ma kekahi wahi o Kenetuke ua nele loa i ka wai ole, a ua kii ia ka wai maluna o na kaa ahi a laweia mai iloko o na mile kanalima ka loihi.
                      O ka nui o na dala i lilo no ka hana mua ana i ka Hale Ahaolelo nui o Amerika Huipuia ma ke kulanakauhale o Wasinetona he $1,400.000. No na hana hou ana mahope iho, ke kokoke aku nei e $12,000,000.
                      Aia ma Kilona (Caylon) kekahi laau fiku he 2,155 na makahiki o kona ulu ana. Ua kanuia ua laau la ma ka makahiki 288 mamua aku o Kristo.
                      He halepule hoomanao ia Aberahama Linekona, ua kokoke e hoalaia ma ke kulanakauhale nui o Ladana i ku like ai me ke kula ma ka inoa o Linekona ma ia kulanakauhale.
                      Ua hana hou ae ka Bihopa o Oxafoka he ano hou, ma ka ae ana aku i na kamalii e paani i ka la Sabati mahope o ka pau ana o ka pule.
                      Eia ke ola nei ma Nu Ioka o Isaaka J. Haiesi, (Dr. Hayes) ka mea nana i kanu ka Hae Hoku o Amerika Huipuia ma ka aina ike ole ia ma ka akau loa ana i ike ai i ke kai anu e waiho akea ana.
                      He mea kupanaha ka hanau nui ana o kekahi ma Geremauia, he elua makahiki i hala aku nei, ua hanau nui ia na C. Segemea, he kanalima kumamawalu na keiki. Ua hanau ia me kana wahine mua, he iwakalua kumamakolu, he umi kumamalua o lakou i hanau mahoe ia, a he umikumamakahi i hanau pakahi. Mai loko mai o keia kanalima kumamawalu keiki, he iwakalu kumamawalu o lakou e ola nei, a he mau kaikamahine wale no lakou a pau; a o ua makuakane nei, aole ia i mai iki, a eia no ke noho oluolu la e like me noho ana o kana mau keiki. Aohe no i kana mai ua mea he keiki a keia makua.
                      Elua mau kahaka ma ka moku aina o Veremoneta i hele e hoopii kanawai no ka hipa elima dala ke kumukuai. O ka mea e hoihoi mai i na poho o na dala $116.46 nana e uku i ka Loio i $230 no kona uku. Eia ka ninau, heaha ka waiwai o kekahi aoao i ko kekahi?
                      Eia ma ke kulanakauhale o Kapalakiko he kanaka waiwai, ekolu miliona dala, he kanahiku kumamakahi, ka nui o kona mau makahiki, a ke ai nei oia i ka loaa a kona mau la ui.
                      Ua hoopuka ae kekahi nupepa o Ladana, me he mea la ma ka nana aku, ua makemake ke Keiki Alii o Wale i ka noho ana Geremania, mai Badena ae kona puka ana a holo lealea aku la.
                      Ua loaa ma Melebouna kekahi auka gula nui, a i ke kaupaona ia ana, ua hiki aku i ka elima haneri aunake kona kaumaha.
                      Ma ka hale hoonaauao o ua Kuli a me na Aa ma ke kulanakauhale o Nu Ioka, ua ike ia iho ke ao ia nei lakou ma na hua mua o ka waea Telegarapa a J. Morse.
                      Ua olelo wale ia ae he manao ke Loui Napoliona e hoopalau ia ka Haku Emepera o Farani me Gisele ke kama alii Hope loa a ka Emepera o Auseturia.
                      Mahope iho o ka uku ana aku i na aie a pau o ka Peresidena Linekona i make, ua koe iho ke koena he $l10,294.62, ua puunaueia no na hooilina a me ka wahine kanemake. Oia he $34,765.30 no lakou pakahi.
                      He kanalima tausani pu i kauohaia e ke Aupuni o Amerika Huipuia ma Springfield a e kokoke ana e paa.
                      Ua paa iho nei o Peresidena Huare o Mesiko i ka bipi-kea ma na kiwi, a ua hai aku o na kuikahi a pau o Mesiko me na aupuni o Europa, ua pau. Aole pono ia Farani, Enelani, Sepania, a me Auseturia e hana wale aku i kela aupuni Ripubalika.

                      ELIMA POAONO O FEBERUARI.—I ka nana ana i na la o ka malama o Feberuari o keia makahiki, ua ike iho makou, e hoomaka ana ka la mua ma ka Poaono, a e pau ana ka la 29 ma ka Poaono, a i ka helu ana aku i ka nui o na Poaono, he elima paa.

KA LUNA HOOPONOPONO, - - L.H. KULIKA.
KA HOPE LUNA HOOPONOPONO, J. KAWAINUI.

POE HAKU MANAO NO KE KUOKOA.

Ka Nupepa Kuokoa.
HONOLULU, FEBERUARl 8, 1868,
Ka hana Naaupo o na Poo Aupuni!

                      UA ike iho makou ma ke kakahiaka Poaono aku nei i hala, i ka hoopukaia ana o kekahi apana pepa mai ka Hale Pai Aupuni ae, nona ka inoa "Makamae Hawaii;" ua ku na olelo maloko o ia pepa, i ka hoinoino loa i ko kakou makamaka aloha oiaio, oia ke Aupuni o Amerika Huipuia.
                      Ua pale ae ke Aupuni iaia iho ma ka nupepa Au Okoa o ka Poaha iho nei, e olelo ana, "aole ia he olelo kupono na kakou e hilinai ai, he olelo wale no na kekahi makaainana o ia Aupuni. O ia mau olelo a pau, mawaho wale ae no ia o na makani o ko kakou nei Pae Aina."
                      He oiaio keia olelo pale, aka, ua komo pu ke Aupuni i ke kokua ana i keia pepa i hoolahaia; mai loko mai o ka Hale Pai Aupuni ka hoopukaia ana o kela pepa e hoonaukiuki ana i ke Aupuni Nui o Amerika Huipuia, na na Luna Aupuni i ae aku, me ko lakou ike no he mau olelo hoonaukiuki i kela Aupuni, a ua hoolahaia iho nei no ma ke Au Okoa o ka Poaha ua olelo a pau o ia pepa.
                      He mea uuku loa keia ma Amerika, aka, ma ke kokua ana a ko kakou mau Luna Aupuni, alaila, e lilo ana ia i mea nui loa, a e lili ai kela Aupuni nui, a he ku maoli no keia hana a ko kakou mau Luna Aupuni i ka hoonauluulu, a e ehaeha maoli ana ka manao o kela aupuni.
                      E like me ka nahesa nahu keia mea kakau apiki e hoao ana e hoo i ka laau make iloko o ko kakou mau manao e na kanaka Hawaii, e kue aku i ko kakou mau hoa'loha kahiko oiaio loa, i noho a ewe ia Hawaii nei, a e hoalaala i ka manao ino mawaena o ka "ilikeokeo" a me ka "iliulaula." I ko oukou heluhelu ana i kana mau olelo hoinoino ia Amerika, e hoomanao iho no oukou, mai kinohi mai ka hana aloha ana a kela Lahui nui ia kakou, a oia no ka mua o na Lahui i imi i ko kakou kuokoa; aole loa no hoi i hoouna mai i kona moku kaua ia nei e pani, wale i ka waha o ko kakou mau pu kuniahi, a e huki wale i ko kakou Hae Hawaii ilalo, a e hao wale i ko kakou waihona dala, a i hana ino iho i na umelaau a ko kakou Moi. Ma ka hooikaika ana a kela Aina nui, i loaa ai ia kakou ke Aupuni kuokoa i keia la, a aole hoi he Panalaau e like me Nu Zilani a me Tahiti.
                      O kela Kuikahi Hoopomaikai Like i hooholoia iho nei e ko kakou Ahaolelo i hala, ke lana nei ko makou manao, e hooholoia ana e ka Ahaolelo Nui o Amerika Huipuia, a e lilo ana oia kekahi o na hoopomaikai nui ana a ia Aupuni, e haawi mai ai i ko kakou Aina. Aole kakou i makemake i kekahi pili ana kokoke loa i Amerika i oi aku i keia, a o ke kahua no keia o ko kakou mau Lunamakaainana.
"E mau ke kuokoa ana o keia Aupuni."
                      Aole no o kakou, aka o "Hawaii Ponoi" a me "Heleouwalo" e hoomaka nei i ka hoonaukiuki ma keia kumu, o ka hoolilo ana i keia Aupuni i panalaau no Amerika.
                      Ke hoomaka nei lakou me ka hoinoino i na Luna Aupuni o ke Aupuni o Amerika maloko o na nupepa a ma ka lakou mau haiolelo ma ke akea ma ka la koho balota.
                      I ka wa i ae ia ai ka lakou mau mea hana a me ko lakou mau Luna e hana i keia, ua hoao maoli ua Kuhina e uumi i ka manao kuokoa o ko ke kanaka makemake iho ma ke koho balota ana. Ua ike holookoa loa ia, ina e hookuu lanakila ia ke koho balota, a aole e hoopilikia ia, a hao wale ia na balota i ka Poakahi iho nei, alaila, ina ua kohoia ko kakou mau Lunamakaainana e ka hapa nui o o ka poe koho. He nui wale o ka poe koho e makaukau nei e hoike mai, o ka lakou mau balota, ua lawe ia mai ko lakou mau lima aku, a ina aole e hoomaka'uka'u ia a hooweliweliia, aole loa lakou i koho ia Kapena Loke ma.
                      Eia hou, Ma na aina kuokoa o na makaainana, aole i ae ia na koa e koho Balota ma ko lakou mau ano koa. Ma Enelani, ua papa ke kanawai, koe wale no elua a ekolu paha mau wahi, e hookaawale, loa ia na Puali koa i elua mile mai kahi koho Balota aku. Aka maanei, ua hoonoho papa ia na koa a hele like aku la i ka pahu balota e like me ka pua hipa, a ua hooweliweli ia e ko lakou mau luna e koho ma ka balota hookahi wale no. Ma ke kanawai, ua hiki ke hoopai ia keia luna koa i $50.00, a i ole ia i eono mau malama e hoopaahao ai, a ke manao laua nei makou he pono ke hoopiliia kela luna koa malalo o ka pauku 809 o ke Kanawai Kivila.
                      Ua oi loa ae ke koho balota o na ma Parisi mamua o ko onei. O Napoliona, ka Emepera o Farani, me kona mau puali he nui wale manao ia he pono e hookuu ia na makaainana e koho kuokoa aole e hooweliweliia; a i kela makahiki keia makahiki e koho ke kulanakauhale o Parisa i mau Lunamakaainana no ka Ahaolelo e kue ana i kona mau Kuhina.
                      Ina e makemake ana na kuhina maanei e kokua aku i na manao o kela nupepa ma Piladelepia, a ina lakou e makemake ana e hoonaukiuki i na makaainana e ohumu; a ina e makemake lakou e hoala ae i aoao hou mawaena o ko kakou lahui, i ike ole ia a i hookumu ole ia maanei mamua, ma ka ae ana e hoohui aku me Amerika Huipuia, alaila he pono ia lakou e hoao aku e kinai i ke kamailio akea ana a me ka hoolaha ana o na nupepa, a e hoonuinui lakou, a e hoopuiwa ma ke koho balota ana, e hoole i ka hoomalu ana i ka poe koho, a e hoole i na Kanawai no ke koho balota ana, a e hoike aku i ka lehulehu, aole i hoomalu ia na pono o na makaainana malalo o keia Kumukanawai.

NU HOU KULOKO.
Oahu.

NO KE KOHO BALOTA ANA.— Ma ka hora 8 o ke kakahiaka poaono iho nei, ua weheia ka pahu baloka no ka hookomo ana o kela a me keia poe koho o ka Apana o Kona nei i kana balota i makemake ai. Mai ia manawa mai a hiki i ka hora 5 o ke ahiahi, ua paniia ka puka no ka helu ana i na balota. I ka heluia ana, ua puka mai na balota e like me keia:
G. Rhodes. (Kapena Loke) 350 kohoia
E.H. Boyd. (Ailuene) 348 "
W.P. Wcod, (Pinehasa) 329 "
J.W. Makalena, 323 "
S.P. Kalama, 275
J.W. Austin, (Aukina) 274
A.F. Judd, (Alapaki) 268
J. Kahai, 258
I ko makou nana pono ana, ua puiwa na makaainana mahope o ke alakai ana a na, pepa liilii i hoopukaia mai ka Hale Pai Aupuni, ma ka Poaono a me ke kakahiaka Poakahi, no na olelo hoomaka'uka'u i hoolahaia, maloko, "e lilo ana ke aupuni ia Amerika i na e kohoia na haole" a aia a koho wale no i na kanaka alaila pono, paa ke aupuni. Aole hoi oia wale, aka, ua ike ia kekahi kumu ino e ae. Ma ia la, ua puka na oleia ino o kekahi aoao i kekahi aoao no na mea i hala loa i hope, a he menene nei makou i ka ike ana iho ua koho kekahi na pepeiao i ka lohe ana aku, aka, ke mahalo mau makaainana i na haole, a ua puka, aole i pale i na haole e like me ka, "Hawaii Ponoi" kuauhau loihi i na Au Okoa i hala.

No. KOOLAUPOKO.

C.H. Judd, (Kale Kauka) 135 kohoia
J.P. Kamai, 33
G.B. Ukeke. 6

No KOOLAULOA.

S.G. Wilder, (Waila) 149 kohoia
G.B. Ukeke, 60
J. Kupau, 5

No WAIALUA,

J.W. Keawehunahala, 123 kohoia
Natanaela, 78

No EWA & WAIANAE.

S.W. Mahelona, 166 kohoia
H. Thompson, 85
J.P. Kahaleaahu, 90

HE WAHI HALE KUAI KANAKA.— Ua ike iho nei makou ma ke Alanui Nuuanu, ma uka iho o ka Hale Inu Kope o Hanale ma, he Hale Kuai Lole no kekahi kanaka Hawaii o Mose Ulunahele kona inoa, a ke makaukau la oia e kuai oluolu aku me na kanaka o kona lahui iho a me ka poe e ae e naue aku ana.
KE LII KIAAINA, WAHINE O HAWAII.—Ua oluolu makou i ka hai aku, he omaimai iho nei ko ke Kiaaina Wahine o Hawaii i keia mau la, aka mamuli o ke ahonui a me ka hoomanawanui akahele ana a kona mau Kahunana lapaau haole, nolaila, ua naha ae oia mai kona pilikia mai, a ke lana nei ko makou manao e hoola loaia mai oia a hooloihi hou i kona ola ana me kakou.

KA MOKUAHI PELE.—I ke kakahiaka la Sabati iho nei, ua haalele iho o Pele ia Honolulu nei, a ua holo aku i Molokai me kona mau kia a me kona mau pea, ai ka po Poakahi iho nei, ua ku hou mai ma Honolulu nei. I ka auina la Poalua iho nei, na holo hou aku i Molokai me ia ma pono mua no ona. O ke kumu o keia holoholo ana, aole makou i lohe, aka, he hana nui no paha. Ua kokoe no nae ua wahi Pele la i ka holo ana aku.

PAHU KA PU EHA O J.H. BARAUNU.—Ma ka Poaono aku nei i hala, holo aku la o Keoni H. Baraunu, ka Luna Paahai Nui o Kawa, a i kona hiki ana ma kahi o Vikoa ma Manana, noho malaila e hoomaha ai, kokolo hele aku la ia me kana pu kamanu e imi hele ana i na manu, aka, ua ike no ia i na manu, a i kona ki ana i kana po o ka naha liilii ae la no ia o kana pu, a ke liilii mai la ma kona mau maka, aka, ua pa mai la no hoi ka ihu, a akaaia ka ili, a noi mai la kona iwi maka. I ka loheia ana mai o keia pilikia, ua holo koke aku o Kaua Makipineopio e lawelawe no keia pilikia. I ke pahu ana, holo pupule oia no keia ao e. I ke kakahiaka Sabati ae, hoihoi ia ia i oia maluna o ka waapa i Honolulu nei.
KA MANUWA FARANI.— I ka Poakolu iho nei, ua puka aku ka manuwa Farani e ku ana ma Honolulu nei, a ua holo aku ma kona ala hele moena.

Ua hoomaka ae nei ka wili ana o ka wili raiki a wili kulina hoi a Keeni Opuma kani, ma kai iho o Kawaiahao a ke holo la kaua hana.
Ua kapili hou ia iho, nei ka moku Rukini e ku nei makai iho o Hale Dute kahiko, a ua paa loa kona puka liu a eueu ana paha ia e holo ma kona ala hele moana.

Ua lilo ae nei ke kuna Emmaline ia Dawson & Co., o keia kulanakauhale, a e hana houia ana a paa, alaila, e hooholoia ma na kai anu no ka huli ana i na ia nui o ke kai, oia ke kohola.

KE KUNA MALOLO NO MAIKONISIA.—I ka auina la Poaono aku nei i hala, ua holo aku kekahi kuna holoholo pili aina o kakou ma na Pae Aina o Maikonisia e kalepa niu ai a waiwai e ae paha, oia kela kuna e kau ae la maluna. ---------
Ma ka Poakolu aku nei i hala o kela pule, ua kuai kudala mamua iho o ka puka o ka Hale Hookolokolo ma Honolulu nei, na aina o R.C. Wale a makou a hoolaha mua ai mamua iho nei. O ka nui o na dala no na aina i kuaiia he $7,610.

                      NA PAKE HOOHAUNAELE.—Ma ke ahiahi Poalima aku nei i hala, Ianuari 31, ua hiki mai ma Honolulu nei he umi mau pake hana o ka mahiko o Paukaa ma Hilo. O ke kumu o ko lakou laweia ana mai, no ka hoao ana e lawe i ke ola o ko lakou luna hana, aka, ua pakele no nae ke ola, a ua hoehaia no nae ka luna. ---------
                      PIAPA EBONA KUSAIE—Ua ike iho nei makou i kekahi mau piapa o kela mau mokupuni i paiia a humuhumuia ma Ebona e Rev. B.G. Kano, ka Misionari Amerika e noho la malaila. I ka nana ana i kana hana, ua maikai maoli, a ua maiau no hoi kana humuhumu ana, a ua like me na buke paha i humuhumuia a i paiia ma Honolulu nei, nolaila, ke manao nei makou he hana maikai keia a lakou i hoolaha ai malaila, i loaa koko ai ko lakou kuikui e alakai ai i kela lahui. —
                      KE KIAAINA DOMINIS A ME KANA ALII WAHINE.—Ma ka Poalima i hala, ua holo aku ke Kiaaina o Oahu i Ewa, a ma ka Poaono ua holo loa aku i Waialua, malaila laua kahi i hoonanea ai, hiki aku kekahi palapala mai Honolulu aku nei, e koi ana e hoi mai. Ma ka hora 9 o ka Poakahi, haalele ia Waialua, huli hoi mai i ke kulanakauhale alii.

Ma kekahi la o ka pule i hala, ua komo mai ka hoohuoi i ka ike ana aku i kekahi Kaa Wai e kau ana iluna o ke kao, a e lana pono ana ma ka ihu o ka moku Rukini, a haupu ao la ho ahi pahu, eia ka ua nei e pauma ia ke kai o ka mea hoolana moku i lana loa ka moku a ikeia kahi poino. A o ua kaa nei oia ke kaawai kahiko o ka Helu I o Honolulu nei i lilo iho nei.

                      Ua lohe mai makou ma ka hoi ana mai a ka Hokuao mai na Pae Aina mai o Maikonisia, ua minamina ka Moi o Butaritari no kona pepehi mainoino ana i na luina Hawaii ma kona kapakai, a ua mihi oia i kona hewa, aka, mai make ole no paha kela mau Hawaii o kakou ina aole i ona ka Moi, aka, no ka ona rama ka mea i pepehi ia ai, oiai ua ike ole oia i kana mea i hana ai. -
                      HOONANA IO NO.—I ka Poakolu o ka pule i hala, holo aku ka hunona a Limaikaika a mawaho o kona pa ma ke poo o Alanui Rikeke, hikiikii i kona lio, a komo aku la iloko, he hookahi a elua wale no paha mau minute o kona kaawale ana aku, i hoi mai ka hana aohe ka lio, i nui aku ka hana i Waikiki e holo ana ke kanaka maluna o kona lio me ka holo nui. I ke kakahiaka ana ae hoihoiia mai ana ka lio i ka Halewai, a o ke keiki lapuwale nana i holo, ua hoopaiia hookahi makahiki ma ka Halepaahao. -
                      KA LA AHAAINA O NA KEIKI KAA WAI.—Ma ka Poakahi iho nei, e like me ka hai mua ana ae i ka pule i hala a keia pepa, ua hooholoia e ka Oihana Kinai Ahi o Honolulu, o ka la 3 o Feberuari o kela a me keia makahiki e hiki mai ana, ko lakou la hookahakaha, nolaila, ua hooko lakou i ka Poakahi iho nei, a ua puka ae kela kaa wai keia kaa wai e like me ka nani a ka manao e anoi aku ai. Ua kahikoia na keiki o ke ahi me na aahu hoohanohano o ko lakou kaa iho, a ua puia pu no hoi ka lakou mau kaa pakahi i ke ala wai anuhea a na pua i kahikoia aku ai. Ua houluulu lakou ma Monikahaae, a malaila ae iho ma ke Alanui Papu, a hele a ma ke Alanui Kalepa, a mawaho iho o ka Hale Pai Aupuni a me ke Keena Kuokoa, ua ike iho au, hookahi wahi kanaka Hawaii i haulehia e ka lua mimilo o ka ona, e kiloi ana i na pepa liilii iluna o na kipoohiwi o ka poe o ka huakai. Ua hoomau no kona uhai ana i ka huakai a hiki mawaho iho o Kaumakapili, no ke kupono ole maoli o kana hana i ka hanohano o ka poe e hookahakaha ana, nolaila, ua kii mai la kekahi Luna a hoohuli ae la iaia, a ua hoanuuia kona kua i ka meumeu o mua o ke kamaa hoki i ekolu manawa pokole. Owai ia e ka mea ninau? O Bones wahi a ko'u ike. Hoihoiia aku la ia i kona home a heaha aku la kona hope aohe au i ike aku. Malaila ae ka iho ana a ka huakai a hiki i ka Halewai Helu 1., a ua hookuuia ka huakai no ka manawa a houluulu hou malaila. Ma ka hora i haiia ai, ua akoakoa hou a hele i Kohalaloa i ka ahaaina i hoomakaukauia no lakou. Ua ai lakou a maona, a ua inu a kena. J. MAKAIKAI.
                      KE HOOMAU NEI NO ka lawaia ana a ka poe Italia. I kekahi lawaia ana, loaa kahi ia. O kekahi no hoi moewaa, aka, o ka nui no nae ka loaa o na wahi kauna ia aenei no.

HALE PAU AHI.—Ma Moanalua i ka la Sabati aku nei i hala, ua pau kekahi hale i ke ahi, o ke kuma o keia, ua loaa kekahi ahi koe i kekahi wahi keiki, puka kela e koe ai a hoani ae i ka hale, o ka mu a mai la no ia o ke ahi holo i ke olohelohe. Eia na poo o oukou e na makamaka ihea e ao loihi ia nei. E aho ka hoi ke poo o ka moa i ko oukou.

Ua hoopauia iho nei o J. Kahai Esq., mai ka oihana malama Luloa ana no ka awa o Honolulu, a ua paniia kona hakahaka e Hon. Heneri H. Kahanu. He nui ka poe i ninau mai ia makou i ke kumu o kona pau ana, no ka mea, ekolu Moi o kona noho ana ma kela wahi, a akahi no a lele mai, nolaila, ua kupono paha ka lakou la haohao mai.

PUALI KINAI AHI HELU 4.—Ma ka halawai ana a keia Puali i ka po Poalua iho nei, Feberuari 4, ua oluolu ia Puali holookoa, e hookohu hou aku i ko lakou Luna Hoohana mua, oia o E.H. Boyd (Ailuene) i Luna Hoohana mua hou no keia makahiki e hele nei. Ua kohoia o S.P. Nohea i kokua mua Luna Hoohana, a o Hon. D. Kali kaua i kokua alua Luna Hoohana, o A. Halulu, i Kakauolelo mau no ka Puali, a o Pinehasa i Puuku no ka Puali.

KA HOKU AO NO FATUHIVA.—Ua hooholo ka Papa Hawaii, e hooholo i ke kialua Hoku Ao i na Pae aina o Fatuhiva, nolaila, ke hai ia aku nei ka lono i na makamaka a pau e manao ana e palapala i ko lakou mau hoalauna ma ia mokupuni, e haalele ana ka Hoku Ao ia Honolulu nei ma ka la 20 o Maraki, a e holo pololei ana i kela Pae Aina. Ua koho ia o Rev. L. Kamika, kahu ekalesia o Kaumakapili, e holo i Elele no ka Papa Hawaii e nana i na kihapai oia mau mokupuni i noho ia e ko kakou mau Misionari.

MAKE I KE ONE O KAKUHIEWA.—Ma ka Poakolu, la 29 o Ianauri, make iho la ma Honolulu nei, o Miss Caroline A. Holo, ke kaikamahine alua a ka Mea Mahaloia E.O. Holo o keia kulanakaahale. He iwakalua kumamawalu ka nui o kona mau makahiki, a he umikumamalua na makahiki o kona waiho omaimai ana, a kuu aku la kona luhi. He kaikamahine i ikeia e kona mau makua a me kona mau pilikana, ua lana kona manao no ka hilinai ana maluna o ke Kalahala Nui ma ka lani. Aia maluna o na makua a me na pilikana i hooneleia i ka makamaka i hele aku la ko makou aloha.

HOAO F. PEPEHI. - I ka Poakahi aku nei i hala, he la ua ma Honolulu nei, a ua hoohanaia na pake o ka, mahiko o Nuuanu ma loko o na hale pili. O kekahi o na pake paahana, pakike wale mai la no, a nolaila, olelo aku la ka luna, no keaha kou mea huna ole i ka hana, kapa mai la ka pake he hoopunipuni. Elua hoopuka ana a ua pake la pela, hapai ae ia i kana kope e hahau aku iaia, a lele mai la ua pake la e hou me kana kope hao manamana a hou mai la ia Mr. Wood, a he wahi poino iki no. Ua hoopiiia ua pake la imua o ka Ana Hoomalu, a ua waihoia ka hookolokolo ana iaia a hiki i ka Aha Hookolokolo Kiure.

                      KA MOI KAPUAIWA.—Ma ka auina la Poakolu iho nei, hora 1 paha ia, ku mai la ka mokuahi aupuni Pele mai Molokai mai mahope iho o kana huakai alua, maluna mai ona ka Milimili a ke aupuni holookoa, Aliiiolani a Kamehameha. I kona pili ana mai ma ka uapo o Ainahou, ua makaukau e kona kaa lio e hoihoi aku ia ia iloko o kona Hale Alii. Aole no i haawi mai na pu o Puowaina i ke aloha, no ka mai o ke kaikuahine R Keelikolani. Aka, ua oili pulelo ae la ka hae o ka Halealii e hai ana ua hoi mai la. He maikai kona ola kino i ka makou ike aku. —
                      KOKUA MAHINA HOU MA WAIALUA A ME KAHUKU, NO IANUARI;—Ap. 1 Kula kaikamahine $8.—Ap. 2 Na Pokii Kula Sabati $4. -12 Kahuku & Waialae $7.50 Waimea 1 38 Ukoa $4.—Ap, Luakini $5.50 Paalaa-kai .75 Paalaa-uka $3. Kamooloa $5. Kauaula 1.13 Mokuleia 1.62 na malihini .75. Loaa a pau.—$42.75
                      KA NUPEPA POKII A KAKOU. - Hookahi no helu i koe o ke Alaula, a pau mai ka lua o na makahiki o kona ola kino ana. I Aperila e hoomaka aku ka makahiki hou. Ua puka aku na kii hou he nui e lawa ai e hoikeike ai i na mea hou wale no a puni ka makahiki. Nolaila o ka poe e minamina ana i na mea ono a keia wahi puolo uuku e hoomakaukau mai oukou. O na leo mele hou me na hua olelo hou i haku ia e ka Haku mele o Hawaii e noho la i ka aiha o ka-ua ki puupuu o Hawaii, oia kekahi mea hoopomaikai i ka poe e lawe ana.
                      NO KE ALAULA:—Ke ike la makou ma ka aoao eha o ke Alaula no Beberuali, ua pai ia he leo mele no na Kula Sabati. Ke kahuhipa maikai; e manao ia ana e hoopuka mau ia he leo mele i kela helu keia helu.
                      He mea nui keia e kokua mau ai i na Kula Sabati, i na mea e lealea ai na makua a me na keiki, he leo mele hou.
                      HOIKE MAKAHIKI O KA EKALESIA O WAIALUA. -Ma ka hoike o ka Puuku o ka Ekalesia, ua hai ia mai na loaa a pau no ka M. H. 1867, penei;
Mahina Hou - - - 422.11
Hanai Kumu - - - 232 63
Hoolako Luakini - - - 35 93
Dala Bele - - - 161.00
Kokua i ka Luakini ma Kalihi
P. Kapohaku - - - 30.00
Kokua ia Ioane Makani ka Ilikini 13.00
Hoolako i kelepa kanikau no ka Luakini i Malaki - - - 9.00
$903.67
                      E HOOMAHA ana ka mokuahi Kilauea i keia pule ae no ka hoomaemae ana ia ia iho, aia a ka Poakahi la 17 o Feberuari, alaila, e hoao hou oia e nomenome aku ma ke kai o Kaiwi a e kaalo ae ma na makalae o Maui a me Kona. He ahu la ia. Pelaka.

-
Maui.

Ua hiki mai ka lono i o makou nei, mai ka mokupuni mai o Molokai nui a Hana, ua kohoia o C. Kalu a me J.W. Kaiue, i mau Lunamakaainana no Molokai me Lanai. -
HE ALANUI HOU - Ua lawe ae la o Puowina i ka hana ana i alanui mai kamaalaea a hiki i Anapoakai, kahi a ko kakou mokuahi Kilauea e hoolulu ai i ka wa makani.

HE MAKEMAKE I KAHU EKALESIA.—Ua makemake ka ekaleisa o Hana e loaa no lakou kekahi Kahu ekalesia. Ua lono mai makou e makemake ana kekahi poe ia Rev. P.W. Kaawa o Kaupo. -
NA KOKUA MAHINA.—U noonoo na ekalesia o Maui e hapai i ka hookupu ana i ke kokua i na aina e i kela a me keia malama. Ma keia hana ana a lakou, aohe kanalua e mahuahua nui ae ana ko lakou hookupu ana i ka makahiki e hele nei.

Ua palapala mai kekahi kanaka ia makou, no, Kaanapali mai, nona kekahi inoa a makou e ninau aku nei, no hea mai la ia inoa? O kekahi hapa o ua palapala la, e pane ana ia S.W. Nailiili, a o kekahi hapa no na mea hou, nolaila na waiho ia.

KA HOOPAKELE ANA I KA EKE LEKA.—O ka eke leka mai Honolulu mai i laweia aku e ke Kuna "Mary Ellen" i Waihee, ua hooleleia ma ka la Sabati, Ianuari 25. I ka wa i laweia aku ai, ua kahuli ka waapa. E nanahu iho ana ke kanaka i ke eke leta pakele ai; malaila i loheia aku ai ke ku ana mai o ke kialua Hokuao.

HOLO KA NUPEPA MA LAHAINALUNA.—Ua poloi mai la o J.L. Kaulukou ia makou i kona ike ana ka lawe nuiia o ke Kilohana Pookela ma kela Kulanui, oia hoi he 38 nupepa a oi iki aku paha. Ke mahalo nei no hoi makou i ko oukou lawe nui ana, a pela no hoi ma ke kula hanai a Rev. E. Bona o Kohala ke, lawe nui la no lakou.

NA KANAKA I PEPEHIIA MA HAIKU. — O Napua a me kekahi kanaka i pepehiia ai, ua inu i ka awa a ona, a i ka wa a na pake i lele aku ai e pepehi ia laua. O ka makuakane o Napua he kahuna lua a ua ao ia ma ia hana. I ka wa i poi po aku ai na pake, olelo mai la ka elemakule ia Napua, "e hookanaka kaua" aka, ua hiki ole ia laua ke pale aku, no ka mea ua oki mai la ka ona a ka awa. I na pona ole keia mau kanaka i ka awa ina la ua hiki ia Napua ke pale aku i na pake. ——
Ua pau i ke ahi kekahi hale ma kai iho o Lahainaluna, ma ka la 17 o Ianuari iho nei; pela mai o J.W.K. o kela wahi maluna. He lolo ko ka hale, a puka ae la ia a mawaho o ka hakala o ka hale, a ho-a i ke ahi. Ia wa, e apu ae ana ka ula o ke ahi, aka, ua ike e mai na haumana o ke Kulanui, a na lakou i holo mai e hoopio i ka mana o ke ahi, nolaila, ua ili ka mahaloia maluna o ka lakou hana maikai.

-
Hawaii.

UA WEHE AENEI O REV. J.D. Paris i Kula Olelo Haole ma ka hale kahiki o Kapiolani, a ua loaa ia ia he kanakolu a oi ae paha na haumana. -
MAKE MA LAUPAHOEHOE.—Ua hai mai la o J. Hanaloa o kela wahi ia makou e hoike ana i ka make ana o kekahi hoahanau wahine hoopono ma kona ekalesia. Ke i nei no makou. Pomaikai ka poe i make iloko o ka Haku, oiai, nana i haawi mai a nana no i lawe aku, mai ohumu iho ke kanaka no ia.

KULA HAOLE HOU NA HILO.—Ua lohe mai nei makou mai a Waimaiole mai o Hilo, ua hoomaka ia he kula haole ma ka ua Kanilehua, o Hilo. A o ka mea nana e malama nei ia kula, o ko makou makamaka no o keia Keena i na makahiki i hala, oia no hoi o J. Kua. E ku auanei ka liki o Kukahaoa.

PUU DALA NUI.—Ua palapala mai o Kekaula o Kau ia makou, ma ka la 22 o Ianuari, ua hoahaaina iho nei lakou, a o ka nui o na dala i loaa mai no ia ahaaina mai na makamaka mai, he $206.50. Ua hooholo like iho na wahine nana ka ahaina, e haawi ia kela puu dala nui, no ka hemahema o ko lakou luakini malaila.

INU UALA MA HILO. - Ua palapala mai kekahi ia makou mai Hilo mai, he nui ka inu uala malaila, ma ka la 25 o Ianuari, oia hoi ka la makahiki hou o na pake. He nui ka lealea malaila, a ua hupu ia kekahi poe ona, hakaka a me kekahi poe e ae i hana i kekahi mau hana, ino e ae.

KA MAKE ANA O S.P. KOKO. - Ua make iho nei ko makou Lunakanawai Apana, nona keia inoa maluna. Ua make oia ma ka la 15 o keia malama, oia hoi ka la Sabati, hora 7 o ke ahiahi. Ua hoomaka kona mai ma ka la 3 o Nov. 1867, he anu a me ka wela. A o kekahi mai ona i loaa ole ai ka oluolu, he puu iloko o ka opu, e pili ana ma ka aoao hema, a moe kea ae la ma ka umauma, a holo ae la ma ka aoao akau, a holopani mai la i ka houpo, a kaili ae la e lawe i ka hanu. Pela iho la ke ano o kona mai ana, a kuu aku la kona luhi, a waiho iho la i kana oihana. H.M. Kaneakala
Pololu, Kohala, Ian. 28, 1868