Ka Nupepa Kuokoa, Volume VII, Number 6, 8 Pepeluali 1868 — Page 1
KA NUPEPA KUOKOA.
KE KILOHANA POOKELA NO KA LAHUI HAWAII.
BUKE VII. HELU 6. HONOLULU, FEBERUARI 8, 1868. NA HELU A PAU 323.
"KA NUPEPA KUOKOA,"
HOOPUKA MAU IA MA HONOLULU
I kela Poaono keia Poaono.
$2.00
No na mahina he UMIKUMAMALUA,
$1.00 no na mahina eono.
ME KA HOOKAA MUA MAI.
NA OLELO HOOLAHA—aole i oi mamua o 10 laina no ka hoopuka hookahi ana, $1.00; alua komo ana, he $1.50; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai.
KANIKAU—he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi—penei: he 25 lalani, $1.00; 50 lalani, $2.00; a pela'ku.
NA UKU NO NA OLELO HOOLAHA—ka uku pepa, a me ka uku o ke Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.
O NA UKU PEPA A PAU E HOOKAA MUA MAI NO—aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.
AIA KE KEENA O KA NUPEPA KUOKOA—ma ke kihi hema o ka Hale Hookipa Luina (Sailor's Home.) O na hora hana, ma ka eiwa o kakahiaka, a i ka ha o ke ahiahi.
L. H. KULIKA. (Luna Hoopuka.)
KA "NUPEPA KUOKOA."
Is published in Honolulu
EVERY SATURDAY,
$2.00 per annum, or $1.00 per six
months, in advance.
ADVERTISEMENTS not exceeding 10 lines, inserted once for $1.00; twice or $1.50; and $2.00 for one month; all advertisements must be paid for in advance.
KANIKAUS will be charged 1.00 per page, or 4 cts. a line.
PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.
ALL SUBSCRIPTIONS must be PREPAID. No names, either of foreigners or natives, will be inserted on the subscription list, until paid for. This rule must be strictly adhered to, on account of the low subscription price.
THE OFFICE OF THE KUOKOA is in the South corner of the Sailors' Home. Office hours from 9 A.M. to 4 P.M.
L. H. GULICK.
For the Publishers.
Volume I, II, and III of the KUOKOA, bound, for sale, $3.50 each.
Persons having complete sets of the above, can have them bound by paying $2.00 each.
S. MAGNIN
MEA KUAI LOLE MAIKAI
—A ME-
NA ANO LOLE HOOHIE A KA MANAO,
Na Kamma, Buti, na Papale Kapu a me na ano Papale.
E hele mua maanei mamua o ka hele ana aku i na hale e, a e kuai makepono aku no waa. Aia makai iho o ka Roiala Hotele ku'u Halekuai Lole. E wehe ia ana ka puka i keia la. Honolulu, Ian. 4, 1868. 318 6m
E HOLO MAU ANA KA
Moku Ahi
"KILAUEA"
I ke keia hapaha Makahiki, e like
me keia malalo nei.
E haalele ana ia Honolulu
Poakahi Dekemaba 30
Poakahi Ianuari 6
Poakahi Ianuari 13
Poakahi Ianuari 20
Poakahi Ianuari 27
Poakahi Feberuari 3
E hoomaha ana i ka hebedoma elua, e hoomaka ana i ka la 10 o Feberuari, a holo hou i ka
Poakahi Feberuari 17
Poakahi Feberuari 24
Poakahi Maraki 2
Poakahi Maraki 9
Poakahi Maraki 16
Ma ka hora 4 1/2 o ke ahiahi, a e ku ana ma
LAHAINA,
KALEPOLEPO,
KEALAKEAKUA,
KAILUA,
KAWAIHAE,
a me MAHUKONA.
Ma ka hoi ana mai, e haalele ana ia
KEALAKEKUA ma ke awakea Poakolu.
KAILUA, ma ke ahiahi Poakolu
KAWAIHAE & MAHUKONA, ahiahi Poaha.
Ku hou ma HONOLULU i ke kakahiaka Poaono.
E hoopae ia no na ohua o MAKENA.
Ma ka Poaha Maraki la 26, e holo ana i KOLOA a me WAIMEA KAUAI ma ka hora 4 1/2 ponoi, a e ku hou mai ana i ka Poaono la 28.
WALKER & ALLEN
Honolulu, Dek. 21, 1867. NA EGINI.
318 3m
HALE PAI KII!
AIA KO'U HALE PAI KII MA
MONIKAHAAE,
Mawaena o ka HALEKUAI BIPI a me ka HALEKUAI MEA AI o S. SAVIDGE ma ke Alanui Papu. He emi loa ke kumukuai o na KII. H.L. KEIKI (CHASE)
318-ly Mea Pai Kii.
HE MOKU HOLO MAU NO KONA
A ME
KAU, HAWAII.
E HOLO MAU ANA KE KUNA
"Kona Packet,"
KAPENA BALAAMA, mawaena o Honolulu a me Kona, Kau, Hawaii. No na ukana a me na ohua, e ninau i ke Kapena ma ka moku, a i ole, ia
PALAIKA (F.S. PRATT)
Honolulu, Aper. 23, 1867. 318-6ms.
Papa Nukama (R. Newcomb),
A ME
Toma Kea (Thomas Cross)
NA MEA HUMU BUKE.
Alanui Kalepa Makai o Hale Luina.
318-3m
No Hilo.
KA MOKU KUNA
"MELE HILO,"
O Sebastian ke Kapena.
E HOLO MAU ANA KEIA MOKU I KE Awa maluna, no na ukana a me na ohua e ninau ia
HULIPAHU, (L.L. TORBERT).
318-tf
HE MOKU HOLO MAU
No Lahaina, a me Makena.
O KE KUNA KALEPA PAA maikai,
"Kate Lee."
O Crane ke Kapena,
E HOLO MAU LOA ANA A HIKI MAI no hoi ma na Awa i olelo ia maluna. No na ukana a me na ohua, e nina i ke Kapena ma ka moku, a i ole ia ia
318-tf C. BREWER &co. (BURUA MA)
Ka Nupepa Kuokoa.
KA MOOLELO O NA KAMEHAMEHA.
NA S.M. KAMAKAU.
HELU 59.
NO KA NOHO ALII ANA O LIHOLIHO
MALUNA O KE AUPUNI, A UA KAPAIA
O KAMEHAMEHA II.
Hoi mai la o Kaahumanu ma me Kaumualii ma a hiki i Kauai, alaila, koi aku la o Kaahumanu Kaumualii e holo pu i Oahu, a ua ae aku no o Kaumualii i ke noi a Kaahumanu. Holo mai la o Kaahumanu a me Kaumualii, a me na'lii no hoi a pau o Kauai, a noho ma Waialua, no ke kaupaona laau ala. Hoonoho iho la o Kaahumanu i ka poe loea i ka ulana moena pawehe ana i lawe mai ai mai Niihau mai. Hoi mai la no hoi o Kaahumanu me na alii a pau o Kauai a ku ma Honolulu.
I ka noho ana o Kaahumanu me na'lii a pau a me ka Moi no hoi ma Honolulu, ua lawe ae la o Kaahumanu e hoao paa, a e mare ia Kaumualii i kane nana, a o ka lua no hoi ia o kana kane, o Kamehameha I., a o Kaumualii hoi.
O ka manao o na alii a me na hoahanau a pau o Kaahumanu, ua ae no lakou o Kaumualii ke kane, aka, ua kanalua o Kaumualii, aka, o ka olelo ana mai hoi a ka Moi he pono ia Kaumualii ke lawe, ia Kaahumanu i wahine nana, nolaila, ua paa o Kaumualii aole e hoi i Kauai. Ua lawe oia ia Kaahumanu i wahine nana. I ka noho ana o laua he kane a he wahine, aka, he makemake loa nae o Kaumualii e ike oia i na pae moku a pau a hiki i Hawaii, nolaila, makemake pu iho la o Kaahumanu e hoikeike i kana kane hou. O ko Kaumualii ano kino, he wahi kanaka maikai o ke kino, a ua keokeo hoi me he hapa haole la, a ua like loa no na hiohiona o ka ihu mo ko ka haole, o ua kupono kona pauku oiwi, a mikioi no hoi ma ke komo lole ana; a ina e hele mai i kahi mamao, ua kuhiia aku no he haole. He wahi alii olelo akahai, he akamai no hoi i ka olelo Beritania, he oluolu, a he akahai. He pomaikai ko ka lahui, ina i haawiia mai ke ano o na'lii e like me ia.
Ua holo aku o Kaahumanu me Kaumualii a me na alii o Kauai. O kekahi alii hoi, o Niau ka inoa, ke kane a Namahana, he alii kaulana i ke oli a me ka hula, a ua makemake nui ia e na alii o Hawaii. Ma keia huakai, ua makaikai ia Molokai me Maui, a ua kaapuni hoi ia Hawaii.
Ia Kaahumanu ma nae e noho ana, ma Hawaii, ua mahuahua loa ka mai o kona kaikunane oia hoi o Kahekili Keeaumoku. A i ka makahiki 1823, i ka malama o Feberuari, hoi mai la o Kaahumanu ma mai Hawaii mai. Ma ka la 23 o Maraki o ia makahiki no, make iho la o Kahekili Keeaumoku ma Pakaka, i Honolulu. O ka mai kuna a me kekahi mai, e ae kona mai i make ai. O na Kauka haole no ka poe nana i lapaau.
Eia hoi kekahi mea kupanaha; i ka po i make ai o Keeaumoku a ao ae, ku mai la o Kuakini mai Hawaii mai, a kalewa no ka moku iwaho, me ka manaoia e hoolewa a e pule ia Rev. H. Binamu, aku, ua lawe malu ia e Kuakini ma Hawaii, a o ka pahu wale no kai hoolewaia, a ka i pule ia. Aole alii i hoomaomaopopo i na olelo a na Misionari ia manawa, oiai e noho ana na alii a me na makaainana iloko o ka hoomaloka, e punihei ana no i na olelo hoowalewale a na haole— A ke olelo ae la kekahi poe alii a me na kanaka, "O ka ikeia ia o ka mana o ke Akua o ka Haole, o ka ike iho aohe kupapau o loko o ka pahu." Ahu no hoi kupanaha o ua mea he hoomaloka o ka aia, e hoole ana aohe Akua.
Mahope iho o ka make ana o Keeaumoku, ma Pakaka i Honolulu, Ahaolelo iho la ka Moi Liholiho a me na Lii no ka make ana o Keeaumoku, ke alii aimoku o Maui; a hooholo iho la ka Ahaolelo Alii, o Ulumeheihei ke alii aimoku o Maui, a e noho alii maluna o ia mau mokupuni.
I ka hooholo ana o ka Moi Liholihoe lilo o Ulumeheihei Hoapili i alii aimoku no Maui, no ka make ana o Keeauku ia wa, hiki mai la he poe Misionari hou, (oia paha ke kokua mua o na Misionari) oia hoi o Rev. William Rikeke, o Rev. G. Tuata a me Rev. A. Bihopa, oia hoi ka la 27 o Aperila 1823. Makemake iho la nae o Keopuolani i mau kumu misionari nana e lawe pu i Maui, no ka mea, ua hoonohoia laua i mau alii no Maui. Lawe ae la oia i elua ana kumu, oia hoi o Rev. C. Tuaita a me Rev. W. Rikeke. O Keopuolani ke alii wahine i hoomaopopo i ka manaoio i ke Akua ia manawa. Ua hoomanao ia ka pule i ka wa ai a me ka pule ohana. He poe kanaka Borabora haipule ka poe e noho pu ana me ia ia manawa, oia hoi o Kaauamoku he wahine kane ole, o Kaaua kane me Kau-a wahine, ua holo pu mai lakou me Rev. Mr. Eleiki mai Tahiti Borabora mai. Ua lilo keia poe Borabora haipule i poe nana e ao ia Keopuolani i ka haipule, ana, a me ke kuhikuhi ana i ke alanui o ke ola e hiki ai i ka lani; a ua lilo lakou i mau hoa haipule pu me keia alii wahine. O Kau-a kane, ua lilo oia i kahunapule no ke alii, no kona mau ohua a me na aialo, a na lilo lakou i poe hoahanau ekalesia. O ua poe Borabora nei a pau, no ka Ekalesia Beritania o Tahiti. O ua poe Borabora nei ka mea nana i ao ia Keopuolani i ka Pi-a-pa, a ma ka lile, a ua ike oia i ka heluhelu. Ua lawe pu no o Keopuolani i keia mau kumu Borabora ana i Lahaina. Ku pono no hoi ke ao ana a keia poe Borabora a ka waha o Kahala. O ka mana no ia o ka lakou pule.
I ka hoi ana mai o ka Moi a me ka poe a pau meia mai Kauai mai a noho ma Honolulu, o ka lealea kana hana nui o ka uhauha, ka ona rama, o ka moe aku moe mai, o ka hookamakama, o ka pili, o ka ume, o ka loku a me na lealea haumia; aole no hoi o kana mai.
O ka inu rama, he wai auau ia ma ke alo alii a ma na kuaaina a puni. O na aha hula a me na hula pai kauhale a puni na pae aina, oia na kula i ao nuiia iloko o ko ka Moi Liholiho mau makahiki i noho alii ai. A ike hoi na Moiwahine i ka lilo o ka Moi i ka ona rama a me ka moekolohe a me na lealea he nui wale, nolaila, hele pu aku la lakou ma ia hana hookahi. A no keia mea, komo iho la ka manao lili a me ka liuliu o ka Moi, a nolaila, kauoha ae la oia, e pepehiia na'lii a me na punahele i hoohaumia i na Moiwahine, aka, ua pakele no i na kahu alii o na Moi nei, a no ka nui no hoi kekahi o na makua.
O Haalou ke kanaka i okiia ke poo i ke koi e Kolii a me Kahalaia, oiai ua hiamoe loa oia me kana wahine, me Sarai Hiwauli iho nei no a John Ii; na ka Moi no i kena e pepehi, no kona moekolohe ana i na Moiwahine. O ka ona rama a me ka moekolohe mai ka lili o ka make. He alii ikaika loa o Liholiho i ka inu rama, a ua lilo ka rama iaia me he wai e inu la, aole nae oia i ike la aku e ona mai ana, aka, he alii oluolu loa, he hoohaahaa imua o ka poe ilihune, he hookama i na keiki a ka poe ilihune loa; launa oluolu no me ka poe misionari; he hoouna no i kona mau kaikaina e ao i ka palapala, a ua ike i ka heluhelu a me ke kakaulima, aku, ma kona manaoio ana i ke Akua, aole oia i hoomaopopo ia mea.
I ka manawa nae e noho ana ua Moi nei ma Puuloa i Oahu me kana poe wahine, a me kekahi poe alii e ae he nui wale, hele aku la kekahi misionari, oia hoi o Rev. H. Binamu, a ua hookipa no ka Moi iaia. Ua hai aku oia i kona kuleana o ka hiki ana'ku imua o ka Moi, oia o ke "aloha," me ka i aku, "He nui loa ko'u aloha ia oe, he alii opiopio oe, nolaila, e haalele oe i ka inu rama a me na hana lealea e ae, a e lilo oe i alii maikai, e mihi oe i kou hewa i ke Akua, a e pule aku iaia, alaila, pomaikai kou Aupuni, a e pomaikai hoi kou uhane me ke Akua ma ka Lani." Olelo mai la ka Moi Liholiho, "Elima O'u makahiki i koe, alaila Huli Au i kanaka maikai."
I ka ekolu o ko Liholiho mau makahiki ma Oahu, hana iho la oia i ka ahaaina hookahakaha no kana mau Moiwahine elima, oia o Kamehamalu, o Kekauluohi, Pauahi, Kekauonohi a me Kinau a ua auamo na'lii i ka hua o ka hoohanohano ana, me na kahili nunui e hoohiwahiwa ai i ka nani a me ka hanohano o na Moi wahine. O kekahi Moiwahine, oia hoi o Kalanipauahi, e hoike ana iaia iho, oia ka oi, ua puhiia kona, hua i ke ahi. He nui wale ka waiwai i hoomauna ia na ke ahi e aahu, aohe nae i mehana ke ahi no ka nui o ka waiwai i haawiia aku iaia.
(Aole i pau.)
HE MOOLELO
—NO—
HAMANALAU.
HANAI A HAWEA.
I laweia mailoko mai o na kaao kahiko o Hawaii nei.
HELU 7.
E ka mea heluhelu, ua ike ae nei oe he, kino maua ko Hamanalau, a e haohao paha oe, heaha la ka manu, ae, he mea hoohuoi io no-ia. E hai aku no au, he Iiwi-maka-polena, oia ke kino o Hamanalau i hoohalike ai. A ke haohao hou nei paha oe no ka mau o ka paa a ke kino o Hamanalau me ka helelei ole; ae, pela no hoi paha, ua ike oe he wahi anu ke kuahiwi, a he ano kupua no hoi o Hamanalau. Ua ike ae nei no kakou i na olelo hooiloilo a Hawea mamua iho nei. Nolaila, ua hooko mai na kaikunane akua ono, ua make o Hamanalau, aia a make o Hamanalau, alaila, paa ka awahia o kela olelo; ma ia ano kupua no nae, ua hoihoi hou o Hawea i kana olelo, a ua hoouna hou i na kaikunane ona e hele e lapaau pu me kahi moopuna uuku a lakou; a ua hookolo no na kaikunane e like me ke kauoha a ko lakou kaikuahine. Aole nae hoi au i hai mua ae nei ia oukou i ke kumu i aloha hou ai o Hawea ia Hamanalau, a ola hoa ai, eia iho malalo kona moolelo, e heluhelu oukou malaila.
KA HIKI ANA O KA UHANE O HAMANALAU I KAALA I O HAWEA LA.
O ka poe heluhelu, ua ike kakou mamua iho nei, ua make o Hamanalau, a e nana hou ae kakou, i ka hoi ana o kona uhane me ka ukana luuluu a ka moe, ua hoi uhane oia i Oahu nei. Mahope iho o ka la a Kaukanapokii i kanu ai ia ia, oia no kona wa i haalele ai i kahi kaikunane ona, me ke kamaiki a laua i ka uka nahele laau loloa o uka o Waipio, kahi hoi a ke anoano kanaka ole i noho ai, i hoolauwawaia e na manu o ka uka lio-lio.
I ka hiki ana'ku o Hamanalau iluna o Kaala, e noho mai ana no ua Kupunawahine me ke aloha, paumako no, no ka lawe malu ia ana no o ka moopuna. A i ka hiki ana 'ku oia nei. I nana mai ka hana o Hamanalau keia e ku aku nei, ua hele a ohuohu ke poo i ka lehua, he pa-u mahuna no kai ka hope, i hui-pu-ia me ka laumaia pala, kikepa ae la ke kihei ma kekahi aoao, ua hele wale a ehu ke oho i ka pukai, a puka maokioki mai ana mailoko mai o na alai ana'ku a ka lei lehua; he awili lei maile no ka-i-ka ai, ua hele wale kela a luluu, me he mea la e noho ana o Laka iluna. He nani maoli no i ka nana ana'ku; hookahi wale no wahi kina, ua hele a laukea, ua hi o ka ihu, ua hohoma na papalina, ua ano mu-kae ka maka. E hii aku ana no i ke keiki, oia ka mea i kikepa ia ai ka hipuu o ke kihei-kalukalu ma ka aoao.
A ma ko Hawea ike ana mai, ua make ka moopuna, aole hoi na hiohiona o ka uhane ola, a ma ko Hawea kuhi pololei io ana mai no, ua make no o Hamanalau. O ka lele mai la no ia o ko Hawea uhane, a uwe ku makena ae la i ka moopuna me ka leo nui; a uwe helu mai mai la no hoi i ka hoa noho o kahi mehameha, o ke kuahiwi anu o Kaala, he moopuna, ka mea hoi i hana, lehulehu ole ai, hookahi lehulehu o ka poe e-epa o ka po. Pela keia e helu mai ai, ma kela a me keia ano o ka noho ana. Ua ike no oe e ka mea heluhelu i ke ano uwe o ko Hawaii nei mai ka wa kahiko mai a hiki loa no i keia wa.
KA HAI ANA O HAMANALAU IA HAWEA I KA MAKE ANA ONA, A ME KA LAUA OLELO PU ANA.
I ka pau ana o ka uwe kumakena ana o Hawea, a me Hamanalau; ninau mai ke kupunawahine. Pehea mai nei oe; a auhea ka hoi ko pokii kaikunane? Olelo aku o Hamanalau; ua make au, aia maua la i ke kuahiwi kahi i noho ai, o maua wale no, a mahope ae hoi lanau ke keiki a'u oia keia, Haalele aku nei no au oia wale no ia e noho la e kiai ia'i, o ke kaikamahine no a maua e hanai wai ole la, hookahi wai-u o ka opuu o ka maia he pilali paha ia mea. Ua hookumakaia kumakaiia ia maua e kuu kane nana wau i kii malu nai, aole loaa mai o ka ai a me ka ia, nolaila make au i ka pololi ai, a pela aku keia e ole ai i na ano a pau. Na Hamanalau ka lelo; ka nuu wale no ka ua kupuna wahine i ka waimaka e uwe haaloulou ai, (ke haalouou la ka hoi i kana mea i hoino ai; he hono ka hoi kela poe palaualelo ae hewa.)
A mamuli o ka Hamanalau mau olelo hoalohaloha inoa o kona kupunawahine. Nolaila, ua ae aloha hou ae la o Hawea, a hoomanaoae la oia i ka olelo ana i pane ai e hoino au ia Hamanalau; ua ike no oe e ka mea heluhelu ia Hamanalau e laweia ana i ka moan o Pailolo, e kokoke aku ana i Lahaina. Nolaila, pane aku la o Hawea i ua moopua, "ae, ua ola hou ae, aia nae a hoomanaonui ko kaikunane i ka malama ana ia oe, ilaila, ola oe, a ina i hoomanawanui ole, a lakike paha a kunukunu, aole oe e ola, a ou wahi waiho aku la no ia o ke kuahiwi o Hawaii." Ninau mai la ua moopuna; a pehea ae nei au e ola ai. "Peneia. e komo aku auanei ke kino uhane iloko o kela manu a kaua la. (oia hoi ka iiwi makapolena i haiia mamua ae nei) a ma ia kino ka hoi oe e hoi ai i Hawaii, a oia kino kau e hoowalewale ai i ko kaikunane, a na'u no hoi ia e kauoha ae i ko mau kupunakane e-epa, e hoolioli, a e kohikohi aku i na mea kupono e hiki ai ke hana ia oe, mailoko mai o kona hana ano naaupo ana, a pela e ola ai oe; a i na nae e ola ae e-a, mai noho oe a noho hou i Hawaii, e hoi mai oe i Oahu nei, e waiho aku no ke kaikamahine au i Hawaii i kona makua. A ina hoi e hoi pu mai no olua me Kaukanapokii pono no. A ina hoi e noho aku no oia i Hawaii i makuakane no hoi no ke keiki, ua pono iho la no hoi ia. Ina io hoi e ola ae e-a, ma keia koolau mai oe aenei e hoi mai ai, ma ke koolau mai o Maui, a ma ke koolau mai o Molokai, a ma ke koolau mai Oahu nei; a hiki ae oe ilalo nei o Waialua, aia no ilaila kou mau makua. O Kaiaka kou makuakane, a o Puaena kou makuahine. A malaila oe e noho ai, malie no hoi o loaa ae kahi aleuleu kane malaila. Hookahi ka noho pu ana, o na makua, o ke keiki, nana aku nana mai, a hiki i ka wa e pauaho mai ai ka noho inei ana ma keia ao mau-leule."
A ma ko Hamanalau hoolohe pono loa ana 'ku i ka olelo a ke kupunawahine ona, a ua maikai wale no mai ka mua a ka hope. A olelo aku la nae keia "a pehea la auanei kuu kaikamahine nei, ina wau e hoi a loko o ka manu, a lilo hoi oia manu ko'u kino, pono ole paha ae nei kuu kaikamahine." "Pono no," wahi a Hawea; "heaha aenei kau hopohopo ana nona, oia hoi e ua make ke keiki, aia no ke ola la kona kino ma-o, a he uhane na au i lawe mai nei, he hiki no i na kupunakane ou ke lawe i na uhane keiki a waiho aku no me kona kino, me kou ike ole mai nae, aka, o ke kino maoli ona e noho la i Hawaii, oia kau kino e ike ai. A mai hoalohaloha nae oe i ko kaikamahine, o pono ole aenei, a uwe ino, a huli hele paha, a ulaia ia oe, mai hana oe pela, e hoihoi no oe i kou aloha ia oe iho, a hiki wale i kou wa e ola hou mai ai," ae aku la o Hamanalau me ka oiaio.
A i ka liu-liu ana iho o ka laua nei noho ana, o ka laweia mai la no ia o kekahi manu maikai loa, a olelo aku la o Hawea, "eia ae, ko kino manu e hoi ai, ae aku la no hoi o Hamanalau. I ka Hawea a me ka Hamanalau ike ana'ku hoi i ua manu nei, he ano laka, a i ke komo ana'ku o Hamanalau iloko, ua oi aku ka pi-ena, a me ka ahiu launa ole ka hoi o ua wahi manu nei, ke pi-oo la io, a ia nei, ke lele la iluna a ilalo no hoi. A ma ko Hawea ano kilokilo, ke namunamu wale la ho o ua o Hawea, a hiki i ka wa i laka mai ai ua moopuna manu nei a ua o Hawea.
KA HOI ANA O UA O HAMANALAU I HAWAII.
I ka ike ana iho o Hamanalau i keia kino oia nei, he kino manu, e lele kauaheahe ana, a e hookakakaha ana me na eheu, a e lele ana ma o, a maanei; lea-lea loa iho la keia. A i ka hoomaka ana ae nae e kamailio, aohe hiki pono o ka leo, he kani wale no nae, ina nae e akaaka o Hamanalau, aohe i ka aka pono nei, he oleolehala wale no me he mea e walaau ana. Nana aku la keia i ke kupunawahine ona e noho mai ana no, o ko ia nei aloha aku la no ia, aloha mai la no hoi keia, o ko ia nei hoi iho la no ia. O ke kaikamahine a ia nei, ua hoihoi mua ia no paha e na kupuna ona. Pau ko ia nei hele ana mai ma ke kai, ma ke kuahiwi ka ia nei hoi ana mai, (ua ike no oe ka mea heluhelu, aia no ma ke kuahiwi kahi a ka manu o ka waokele e lele ai, a e noho ai no hoi. Aole nae o Hamanalau wale no kai hele mai, ua hele pu mai no me na manu e o ke kuahiwi, na mauu liilii, a me na manu nui, oia hoi na manu e lele nei i ka moana i ka lawaia i ka po; oiai hoi, ina e lele o Hamanalau a maloeloe, ua loaa nae ka mea nana e hooluolu o ka manu nui, a manu au-kai hoi,) (oiai ua ike no oe e ka mea heluhelu, aohe lau laalaau o ka moana, e loaa iho ai kahi e hoomaha iho ai) oia lele ko Hamanalau a hiki i Hawaii, i hiki aku ka hana, e noho mai ana no ua kaikunane, me kana ukana nui e noho mai ana, oia hoi ke aloha kaikuahine, me ko ia nei ike aku no nae, e kipulu, a e hoolulu mai ana kela i na mea hooulumahiehi a pau, e like no hoi me ka kakou i ike mua ae nei ia Kaukanapokii e hana ana. A ma ia ano ko Hamanalau hoowalewale ana ia Kaukanapokii, e kii aku ana kahi kaikunane i ka manu e hopu, me ka manao la hoi i manu hoolakalaka, a laka mai ia hoi, i mea milimili na ke kaikamahine. Eia ka, ae nei, he manu e-epa keia.
KE KUKA ANA O HAMANALAU MA ME KAUKANAPOKII NO KA HOI I KAI O WAIPIO.
E na hoa puni heluhelu moolelo a kaao hoi, e alu hou ae kakou i hope, ma keia wahi a kakou i hookakahele mai nei, oia hoi ka hoi uhane ana o Hamanalau i Oahu nei, a hoi ai i Hawaii, a lapaau ia aie Kaukanapokii a ola ai, aka, ua kamailio e aku nei nae au ia oukou no ka lapaau ana, ae, ua pono no ia. A i ke ola loa ana ae o Hamanalau, i oi ai ka nani a me ke kelakela o ka ui, a me ka hie-hie o ka maikai, oia no oe i ka lehua hua noho i ka malu, i hele walea luluu i ka kapapa. O ko Hamanalau pane aku la no ia ia Kaukanapokii. "U! aloha no hoi oe, ina paha oe i ku i ko aoao kamalu, aoao pakike, a aaka la hoi, e like me kaua i kai o Waipio i noho ai i ka hale kane, ma ia paha aohe au e hoi hou mai i ke ao-malamalama, ina paha aole e ikea hou ia keia mea he la, nolaila, no ko nui ahonui no hoi, e like no me ka'u olelo ia oe i kinohi, pela no hoi kau hoolohe ana, aloha wale." Na Hamanalau ka olelo i ua kaikunane, he waimaka ko Kaukanapokii e kahe a wai mai ana, a pela no hoi ko Hamanalau. Pane hou no o Hamanalau, "he nani no na, ua lapaau iho la no oe ia'u a ola, euho: paha kaua i Oahu, a makai aku hoi kaua i ko luhi e ike ai a, noho iho no ko Hawaii nei keiki me kona makua, hoi no ko Oahu keiki. Oiai hoi ua ko mai la no kou makemake e kuu pokii, oia hoi ka hooholoholo-waa, oia paha nei e olelo ia nei la e ka poe kahiko, "moe waa." Ina la paha he moe waiwai, ina ua pono, aole, o ka mee-waa hoi; ope-a ua moe lalau he moe waa, o ka moe waa iho la no hoi paha ia la, ke laweia mai la e ke kane a uka nei la haalele ia iho. Nolaila e-a, e uhoi kaua." Ae, aku la no o Kaukanapokii. "Ae," a mahope iho o ko ia nei ae ana'ku, hoopuka aku la keia i ke mele a ia nei i pane iho ai i ko kaikuahine, oia na mele i haiia mamua ae nei, aka, he mea hou hoi keia i ka kakou ike ana ae ia Kaukanapokii, e hana pu ana me Hamanalau ma ke mele kike ana, penei ka uhana like ana.
Kaukanapokii Hanau la e hanau,
Hamanalau Hanau la e keiki,
K. Keiki a Kaihuauwaalua,
H. Hanau Kukoaa he kaikamaliuloa
K. Haawe i ke kua o Kaukanapokii.
A pau keia mele i ka hana kike ia e laua, e nana i ka lalani mua, na Kaukanapokii ia, a na Hamanalau aku ka lua, a na Kaukanapokii aku ke kolu, a pela aku, e nana i ka K. & ka H. A pau keia mele, hoopuka hou no o Kaukanapokii, i kekahi mele iho, oia hoi ke mele a Hamanalau i oli mai ai ma ka uhane, i ka wa i hopu ia ai ke kino manu ona e Kaukanapokii, ua ike no kakou mamua ae nei, aka hoi, he mea hou no ko laua kike uhane ana, a penei no ia.
Kaukanapokii Nihauiha wale e kunane
Hamanalau Uhia na maka i ka lau pala
K. Hana-ia i ka opuu maia
H. Loaa Hamanalau he pu-lo-ku
Ae, e ka mea heluhelu, ua ike ae nei kaua ia Hamanalau e oli pu ana me kona kaikunane, ma ke mele a Kaukanapokii i hana ai oia hookahi wale no, a ma ke mele hoi a Hamanalau i oli uhane mai ai oia wale no. He mea hou no ia no ko kakou hoonanea ana. Ma ke mele maluna, ua ike no oe ia mele, e papa iho ana o Kaukanapokii i ke kaikamahine a laua, mai uwe ae oe, e noho malie. Ia Kaukanapokii hoi keia. "Hanau la e hanau," a pela iho. A ma ke mele hope hoi a Hamanalau, ae, e wehewehe aku au i-a oe i keia. O ke kino make maoli o Hamanalau, ua hoolulu ia, a kipulu ia hoi i na lau nahelehele o uka, ua olelo ae nei no hoi au mamua, ua waiho a pa-a iloko o ka halelua, a ua kauia kekahi lau maia pala ma na maka, aole nae ia o ko Kaukanapokii manao maoli, malie paha i haule iho ma ke ano mimino ana ae paha o ka pu-a, a owili lau nahelehele, nolaila, ua haule a kau pono i ka maka, a waiho loihi no kekahi wa a Kaukanapokii e wehe ole aku ai e nana. Nolaila, pane mai ai o Hamanalau. "Nihaniha wale e kunane," aole i pololei loa ia olelo, ua ane kawalawala, aka, nau no nae ia e ka mea heluhelu e noonoo iho, oiai, ua palale paha ka leo, a ua pa-aheahe, aole hoi ke koikoi pono e like me ko kaua leo ko ke kanaka, he okoa hoi ka leo o ka poe e-epa au e nana iho ai, he ma-ae-ae wale no. Eia ka pololei loa. "Hoomaniha wale hoi ke kaikunane." Ka uhia ia iho ka ia o na maka i ka lau pala. "Hanaia i ka opuu maia," ae, o ka ai no ia a Kaukanapokii i hanai ai o ka maia o ka e-a, o ka wao. Loaa Hamanalau he pu-lo-ku, o Hamanalau ka pono, "he pu-lo-ku," ae, ua hanaia ka imi ana i mea e ola ai o Hamanalau, me he mea la e noho ana o Laka iluna, ua hele wale a pulo ku i ua mea he ohuohu i ka lei; hoopunonohu iluna o Keolewa, a oia ae la no.
A pau na mele a laua nei i ka hanaia, o ka-u hoomakaukau iho la no ia e hoi, kau no na wahi puolo a laua i kahi kaikunane, o ka uhoi iho la no la, a haalele aku la i ko laua home noho kuahiwi; kahi a laua i hoomanawanui ai i na po loloa o ka hooilo, a me na la kuhaoa o ke kau. Oia hoi no ko laua nei a hiki poeleele i kai o Waipio, ao e hoi ka hale Alii a laua nei i noho mua ai me ka hanohano nui, kipa ae la hua nei ma kekahi wahi papupu hale kuaaina, he wahi luahine hookahi ko loko. Ia laua nei i hiki aku ai e paina ana kela, a hooho mai la kela me ka hoopuka mai ia Hamanalau, me ke ano, ua moe uhane paha ia, a i ole ia, ua loaa paha o Hamanalau ia ia e komo mai nei iloko o ko ia nei hale me he mea la he uhane paha, a e ano hoohu kipepeiao ia ana paha keia, e hoohanalaea ai i ke oho, mai kona waiho malie ana iluna, o ke poe. A ma ka nana aku i ka luahine, ua eehia loa no, hele ka lepo-manu a me he mea la aole i kona wahi mau. A mai kuu-lala loa ua luahine nei, a manao e kahea. A no ko laua nei kamailio ana'ku, i hoi mai ai kona manao hiena a akakuu iho iloko ona.
(Aole i pau.)