Ka Nupepa Kuokoa, Volume VI, Number 45, 9 November 1867 — Page 1

KA NUPEPA KUOKOA.
KE KILOHANA POOKELA NO KA LAHUI HAWAII.
BUKE VI. HELU 45. HONOLULU, NOVEMABA 9, 1867. NA HELU A PAU 310.

KA NUPEPA KUOKOA,
HOOPUKA MAU IA MA HONOLULU I kela Poaono keia Poaono,
$2.00 No na mahina he Umikumamalua! $1.00 no na mahina eono,
ME KA HOOKAA MUA MAI.

NA OLELO HOOLAHA— aole i oi mamua o 10 laina no ka hoopuka hookahi ana, $1.00; alua komo ana, he $1.50; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai.
KANIKAU—he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi—penei: he 25 lalani, $1.00; 50 lalani, $2.00; a pela'ku.
NA UKU NO NA OLELO HOOLAHA—ka uku pepa, a me ka uku o ke Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.
O NA UKU PEPA A PAU E HOOKAA MUA MAI NO—aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.
AIA KE KEENA O KA NUPEPA KUOKOA—ma ke kihi hema o ka Hale Hookipa Luina (Sailor's Home.) O na hora hana, ma ka eiwa o kakahiaka, a i ka ha o ke ahiahi. L. H. KULIKA. (Luna Hoopuka.)

KA "NUPEPA KUOKOA,"
I s published in Honolulu EVERY SATURDAY,
$2.00 per annum, or $1.00 per six months, in advance.

A DVERTISEMENTS not exceeding 10 lines, inserted once for $1.00; twice or $1.50; and $2.00 for one month; all advertisements must be paid for in advance.
KANIKAU S will be charged 1.00 per page, or 4 cts. a line.
PA YMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.
ALL SUBSCRIPTIONS must be PREPAID. No names, either of foreigners or natives, will be inserted on the subscription list, until paid for. This rule must be strictly adhered to, on account of the low subscription price.
THE OFFICE OF THE KUOKOA is in the South corner of the Sailors' Home. Office hours from 9 A.M. to 4 P.M. L. H. GULICK. For the Publishers.
Volume I, II, and III of the KUOKOA, bound, for sale, $3.50 each.
Pe rsons having complete sets of the above, can have them bound by paying $2.00 each.

KAUKA LAPAAU.
—O—
Dr. Kennedy (Kenede) kona inoa.

AIA NO KONA HALE KAUKA MA ke Alanui Papu, makai iho o ke Alanui Hotele. Honolulu 245-1y

HALE PAI KII!

AIA KO'U HALE PAI KII MA MONIKAHAAE, Mawaena o ka HALEKUAI BIPI a me ka HALEKUAI MEA AI o S. SAVIDGE ma ke Alanui Papu. He emi loa ke kumu kuai o na KII. H. L. KEIKI (CHASE.) Mea Pai Kii. 267-1y

Papa Nukama ( R. Newcomb),
—A ME—
Toma Kea (Thoma s Cross)

NA MEA HUMU BUKE. Alanui Kalepa Makai o Hale Luina. 275-1y

No Hilo.

KA MOKU KUNA "MELE HILO," O Sebastian ke Kapena. E HOLO MAU ANA KEIA MOKU I KE Awa maluna, no na ukana ame na ohua e ninau ia HULIPAHU, (L. L. TORBERT).

HE MOKU HOLO MAU
No Lahaina, a me Makena.

O KE KUNA KALEPA PAA maikai, "Kate Lee." O Crane ke Kapena, E HOLO MAU LOA ANA, A HIKI MAI no hoi ma na Awa i olelo ia maluna. No na ukana a me na ohua, e nina i ke Kapena ma ka moku, a i ole ia ia C. BREWER &co. (BURUA MA) 228-tf

HE MOKU HOLO MAU NO KONA
—A ME—
KAU, HAWAII.

E HOLO MAU ANA KE KUNA "Kona Packet," KAPENA BALAAMA, mawaena o Honolulu a me Kona, Kau, Hawaii. No na ukana a me na ohua, e ninau i ke Kapena ma ka moku, a i ole, ia G. A. WILLIAMS. Honolulu, Aper. 23, 1867. 281-6m

No Hana, Kaupo, a me Kahului.

KA MOKU KUNA 'MANUOKAWAI,' O Akoni ke Kapena. E HOLO MAU ANA KEIA MOKU I NA Awa i haiia maluna. No na ukana a me na ohua, e ninau ia C. BREWER &co. (BURUA MA)

Na Buke i Paiia e ka Papa Hawaii
Eia na buke kuai, a me ke kumukuai.

Baibala Ohana, ano nui, me na kii, 2 50
a me na Moohana, 5 00
Kauoha Hou, me ka pepa lahilahi o waho, 12 ½
Kauoha Hou, hapa haole (Haw. Eng.) 25
Haiao, 25
Hele Malihini Ana, 25
Wehewehehala, 25
Li ra Hawaii, 25
No ko ke Akua Ano, 25
Li ra Kamalii, 25
Kumumua Hou, 12 ½
Moolelo Ekale sia, 50
Hoike Palapala Hemolele, 25
Himeni Hawaii me na Leo Mele, 1834, 25
Ninauhoike, 12 ½
Ui Kamalii no na Kula Sa bati 12 ½
Kumu Leomele 12 ½
Haawina Kamalii, Buke 1, a me 2, 12 ½
Haawina Kamalii, Buke elua i huiia, 25

Eia na buke i haawi wale ia.

Ui.
No ka Aoao Pope.
Hoike Pope.
Ka Ekale sia Oiaio.
Palapala Liilii—
Helu 4—Makemake anei oe i ke ola?
Helu 6—E hele i o Kri sto la.
Helu 7—Ka hoi ana mai o ke Keiki Uhauha.
Helu 11—No ka hoohiki wahahee i ke Akua.
Helu 16—Ka Eehia ana o ka Ahaaina a ka Haku a me ka Papekiko ana.
Helu 17—Mai hana ino i na Holoholona.
Helu 18—No ka mahi ana, kuai ana, a me ka inu ana i ka Awa.
Ka Davida Malo Kumumanao.
Ka Moolelo o Batimea Puaaiki.

L. H. Kulika.
Kakauolelo o ka Papa Hooko o ka Ahahui Euanelio o ko Hawaii Pae Aina.

Ka Nupepa Kuokoa.

KA MOOLELO O NA KAMEHAMEHA.
NA S. M. KAMAKAU.
HELU 46.

NO KA NOHO ALII ANA O LIHOLIHO MALUNA O KE AUPUNI, A UA KAPAIA O KAMEHAMEHA II.

KE KAUA AINOA MA KUAMOO.

                Ma ke kaulua o Keopuolani, a ma ka waa kaukahi o Hoapili. Kauoha mai la hoi o Haiha Naihe ia Hoapili penei: "Ke hoi la oe me ke alii i Kailua, e holo oe a pae ae i Keauhou, e kakali mai oe a hiki aku ke keiki a kaua, alaila, holo pu aku." A lohe o Keopuolani i ke kauoha a Naihe ia Hoapili, no ka pae ana ma Keauhou, me ke kali ana ia Kekuaokalani a hiki aku. Nolaila, ee iho la hoi o Keopuolani ma ko Hoapili waa, a holo loa aku la a pae i Kailua.
            I ka pae ana o Keopuolani ma ma Kailua, a halawai oia me ka Moi Liholiho Kamehameha II , me ka waimaka helelei a me ke kumakena imua o kana keiki, me ka olelo pu aku no hoi, "Mai ike ole ole ia'u, mai make mai nei au.'' Ninau mai la o Kalanimoku, ''Auhea la hoi o Kekuaokalani?" I aku la o Keopuolani, E i ae no mauka mai. Ninau hou mai la o Kalanimoku, Pehea ka pono o ka oukou kii ana aku nei? Pane hou mai o Keopuolani, Ua pau ke kii hoahanau ana, o kau wale aku no koe. Kena aku la o Keopuolani ia Kalanimoku e kii e kaua ia Kekuokalani. Ae mai la no hoi o Kalanimoku.
            Ia ahiahi no, haawi iho la ka pu a me ke kahei pau da a na koa, a me na lako kaua o na'lii a me na kaukaualii, na puali a me na koa o ka okaka a me na koa kaua alii, me ka lako i ka ahuula, na kapa koa a me na papale koa.
            A i ke kakahiaka ana ae, i ka aui ana o ka la, hoonohonoho iho la o Kalanimoku i na waa kaua eiwa, a oia no hoi na papa kaua a me na alii kaua o na papa kaua, me ka haawi aku i na olelo kauoha, "E noho malie, mai walaau, e ikaika, e koa, e inu i ka wai awaawa. E na pokii, e moe imua, aohe hope e hoi hope mai ai, imua aku no a make. Aia ka aina imua, aia ka hanohano imua, aia ka waiwai imua, mai hookuemi mai i ko oukou mau kapuai i hope, imua no a make, imua no a ola."
            Hoonoho iho la o Kalanimoku i ka poe lawe wai a me ka poe lawe ai. Hele aku la ka huakai kaua a hiki ma Keauhou, a hoomoana iho la malaila. Aka, hoouna e aku la o Kalanimoku ia Kaheana, me ka i aku, "E ae i ko alii e hele mai e ike me ke keiki; a i ae mai e ike, alaila pau wale keia kaua."
            Hele aku la o Kaheana oia hoi o Moehau, a halawai pu me ke Kuaokalani ma Kuamoo. A ike mai la o Kekuaokalani ia Kaheana, aloha mai la a ninau mai la i kana mau huaolelo. Pane aku la hoi o Kaheana, "Ua hoouna mai nei o Kalanimoku ia'u e hoopau i ke kaua, a e hele ae oe e ike me ko keiki me Liholiho, ma Kailua, a e ike mua nae olua me Kalanimoku, alaila, o ka pau no ia o ke kaua." Ninau hou mai la o Kekuaokalani, Haalele aku nei oe ia Kalanimoku ma i hea? "Aia i Keauhou kahi i hoomoana nui ai," wahi a Kaheana. Pane mai hoi o Kekuaokalani ia Kaheana, "Eia kuu kauoha ia oe, e hoi oe ma ka aoao o Kalanimoku, a i hea aku o Kalanimoku ma i ko makou aoao ea, e hopu iho oe ia Kalanimoku a paa, a loaa aku ia'u."
            Aole nae i pau ae ka laua kamailio pu ana, kani koke ana no ka pu a ka poe kiu a Kalanimoku i kahi papohaku i Lekeleke, o ka honi aku la no ia o ke kahu ia Kekuaokalani, a o kona lele aku la no ia iloko o ke kai, a au aku la a loaa o Kalanimoku ma ma Kawanui.
            O ka huna mua o ke kaua ainoa, oia no kekahi poe alii, o Kaikioewa ma. Ua ki pu mai la na kiu a Kekuaokalani, i ka huna mua o ke kaua ainoa, a ku iho la o Kaikioewa me ka oloolo wawae, a o Holualoa hoi ke aikane a Kauhiwawaeono, ke kane iho nei a Kakae, o laua kai ku mua i ka pu a ka poe kiu a Kekuaokalani, aka he ku pa ola nae, ina paha e ku pamake, ina ua lanakila ke kaua aikapu. A o kekahi poe koa no nae hoi o ka aoao ainoa, ua make no i kela poe kiu a Kekuaokalani. A ike na koa o Kalanimoku i ka make o ko lakou aoao, hee mai la lakou i hope; a o ka huna kaua ainoa ma ka aoao mauka, ike mai la lakou he poe uuku wale no ka poe kiu a Kekuaokalani, e pili ana i kahi papohaku, a ki pu ia mai la ma ka aoao mauka, a pau nui aku la i ka puehu. A ike hoi o Kalanimoku i ka puehu ana o na kiu o ka aoao aikapu, o ke alualu aku la no ia o kona poe koa, a halawai aku la me Kekuaokalani ma Kuamoo, a o ka hoouka iho la no ia o na aoao elua me ka ikaika loa. Iwaena nae o ka hoouka kaua nui ana o na aoao elua, ua koa launa ole no o Kekuaokalani, ke auhee nei kona poe koa, ke noke nei no kela imua me ka wiwo ole, a me Manono kana wahine ma kona aoao.
            I ka aui ana o ka la, ku iho la kona uha, a pelu iho la oia ilalo, a hoouka aku la no i ke kaua a ahiahi, aka, ua poai ia mai oia a puni, mauka, ma ke kai, ma na aoao a puni, a ua ku oia ma ka umauma, a pela oia i make ai imua me ke koa.
            A make iho la o Kekuaokalani, a o Manono hoi kana wahine, kahea mai la oia ia Kalanimoku e ola, me ka i mai: "E Kalanimoku—e, e ola a—u." He kaikuahine o Manono no Kalanimoku, oiai hookahi no o laua makuakane. Aka, ninau aku o Kalanimoku, Pehea ke 'lii? "Ua make," wahi a Manono. Pane hou aku o Kalanimoku, "Aole oe e pono ke ola, e waia auanei au i ke ao.'' Aloha ino ka leo o ka wahine, i ke noi ana mai i ke ola! Ua waiho oia ma ka aoao o kana kane, me ke kipu pualu ia.
            O Kuaiwa ke kahuna nana i paipai ka manao e kaua i ka aoao ainoa. Mahope o ka lanakila ana o ke pio ma Kuamoo, ua hopu ia ma Kailua; a o kekahi o ka poe kiu a Kekuaokalani, o Wahahee ka inoa, nana i kipu ia Puakau ma, ua hopuia laua ma Kailua, a ua pepehiia, me ke kauo hele ia. O Kuakamauna hoi ke keiki a Lonohiwa me Peapea a me Naheana ma, ua holo pio i ka nahelehele. O Manono ke keiki a Kanaukapu laua me Keawehaku, ua hele pio, a noho pio i na pali o Waipio; a pela ka nui o ka poe pio i ka nahelehele, a o kekahi poe, ua pae pio aku i Maui, aka, ua kalaia ko lakou make e ka Moi Liholiho, aohe e luku hou ia ka poe pio.
            Hoi mai la o Kalanimoku mai ke kaua ana ia Kuamoo, hoakoakoa ae la na alii a pau, a ahaolelo iho la me ka Moi, a ua hooholo iho la ka Ahaolelo, o Ulumeheihei Hoapili ka Alihikaua e hele e hoopuehu i ke kaua makaainana ma Hamakua.
            Holo aku la o Hoapili me kona mau koa maluna o ka waa a pae ma Kawaihae, a pii aku la oia me kona mau koa a hiki ma Waimea, halawai aku la oia me ua kaua makaainana nei, a o ka hoouka koke iho la no ia o ke kaua, a ua hoopuehuia ke kaua makaainana, ua lukuia kekahi poe, a ua auhee aku hoi kekahi poe iloko o ka nahele o Mahiki. O ka lanakila loa ae la no ia o ke Aupuni Ainoa.
            A ike iho la o Ulumeheihei Hoapili, aohe haunaele hou i koe ma Hamakua a ma Waimea, aole no hoi he nune hou no ke kaua aikapu, nolaila, hoi aku la hoi o Hoapili ma Kona, a huipu me ka Moi Liholiho a me na alii. O Kailua no ke kulanakauhale alii a me kahi e Ahaolelo ai na'lii no na oihana o ke Aupuni.

KE ANO O KA NOHO ANA O KE AUPUNI O HAWAII NEI MAMUA O KA HIKI ANA MAI O NA MI SIONARI.

                Eia ko kakou manawa kupono e hoakaka ai i ke ano o ka noho ana o na kanaka o Hawaii nei, mamua o ka hiki ana mai o na Mi sionari Pulitano ma keia pae aina.
            1. Ua lilo ka aina i na alii wale no. A aole no hoi i akaka ke alii mua nana i haawi ka aina no na'lii wale no, aole no hoi i akaka ke kumu o ka lilo loa ana o ka mana o na alii maluna o ka aina, a noho aku na kanaka malalo o na alii me ka hookaumahaia.
            2. Ua oleloia, na na makaainana no i haawi ka aina i na alii, a na ka poe hoi i lanakila ma ke kaua ana, a ua lawe pakaha wale ia na aina o na alii i pio a me ka aina o kona poe makaainana i lawe pio ia. Ua maopopo ma ka moolelo kahiko o keia pae aina, mai ka wa kahiko mai, ua hahai nui na kanaka a pau mahope o na alii e noho ai, me ka hoopilimeaai wale aku no, i loaa mai ia lakou ka waiwai a me ka aina. Pela no hoi kekahi poe alii, ua hanai nui i ke kanaka a nui, a paapu ke alo, a o ka hele no ia i ke kaua, a lanakila maluna o ke aupuni, a o ka okioki koke iho la no ia o ka aina, a haawi ae la i kona poe kanaka a me kona poe koa, a o ka lilo no ia o ka aina no lakou.
(Aole i pau.)

Ke Kaao o Hesana.
HELU 20.

                I ko Menia manawa i ike mai ai i ke ano kupilikii o ko Dasi kulana, lele mai la ia me kona poe koa e kokua mai iaia, aka, i ko Itai ike ana, ua nele o Hesana ma i ka poe nana e malama i kona maluhia, haalele aku la oia i ka hakaka ana me Dasi ma, lele mai la oia a me kekahi hapa o kona poe koa e pepehi mai ia Hesana—Ike mai la o Hesana i ko Itai haalele ana aku i na hoa hakaka ona ma kona alo, manao iho la no oia e lele mai ana oia e hakaka pu me ia, nolaila, olelo ae la oia ia Soda, i ka i ana "E ka hoahanau, ua kokoke mai ka manawa e hoouka aku ai oe i ka enemi me kahi ikaika i loaa ia oe." Olelo ae la no hoi o Soda, "Ma ka ikaika a me ka mana o ka'u pahi, aole loa au e hoihoi mai ana i kuu lima a hiki i ka manawa e ike ai au i ka haule ana o ko Itai poo ilalo, a me kona poe Haku hana ino. Hoomakaukau ae la o Hesana e o aku i kana pahikaua —Kahea mai la o Itai me ka leo nui, "E hopu a paa i ke kino o keia kipi hoohaunaele! E hoopaa i kona mau lala e na koa makau wale, no ka mea, aole e pono i keia koko kanaka ke hoopumehana hou i kona kino, oiai ua awahia kona koko i na hewa nui ana i hana ai. Ua pepehi wale oia i na poe kanaka pono e noho ana ma na mauna o Kasimia, a ua hoohaunaele wale oia i na wahi a pau o keia ao!" Nana ae la o Hesana, aia hoi, e iho mai ana he mau haneri eheu maluna iho ona, hoani ae la oia i kana pahikaua; a mamua ae hoi o kona manawa i hoomaka ae ai e hahau, ua hamo e ae la he ahi ano e i ike ole ia kona wahi i puka mai ai, a ua ikaika loa ka wela o ke ahi maluna o ko lakou mau kino, nolaila, ua haalele iho lakou ia Hesana, a holo nui aku la iloko o ke kai, aka, i loa no a komo aku lakou iloko o ke kai, o ko lakou manawa no ia i miki ia aku ai e na poe e noho ana iloko o ke kai, a pau loa iho la lakou i ka make.
            O Itai hoi, i kona manawa i lele mai ai me ka paukiki nui maluna o Hesana, aia hoi, ua haka pono loa ae la ko Soda mau maka iaia, a lele mua aku la oia me kana pahikaua e hou aku ia Itai—I ko Itai ike ana mai ia Soda, hoomohala pono loa ae la ia i kona eheu e poi pu iho maluna o Soda, aka, i kona manawa i hahau iho ai i kona eheu, ua moku koke ae la kona mau wawae a i elua, a mamua ae hoi o ka manawa i haule iho ai o kona eheu, ua moku e ae la no ia i ka pahi a Soda, a haule iho la oia i ka honua. Aole no i hoohakalia iho o Soda i ka pepehi ana aku i kona hoapaio, no ka mea, holo wikiwiki aku no oia a ooki iho i kona poo manamana i na apana eha, a hou iho la oia i ka welau o kana pahikaua iloko o kekahi apana a owiliwili ae la iloko o ka lewa, me ke kaena ae, "E like me ka'u i olelo ai pela no au e hooko ai."
            I ko na uhane akua ike ana mai ua make ko lakou alii, lulumi nui mai la lakou ma kahi a Hesana ma e ku ana, aka, ua noke aku la o Menia me ka luku nui ia lakou, a o Dasi hoi hoomaha iki ae la ia no ka poluluhi iki i loaa mai iaia.
            O Menia mai mahope a o He sana ma aku hoi ma ke alo. O na manao kanaka, a me na kaua ma ka ikaika kino iho, aole malaila ka hoouka ana, aka, maluna iho o ka mana kupua o na pahikaua, a me na uhane kupua o loko o ke Komo, a me ke pine gula.
            He nui na mea make i kiola ia mai e na poe kipi e pono ole ai ke kanaka. Ua hoopihaia ke ea e ka hohono pakui o na luai pele, a me na lahea inoino o na hanu o keia poe akua. Ua hoounaia mai na ihe wela, a me na pua, pana, na pahi, he mau wai auau wale no nae ia no He sana ma.
            He mau ho ra ko keia hoouka kaua ana, a ike ia aku la ka waiho mokaki mai o na enemi, i paa i ka nakinakiia, a ua aneane no hoi e pau loa i ka lukuia.
            Mahope iho o ka wa i auhee aku ai o na hapa uuku iho i koe o ka poe enemi, holo aku la lakou a komo iloko o ka moana lipolipo, aka, i loa no a komo aku ko lakou mau poo iloko o ke kai, ua hamu koke ia mai ia lakou e ko ke kai poe. Pela iho la ke ano i hoopau ai o Hesana ma i keia kaua ana me na enemi, aohe ahailono i koe, ua noke ia a pau loa, a o ka poe e koe ana ko lakou ola, ua pau pio lakou, a halihali ia aku i na ana o na mauna o Kasimia.
            He mau minute mahope iho o keia manawa, ua ike ia aku la ka malino o ke kai, a me ke kalae o na wahi a pau, aohe mau ao hoomalumalu i ike ia aku e pii ae ana mai ka huina aouli mai, aohe hoi he kupikipikio i ikeia aku no ke kai, a ua like kona waiho halana ana me he wai la o ka loko, aka, o kona malino ana pela, aole ia i mau a hala ka hapalua ho ra, aia ua hoomaka mai la ke puhi ikaika ana o ka makani mai ke Komohana mai, a ea mai la na ale kawahawaha o ka moana a kiekie me he mau kuahiwi nunui la, aole i kanamai. He mau lalani ale kai pakui mai mahope o kekahi, a me he papa lalani koa la ko lakou hele ana mai.
            Lalau mai la o Menia ia Hesana ma laua o Soda, a lawe aku la ia laua iloko o ka lewa iu anoano. Kauoha ae hoi o Dasi i na Uhane Kupua e wahi iho i ka honua a hamama i wahi no ke kai e kapoo iho ai i ole e halana pu ia ka aina
                Ia manawa, ua hooko koke ia mai la ke kauoha a na kupua. Hamama ae la ka honua i kona waha a moni pu ia aku la ke kai i uhi mai iluna o ka aina, a ia manawa no hoi i hoea pu mai ai me na poe kohola o ke kai, na hookalakupua i koe aku me kela ALII KAI Kupua. Hoomaka iho la ka haka ka hou ana o ua Kupua nei o ke kai me na poe ma ko He sana aoao e noho ana iloko o ke kai, a ua luku loaia na enemi a pau i ka make, pualena ae la ke kai i ka ula i ke koko, a mai ia manawa mai ke kapaia ana o ua kai la o ke Kai Ula. I ko Menia ma hoomaopopo ana iho ua pau loa na enemi o ke kai i ka luku ia, puhi ae la oia i ka ole, a akoakoa mai la ko lakou poe a pau i o lakou la. Kauoha aku la oia ia lakou e hele mua aku lakou a hoomoana iho ma na aekai o ke aupuni Uhane, a hiki i ka wa e hiki aku ai o Hesana ma. Iloko o keia manawa, he haohao nui ko Majo ma no ko Itai nalowale loihi mai ko laua maka mai. Hoouna ae la oia i kekahi elele e hele mai e makaikai i ke kumu o ko Itai ma lohi loa ana, aka, i ka hiki ana mai o keia elele i na kapa kahakai o ka mokupuai waho loa o na mokupuni Uhane a pau, aia hoi, he poe e wale no ke hoopuni ana i ua mokupuni nei. Ike pu mai la no hoi ia, ua hooulaulaia ka moana holookoa e ke koko. Hoi wikiwiki aku la oia e hai ia Majo a me kona poe i kana mau mea i ike ai.
            I ko Majo lohe ana i keia mea, hoouna koke aku la oia i ka Elele i o Anejao la ke Alii nui nona na mokupuni Uhane, oiai oia e noho ana i kona mokupuni Ahi, oia hoi ke kikowaena o na mokupuni a pau, a me ka oi o ka ikaika o na mea Kilokilo. I ko Anejao ike ana mai i ka ahaiolelo a kona Kuhina Nui e hele aku ana, ala ae la oia a kauoha ae la i na poe kupua ikaika ona e hoomakaukau ia lakou iho, a o ko lakou manawa koke no hoi ia i hoa lalapa ae ai i ke ahi enaena, a ua nowela ka lani i ke okooko. Hiki aku la ka elele, a hahai aku la i na olelo a pau ia Anejao, no ka hiki ana mai o na enemi, a aia lakou ke hoomoana la ma na ae kahakai o ka mokupuni waho loa o na mokupuni a pau. Ia manawa, hoomaka mai la ko Anejao mau helehelena e haikea, e ike ia aku la he mau manao hana nui kana e hana ana ia manawa.
            Oiai o Hesana ma e ku ana ma na kapa kahakai o Kasimia, aia hoi, hoea hou mai la o Baji mai loko mai o ke kai, kahea aku la o Hesana iaia i ka i ana aku, e hana mai lakou i kekauwahi waa e holo aku ai a pae i kekahi o na mokupuni Uhane. I mai la o Baji, ua makaukau kou moku e holo aku ai oe a pae i na mokupuni o ke kai, a eia ae ia ke holo mai nei i ka moana. O ka'u i hele mai nei e hai aku ia oe, oiai hoi, e noho iki oe i mau la elua, a e hoomaamaa ia oe i ka au ana a me ka luu ana iloko o ka hohonu o ke kai, i hiki ai ia oe ke luu me ka poino ole ke hiki aku oe i na mokupuni Uhane, no ka mea, oia ka oi o na mea paakiki a pau au e kii aku ai. A i hou mai la no hoi ia. Ua pau loa na kupua o ke kai i ka lukuia, a o kela Nunui Deragona wale no i koe, ua holo aku la oia i ka mokupuni Uliuli, kahi i nohoia e na lapu hooweliweli o ka po. Napoo hou aku la o Baji iloko o ka opu o ka moana, a ia manawa koke no, unuhi ae la oia i ke pine daimana a hooluli ae la iaia, a iaia i hana ae ai pela, aia hoi, hoea mai la o Dasana me ke kulou mai imua o Hesana, a hohola ae la i kona mau lima me ka i mai, "E hoomaikai ia ka inoa o kuu Haku, a e aloha ia mai hoi oia e ko ka honua a pau, no ka mea, ke ike nei au, ua hoolilo iho oia i kona poe enemi i puu hooleina moka iloko o ka honua, a ua hookauliilii aku hoi oia ia Itai a me kona puali i mau opala ma ka lani. Aole e hoi mai ka ikaika o kona lima, aole hoi ka mana o kana pahi-kaua a hiki wale i ka wa e hoopuehu loa ia aku ai kona poe enemi mai ka ili aku o ka honua. A imua o na Hanauna a pau e hiki mai ana, aole loa e nele ka hoomanao ia o kona inoa." I ka hoomaha ana iho o Dasana, aia hoi, olowalu like mai la na leo hooho he lehulehu, i ka i ana, "E ola! E ola!, ko kakou Haku!" A ike ia aku la ka hookeke ana o na poe koa malalo o Dasana, me ko lakou kulou like iho i ka lepo, a o ko lakou lima hema i ka lani kahi i kuhikuhi ai. Olelo hou mai la o Dasana ia Hesana, e hookuu mai oe ia makou e hele e hoouka aku i kela poe."
            "E hele aku, wahi a He sana, no ka mea, eia ka wa e hoouka aku ai oukou i na enemi." Haalele mai la oia ia Hesana ma, a lele aku la lakou i ka lewa, oiai aohe mea nana e hoomaka'uka'u mai i ko lakou lele ana iloko o ka lewa. A e ane aku ana i ke ahiahi, hiki aku la lakou i ka mokupuni a Dasi ma e noho ana, a halawai like aku la lakou, a hoomaka koke iho la no ia o lakou e kaua like aku i na enemi o ua mokupuni la. Ua hooauhee ia aku na poe kupua a pau o luna o ka mokupuni, a ua lilo holookoa ae la ua mokupuni la ia Dasi ma, a me Menia. (Aole i pau.)

Ka holo ana e Kaapuni ia Hawaii.

                Ma ka la 8 o Augate. Ua pau ka Ahahui Lunakahiko o Kauai, ua holo mai maua o Rev. L. H. Kulika, maluna o ka moku Neti Mela. Ua loihi makou no ka malie o ka moana.
            Au gate 10. O ka Poaono ia, ua ae oluolu ke Kapena ia maua e lele ma Waianae. A hele aku la o L. H. Kulika i Waialua ia po no, a hele mai hoi au i kahi o Bev. A. Kaoliko ma Pokai. Aohe i loaa ia'u, ua hala kela i Lahaina.
            Au gate 11. He la Sabati keia. Ua lilo ia'u na hana o ia la, a ua hai aku au i na hana o ka Pae Aina o Nuuhiva. A pau ae la ka'u olelo ana, ua haawi mai lakou i na dala he $14.75.
            Augate 12. Ua haawi aloha mai ka wahine kanemake Hana Waima lu, i lio no'u e holo ai i Honolulu. E makaukau ana hoi o Kilauea e holo i Hawaii, o ka pii koke no ia maluna, a holo aku la makou.
            Augate 13. Ua ku iki iho no makou ma Lahaina, a lele aku la i uka e launa pu me Rev. D. Baluwina ma, a me Re v. J. H. Moku. Kau hou ma ka moku, a holo aku la i Kalepolepo, a pau ko laila poe i ka lele aku, o ka holo loa no ia a hiki i Kaawaloa, Hawaii. O Hon. D. K. Naiapaakai kekahi ma keia holo ana. Ua hui aloha no maua i ka noho ana ma Kaanapali.
            Au gate 14. Ua ku makou ma Kaawaloa, a lele aku i uka, a nana i kahi i pepehi ia ai o Kapena Kuke. Ua haawi aloha ia mai ko'u lio e pii ai i kahi o Rev. J. D. Parisa ma Kuapehu. He aina nui maikai kona, a maikai no hoi kona hale e noho ai. Ua aua ko'u hoa'loha Mr. Makaike ia'u i na la elua.

KAAPUNI ANA IA HAWAII.

                Augate 16. Ua hele mai i Kona Akau keia kaapuni ana. Ua akoakoa na kanaka o Kainaliu, maloko o ka luakini o Lanakila, a ua piha loa no. He poe makaala lakou, a hoihoi i ka hoolohe i na mea hou. Ua lohe mai au, o Mrs. Raisi, he wahine hapahaole, ano haipule, oia kai haawi aku i kona apana aina i wahi e kukulu ai ka luakini o Lanakila. Me M rs. Raisi ko'u mahalo kiekie aku, a me kekahi poe e aku no e noho mai nei. A pau ka'u olelo ana, ua haawi mai lakou i na $10.25.
            Augate 17. Ua haalele ia Kainaliu, a hele aku a moe ma Kahaluu, oia ke kihapai a J. W. Kupakee i malama ai, a me ka luakini maikai Helani.
            Augate 18. He la Sabati keia ma Helani. A pau ka pule kakahiaka, ua haawi mai lakou i na dala $4.25. A hele aku la maua me Rev. G. W. Pilipo i Kailua, oia no ke Kahu Ekalesia o ia Apana. Ua akoakoa na kanaka i ka pule ahiahi ma Mokuaikaua, e kali ana e lohe i na hana ma ka pae aina o Nuuhiva. A pau ka'u hoike ana, ua haawi mai lakou i na dala he $12.87 1/2.
            Au gate 19. Oia ka Poakahi, ua pii aku maua me Rev. G. P. Kaonohimaka iuka o Kekaha, oia kona Kihapai Ekalesia. He aa, a kaawale loa na hipa. Ua akoakoa na kanaka mauka o Kaloko. A pau ka olelo ana, ua haawi mai lakou i na dala $4.25. A pii aku la maua i Kalaoa, ua piha e ia luakini pohaku maikai i na kanaka, o Haleola kona inoa. He wahi awai pohaku kona, ua hoonania ia i na pua a me ka manu ano aeto. Akahi wale no au a ike i ka awai i hoonani kaleko ia ma keia paeaina Hawaii. Ua mahalo no kamalii i kona onionio maikai ana, aka, o na kanaka makua paha, aole lakou e mahalo ia mea. Ua mahalo nui au i na hoahanau o Kekaha, no ko lakou kuai ana i 60 eka aina no ko lakou Kahu, a me ka hale ano maikai e noho ai. He pono i na ekalesia okoa mai o a o, e hana e like me lakou la ma Kekaha, i Kona Akau, Hawaii. Ua haawi mai lakou i na dala $2.00.
            Augate 20. Ua hele pu me a'u ke Kahu i kai o Makalawena. He loihi ka iho ana, he aa wale no, he hoki ka mea pono loa ma ia aina. He wahi halelaau uuku maikai kahi luakini. Ua hele mai na kanaka he 20. A pau ka olelo ana, ua haawiia mai na dala $2.75. Ma ke awakea, ua kokua aloha mai kekahi hoahanau i kona waa, a hoe aku ia maua i Kiholo. Halawai iho la na kanaka o Kiholo ia ahiahi no. Ua loaa mai na dala $2.75.
            Au gate 21. Ua hoe aku na hoahanau o Kiholo ia'u maluna o ka waa, a hiki ma Kapalaoa, a halawai malaila. A pau ia, holo aku a pae i Puako, a halawai no malaila. He wahi halepule maikai ko laila, ua nui no na kanaka i hele mai e lohe i na olelo no Fatuhiva. A pau na hana malaila, holo aku la maua ma kahi waa uuku, a poeleele, pae maua ma Kawaihae, a moe ma ka hale o D. Manuia ko'u hoa'loha. (Aole i pau.)