Ka Nupepa Kuokoa, Volume VI, Number 34, 24 ʻAukake 1867 — I ke Kuokoa. [ARTICLE]

I ke Kuokoa.

E ka Luna Hooponopono.. Ua heluhelu iho makou i kou manao pepa o ka la 20 o Iulai e pili ana i ka Aha Hoomalu, a me he mea la e kapa mai ana oe i ke kahu oia Aha he mea hana paewaewa mau, a nolaila, ua manao makou he mea pono ke hoopololei aku ia oe maia mea ; Oiai aohe makou i apono i kana olelo hooholo ma ka hihia au i hoolaha ai, aka, ma na hihia e ae a makou i ike ai ua hooholo no oia e like me ke kupono i ka makou i manao ai he pono. Me ke Aloha. E. Kanihina. J. W. Keawehunahala. J. Komoikeehuehu. Levi Keliipio. Honolulu, Aug. 2, 1867. Nani ko makou mahalo ia oukou e ka poe nona na inoa maluna, no ko oukou apono ana mai ia makou a me ko oukou hoahewa ana i ua Lunakanawai Hoomalu nei, no kona olelo hooholo i hoopuka ai ma ka hihia a makou i hoolaha ai. Aka no ko oukou wahi manao makamaka paha, nolaila ua hapala pu oukou i ka maikai i kana mau olelo hooholo ma na hihia e ae. Aka ua akamai, a ua nihi ka oukou hele ana mai, a me he mea la o ke ano nui, he mea ia i hilinai nui oleia e oukou ma ke kanana kaulike ana i ka pono o ka lehulehu, ke ku ka iliulaula ma kekahi aoao. A ina i loaa ia makou ka manawa kaawale ma keia hope aku, alaila e wehewehe hou makou i kekahi o kana mau olelo hooholo e ae. Luka Hooponopono.]