Ka Nupepa Kuokoa, Volume VI, Number 34, 24 August 1867 — Page 1
| This text was transcribed by: | Leilani Lindsey-ka'apuni |
| This work is dedicated to: | Henry Keawe Lindsey |
Ka Nupepa Kuokoa
KE KILOHANA POOKELA NO KA LAHUI HAWAII.
BUKE VI. HELU 34. HONOLULU, AUGATE 24, 1867. NA HELU A PAU 299.
"KA NUPEPA KUOKOA,"
HOOPUKA MAU IA MA HONOLULU
I kela Poaono keia Poaono.
$2.00
No na mahina he UMIKUMAMALUA!
$1.00 no na mahina eono.
ME KA HOOKAA MUA MAI.
----------
NA OLELO HOOLAHA—aole i oi mamua o 10 laina no ka hoopuka hookahi ana, $1.00; alua komo ana, he $1.50; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai.
KANIKAU—he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi—penei: he 25 lalani, $1.00; 50 lalani, $2.00; a pela'ku.
NA UKU NO NA OLELO HOOLAHA—ka uku pepa, a me ka uku o ke Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.
O NA UKU PEPA A PAU E HOOKAA MUA MAI NO—aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.
AIA KE KEENA O KA NUPEPA KUOKOA—ma ke kihi hema o ka Hale Hookipa Luina (Sailor's Home.) O na hora hana, ma ka eiwa o kakahiaka, a i ka ha o ke ahiahi.
L. H. KULIKA. (Luna Hoopuka.)
KA "NUPEPA KUOKOA."
Is published in Honolulu
EVERY SATURDAY,
$2.00 per annum, or $1.00 per six
months, in advance.
ADVERTISEMENTS not exceeding 10 lines, inserted once for $1.00; twice or $1.50; and $2.00 for one month; all advertisements must be paid for in advance.
KANIKAUS will be charged 1.00 per page, or 4 cts. a line. PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.
ALL SUBSCRIPTIONS must be PREPAID. No names, either of foreigners or natives, will be inserted on the subscription list, until paid for. This rule must be strictly adhered to, on account of the low subscription price.
THE OFFICE OF THE KUOKOA is in the South corner of the Sailors' Home. Office hours from 9 A.M. to 4 P.M.
L.H. GULICK.
For the Publisher.
Volume I, II, and III of the KUOKOA, bound, for sale, $3.50 each.
Persons having complete sets of the above, can have them bound by paying $2.00 each.
MOKU KUNA WAWIKI !!
E HOLO MAU ANA KEIA wahi moku i Molokai i kela pule keia pule mai Honolulu aku nei. A ina he ukana hooili ka kekahi a e holo ohua ana paha, alaila, e ninau no i ke Kapena oia o KAHALEMAKE.
266-3m
HE MOKU HOLO MAU NO KONA
A ME
KAU, HAWAII
E HOLO MAU ANA KE KUNA
“KONA PACKET,’
KAPENA BALAAMA, mawaena o Honolulu a me Kona, Kau, Hawaii. No na ukana a me na ohua, e ninau i ke Kapena ma ka moku, a i ole ia
G. A. WILLIAMS.
Honolulu, Aper. 23, 1867
281-6m
No HONOIPU me NAOHAKU.
Ka Moku Kuna
“KOHALA”
O Howard ke Kapena.
E holo mau ana keia moku ma na awa i oleloia maluna, no na ukana a me na ohua. E ninau i ke Kapena, a i ole ia, ia
KAKELA me KUKE.
6m
No Hana, Kaupo, a me Kahului.
KA MOKU KUNA
‘MANUOKAWAI,’
O Akoni ke Kapena.
E HOLO MAU ANA KEIA MOKU I NA Awa i hana maluna. No na ukana a me na ohua, e ninau ia C. BREWER &co. (BURUA MA)
HE MOKU HOLO MAU
No Lahaina, a me Makena.
O KE KUNA KALEPA PAA maikai.
“Kate Lee.”
O Crane ke Kapena,
E HOLO MAU LOA ANA, A HIKI MAI no hoi ma na Awa i olelo ia maluna. No na ukana a me na ohua, e ninau i ke Kapena ma ka moku, a i ole ia ia
C. BREWER &co. (BURUA MA.)
228-@
No Hilo.
KA MOKU KUNA
“MELE HILO,”
O Sebastian ke Kapena.
E HOLO MAU ANA KEIA MOKU I KE Awa maluna, no na ukana a me na ohua e ninau ia
HULIPAHU, (L. L. TORBERT.)
NO KAWAIHAE.
E HOLO MAU ANA KE KUNA MArilda i kela awa maluna. No na ukana a me na ohua, e ninau i ke Kapena ma ka moku, a i ole ia
WALKER & ALLEN,
Na Luna.
Na Luna ma Kawaihae, o CONWAY & ALLEN.
276 3m
NA BUKE
HOOLAHAIA E KA PAPA HAWAII
Baibala Hemolele Nui ili eula nani me na kuhikuhi ma na a ao.....$12 00
" " Nui ili eleele kaekae wai gula.....5 00
" " uuku iki ihi " ".....8 00
" " Pananaiki iho ili eleele.....4.00
Kauoha Hou ili gula nani me na kuhikuhi.....3.00
" " eleele kaekae wai gula.....1.00
" " " ......75
Kauoha Hou Hapa Haole.....75
Lira Hawaii 1848 me ke kanawai......25
" " 1855.....25
Moolelo Ekalesia.....50
Haiao ili lahiahi.....10
Hele Malihini ana.....25
No ko ke Akua ano......25
Lira Kamalii......25
Hoike Palapala Hemolele.....25
Moolelo o Heneri Opukahaia.....25
Hoike Akua.....25
Weheweheia.....25
Ninau Hoike ili manoanoa.....25
" " " lahilahi....10
Kumumua Kula Sabati.....10
Buke Lawe Lima.....10
He Buke no ka Pope.....10
Ui Kula Sabati Helu 3.....25
" " " " 4......25
" " " " 5......25
Buke Euanelio a Ioane.....10
Himeni .....1.00
Himeni Ili nani.....1.75
Na Kauoha Hou Pakeke
Ili Gula nani.....1.50
Ili eleele kaekae nani......50
Ili eleele......35
Kauoha Hou Pakeke me na Halelu
Ili Gula nani.....1.75
Ili eleele kaekae wai gula.....50
Ili eleele......50
Na Halelu Pakeke
Ili Gula nani.....50
Ili eleele kaekae wai gula......30
Ili eleele.....20
Ka Hae Hoonani (Buke Mele)......25
Buke Wehewehe Huaolelo Baibala.....2.00
" " " Ili nani.....3.00
Eia na buke haawi wale
Palapala Liilii--
Helu 4--Makemake anei oe i ke ola
Helu 6--E hele i o Kristo la.
Helu 7--Ka hoi ana mai o ke Keiki Uhauha
Helu 11--No ka hoohiki wahahee i ke Akua
Helu 16--Ka Kehia ana o ka Ahaaina a ka Haku a ma ka Bapetiso ana.
Helu 17--Mai hana ino i na holoholona
Helu 18--No ka mahi ana, kuai ana a me ka inu ana i ka Awa.
Ka Davida Malo Kumumanao.
Ka Moolelo o Batimea Puaaiki.
L. H. Kulika.
Kakauolelo o ka Papa Hooko o ka Ahahui Euanelio o ko Hawaii Pae Aina.
Ka Nupepa Kuokoa.
KA MOOLELO O KAMEHAMEHA I.
Na S. M. Kamakau.
HELU 38.
KE AU O KAMEHAMEHA MAI KA A. D. 1811, A
HIKI I KA A. D. 1819. NO KA HOI ANA
O KAMEHAMEHA I KA A.D. 1811, I
HAWAII. KANA MAU HANA A
HIKI I KA MAKE ANA.
O na akua i hoomana ia a i pule nui ia maloko o na heiau, oia hoi o Waihau, Unu, Haleopapa, Kuula, Koa, Loulu a me na mua, Haleilimaia, alaneo, hale-auhaumaule, aleo, oeoe, anuu, kuapala a me ka halelau. A o na akua iloko o ka pule; a o ka hua pule e puana ai: O Kane, Ku, Lono a me Kanaloa. O keia mau akua, aole no ia he mau akua laau a pohaku hoi. Aole no hoi i laweia keia mau akua i mau hoailona i ike makaia a hoomana aku. I ka manawa e pule anaina ai ke anaina a pau loa, alaila, e kukulu like na lima iluna me ka hooiaio ana, aia ke akua oiaio ma ka lani. A pela iho la e kukulu like ai na lima, me ke kuhikuhi like aku, aia ke akua oiaio ma ka lani. A pela no e puana like ai a hiki wale i ka Amama ana, (Amene) alaila, hookuu na lima ilalo. Ina he pule ohana; i ke ala ana mai o ke kane a me na keikikane, a mau makua paha, alaila, komo aku lakou i ka hale mua, a lawe mai hoi i ka ipu a Lono, oia hoi ka ipu-kuaaha. He hulilau ke ano o keia ipu, ua hana ia i ke kuaaha a paa, a ua kakai ia kekahi aia maloko, he ai, he ia, he awa, a he wahi huluhulu awa mawaho o ke kakai, ua nakinaki ia, a lawe ia ae la a waiho ma ka puka, haliu aku ke alo iwaho, me ka nonoi aku i ke akua, e hoola i na ‘lii, na makaainana a me ka ohana, a pau ia, ai ka ai a me ka ia. A pela no i ke ahiahi.
Ua olelo nui ia ka lahuikanaka Hawaii, he lahui haipule i ke akua, he hookipa, he oluolu, he heahea, he aloha, he haawi wale i na mea ai a me na mea aahu, he kahea no i na malihini e moe ma ka hale, e ai wale ana i ka ai a me ka ia, a e aahu wale ana no me ka uku ole. He lahui hilahila keia i ka piepiele. Oia iho la ke ano o keia lahui mamua aku o ka hiki ana mai o na haole a me ka pono Kristiano ma Hawaii nei, a ke aoia nei i ka aua, ke pi, ka uahoa a me ke koea, a e ao i ka hauhauhali, a e puka i haoa a e hooiolea. Ua hooko no kekahi poe i keia, aka, o ka hapanui, ke maumaua mai nei no na mamo a ka lokomaikai. O ka poe aua a pi hoi, ua hoohilahila loa ia ko lakou mau inoa. Pela o ka mahiai a ke Kukului, o Pahia a me Kuleioiki.
Heaha ke kumu? He lahuikanaka haipule i ke akua, he ike i ka moolelo o ke Akua, i kona mana, i ka ike, ke ahonui, ka hana maikai a me ke ola loa. He lahui ike i ka moolelo o ka honua nei i ka pono a me ka hewa. He lahui ike i na moolelo o kela a me keia aupuni, no ka maikai a me ka ino. Aia ma ka moolelo pule, Akua, kaao, papahulihonua a me na moolelo o na mookuauhau, aia malaila e loaa ai na lahuikanaka o ka honua.
HOOMANAKII. He lahui hoomana ole keia i na kii mamua aku o ka hiki ana mai o na haole a me ka pono Kristiano. Aole no he kii i kukuluia imua o ke anaina, a kukuli hoomaikai aku ke anaina a ahakanaka paha. Aole no hoi i kukuluia imua o Kukailimoku, Kukeoloewa, Kuhooneenuu a me na mea like, a hoomana aku la hoi ke anaina, me ke kukuli ana iho i na kuli ilalo o ka lepo. O keia mau akua, he mau akua kapu loa aole e ike ia e ke anaina, aohe no hoi e waiho mau ia i loko o ka heiau; aia wale no i ke kapu nui ana o ka heiau i ka po, a oia wale iho la no ka wa e laweia mai ai o keia mau akua, alaila, kauo ke akua hulu; o ke Alii a me ke kahuna nui wale no, a mahope o ke kuahu ka aha kai. He mau hoailona keia no ke akua ike ole ia. O na kii i kukuluia mawaho o ka pae humu, he mau kii hoonani wale no ia mawaho o ka heiau, aole ia he mau kii e hoomanaia’i a kukuli aku kekahi kanaka.
KE ANAINA PULE. I ke anaina pule nui mawaho iho o ka lele i ka wa e pule ai, a o ke alii nui ma ka puka o ka heiau, malalo iho o ka lele, a haliu mai ke alo i ke anaina, a o ke kahuna nui ma ka aoao; o na alii a me ke anaina, mawaho aku lakou o ka lele, e haliu aku ana ke alo imua o ke alii a me ke kahuna, me ka noho paa o na lemu, me ka pelu like o na kuli. I ka wa a ke kahuna e hooho mai ai i ka hua pule, alaila, hoala like ae la na lima akau i ke kuhikuhi i ka lani, oia ko lakou hoohiki ana i ke akua e kokua mai. A loihi loa ka hapai like ana o na lima, a ina he pule i loaa like i ke anaina, alaila, e puana like auanei me ke anaina; a hiki i ka pule kapu loa, he kumulolohia, he mau hua pule pokole, aka, ua ikaika loa nae ke kanawai hoopai i ke ola; a kulou like aku la ke poo o ke anaina ilalo, me ka lele ole mai o ka lemu, alaila, Amama (Amene) ae la ke alii. Aole no he kii i kukuluia mai imua o ke anaina. O keia iho la no ke ano maoli o ke anaina haipule a na alii i ka wa kahiko o Hawaii nei a hiki mai ia Kamehameha.
Hoi mai la o Kamehameha a noho iho la ma Kailua, oia a me ka huakai holookoa a pau. A o kana mau hana mau i kona mau makahiki elemakule, oia hoi ka lawaia. Hele no oia i ka lawaia me kana poe lawaia a pau i Kekaha ma Kaelehuluhulu i ka hi-aku, ka hi-ahi a me kela lawaia keia lawaia a nui wale. A nui ka ia i loaa mai, alaila, haawiia ae la i na’alii a me na kanaka, a haawiia no hoi i ka poe mahiai a me na kahuna kalai. I ka wa no o ka malolo o Kohala, holo no o Kamehameha i Kohala i ka lawaia malolo, a kuai no i ka malolo me ka poe mahiai o Kohala, Waimanu a me Waipio. Hana maalea o Kamehameha i ke kuai ana me ka poe mahiai, hookahi no holoai hookahi malolo, hookahi no umeke poi hookahi malolo, a pela wale aku. A ma keia hana ana a Kamehameha pela, ua poho loa ka poe mea ai, nolaila, imi maalea iho la lakou i mea no Kamehameha e poho ai, a e loaa ai no hoi ia lakou ka haawina like. Hana maalea iho la hoi ka poe mahiai, hookahi no oha kalo paa i ka wahi, aole hoi e hiki ia Kamehameha ke hoohalahala. Olelo iho la nae hoi o Kamehameha, “O ‘oe wale no la hoi e ka lawaia ka maalea, aole hoi e hana maalea ka mahiai, waiho aku la hoi ke akamai a hea.” Ina e kaulana mai ke ahi o Kalae i Kau, holo no o Kamehameha i ka hi-ahi i Kalae, a lawaia aumaiewa no ilaila, i Kaulana, Kailikii, Pohue, Napuu o Pele, ma Kapalilua a ma ia wahi aku a ia wahi aku.
O ka hoala i na heiau o ke akua kekahi hana nui a Kamehameha, ua hana oia ia Keikipuipui ma Kailua, he hana nui, me ke kukulu i na kii hoonani mawaho o ka paehumu, he kii laau ohia i kalaiia a oleole ka waha, a hooloihiia ke poo a mahiole iluna, a ua hoopoepoe ia na uha me na wawae, a malalo o na wawae, o ka pauku wahie okoa no a loihi, i paa ke kukulu ana ilalo o ka lepo; he mau kanaha ka nui o na kii o kekahi heiau, a he lau ko kekahi mau heiau nui. Ua kukulu ia o waho o ka paehumu a puni o ka heiau, a ma ke alanui e hele mai ai a hiki i ka pahu kapu, ua kukulu lalaniia ke kii, a o ke kii e ku ana i ka pahu kapu, o Kukalepeonionio ia. O keia poe kii i kalaiia, aole no ia he poe kii e hoomanaia ana, aole no hoi e kukuli iho kekahi kanaka a kahuna hoi ilaila a hoomana aku. O ka ohia hamau, ohia pane, ahiaha a me ka ohia lama, oia na laau e kalaiia ai. Ua hanaia na kii i mea hoonani, i uluhia, ulumahiehie ka hale o ke akua, a i iho mai ke akua mai ka lani mai. E nana i ka moolelo o Umi a Liloa. I ke kaumaha ana o Umi ma ka heiau o Moaula ma Waipio i ka mohaikuni, a iho mai la o Ku ke akua mai ka lani mai, maloko o ke ao polohiwa a me ka onohi, a o ke alelo kai kapalili ilalo o hoopau a palu aku hoi i na mohaikuni.
O keia mau kii laau i kukuluia mawaho o ka heiau, aole he kapu ke kahuia i ka umu. I kekahi manawa, ua kahu no ka poe paa mua i na kii i wahie. E nana hoi i ka moolelo o Kawelo i ka holo ana i Kauai i ke kaua, i ke kapu ana o Kawelo i ka heiau o Puehu, aia ma Waianae. I ka pau ana o ke kaumaha ana o ka mohai, o ke kena ae la no ia o Kawelo i ka laau o ka paehumu, me ka laau pa, a me na kii no hoi o ka heiau i wahie no ke o e holo ai i ke kaua i Kauai.
Hana iho la o Kamehameha ia Ahuena me kona mau kii, ia Hikiau me kona mau kii, a ia Hale o Keawe me kona mau kii, a pela no ma kela wahi keia wahi o na heiau kahiko.
NO KA WAHIE ALA (ILIAHI.)
I ke ono a me ka hiku o na makahiki o ko Kamehameha mau makahiki ma Oahu, mahope iho o kona holo ana mai Hawaii mai maluna o ka Peleleu, he nui na moku e holo mau ana ma Manila, Matao no Kina mai, a ua nui no hoi na Kapena moku i olelo mai ia Kamehameha a me na alii, o ka laau wahie ala (iliahi), oia ka laau waiwai loa. Ua makemake loa ia kela laau ala ma Matao a ma na aina pake a pau. Nolaila, ua kena koke ae o Kamehameha, e huli nui ia kela laau ma na kuahiwi o Oahu, ua loaa no a ua ike hoi na haole eia ma Hawaii nei ka laau ala. O Kapena McCook, Kapena Ogena, Kapeka Kawilipota, Kapena Uwinihepa, Kapena Bartow a me Kapena Davids Opealoa; ua lawe nui loa lakou i ka laau ala ma Matao a me Kanetona, a lawe nui mai i ka lole. O ke ano o na lole i lawe nui ia mai e kuai i ka laau ala, o ke kanekopa, kuakalikea, omaomaokalikea, o ke pulu aahu, o ke omaomao holookoa, o ka huluhulu pohaka ulaula, o ka holoku pihapiha, o ka lainakini, o ka holei, o ka laholile a me na ano lole he nui wale.
I ko Kamehameha noho ana ma Hawaii, iaia i hoi ai i ia Kaniaukani, ua kena aku oia i ka poe kalai laauala ma na kuahiwi o Kona a me Kau, a ua haawi i ka lole a me ka mamaki i ka poe kalai laau, a haawi nui loa aku la i ka ai a me ka ia. A o ka lawe ana i ke awa ku moku, na na makaainana o Kona a me Kau; a pela no hoi o Kohala a me Hamakua. A pela no hoi i na alii a pau i hoouna aku ai i ko lakou poe kanaka i ke kalai laau.
O ka hele nui ana o na ‘lii a me na makaainana i ke kalai laau ala, a me ka halihali ana i na awa ku moku, nolaila, ua hiki mai ka wi nui puni mai Hawaii a Kauai, a ua kapaia kela wi nui ana, he Hilaulele a he Hanapilau, he Laulele, he Pualele, a he ai amau a me ka ai hapuu. A ike o Kamehameha i ka wi o ka aina, kauoha oia i na’lii a me na makaainana, aole e hoopapau nui i ke kua laau ala. Hookapu aku la oia i ka laau ala no ke Aupuni.
Olelo aku oia i na alii a me na makaainana, e mahi nui i ka aina i ka ai. O Kamehameha no kekahi i hana i ka mahiai, aia kana mahinaai mauka o Kailua ma Kona, a ua hana pu no oia me kona mau aialo. I ka pau ana o ke pulu, ua kipuluia me ka uhi ana i ke amaamau a paa. Ua oleloia hoi, o kela mala a Kamehameha i hana ai, ua loihi na makahiki o ka waiho ana me ka ulu ole o ka nahelehele o ke kalo no ke lawe mai, ulu no ka oha, a nunui uhukiia, ulu mai no ka wae, a pela aku, ulu mai no ka-mau, a ulu mai no ka palili, a pela no ka mamauea a me ka ae. O Kuahewa ka inoa o ua mala nei.
I ka hana ia ana o keia mala kalo nui, papa loa o Kamehameha i na kanaka o kona aialo, aole e kii wale aku i ka ai a me ka huli a na makaainana, a hao wale, a kii wale a lalau wale aku, a ike aku i ka ahui maia, pu-ko, pue uala a hao wale iho, mai hana ko‘u poe kanaka pela, o alina auanei ko‘u inoa. O ke kuai a me ke noi aku no ka pono ma ke alo, a i aua kela, ua pono no, “Aia no i o wahi o Pahia.” O ke noi no ka mea maikai wahi a ka poe kahiko. O ka aihue, lalau wale, hao wale, pakaha wale, lawe wale, mokio, lawe malu, o ka hewa ia wahi a ka poe kahiko o Hawaii nei.
O Kamehameha no kekahi i hele i ke noi huli no kana mala kalo. Eia kekahi mea kupanaha, a lohe o Kamehameha elua mala kalo nui mauka o Kuapehu na kekahi alii, a o kahi kahu o ua alii nei, ua oi aku kona punahele i kona haku, a manao iho la nae o Kamehameha e noi i ua alii nei nana na mala kalo, a e haawi hapa ia mai ana paha ka huli a e loaa ole ana no paha.
Aole i pau.
Ke Keiki Alii Hesana
A me Bidia Samela o Bohemia.
HELU 18
Aole no i u iho ko Soda kakali ana i kahi a Dasi e lawe nei ia ia, aia hoi, ike ae la ia i ka ue ikaika ana ae o Dasi i kona eheu akau a pai aku la i na paia manoanoa o kekahi hale towera nui, a pakele no hoi o ke kiekie. Ike iho la o Soda i ka helelei ana aku o ka hale me ka halulu nui, a ua like ka hiolo ana o ua hale nui la me he hanee ana la o kekahi puu one i na kapuai o ka holoholona. A lohe ia aku la no hoi na leo uwe o na Uhane daimonio i pepe iho i ka hanee ana o ka hale, a o kekahi poe Uhane hoi lele mai la lakou e hakaka pu me Dasi, aka, luku aku la o Dasi ia lakou me ka pewa hookahi wale no o kona eheu akau, a ua like ko lakou ikaika, me he opala la e hele ana mamua o ka bulumi, imua o ka eheu hookahi o Dasi. Hiki mai la o Sadadi ke alii Kupua nona ua wahi nei; aka, hopu kino ia aku la oia e Dasi a paa a olelo hooweliweli ia aku la ia ia, i ka i ana, e make koke no ia ke kuhikuhi ole mai oia i kahi i waiho ai o ka pahi kaua kaulana a Nuda.
Ae wikiwiki mai la no oia me ka manao na ka pahikaua e pepehi mai ia Dasi ke paa aku oia i ka pahikaua, (no ka mea e poha mai no ka uila mailoko mai o ka pahi ke paa aku kekahi mea i ua pahi la; ke ole e loaa ke apo o Nuda ma kona lima.) Hoonaha ae la o Sadadi i ka puka o lalo loa, a kuhikuhi mai la ia Dasi i kahi e kau ana o ka pahikaua. Hoo aku la no hoi o Dasi i kona lima me Soda pu iloko o kona poho lima, a na Soda i lalau maoli aku i ka pahikaua a lawe mai. A mamuli hoi o ko Soda lealea wale iho no, i o ae ai oia i ka welau o ka pahikaua ia Sadadi, a walawala aku ai oia i lalo o ka hale lua o ua towera nei. A oia iho la ka hopena o ka ohana Kupua o Sadadi ana, a me ka hale eehia o ke kulanakauhale o Kairo.
Ma na alina i kahakahaia aku ma ko Soda mau papalina, aia, he uiuiki ana mai o na manaolana no ka hoopakeleia o kona kaikuahine, a he mau hulu-a-a hoi o na manao wiwo ole kai hoopulapula ia iho i loko o kona puuwai; a mamua ae o ka manawa kupono e hoouka aku ai oia me na hoouka kaua o na puali uhane, ua a e no ke ahi a ke koa i o la honua iloko ona – Ke lele nei o Dasi maluna aku o na puu, na mauna a me na awawa, na kauhale hoi he nui wale a me na aupuni ku okoa elima, a hiki aku i ka piko o ka mauna o Kirakasia iloko o ka manawa pokole. I loko no o keia aipoaipo panopano o ka pouli o ka po, ua pau na hana a pau i ka hana ia e Dasi ma, oiai, o ka loa ke hele wawaeia mai ka piko mai o ka mauna o Kirakasia a hiki i ke kulanakauhale o Kairo he eiwa mau malama ia ka loihi, a ina hoi e hoomalo pono ia na iwihualala o na mauna, a me na puu, a waiho kamoe like e hiki ai i ka lio ke holo me ka poino ole mai Kirakasia mai a i na kaiaulu o Kairo, alaila, he eiwa na la e holo ai o ka lio mama loa alaila hiki, aka, i ko Dasi lele ana a hoi aku he mau hora wale no ka nalo ana aku mai ko Hesana mau maka aku a hoea hou mai ana.
I ko Dasi ma hiki ana aku, e hoomoana ana na puali kaua o lakou ma na kualono o na mauna e kakali ana no hoi i ko Dasi manawa e hiki aku ai laua me Soda; a o Hesana hoi e kau ana oia ma na kipoohiwi o Dasana iwaena konu o ka pukoi o na puali kaua.
A ia Dasi ma e hiki aku ai, lalau mua mai la o Hesana i ko Soda mau lima a honi ae la a o ka pahikaua hoi a Soda i kaili mai ai eia no ia ke lewalewa nei ma ko Soda puhaka a i kona ike ana mai i ua pahikaua la olelo mai la oia ia Soda. “E ka pokii aole no i emi iho kou hanohano malalo o Abadona, a aole no hoi kou mana malalo o Sobia ; a o kou ikaika ua like pu no ia me ka ikaika o na koa he tausani o Anejao ma.” - “E ka hanau mua, ma ou la wale no i ili mai ai keia pomaikai maluna o‘u, a o ke kaena ana ae i ka ikaika a me ka mana nou wale mai no ia, aole no‘u iho,” wahi aku a Soda.
Kahea aku la o Hesana ia Menia a me Dasi, i ka i ana, “O ko kakou hele ana aku ma na papa koa i hoonoho lalani ia iho nei he mea no ia e hoakena aku ia kakou iho imua o ko kakou mau enemi ua ikaika kakou, aohe he enemi nana e hoopio mai. He mea pono e hoihoi ia keia poe a pau ma ko lakou wahi a hiki mai i ka manawa e kahea ia aku ai lakou no ke kaua nui alaila hele mai.” Ninau ae la hoi oia ia Dasana i ka i ana, “Aole anei he wahi waa kekahi no maua e holo aku ai maluna o ke kai a hiki aku i ua mau Mokupuni Uhane la.” Olelo mai la o Dasana ia ia, “Aohe kupono o ka waa a me ka moku no ko olua holo ana aku i ua mau Mokupuni la, no ka mea, ua piha loa ke kai i na mea ino he paapu wale; Aia na Kupua hiki ole ke hoopakele ae ia oe mai ka make mai o ke kai; Ina no paha e hiki ana ia oe ke luku aku i ua poe Kupua la, aole nae ou wahi honua e ku iho ai oe, no ka mea, he wahi waa kahulihuli wale no kou wahi puuhonua, alaila e piho auanei hoi oe iloko o ka hohonu o ka moana.
“A ina hoi paha oe e manao ana ma ka lewa e lele ai kakou alaila aole e hiki ana ia oe ke hakaka aku me kou pahikaua, no ka mea, ua hilinai wale iho no kou kulana maluna o‘u o kou mea nana e kaikai ana a he nui no hoi na mea kilokilo i ike ole ia e ili mai ana maluna o kakou, oiai kakou e lele ana, a oiai no hoi aole makou i helu e i ka nui o kona poe koa e hiki ai ia kakou ke hookuku iho i ka like o ko kakou ikaika me ko lakou. Mamuli o ko makou lohe wale ana i ka lehulehu loa o ko lakou poe koa nolaila ua ano hopohopo iki makou, oiai he mau unahi wale no ko makou poe no ko lakou, aka, ua hilinai nui ia ka ikaika o ko makou mau wahi puali koa me ka ikaika o kau pahikaua, ka mea lua ole i hana ia malalo iho o ka la e ke Kaula Mamiona a no ka loaa hou ana mai nei hoi o ka pahikaua a Nuda, nolaila ua hoomahuahua hou ia mai ko kakou ikaika, a mamua o ka hoohuihui ia ana aku o ko makou ikaika me ka ikaika o ka olua mau pahikaua, i hiki ai ia makou ke manaolana ae he lanakila ka pahuhopu o ko kakou aoao. Penei paha e loaa ai ia olua ke alanui e hiki aku ai ilaila me ka ike ole ia mai, e ninau aku kakou i ka Haku alii Barona o na Feare i kahi e moe nei o ke alanui kapu o lakou, a nana ia e kuhikuhi mai ia kakou.”
Aole i liuliu iho mahope o keia manawa hiki mai la o Balada kekahi elele i hoouna ia mai e ka Haku alii o Barona o na Feare; a i kahi e loa no haule e iho la oia i ka lepo a kahea ae la me ka leo haalulu “O, wahi ana, “e kokua mai ia‘u i ka mea i poino. E ke alii hoi e Hesana, ua hoouna ia mai nei au e hai aku ia oe i ke alanui e hiki aku ai oe i na Mokupuni Uhane, aka, aole he alanui i koe ua paa loa i ke kiaiia e na uhane damonio, a ke hopohopo nei makou no ka nui loa o ua poino i hoahu ia ma kou mau kuamoo e hele aku ai; a hookahi wale no alanui i koe e hiki ai oe ilaila o ka naau koa a me ka wiwo ole, i owili pu ia mai nae e ka ikaika o kau pahikaua.”
I ko iala manawa i pane mai ai i keia mau huaolelo ua ane paupauaho a haalulu no hoi ka olelo ana, a o ke kumu o ia haalulu ana, ua aneane oia e make i ka nui o na eha i loaa mai ia ia, a me ka paupauaho loa hoi kekahi i ka holo, mai ke alualu ia ana mai e Idai ma na Kupua o ka lewa. Oiai mahope iho o kona hoouna ia ana mai e ka Haku Feare ua hele mua aku la oia e nana i na mea keakea o ke alanui honua i manao ia ai i wahi no Hesana ma e hele aku ai, aka ua ike ia mai la kona hele ana aku e Idaia, mai make loa no oia e ole kona kaa e ana mawaho o na palena o na kai o na aina uhane pakele ai.
Olelo mai la o Dasana, “Aohe manao hou ana aku i koe no na kuamoo e hiki ai ia olua ke hele malu aku a komo i ua mau Mokupuni la, no ka mea, ua hala ka manawa kupono, eia wale no o ka unuhi ae i ka olua mau pahikaua, a hele aku no imua me na hakoko kaua o ka lanakila.”
“E Balada,” wahi a Hesana, “e hele pu mai anei oe me makou, a i ole ia, e noho iho ana paha oe ia nei a oluolu kupono oe alaila hoi aku oe i kou Haku?”
I mai la o Balada, “Aohe o‘u eha nui i keia manawa ua oluolu kupono ae nei au, a e manao ana au e hoi hou aku i kuu Haku la, o luhi makehewa mai auanei ia i ke kali i ka huaolelo ma kuu waha. He nui kuu makemake e ukali pu aku mahope ou ina e ae ia mai ana au e hele pu aku me oe. He inaina nui ko makou no Anejao ma, no kona haalele ino ana mai ia makou a hahai aku mahope o Majo kela alii ino o ka po; a ina e ae ia mai ana makou e kokua pu aku ia oe alaila e hiki aku ana makou i ou la ma ke awakea o ka la apopo.”
Kena koke aku la no o Hesana ia Dasi ma e lawe ia mai i elua mau miula no laua e u holo aku ai ma ka aina, no ka mea aole ae la o laua makemake i ka lele aku ma ka lewa. Aia hoi a hiki aku laua i na kapa kahakai o Kasimia, alaila, noonoo ia ka mea kupono e hana aku ai o Hesana, aka o kona manao mua nae e pepehi e aku i kela kupua ino o kekai, mamua o ke kii ana aku e hoopai i na kupua o ka lewa.
Ia manawa no hiki koke mai la no elua mau miula maikai loa, a o ko laua ka kau ae la no ia maluna a u hele aku la. E owekeweke mai ana kai o ke ao mamua ae o ko laua manawa i hiki aku ai i kekahi kakai pali kahakai kiekie e huli aku ana i na ale paio o ka moana Kupua. A ma ia wahi o Hesana ma i lele iho ai ilalo a hookuu ia aku no hoi na miula. Kauoha ae la o Hesana ia Dasi e hanaia kekahi moku pihaa a paa alaila hoolana aku iloko o ke kai, a maluna iho o ua moku pihaa la e hookau ia kekahi mau holoholona make, a e huki ia ua wahi moku nei e kekahi mau manu akua liilii. Aole no i emo aia hoi ike ia aku la ka lana ana mai o ua wahi moku nei, a koia loa ia aku la a hiki i kuaau; aole i kaa loa aku ua wahi moku ia mawaho o kuaau, aia hoi, ea mai la kekahi nalu nui a popoi iho la i ka moku holookoa a pau ilalo i ka hohonu, a miki mai la na Kupua o loko o ke kai e huki i na mea maluna o ka moku, aka aole i loaa iki kekahi mau mea e ae o na lio make a me na miula i hookau ia ai maluna o ka moku oia wale no kai loaa ae ia lakou, a kihaehae ia ae la ua mau holoholona la iloko o na apana he lehulehu. O ke Deragona nunui hoi nana e kiai ana ka malino o ke kai, i kahi e loa no oia ike e i ka hewa i hanaia maloko o kona mau kai, holo kiki mai la oia me ka puhi ikaika ana i ke kai a pouli pu ka lewa. I kona hookokoke ana mai i kahi i kahuli ai ka moku hoomaopopo iho la oia i ka hohono o ka moku a me na holoholona make, no Hesana ua mau mea la, nolaila, kupaka ino iho la ia kahi i kahuli ai o ka moku, me ka wawahi aku i na akoakoa o lalo loa a hiki i ka papa ku o lalo lilo, a no ka nele ana malaila o kekahi ano meheu o Hesana, nolaila pii ae la oia a ou mai la i ka ili o ke kai, a kiola mai la i kona mau onohi ikaika i na paia o na mukae pali kahakai, aole i huliu kona nana ana mai ike mai la oia ia Hesana ma e ku ana i luna o kekahi ohuku pali. No kona nui huhu a me ka inaina make welawela ia Hesana, nolaila ua haalele koke ae la oia i kona kino kai, a au mai la i kuapa o na mukae pali ma ke ano kino kanaka a he Korokodile hoi kona lio i holo mai ai. Aole i kana mai o ua mea he hae o ua Kupua nei o ke kai, ua hooweliweli loa ia o Soda e kona mau leo piena, aka o Hesana ku iho la no oia me ka nana malie aku ia ia a hiki i ke kokoke ana mai, unuhi ae la oia i kana pahi wakawaka he iwi a o kekahi moo kai, a hahau mai la ia Hesana ma oiai he kanalima anana ke kaawale mawaena o lakou, akaaka wale aku la no o Hesana i ua Kupua nei, me ka hoohenehene aku ia ia i ka i ana, “He iwi a ka o ka moo ka pahi a ke kanaka ikaika o loko o ke kai, e aho paha e kali ko kaua hakaka ana a loaa ona niho papai na‘u i pahikaua hoi na‘u e pale aku ai i kena pahi iwi moo.”
Pane mai la ua Kupua nei, “E ke keiki hookano, aole he mea e pakele mai kuu lima aku, a ke hoohenehene mai nei oe ia‘u me he kamalii la.”
Uwo ae la oia me ka lea nui a holo mai la maluna o kona lio Kerokodile a hahau mai la ia Hesana, aka papale malie ae o Hesana me ke akamai o helelei iho na hakina o ka iwi maluna ona a i ka pa ana ae no hoi o ka Hesana pahi i ua iwi la ua aa ia aku la ua pahi nei e ka lapalapa o ke ahi a hiki i ke kumu o ka pahi e paa ia ana e ka lima o ke Kupua o ke kai.
(Aole i pau.)