Ka Nupepa Kuokoa, Volume VI, Number 28, 13 Iulai 1867 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

KA NUPEPA KUOKOA,

HOOPUKA MAU IA MA HONOLULU

I keia Poaono keia Poaono

$2.00

No na mahina he Umikumamalua!

$1.00 no na mahina eono.

ME KA HOOKAA MUA MAI.

 

            NA OLELO HOOLAHA- aole i oi mamua o 10 laina o ka hoopuka hookahi ana $1.00; alua komo ana. he $1.50; hookahi malama $2.00. E uku mua ia mai ke dala o na olelo hoolaha a pau e hoounaia ana mai e pai.

            KANIKAU- he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi-penei: he 25 lalani, $1.00; 50 lalani, $2.00; a pela 'ku.

            E UKU NO KA OLELO HOOLAHA- ka uku pepa a me ka uku o ke Kanikau, e haawiia no ma ka lima o na Luna o ke Kuokoa a i oleia, e hoouna mai ia Kauka Kahua.

            O KA UKU PEPA A PAU E HOOKAA MUA MAI NO- aole e kauia ka loaa o kekahi haole a kanaka maoli paha. ma ka loaa o ka poe lawe pepa ke ole e hookaa e mai mamua.  E pono ke hiipoiia keia mau rula no ka mea he emi no ka auhau no keia nupepa.

            AIA KE KEE O KA NUPEPA KUOKOA- ma ke kihi hema o ka Hale Hookipa @ (Sailor's Home) O na hora hana, mai ka eiwa o kakahiaka a i ka ha o ke ahiahi

            L.H. KULIKA (Luna Hoopaka)

 

"KA NUPEPA KUOKOA."

Is pulsihed in Honolulu

EVERY SATURDAY,

$2.00 per annum, or $1.00 per six

months, in advance.

            Advertisements not exceeding 10 lies, inserted once for $1.00 twice or $1.60; and $2.00 for one month; all advertisements must be paid for in advance

            Kanikaus will be charged 1.00 per page or 4 cts. a line.

Payments for advertisements, subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.

            All subscriptions must be prepaid.  No names, either o foreigners or natives, will be inserted on the subscription list until paid for.  This rule must be strictly adhered to on account of the low subscription price

            The office of the Kuokoa is in the South corner of the Sailors Home. Office hours from 9 A.M. to 4 P.M.

            L.H. Gulick.

            For the Publishers.

            Volume I, II, and III of the KUOKOA, bound, for sale, $3.50 each.

            Persons having complete sets of the above can have them bound by paying $2.00 each.

 

No Hana, Kaupo, a me Kahului.

KA MOKU KUNA

'MANUOKAWAI,'

O Akoni e Kapena.

E HOLO MAU ANA KEIA MOKU I NA Awa i halia mahina.  No na ukana a me na ohua, e ninau ia C. BREWER & co. (BUKUAMA)

 

HE MOKU HOLO MAU

No Lahaina, a me Makena.

O KE KUNA KALEPA PAA

maikai.

"Kate Lee."

O Fountain ke Kapena,

E HOLO MAU LOA ANA, A HIKI MAI no hoi ma na Awa i olelo ia maluna.  No na ukana a me na ohua, e nina i ke Kapena ma ka moku, a i ole ia ia

228.11             C. BREWER & co. (BURUA MA)

 

No Hilo.

KA MOKU KUNA

"MELE HILO,"

O Sebastian ke Kapena.

E HOLO MAU ANA KEIA MOKU I KE Awa ma luna, no na ukana a me na ohua e ninau ia Hulipahu. ( Ia Ia @.)

 

NO KAWAIHAE.

E HOLO MAU ANA KE KUNA MArilda i keia awa maluna. No na ukana a me na ohua. e ninau i ke Kapena ma ka moku a i ole ia WALKER & ALLEN. Na Luna.

Na Luna ma Kawaihae, o CONWAY & ALLEN. 276.3m

 

MOKU KUNA WAWIKI!!

E HOLO MAU ANA KEIA WAhi moku i Molokai i kela pule keia pule mai Honolulu aku nei. A in a he ukana hooili ka kekahi a e holo ohua ana paha, alaila, e ninau no i ke Kapaena oia o KAHALEMAKE. 266-3M

 

HE MOKU HOLO MAU NO KONA

A ME

KAU, HAWAII.

E HOLO MAU ANA KE KUNA

"Kona Packet,'

KAPENA BALAAMA mawaena o Honolulu a me Kona, Kau, Hawaii. No na ukana a me na ohua, e ninau i ke kapena ma ka moku, a i ole, ia G. WILLIAMS

Honolulu, Aper. 23, 1867   281-8m

 

No HONOIPU me NAOHAKU,

Ka Moku Kuna

"KOHALA"

O Howard ke Kapena.

E holo mau ana keia moku ma na Awa i oleloia maluna, no na ukana a ame na ohua. E ninau i ke Kapena, a i ole ia, ia oia.  KAKELA me KUKE.

 

Na Buke i Pai ia e ka Papa Hawaii.

 

Eia na buke kuai, a me ke kumukuai.

Baibala nui no na Awai o na Halepule $4.00

" Ohana, ano nui, me na kii 2.00

            a me na Moohana  5.00

" Ohana uuku iho, me na Moohana ili ulaula 1.00

" Ohana, me na Moohana wale no, 62 1/2

" Okoa  50

Kauoha Kahiko, i paiia i ka M.H. 1838, 25

Kauoha Hou me ka pepa lahilahi o waho, 12 1/2

Kauoha Hou, hapa haole (Haw. Eng.) 25

Haino  25

Hele Malihini Ana,  25

Wehewehehala,  25

Lira Hawaii,  25

No ko ke Akua ano,  25

Lira Kamalii,  25

Kumumua Hou,  121/2

Moolelo Ekalesia,  50

Hoike Palapala Hemolele,  25

Himeni Hawaii me na Leo Mele, 1834,  25

Ninauhoike,  12 1/2

Ui Kamalii no na Kula Sabati  12 1/2

Kumu Leomele  12 1/2

Haawina Kamalii, Buke 1 a me 2,  12 1/2

Haawina Kamalii, Buke elua i huiia,  25

            Eia na buke i haawi wale ia

Haawina Baibala.

Ui.

No ka Aoao Pope.

Hoike Pope.

Palapala Liilii

            Helu 4- Make make anei oe i ke ola?

            Helu 6- E hele i o Kristo la.

            Helu 7- Ka hoi ana mai o ke Keiki Uhauha.

            Helu 11- No ka hoohiki wahahee i ke Akua.

            Helu 16- Ka Eehia ana o ka Ahaaina a ka Haku a me ka Papekiko ana.

            Helu 17- Mai hana ino i na Holoholona.

            Helu 18- No ka mahi ana, kuai ana, a me ka inu ana i ka Awa.

Ka Davida Malo Kumumanao.

Ka Moolelo o Batimoa Punaiki.

            Ia H. Kulika.

Kakauolelo o ka Papa Hooko o ka Ahahai Euanalio o ko Hawaii Pae Aina.

 

Ka Nupepa Kuokoa

 

KA MOOLELO O KAMEHAMEHA I.

NA S.M. KAMAKAU.

HELU 33

KE AU IA KAMEHAMEHA. MAI KA A.D.

1797 A HIKI I KA A.D. 1811.

KONA HOOOPONOPONO ANA I KE AUPUNI

A ME KONA NOHO ALII ANA.

 

            I kekahi manawa, kokua aloha o Kamehameha i kekahi elemakule me ka haawe ki nui i ke kula o Kawaihae, a me kana moopuna.  A ike o Kamehameha i ka elemakule, ua pilikia oia i ke kaumaha, a ua paupauaho hoi ka hanu, hookokoke aku la oia e kokua i ua elemakule nei, aka, makau nae ka elemakule o pepehiia mai laua e keia kanaka, aka, ua kailiia aku nae ka haawe ki.  A no keia kaili ana o Kamehameha i ka haawe ki, puana aku la ka elemakulei i ka huaolelo e i ana, "Auwe! He kula kapu keia no Paiea!!" A no keia leo o ka elemakule i pane mai ai, aui hou aku la o Kamehameha  a ninau aku la, "He alii maikai no nae paha o Paiea?"  I maila hoi ka elemakule, "Ae, he alii maikai o Paiea, e hele ka elemakule a me ka luahine a moe i ke ala.  He alii maikai loa o Paiea, a o na aikane no nae ka hewa he hao wale. " "Hewa io no," wahi a Kamehameha.

            Kokua aku la o Kamehameha i ka haawe a ka elemakule, ma ka lawe ana hoi i kai, a hiki ma kahi e kokoke aku ana i kai o Kawaihae. Olelo aku la nae oia i ka elemakule. "A i loaa mai oe i ka huakai kanaka e iho mai nei mahope, mai olelo aku oe, na'u i lawe mai nei ko haawe ki."

            A hala aku la o Kamehameha a liuliu iki, loaa mai la ua elemakule nei i na aikane, a ninau mai la ia ia nei, "Ua ike iho nei nae paha oe i ke alii ia Kamehameha?" A lohe ka elemakule no keia leo, hopohopo iho la kona manao, a mihi iho la oia i ko laua make, no ka haawe ana mai o Kamehameha i ka haawe ki, a hoomaopopo iho la oia o Kamehameha no ka keia, a piha loa iho la oia i ka makau, me ka manao no hoi e make ana, aka, he naau alii ko Kamehameha, ua komohia e ke ahonui a me ka lokomaikai a he naau Kristiano hoi.

            I ka noho ana o Kamehameha mauka o Waimea me na'lii, a hoala iho la i na heiau kahiko, a ua hoala ae la ia Uli; a paa pono kona mau pae humu, na anuunuu a me na kipapa, iho aku la na'lii a me na kanaka a pau i kai o Puako i ka niu, a ua lawe na mea a pau loa i ka niu, aka, ua koe iho nae hookahi lau niu a me na kanaha elua (oia hoi 480) i koe iho me ka paa no i ka pulu.  Ua pau loa aku na mea a pau i ka pii a koe nae hoi hookahi kanaka, a o Kamehameha no ka lua. Olelo iho la o Kamehameha, "aole paha auanei e pau ka niu o ka heiau o ke akua o ke Alii?" "Ua pau" wahi a ke kanaka.  Pane hou no o Kamehameha, "Aia a pau keia niu, alaila, noa ka heiau a ke Alii i kakahiaka o ka la apopo."  Ua ike paha keia kanaka o Kamehameha keia, a ua ike ole paha.  ua ike ole o Kamehameha i keia kanaka i na wa mamua ae. Hana iho la laua nei i ka haawe, aole no hoi i kana mai ua mea he nui.  A paa ua haawe nei i ke kipapa ia, ua haahaa iho ke kanaka ilalo, a ua kiekie ae ua haawe nei iluna.  He loihi hoi ke alanui e pii ai mai Puako a hiki ika o Waimea, ua aneane paha e hiki aku i ka iwakalua ka nui o na mile.  I ka pii ana nae o laua nei, ua kokua aku no o Kamehameha ma ka haawe ana, ke ike aku nae oia ua ane pilikia ke kanaka i ke kaumaha, a laila, ua haawe aku no o Kamehameha i ua haawe nei a hala mai kekahi mau mile.  Pela no laua i kaana like ai a hiki i ka aneane ana e hiki iuka. A no ke kokoke loa i ka wa pule o ke ahiahi, nolaila, haalele iho la o Kamehameha i ua kanaka nei, me ke kauoha iho no hoi, "Ahiki aku oe i kahi kokoke i ka heiau, e kipa ae oe i kauhale kamaaina, a malaila oe e moe ai, me ka olelo ole aku, ua haaweia e Kamehameha."

            O ka ikaika i ka haawe niu, a me ka ikaika o ua kanaka nei i ka laua mau puaa anana elua, me ke kokua ole mai o kekahi kanaka, oia no na kumu i oi loa aku ai ka punahele o keia kanaka, a lilo ae la i kanaka nui, kiekie a hanohano no hoi.  O Kuihelani ka inoa o ua kanaka nei.  A no kona lilo ana i mea nui imua o ko Kamehameha alo alii, ua loaa ia ia he umi wahine, aole hoi he mau alii e ae i like me Kuihelani ma ia ano.  Aole no hoi he hale i piha i ka hoihoi e like me ko Kuihelani.  Aole nohoi he alii i ku i ka moku e like me Kuihelani.

            He alii malama o Kamehameha i kana mau wahine, a hookupu nui i ka waiwai a me ka hanohano no lakou.  Hana iho la oia i  ahaaina hanohano loa no kana wahine i aloha nui ai, oia hoi o Kaahumanu.. he ahaaina kaulana loa ia ma Kailua, Kona, Hawaii. Ua hanaia na mea hoohiwahiwa e hanohano ai.  Ua hana ia he kahili nui a kiekie, o Hawaiiloa ka inoa.  Ua hanaia na lei hulu kumukuai nui, a o ka ahuula, ua haliiia maluna o na mahele e auamo ai, ua kipapa ia me ka nuanua a nolunolu o luna o na manele i na aahu i hoonaniia a i hoopeia hoi i na mea ala kupaoa, i moani i ke ala, ke onaona ame ka hiehie.  O na'lii a me na kane a me na wahine e amo ana i ka hua o ke kapa a me ka pau i hooluu ia i na wai hooluu ano e a ka poe loea.  O Kaheiheimalia Kaniu ka lua o kana wahine, a o Kahakuhaakoi ke kolu o kana mau wahine, me ko laua hoohanohanoia e ke kahili o Koaehulumaemae.  he kahili keia no Keaka, ka Alapai Nui wahine, a waiho mai no na moopuna, i mea kahiko hoohanohano no ko laua nani,  mamuli o ka hoohiluhilu a na makua.

            Puka mai la ke Kamalei Alii kapu a Kalanikauikeaouli me Kekuiapoiwa, o Kalanikauikaalaneo Keopuolani a me kona makuahine paepae o Peleuli, ka lima o na wahine a Kamehameha.  O na kanaka alii kapu o ka pae aina hawaii, me ke kahili o Eleeleualaninui.  Ua hoohiluhiluia ka hanohano a me ka hiwahiwa lipolipo i ka waokele.  Ua moe iho ka noa i ke kapu.

            Ua puka mai na kaikamahine alii hoohiwahiwa a Na 'Lii, no ka hookahakaha o na wahine a Kamehameha a me na pua lii a pau a na'lii.  O keia mau la i hana ia, no ka hookiekie a me ka hoohanohano.  Ua hoomaunauna ia ka waiwai no ke kuikahi ana o ke aupuni mai Hawaii a Oahu, malalo o ka malu o Kamehameha ka olali o ia wa.

            Hoonoho iho la o Kamehameha i mau Kiaaina, he poe kanaka no; no Hawaii, no Maui a me o Oahu, a me Molokai.  O keia hana ana pela, no kamakau o Kamehameha ke hoonoho i na'lii, o kipi.  A mahope, ua hoonoho ia he alii aimoku ko Maui, oia hoi o Kahekili Keeaumoku, ko Kaahumanu kaikunane.

            O Mokuhia ko Hawaii, ua imihala ia o Mokuhia e Kaneihalau kekahi kanaka, mamuli o ka hana hoepaepaeia ana o Kaneihalau e Kekuawahine.  penei hoi ka laua hana ana: Olelo aku o Kekuawaine ia Kaneihalau, e hele kaua i kahi o Kamehameha, a owau hoi ke hele aku e kamailio pu me Kamehameha, a e nana pono no hoi oe ia'u, a e kunou ana auanei kuu poo, ua ae o Kamehameha, alaila, e hoi oe a pepehi ia Mokuhia.

            Hele aku la laua nei a ma kahi e, noho iho o Kaneihalau, a hele aku la no hoi o Kekuawahine e kamailio me Kamehameha.  Eia hoi ka mea kupanaha, e kamailio ana o Kamehameha me kekahi mea e, a laila, kunou aku la ua kanaka eepa nei i ka makani, a kuhikuhi wale ae la no i ka lewa; kunou ae la hoi ko Kamehameha poo no ka olelo ana me kekahi mea e, alaila, kunou ae la no hoi o Kekuawahine.

            Hoi mai la hoi o Kekuawahine a olelo aku la ia Kaneihalau, "Ua ike ae nei no nae paha oe i ke kamailio o maua me Kamehameha?" "Ae," wahi a Kaneihalau.  "ua ae mai nei o Kamehameha e make o Mokuhia, a ua ae mai nei no hoi e lilo oe i Kiaaina no Hawaii."

            Ua pepehiia o Mokuhia mamuli o ka hoopunipuni.  A lohe o Kamehameha ua make o Mokuhia, mamuli o ka hana hoopunipuni ana ke kumu i make ai, a nolaila, aole o Kamehameha i hoonoho ia Kaneihalau i Kiaaina no Hawaii, aka, ua koho aku o Kamehameha me ka hoonoho ana aku ia john Young Olohana, i Kiaaina no Hawaii.

            O kekahi mea kupanaha mahope iho o ke kaua i kapaia o Kaipalaoa, iloko no hoi o na makahiki eha o ko Kamehameha hooponopono ana i ka noho alii o kona aupuni. oia hoi ka ai ana o ka Pele ia Huehue, a me ka hookahe a wai ana o na muliwai ahi ma Mahaiula me Kaupulehu a me Kiholo. Ua manao wale ia e ka poe o ia wa, o ke kumu i puka mai ai o keia ahi aihonua, o ka ono ka o Pele i ke awa o Kiholo a me Kaupulehu a me ke aku o Kaelehuluhulu; o ka lili o Pele ia Kamehameha, i ka lilo i ka haawe oloolo, a haalele i ka haawe leilei; a o ka aua ana kekahi i ka ulu kapu o Kamehaikana iuka o Huehue kahi i puka mai ai o Pele.  he kuhihewa loa paha keia manao ana pela, oiai aia ke Akua oiaio ma ka lani, ka mea nana i hoopiha ko ka lani i ko laila mau mea kupanaha. a hoopiha no noi i ka honua i kona mau mea i piha ai.

            Minamina iho la o Kamehameha no ke ino ana o ka aina, a me ka pau ana o na loko ia. Aohe kahuna, aohe no hoi he kakaolelo a kilokilo e hiki ke a-a aku i ko lakou akamai, a ua pau loa i ke kumumu ka lakou mau mea hana.  Ua kii ia ke kaula o Pele, o Kamakaokeakua kona inoa.

            (Aole i pau)

 

Ke Keiki Alii Hesana

A me Bidia Samela o Bohemia.

Helu 13.

 

            Hele aku la oia a hiki i ka palena mai o ka laau loloa, malaila oia i ike aku ai i ka pohaku paea eleele a Mamiona i hoike mua mai ai ia ia nolaila, wehe ae la oia i ka buke kilokilo a heluhelu iho la ma na lalani mua o loko o ka buke; a ia ia i hookokoke aku ai i ka pohaku, ike aku la no oia i ke ano o ka pohaku me he pahu kupapau nui la no, a puana ae la oia i kekahi mau hua olelo o loko o ka buke i ka i ana penei:

"E na kiai o loko o keia pohaku mana,

E ka makua mana, a me na Kaula

O ka mana hea la ka i haawi ia mai ia'u?

E kiekie a e wehe ia mai na mea paa,

Oloko o keia pohaku kupua kupanaha."

            A heluhelu hou iho la no oia i keia mau lalani malalo iho penei: "He mau tausani na makahiki i hala aku eni, aole he mea hookahi nana i wehe ae i na mea huna o loko o keia pohaku, no ka mea, aole lakou i hele mai ma ka inoa o Mamiona ka'u kumu, a ko'u makua aloha hoi; a i na ma o na la e wehe ia mai ai na pani paa o keia pohaku, ke nonoi aku nei au e wehe mai ano; e na kiai o keia pohaku kupua."

            Ia wa no lohe ia aku la ka leo winiwini o kekahi mea i ka i anamai. "Ae, ae," a oaka mai la ka pohaku, aia hoi, he puka e hamama mai ana me ka alanui pii e iho aku ai iloko o ka honua. Hoomau aku la oia i ka hele ana, a hiki i ke komo ana aku iloko o ka pohaku, a i kona manawa i nalowalu aku ai i loko o ka opu o ka honua, lohe ia aku la na leo kupinai e uwa mai ana ia ia me ka nuku mai a me na hana hoomakauka'u he nui e hooweliweli mai na ia ia--Aole no i hookuia mai o Hesana e na mea hoomakau wale, aka hoomau aku la no oia i ka hele ana me ka noonoo pono i na mea a pau i hahai ia mai maloko o ka buke.  I kona hiki ana aku i lalo o kekah rumi akea ike aku la no oia i kekahi akua ano e o na helehelena; a hoana ma la oia i ka pahi nui e paa ana ma kona lima akau; aka i kona ike ana mai i ko Hesana kuoo a me ka makau ole, huli ae la oia a hele aku la mai o Hesana aku;--Mahope koke iho no o ia manawa, hiki mai la ekolu mau akua ano e loa me na ihe loloa e paa ana ma na lima hema, a he pahi kaua hoi ma na lima akau.  Ninau mai la lakou ia Hesana--i kona inoa a me kona wahi i hele mai ai; aka, aole loa o Hesana i ekemu iki aku ia lakou, no kamea pela o Hesana i aoia mai ai e ka buke, aole oie e ekemu--a e pane aku hoi i kekahi huaolelo hookahi oiai oia maloko o ka pohaku kupua ahiki wale i ka loaa ana ia ia o ka mea huna o Kasimia.

            Ia ia e hoomau ana i ka heluhelu i ka buke, halwai mai la me kona mau maka na olelo ao e pili ana no ka waina; aole no i liuliu iho kona heluhelu ana i na mea i papaia mai no ka waina a me ka ahaaina lealea,--aia hoi, oiaka mai la ke pani puka o kekahi rumi akea, a ike aku oia i kekahi poe wahine a me na kane e hoomakaukau ana no ka ahaaina.  Ia lakou i ike mai ai ia Hesana ku like ae la lakou a pau iluna me ke kahea aloha mai ia ia.  A i kona nana ana aku ia lakou a pau aole no ko lakou mau helehelena i malihini ia ia, aka, me he mea la o ka poe no a pau o ke alo alii o Kasimia, a eia nae hoi kona wahi mea i haohao iki ai, mahea la ko lakou wahi o ke komo ana mai iloko o ka pohaku, oiai, ua olelo ia aole he mea hookahi i komo iloko, o ua pohaku nei.  Ku iho la oia me ka manao e ninau aku i ke kumu o ko lakou hiki ana mai iloko o ka lua huna o Kasimia.  Lohe e ae la oia i kekahi leo e hawanawana iho ana ma kona mau pepeiao i ka i ana. "E ao oe mai puni wale oe i ka lakou mau olelo pahele ia oe, a mai kuhihewa no hoi oe ua mauna mua oe me keia poe iloko o na la i haahope ae; no ka mea, he oiaio no, i kou manawa e puni wale aku ai i ka lakou mau olelo apuhi ia oe, e lilo koke mai ana lakou he mau enemi ino loa nou; i oi ae mamua o na enemi au i ike mau ai iloko o kou ola ana."

            Hoopuni mai la lakou ia Hesana, me ka hoouweuwe aloha mai ia ia, a hoonoho mai la hoi i ka mea ai imua o kona mau maka, koi mai la kekahi e noho iho ilalo e ai ai, a o kekahi hoi hoomakaukau mai la i wai holoi no kona mau kapuai, a i mai la hoi kekahi--"Ke kakali nei kou makuakane o ko hoi mai, alaila, paina kakou."

            Oiai eia põe e ku puni mai nei ia Hesana me na olelo pahee he nui wale: e mau mai ana no ke o ana o kela leo kanikaniaula iloko o kona mau pepeiao.  Ua hoopunini ia mai o Hesana no kakhi manawa loihi.  I kekahi manawa, ua kui lima ia mai oia e kekahi mau kaikamahine opiopio, me na leo hoinainau e nolu mai ai ia ia i mea no Hesana e puni aku aku ai--a i kekahi manawa ua koi ia mai o Hesana e heluhelu leo nui aku i ka mea i kakau ia iloko o ka buke. --Manao iho la o Hesana o paa loa auanei oia i ka hoowalewale ia mai e lakou, nolaila, unuhi ae la oia i ka eke a Mamiona i haawi mai ai ia ia, a wiliwili ae la iloko o ke ea i ekolu manawa,--a mamua ae o ka piha ana o ka rumi holokoa i na ehu paoa o ua eke kupua nei,--ua lilo e aku la ko lakou mau helehelena  apau i kino pulelehua, a ia manawa koke no ua neoeno loa iho la loko o na rumi la a o Hesana wale no kai koe iho.  Huli ae la oia ma ka aoao komohana o ka rumi, a ike aku la oia i kekahi wahi puka uuku, hele aku la oia malaila, a wehe malie ae la i ke pani puka; a i kona kiei ana aku iloko o ua wahi la, hooho mai ana ka leo o kekahi mea, a ikeia aku la kekahi mau akua ano e loa ekolu, pii pololei ae la lakou iluna a hoonauweuwe ae la i na paia a pau o ka rumi holookoa--Aole no o Hesana i makau no ko lakou nunui, a me ke ano hoomaka'u o ko lakou mau helehelena, aka hoomalielie iho la oia i kona mau manao hopohopo me na lalani huaolelo o loko o ka buke; iho aku la oia ilalo; he wahi lua pouliuli iki ia, a nana aku la i na mea maloko; aole no i liuliu kona nana ana hoea mai la kekahi kanaka eleele nui me ka lama ku e paa ana ma kona lima.  I kona manawa i ike mai ai ia Hesana, ninau koke mai la oia i ka i ana. "Owai keia kanaka aihue i hiki mai nei maloko o o nei?"  Uwa ae la oia me ka leo nui a wa aku la na rumi holookoa a pau, a o keia no hoi ka rumi kupinai o na rumi a pau o loko o ua wahi nei.  Oiai na leo e walowalo hea mai ana, hiki hou mai la ua poe akua nei ekolu, a hahau mai la ia Hesana i ka pahikaua ma kona lima akau, a houhou mai la no hoi ia ia i na mea eha, a hiki i kona hina ana ilalo.  Uumi malie iho la o Hesana i kona mau eha a hiki i ko lakou manawa i haalele mai ai ia ia e waiho a maule ana iloko o ka rumi kupinai; aole oia i auwe ae, aole no hoi i hoopulu ia kona mau lihilihi e na kuluwaimaka o ka ehaeha, a i kona pohala ana ae mailoko mai o ka waiho a maule ana, aia hoi he ahi lanahu e waiho ana me ka palaoa pulehu maluna a me ka ia, a he omole wai kekahi e ku pu ana.  Nana hou iho la oia iloko o ka buke ma kahi aku i koe ia ia i ka heluheluia a loaa aku la ia ia keia mau mea i palapalaia, penei: "E ala ae a e ai i kau mea e ike nei. A e olioli hoi no kou mau la pomaikai e hiki mai ana.  Aohe luuluu i koe maanei."  Hooikaika ae la oia a noho iluna, aole i kana mai kona mau eha, a me na palapu.  Lalau aku la no oia i ka omole wai a inu ae la, a ai iho la oia i kamea i ike ia eia.  Mahope iho o kona ai ana, ua hoi hou ami la ka ikaika i kona kino e like me mamua, aohe hoi i ike ia he wahi meheu, a he mau alina o ka eha  maluna o kona kino okoa a pau.

            Hele hou aku la oia a hiki i ka puka pohaku nui e ku ana ma ka aoao komohana akau o ka rumi kupinai, wehe malie ae la oia i ke pani, aia hoi, he wahi keena uuku, he lepo kelekele wlau no o loko a me ka pohaku paea ooi.--Alawa ae la oia ma ke pani puka o loko a ike aku la oia i kekahi palapala e kau ana, penei: "O ke kanaka mua e hiki ana ia nei: e hoo aku oia i kona manamana loihi iloko o ka lepo palolo a unuhi mai, a mahope iho e ike aku no auanei oia i ka huna o Kasimia, e oili mai ana mailoko mai o ka lua ana i hou aku ai me kona manamana."

            Hoao iho la oia e like me ka mea i kuhikuhiia mai, a mahope iho o kona kali ana i ke ano o ka mea e puka mai ana mailoko mai o ka lepo, aia hoi, hoea mai la he papai noho lua o loko o ke one, (oia hoi ka ohiki.) Hopu iho la oia a paa i kona lima, a hoo iho la iloko o ka eke; a waiho iho la oia i ka hua papapa iloko o ka lua ana i hou ai iloko o ka lepo; a waiho pu iho la no hoi oia i ka buke Kilokilo malaila a pani aku la i ka puka mahope on a.  Ia wa pokole o he mau leo o ka olioli kai lohe ia e huro mai ana mai na rumi mai a pau, a hiki mai la kekahi Nika imua on a me ke kukuli iho.  I mai la oia. "Owau no ke kiai kahiko loa o loko o keia pohaku, a o ka'u hana i koe i hele mai nei au e nonoi ia oe e hoohiki mai oe no'u, e hookuu wale mai ia'u mai ka noho kauwa ana maloko o keia pohaku."  Olelo aku la o Hesana, "e hele oe e hooko i kou mau iini a pau no ka noho ana hookauwa hou ole ia, a ooe iho no ka haku o kou mau manao a pau."

            Olelo hou aku la no hoi ka Nika. "Hookahi a'u mea i koe e hai hou aku ai ia oe: O ka waiwai hula i laweia mai nei e kou koa a me ka makau ole, e mahele iho oe ma ke kua o ka ohiki, a e kiola aku i ke kino o ka ohiki, a mahope iho auanei o ia manawa e hoea mai ai na kauwa o loko o k amea au e paa la."

            Nalowale aku la kela, me ka ike ole ia o kona wahi i nalo aku ai: Unuhi ae la hoi o Hesana i ka ohiki mai ka eke ae, a wahi iho la i kona kua, a i kona lawe ana ae i ka naau oloko o ka ohiki a hoopahu ae, aia hoi, he komo ka waiwai i waiho ia maloko a me kekahi piue daimana uuku.  Lawe ae la oia a holoi iho la a maloo a hee hou iho la iloko o ka eke kupua.--Mahope iho o ia manawa hiki mai la kekahi mau akua ekolu me ka olelo mai.  "E ko makou Haku, mamuli o kau kauoha ia makou, heaha la ka makou e hana aku ai nou? e kukulu ia anei i hale maikai loa nou, a i ole ia, e hoopuehu aku anei makou i kou mau enemi ma ke kai a ma ka aina?"

            Ninau aku la o Hesana. "Owai oukou? a mai hea oukou i hel mai nei?"

            I mai la lakou la. "O makou no na kauwa o loko o ke komo a me ka pine, a o ka mea e paa ana i ke komo a me ke pine e hooko no makou i kana mau kauoha a pau e makemake ai.  aia malalo mai o makou na uhane ikaika loa he 40, a malalo mai hoi o lakou na uhane kupua ikaika he hookahi tausani elua haneri."

            Olelo hou aku la o Hesana, "Ke makemake nei au e ike i ko oukou nui." I mai la lakou la. "He mea kupono ole nou ke ike maka i ke ano o ko lakou mau helehelena, no ka mea, o kekahi ano o lakou he huelo wale no e like me ko ka moo, aohe maka, aohe wawae, aohe lima; a o kekahi hoi he eheu wale no; a o kekahi he ahi wale no ka mea ike ia, aohe kino; a o kekahi hoi he lima wale no, aohe poo, aohe kino, aohe wawae; aka, he pono no i na kauwa ke hoolohe i ka olelo a na haku, nolaila e hoike no makou i ko lakou mau helehelene ia oe.

(Aole i pau.)

 

NA KANAKA O AMERIKA HUIPUIA.--Ma ka helu ia ana o na kana o Amerika Huipuia i ka malama aku nei o Novemaba i hala, ua ike ia, he 34,100,255; in a e hui puia me na Aina (Territories) alaila hiki aku ka huina i ka 34,505,882.  Aohe no i kana mai he kohu hanau ana no ka paha a na holoholona ka hikiwawe.

 

KE AUPUNI PERUSIA.--Ke noho makaukau la no ke Keiki Perusia i keia wa.  ua makauakau oia i namea kaua a pau, a ua hoouna aku oia i Amerika e loaa mai i elua mau mokuahi hao, i pale ikaika no kona mau Ulumoku kaua.

 

NA KEIKI LALAWAI O PENISELAWENIA.--Ua hiki aku ma kae kulanakauhale alii o na Kipi ma Bikemona i keia mau wa i hala iho nei, he iwakalua mau keiki kuonoono o ka mokuaina o Peniselawania, me ka manao e hele makaikai ia Viregenia.