Ka Nupepa Kuokoa, Volume VI, Number 25, 22 June 1867 — Page 2

Ka Nupepa Kuokoa

KE KILOHANA POOKELA NO KA LAHUI HAWAII.

 

            KA LUNA HOOPONOPONO, - L.H.KULIKA.

NA HOPE LUNA HOOPONOPONO, {J.KUA.   

                                                                 (J.KAWAINUI.

POE HAKU MANAO NO KE KUOKOA.

C.J.Laiana, (Lyons,) 

Rev.M.Kuaea,

G.W.Kanuha, (Oniala.)

Rev.L.Laiana(Lyons)

S.M.Kamakau.

Rev.G.B.Anelu.(Andrews.)

D.Malo,(Lokoino.)  

Ka Nupepa Kuokoa.

Honolulu, Iune 22, 1867.

 

     Hoike o ke Komoite no na Kula La o ke Aupuni, i ka Ahahui Euanelio o ka Pae Aina.

 

     I KA NANA pono ia ana o ke ano e noho nei o na Kula La o ke Aupuni, aole no i loaa ia makou he kumu e hoololi ai i na olelo a keia Aha i hoopuka ai i ka la 14 o Iune, M.H. 1866 e pili ana i na Kula.

     O ka hoihoi ia o ka mana hooponopono a ma ka luna o ka Papa Hoonaauao, he mea ia o kue ana i ka pono o na Kula e like me mamua; a o ke ano hoi o ka mea e hoopiha nei i ka oihana, o ka Luna Kula Nui, he mea ia e hoike ai i ke kue ikaika ia o na kumu mai Amerika mai, a me ka lakou ao ana, a me ka hoowahawaha i na kula a lakou i hookumu ai.

     Ua oia mau no ka hoowahawahaia o na manao a pau o na makua mea keiki, koe wale no ma na wahi kakaikahi loa, a ua mau no hoi ke kipaku ia o na manao hoomana kupono a pau mai na kula aku. - Ke papa ia nei no e like me mamua ma na rula o ka Papa Hoonaauao, ke mele ana; aka hoi, aole no i malama loa ia keia rula ma na wahi a pau, a me ke kauwahi uuku hoi, ua hoonoho ia na kumu ao pa-ko-li.

     ke mau nei no ka hooponopono mahaoi ana ma na mea hoomana, oia hoi ka haawi mai i pule no na Kula - ka pule a ka Haku i hoololiia e ka Papa Hoonaauao!

     Ke mau nei no ka hoonohoia ana o na kumu Kula Katolika Roma, maluna o na kula o ko kakou aoao, a ua hoolilo ia ka hookaawale ana o na keikikane a me na kaikamahine ma na kula kaawale, i mea e hoohiolo ai i ka aoao hooomana o kakou, ma kekahi mau wahi.

     Ke hoomauia nei no na Kumu Kula a me na Luna Kula ano haumia a kolohe hoi, me ka hai maopopo ia au no o ko lakou mau ano hewa.

     Ua hoonele loa ia no kekahi mau Apana nui i na Kula a me na Hale Kula, ma na wahi hoi i lawa kupono no ka nui o na keiki.

     Ua hoonele ia na Kula i na una paipai e kokua i na Kumu Kula ma ka imi ana i na keki auwana a haalele i na kula.    

     Ua uku like ia na kumu makaukau a me na kumu hemahema, na kumu makaala a me na kumu molowa, he hapalua no ka la; a ma keia hoohelelei naaupo ana, au hoonele ia ka mea e hoohoihoi ai i na kumu, a ua hoopau wale ia na dala ma ka waihona o na Luna Kula, a oia no kekahi kumu o ka hookuuia ana o na Kula ma kekahi mau apana a hala na mahina he nui, a ma ke kauwahi, na kula ia elua wale no la i ka hebedoma, a aia no i ke kumu ke koho i na la ana i makemake ai e kula, e like me kona manao wale iho.

     He mea hoehaeha loa i ka naau ka lohe ana i na hoike a na Kahu Ekalesia, he aneane kanaha, i hiki mai i keia Aha, e hai ana i ke kahuli ana o na Kula Aupuni; a he mea no ia e hoopouli ana ma keia hope aku i ka naau o ka lahui ma ka hoomana, a e hoonele ai i ka ike a me ka noho naauao ana.

     Ua pau ka hapai nui ana o na Kula Aupuni i keia lahui, ma ka hoala i ka noiau a me ka hoopono.

     E haalele auanei na Kula Aupuni i ke alakai aku i keia lahui imua a iluna; a e kauo auanei lakou i keia lahui ilalo iloko o ka pouli.  E lilo ana keia lima akau o ka malamalama i lima lolo, a ua hoomaka ia no ka ike ana i kona lolo.

     Me he la e hooko ana ka Papa Hoonaauao ia ka manao o ka poe makee ole i ka naauao o ka lahui; he poe e ae ana e hoonaauao i kekahi poe kakaikahi ma ka namu ana i ka olelo haole, me ka hoonele i ka lehulehu i ka ike.

     Iwaena no nae o keia mau mea e hoopoho ai i ka manao, ua loaa kekahi mea e hoolana ai, iloko o ka hoike o keia makahiki.  O ka manao i hoala ia e keia Aha i keia makahiki. o hookumu i mau kula kuokoa ma na wahi i hoole ia ka makemake o na makua, ua hooko ia no ma o Oahu nei a ma Lahaina.

     Ma Oahu nei, he eiwa mau kula kuokoa, iloko o keia makahiki, i hookumuia e na ekalesia a me na makua; a iloko o ia mau kula, ua loaa paha he 250 mau haumana.

     E kapaia eono o keia mau kula, "he mau kula misionari koloko," no ka mea, ua malama ia e ka ekalesia kahi i kukuluia ai.  elima o keia mau kula i aoia ma ka olelo haole e na kumu Hawaii.

     Elua o lakou, eia ma Honolulu nei, malalo o ka malu o ka Ekalesia o Kaumakapili a me Kawaiahao, a he hookahi paha haneri haumana, ma keia mau kula elua.  Hookahi paha haneri haumana ma na kula kuokoa ma Waialua; hookahi o lakou he kula ao i ka olelo Beritania, a eha hoi o lakou me na haumana he kanahiku, ua malama ia e na makua a me ka ekalesia ma na wahi i haaleleia e ka Papa Hoonaauao no ka nele keiki ole, wahi a lakou!

     Ma ka apana o Lahaina, kahi i hoopoino wale ia na kula, a lilo ia i mea e kokua ai i na hoomana e, ua kukuluia elua mau kula misionari koloko, me na haumana he 75 paha ka nui; a ua hoopauia na kumu Katolika Roma elua, a ua hoopahoia na kumu o ko kakou aoao ma ka laua hakahaka, i mea e hoopaa mai ai i na keiki, o pau loa auanei lakou i ka holo i na kula misionari koloko.

     Ma Keaiwa, Kau, Hawaii hoi, ua malama na makua i ke kula i kekahi wa a ke Aupuni i hookuu wale ai, a hiki i ka wa i hoomaka hou aku ai ka Luna Kula.

     O keia makaala ana o na makua, he ouli ia no ka pomaikai e waio ana imua o keia lahui.  Ina e hele ana imua na makua ma keia hana, o ka hoonaauao ana i ka lakou mau keiki, e ola auanei o Hawaii; anoai ke hoopupu nei na Kuhina, a ke hoouhi nei i ka malamalama.

     Ke ole e makaala nae kakou, e haule auanei keia lahui mai ke kulana kiekie o ka naauao ana i ku ai i na makahiki i hala ae nei.

     E kau leo aku kakou e hoole ana i keia hana e hoopoino ana i ka lahui, a e hokai ana i ka nani o ka Noho'Lii o Kamehameha.

     Ina e noho mumule wale kakou, me ka hoike ole i keia mea e hoopoino wale ia ai keia lahui, e ahewaia auanei kakou imua o ke ao nei, a imua o ke Akua.  Ke koi nei kakou no ko kakou mau pono maoli malalo o na kanawai kaulike.

     No keia mau mea i ikea, he pono ia kakou e hoopuka aku i na manao ekolu, penei:

     1. E koi mau aku na makua a me na makamaka o ka naauao, me ka wiwoole, e aeia ko lakou leo, a me ko lakou hooponopon ana i na kula ma ko akou mau apana iho, a ma o ka Papa Hoonaauao.  Ua hala ke kau e hiki ai i kekahi aupuni e hoole ai i na manao makee pomaikai o na makaainana.  He hewa maoli a he mea e poino ai ka hooneleia o na makua i ka leo hooponopono ma na mea e pili ana i ka hoonaauao keiki.  He oiaio no, ma kekahi mau wahi uuku, ua aeia no ka manao o na makaainana no na kula; aka, aole no i hoakeaia ka ipuka, a, aole no i koiia na makua e ka Papa Hoonaauao, e kokua ma keia hana.

     O ka hapanui o keia lahui ma ko kakou aoao hoomana hookahi, ua hooneleia i ka leo ma ka Papa Hoonaauao.  He mea ole no ka noho Peresidena ana ma ka Papa Hoonaauao o ka Mea Kiekie M. Kekuanaoa, ka Makua Alii i aloha nuiia e kakou, he Lala no ka Ekalesia Hawaii nei; no ka mea, ua hoopauia ka mana o ia noho Peresidena ana.

     O na lala paa eha i koe o ua Papa la, he Katolika Roma, a ekolu hoi o lakou, he mau lala Katolika i Hooponoponohouia, a o kekahi hoi o lakou ekolu, he Poo ia oia hoomana.  A o ka mea hooko hoi i kapaia o ka Luna Kula Nui, ua opu awaawa loa i ko kakou aoao hoomana.

     He mea ole hoi ka olelo ana a kekahi poe, aole i manaoia ke ano hoomana o na lala i kohoia no ua Papa Hoonaauao la, no ka mea, ina pela, no ke aha la ke koho ole ia o kekahi o ko kakou aoao hoomana?

     O na misionari o Amerika kekahi o na koo oiaio o ka Noho Moi ana o ko Hawaii nei Pae aina.  O lakou no hoi ka poe nana i hookumu i ka Pono ma Hawaii nei, a i kokua nui ma ka hookahua ana i keia Aupuni maluna o ke Kumukanawai Malama Alii.  O na Kahunapule Hawaii a me na hoahanau, a me ka lehulehu o ko kakou aoao, ka oi no lakou o na makaainana malama Alii.

     Nolaila, ke paipai ia nei kakou a pau, e koi ikaika aku, e hoolohe ia ko kakou leo ma na oihana a pau e pili ana i ka hoonaauao a me ka hoomana.  He pono keia, i hiki ai i kela a me keia makaainana Hawaii e hoopaa ikaika iho.

     2.  E hoopii ko kakou mau kahunapule a me na hoahanau me ka wiwo ole, e kipakuia aku na kumu kula a me na luna kula ano kolohe.  Ke alakai hewa ia nei ka lahui opio e na luna kolohe he lehulehu ma na oihana aupuni.  Mai kapulu iho na makua i ka makai pono ana i ke ano o ua kumu.  Mai mumule kakou, oiai ke uluaoa nei ka hewa.

     3.  No ka ili ana mai maluna o kakou ka hookumu ana i na kula kuokoa no ka kakou mau keiki, no ka palaka o ke aupuni i kana mau kula, a no ka hookeia mai o ka Ekalesia o Hawaii, nolaila, ke koi aku nei kakou, e hookomo hou ia ka pauku kanawai e hooku ana i na makua i uku aku no ke ao ana i ka lakou mau keiki iho ma na kula kuokoa mai ka auhau kula aku.  A e hoomau ia no keia hoopii, a hookuuia mai ka auhau kula, ke hoolohe ole ia ka leo o na makua ma na mea pili i na kula.

     Aole kakou e hoole i ka pono o ka hanaiia o na kula Aupuni mai loko o ka waihona Aupuni; aka hoi, ke hoohalahala nei kakou, no ko kakou hooneleia mai i ke kuleana hooponopono kula.  E hoomau kakou ma keia hoohalahala ana, a hoihoiia mai ko kakou kuleana hooponopono kula, a i ole ia, e hookuuia mai kakou mai ka auhauia ana no na kula, e hoohiolo ai i ka kakou mau hana , a me ko kakou mau pono kanaka.                                                                                         E.BOND,

       A.KAOLIKO,

                                                                     L.H.GULICK.

 

La Hoike Kula Sabati o Honolulu.

 

     Mamua ae o ke kakahiaka nui Poaono aku nei i hala, ua wehe ae ka pawa o ka wanaao me ka ula wena, a ua ike ia aku na kuahiwi e kau ia ana e na ohu, a i ka puka ana mai o na kukuna o ka la 15 o Iune, aia hoi, ua nalowale aku la na mea i ike ia no ke kakahiaka, a ua hoea kakaikahi ae ma na huina alanui o ke kaona nei, na kamalii i hoonuanua ia lakou iho no ia ia, a ua maalo ao imua o ko ka lehulehu mau kii onohi maka, na aahu keokeo maka like a me na lipine e pulelo ana i ka makani.

     I ka hora 10 a mamua iho.  ua loheia aku na leo o na kamalii a me na makua e holohe ana ma au alanui, a e ake nui ana o ka hiki aku i Kawaiahao i ka wa kupono.  Ua pau nui mai na keiki a pau mai na wahi a pau o keia Apana o Kona nei i ka hele mai i Kawaiahao a au ukali pu ia lakou e ko lakou mau makua me na opeope a puolo ai no ka lakou mau keiki iho no ka wa e paina ai lakou.

     KA HOONOHONOHO ANA I KA HUAKAI.

     Ma ka hora 10 o ke awakea, ua hoonoho ia ka kuakai ma Kawaiahao, malalo hoi o ka hooponopono ana a Alabati F.Kauka, ka Ilamuku Nui o ka la, a me kona mau kokua.  Kapena W.H.Daimana opio, a me W.W.Holo opio.  A penei ka hoonohonoho ana i ka kuakai:

     1.  Puhi ohe Keoki Haiaka.  2.  Kula Sabati o Pauoa.  3.   Kula Sabati o Moanalua.  4.  Kula Sabati o Kalihi.  5.  Kula Sabati o Kapalama.  6.  Ke Kula Sabati o Maemae.  7.  Kula Sababi o Kaumakapili.  8.  He hae Puali Inuwai, ua pena ia he kii maloko o ia hae, ua hoohalikeia me kekahi awawa uliuli o uka, a mai loko mai o ia awawa, he kahawai nui e hookahe mai ana i ka wai, me he mea la no nae, o ke kumu no o ka wai o ke kahawai o Nuuanu.  9.  Na Kula Sabati haole.  10.  He Hae Hawaii.  11.  Ka poe Puhi Ohe o Honolulu.  12.  Kula Sabati o Kawaiahao.  13.  Kula Sabati o Makiki.  14.  Na kaikamahine Iwa o ke kaona nei.  15.  Kula Sabati o Manoa.  16.  Kula Sabati o Kamoiliili.  17.  Kula Sabati o Waikiki.  18.  Ka Hae Hawaii.  Ua palua ia na keiki i kinohi no ka hele ana, aka, no ka loihi loa o ka huakai, ua hoololi hou ia ma ka pa ha a ma ka pa lima.

KA HELE ANA MAI O KA HUAKAI.

     I ka naue ana mai o ka huakai, ua ike e ia aku o Keoki Pohu, ma ke poo o ka huakai, me kana wahi pila e hookapalili ana i a waha, a mahope mai ona na kamalii e like me ka hai ana maluna, me na kapa makalike.  A iwaena aku o ka huakai, ka Poe Puhi Ohe o Honolulu, e mele ana i ka lakou mau mele i hoomaamaa ai, a e haule ana hoi kahi pahu uuku i ka "liilii o ka wai."  O ka pahu nui hoi, e kukala leo nui ana no ia e like me kona haawina mau.  Ua kai ka huakai mai ka pa mai o Kawaiahao ma Alanui Alii, a ma na huina o Alanui Papu a me Alii, pii iuka, a ma Alanui Beritania ae, hele a na huina o Alanui Beritania a me Nuuanu, huli i kai a hiki hou ma Alanui Alii, hele mai a hiki i ka Punawai.

KA HOOLAA ANA I KA PUNAWAI O KA LEHULEHU.

     I ka hele ana o ka uakai a ka Punawai, ua hoomau aku no ka hele ana a hiki i ke kaa ana o waena konu o ka huakai, ma ke alo ponoi iho o ka punawai, o ka wa ia i ku like ai o ka huakai, aohe naue, aohe oni.  a hookahi mea hoolohe, o na hana ma ka punawai; oia hoi keia malalo nei:

     1.  Himeni haole - "From this bright Drinking Fountain."

     2.  He pule ma ka olelo haole - Na Rev. S.C. Demon.

     3.  He haiolelo haole - Na Hanele A.P. Carter.

     4.  Himeni Hawaii - "Punawai maikai nona mai ka wai."  Na ka Papa Himeni o Kawaiahao i mele, malalo o ke alakai ana a Ka Mea Hanohano Mrs. L. Kamakaeha Dominis.

     5.  Ha haiolelo Hawaii - Na Rev. A. O Polepe.

     6.  Himeni haole - "Sparkling and bright in its liquid light."

     Ua holo maikai na hana ma ka Punawai, aohe haunaele.  O ka haiolelo a Hanale A.P. Carter, ua maikai maoli i a poe a pau i lohe i ka olelo haole.  Ua hai oia ia haiolelo me ka wiwo ole a me ke akamai.  I ka pau ana o kana haiolelo ana, ua haawi ae ke anaina i mau huro ekolu.

     Punawai maikai nona mai ka wai - Ua meleia keia himeni e ka Papa Himeni o Kawaiahao, maloko ponoi o ka pa o Polelewa, ma kahi kokoke i na nuku wai e kahe mau ana.  A e like hoi me ka mea mau i loheia no ia papa himeni, pela no i hookoia'i ma ia la na iini ana o ka poe e makemake ana e lono i na leo mele o na keiki o ia papa himeni.  O na Kamalei Alii Lilia Kamakaeha a me Likelike kekahi iloko o ia papa himeni, a na ke kaikuaana ke alakai ana.

     O ka haiolelo a Rev. A.O. Polepe i hookaokoa ai no ia hana ia la, oia no kekahi o na haiolelo i mahalo loa ia e ka lehulehu e kuku ana.  Ua hoomaopopoia e kekahi poe, me he mea la, o ka helu akahi ia o kana haiolelo maikai loa ana ma Hawaii nei.  Ua minamina loa ia nae kana mau olelo o ia la, no ka mea, ua paa ole ia i ka hopu aku, a ua pakelo loa aku ia e like me ka olali.  He mau huro a he mau paipai ana mawaena a ma ka pau ana o kana haiolelo.

KA HOI ANA O KA HUAKAI.

     I ka pau ana o na hana ma ka Punawai, ua hoi aku ka huakai a komo ma la luakini o Kawaiahao.  I na pahu e kani ana, a i na hae e pulelo ana i ka lawea e ke ahe makani.  a i na ohe no hoi e honehone ana, aia hoi, ua uleu like ka hele ana o na keiki a komo i Kawaiahao.  Ua pomaikai like na keiki a pau ma ka hele ana ma ka huakai, aohe mea i poino a pilikia, a me he mea la, ua malama ia mai no na keiki liilii a pau loa, a ua hoohiki poao ia aku lakou ma ka hale a lakou i hoiliili ai.

KE KOMO ANA I KA HALEPULE O KAWAIAHAO.

     I ka hiki ana o ka huakai ma ka ipuka, ua hookomo ia aku na keiki iloko, a ua hookaawaleia ko kela a me ko keia Kula sabati wahi o noho ai.  I ke komo ana aku hoi iloko o ka hale, ua hoonani ia o loko i na lau uliuli o ka nahelehele, a e kiani ia ana hoi ua mau lau nahele nei e ke ahe malie a ka lau makani i komo mai iloko o ka hale.  A pau loa mai la na makua a me na keiki i ke komo iloko o ka hale, ua hele a pouli, a me he mea la he la ualanipili.  aohe he kuhihewa ia, aka, he piha maoli no i na kanaka o kela a me keia ano i komo mai e ike i na hana a na pulapula Hawaii opiopio.

NA HANA ILOKO O KA HALE.

     O na mea maluna o ka awai.  Ka Mea Kiekie M.Kekuanaoa, Rev.T.Koana, Rev.S.C. Demona, Rev. M.Kuaea, a me ka Peresidena o ka la Rev. L.H.Kulika.  O ka hana mua.  he himeni na ka Papa Himeni o Kawaiahao, oia hoi ke mele hou, nona ka inoa.  "Mele Lahui Hawaii."  2.  He pule na Rev. T.Koana.  3.  He himeni na ke Kula Sabati o Kawaiahao, na ka papa himeni i alakai a ma ka leo hui, e hooho like ana me na haumana.  4.  He wahi haiolelo pokole na Rev. M.Kuaea ma ka olelo Hawaii, a ua unuhiia i ka olelo haole ia wa koke no e ka Peresidena o ka la.  5.  Ua kahea ia mai o Rev. A.Kaukau e ka Peresidena.  He wahi haiolelo pokole hoolana manao no kana no na mea ana i ike ai ia la, a me kona hoopili ana ae i na aina pouli ana i noho mai nei.  Ua unuhiia kana olelo i ka olelo namu e ka Peresidena.  6.  He himeni haole na na keiki haole.  7.  He haiolelo pokole na Kapena Binamu ma ka olelo haole, a ua kulu iho no ia ma ka olelo o kona one hanau.  8.  He himeni Hawaii na ke Kula Sabati o Kaumakapili.  9.  He haiolelo na Ka Mea Kiekie Ka Makua Alii M. Kekuanaoa, a unuhiia i ka olelo haole.  10.  He haiolelo hope loa na Rev. A.O. Porepe o Molokai, ka mea i haiolelo mua ma ka Punawai, kai no paha o ka pau la ia o kana mau huaolelo momona, e iliki hou iho ana no kela, o ka hele ia a nakulukulu ka papahele.  Ia iho ana iho no ma ka olelo haole, hauoli hoi na haole, a kuli iho la hoi na kanaka.  11.  He himeni na ka Papa Himeni o Kawaiahao.  12.  He pule hookuu na Rev.S.C.Demona.  Hookuuia na hana maloko o ka luakini, a puka aku la na kamalii iwaho, a hele aku la ma na papaaina loloiahili i hoomakaukau ia e ke Komite, a i  hoopihaia hoi i na mea ai e na makua o kela a me keia keiki i makaukau.

     He mau hoohalahala kekahi no na makua mea keiki i hoolako ole mai i wahi mea paina na ka lakou mau keiki, aka, ua hele wale mai no na makua ma ke ano noho palaleha, a ua lilo ka lakou poe keiki i mea auwana, e hele wale ana ma o a maanei me he poe la e makilo hele ana.

     Eia kekahi mea hilahila loa, o ka hele ana o kekahi poe a hao wale i na mea maluna o ka papaaina a na kamalii haole, ka mea i kukala mua ia mai, mai hookokoke kekahi poe ma ia papaaina, aka, ua pani nae lakou i ko lakou mau pepeiao, a ua hele a hao wale i na io ipu haole a me na mea e kakau ana.  Hilahila ole maoli keia hana a na iliulaula.  Ke lana nei ka manao e pau ana ia hana pegana a Hawaii nei.

     O ka nui o na keiki i hele i ka huakai, ma ka ehiku haneri a me kanalima paha, koe nae na makua i komo pu mai iloko oia huakai aole i helu ia.  Akahi no a ike ia keia hana ano hou loa ma Honolulu nei, ka hele huakai nui loa ana o na keiki o ka Apana o Kona nei, a me ka pau nui loa ana mai i ka hele e hoohiehie i ko lakou la kaulana o keia wa opiopio.  Ua kuhi ia o ka la i hele nui ai e ike i ka moku Hokuao la ka nui, eia ka hoi ka oi o ka makahiki 1867.

     Ua ike ia i ka wa e noho Peresidena ana o Limaikaika no ka Papa Hoonaauao, he puali Inuwai ko ia mau la, aka, he okoa ae keia, a ke manaoia nei e puni ana na Kula Sabati a pau o ka aoao Euanelio o Hawaii nei i ka hana i keia mea ano hou.  He mea io no keia e hoolanalana ana i na manao kamalii.

 

NU HOU KULOKO.

Oahu.

     MALUNA O KA MANUWA LAKAWANA kekahi mau kahu ekalesia kanaka maoli i ka Poakolu iho nei, mamuli o ke kono ana mai a ke Kapena oia moku.

     UA HOI I KA MAHIAI. - O ke Keiki Alii a me kona makuakane, ua hoi aku i Waikiki i ka mahiai i ka Poalua iho nei, a ua pau pu aku me ko laua mau ohua i ka hele pu me laua i ka mahiai.

     ABERAHAMA FORNANDER. - Maluna mai o ke Kilauea i ka Poaono aku nei i hala, au hoi mai ke Kahukula Nui, no ke kokoke mai paha i ka wa e hoike ai na kula o ka apana Honolulu nei, oiai ke liuliu mai nei na kula.

     UA HALA I KA EHU KAI. - Ua hala aku nei o Kauka Kulika a me J. Kua i Waialua, a owau wale no ko ka hale e noho nei.  Ke lana nei nae ko'u manao ko ka noho hale, aohe e nele ko laua waiho mai i wahi puolo na'u.

     HOOKUUIA KA AHA EUANELIO. - Ma ka Poalua iho nei, ua hookuu ia ka hana o ka Ahahui Euanelio o Hawaii nei, a ua hoi aku na lala a me na hoa ma ko lakou mau wahi, a na lele like aku kahi poe i Waialua.

     UA LIMALIMA AKU. - Ma ke awakea o ka Poakahi iho nei hora 11, ua komo kolohe ia ae ke keena hana o P.W.Kauaohilo e ka aihue hilahila makau ole, a ua laweia aku he hapaha mailoko aku o ka pahu ume waiho palapala, he keu aku a ke kolohe, nana no hoi ke komo ana ia Rumi.  E loaa aku ia P.W.K., ina ua puali na lima i ka paa i ke kaulahao, aia la kona wahi o Kawa.  He noho wale no anei kau hana i loaa ole ai kau wahi hapaha, a aihue okoa iho nei oe?

     HE LEO MELE MA KA ILI WAI. - Ma ka po Poakahi iho nei, ua naue aku na Kamalei Alii Ekolu a kakou, oia o Kamakaeha, Pauahi, a me Likelike maluna o ka waapa, me ka lawe pu ana aku i kekahi mau lala o ka papa himeni a lakou.  I ke kaa ana malalo o ka moku. e kuu koke iho ana lakou i ka lakou mea hoohonehone pepeiao, emoole a kahea koke ia mai la lakou e ka wahine a ke Kapena a hookipaia aku.

     KA LA EHA O IULAI. - Ua ike iho nei makou.  ua hoolaha ae kekahi mau haole kamaaina o Honolulu nei, e hoohanohanoia ka la 4 o Iulai ma ko kakou nei Kaona, e kali kakou a ikeia kona oiaio ana.

     HOIKE KULA HAOLE MA WAIALUA. - Ma ka Poakolu na hoikeia ke kula haole ma Waialua malalo o ke ao ana a J.W. nakuina, a e like me ka mea i poloai ia mai, he maikai a he holo ka hoonaauao ana, me he mea la paha ua ike aku la kekahi poe o makou.

     KULANUI O LAHAINALUNA. - E hoomaka ana ke Kulanui o Lahainaluna ma ka la 3 o Iulai oia ka Poakolu, noaila i mea e makaukau like ai na mea a pau, ke hai e aku nei makou i ka poe a pau e makaukau ana no ke komo ana ia hale hoonaauao.

     LUNAKANAWAI KAAPUNI O OAHU. - Ma ka Poalima aku nei i hala, ua hele aku Ka Mea Hanohano W.P. Kamakau i kana huakai hookolokolo no na hihia i hoopii ia mai i mua o kana Aha.

     NA MEA HANOHANO. - Maluna mai o Kilauea i ka Poaono iho nei, ka hoi ana mai o na Mea Hanohano R.G, Davis, S.H. Pilipo, ka Loio Kuhina a me kana Kakauolelo.  Ua hoi pu mai no hoi me na loio i hele aku nei i ke Kau Kaapuni ma Maui.

     PIHA PONO O KAUMAKAPILI. - I ka po Sabati aku nei i hala, au hele o loko o ka luakini o Kamakapili a pili pu i na kanaka i pau nui mai e hoolohe i ka olelo a Rev. A. Kaukau.  ka misionari i holo i Fatuhiva a hoi mai nei.  Nui na olelo hoolana mai a ia ia mai.

     KE KUNA KATE LEE. - Maanei ke Kapena o ke Kate Lee me makou kahi i kamailio pu ai, a ua hai mai oia ua hooemiia ka uku eemoku o kona moku no ke kino hookahi, i hookahi dala, mai ke awa aku o Honolulu nei, a me na awa e ae ana e ku mau ai ma Maui, pomaikai wale ko Maui. 

     AHAAINA PALALA. - I ka auina la o ka Poaha o kela pule iho nei, ua haawi ia ae he ahaaina hoomanao i ka la hanau o John Meek Crabb (Papai,) keiki kane a Horace G. Crabb (Papai) me kana wahine, ma ka pa o Kaaione ma Kikihale.

     HE PUA HOU. - I ka wanaao o ka Poakolu iho nei, hanau ia mai na ka wahine a W. Pinehasa Wood, kekahi wahi kamaiki kane opiopio hou maikai.  O ke kolu paha ia o ka laua mau keiki, a ke ia ae nei hoi makou, Ho hou mai a nui ka pulapula.

     MAU LOIO HOU. - Ma ka Poakolu iho nei o keia pule, ua oluolu Ka Mea Hanohano E.H. Allen Lunakanawai Kiekie o ko Hawaii Pae Aina, e hookohu aku ia Andrew J. Lawrence Esq., a me G.B. Ukeke Esq., i mau Loio, e hiki ke ku imua o na Aha Hookolokolo a pau o keia Aupuni.

     W.D.ALEKANEKERO. - O kekahi o na hoa kokua o keia pepa, ka mea i hoike inoa ia maluna ae, e hoo ana oia i Kapalakiko maluna o ka moku Rainer i keia la, a i oleia i ka Poakahi paha.  E hoi mai ana no i ke one hanau ke pau kona hoonana kino ana.  Ma kana wahi e hele ai, e loaa pu ia ia na hookipa aloha ana a pau, a huli hoi mai.

     HE MAKAHEHI MAOLI PAHA. - I ka Poakolu iho nei, ike aku la makou he kaoo lio okoa no e holo ana i Waialua.  E holo nui ana paha e makaikai i na hana ma Waialua.  O kekahi poe, ua pau e aku no i ka iho i lalo i ka po.  Eia hoi kahi loaa o ko makou wahi keiki o ka mikina aku olaila, e hoi mai paha oe e kela wahi keiki e hele la.  He loaa mai koe o ka laua la, e nana ae hoi kakou e.

     NOHEA KE KOLOHE. - I kekahi o keia mau po i hala aku nei, ua komo kolohe kekahi mea i ka Hale Kula Alii, ma ka wawahi ana i kekahi apana o ka puka aniani, a komo iloko i ka po, ho-a i ka laau lepo-pele, ke kukui ihoiho; a waiho mokaki iho ia mau mea iloko olaila.  Nawai ke kupua kolohe o oe?  Oia ka ninau.  Ua lono mai makou, ina e ike ia ka mea nana i komo kolohe i keia hale ao, aia ka hale nui ma Kawa; he mau kiai no ko laila e malama pono ia ai ua mea kolohe nei.

     LA HELE MALIHINI O KA POPE. - Ma ke ahiahi Poaha iho nei, ua puka na hoahanau Pope mawaho o ke alanui a ua kaihuakai aku ma ke alanui Beritania, a ma ke alanui Emma, a ma ke alanui Kula a huli ma alanui Papu a iho mai a komo iloko o ka halepule.  Ua hele wale ua poe la a kanonono i ka la me na hae e paa ana i na lima.  Ua kuhihewa aku au o na hae liilii o ka mahele B o ka Puali Kaua Lio.  J. MAKAIKAI.

     HE KANAKA LOU I KA MAKAU. - I ka Poaono aku nei i hala, au holo aku kekahi poe o Waikiki i ka pahoe malolo, a e like me ka mea mau he luu kekahi e nana i ke komo mai o ka ia, pela o Mauhelemoku i hana ai, a i ke kolu o kona luu ana, e lewalewa ana he aho a he makau na kekahi mea lawaia.  E holo ana ka waa nana ka makau i mua.  a lou ae la ka waha o ua kanaka nei, kuhi ka mea nana ka makau he ia, i huki ae ka hana he kanaka.  me ka makau no ka iho ana mai o ua kanaka nei a na Kauka Hilibarani i wehe.  E! he mea hou keia o keia kau pahoe malolo.

 

Kauai.

 

     MAKE LOA I KA LIO.- He wahi keiki uuku nona na makahiki 5 paha, ua make loa i ka lio ma ke ahiahi Sabati aku nei ma Hanalei.  Ua hikii kokeia ka ho ma ka ipuka hale a ua lalama ua wahi kaiki nei ma ke kaula, a ua wili iho ia ia, aka, ua puiwa ka ho a kauo ia aku la ia a make loa.  Pela ma o Ioane Waiohinu ia makou ma kana palapala.

 

Maui.

 

     PAU AHI. - Ma ka la 7 o Iune nei, ua pau i ke ahi ka hale o Miss. Baraunu (Brown), ma Molokai.  Aole no i maopopo ka mea nana i puhi, aka, ua manao wale ia no na kekahi mea i maa i ka hana kolohe.

     PEPEHI KANAKA MA MOLOKAI. - Ma ke ku ana mai o Wawiki i nehinei, ua lohe mai makou mai ke Kapena mai, ma ka wanaao ka o ka Poalua iho nei, Iune 18, ma Honouli-maloo, ua pepehi malu ia o Elisai, he keiki ui, e Mahoe, he kanaka ua a-o-o.  O ke kumu nae i pepehiia'i, aohe no i maopopo.  Eia nae ka mea i loheia; o ua Elisai nei i make aku la, e waiho ana oia i ka mai, a o kana wahine hoi, ua hele i ka halawai ia wanaao, aka, i kona hoi ana mai, e waiho ana kana kane ua make.  He keiki keia na ka wahine mua a ua Mahoe nei, a he wahine hou hoi kana i keia wa.  Me he mea la paha, ua komohia ka manao aloha ole iloko ona no kana keiki a na pepehi aku me ka manaonao ole.  Aloha ino ka mea i make aku la, oiai oia e noho ana me ka mai, me ka hiki ole aku paha hoi i ka palena hope o kona ola ana, aka, ua hanaino aku ka mea kino ola, a make aku la ia me ka nawaliwali mai a me ka pepehiia.  la la no, ua lawe koke ia ua Mahoe nei i Lahaina, a aia oia maloko o na wahi paa.  A me he mea la nae paha, e hiki mai ana i keia la maluna mai o Kilauea.

 

Hawaii.

 

     PAU KE KEKAKE I KA ANU IA. - O ko makou hoa aloha o ka malu kuikui o Kaukaweli, i hoi aku nei i ke kai malino o Kona, ua poloai mai ia makou ma kana palapala.  ke hoolilo ia la na kekake a me na miula i mau i nai no ka lakou mau ai ana.  He no ka aka i ko Kona poe.  O ka makapehu ia loa mai la no ka paha ia o Kona.  He lohe olelo wale hoi ia Parisa i ke ku o na hale kuai io lio, a eia ka hoi o ko Kona poe ka oi loa aku.

     KE PII LA I KA LAPA MANU OLE. - O na Keonimana hookahi la no maluna, na pa leo hou mai no ia makou, ke pii la kekahi poe o Kona i ka lapa manu ole, a ke hana la i na kaula lele kowali a ke lele la kekahi poe.  O ka makou keia e pa leo e aku nei, ea, he lala maloo aku ia.  Eia kekahi, he hana hoopalaleha, a manaka, a lilo loa aku i ka noho wale, a he pololi a maka poniuniu ka hope.  Nolaila, e hoomama a e hoopau loa aku i na hana hope ole.

     NO KAU MAI. - Ke hai mai nei o J.W. Manoa o Punaluu ia makou, ke li la ka io o ko Kau poe, a ke kumakena la na kanaka, a ke haalele la i na hale, a ke hele la ma kekahi wahi e aku, no ka makau i ka olelo hooweliweli a kekahi mau kahuna anaana, e pau ana na kanaka o Kau i ka make.  He keu aku ka wanana hoopunipuni a na kahuna anaana, a he keu aku ka hupo o ka poe hoolohe aku i ka lakou mau olelo. 

     HOOKUPU DALA LUAKINI MA KAIPUHAA. - Ua loaa mai ia'u he palapala mai a E Palea mai, e hai ana, i ka la 5 iho nei o Iune, ua lulu dala na hoahanau mai Kou a Paoo, a ua loaa na dala i huiia me na dala kahiko, ua hiki aku ka nui $148.35,  he poe uuku loa keia nana i kokua, i nui ke aho, mai hana kamalii, hoomau ia ka lulu ana i paa ko oukou heiau, aia no eia lulu dala ma Kohala Komohana, mai Kukuipahu a Puuepa, ke lulu nei lakou i dala hale pule no lakou, a ua loaa he $736.50, keoni mai nei hoi keia wahi ekalesia, ma ka hana pono, he wahi ekalesia uuku keia, a ke hoala nei i elua heiau, i wahi e hoomana ai ia Iehova.

     NO KA MAKE ANA O RUTA K. KAONOHIMAKA Ua make o Mrs.R.K.Kaonohimaka ka mea aloha nuiia ma Holualoa Kona Akau, i ka la 19 o Mei 1867 nei.  Ua hanauia oia ma Kooai Holualoa Kona Akau i ka A.D. 1833, o ka nui o kona mau la o ka lawe hapa ana i na inea o keia noho ana, he 35 na makahiki, ua paupauaho mai la oia ia'u i ka 20 o na makahiki o ko maua mare ana.  Ua hanauia mai eia i elua keiki na maua, hookahi keiki kane a hookahi kaikamahine, a no ka lawe ana 'ku o Ka Mea Mana loa ia ia, a ke noho nei au me na kamalei a maua me ka naau luuluu i hoopihaia e ke kumakena a me na ao-polohiwa a ke kaumaha, me ka hoohaiki ana mai o ka puuwai i ka pauma ana, i ka ua mea he maeele i ke aloha kuhohonu nona.  He hoahanau oia no ka berita o Kailua i ka wa o Rev. A.Kakina, i ka A.D. 1852, kona lilo ana i Kristiano.  Ua noho maua ma ka Ekalesia o Kekaha me ka oluolu pu, e hapai like ana i na hana a ka Haku i hoonoho mai ai ia maua malaila; Nolaila, ke lana nei ko'iu manao, he haawina no kana mai ke Akua mai e like me kana hana ana, nolaila ke noi nei au, E hewa anei au ke pane ae i keia mau hua malalo.

     "Kuu wahine mai kaua anu o Waimea, Mai kaua kipuupuu hele i ke kula, I ke kula no ia ua a waikahe - a."

     "Pomaikai ka poe make, ke make iloko o ka Haku" Aloha e na hoa iloko o ka Baibala.  Owau no me ke kaumaha. 

                                                                                                                                    G.P.KAONOHIMAKA.

     Kawaiahao Iune 18, 1867.