Ka Nupepa Kuokoa, Volume VI, Number 22, 1 Iune 1867 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE VI. HELU 22. HONOLULU, IUNE 1, 1867  NA HELU A PAU 287.

 

KA NUPEPA KUOKOA,

@ MAU IA MA HONOLULU

I kela Poaono Keia Poaono.

$2.00

No na mahina he Umikumamalua !

$1.00 no na mahina eono,

ME KA HOOKAA MUA MAI.

@ @

 

"KA NUPEPA KUOKOA."

Is published in Honolulu

EVERY SATURDAY,

$2.00 per annum, or $1.00 per six

month, in advance.

 

Announcements not exceeding 10 lines, @ for $1.00

twice or $1.59, and $2.00 @ month, all advertisements

must be paid for in advance.

Kanikaus will be charged $1.00 per page, or 4 cts. a line.

Payments for Advertisements, Subscriptions or Kanikaus,

may be paid to any of the Agents of the Kuokoa, or may

be @ a letter to the Publisher.

All @ must be prepaid. No names, either of

foreigners or natives, will be @ on the subscription

@, until paid for.  This rule must be strictly adhered to

@ of the @ low subscription price.

The office of the Kuokoa is in the South corner of the Sailors'

Home.  @ are from 9 A.M. to 4 P.M.

L. H. GULICK,

For the Publishers.

@ Volumes I, II and III of the KUOKOA, bound, for sale,

$ 4.50 each.

@ Persons having complete sets of the above, can have

them bound by paying $2.00 each.

 

No hana, Kaupo, a me Kahului,

KA MOKU KUNA

'MANUOKAWAI,'

O Akoni ke Kapena,

E HOLO MAU ANA KEIA MOKU I NA

@ . No na ukana a me na ohua, e @

            C. BREWER &co. (BURUA MA)

 

HE MOKU HOLO MAU

No Lahaina, a me Makena.

O KE KUNA KALEPA PAA

@

"Kate Lee,"

O Fountain ke Kapena,

  E HOLO MAU LOA ANA, A HIKI MAI

@ ma na Awa i ololoia maluna.  No na ukana a me

na ohua, i mua i ke Kapena ma ka moku, a i ole ia ia

 C. BREWER &co. (BURUA MA)

 

NO HILO

KA MOKU KUNA

"MELE HILO,"

O Sebastian ke Kapena

E HOLO MAU ANA KEIA MOKU I KE

Awa maluna, no na ukana a me na ohua e nina ia

  @ahu, (L. L. Tormant.)

 

            NO KAWAIHAE.

E HOLO MAU ANA KE KUNA MA-

@ i kela awa maluna.  No na ukana a me na

ohua e ninau i ke Kapena ma ka moku, a i ole ia

  WALKER & ALLEN

  Na Luna.

Na Luna ma Kawaihae, o CONWAY & ALLEN.

  276 3m

 

MOKU KUNA WAWIKI ! !

E HOLO MAU ANA KEIA

wahi moku i Molokai i kela pule keia pule mai

Honolulu aku nei.  A ina he ukana @ ka

@ a e holo ohua ana paha, alaila, e

ninau no i ke Kapena oia o

@  KAHALEMAKE.

 

HE MOKU HOLO MAU NO KONA

 A ME

KAU, HAWAII

E HOLO MUA ANA KE KUNA

"Kona Packet,'

KAPENA BALAAMA, mawaena o Honolulu a me Kona, Kau,

Hawaii.  No na ukana a me na ohua, e ninau i ke Kapena ma

ka moku, a i ole ia

  G. WILLIAMS

Honolulu, Aper. 24, 1867  281-6m

 

No HONOIPU me NAOHAKU,

Ka Moku Kuna

"KOHALA"

O Howard ke Kapena.

E holo mau ana keia moku ma na Awa i oleloia maluna, no na

ukana a me na ohua.  E ninau i ke Kapena, a @ ia, ia

  KAKELA me KUKE

 

Na Buke i Pai ia e ka Papa Hawaii.

 

Eia na buke kuai, a me ke kumukuai.

Baibala nui no na Awai o na Halepule, $4 00

  "    Ohana, ano nui, me na kii, 2 50

 "     a me na Moohana,  5 00

 "     Ohana uuku iho, me na

        Moohana, ili ulaula,   1 00

"       Ohana, me na Moohana wale no,  62 1/2

"       Okoa,     50

Kauoha Kahiko, i paiia i ka M.H. 1838, 25

Kauoha Hou, me ka pepa lahilahi o waho, 12 1/2

Kauoha Hou, hapa haole (Haw. Eng.)  25

Haiao,   25

Mele Malihini Ana, 25

Wehewehehala, 25

Lira Hawaii, 25

No ko ke Akua Ano, 25

Lira Kamalii, 25

Kumumua Hou, 12 1/2

Moolelo Ekalesia, 50

Hoike Palapala Hemolele, 25

Himeni Hawaii me na Leo Mele, 1834, 25

Ninauhoike, 12 1/2

Ui Kamalii no na Kula Sabati 12 1/2

Kumu Leomele 12 1/2

Haawina Kamalii, Buke 1 a me 3, 12 1/2

Haawina Kamalii, Buke elua i huiia, 25

 

Eia na buke i haawi wale ia.

Haawina Baibala.

Ui.

No ka Aoao Pope.

Hoike Pope.

Palapala Liilii--

 Helu 4 -Makemake anei oe i ke ola?

 Helu 6 -E helo i o Kristo la.

 Helu 7 -Ka hoi ana mai o ke Keiki Uhauha.

 Helu 11 -No ka hoohiki wahahee i ke Akua.

 Helo 16 -Ka Eehia ana o ka Ahaaina a ka

                Haku a me ka Papekiko ana.

 Helu 17 -Mai hana ino i na Holoholona.

 Helu 18 -No ka mahi ana, kuai ana, a me ka

                inu ana i ka Awa.

Ka Davida Malo Kumumanao.

Ka Moolelo o Batimea Puaaiki.

   L. H. Kulika.

Kakauolelo o ka Papa Hookoo ka Ahahui

  Euanelio o ko Hawaii Pae Aina.

 

 

Ka Nupepa Kuokoa.

 

KA MOOLELO O KAMEHAMEHA I.

 

Na S. M. Kamakau.

 

Helu 20.

 

NO KA HOI ANA O KAEOKULANI I KAUAI,

A ME KE KAUA HOU ANA ME

KALANIKUPULE I KA

A. D. 1794.

 

  A pau ka noho ana o Kaeokulani ma

Kailua me Kalanikupule ka Moi o Oahu,

hapai hou ae la oia i kona manao e hoi i

Kauai, aka, holo aku la a pae i Waialua,

mailaila aku a pae i Waianae, a noho

iki malaila no kekahi mau la.  A no ka

paa no hoi o kona manao i ka hoi i Kauai,

nolaila, hoomakaukau iho loa oia no ka

holo ana, aka, lohe iho la oia i ka ohumu

a Kaiawa a me kekahi poe alii e ae,

i kokua ia hoi e na hookele, e i ana, "E

holo a waena moana, alaila, kiola ia

Kaeokulani."

 

  A lohe o Kaeokulani no keia ohumu

ino ia ana, a manao iho la oia e make

hookahi ana oia i ka moana, a e aho hoi

ka make ana i ke kaua he nui na moepuu,

nolaila, hoopau iho la oia i kona

manao hoi i Kauai, a kauoha ae la oia e

wawahi i na auwaa a pau, a e hele hou

e kaua me Kalanikupule.  Hui pu mai

la hoi na kanaka koa o Waianae a me

Waialua mahope o Kaeo.  A o keia manao

ana o Kaeo, ua kaulana aku la hoi a

lohe o Kalanikupule.  Hoomakaukau iho

la ke kaua o na aoao elua, i ka malama

o Hanaiaeleele, oia hoi ka malama o Novemaba,

o ka makahiki 1794.

 

  I ka houuka mua ana o no aoao elua,

ua lanakila loa o Kaeo maluna o na koa

o Kalanikupule.  Iloko no hoi o ia mau

la o ke kaua ana, ua komo mua mai

kekahi mau moku ma ke awa o Kou ma

Honolulu, oia hoi na moku nana i komo

mua ke awa o Kou; no ke aupuni mai o

Amerika ia mau moku; o Jackoll a me

Prince Liboo ko laua ma inoa, a o Kapena

Baraunu ma na'lii moku, he mau

moku huli aina, a he ano manua no hoi.

Ua hoolimalima aku o Kalanikupule ia

mau moku, e kokua mai ia ia ma ke kaua

ana, oia hoi eha haneri puaa, ua like

ia me hookahi lau a oia iho la kona kumu

hoolimalima.  Ua ai mai no na Kapena

e kokua ia Kalanikupule.  I ke

kaua ana ma ke kula o Puunahawele, ua

make kekahi mau haole ia Mare Amara,

a ua make no hoi kekahi mau kanaka

maoli ma ia kaua ana, a ua hee na koa o

ko Kalanikupule aoao.  Mahope iho o

ia mau la, ua hoomaka hou ke kaua ana

iloko o na la eono, ua mau no ka lanakila

ana o ko Kaeo aoao; a no kona ike i

kona lanakila mau, ua komo loa ke kaua

ana iloko o Ewa.

 

Houuka kaua nui ma Kalauao, i Ewa.

  I ka la 12 o Dekemaba, o ka A.D.

1794, ike iho la o Kaeo i ka mau loa o

kona lanakila ma na hoouka kaua ana a

pau, a manao iho la oia e mau loa aku

kona lanakila ana a komo loa i Kona, a

malaila ke kulanakauhale alii of Waikiki.

A hiki ua o Kaeo ma ma Kalauao i Ewauli,

ua hoopuni koke ia lakou e na puali

koa o Kalanikpule.  Aia keia hoouka

kaua nui ana mawaena o Kalauao a me

Aiea, ma ke kahua o Kalanimanuia.  O

ka eheu akau o na koa o Kalanikupule,

O Koalaukani ka alihiakaua, aia maluna o

na ahua kuamoo o Kalauao a me Aiea;

o ka eheu hema, o Kamohomoho ka

alihikaua, aia ma na iliili a Malei; ma ka

honua ka Poe, aia malaila o Kalanikupule

a me na'lii, mawaena o Aiea ma kau

papaloi.  O Kapena Barauna ma a me

na haole, aia lakou ma na auwaapa maloko

mai o ke kai.  Ua hoopuniia hoi ko

Kaeo mau puali koa, a ua halawai pu na

kaua elua, a ua oki pu ko Koalaukani

mau koa mawaena o Kalauao, ma Kuamoo;

a ma Kahuawai, nolaila, hoopuehu

ia ke kaua a Kaeo, a ua puni o Kaeo

ma iwaena, aka, ua hoouka no o Kaeo

me ke koa launa ole, a ua like me he

kaihoee la ka uhi ana o ke kaua, o na pu

me na elau, o na pahikaua a me na pololu

a me na ihe, a kuihauneki ae la hoi

ko Kaeo poe kokua, ua haalele aku hoi

o Kaeo me aono kokua mahope ona, a

ua iho mai la ma Aiea, he wahi awawa

auwai; a mai nalowale pah ilaila, aka,

ua ike ia ma ka ula o ka ahuula, a ua

ike ia mai no hoi e ka poe maluna o na

waapa ma kai, a ua hoouka mai i ke

kaua, me ke ki ana mai i na pu.  Ua hoopuniia

e na koa mauka, a iloko o ia hoouka

ulaoa ana o ke kaua, e alu ana ma

na aoao a puni.  Pela i make ai o Kaeo

me kona koa launa ole.  Ua luku pu ia

kana mau wahine a me na wahine a me

kekahi poe alii a me kekahi poe koa. A

ua kapaia keia kaua ana, o Kukiiahu.

I ka malama o Hanaiaeleele he 16 la, a i

ka malama hoi o Dekemaba, he 12 la, o

ka makahiki 1794 ma Kalauao, Ewa.

 

 I ka aui ana o ka la, ua houluuluia na

heana o ka poe i make i luku ia i kela

kaua ana, a ua laweia ma kai o Paaiau,

malaila ka poe make kahi i houluuluia'i,

a e ahu a lalakukui ana ko lakou mau

heana make.  Malaila no hoi ka heana

o kekahi wahine i pepehiia a make loa a

ola hou, a o Kahulunuikaaumoku kona

inoa. -(Ua ike maka iho au iaia me

kona mau palapu manaonao ma kona kino

a puni, i ka makahiki 1834 kona make

kupapau ana.)  I ka hora i paha o ka

la 12 o Dekemaba, A.D. 1794, ua pepehi

like ia lakou me Kaeokulani ma,

ma Kukiiahu, aole hoi oia i ike ua laweia

na kupapau o lakou ma kai o Paaiau,

a malaila kahi i waiho ai a hiki i ka hora

10 o ka po, lele mai ana kekahi manu

pueo, a pai ae la i kona mau eheu ma

ke poo o Kahuluniukaaumoku, a hikilele

ae la kona make me he hiamoe la, a

kaakaa ae la kona mau maka, a ike iho la ia

e waiho pu ana oia me na heana o ka

poe i make, e kau ana kekahi maluna o kekahi;

a ike aku la no hoi oia i ke

kanaka kiai, e holoholo ana ma o a maanei.

Lele aku la ua pueo nei iloke o ke kai

kokolo aku la no hoi keia mahope a au

aku la iloko o ke kai, a au aku la me ka

hoomanawanui loa i ka walania o kona

mau eha, i hahauaia ai i ka pahikaua a

me ka pahupahu ia i ka elau waiki a me

ka pololu.  Alakai aku la ka pueo ia ia

a pae ma Aiea, a pii aku la ma ke awawa

o Halawa, a hiki ma ke kuahiwi, loaa

kekahi ana, a malaila oia kahi i waiho a

make ai; aole no hoi oia i ike, ua kii ua

pueo nei i kekahi kanaka i pili kahu nona,

a he kanaka kupa kamaaina i na wahi

huna o uka o Halawa, a na ia kanaka

i lawe aku i ka ai a me ka nini ana i na

eha.  Elua la elua po, kukala ae la hoi

ka Moi Kalanikupule i ke kanawai, e ola

na pio, a e hoopau i ka luku ana i na pio

a pau; a o ke pio e pepehiia mahope iho

o ke kukala ia ana o ke kanawai, ina he

alii a he kanaka paha ka mea nana i

pepehi, e make no, ke malama ole ia ke

kanawai.

 

  Ahonui ke akua ia Kahulunuikaaumoku,

no ka hoola ana ia ia a lohe oia i ka

olelo a ke Akua, me ka inoa o na Kolukahi

Hemolele.  He kaikamahine oia na

Kuohu, ke kahuna nui o Kauai.

 

  I ka make ana o Kaeokulani ke keiki

a Kekaulike, ka Moi o ke aupuni o Maui,

a o Holau kona Makuahine.  Ua lilo ka

hooilina o ke aupuni o Kauai ia George

Kaumualii kana keiki, aka, aohe nae hoi

i kupono ia ia ka hooponopono i ke

aupuni no kona uuku, a ua lilo i kekahi

poe kahu ka malama ana i ke aupuni me

ke kaua no.

 

No ka Pepehi ana o Kalanikupule ia

Kapena Baraunu ma.

 

  Mahope iho o ke kaua ana ma Kukiiahu

a me ka make ana o Kaeokulani, ua

lanakila hoi o Kalanikupule, alaila, koi

aku la o Kapena Baraunu ma ia Kalanikupule,

e uku aku i ke aupuni o Oahu, i

uku no ko laua kokua ana ia ia i ke kaua

ana me Kaeo.  Hoole aku o Kalanikupule,

"aole pono o ke aupuni ka uku

o ko olua kokua ana i ke kaua, no ka

mea, ua hooholo mua ia, hookahi lau

puaa ka uku, oia hoi he umu kanaha, a i

keia wa hoi eha haneri."  Ua hoole mai

no o Baraunu ma, a koi mai no o ke aupuni

no ka uku.  A no keia mea, ua ohumu

iho na'lii, e pepehi ia Baraunu ma.

 

  Olelo aku la hoi o Kamohomoho ia

Kalanikupule, e uku aku no i na Kapena

o na moku i ka puaa, e like ka nui

me ka mea i olelo mua ia, a i loaa ole ka

paakai e kopi ai, e kuhikuhi aku oe i ka

paakai o Kaihikapu, anoai o pau loa na

waapa i ka holo i ka paakai, a holo pu

no hoi paha me Kapena Baraunu ma,

alaila, e kaili kakou i na moku, a e pepehia

na haole.  Ae mai la no hoi o

Kalanikupule.  Lawe ia mai la ka puaa a nui

loa, ke hele la piha pono na moku a elua.

A no ka paakai ole hoi e kopi ai, nolaila,

nonoi aku la na Kapena i paakai no ka

puaa, a ua kuhikuhiia ka paakai ma

Kaihikapu; he wa kai nui hoi ia no Keehi.

I ka holo ana o na waapa a hiki ma Kaihikapu,

hooiliia na waapa a piha i ka

paakai, a i ka hoi ana mai, ua maloo ke

kai o Keehi, a hiki ole hoi na waapa ke

hoi mai.  O na moku hoi e ku ana ma

ke awa, ua piha loa i na'lii a me na kanaka,

a ua pephiia o Kapena Baraunu

ma; o ka poe haole hoi i kii ai i ka pakai,

ua pau i ka pepehiia a ua ola

mahunehune kekahi poe haole, a pela no hoi

ko ka moku, ua pepehi ia kekahi poe, a

ua hoopakele ia no hoi kekahi poe, a ua

lilo na moku elua ia Kalanikupule.  A o

na haole i koe, ua noho pio lakou me ko

lakou manao hoopea waleia.

 

  I ka loaa naa o na moku ia Kalanikupule,

me ka lako i ka pu kuniahi a me

na lako kaua he nui wale, alaila, hu ae

lo kona manao e holo i Hawaii e akua ai

me Kamehameha.

 

   Kaili hou na haole i na moku.

 

  I ka hala ana o na pule ekolu mai ke

kaili ana o Kalainkupule i na moku a me

ka pepehia ana hoi o Baraunu ma, alaila,

hoomakaukau iho la o Kalanikupule i ka

holo i ke kaua; o na'lii, na kuhina, na

koa a piha na moku elua, a ma ka auwaa

kekahi.  Olelo aku la o Kamohomoho ia

Kalanikupule, "O ku nui o ka haole ma

ka auwaa, a o na haole hookele wale no

maluna o na moku."  "No no," wahi a

Kalanikupule.  Olelo hou aku o Kamohomoho,

" O ka nui o na mea kaua ma

ka auwaa, a o ka pu hiki ole ma ka auwaa,

ma na moku ia."  Hoole hou no o

Kalanikupule.

 

  I ka la 4 o Ianuari 1795, hoopuka aku

la na moku mai ke awa o Honolulu aku,

me ka piha i na'lii a me na koa, a holo

aku la a po, a mai ia po a ao ae o ka la 5

ia, ua pau loa na alii a me na kanaka i

ka luai a me ka hoopailua, a hoi hou mai

na moku a ku ma Waikiki.

 

  Olelo hou aku o Kamohomoho ia

Kalanikupule, "He pono ole ka hana a ka

haole, o ke kumu nui i pau ai na kanaka

i ka luai, o na ipu pilau a ka haole, oia

ka mea i pakui ai, a i pau ai i ka luai, a

nolaila, e kiola ka nui o na haole ma ka

auwaa, a o na haole hookele wale no ma

na moku, a e lawe na mea kaua a pa

ma ka auwaa."  "No no," wahi a

Kalainkupule.  [Ka i no iaia pau ka hookuli

o na alii, ke hahai loa mai nei.  Wahi a

ka mea kakau moolelo.]

 

  Ua pau loa na'lii a me na kanaka i ka

lele i uka, aohe mau koa kiai i koe maluna

o na moku, a he waa no nae maluna

o ka moku.

 

  I ke aumoe ana iho, ua makaukau ka

moku Prince Lipoo e holo, ua makaukau

na pea, a pio mai la me ka hokio i ka

moku Jackoll, o ka hoomakaukau koke

iho la no ia e holo.  O Kalanikupule hoi

me kana wahine, eia no maluna o ka moku

a me kekahi mau kanaka lawelawe no

laua.  O ka holo aku la no ia o na moku.

I ke ao ana ae, i nana aku ka hana o ko

uka poe, ua heo na moku.  Eia nae hoi

ka mea kupanaha, o ka hoihoi hou ana

mai ia Kalanikupule ma a mawaho aku o

Laeahi, hookuuia mai maluna o ka waa.

 

  He naau aloha Kristiano ko ka poe o

luna o ka moku, aohe hoomauhala, aohe

i manao i ko lakou poe i pepehiia a me ka

lawe pio ia ana o na moku.  Manao nui

lakou i ke ola o ke alii, a waiho a malamalama,

hoihoi mai a hookuu mai i ke

ola o ka Moi.

 

  No ke aupuni o Amerika Huipuia keia

mau moku.  Holo aku la laua i

Hawaii, a hahai aku la i na mea a pau i hanaia

ia Kamehameha, a me ka pau loa ana o

na mea kaua o ke aupuni o Oahu.  Ua

aie ke aupuni Hawaii, no ka pau loa

o na mea kaua a Kalanikupule.  Ina paha

aole e lilo i kela mau moku na mea

kaua a Kalanikupule a me na moku, ina

paha aole i akaka ka hui ana o na aupuni

o Hawaii malalo o Kamehmeha.

  (Aole i pau)

 

Ke Keiki Alii Hesana

a me Bidia Samela o Bohemia.

 

  HELU 10.

 

  A o Hesana i keia manawa, aohe oia i

hoomanaoi ae i na olelo a Mamiona e pili

ana i kona mau pilikia no ka mea, ua lilo

loa kona manao i ka lealea a ka waina, a

mawaena o na kiaha wai ula o Mareka

kahi i puunaue ia ia na koii o kona puuwai

oiai oia i hooihoiho ana i ua mau kiaha

wai la o Kanoenoe.  Noho malie iho

la o Mamiona no kekahi manawa, a mahope

iho, i hou mai la oia.  "Ua akaka

no ia mea ma na alo alii a pau, o ka waina

nei ka luahi o na poino e ae a pau, a

o ko na alii aoao mau no hoi ia o ka

waina; aole nae au e hookapu loa aku ana

ia oe ma ia mea i keia manawa, a i ka

manawa mahope aku; aka hoi, e pono no

oe e maliu mai i kuu olelo, a mai paulehia

loa oe mai ia mea, o loaa oe i ka poino;

no ka mea, aia ma ke alanui, kahi au

e hele aku nei i ka piko o ka pomaikai,

aia pu malaila na hoowalewale he nui o

keia ano e hoopunihei ia ai na keiki a

kanaka; a malia iloko o kou haule ana iloko

o kekahi aha lealea; e inu naaupo

auanei oe i ka waina, a hiki i ka poino

ana o kou mau noonoo kanaka, alaila, aole

io auanei e ole ka lanakila mai o na lima

okala o ka enemi maluna ou."

 

  Olelo aku la o Hesana.  "E Mamaiona,

ke lohe nei au i kau mau olelo a pau, a

malama hoi; a o keia pilikia au e olelo

mai nei he pilikia nui a'u e alo aku ai;

oia ka'u mea haohao, heaha la ka pilikia,

a me na popilikia e ukali mai nei ia'u? "

 

  "E ke keiki alii, kuu Haku," wahi a

Mamiona, oia ka'u e hai aku nei, e

hoolohe mai.

 

  Ua haalele ino ka luahine i ka rumi a

lakou i noho mua ai, a ua hele aku oia

ma kahi kaawale, maloko hoi o kekahi

rumi mehameha, e ninini ai i kona mau

ehaeha a pau ma na kapuai o ka mea ike

ole ia, a e hoalohaloha aku hoi no na

pomaikai he nui i hiki mai maluna ona.

 

  O ka moolelo o keia luahine, he moolelo

kupanaha no, a o keia no hoi ke

kupunohine kuakolu o Bidia Samela o

Bohemia.  He kanakolu kumamahiku na

makahiki i hala aku mamua, ua kipaku ia

mai ua luahine nei mai Bohemia mai e

kana hunona ponoi,  @ ka manaoia he

luahine anaana ua luahine nei.  O kona

inoa mua o Boida Tamima, a no ke

kaulana loa hoi o ua luahine nei i ka

anaana, nolaila, ua kapa hou ia iho kona

inoa o Boida ke Kupua, a o Kupua Boida

hoi me kekahi olelo ana.

 

  O ka oiaio maoli, he wahi luahine ano

kilokilo, a he ike hoi i kekahi mau mea

pohihihi, a me na mea e hiki mai ana mahope,

a o ka anaana ana nae a me ka lawe

ana i ke ola o kekahi mea, aole ia i

ike iki ia mea, a aole no hoi i hana iki i

kekahi mea o ia ano, aka, o ka hoohuoi

nui ia o ka nalowale honua o na keiki

alii, a me na poe opiopio hanohano a pau

o Bohemia, nolaila, kapilipili nui ia ai i

make ia Boida keia poe a pau.

 

  Aole no paha oukou e poina i na inoa

o Magimo, Ogea, Ugalemugimo, a me ka

nui o ia poe pilikua ai kanaka e noho ana

ma na mauna i Kirakasia a me Kasimia,

a ma na ulu-laau hoi o Bohemia.  O loko

o keia mau palipali, a me na o-awawa

poopoo, ua noho wale ia no e na nunui

ai kanaka, a ua kapa ia hoi keia mau

wahi "Na aina o ka Nunui."  Na lakou

no i pepehi nui i na keiki alii, a me na

kanaka e maalo mehameha ana iloko o ua

ulu-laau o na Aina Nunui.

 

  Mahope mai o ke kipaku ia ana o Boida

Tamia mai ke alo alii mai o Bohemia, ua

auana hele aku no oia ma na wahi a pau o

Bohemia me ka mea ole na na e hookipa ia

ia, no ka mea, ua weliweli nui ia oia e na

kanaka.  A ma kahi e kokoke ana i ke kumu

o ka mauna o Kirasakia, malaila oia i

noho iki iho ai no kekahi mau makahiki;

A o na poe a pau e maalo mai ana ma ia

mau wahi; haawi manawalea mai lakou ia

ia i na mea ai, a me na mea aahu, a me

kekahi mau moni; a pela oia i kana-aho ai

no ia mau makahiki o ka noho ana ilaila.

Iloko o kona noho ana malaila, ua hai

nui aku oia imua o ka lehulehu a pau i

hiki mai malaila i ke ano o na lahuikanaka

e noho ana ma na kuahiwi, he poe

nunui, a he ai kanaka hoi, me ka papa pu

aku ia lakou mai hele lakou iloko loa o

na mauna, a me na ululaau hihipea o

namauna.

 

  O kekahi Alii Uhane ino, o Majo kona

inoa, oia ka mea na na i kii mai ia Boida

i ka po a lawe ia ia a hiki i Kasimia, a

waiho iho la ia ia ma ke kula panoa:

malaila kona wahi i waiho ai a hiki wale i

ka loaa ana ia Hesana. Iloko pu no hoi

o kona wa i hiki mai ai i Kasimia kona

loaa ana i na mai he nui, na mai hehe,

hui o ke kino, kuli o ka pepiao, a me ka

lolo; o na pilikia keia a Majo i haawi

iho ai i ka luahine Boida: o kona hoomau

hala ia ia ke kumu o kona hoopilikia

ana pela.

 

  E ahonui hou mai oe e ka mea heluhelu

i ka makou e kuekaa hou aku nei.

O ua Majo nei, he alii oia o na pilikua

luu, a me na pilikua lele, a me na uhane

ino no a pau o ka Aina Uhane, a o ua

poe uhane nei kekahi poe kokua loa

mahope o na pilikua aikanaka, a na lakou

hoi i hoola loihi i kekahi poe Keiki alii

opiopio me ka hana hoomainoino aku ia

lakou a hiki i ka make ana. Aia no hoi

maloko o ke ana o Ugalemugimo i noho

ai, kahi i hoopaahao ia aku ai na kanaka

he nui; ua pau kekani poe i ka make no

ka piliaiku, a o kekahi poe hoi ua pau i

ka ai ia e na pilikua, a o ke koena, aia no

lakou ke noho la iloko o ka pilihua a ka

mainoino; a mawaena hoi o keia poe pio,

o Bidia Samela pu kekahi i hoopaaia me

ke aloha ole.  He akolu malama o ko Bodia

Samela paa ana iloko o ua wahi nei,

mamua aku o ko ke keiki alii Hesana hiki

ana aku ilaila.

 

  O ke kumu o ko Bidia Samela paa ana

iloko o ua lua pouli la, no ka manaoia e

na uhane ino, o ua Bidia Samela la ka

mean nana e haawi aku i ka hoopai ino

maluna o lakou, a me na pilikua ai kanaka

a pau o ka aina o na pilikua, no ka

mea, ua kui aku la ka lono o Bidia Samela

ma na wahi a pau, i ke akamai, ka

naauao ma na mea a pau i ao ia e na keiki

o ia mau la, a he akamai hoi me na ano

oihana kaua a pau, a me ka haha ouli o

na wa e hiki mai ana.  Ua oi loa ae kona

naauao i ko ka poe akeakamai e ae a

pau o ka hikina a me na kakaolelo naauao

o Delepi.

 

  A o ke kumu nui no hoi o ka hoopaahao

ia a me ka luku hoomainoino nui ia

o na keiki alii a pau; no kekahi olelo

wanana wale no i wanana mua loa ia i ka

wa kahiko e kekahi kaula kupu o na lahui

Kasimia, penei:

 

" E hoolohe mai e ko ka honua,

Aia no i na wa mahope;

E luku hoomainoino loa ia aku ana, 

Na hoopiopio, na kahuna anaana, a me na kupua,

A me na uhane haukae e noho pu ana me

kanaka,

E  anai loa ia lakou e ka uila, a me ka pahikaua,

A e hooluhelelei loa ia hoi na mana kilokilo

a pau,

E ka ikaika, a me ka mana o kekahi keiki kanaka,

Ka mea i hanauia mai e ka wahine kanaka,

Noloko mai o kekahi o na hanauna alii,

A e lilo ana oia i hooilina no na aupuni eha

o ka honua."

 

  O keia iho la ka wanana i hai mui ia

i ka wa kahiko loa, a ua kaulana ae keia

mau olelo i na wa he mau haneri makahiki

mamua aku.  A iloko o ko Hesana

manawa a mamua iki iho o ia manawa,

aole no i lohe nui ia keia olelo wanana, no

ka mea ua pau i ka make ka poe i

hoomanao mau i ua mau olelo wanana nei,

a ua pau no hoi ka uluku loa o ka manao

o na kanaka no keia mau mea i olelo nui

ia iloko o ia mau la; koe nae ka elemakule

kaula o Mamiona, ka mea i hoola

looihi ia mai i kumu, a i alakai hoi no ke

Keiki Alii Hesana.  A o ka poe magoi e

ae o ka hikina a me na kanaka akamai e

noho ana ma Delepi, a me ka heiau o

Diona ua ike lakou ua kokoke mai ka

manawa e hookoia ai ua mau olelo wanana

nei, nolaila, ua kakali iho lakou me ke

ahonui i ke kokoke io ana mai o ua

manawa la.  Ua ike e no hoi na uhane ino

a pau, a me na pilikua ai kanaka, ua

kokoke mai ko lakou manawa, nolaila

hoopuipui ae la lakou i ko lakou mau puali

kaua, a hoopuni ae la no hoi i na mokupuni

a pau o ka aina uhane me na puali

koa he lehulehu, a o na pilikua ai kanaka,

ua akoakoa ae la lakou ma na piko o na

mauna o Kirakasia, e kiai ai i ka waho o

ke ana o Ugalemugimo, kahi i hoopaahaoia

aku ai o na pio he lehulehu, a me

ke kaikamahine Bidia Samela.  He nui,

a manuunuu wale na mea make i

hoomakaukau ia e na Uhane ma ke alanui,

kahi a Hesana e hele aku ai, aka, o

Hesana aole oia i ike iki i ke ano o na pilikia

e loaahia ia mai ai ia ia, a e like no

hoi me kona poina pu, pela no hoi na Lii

Uhane, aole lakou i manao iki o Hesana

ko lakou enemi ikaika, nana e hoopuehu

aku i ko lakou noho alii ana ma ke kai

a ma ka aina, no ka mea, aole no i kaulana

loa aku ko Hesana inoa mai kona

wa uuku mai a hiki i kona nui ana.  Ua

hanaiia oia, a ua hoonaauao pono loa ia

malalo o ka malama makamae ana a

Mamiona, mai kona manawa uuku mai; a

hiki i ka iwakalua paa o kona mau makahiki,

ua hookuu mai o Mamiona ia ia e

hele e hoomaamaama iloko o na hana luhi

a pau o keia ao, a e ike hoi i ke ano

o na hoouka kaua maoli ana, a e lawelawe

pu he lima a he lima imua o na enemi

he lehulehu i kue mai ana ia ia.

 

  Ua hala na makahiki elima o ko Mamiona

haalele ana ia ia a hiki wale i kona

loaa ana i ka pilikua Ugalemugimo. Iloko

no hoi o ia mau makahiki elima o ko

Hesana noho ana iloko o ke kaona alii o

konamakuakane, ua hoolilo ae kona

makuakane Moi ia ia ka mana e hooponopono

ai i ke aupuni.  A ina wa i hiki mai

ai na kaua kuloko a me na kaua o na aupuni

e, ua alakai kino aku o Hesana i kona

mau wahi puali koa kakaikahi, a ua

hooku ia mai no nae e ka lanakila,

mamuli o ka noeau o kana hana, a me ka

akamai o kona alakai ana.  pela i pii mau

ae ai kona ikaika a me ke kaulana a hiki

wale i ka wa a Anejao i hoao mai ai ia ia;

ke kumu hoi i hiki aku ai oia i ka lua

eehia o ka pilikua Ugalemugimo.

(Aole i pau).