Ka Nupepa Kuokoa, Volume V, Number 52, 29 December 1866 — Ka hana a Kamalii. [ARTICLE]

Ka hana a Kamalii.

O ka la i kapaia o Karisimaka, oia ka la 25 o Dekemaba, a o ka la no hoi i oleloia, (me ka ike ole nae) o ka la hanau ia o ko kakou Haku o Iesu Kristo, he la ia i malama nui ia e kekahi poe. Ma ke ano Ekalesia kekahi hoomanao ana, a ma ke ano ohana kekahi. Ma Geremania, a ma Enelani, a i keia wa, ma kekauwahi o Amerika Huipuia, he la keia i hoomanao ia ma ka haawi makana ana i na makamaka a me na pili kino. O ka nui nae o na makana, ua haawiia e na makua i na keiki, nolaila, ua makemake loa na kamalii ia la. Ua hoomakaukau e ia na makana i ka wa e hiamoe ana na kamalii, a i ko lakou puoho ana, ua loaa no ia lakou ko lakou mau mea milimili. A o kekahi hana, o ke kukulu ia ana ma ke keena maikai he kumu laau uuku maikai mai ke kuahiwi mai, he paina ka mea i imi nui ia no ia hana ; a i ka poeleele ana ae, ua ho-aia ona mau kukui liilii, a kau ma na lala, a o na makana a me na mea ono liilii, oia kekahi mea i kauia maluna i mea e olioli ai na keiki. Ua pili keia i na ohana a me na kula no kekahi. Eia hoi kekahi hoomanao ana i ua la la,—ma ka hoomana ana i ke Akua ; na kekahi mau aoao hoomana keia. He la nui keia no ka Ekalesia Katolika Roma, a ua hoomanao nui ia e ka lala Episikopo o ka Ekalesia. I ke ahiahi a po mamua ae, oia hoi ka po i oleloia ua hanau o Iesu Kristo, ua himeni lakou i mau himeni maikai me na pule i hakuia, me ke kani ana no hoi o na bele i ka hora umikumamalua o ka po. Eia ka makou no keia mau mea :—Ina he makemake ko na ohana e hoomanao i keia la me na mea e hooluolu ai i ka manao o kekahi i kekahi, a e kupu mai ai ke aloha o kekahi i kekahi, ua pono no. Ina he manao aelike ko na kanaka e hoomaha ka hana ma ia la, ua pono no. Ina ua ae-like na lala o kekahi hapa o ka ekalesia e hoomana i ke Akua ma ia la, ua kohu pono no ia hana. Eia nae,—Aole i hiki i ka Ekalesia ke kau kanawai no ia mea, no ka mea, aole i kauohaia ma ka Palapala Hemolele. Aia no i ka manao o ke kanaka. Oiai hoi, aole no i maopopo ka la i hanau ai o ko kakou Haku o Iesu. O ka makou mea keia e hoole loa nei, o ke kukulu ana o ka Ekalesia iaia iho i alii ma ia mea. A eia kekahi :—Ua makemake ole makou i ka hana i hanaia i keia po Karisimaka iho nei,—o ke kani ana o na pu o Puowaina i ka like a like o ka po. Nawai ia mau pu a me na paona pauda? Na ka Ekalesia hoomanao Karisimaka no anei? O kana hana ka ia o ke ki pu! Ina he bele hookani, e aho ia, nawai hoi e hoole? Aka, o keia hoohalulu mai i na puka aniani a me na puka komo, a a me ka honua okoa i waena-konu o ka po, he ku ole ia i ke ano o ko Iesu Krisso hele ana mai i ka honua nei. Heaha ko ke Aupuni ma ia mea? Akahi ua Aupuni hoomanamana! O ka makou dala auhau i haawiia i mea ki pu aloha no na moku manuwa, eia ka he mea hoohalulu mai i ka po, a pau ai ka hiamoe o na makua mea keiki a me ka poe nawaliwali. O kekahi makua a makou i lohe ai, he keiki mai, kona ia po, a nui mai ka pilikia no keia mea hoopau hiamoe. I ka makou nana 'ku, he hana kamalii keia a ke Aupuni. No ka mea, ua pili o Karisimaka i ka ohana a me kekahi mau Ekalesia, aole i ke ano Aupuni o ka honua nei. E ao kakou o henehene ia mai e ko na aina e iwaena o kakou. Akahi no a lohe ia keia hana ma na aina naauao. Aole no i hanaia pela ma Enelani ; ma kekahi mau aina i lilo loa ai ke Aupuni i ke Katolika paha kahi i loheia. Eia hoi ;—Ua pono kekahi mau la hoomaha no na paahana i ekolu paha, eha paha o ka makahiki. Aka, o keia kinikini wale mai o na la hana ole, he mea ia e pono ole ai, a lilo keia aina e like me Mekiko a me Peru. O Iulai 31, o Nov. 28, o Dek. 11, o Dek. 25, o Ian. 1, a heaha la koe! Aole no he kawalawala a koe o na la hana. Oiai he mau Amerika kekahi e manao nui ana i ka [illegible] E malama kakou o lilo i poe [illegible], a o ka [illegible] wale no ka puni o kakou.