Ka Nupepa Kuokoa, Volume V, Number 49, 8 December 1866 — Page 1
KA NUPEPA KUOKOA.
KE KILOHANA POOKELA NO KA LAHUI HAWAII.
BUKE V. HELU 49. HONOLULU, DEKEMABA 8, 1866.
"KA NUPEPA KUOKOA,"
HOOPUKA MAU IA MA HONOLULU
I kela Poaono keia Poaono.
$2.00 no na mahina he UMIKUMAMALUA,
$1.00 no na mahina eono.
ME KA HOOKAA MUA MAI.
NA OLELO HOOLAHA—aole i oi mamua o 10 laina no ka hoopuka hookahi ana, $1.00; alua komo ana, he $1.50; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai. KANIKAU—he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi—penei: he 25 lalani, $1.00; 50 lalani, $2.00; a pela'ku.
NA UKU NO NA OLELO HOOLAHA—ka uku pepa, a me ka uku o ke Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.
O NA UKU PEPA A PAU E HOOKAA MUA MAI NO—aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.
AIA KE KEENA O KA NUPEPA KUOKOA—ma ke kihi hema o ka Hale Hookipa Luina (Sailor's Home.) O na hora hana, ma ka eiwa o kakahiaka, a i ka ha o ke ahiahi. L. H. KULIKA. (Luna Hoopuka.)
KA "NUPEPA KUOKOA."
Is published in Honolulu.
EVERY SATURDAY,
$2.00 per annum, or $1.00 per six months, in advance.
ADVERTISEMENTS not exceeding 10 lines, inserted once for $1.00; twice or $1.50; and $2.00 for one month; all advertisements must be paid for in advance. KANIKAUS will be charged 1.00 per page, or 4 cts. a line.
PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.
ALL SUBSCRIPTIONS must be PREPAID. No names, either of foreigners or natives, will be inserted on the subscription list, until paid for. This rule must be strictly adhered to, on account of the low subscription price.
THE OFFICE OF THE KUOKOA is in the South corner of the Sailors' Home. Office hours from 9 A.M. to 4 P.M. L. H. GULICK.
Publisher.
Volume I, II, and III of the KUOKOA, bound, for sale,
$3.50 each. Persons having complete sets of the above,can have
them bound by paying $2.00 each.
HE MOKU HOLO MAU
No Lahaina, a me Makena.
O KE KUNA KALEPA PAA
maikai,
"Kate Lee."
O Fountain ke Kapena,
E HOLO MAU LOA ANA A HIKI MAI no hoi ma na Awa i olelo ia maluna. No na ukana a me na ohua, e nina i ke Kapena ma ka moku, a i ole ia ia
228-tf C. BREWER &co. (BURUA MA)
No Hilo.
KA MOKU KUNA
"MELE HILO,"
O Sebastian ke Kapena.
E HOLO MAU ANA KEIA MOKU I KE Awa maluna, no na ukana ame na ohua e ninau ia HULIPAHU, (L. L. TORBERT). No Hana, Kaupo, a me Maliko,
KA MOKU KUNA
'MANUOKAWAI,'
O Merchant ke Kapena.
E HOLO MAU ANA KELA MOKU I NA
Awa i haiia maluna. No na ukana a me na ohua, e ninau
ia C. BREWER &co. (BURUA MA)
Olelo Hoolaha
- A KA -
AHAHUI HOOHOLO MOKUAHI
- A -
MOKU MAOLI KULOKO
- O KO -
Hawaii Pae Aina.
KA MOKU KUNA MAIKAI
Alabani,
161 tona, e holo ana i Kawaihae, a me Kona, ma ka Poaono, a mamua ae paha, la 10 o keia malama.
O KE KUNA KALEPA
O Neti Mela
E holo mau ana i Lahaina, a me Maalaea.
No na mea i koe, e ninau ia Kapena Mokina, a i ole ia, ia JANION GREEN & CO.,
211-tf A. H. M. K. H.
Na Buke i Pai ia e ka Papa Hawaii.
Eia na buke kuai, a me ke kumukuai. Baibala nui no na Awai o na Halepule,$400 "
Ohana, ano nui, me na kii, 2 50
a me na Moohana, 5 00
" Ohana uuku iho, me na Moohana, ili ulaula, 1 00
" Ohana, me na Moohana wale no, 62 ½
“ Okoa, 50
Kauoha Kahiko, i paiia i ka M. H. 1838, 25
Kauoha Hou, me ka pepa lahilahi o waho, 12 1/2
Kauoha Hou, hapa haole (Haw. Eng.) 25
Haiao, 25
Hele Malihini Ana, 25
Wehewehehala, 25
Lira Hawaii, 25
No ko ke Akua Ano, 25
Lira Kamalii, 25
Kumumua Hou, 12 1/2
Moolelo Ekalesia, 50
Hoike Palapala Hemolele, 25
Himeni Hawaii me na Leo Mele, 1834, 25
Ninauhoike, 12 1/2
Ui Kamalii no na Kula Sabati 12 1/2
Kumu Leomele 12 1/2
Haawina Kamalii, Buke 1, a me 2, 12 1/2
Haawina Kamalii, Buke elua i huiia 25
Eia na buke i haawi wale ia.
Haawina Baibala.
Ui.
Buke Pope.
Palapala Liilii Helu 4
" " " 6
" " " 7
" " " 11
" " " 16
Ka Davida Malo Kumumanao.
Ka Moolelo o Batimea Puaaiki.
L.H. Kulika.
Kakauolelo o ka Papa Hooko o ka Ahahui Euanelio
o ko Hawaii Pae Aina.
Ka Nupepa Kuokoa.
Mele Kahiko.
"O Hawaii moku o Keawe,"
Pali o kuai lehua i Lehuako-na,
Ke kona hoailona ua,
Aia ke ola i ka Opua,
Ke hii mai la o Lonoopuakau,
He kau leo na ko Akua,
E poloai mai ana e hoi e noho olua,
I ka lulu i kuu aina i Paia,
Me he loko la Wailuku,
Moana hohonu Kealia i ka la,
E haele na iliili a Kaulu.
E huli e pii ai ke alo i uka,
I ke kukui makaneenee,
I ke one wai i Halalii - la, Na wa hale o Maili,
Ili a'la lilo Kaihuanu,
Anuanu a a'la o Puuanuanu,
Lihau kanikau pololei,
E kani mai ana kuakamauna,
He Mauna iluna halaula,
Ke iho la ke ao i Papawai,
Kiai wai anehenehe,
Ke anehenehe ia e hopu,
I na halo lima a Kanaloa - e haliu,
E haliu ke alo i Tahiti,
E hoi i Niukini i ka malie,
O ka malie o Niukini,
O ka la'i kupa oa 'ke hau,
O ka - ua i ka pali hulikua kane,
------ Aloha ------
Aloha wale kamako 'ke hoa,
E maunu ia nei, e malia wale ia nei no e ka leo.
(Aole i pau.
Ka Moolelo o Kamehameha I.
NA S. M. KAMAKAU.
HELU 5.
I ka M. H. 1766. Noho Alii o Kahekilinuiahumanu i Moi no ke Aupuni o Maui. He Alii puni lelekawa, e lele no ia i na pali kiekie loa, e hiki no ke lele i na pali e 360 kapuai ke kiekie, a hiki i ka eha haneri kapuai. Ke waiho nei no kana wahi i lele ai a puni o Maui.
He Alii puni kakau ma ka ili, ua paeleia kekahi aoao o Kahekili mai ke poo a ke kapuai, ua hapalua ia ke kino, he Alii leo hano pilo. He Alii ikaika i ke kanu, a he Alii naauao, a he noonoo, he Alii hakilo i ka po, me ka hoomakaulii i ka po no ka ohumu, no ka olelo ino, no ke kipi. He Alii moe pu ole me na wahine, aia kona wahi e noho ai maluna o na puu, o malaila e kukulu ai kona hale. Mamua o kona noho aupuni ana, ua hanau mai kana mau keiki me kana mau wahine. O kana mau keiki, o Kalanikupule, o Koalaukani, o Kalola, a me Kalilikauoha, o ka makuahine o Kauwahine.O Manono Kauakapekulani, o Luahiwa kona makuahine, ke kaikamahine a Kanealai no Molokai. O Kahekilinuiahunu, nona mai ka inoa Kaahumanu.
O na makahiki o Kahekili i noho aupuni ai no ke aupuni o Maui; he iwakalua kumamahiku, a eiwa makahiki i noho Alii ai no ke aupuni o Oahu, mahope iho o ke kaua anu ma Kaheiki ma Honolulu, i ka M. H. 1,782. I ka M. H. 1766, mahope iho o ka make ana o Kamehameha nui ka Moi o Maui, ke kaikuaana o Kahekili. A ua noho ae o Kahekili ma ka noho Moi o ke aupuni o Maui. Ua oluolu ka noho ana o na'lii malalo o ko lakou Moi o Kahekili. Aka, e noho ana o Keeaumoku ke keiki a Keawepoepoe, a o kona makuahine o Kumaiku, e noho ana oia ma Maui, no ka mea, he mau hoahanau na'lii o Maui nona.
O ke kumu o kona noho ana i Maui, ua kipi no ia Kalaniopuu ka Moi o Hawaii. Ua kipi a noho i ka puu kaua o Pohakuomaneo, aia no ia puu kaua mawaena o Pololu, a me Honokane, aka, ua pii mai o Kalaniopuu ma ke kuahiwi, a ua lawe pio ia ka puu kaua o Pohakuomaneo, aka, ua pakele o Keeaumoku ma kawaa, a ua hookuukuu ia i ka pali, a holo aku i ka moana. Ua kapa ia kela kaua, o Pohakuomaneo, a o Papaihaehae.
I ka noho ana o Keeaumoku me na'lii o Maui, ua hookipa ia me ka oluolu, aka, i kekahi manawa ua kii i ka wahine kapu a ka Moi Kamehameha nui, o Namahana ka inoa, a mahope o ka make ana o Kamehameha nui ka Moi o Maui. Ua hanau o Namahana i kana mau keiki makahiapo me Kamehameha nui, o Peleioholani ka hiapo, a o Kuakini. Mahope o ko Kamehameha make ana, lawe lilo ae la o Keeaumoku ia Namahana i wahine nana, aka, aole oluolu o Kahekili i ka lilo ana o Namahana ia Keeaumoku, ua like no ia me ke kipi i ke aupuni.
I ka lilo ana o Namahana i wahine na Keeaumoku, ua lilo no ke ahupuaa o Waihee ia Namahana, malaila no o Haalou ka makuahine o Namahana me Kekauhiwamoku kana kane, o Kalanikuikapooloku me na'lii o Molokai, o Kumukoa ma kekahi poe Alii e noho ana ma Maui. Ua nui ke kaua ma Molokai ia manawa. Aia ma Molokai o Peleioholani ka Moi o Oahu i ke kaua, a ua lilo ka mokupuni o Molokai iaia.
NO KE KAUA ANA IWAENA O KAHEKILI
ME KEEAUMOKU MA.
Ua ku mai ke kaua kuloko iwaena o ka ohana Alii, o na keiki a Kekaulike Kalanikuihonoikamoku. I ka M. H. 1,765. E noho ana o Kahekili ma Pihana, a ma Paukukalo ma Wailuku me na lii, a me kana mau punahele, a me kana mau aikane, a me kona poe koa o Kaniuula me Kepoouahi. O ka nalu o Kehu me Kaakau, oia kahi luana o na'lii o Wailuku. O ka Nalu o Niukukahi me Aawa kahi kuakahela o na'lii o Waiehu me Napoko. O Palaie me Kahahawai na nalu luakaha o na'lii o Waihee. O ke kumu o ke kaua kuloko, o kekahi kanaka puali koa o Kahanana ka inoa. No ka aoao o Keeaumoku ma ia koa, o kona wahi aina o Kaapoko, he wahi ili aina iloko o ke ahupuaa o Waihee.
Ua hele mau keia kanaka i ka mahiai, a i ke ahiahi hoi i ka hale, ua pulehu kahi
wahine i ka luau, ua haawi na'lii i ka ia i na kanaka a pau, a koe laua nei me kana wahine He aina ia o Waihee i ka wa kahiko, o ka maomao, o ke auau, o ka hee, me ka ohua. O na ia ku, o ka nehu me ka piha. Ua maa ko laua hooneleia i ka haawina ole a na'lii. Olelo iho la na kanaka nei o Kahanana. "I lealea ka ai ana a na'lii i ka ai, a me na laulau, me na hoolua, a me ka ia, ono kana ai ana me na wahine; i ke ka ole ia i ka pohuehue, kaikoo ke awa, popoi ka nalu, aole i ikeia ka poe nana e hee ka nalu." Nolaila, nahu iho la o Kahanana i ka ahuula, o ka mahiole i ke poo. O ka hele no ia a Niukukahi, a make ke kanaka, a hopu hou no o Kahanana, alua kanaka i make ia Kahanana. O ka hoomaka no ia o ke kaua, o ke kaua no ia o na aoao a elua a po ka la. I ka lua o ka la kaua, ua hahana na aoao elua o ke kaua ana, ua hoouka aku, ua hoouka mai ke kaua me ka make o na aoao elua. O Kalaeiliili ka inoa o keia kana, ua hee o Keeaumoku ma me na'lii o Molokai, ma ka auwaa kekahi, a mauka kekahi, ma ke kuahiwi o Lanilili a na Eke, a iho i Kaanapali. O Keeaumoku, o Namahana, o Haalou ma, o Kekuamanoha ma, o Kauhiwawaeono ma, me ka hanauna 'lii a pau, mai Kaanapali a pae ma Molokai.
Ua holo aku o Kahekili mahope e kaua ai ia Keeaumoku ma, ma Molokai, a ua hoouka kaua aku o Kahekili i Molokai. O Kalauonakukui ia kaua, ua hee o Keeaumoku ma, ma ka moana i holo ai a pae ma Hana ka puali hikina o Maui. O Mahihelelima ke Alii Kiaaina e noho ana ma ka puu kaua o Kauwiki. I ka noho ana o Keeaumoku ma, ma Hana, malaila i hanau ai o Kaahumanu ke Alii wahine kaulana i ke au o Kamehameha I, Kamehameha II, a me Kamehameha III. (Mahope iho o ka noho aupuni ana o Kamehameha II, a mamua o ke au ia Kamehameha III, e kakau au i ka moolelo o Kaahumanu, ke ae mai ke Akua, me ka moolelo o Kalanimoku, me ko Keopuolani, a me Ulumaheihei Hoapili.)
NO NA KAUA IWAENA O KALANIOPUU KA
MOI O HAWAII, ME KAHEKILI
KA MOI O MAUI.
O ka M. H. 1,775, 1,776, 1,777, 1,778, a me ka makahiki 1,779. Ua holo mai o Kalaniopuu i ke kaua ma Kaupo i Maui, me kona mau Alii, a me na Kuhina kaua, a me na koa. Ua holo mua mai o Kalaniopuu i ke kaua ma Kaupo, a ua hoomainoino o Kalaniopuu i na makaainana o Kaupo, me ka hohoa ia o ka lae i ka newa. Ua kapaia kela kaua o Kalaehohoa.
I ka lohe ana o Kahekili ka Moi o Maui, e holo mai ana o Kalaniopuu i ke kaua ma Kaupo, me ka hao wale i ka waiwai o na makaainana, malaila hoouna mai la o Kahekili i kekahi puali koa o ka Niuula a me Kepoouwahi. O Kaneolaelae ka mamaka kaua. O Puumaneone me Kapukaauhuhu na kahua kaua, aka, aole i loaa ia Kalaniopuu ia mau kahua kaua, ua hoouka aku no o Kaneolaelae ma na auwaha uwala makai aku o laila, e kupono ana i Kalaeokailio, e uhi ana ka eheu akau o ke kaua i Pahonu, a o ka eheu hema o ke kaua ma ka huli hikina o ka pali o Waipu. O Kaneolaelae, ua huli pono kana kaua i na kawaha e huli ana i Kiei. I ka hoouka kaua ana o na aoao elua, ua lanakila o Kaneolaelae maluna o ke kaua o Hawaii, ua luku mai o Kaneolaelae i na koa o Hawaii, no ka mea, ua pii loa iuka o Kihapuhala, ma Paauhau ke kanu o Hawaii, nolaila ua loihi kahi o ke kaua ana o ka Hawaii. O ka auwaa ka puuhonua o ka Hawaii, aia no i ka lulu o Kalaeokailio. O ke koa kaulana o ka aoao o ka Hawaii, o Kekuhaupio ka inoa. Ua kaohi oia i ka hee ino o ka Hawaii ia la, i ke kupono ana i ka auwaha uala, ua hihiu o Kekuhaupio i ke kalina uala, a hina iho la, aka, ike koke aku la o Kamehameha I i ka hina ana o Kekuhaupio, hoouka koke aku la o Kamehameha ma ka hunapaa o ke kaua, mai make o Kekuhaupio ia la, ina aole e kokua o Kamehameha iaia, aka, ua hee aku o Kalaniopuu ma, a kau iluna o ka auwaa. Ua luku aku o Kaneolaelae i ka Hawaii a hiki i Kalaeokailio. Oniu ae la oia i kana laau kana, e hoike ana i kona lanakila maluna o Kalaniopuu ke Alii o Hawaii. Ua kapaia kela kaua ana o Kalaeokailio. O ke kaua mua keia o Kamehameha i kaulana ai i ke koa, o ka hoopakele ana i kana kumu koa, a me koaa kumu nana i ao i ke kakaolelo, a me ka oihana kahuna. Ua kapa aku na'lii me na koa o Maui, o kahi aikane koa a Kalaniopuu o Paiea.
Ike iho la o Kalaniopuu ua hoohoka ia oia e na koa o Kahekili, nolaila, hoi akula o Kalaniopuu i Hawaii me ka manaoino ia Kahekili. Hookahi makahiki okoa o Kalaniopuu i hoomakaukau ai i na lako kaua, eono moku o Hawaii, eono Alii pukaua, eono poe kaua. O na poe kaua i kapaia he I, he Ahu, he Mahi, he Palena, he Luahine, he Paia. O ke kaua Alii, oia ka poe i kapaia he Keawe; kapa aku la o Kalaniopuu i na koa Alii aialo, o lakou ka poe oi o ke koa, kapa aku la i ko lakou inoa o na Alapa, a me na Piipii. Hoala ae la o Kalaniopuu i na hale o kona mau akua o Kaili, o Ohiamukumuku ma Kahaluu, a o Keikepuipui ma Kailua, he mau Haiau e ku ai kamakaia, a e make ai ka Moi o Maui. O Holoae ke kahuna a Kalaniopuu, he kahuna o Holoae no ka papa kahuna a Paao, a o na moopuna a Holoae, oia no o Puou, a o Hewahewa. I ka lohe ana o Kahekili ka Moi o Maui, e imi ana o Kalaniopuu i ku kamakaia ia Kahekili, nolaila, kii aku la o Kahekili ia Kaleopuupuu, oia kekahi kahuna a Peleioholani, aka, ua make o Peleioholani ia wa. O ke kahuna o Kaleopuupuu, he kahuna oia no ka papa kahuna o Kaekae a me Maliu, a me ko Malela. Hoala ae la o Kahekili ma ke kuhikuhi a Kaleopuupuu i ka hale o ke akua. O Kaluli ka Haiau, aia no ma Puuohala, ma ka aoao akau o Wailuku.
I ke kukulu ana a paa, i ke kukulu ana o ka ohiako, i ke kakai ana o ka aha, a maikai, olelo mai la o Kaleopuupuu ia Kahekili ka Moi. "O ka hale keia o ko akua, wahi ka makaha na ka ia no e pii."
I ka M. H. 1,776. Holo mai la o Kalaniopuu me na'lii o Hawaii, i ke kaua ma Wailuku, me ka Moi Kahekili o Maui, he kaua huliamahi no Hawaii a puni. I ka holo ana o Kalaniopuu me na'lii, a me na Kuhina kaua, a me na koa, me na puali, a me na maka kaua, a pae iho la ma Keoneoio, a hiki i Makena ma Honuaula, ua nui loa ka auwaa i piha i na koa. O na makaainana o Honuaula, ua hao ia ka waiwai, ua luku wale ia, a ua auhee i ka nahelehele me ka pilikia. I ka lohe ana o Kahekili ua hiki mai ke kaua i Honuaula, hoomakaukau iho la o Kahekili i kona mau Alii, a me kona mau koa, ka poe lima hema e maa aku ai i ka lauoho a me ka pua mauu aole e hala.
Anoai o na Aui!
I unuhiia mai loko mai o na Kaao a Wiliama
Hoonaueueike (William Shakespeare.)
I kela wa nae a ke kanaka hana gula i hiki hou aku ai ma kahi a laua i huipu ai me Anetipoli o Surakuse, aia hoi, halawai pu iho la oia me Anetipoli o Epeso, ma kahi no a laua i huipu ai me Anetipoli o Surakuse. Ia wa no nae, nonoi koke aku la ke kanaka hana gula no ka uku o ke kaula gula ana i haawi aku ai ma kona lima.
A lohe o Anetipoli no keia mea, kuemi hope iho la kona manao me ka haohao ana. A no ka mea no hoi, aole io no ua kanaka nei i haawi aku i ke kaula gula i keia Anetipoli, nolaila, hoole mai la no o Anetipoli, me ka i aku, "aole au kaula gula i haawi mai ia'u, aole no hoi wau i ike i kau mea e hana mai nei ia'u, aka, ua kauoha aku no nae au ia oe e hana, aka, aole nae wau i ike ia mea a hiki i keia mau minute a kaua e kamailio nei."
A o keia hoole ana aku a Anetipoli, alaila, kunahihi iho la ka manao o ka mea hana gula, a pane mai la oia, "ua haawi aku no au i ke kaula gula iloko o ka poho o kou lima, iloko hoi o kekahi mau minute pokole i hala ae mahope."
A no keia mea, ala mai la ka hoopapaa inoino mawaena o laua no kekahi manawa loihi. E kuhi ana kekahi oia ka pono, a pela no hoi kekahi. Oiai nae laua e hoopaapaa ikaika ana, huki ia aku la ke kanaka hana gula e ka Makai, a lawe ia aku la i ka halepaahao e hoopaaia'i, a pela no hoi o Anetipoli.
Oiai no hoi o Anetipoli o Epeso e alakai ia ana i ka halepaahao, halawai pu mai la me ia o Doromio o Surakuse, ke kauwa a kona kaikaina; a i kona ike ana aku ia ia, kuhi iho la oia o kana kauwa no keia, nolaila, haawi aku la oia i ka olelo kauoha ia ia, e hoi aku oia i kana wahine ia Aderiana, e haawi mai i na dala kupono e hiki ai oia ke hookuuia mai ka halepaahao aku. Kahaha koke iho la no hoi o Doromio i ka hoouna koke ana mai a kona haku, no ka mea, ua kuhihewa aku la no hoi o Doromio o kona haku no keia, oia hoi o Anetipoli o Surakuse i ka hale malihini ia ia nei, i kahi hoi a kona haku i ai ai i ka aina awakea. A no ka hikiwawe loa o ko ia la manawa e hele ai me ka hookaulua ole ia iho e na makai nana e lawe ana i ka halepaahao, nolaila, aole e hiki ia Doroimo ke kamailio aku ia manawa, no ka mea, i hoi mai oia e hai aku i kona haku no ka makaukau o ka moku no ka holo; a no ko Doroimo ike ana aku no hoi kekahi, aole hiohiona apiki kai luna ona, aka, ua kahakaha ia ke alina o ke kaumaha a me ke kuoo ma kona mau papalina, nolaila, huli ae la oia a hele aku la e nalu ana iloko ona iho i ka i ana, "E hele io ana au i ka hale o Aderiana, kahi e loaa mai ai ka uku panai no kana kane, no ka mea, he pono i na kauwa ke hoolohe i na kauoha a pau a ko lakou mau haku."
Ia ia i hiki ai i ka hale o Aderiana, a hai aku la oia i na huaolelo, alaila, haawiia mai la ma kona lima he eke gula e like me ke kauoha a kona haku. Huli hou ae la o Doromio a hele aku la mahope o kahi i alakaiia ai o kona haku i ka halepaahao; a oiai oia e hooma ana i na kaina o kona mau wawae me ka mama, halawai mai la ka ike a hona mau maka i kona haku, oia hoi o Anetipoli o Surakuse.
Oiai o Anetipoli o Surakuse e ku ana me ke ano pahaohao loa no na mea a pau i halawai mai me ia ma ke alanui ana i hele mai ai, no ka mea, aloha mai la kekahi poe ia ia, me he mea ua kuluma mau ia ka launa ana; a o kekahi poe hoi, haawi mai la i ke dala ia ia, me ka i mai, "O ka'u uku keia ia oe no ke dala a'u i aie ai ia oe." A o kekahi hoi, kauoha mai la e hele aku e ike ia lakou;a o kekahi, hoomaikai mai la ia ia nei, no ka ia nei mau hana aloha ka ia lakou. A hoikeike mai la kekahi tela humu lole, he mau lole silika ana i kuai ai, me ka hoike pu mai i ke ano o ko ia nei lole komo ana i hana mua ai. O keia mau kuhihewa a pau i hana ia mai imua ona, no kona kaikuaana wale no, ka Anetipoli hoi o Epeso.
A puka au la na hoomanao ana maloko o ko Anetipoli naau, eia ka oia iwaena o ka lahuikanaka kilokilo, a me ka hoopiopio: a, aole no hoi o Doromio i kakali a akakuu lea iho na manao pahaohao o kona haku, no ka mea, hoopuka e mai la no kela i ka ninau ana ia ia i ke kumu o kona hookuuia ana mai e na makai nana e kai ana ia ia i ka halepaahao, me ka waiho pu mai hoi i ka eke gula ana i lawe mai ai mai a Aderiana mai, i mea e uku aku ai, i hemo mai oia mai ka halepaahao mai. O keia mau olelo a Doromio, no kona kaiia i ka halepaahao, a no keia eke gula hoi ana i lawe mai ai mai a Aderiana mai, ka mea nana i hoomahuahua loa mai i ko ia nei kupilikii, a hoopu-a ae la ia i ka i ana, "O keia wahi Doromio io no ka mea nana au e hoauwana nei, a e hoolualele nei ia maua i kela wahi keia wahi." Kahea ae la ia me ka leo nui, "Na kekahi mana i hoonaniia e hoopakele mai ia maua mai keia wahi malihini aku."
Ia manawa no, hiki ana kekahi wahine ano malihini ia ia nei, a kahea ana ia ia nei ma ka inoa Anetipoli, me ka i mai, o laua pu kai ai i ka ainaawakea o ua la nei ma kona hale, a ua hoohiki aku keia e haawi aku ia ia i kekahi kaula gula. A lohe o Anetipoli no keia mea, aole nae e hiki ia ia ke hoomanawanui iho, i ke kapa ana mai ia ia he wahine kilokilo, me kona hoole pu mai, aole laua i ai pu iki ia ainaawakea, aole no hoi oia i olelo iki no ke kaula gula, a he ole loa no, aole oia i ike iki i keia wahine, a akahi wale iho la no ia manawa. Aka, hoopaa aku la no ua wahine la no ko laua ai pu ana, a me kona hoohiki pu ana aku, e haawi ia ia i kekahi kaula gula, a oia kona kumu i haawi ai i kona komo lima kumukuainui ia ia. A hoomaka mai la oia e nonoi no kona komo e hoihoi aku.
No keia mea i aui loa ae ai ko Anetipoli noonoo kanaka, a kapa hou mai la ia ia he wahine kilokilo a me ka anaana, a hoole loa mai la aole oia i ike i kona komo a me na mea a pau i hanaia iwaena o laua me ka wahine. A holo aku la oia mai ka wahine aku, me ka waiho iho i ka wahine e kahaha no kana mau olelo a me ke okalakala o ko ia nei nanaina.
A! o keia wahine pu no hoi kekahi i haulehia iloko o ke kuhihewa e like me ko Aderiana, a me ka nui o na poe i launa mai me ia, e kuhi ana no, o Anetipoli no keia o Epeso. No ka mea, i ka wa i hooleia mai ai ko Anetipoli o Epeso komo ana aku iloko o kona hale, mamuli o ke kuhihewa o Aderiana, a me ko loko a pau o ka hale, o Anetipoli no keia o Epeso a lakou e ai pu nei ia wa, nolaila, wela iho la kona huhu no Aderiana, a hele aku la oia ma kahi o keia wahine e paina ai no kona houpolewalewa, a i kona hiki ana kau, ua hookipa ia aku oia e ka wahine me ka oluolu loa, ua ai no a lawa, ua inu hoi a kena; a no keia mea i hoohiki pu aku ai o Anetipoli e haawi ia ia i ke kaula gula i alana aloha, a i mohai no ke kahua pau ole i ke ana ia, ka mea hoi a Anetipoli i manao mua ai, i kaula gula o no kana Aderiana aloha aka, i ka la o ka inaina, ua moku ae la na lihi oia manao, a ua lilo i ka wahine e iloko o na hora hoohialaai a kaunu hoi; a o ua kaula gula nei, eia no ia ia Anetipoli o Surakuse, ka mea a ka hana gula i haawi hewa ai iloko o ko ia nei lima.
A no ka oi nui loa ana o ka makemake i ka lohe ana, he kaula gula ka mea e makana ia aku ana ia ia, nolaila, unuhi ae la oia i kona komo lima kumukuai nui a haawi ia Anetipoli o Epeso; aka hoi, i kona hiki ana mai imua o keia Anetipoli, ua hoohoka ia oia mamuli o ka hoole ana aku a Anotipoli, aole i ike ia ia, a me ka hooneleia ana hoi i ke kaula gula, -ka ole ia ana aku o kona komo, a me ka holo ana mai ona kau, me ka haalele iho ia ia e maewaewa i ke alanui, ka mea nana i hookomo mai i keia manao, ua hehena ia o Anetipoli, a wikiwiki koke aku la ia i ka hale o Aderiana, e hai aku ia ia, ua pupuleia kana kane.
A oiai ua wahine nei e kamailio pu ana me Aderiana, hiki ana o Anetipoli o Epeso me ka Luna o ka halepaahao.