Ka Nupepa Kuokoa, Volume V, Number 42, 20 ʻOkakopa 1866 — Page 1
KA NUPEPA KUOKOA.
KE KILOHANA POOKELA NO KA LAHUI HAWAII.
BUKE V. HELU 42. HONOLULU, OKATOBA 20, 1866. NA HELU A PAU 255.
"KA NUPEPA KUOKOA,"
HOOPUKA MAU IA MA HONOLULU
I kela Poaono keia Poaono.
$2.00 no na mahina he UMIKUMAMALUA,
$1.00 no na mahina eono.
ME KA HOOKAA MUA MAI.
NA OLELO HOOLAHA—aole i oi mamua o 10 laina no ka hoopuka hookahi ana, $1.00; alua komo ana, he $1.50; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai.
KANIKAU—he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi—penei: he 25 lalani, $1.00; 50 lalani, $2.00; a pela'ku.
NA UKU NO NA OLELO HOOLAHA—ka uku pepa, a me ka uku o ke Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.
O NA UKU PEPA A PAU E HOOKAA MUA MAI NO—aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.
AIA KE KEENA O KA NUPEPA KUOKOA—ma ke kihi hema o ka Hale Hookipa Luina (Sailor's Home.) O na hora hana, ma ka eiwa o kakahiaka, a i ka ha o ke ahiahi. L. H. KULIKA. (Luna Hoopuka.)
KA "NUPEPA KUOKOA."
I s published in Honolulu.
EVERY SATURDAY,
$2.00 per annum, or $1.00 per six months, in advance.
A DVERTISEMENTS not exceeding 10 lines, inserted once for $1.00; twice or $1.50; and $2.00 for one month; all advertisements must be paid for in advance. KANIKAUS will be charged 1.00 per page, or 4 cts. a line.
PA YMENTS FOR ADVERTISEMENTS, Subscriptions or Kanikaus, ma y be paid to any of the Agents of the Kuokoa, or may be enclosed in a letter to the Publisher.
ALL SUBSCRIPTIONS must be PREPAID. No names, either of foreigners or natives, will be inserted on the subscription list, until paid for. This rule must be strictly adhered to, on account of the low subscription price.
THE OFFICE OF THE KUOKOA is in the South corner of the Sailors' Home. Office hours from 9 A.M. to 4 P.M. L. H. GULICK. Publisher.
Volume I, II, and III of the KUOKOA, bound, for sale, $3.50 each.
Pe rsons having complete sets of the above, can have them bound by paying $2.00 each.
HE MOKU HOLO MAU
No Lahaina, a me Makena.
O KE KUNA KALEPA PAA
maikai,
"Ka te Lee."
O Fountain ke Kapena,
E HOLO MAU LOA ANA A HIKI MAI
no hoi ma na Awa i olelo ia maluna. No na ukana a me
na ohua, e nina i ke Kapena ma ka moku, a i ole ia ia
228-tf C. BREWER &co. (BURUA MA)
No Hilo.
KA MOKU KUNA
"MELE HILO,"
O Sebastian ke Kapena.
E HOLO MAU ANA KEIA MOKU I KE Awa maluna, no na ukana ame na ohua e ninau ia
HULIPAHU, (L. L. TORBERT).
No Hana, Kaupo, a me Maliko,
KA MOKU KUNA
'MANUOKAWAI,'
O Merchant ke Kapena.
E HOLO MAU ANA KELA MOKU I NA Awa i haiia maluna. No na ukana a me na ohua, e ninau ia C. BREWER &co. (BURUA MA)
Olelo Hoolaha
- A KA -
AHAHUI HOOHOLO MOKUAHI
- A -
MOKU MAOLI KULOKO
- O KO -
Hawaii Pae Aina.
KA MOKU KUNA MAIKAI
Ala bani,
161 tona, e holo ana i Kawaihae, a me Kona, ma ka Poaono, a mamua ae paha, la 10 o keia malama.
O KE KUNA KALEPA
O Neti Mela
E holo mau ana i Lahaina, a me Maalaea.
No na mea i koe, e ninau ia Kapena Mokina, a i ole ia, ia JANION GREEN & CO.,
211- tf A. H. M. K. H.
J. W. KEAWEHUNAHALA.
Loio! Loio!!
O KA POE MAKEMAKE I LOIO E KOKUA ma ka Hoopii ana, a pale ana ma ke Kanawai imua o o na Aha Hookolokolo o keia Aupuni, e kii koke i ka mea nona ka inoa e kau ae la maluna ; a e loaa no oia ma kona Hale noho i
Kikihale,
ma uka o kahi o J. KAHAI Esqr., a i ole ia, e loaa no ma ka Hale Hookolokolo i Honolulu, Oahu. Honolulu, Feb. 9, 1866. 219-1y
Na Buke i Pai ia e ka Papa Hawaii.
Eia na buke kuai, a me ke kumukuai. Baibala nui no na Awai o na Halepule, $4 00
" Ohana, ano nui, me na kii, 2 50
a me na Moohana, 5 00
" Ohana uuku iho, me na Moohana, ili ulaula, 1 00
" Ohana, me na Moohana wale no, 62 1/2
" Okoa, 50
Kauoha Kahiko, i paiia i ka M. H. 1838, 25
Kauoha Hou, me ka pepa lahilahi o waho, 12 1/2
Kauoha Hou, hapa haole (Haw. Eng.) 25
Haiao, 25
Hele Malihini Ana, 25
Wehewehehala, 26
Li ra Hawaii, 25
No ko ke Akua Ano, 25
Li ra Kamalii, 25
Kumumua Hou, 12 1/2
Moolelo Ekalesia, 50
Hoike Palapala Hemolele, 25
Himeni Hawaii me na Leo Mele, 1834, 25
Ninauhoike, 12 1/2
Ui Kamalii no na Kula Sabati 12 1/2
Kumu Leomele 12 1/2
Haawina Kamalii, Buke 1, a me 2, 12 1/2
Haawina na Kamalii, Buke elua i huiia 25
Eia na buke i haawi wale ia.
Haawina Baibala.
Ui.
Na Dawida Malo Kumumanao.
Ko Olelo Ao Liilii.
Ka Moolelo o Batimea Puaaiki.
L. H. Kulika.
Kakauolelo o ka Papa Hooko o ka Ahahui Euanelio o Hawaii.
Ka Nupepa Kuokoa.
Mele Kahiko.
Kilikili noe makani aloha Kaala,
Nae waiopua lalo o Maunauna,
Ka noenoe ua make wale i ke anu,
Hooluelue i Malamanui,
Na lehua o Mokoehemo,
O pule e ua komo pu i ke hau e,
Maikai no.
Komo ana ka laula o Malama,
Ke ake o kokoloea, ua lena i ka ua Helemano,
Ahea ka au liuliu kaawale,
Waiho e ka luhi,
Waiho no.
Waiho ke aloha i loko,
He aha kana,
He ao wale no ka po i ka oni-ia,
No oe ia a me he mea o moa le,
NA KALANIKUPULE.
Ma molo oha ohia pelau ke koa,
Ka palau lino o ka lauki,
Oho helu noni ino no ke kaunoa,
Ka wiliula i ka lau o ke kukui,
Hihia ku no ka lau awapuhi,
He aha la ia na lena i opalie,
Maikai no.
Ololo i kuaka hele kahela uk'e,
Huli aku huli mai ka ama-u,
E hohoi e pulolou a'u lehua,
Ka lehua maka piipii lau kalakala,
I ka lole kaonohi o kela paa kela,
Maikai no ia pua o kuu kane,
Kane no.
O kuu kane pahaohao i ka moe,
Ke kiu-a mai nei au me he ipo la,
Auhea hoi ka maka pili a kaua le,
No oe ia'u me he me o moa le,
NA KAKAE.
Ka Moolelo o Kamehameha I.
NA S. M. KAMAKAU.
O ko Kamehameha I., manawa i hanau ai, he manawa kaua nui ia o na'lii o Hawaii, mahope iho o ka make ana o ka Moi o Hawaii, o Keawekahialiiokamoku.
O Moku ka Moi o Hilo, me Hamakua, me kekahi hana o Puna. O Keeaumoku ka Moi o Kona, me Kohala.
E noho ana o Alapai Nui a Kauaua i Maui, me Kalanikuihonoikamoku ka Moi o Maui, he kaikunane hoi no Kekuiapoiwa Nui, ka Moi wahine.
A lohe oia ua kauoha ke Aupuni o Hawaii pela, manao iho la o Alapai e kaua i kela mau Alii o Hawaii.
Hoi aku la o Alapai i Hawaii i ke kaua, a ua lanakila o Alapai maluna o nalii o Hawaii, a ua luku ia na'lii o Hawaii, a ua hui ia i hookahi Aupuni, malalo o Alapai.
Ua lawe o Alapai ia Kalaniopuu, a me Keoua, i mau keiki, a i mau mahana koa alihikaua nona. O Kekaulike, oia no o Kalanikuihonoinamoku, ka Moi o Maui.
E noho ana oia ma Kaupo, e kukulu ana i mau luakini no kona mau akua.O Kanemalohemo ma Popoiwi, o Loaloa, me Puumakaa, ma Kumunui me Pohoula, oia na hale mamala koa.
He Alii puni kaua o Kekaulike, a ua holo aku la oia ma Hawaii e kaua ai. Ma Kona i Hawaii kahi i hoomaka ai o ke kaua me Alapai, he kaua huliamahi ia o na aoao elua.
Ua kua ia ka ama o na aina o Kona e Kakaulike. Aka, ua hee o Kekaulike i ka moana ia Alapai. Aka, ua hoomaewaewa wale o Kekaulike i na makaainana o Kekaha. Ua pau i ke kua ia ka uluniu o Kawaihae. O na makaainana o Kohala, ua luku ia me ka hao wale ia o na waiwai, a pela oia i hoi ai i Maui.
I ko Alapai lohe ana i kahana hoomainoino a ke Alii o Maui, i na makaainana o Hawaii. Hu ae la ke aloha iaia, a manao iho la o Alapai, e holo ke kaua i Maui.
Nolaila, hoolohe aku la o Alapai i na Alii, a me na kaukaualii, a me na puali, a me na koa.
Eono moku o Hawaii, eono Alii aimoku, eono poe kaua, eono waa lau kaua.
M Kailua, i Kona, Hawaii, ko Alapai wahi i noho ai, me kona poe Alii. He Alii koa o Alapai, ua aneane e holookoa ke Aupuni iaia, mai Hawaii, a Oahu.
Eia ke kumu o ka hu ole malalo ona, he Alii aloha ohana Alii, a aloha makamaka. Ua pili oia i na Moi o Maui, a me na Moi o Oahu.
Ua lohe paha oukou i na kaua a Alapai ma Maui, a ma Kawela.
I ka makaukau ana o ka holo mai o ka Moi o Hawaii o Alapai, i ke kaua ma Maui. Holo mai la o Alapai me na'lii, a me na alihikaua, a me na poe kaua ma na waa kaulua, a ma na waa kaukahi, he kaua huliamahi no Hawaii, no ka holo ana i ke kaua i Maui.
Ua hoomoanaia ka auwaa kaua ma ka pae ana ma Kohala, mai Koaie, a hiki i Puuwepa.
Ua pae ka Moi o Hawaii, me na'lii, ma ke awa o Kapakai, ma Kokoiki, e pili ana me Upolu. E kokoke ana i ka Haiau, Luakini a Paao, o Mookini ka inoa, ma ka aoao akau o Kohala.
I ka lua o ka po malaila, ua nahunahu iho la e hanau o Kekuiapoiwa i ke keiki, o ko Hawaii Kekuiapoiwa no keia, ke kaikamahine a Kekela, laua o Haae. He okoa o Kekuaipoiwa Nui o Maui, ka makuahine o Kahekili ma.
He po ua nui loa ia, a ua pilikia kahi e hanau ai, ma kahi lanai e pili pu ana ma ka hale hookipa, malaila i nahunahu ai.
Ua nui ke kiai ia no ka manawa e hanau ai, ua ala na'lii, me ka poe kiai poo, a no ka nui o ka ua, me ke anu, ua hoi na'lii e hiamoe, a i ke kokoke i ka pili o ke ao, ua hoi pu aku no o Kekuiapoiwa iloko o ka hale, a huli mai la kona alo I ka paia o ka hakala, a keehi mai la kona wawae i ka paia.
Ua hiki mai la kekahi kanaka malihini mawaho o ka hale, e hoolohe, a i kona lohe pono ana i kaili o ke kuakoko, hapai mai la oia i ka hua o ka paia o ka hale, a hakahaka iluna, o ka hemo mai la no ia o ke keiki, a kau pono iluna o ke kapa i uhola ia e na kanaka nei.
Ku ae la o Keuiapooiwa iluna, a hemo aku la ke ewe, uhi mai la ua kanaka nei i ke kapa, a lilo akula ua keiki nei.
I ke ala ana o na'lii, haohao iho la lakou, ua lilo ke keiki. I ke ao ana ae, ua huli ia o Kohala, me ke puhi ia o kauhale.
O ke kanaka nana i aihue ke keiki, oia no o Naeole, ke Alii o Kohala, a he makemake kona e lilo iaia ke keiki Alii, a e lilo oia ke kahu, a he hookapuni no ke Alii.
O ke keiki i lawe huna ia oia no o Kamehameha I.
NO KA HANAU ANA O KAMEHAMEHA.
Ua hanau o Kamehameha I ma Kokoiki ma Kohala, i ka A. D. 1736. O Kekuaipooiwa ka makuahine, ke kaikamahine a Kekela w, me Haae, no ka ohana alii o Hawaii.
O ka makuakane o Kamehameha, oia no o Keoua, ko Kalaniopuu kaikaina, no ka mea, hookahi no o laua makuahine, o Kamakaimoku.
Ma ka nani o na'lii, ma ke ano kahiko o ko Hawaii noho ana; oi aka haawi ana i ke keiki na ka Moi o kekahi Aupuni. He nui ka olelo ia, o Kahekili ka makuakane o Kamehameha, oia ke keiki a ka Moi o Maui, no ka mea, he he mau hoahanau na 'lii o Hawaii, no na 'lii o Maui.
Ua olelo ia, oia ke kumu i hoonoho ia ai o Kameeaumoku me Kamanawa, he mau mahoe kapu laua na Kekaulike, ka Moi o Maui, e noho i Hawaii no ke keiki a Kahekili.
Ma ke mele a Keaka, ka Moi wahine, ka Alapai wahine ia, ka Moi o Hawaii. Ua olelo ia o Ikuwa ka malama i hanau ai o Kamehameha, penei.
"He ua lokuloku no Ikuwa ke 'lii."A penei hoi kekahi; ke olelo ia he ua, he hekili, a he uila ka po i hanau ai o Kamehameha.
Ua maopopo paha o ka malama o Ikuwa, oia ka malama a ka ua, me ka hekili, a me ka uila. Oia ka malama o Feberuari, a me ka hapa mua o Maraki paha.
No ka pilikia o Keuiapoiwa no ka hanau i kana keiki makahiapo, nolaila, aole i holo pu i ke kaua me ka Moi me Alapai i Maui.
Mahope iho, ua lohe ia ka mea nana i lawe ke keiki, oia hoi o Naeole.
Nolaila, ua haawi ia o Naeole ke kahu hanai o ke keiki. Ua hoonoho aku o Kalaniopuu i kona kaikaina ia Kekunuialeimoku, i makua hanai no ke keiki.
O Halawa, he Ahupuaa ma Kohala loko, oia ka aina i hanai ia ai o Kamehameha, mai kona hanau ana a hiki i ka lima paha o kona mau makahiki, alaila, hoihoi aku la o Naeole ia Alapai, i ka Moi o Hawaii, i ke keiki. Nolaila, haawi aku la o Alapai na Keaka e hanai, oia hoi ke kahu Alii nui o ke keiki.
NO KA MOI KEKAULIKE.
I ka hoi ana mai o ka Moi Kekaulike, ke Alii o Maui, mai ke kaua ana ia Hawaii, a me ka luku wale ana i na makaainana o Kohala, a me ka hao wale i ka waiwai.
I kona noho ana ma Mokulau, i Kaupo, a e ka manao e holo hou i ke kaua ma Hawaii, a e hao wale ma Waipio, me Hamakua, me ka manao e hookaumaha wale aku i ko laila poe Alii, me na makaainana.
Aka, ua haawi mai la ke Akua i ke kumu e hiki ole ai i Kawaii. Ua loaa mau he mai ikaika loa iaia, he mai huki, oia hoi o Kamakahukilani.
Ua lapaau na kahuna lapaau aole e ola. Nolaila, i Mokulau ma Kaupo, kauoha ka olelo hooilina Aupuni. O Kamehameha Nui, ke kaikuaana o Kahekili, oia ma ka noho Moi ma ke Aupuni o Maui. Aka, he Alii keiki nui o Kekaulike me na wahine, a me na hana wahine. O Kauhiaimokuakama ka hiapo, me Kahawala w. O Manuhaaipo; o Kekauhiwamoku me Kaeoa na Holau w. O Kamehameha Nui, o Kalola, o Kahekili, me Kuhouheiheipahu, na Kekuiapoiwa Nui w. O Namahana, o Kekuamanoha na Haalou.
Aka, ua lilo ka hooilina Aupuni ia Kamehameha Nui, ma ke kauoha a ka Moi Kekaulike. Ua oi ke Alii ana o ia ohana; mamua o ke Alii ana o ka nui o kana mau ohana Alii keiki.
Noloko o ia ohana Moi, hooilina Aupuni o Maui, me ka hooilina Aupuni o Hawaii ma ke kauoha a ka Moi Kalaniopuu, ma Waioahukini, i kana keiki i ka hooilina Aupuni ma o Kiwalao la. Oia hoi o Kamehameha II, me Kamehameha III, no ia mau ohana Moi elua.
I ka lohe ana o Kekaulike, aia ma Kohala ka Moi o Hawaii, e holo mai ana I ke kaua ia Maui; alaila, makau iho la oia, a hopuhopualulu iho la ka holo maluna o kona mau waa kaua o Keakamilo, e hoi ma Wailuku. Aole i pau.
He wahi Kaao no Ioane.
HELU 1.
E na makamaka, mamua ae o ko oukou heluhelu ana i keia Kaao, he mea pono ia'u e waiho mua ae i wahi olelo hoakaka, oia hoi keia. Ua lawe nui wau I keia Kaao mai ka waha mai o kekahi Paniolo, a o Keoni Huana kona inoa, oiai oia e kaao ana ia makou. A ma kana olelo mai, ua ike oia i keia Kaao maloko o kekahi Buke. A me he mea la, ina he oiaio kana olelo ana, alaila, aole no hoi paha e ole ka loaa o kekahi o ia Buke i kekahi mea ma ko Hawaii Pae Aina, a e pane mai no auanei lakou no ka lalau o keia hoopuka ana, mahope iho o ka pau ana o na Haelu o keia Kaao. Me ka lana no nae hoi o kuu manao, e haulehia ana no kakou i ka olioli no keia Kaao, a nolaila, i mea hoi no'u e hala ole ai ma keia kamailio ana, nolaila, ke hoopuka nei au i na Kaao nei, a oia hoi keia malalo iho.
He kanaka koa o Ioane, he kiai puka no ka Hale Alii o Hula Geradine, ka Moi hoi o Guatemala. He elima mau makahiki ko Ioane noho ana ma ke kiai puka no ka Hale Alii, a o kona uku ia wa, hookahi no wahi keneta no ka la; a ma ia uku no oia i hoomanawanui iho ai a hiki wale i kona wa i lilo ai i Luna kuau mea ai no ka Hale Alii.
Ia Ioane nae ma ka ipuka o ka Hale Alii, ua ike pinepine ia kana mau hana maikai e na kanaka a me na kamalii. I ka wa o ka huakai e maalo ae ai ma ka puka pa o ka Hale Alii, e haawi pakahi aku no o Ioane i hookahi keneta i kela a me keia mea e noi mai ana iaia.
A no ia mau hana maikai ana, a ma ke kamailio ana hoi, nolaila, ua loaa iaia ka mahalo nui ia. A ma ia mau ano hoi ona, ua hoolilo ia ae oia i Luna kuai mea ai no ka Hale Alii. A ia ia i lilo ae ai i Luna kuai mea ai no ka Hale Alii, ua hoopiiia ae kona uku, oia hoi, eono keneta no ka la hookahi. He mau makahiki elima kona noho ana ma ia oihana, a ua nui loa hoi ka aie o ka Moi iaia.
A no keia aie nui ana, noonoo nui iho la Moi Hula Geradine, i wahi e pau ai kona aie ia Ioane. A hala he mau la o kona noonoo ana no ia pilikia i ili mai maluna o ka Moi, aia hoi, komo aku la ka Pauku Nui o ka Hale Alii e ike i ka Moi. A iaia nae i komo aku ai ma ka rumi hooluana, e waiho mai ana ka Moi malalo o ka papakaukau, iluna hoi o ka papa hele o ka Hale Alii.
I ka manawa nae a ua Puuku Nui nei i ike aku ai, wikiwiki aku la oia a hoola ae la i ka Moi iluna, me kona olelo iho. "E ka Moi, heaha keia mea au i hana iho nei, i haule ai oe ika hiamoe nui ma kahi aole i ae ia nou?"
A hikilele ae la ka hiamoe o ua Moi nei, a kaakua ae la kona mau maka, aia hoi, e hapaiia ana oia e kona Puuku Nui, ka Luna nui hoi o kona Hale Alii. Pane ae la nae ua Moi nei i kona Puuku, "Aole no wau i manao e hiamoe ana ma keia wahi, aka nae, he mau la mamua iho nei, komo aku la wau ma ke Keena o ke Kakauolelo Nui, a ike iho la au ma kaua Buke hoomanao, ua haulehia wau i ka aie nui ia Ioane, ka Luna kuai mea ai hoi o ka Hale Alii nei. A ma keia mea, noonoo nui iho la wau i kela la keia la no keia aie nui o'u, aole no hoi he loaa o kahi e pau ai oia aie na o'u ia Ioane."
A lohe ka Pauku Nui no na olelo a ka Moi, i aku la oia, "E ka Moi Nui a maikai hoi, aole o'u manao e aie ana oe ia Ioane, ina e lohe ana oe i ka olelo a ka Loio."
A lohe ka Moi no keia huaolelo, kena koke ae la oia i kona Ilamuku Nui e kii i ka Loi. Ia manawa, kii koke ia aku la ka Loio Sebarino.
A hiki mai la ka Loio ma ka Hale Alii, imua hoi o ka Moi. Ninau aku la hoi ua Loio nei, "E ka Moi, ua hoounaia ae nei au e hele mamuli o kau kauoha, nolaila, ina he pilikia e hai mai, ina no hoi aohe pilikia, e hai mai no i keia wa."
A lohe ka Moi no keia mau huaolelo ninau a ka Loio, pane mai la oia me ka leo kaumaha, i ka i ana, "Ua pilikia wau, ua haulehia hoi iloko o ka aie nui i ka Luna kuai mea ai o ka Hale Alii nei; a he mau la loihi no hoi ko'u o ka noonoo nui ana i wahi e pau ai o ia aie o'u ia Ioane, aole nae i loaa. A no ia loaa ole ana, haule iho la wau i ka haalulu, a loaa mai nei au ia ia nei e moe a make ana malalo o keia papakaukau, kahi hoi aole i ae ia no'u e moe ai."
A pau ae la ka olelo ana a ka Moi, alaila, pane aku la ua Loio nei, me ka leo nahenahe, "Aole ou aie." A lohe ka Moi i keia wahi leo uuku wale no o ka Moi i keia wahi leo uuku wale no o ka Loio i pane aku ai "aole ou aie." Alaila, huli pono mai la ua Moi nei a ninau mai la i ka Loio Sebarino, "Pehea i makaukau koke ai oe i ka hoole mai, "aole o'u aie?" I aku la hoi ka Loio, "Apopo a ahiahi, e hele hou mai au ianei, a ia wa au e hai aku ai i ka mea pono ia oe ke hana, i ike ai hoi oe aohe ou aie." Ua maikai iho la ia mau huaolelo i ko ka Moi manao, a hoopau ae la i ko laua kamailio ana, a hoi aku la ka Loio Sebarina.
I ka Loio Sebarino i hoi mai ai mai ka Hale Alii mai, halawai aku la ia me Ioane ma ke alanui, oiai oia e hele ana i ke kuai mea ai no ka Hale Alii. Iloko nae o keia halawai ana o ka Ioio me Ioane, ua hoowalewale ia o Ioane e ua Loio nei, a ua hoohoka ia no hoi, me ka pau ana o ko ka Moi aie i ua wahi Ioane nei, mamuli o ka hana maalea a ka Loio.
Maanei hoi kakou e ike ai i ka hoowalewale ana a ua Loio nei ia Ioane, oiai laua i ka wa i hui ai ma ke alanui, huki ia aku la o Ioane e ua Loio nei, a komo pu aku laua iloko o kekahi hale Piliode Sloone, a hoowalewale aku la ia Ioane e inu i hookahi kiaha bia, me ka i aku, "E Ioane, he nui kuu aloha ia oe mamua ae nei, oia hoi ko wa e kiai puka ana no ka Hale Alii, aka, aole nae kaua i launa iki ia manawa, aka, ano ua hoohalawaiia mai au me oe ma ke alanui, a nolaila, ke olioli nui nei au ia oe, a e inu pu hoi oe me a'u i ke kiaha bia hookahi, oiai hoi ko kaua hui ana ma ke ano hou aloha, a e lilo hoi keia hui mua ana a kaua, i mea ai ka kaua mau mamo e hoomanao ai, a i Helu 1 no hoi no ko kaua launa ana."
A pau ae la ka ka Loio mau olelo pahele, aka, ua lilo nae ia he mea maikai I ko Ioane manao kuhihewa, nolaila, hoopuka ae la oia i kana mau huaolelo i ka i ana aku, "E Sebarino, o ko'u uku makahiki a pau, aia no ia i ko ka Moi Kakauolelo luna, ka Puuku Nui hoi o ka Hale Alii, nana no hoi e haawi mai i ko'u uku makahiki, nolaila, ke hopohopo nei ko'u naau, a ke lelele nei hoi ko'u oili, me kuu manao no hoi, aole no paha e ae mai ana ka Pakipa o keia Hale inu rama e hoaie mai ia'u e inu pu kaua i ke kiaha bia, a ka la apopo, e hele mai no au e hookaa no keia inu ana o kaua."
A lohe ka Loio Sebarino no keia mau huaolelo a Ioane, a me ka loli ana hoi o kona manao, nolaila, pane mai la oia ia Ioane, "E Ioane, he mau hapaumi no ka'u elua ma kuu bakeke i keia wa, a ua lawa ia no kaua i keia manawa, a ua nui ia no keia mau kiaha bia o kaua."
Ia wa, panee ia mai la na kiaha o laua nei, a ninini iho la laua nei a hoaleale na kiaha no ka piha loa, a inu ae la hoi laua me ka olioli.
A pau ka laua inu ana, puka aku la o Ioane iwaho o ka hale, a hele aku la me ka manao e kuai i na mea ai no ka Hale Alii, aka, ia ia nae i hala aku ai ma kekahi alanui, wikiwiki koke ae la o Sebarino ma kekahi alanui e ae, a hooea mai la mamua pono mai o ia nei, aka, e ko ana hoi kekahi Hale inu rama malaila. Pane aku la o Ioane ia Sebarino, "Haalele aku nei no hoi au i ka hale no, eia mai nei ka hoi mamua nei." Ae mai la no hoi o Sebarino, me ka i mai, "Komo hou mai kaua e inu ela." I aku la hoi o Ioane, "Ua pau kau hoohainu ana ia'u, a o ka'u wale no hoi koe, a ke hilahila nei nae au ia oe i keia wa, no ka mea, aohe he hapaha ma ko'u pakeke, e hiki ai hoi ke uku aku no na kia ela o kaua."
Pane mai la hoi ka Lono, "he mau hapawalu no elua ma ko'u pakeke, a ua lawa ia no na kiaha ela o kaua e inu ai I keia manawa."
A lohe o Ioane no keia mau olelo a Sebarino, komo aku la oia iloko o ka hale, a ninini iho la i kona kiaha a piha loa, a inu ae laua me ka olioli.
Pau ae la ka laua inu ana, puka aku la o Ioane iwaho, a hele aku la ma kekahi alanui, aka, wikiwiki hou ae la o Sebarino ma kekahi alanui e, a hoea hou mai la no mamua o Ioane. I hou aku la o Ioane, "He mea kupanaha no hoi ia oe, ia'u no i haalele aku ai ia oe maloko o ka hale bia a kaua i inu ai, aia nae oe e hoea pono mai ana mamua mai o'u, a pela no i keia hoea ana mai nei o'u, eia hou no ka oe mamua nei." Ae mai la no hoi o Sebarino, me ka i mai, "No kuu aloha no hoi paha ia oe, nolaila, alualu mai nei no wau ia oe e inu barani kaua."
Olelo hou aku la o Ioane ia Sebarino, me ka i aku no hoi, "E Sebarino, ua lohe mua no oe i ka'u mau huaolelo, aohe he hapaumi ma ko'u bakeke no'u ponoi iho, aka, he mea kuai mea ai wale no no ka Hale Alii, nolaila, inu he mea oluolu ia oe, e noho oe maanei, a hiki hou mai au mai ke kuai mea ai mai no ka Hale Alii, anoai o koe mai kekahi wahi hapawalu ma kuu kuai ana aku i ka mea ai no ka Hale Alii, a oia wahi koena paha ka kaua e inu ai." "Ae" wahi a ua Loio nei.
Hele aku la o Ioane ma ka Hale Makeke, a kuai aku la i ka mea ai o na ano maikai loa a pau no na dala he kanalima, a ko e mai la hookahi dal ama kona pakeke, a hoi aku la keia a halawai hou me Sebarino. (Aole i pau.)
- Ma Amerika Hema, ua ike ia ka nunui loa o na lanalana, a no ka ikaika loa o ka lakou mau punawelewele, ua hai ia mai, ua paa na manu liilii ia lakou, a ua pau ke koko i ka ai ia e lakou.