Ka Nupepa Kuokoa, Volume V, Number 41, 13 October 1866 — Page 2

Ka Nupepa Kuokoa.

i ke koa. Aole no hoi i emo, ua kohu pono loa oia e lawelawe ma ia oihana.
            He hiaai anei ko oukou e lohe? - i ua wa keiki la ona, ua kaulana oia no kona ike mau ia me kona mau kahiko-haaheo o ka poe koa, e paa mau ana kona mau kamaa buti me ke sepa, aohe nae hoi ona puhi mau i ke kika e like me ka nui o na keiki o ia kulana.
            He keiki ui loa oia, he haku mele lea, a he puukani ma na mea himeni; lilo ae la oia i mea na ka lehulehu e mahalo ai, a i mea aloha no hoi na na kaikamahine opiopio, aka, hookahi mea i oi ae kona aloha iaia, - ua hao ae no hoi keia iaia nei a paihi, ma ka hoinainau ana me Elene, ke kaikamahine a ke alii Alabani; ua i ia hoi keia iwa, he oi oia o ka nani, ua eo mua ia ia Matai, aka, mali paa ole ia paha e ua Matai nei i lilo ai i ka lima o ke kanaka e, a mare ai me kekahi Kenela (Colonel) o loko o Sinigaglia. O ke kumu nae o keia mare ana, no ko laua launa ana ma ka hale o ka makuakane o ua ui nei ma ke ano ipo.
          Ua lilo keia moewaa nui i mea ehaeha loa no Giana opio, (Pio I X.) nolaila, lilo iho la oia i ka ulaia, i mea e na ai kona ehaeha, no kana ipo aloha; inu nui iho la oia a ona, a lealea nui a me na hana uhauha e ae.
          Iloko o keia manawa i pio ai ko Napoliana I. mana, a hoihoi hou ia o Pius VIII i Roma, (ka Pope a Napoliona i lawe ai i Farani.) A hoi hou ae la na hana o kela ano keia ano e like me ka wa mamua e noho alii ana ka Pope.
          O Matai hoi, oiai oia e ulaia nei, hoouna pu ia aku la oia i Roma e noho ai me kekahi mau makuakane ona; ua manaoia no nae, i hoouna ia oia ilaila e lawelawe ai ma ka oihana kahuna.
          I kona hiki ana i Roma, hoomaka iho la oia e hana me ka uku haahaa loa, he $15 no ka mahina, aka hoi, o ka waipahe o kana mau hana, a me ka nani o kona kino, ka mea nana i hoolilo ae ia ia iho, kekahi o na oi hiehie opiopio o ke kulanakauhale o Roma, a he malihini hoi i manao nui ia ma na hale alii o na alii hanohano o ua kulanakauhale la.
          He kanaka pepa laki oia ma na aha pepa, a ua lawa kupono kona noho ana ma na pulu i eo mai ai iaia.
          I ka iwakaluakumamaha o kona mau makahiki, ua hooliloia oia i kahuna haiolelo. A ma ia hope mai, ua hoounaia oia i Kili, a i kona hoi hou ana i Europa, ua koho ia oia i Akibihopa no Sepoleto. Aole i liuliu, hoonee ia ae oia mai Sepoleto ae a Imola, ma ka inoa Cadinale a Bihopa hoi no Imola.
          Ia Ma tai i noho ai ma keia wahi, ua haule ia mai la maluna ona na kilihuna halialia o ka Abbess, (Abese, he luna wahine o na wahine nunere) o Fogenano, a me ke alii wahine o Sepauro (Countess of Spaur). He nui na mana i haiia mai no ko Matai aloha i keia wahine hope. He mea maopopo lea no, ua lanakila na lima lauahi o ke Kaunatese o Sepauro maluna o Matai Pio IX. Oiai, i ka wa i lilo ae ai o Matai i Pope, hoopuka ae no o Cadinale Anetoneli i kekahi o kana mau mea i manao mua ai e hookuke aku i ua wahine hoohihia nei mai Roma aku.
          Na Pius VII i haawi i ka inoa Pio ia ia. Kohoia hoi i Pope i ka la 16 o Iune 1846, a he iwakalua makahiki o kona noho ana i keia Iune i hala iho nei.
          Mai ka hapa mua mai o kona mau makahiki a hiki wale i kona lilo ana i Pope, aole i hemolele iki oia. Pela ka mea i hoikeia mai ma kekahi o kona mau moolelo. Owau no o G. WILLIE.

Make i alohaia.

            Ma ka la 22 o keia mahina, ua make o Kumuhea, ma Nuhelewai, Kapalama, ma ka pa o Mr. Hoonaulu. O kona wahi noho mau, ma Waikiki waena, aka hoi, o kona one hanau ma Puna i Hawaii. He kanaka hoahanau oia no ka aoao Pulikano, aole no hoi paha i ikeia ke ano e ae o keia kanaka, mai kona wa i komo ai i ka Ekalesia a hiki wale i kona wa i maneleia 'ku la e na lima koko o ka make. He kanaka ua oo a he oluolu kona ano i ka nana 'ku. Ke noho nei kona kokoolua me ka paumako, me ke kumakena i ke aloha i ke kane i ka hoa pili o ke kino. Ua hala aku la kela i ka aoao mau o ka honua, ua waiho mai oia i ke kaumaha i kana wahine, a me makou me na keiki, a ke noho pilihua nei makou me ka manaonao i ke aloha Ke hoomanao nei au i kekahi olelo o ka Baibala, penei. "A hala ka huina o kona mau la, alaila, e hele aku no ia i ke ala aole hoi hoi hou mai." "Pomaikai ka poe make, ke make iloko o ka Haku."
Wiliama Hoonaulu.

Ka Nupepa Kuokoa.
HONOLULU, OKATOBA 13, 1866.
Ka loaa ana o ka Waea Telega rapa i moku ai i ka makahiki 1865.

            Ia kakou e noho nanea ana maluna o keia mau wahi pukoa e ku kilakila nei mawaena o keia moana Pakipika nei, me ka ike ole i na mea nui naauao e hana ia ana ma na Aina nui o ke ao nei, aia hoi, ma ka makahiki 1865, ua hoomoe ia he waea Telegarapa ma ka moana Atelanika, mamuli o ka noonoo noiau ana a kekahi kanaka nona ka inoa Cyrus W. Field.
          Aole na keia kanaka i imi mua i keia mea he waea Telega rapa, aka, na kekahi kanaka Amerika no o Professor J. S. Morse kona inoa, aka hoi, aole ia i hoomoe i ka waea maloko o ka moana kai lipolipo e like me keia eu a kakou e lohe nei. Ma ka aina wale no ka nui o na mea Telegarapa, mahope iho o ka loaa ana ia Morse, a i keia hoi malalo o na ale kaiehu o ka moana Atelanika.
          Penei ka hana mua ana: Ua hookuikui mua ia no ka w aea a ku ka paila, a hoouka ia ma ka moku Hikina Nui. O kekahi piko, ua hoopae ia i uka o Irelani, a holo aku la ka moku i Amerika me ka hookuukuu ana i ua uwaea nui la. Aka i ka hala ana i waena moana, moku ae la ka waea a poho iho la ka manaolana e hiki i Amerika. Uwe waimaka iho la o C. W. Field, a naoa ae la kana ai, aka aole no nae i pau kona manao e hana a ko ka mea a kona lolo i lia nui ai.
          Mahope mai o kona kanahai iki ana ae, ua noonoo nui oia i ka mea e holo ai kana hana, a i mea hoi e hoohoka ole ia mai ai. A ma ka malama iho nei o Iulai o keia makahiki no, mamuli o ke kokua ana mai a kekahi Hui Telegaraba ia ia, ua hoomoe hou ia ka waea Telegarapa a kakou e lohe nei, ua hiki pono i Amerika, a ke holo nei na hua olelo i Amerika a i Europa i loko o ka imo ana a ka maka, a i loko hoi o na sekona pokole loa.
          I ka hiki ana o keia waea hou mai nei i Amerika, ua kupu hou ka manao e holo hou e imi i ka waea i moku mua ai. I ke kau hou ana maluna o ka moku Hikina Nui a holo hou aku e imi, aia hoi o ka mouo i hoailona ia ai i ka wa i moku ai, ua moku a ua nalowale paha, aohe i loaa aku ia lakou. Me ka noonoo noiau a me ke akamai lua ole, ua hookuukuu ia ke kaula elua mile ka loihi me na hao manamana me he mau makau la, i lalo i ka moana, a o ka hohonu no ia o ke kai. I kuu wale ia iho no keia mau hao manamana, me ka pihoihoi o loaa ole ka waea, aka, i ka huki ana ae o ka mekini, ua haohao lakou i ke koikoi. I ka hoomau ana i ka huki a hiki i luna o ka ili kai, lohe koke no lakou i na olelo mai Irelani mai. I ka hiki ana ae i luna o ka moku, ua hoouna koke ia aku ka lohe i Irelani, ua loaa ka waea i moku mua ai ma ka la 2 Sepat.
          I ka lohe ana o ko Irelani poe, ua loaa ka waea i moku mua ai, ua hoouna ae lakou i Amerika maloko o ka waea Telegarapa hou, i ka lono e hai ana, ua loaa ka waea ma ka la 2 o Sepatemaba. Ua po ia la i ka hookui ana a me ka hoomakaukau ana, a i kekahi la ae, ua hoomaka ka hoolei ia ana o ka waea. Aole ma ka piko i moku ai ka loaa ana o ka waea i na hao manamana, aka mawaena iki mai. O ka loihi mai na kapakahakai aku o Amerika a hiki i kahi i loaa ai, kokoke ehiku haneri mile. Ua hiki aku ka moku Hikina Nui i Nu Founalani me kana ukana nui ma ka la 7 o Sepatemaba.
          I ka hiki pono ana aku nei o keia waea i Amerika, loaa iho la alua mau waea Telegarapa e holokea la malalo o kela moana Atelanika nui, a o ka lua ia o na moana nui ma keia ao holookoa. O ka loihi mai Irelani mai a hiki i Nu Founalani he 1866 mile ka loihi o ka waea, ua like no me na huahelu o keia makahiki a kakou e noho nei.
          O ka holo pono ana o ka hana o keia mau waea Teregarapa elua i loko o keia mau makahiki, nolaila ua lilo keia makahiki i makahiki ano nui a kupanaha ma na moolelo a pau o ke ao nei. A e pono e hoopaa ia ma kela moolelo pakahi keia moolelo pakahi o kela Aupuni keia Aupuni, o "ka makahiki 1866 ka makahiki ano kupanaha o ke ao nei."
          Heaha ka manao o keia kanaka i hoohui ai i ka Aina puni ole Hikina a me ka Aina puni ole Komohana e kamailio kekahi me kekahi i loko o na sekona pokole loa, i oi aku ke kaawale o kekahi aina i kekahi mamua o ka 1800 mile? O ka haawina iho la no ia a ke Akua i haawi mai ai i keia kanaka i mea e kaulana ai kona inoa, a i mea hoi e mahalo mau ia ai i kela hanauna keia keia hanauna mahope iho ona. O keia hana oi kelakela a kela haole Amerika ka "Nani o ke au a me na lahui."

            HE MAKANA MAIKAI: - Ua haawi mai ko Kamoiliili poe HOOKAHI HANERI ME IWAKALUA DALA no ka Ogana hou o Kawaiahao. Ua mahaloia ko lakou lokomaikai.
H. H. PA REKA.

KOKUA MAHINA HOU MA KANEOHE. - Ua pii ae ke kokua aupuni o ke Akua ma ka Ekalesia o Kaneohe i keia mahina o Okatoba nei. He $58.50 ka huina o ke dala i haawi ia.

He kanaenae Aloha.
- no -
Charles Hammett Davis.

            Ma ka wanaao o ka la Sa bati i hala iho nei, ua make aku o Charles Hammett Davis ke keiki hanau muli a ka Mea Hanohano R. G. Davis, (Lopaka) Lunakanawai o ka Aha Kiekie, a ua hoi aku oia i ko ke ao nei aoao mau - i ke alanui a kamahele e hele ai me ka hoi ole mai. Aole keia he mea hou ia kakou, o ka lilo ana i poe e noho u a e kumakena hoi no ko kakou mau makamaka i hele i ua ala la mamua o kakou a, iloko no nae oia mau mai o kakou i ka ike ia mea, ua mau no ke kauoia ana o ko kakou mau puuwai me na manao aloha, a me na manao mokumokuahua no na makamaka o kakou i lilo e aku i ka make, a pela hoi i nohoia mai ko makou puuwai e na ao poluluhi o ka noho kumakena ana, i ka apo ia ana mai o ka mea nona keia kanaenae a loha, i na lima menemene ole-ana ole o ka make. No ka mea ua apo ia oia mai keia ao aku, iloko no o ke kau kakahiaka o kona ola ana, a ua kaili ia aku hoi mai ke alo aku o kona mau makua, kona mau hoahanau, a me kona mau hoa kaana o ua aina aloha nei. Ke u mao ole nei ka makuakane no kana keiki aloha, ka makuahine no kana kamalei, ke kaikuaana no kona kaikaina, na kaikuahine no ko laua kaikunane aloha, a o na hoa kaana hoi, no ko lakou hoa aloha maikai.
          O ka waimapuna o ke aloha ua hoohanini mai i kana ukana o ka waimaka, a ke hoohaaloku nei i ka manawa o kona mau kini. No ka mea, he keiki oia i aloha nui ia e kona mau makua, a me kona mau kini, a me na poe no a pau i launa meia. Aole kekahi mea i ike, a i launa me ia, i komo ole ia e ke aloha a me ka mahalo aku nona. He keiki oia ilawa i na haawina maikai a pau. He keiki aloha makua, aloha hoahanau, hoopono, akahai, lokomaikai, mikioi, a naauao hoi, ua aloha nui ia oia e kana mau kumuao, o na kula ana i hele ai, oia hoi ke kula ma Mililani, pau ia ma ke kula Alii ma Kahehuna, a pau ia hoi i ke kulanui o Kapunahou a no kona maikai, nolaila, ua, nui ke aloha ia e kona mau hoa imi naauao, ma ia mau kula, a ina la paha e hooloihiia mai kona noho ana me kakou, ina la ua lilo oia kekahi e ku ma ka papa mua o na keiki akamai o Hawaii nei, a lilo la oia kekahi mea nana e alako i kona one hanau iluna i ka pane poo o ka hanohano, me ke kaao ana ia Hawaii imua ma kana mau hana maikai a me kana mau hana naauao. A ua hooikaika nui kona makuakane aloha keiki i ka hooholo ana iaia imua ma ka moana hiwahiwa lipolipo o ka naauao. Aole makou i aloha, a i kumakena nona, mamuli o kona ano hoaloha wale ana no a makamaka no makou, aka, ua kono pu ia makou, e ka manao aloha alii, aloha aina, a makamae i na poe opiopio o ke au e hele nei, e puapuai e mai ana na hiohiona o ka maikai, a me ka naauao, e like me ka mea nona keia kanaenae aloha, a ua manao lana ae hoi ka mea nana e kakau nei keia mau wahi mamala olelo, e ola ana la oia a hiki i ke kanaka makua ana, alaila la hoike mai iaia iho o kekahi o na hoku o keia pae moku. Aka, wahi a ka olelo. "O ka ke kanaka ka hoomakaukau, na ke Akua ka hooko ana." Pili pono no; keia mea, no ka mea, ua kuko e ka naau, a ua hoonohonoho e i na mea e hana aku ai, aka, hiki e mai la ko elele a lawe aku la i kana, me ka hookaupa mai ia kakou, ma na mea a kakou i hilinai ai ma o kakou iho la. Oia nae hoi e like me na mala pua o keia ao, o na pua makamae wale no kai ako mua ia, me he mea la pela ka akoii ana aku nei o keia keiki maikai, mai waena aku o ka poli aloha o kona mau makua, a me na pilikana. Me e no nae ka nui o ke aloha, a no ka minamina no kona hala ana aku la.
          Aole hoi no ke keiki wale no i hala e aku la ke aloha, aka, ke ehaeha pu nei makou me ke aloha menemene no ka makuakane aloha keiki, e noho u nei me ke aloha. Ua komo e ia makou ke aloha, he poe pili ole i ka mea make, ma ke koko, aka, ma ke ano hoaloha wale no. A nolaila, pehea la e hiki ai ia kakou ke ana a ke ike hoi i ka hohonu, a me ka minamina loa o kona makuakane nona? Oiai, o ua kama 'la i hele aku la, he hoa pili mau oia no kona makuakane, mai na kai ewalu, a me na makani eha, he hoa hele o na alanui o keia kulanakauhale, a me na wahi e ae no, aole no paha e nele ana ke ano, a me ka lapa mai o ia mau mea i ka naau o kona makuakane, a pela hoi kona kaikuaana, a me kona mau kaikuahine, a ia me ka makuakane a me na pilikana a pau o ka mea make, ko makou mau aloha kuhohonu, me ka paumako i ke aloha pau ole. Aka, e hooluolu nae kakou ia kakou iho ma ka manao ana ae.
"Ua haawi mai ka Haku,
A ua lawe aku ka Haku,
E hoomaikai ia ka Haku."
W. P. R.

            GENEBALA MCCOOK: - Maluna o na eemoku i holo aku nei maluna o Kilauea i ka Poakahi iho nei, ua ike aku makou o ka Mea Hanohano Gen. McCook kekahi i holo aku i Maui. Iholo aku nei paha oia e ukali wale aku i kana wahine e noho mai la i ka uka iuiu o Ulupalakua. Ke lana nei ka manao e hoohui pomaikai pu ia laua a elua me kana Leke Hanohano.

NU HOU KULOKO.

            HE PAIKAU NA KA POE KOA PERUSIA. - I nehinei ua lele mai na koa o ka mokuahi kaua Perusia mauka nei e paikau ai.

          AHAKUKAMALU: - Ua komo mai ka Moi ma kona Hale Alii i Poakolu iho nei, a ua weheia kona Ahakukamalu. Elua a kokoke paha i ke kolu na hora o ka noho ana o na lala. I ka pau ana no, ua hoi aku ka Moi i kona Home noho ma Waikiki.

            NA A GENA O KA HUI MOKUAHI O KA PAKIPIKA: - Ma kekahi mau nupepa o ko kakou uei kulanakauhale, ua ike iho makou, ua hooliloia iho nei o Walker, Allen & Co., i mau Agena no ke awa o Honolulu nei, no ka Hui Hooholo Mokuahi o ko Pakipika nei.

            HE MOKU PAKE: - Ma ka Poaono iho nei, ua ku mai kekahi moku kalepa mai Kina mai, a maluna mai ona, he mau pake he kinikini wale, e lawe ia ana paha i Kaleponi. E lawe ia ana la i hea? Na kahi a lakou e hoolele ia aku ai e ike mai ia lakou heahea mai.

          NUI MAI NEI NA MEA AIHUE: - Me he mea la e nui loa mai ana na aihue ma ko kakou nei kaona. Ma ka Poalua iho nei, ua lawe malu ia aku, he lio me ka noho ma ke ano kolohe. Ma ka huina Alanui o Nuuanu a me Moi Wahine kahi i ku ai o ka lio, a ua komo ka ona i ka paikau, aka ua lawe ia aku ka noho. O J. W. Kale ka mea i hoohoka ia.

          WI IO PAHA AUANEI KA UA KANILEHUA: - Ma kahi palapala malu i loaa mai nei i kekahi o makou, mai kekahi wahi makamaka opiopio mai o ka ua Kanilehua, ua ike iho makou, e ano wi ana o Hilo, a penei kana: "O ka nu hou no o Hilo nei, o ka wi. Na Waipio e hanai nei o Hilo."

          HE KEU KA HOI A KA UA. - I na kapakai e wale ae no ka hoi ka ua, noho no o Houolulu i ke poo la. Nawai ole ulu no o na mea kanu o Kona a me Kau i ka ka mea o ka ua o kela auina la keia auina la. He palapala kai loaa mai nei ia makou, e hai ana no ka hoopulu mau ia o kela mau aina e ka ua i keia kau a kakou e noho nei i ka nokunoku a ka wela.

          HE KANAKA HOOPONO: - Ma ka Poakolu o ka pule i hala aku nei, ua haule he wati gula na Mekia C. H. Kauka ma ke awawa o Nuuanu. I kekali la ae, ua lawe mai ua kanaka ma ka hale kuai Buke o Wini, me ka manao e hoolaha, aka ua hai ia aku na Kale Kauka ka waki. Ua hoihoi aku ia i ka wati, a i ka loaa ana o ka mea nana ka wati, ua haawi ia mai elima dala no kona hoihoi pono ana aku.

          NO KA AHAHUI KAAHUMANU: - Ua hai makou i kela pule aku nei, ua hoopau ia ka Ahahui Kaahumanu a o ke koena dala ua haawi manawalea ia aku i ka Hale mai Moi Wahine. Penei ka makou lohe hope mai nei, ua hoihoi ia no na dala a ka poe katolika, a o ke koena dala iho i koe, ua haawi ia he hapalua oia puu dala no ka hale mai Mai Wahine; a o kekahi hapalua, ua haawi lokomakei ia aku no ke kuai ana i ka Ogana no ka halepule o Kawaiahao. A mahope e hoopuka makou he moolelo no ia Ahahui.

          HE WAHI KUNA HOU: - Ma ka Poalima iho nei, ua kuai ia ma ke kudala he wahi kuna hou mai nei nona ka inoa Indian Maid makai o Ainahou, a ua lilo ia William Harbottle no na dala he 1470. Ua lohe mai nei makou, ua lawe ia ae ma ka uapo o ka poe kapili moku, a e nana ia ana na wahi hemahema o ua wahi kuna la. Ina e mau ana no ka maikai, alailo e hooholo ia ana i keia wa koke aku no a e lilo i wahi kuna holoholo ma na kai e walu o Hawaii nei. Ke paa pu loa mai nei na kuna o ko kakou nei wahi aupuni.

          HE WAHINE HAWAII I KINA AKU NEI: - Ma ke ku ana mai o kekahi moku kalepa mai Kina mai i ka Poaono aku nei, ua ike iho makou, he wahi wahine Hawaii maluna, mai ona. I Kina aku nei ua wahine nei me kona kane, i hele aku nei i ka maikaikai, a e hoikeike hoi ia ia iho i ka aina o ke kane. Ua nui ka poe makaikai mai ia ia i ko laua hiki ana ma Honokaona, oiai he nu hou ka ike ia ana o ka wahine Hawaii ma ia Kaialu. Nani wale ka ike ana o ia wahine Hawaii i ka "aina pua" o kana kane. Namu mai paha ka lahui namu kawalawala o kana kane, noho aku keia i ka muku. O ka inoa o keia wahine Hawaii hele makaikai o Wailaahia.

            MAEWAEWA NO HOI KA HANA A KE AHI: -Ma ka auina la o ka la Sabati i hala ae nei oia ka la 7 o keia mahina ma ka hora 5, ke apu ana mai a ka ula menemene ole o ke ahi i ka hale wili ko o Mr. C. C. Harris (Hailaki) ma Kaneohe, a na pau na lako hana-o loko i ka ai ia e ka ahi, koe na mea hao; a i ka puehu ana ka o ke ahi ua lele aku ka huna ahi a aa ia kekahi mau ko e ulu ana. He 35 tona ko i makaukau e lawe ia ma na ka moku, ua pau loa ia i ke ahi. A i ka manao ana o kekahi poe i hoomaopopo i na mea i pau me he mea la ua hiki ke poho i ka 20,000 dala. Weliweli no hoi na hana a ke ahi ke hana mai, koe wahi opala ole iho ke hao mai. Nolaila e pono e malama loa ia ke ahi, i ole e poino. A laa ka pilikia a ua ahi.

            LOAA KA OIHANA: - Ia Kauka Huki Niho (Dr. J. M. Smith), ua hookuhu ia i Luna no ka Hale Pai Aupuni.

          HOEHOE WAAPA. - Ma ke ahiahi Poalua iho nei, ua ike iho makou i ka Puuku, Mekia a me na Lutanela a o na koa ponoi o ka Moi e hoehoe Waapa ana. He hooikaika kino paha i pau ka mauluulu.

          HE WAAPA AOLO WAI: - ma ka Poaono iho nei, ua hoolana ia i loko o ke kai he waapa halihali wai hou no Kapena Gellet. Na Foster & Co., i kapili iho nei a paa; a e hiki ana iaia ke lawe mai 85 a me 90 mau pahu. Ua kapili puni loa ia o lalo o keia waapa halihali wai no na moku, a e loaa ana no kahi ola maia hana.

          KA HOOMAEMAE ANA I KEKAHI MAU HALE O KA PA ALII: - Ke hoomaemae hou ia nei kekahi mau hale o loko o ka Pa Alii o kakou, oia hoi o ka hale i kapaia o Ihikapukalani a me ka hale Hoihoikeea, malalo o ka hooponopono ana a ka Puuku o ka Moi. Ua oluolu makou i ko makou launa oluolu ana me ia a me kana mau olelo hoinaunau pu me makou.

          AIHUE MA KAHI O J. MO TH SMITH. - Ma ka la 29 o Sepatemaba, ua komo aihue ia ka hale noho o J. M. Kamika e kekahi kanaka aihue, a ua lawe ia aku ke kuka a me ke kaula wati. No hea la hoi nei aihue e hookau mai nei ka weli e o nae o loaa iho kole ke poo i ka pahi umiumi.

          KA HIHIA MAWAENA O GEO. DA VIS KUE I NA KOMISINA AINA MOI. - Ua lohe mai nei makou i ka wa e hoike ia ana na hoike o ka aoao o na Komisina Aina Moi, ke hookolokolo la no ua hihia la. Ua hele nae ka Lunakanawai kaapuni me ke a-na aina e kaapuni ia Waikoloa, oia ka aina e hoopaapaa ia nei a na ana ia. He nui loa na hoike, aohe paha kakou e lohe koke.

          HOI MAI I KE KAONA NEI: - I kekahi la o kela pule aku nei, ua holo aku ka Lede Honolulu Mrs. Pauahi Bihopa i na Pali Koolau, a ma Heeia kona wahi i luana ai, a ma kekahi la o keia pule, ua hoi mai oia, a ke noho lai nei malalo o ko laua hale nani Haleakala. He oluolu maikai no kona kino, a i hoi mai nei hoi paha kekahi e apo lokahi aku me na manao aloha i ka Moi Wahine kanemake e hoi mai nei.

          KA LUNAKANAWAI KIEKIE E. H. ALAN:I - ma ka Poaono aku nei, ua hoi mai ka mea Hanohano ka Lunakanawai Kiekie o ke Aupuni maluna mai o ke kuna Alberni. Ma Kawaihae kona kau ana mai. I ko makou ike aku iaia aole i like me ka mea i hoike ia iho nei ma na Nupepa ua omaimai oia. Maluna pu mai no hoi o ia moku i hoi mai ai ka Hope Loio Kuhina, a me ko makou wahi Luna Hale nana e hoonohonoho, oia hoi o Mr. Zublin. Ua hele wale, a eaea kai, i ka noke ia mai paha e na ehu kai o Alenuihaha.

          HOIKE KULA MA WAIALUA: - Ua loaa mai ia makou kekahi palapala mai kekahi makamaka mai o makou e noho mai la i Waialua, e hai ana, e hoike ia ana ke kula Beritania o Waialua maloko o ka luakini malaila, ma ka hora 9 o ke kakahiaka, o ka la 14 o Okatoba, ua makemakeia na makua mea keiki, na hoa aloha a me ka poe a pau e makemake ana e lohe i ka pakake a na keiki Hawaii, e hele ae e ike maka no oukou iho o lohe pepeiao auanei.

          NO KE KOPE AWA: - Ke hoomaka hou nei o Kaulu, i kana hana i ke kope hou ana i ke awa o Honolulu nei, ma kahi i koe iho ai i ka hana mua ana ai. A ke lana nei ko makou manao, e maikai loa ana ke awa ku moku.
          He mau makahiki loihi ka waiho wale ana iho nei, o keia kao kope awa, a ma ka halawai ana iho nei o ke kau Ahaolelo o keia makahiki, ua hookaawale ia he puu dala no ka eli hou ana i ke awa o Honolulu nei. A me he mea la, oia ka mea e hana hou mai nei ia kao i kana hana o ke kaiehu-ku.

          HE MAU PILI KINO: - Ma ka liula o ka Poaono iho nei, i ka wa a ka la e kokoke aku ana e napoo i ka ili kai, ua lawe aku ke Kometa, Comodoa Pete, i kekahi mau haole i maa i ka maalo mau ana imua o ko makou mau maka, oia hoi ke Kanikela mua iho nei o Farani ma ke alo Alii o Honolulu nei, a me Henere Makafalena. O ka mua he mau makahiki kona i noho iho nei ma Hawaii nei ma ke ano Kanikela a Komikina no ke Aupuni o Farani. O ka hope hoi, he wahi keiki kamaaina ia Hawaii nei, i hanau ia a i noho hoi a ewe i ke one o Kakuhihewa. He wahi keiki i noho loihi me H. M. Wini ma ke ano kuai buke a huli mau hunahuna no ka nupepa haole a Wini. Ua maa oia i ka ike a no makou mau maka, a aole no hoi e hiki ia makou ke hoopoina i kona mau helehelena. Ma ka po Poalima kona haawi ana he wahi paina po, - i hoakoakoaia e na maka opiopio i launa mau me ia. O ka halawai, a luana hope ana no a holo wale aku la. E noho ana oia ma Kapalakiko he makahiki a oi ae paha, a i manao mai ia hope nei hoi mai, a i ole no noho loa aku no. Mai hoopoina i ke awawa uliuli o Nuuanu, a me na ea kolonahe o ka pali o Nuuanu. E aloha auanei e ka hoa opiopio.

          KA HUILA O KA MOKU THAMES. - Ma ka Poaono iho nei, ua hooheehee ia he puu keleawe maloko, a ua hana ia malalo o ka lepo ke kii o ka huila o ka moku Thames. I ka ninini ia ana a piha, ua waiho ia iho a liuliu, i ka hele ana aku o makou e nana, ua kulike e like me ka mea i makemake ia. O ka huila mua o keia moku, ua hana ia ma Enelani, a no ka loihi o ka holoholo ana o ia mokuahi, ua hai ua huila la. A no ia hai ana, ua hoohehee hou ia iho nei i huila hou maloko o ko kakou hale hana hao. O ka huila nui paha keia i hoohehee ia ma Honolulu nei. He nui wale ae no na mea a na maka e nana ai, i hanaia wale no ma Honolulu nei.

          HE LUANA OLUOLU ANA. - I ka po Poaha iho nei, ua oluolu ka Mekia Moehonua e hookipa mai i kekahi mau alii moku ma kona Home Halaaniani, a ua luana me ia no kekahi mau hora. Eia na alii moku i hiki mai: ke Kapena, na Lutanela a me ke Kauka. O ke alakai nana i lawe ae e hoikeike o ke Kanikele Perusia oia Mr. Schaefer. O ke alii hoi nana i hoohanohano i ka hookipa ana, o ka Puuku Nui o ka Moi a me ka mea hale. Na poe i poloai ia aku, ke kapena Makini, na Lutanela o na koa ponoi o ka Moi a me kekahi poe opiopio amateur o ke kaona nei. Ua lohe mai makou i ka olelo a ka poe makaikai, ua mele ia me ke kuliu loa a ua ulumahiehie maoli ka makemake o na alii moku i ka nana aku.

          KA HOPE KIAAINA MALUNA O KA MANUWA PERUSIA: - ma ka hora 11 o ka Poalua nei, ua holo aku ka Hope Kiaaina Col. Davida Kalakaua i luna o ka mokuahi kaua Perusia. Ua ukali ia ka Hope Kiaaina e na Mekia W. L. Moehonua a me Kale H. Kauka a me ke Kapena o ka Puali Koa Hulumanu J. M. Kapena a me na Lutanela o na Koa Ponoi o ka Moi. Ua kahiko ia lakou a pau i na aahu o ko lakou mau Puali, a he ano e ae no ko ka Hope Kiaaina. O ke Kanikela Perusia kekahi i holo aku iluna o ka manuwa; e hoikeike ai ai ia lakou i na alii moku. A i ka hoi ana mai o ke Kiaaina me kona mau ukali, ua hookani ia he 13 Pu no ka hanohano o ke Kiaaina. I ka hiki ana mai i kapa nei, ua kau ke Kiaaina a me ka Mekia Kauka maluna o ke kaa lio e kakali ana, a o ka Mekia Moehonua he kaa lio e no kona.

          NO KA MANUWA PE RUSIA: - Ma ka liula o kela Poaono i hala ae nei, ua ku mai ka manuwa Perusia Vineta ma Honolulu nei, he kanakolu-kumaha la o kona holo ana mai nei mai Kaleo Peru mai, haalele oia ia wahi ma ka la 20 Sepatemaba. O ka nui o kona mau pukuniahi he 28, a o ka ikaika o kona enekinimahu, ua like me ka ikaika o na lio 400. A e holo ana oia i Kanahae, o ka nui o na kanaka a me na 'lii he 318. Ua mahalo ia no na kanaka o keia moku no ko lakou akahai maoli i ka lele ana mai mauka nei. Eia mai na inoa o na 'lii;
Kuhn, - ke Kapena.
Donner, - ka Malamamoku nui.
Rodenacher, Von Kall, Dittmar, - na Lukanela.
Valois, Geogi, Von Reiche, - na Hope Lukanela.
Sa ck - ka Lukanela o na koa.
Dr. Metrner - ke Kauka lapaau.
Dr. Re ger - ka Hope Kauka lapaau.
Wald - ka Puuku.
          Eia nae ka mea lea ia uka nei, ma keia la i oleloia ae nei, i ka wa a ka manuwa ma o o Waialae, ua ikeia ka laau hoailona moku, e hoike ana he mokuahi, a eia ka uka nei ia wa o ke Lii wahine Ema hoi keia maluna mai o Vanderbilt, o i kau aku na maka o ka hoea mai a i ke kaalo ana mai ma keia aoao o Leahi, aia hoi ikeia aku la, aole he hae hoailona alii wahine o Hawaii nei, a i ke komo ana mai iloko o ke awa ike loa ia aku la he Perusia.

            ALOHA KA HELE HOOKAHI ANA AKU LA: - Ma ka hora 3 o ka po la Sabati iho nei Okatopa 7, ua oluolu i ke Akua Nui ma ka lani i ka lawe ana aku ia Kale H. Davis, i ke keikikane i aloha ia a Ka Mea Hanohano Robata G. Davis, kekahi Kokua Aha Kiekie. He mai loihi ko keia keiki i kaa iho nei, oia hoi he ake pau. He keiki oia i aloha nui ia e kona mau makua a me kona mau kini a pau. He hoaloha oluolu hoi no na keiki a pau i hele iho ai i ke kula wela o Kahehuna, a unuhi wale ia aku no i ke Kulanui o Punahou. He hoa hoi no ka papa kula hookahi no kekahi o makou nei ma keia hana, oiai oia a me kona kaikuana e hele ana i ke kula Alii. Mawaena o kona luana ana a me kona kamailio ana, he mau olelo oluolu wale no kana. A ma ka manawa i hai ia ae la maluna, ua haalele mai oia i kona Makuakane, kaikuana a me kona kaikuahine. Mamua ae o kona make ana, he mau olelo kana i ku wale no i ka pomaikai o kona hele ana, a o ka poe hoi i pili loa aku ia ia e noho nei, ua naauauwa lakou i ke aloha nona. Ma ke ahiahi Poalua iho nei, ua hoolewa ia kona kino kupapau, a ua ukali ia aku kana huakai hope loa e kona mau pilikana, na hoaaloha a me kona mau hoalauna a pau. Aia me ka makua i hoonele ia i ke keiki ole, ke kaikuahine i hoonele ia i ke kaikunane ole a me ke kaikuana i hoonele ia i ka pokii ole ko makou aloha paumako a me ka poe e uwe pu mai ana me makou.