Ka Nupepa Kuokoa, Volume V, Number 36, 8 September 1866 — Ko Hana, a me Kipahulu Mea Hou. [ARTICLE]

Ko Hana, a me Kipahulu Mea Hou.

NO NA AHAAINA ELUA O KA LA 31 O IULAI. Ua kukulu ae o A. Unn i ahaaina hauoli me kona poe paahana, oiai o ka la ia i hoomama ae ai ka hana ana; a no kona manao no hoi kekahi e hoomanao pu me kakou i ka la i hoihoi ia mai ai ke ea o ko kakou aupuni nei. A o ke kahua i kukulu ia ai keia ahaaina, aia ma kai o ka puu nui o Kaiwiopele. KA LUA O KA AHAAINA. Ua kukulu ae ka Hui Halekuai o Hana nei i ahaaina hoomanao no ka la 31 o Iulai. Aia maloko o ka pa hale mikanele kahi i kukulu ia ai ia ahaaina; a ua welo ae no hoi ko kakou Hae Hawaii, a i ka pau ana o ka paina ana o ua mau ahaaina la, ua muimuia e na kanaka me na lio ma na alanui; i ka nana'ku, kohu wahi kaona. A nolaila ea, mai manao mai oukou ma kahi maka'lii wale no ka hoomanao ana i ka la 31 o Iulai, aole pela, eia no ma na kuaaina nei kekahi. MAKANI IKAIKA MA KA LA 5 O AUGATE. Ua pa ikaika mai keia wahi makani mai ka Hikina Akau mai. ina ma Kipahulu e noho ai; a o ka loihi o ka pa ikaika loa ana, ua aneane iwakalua minute, a i ka wa i mao ai kona ikaika nui, ua hina eha hale nui, o ko kahi poe hale e iho hoi, ua holo-e ka pili. a ua pili nakekeke ia e waiho nei. A he wahi moku hoi kekahi i huki pu ia mai e keia makani. I holo mai keia wahi moku kiakahi i ka awa, loaa e hoi i keia makani, pae e iuka, aole nae he nui o kahi i poino, o ke kila wale no ka i hemo. A mamua aku nae hoi, o kahi makani mai nei no, a he keu aku hoi ka ikaika i ka auwina la o ua la elima nei. KAIKOO A ME KA UA. Mai na la mua mai o Augate nei a hiki i keia mau la, ke ka-mau iki nei no ke kuakea ana o na maka-lae i ke kai. O ke kaikoo ka ia la ke hai ia mai la e ka nalu i kahi a na maka i maa ole i ka ike ana aku; i ka hiki ana aku iuka, hao ia mai na opala o kulakula a ka moana. Pela no hoi ka wai-kahe o na kahawai, ua piha pono i ka wai a ka ua; a ua hao ia aku na opalaino, na piha-a olokoa a me na mea hoopiha kahawai e ae. A. P. KUINAU. Augate 10, 1866.